☆KA BEISEINA☆ - 25 By Dingdi Pachuau

☆KA BEISEINA☆ - 25 By Dingdi Pachuau

Kan chhûngkaw dinhmun zawng zawng hre vektu a ni, thawk chhuak tam lo mah ila pawisa thawk chhuaktu ber ka ni a, tlêm tlêmin ka nu leh ka nauin an lo thawk chhuak ve bawk a, kan chhûngkuaa ka dinhmun pawimawh vezia leh pasal nei daih thei ka nih rih lohzia thlenga hre vektu a ni, a hre chiang lutuk tlat; mahse, chuti chung chung pawh chuan 'Hlawhchham tùr tal pawha palai rawn tirh' a duh tlat si a, engtin nge ka tih ang? Ka rilru a buai, hlawhchham tùr tih hriat saa rawn kal tùr chuan ka khawngaih a ni, pasal nei thei tùrin sum lamah eng mah khâwl ka la nei bawk si lo; mahse, chuti chung chung pawh chuan han hnial chu ka khawngaih bawk si, tunah hian tuilairapin ka awm mêk a ni.

Mipa a ni a, 'Hlawhchham tùr tal pawha palai rawn tirh' sawi kha a ni bawk a, a thil sawi chu a rawn bawh zui nghâl chat mai, Zirtàwpni zànah palai hmêl chu kan hmu ta! Ka hriat ngai mi an ni lo va, ka lo hre thiam lawk lo nghe nghe zui a; mahse, an țawng ri hriaa ka hming leh U Hruaia hming an lam rîk ațang chuan palai an nih ngei ka ring ta a ni, a lo dik chiah bawk.

"U Hruai, ka phû lo êm êm che tih ka hria; mahse, kei ang dinhmuna ding tân chuan a la harsa êm a ni, a hrehawm ka ti, eng thu tlûkna pawh ka nuin rawn siam mah se i lo hre thiam hrâm a ni ang chu," ka ti ringawt a, hrehawm ka tiin ka khawngaih dâwn êm a ni. Ani lah chuan," I dinhmun hre sa vekin alawm ka rawn tirh, thu tlûkna chu eng pawh ni se ka dem dâwn lo che a, i nu pawh ka dem dâwn rêng rêng lo. Hlawhchham tùr tih hre sain alawm ka rawn tirh, ka hrilh tawh che kha," a rawn ti mai thung a, chutah," Rawn tirh ka duh a, ka rawn tîr a ni mai, rilru hrehawm nân lo hmang miah suh aw," a rawn ti leh a, min rawn hnèm lêt záwk a nih ber chu; mahse, chutiang chuan min rawn ti mah se ka rilru a hrehawm tho. Amah ka khawngaih êm êm rualin miin Pastor Hruaia hnên ațangin palai hmêl ka hmu a ni an lo hre ve lo thei lo ang a, min han sawi kual ang a, kei min demna chu ka tuar thei mai ang; mahse, amah an sawi tel lo thei dâwn lo, pastor a ni a, a nupuiin a tlànsan hun lai pawha sawisêltute bawk khân an han sêl leh ang a, 'Pastor ve si chuti khati' an ti leh ngei ang, rilru a hrehawmin a tâwt leh țûn dâwn a ni.

Chutianga palai rawn tír ta chu Ahlutei pawhin a hre lo thei si lo va, a lakah ka inthlahrung zual ta khawp mai; mahse, ani erawh chuan a hma ang tho khân min biain min en hranna a awm chuang hauh lo. Ngei hmêl pu pawhin min en lovin ka hria, min ti chûk chuang lo va, min chhuahchhàlin min chhaih zui chuang lo, a ngai reng, keimah ber hi ka danglam a nih hi.

Mahse, ka rin loh lutukin ka nuin rem thu sawi a duh tlat mai a nih chu! "A duh che a, nang pawhin i duh chuan a țha, inpeih hun tak tak kan nei dâwn chuang lo, Pathianin i tâna a ruatsak che a nih ka ringhlel hauh lo bawk, harsatna a tâwk a, pui tùrin Pathianin a duh che a nih ka ring," a ti. Kan chhûngte hmun danga awmte râwn kualin Remi nu leh pate pawh a râwn ve tho a, anni hi ka țhiannu ber nu leh pate an nih bâkah min duhsaktute an ni a, ka tâna țha duhtute an ni. Min fiam ve hlak nghe nghe," In induhtawn tih pawh kan lo hre hleinem," an tih loh leh," Pastor nupui i ni mai dâwn si a, i țhiannu nèn chuan in inthlau tawh dâwn hlê mai," an ti a,  min fiam pawh hi a àwm hliah hliah ka ti, an tân chuan a  mak ve dâwn êm asin, kei pawhin ka ngaihtuah hian mak ka la ti fan.

November ni 24 chu kan inneih hun atân ruat fel a ni ta. Fân taka hun ruat kha ka nu leh U Hruaia pain țha an ti lo va, 'Remna thu thlun fel a nih tawh chuan hun fân taka ruat a țha lo, kârah eng eng emaw a thleng thei' an ti tlat a. Thla hnih deuhthaw nulât hun ka la nei tihna a nih chu, ãm taka ka hman a ngai ang. Ka rin aia hmain pasal ka nei dâwn ta si a, ka duh zâwng ti theiin hun leh sum nei lo mah ila pasal neih hunah chuan tuna ka zalèn ang hian ka zalèn thei tawh dâwn si lo va, chu vàng chuan ãm takin duhthawh takin ka nulât hun tàwp lam chu ka hmang ve ang chu.

Eng angin nge U Hruaia chhûngte'n min ngaih ang aw tih ka ngaihtuah ve țhìn, Ahlutei hi chu a sual lêmin ka ring lo va, mi dang chu ka hre ve lo. An mo hmasa lakah chuan eng mah ka ni dâwn si lo va, tehkhin chi pawh ka ni lo, chhûngkaw țha tak chu sawi loh hmeithai fanu ve mai ka ni a, chhûngkaw khawsak lamah ni se, chhuan tùr ka nei hlawl lo. U Hruaia hian engtin nge min duh theih zâwk ni?!! Mi vànnei tak chu ka ni chiang alawm, mi min sawi dàn pawh a ni.

Ka rin lâwk ang ngeiin mi chuan min sawi duh nasa mai. Ka beng hriatah erawh an sawi ve vak lo va, Bawiha hriatah erawh an lo sawi nasa țhìn a nih ka ring, chaw ei lai hian a sawi chhuak zauh zauh a, hrehawm ka ti thei viau nain ka hmêl leh cheziaah erawh ka ti lang duh miah lo thung, ka nu erawh chuan," Sawi ve ang chu, kâ an nei alawm," a ti mai țhìn. Ka chanchin an sawi hi chu ka hre thiam tho a, an sawi dik ngei pawhin ka ring; mahse, U Hruaia dem leh sawisêl pâwl an awm țhìn erawh hrehawm ka ti thlâwt, 'nupui duh leh hma sî' an ti a, a dikna chen pawh a awm tho ang, a hma pawha ka lo vènthàwn tak kha a ni rêng bawk a, inkhâwm pawh nuam lo ka ti lek lek ta mai, min en hrek hrekin ka hria a, min lawmpui an awm rualin min sawisêl pâwl an awm a, min rêltute chuan min rêl phâr nasa ngawt ta ve ang 

U Hruaia pawh a rawn lawr ve zut a, ani pawh a rin loh deuha remna thu kan thlun ațang khân a phûrin a rin phâk bâk a ni bawk a, a hlim khawp mai. Kan inbe pawp reng reng tho nain hmaichhan ngeia inhmuh hi chu a nuam danglam a, ka thlahlel ru ve tho bawk nèn, a rawn lang zut pawh hi ka sawisêl duh lo a ni. A rawn kal apiang lah hian thilpêk min rawn ken ziah a, han sawisêl deuh mah ila engah mah a ngai lo," Nang ka pêk loh chein pêk tùr dang ka nei hleinem, ka duatnaah che ngai mai rawh," a ti thên mai si a, hemi chungchângah kher hi chuan ka țawng tam thlàwn a ni deuh ber mai.

Vawi hnih chu an inah min hruaiin chaw pawh ka ei ve tawh nghe nghe, kan inneih huna ka țit dûk loh nân leh a nu leh pa min hmêl hriattîr  a duh vàng a ni. A pa chu pa țawng duh ve tak niin a nèlawm ka ti a, min biain min ngaihsak ka ti mai, a fapa nupui tùr ka nih vàng pawh a ni maithei, an chhûngkaw chanchinte chu min hrilh nghâl mial mial a, a lan zahawm ang aiin a nèlawm daih mai. A nu erawh chu a țawng mawh deuh, kei nèn tak phei chuan kan inbe lo ti ila a dik zâwk, inlêng an rawn kal erawh chuan a țawng ve ta deuh zâwk a, nu țawng tam tak chu a ni lo a ni ang, sual lêm lo tak, țawng tlèm avànga lang nèlawm lo leh biakpawh hmasak ngai chi a ni ve a ni ngei ang. Ahlutei nèn erawh chuan ni tina inhmua inbe reng reng țhìn kan ni a, kan inbiak loh pawhin nui hmêl min hmuh a, ani hi chu ka nêl, a fel tih ka hria.

U Hruaia chuan a room-ah min hruai nghe nghe a, a sawi dànin nupui a neih dâwn vàngin an siam thar a ni àwm e. A chhûng chu rawng hnawih thar niin furniture pawh thlâk vek a ni a, furniture hùnna pawh thlâk kual niin a zau si a, a nuam khawp mai. Khum nalh zet leh zâu zet mai ka hmuh chuan a enga mah hmain ka zakin ka'n zãm sa êm êm ringawt mai a nih chu! Ani lah chuan," I lài ringawt elo?" a lo la ti zui a, chhàn ngaihna pawh ka hre lo. Ka lak ațanga mit la sawn hauh lo chuan," Kan room tùrah hian i duhthu sãm lo lai a awm em? Han en kual la, han sawi teh, dunlop hei aia chhah zâwk te hi i duh em?" a ti zui leh a, khumah chuan a han țhu vêl a, kei chuan ka lu ka lo thing ringawt. Sawi a zahthlâk, bâkah, a dunlop chhahzia ka hmu a, a duh taka a lei a ni ngei bawk ang a, keia lo inrawlh ve chiamna tùr a awm lo, a dûp nuam dâwn tih pawh ka hria a ni. 

A room chu duhthusàma nuam a ni, a zau a, a zau lutuk pawh a ni lo, hei ai hian zau se ka ti lo va, zîm hlek se pawh ka ti chuang lo, a nih dàn ang hian a tâwk chiah. Kan inneih hnuah chuan a room ni țhìn hi 'kan room' a lo ni tawh ang, pahnih tân pawh zau nuam tak a la ni dâwn tho; mahse, kan awm rei vak thei lo ang, a hna thawhna lam kan pan nghâl mai loh chuan...

Engkim min buaipuisak vek a, thil țûl tùr leh ngaihtuah ngai lah chu a hre thei khawp mai a; kei inbuatsaih dàn tùr pawh ka hre thiam vak lo a nia, kum tam zâwk na nâ nâ chuan thil a lo hre deuh e. A pa ni se, kan mamawh tùr min rawn zâwt reng a, kan hrilh ngai lo nain buhfai leh eng eng emaw hi a motor-in kan inah a rawn dahtîr tawp a, keini tân lah lo sawisèl chiam chi ni bawk si lo, zêp lohah chuan nuam lo ka ti țhìn.

Ka nu chu ka hriat miah lohin a lo inkhâwl nasa daih mai! 'I pasal neih hun atán tiin ka lo khâwl ve alawm' a ti. Thil țûl tùr leh kan mamawh tùrte chu a ziak chhuak dap a, a teptèra buai chiam a tum lo viau a ni. Keini pawh Remi nèn kan theih ang angin kan lo inbuatsaih ve e kan tia, kan bangbo viau nain mi kan zâwt chawp ve lâwp lâwp bawk a. Mipa lamin, "Bungrua kha rawn chhawm chiam a ngai lo a nia. Mizoin dàn kan nei tih chu kan hria a; mahse, insèn chiam kha a țûl ber lo, hetah ni se an awm rei hman dâwn lo va, Kolasib lamah ni se bungrua engkim awm saah an awm mai dâwn a," an ti sa a, a dik leh viau tho mai; mahse, thuam chhawm lova kal ngawt chu a tih chi bîk loh, ka nu pawhin," Mizovin dàn kan nei ve a, kan dàn angin kan kal ve ang chu," a ti ve tlat a, man ei tùrte kan hriattîr hma deuh a, anni pawh an lo inhawng hlawm khawp mai a, mi hausa tak tak awm lêm lo mah se," Ani meuhin pasal a neih dâwn chuan," an ti ve a, "Chu chu ka lo tum ang e," an tih loh leh," Pawisa lamin in duh zâwk em?" te an ti a, ka phû loha bungraw țha tak tak min rawn leisak an tum chu ka hlim a, an zahawm ka ti a, an chungah pawh ka lãwm tak tak a ni.

Pu Hruaia bulah chuan," Ropui taka inneih kher pawh ngai ka ti lo, sènso a tam bãkah ropui taka inneih hi malsàwm dawn tamna leh thu tiam ti nghettu pawh a ni chuang lovin ka hria," ka ti a, ani erawh chuan," A ropui thei ang berin le, i ropui ber nî tùr alawm a nih," a lo ti daih thung. "Chu vàng chuan a ropui thei ang bera neih che hi ka duh a ni, ka nawr luih ang deuh i ni bawk si a," nui deuh hlek chunga a tih leh chuan," Ni chuang lo, min nawr lui hleinem," ka lo ti ve a.

Ka țhianteho chuan min lawmpui êm êm mai a, Remi ka țhianah a țang dâwn tih an hriat phei chuan an phûr zual a. Lalkâwnga nèn ni deuh, ni lo deuha an awm lai a ni bawk nèn, an rawn fiam nasa thei khawp mai. Lalkâwnga ni se group-ah a awm ve reng a, rawn lang viau lo mah se a chhiar ve zêl tho bawk si, renew leh se ka ti asin. Remi hi mi hlim thei tak, nui reng peih leh fiam dãwl tak mai a ni a, hei vàng tak hian fiam pawh an fiam nasa rêng a ni.

Kan thuamhnaw hâk tùr chu Ahlutei'n a order ve thung a. 'Vawi khat pasal neih ve mana mo thuam hawh chu ka ngaih dàn a ni lo' a ti tlat a, kan tân chuan țhuitîr ngaihna a awm lo bawk a, hnial duh viau mah ila a tihluih ngei ka ring bawk si, dàn a ni nge ni lo pawh hre lo chuan Ahlutei kutah chuan ka dah tawp mai. A sawi dànin a naute pahnih pawh an phûr viau a ni àwm a; mahse, an thil zirna lamah insàwrbing a ngai ve si a, a hun dâwn tak takah lo chuan an rawn haw thei dâwn lo a ni.

Pasal ka neih hmain Joshua thlànah ka kal leh a, pangpâr dah pahin," Joshua, ka lãwm e aw, tunah chuan i duh ang takin ka hlim tawh lutuk a nia, nang pawhin min lawmpui ngei ang tih ka hria a ni. Pasal ka nei dâwn asin, i lo hmuin i lo hria ang tiraw? Min lo thlîr reng rawh aw, hmangaihna min hriat thiamtîrtu i ni a, ka theihnghilh ngai lo ang che. Chuan, ka hmangaih che, tuna ka pasal tùr pawh hi nang ka hmangaih che ang bawkin ka hmangaih bawk, hmangaih dang tawnga ka hlim hi min lawmpui tiraw?" tiin ka be sap sap a.

*INBIAK TAWNNA HAN TIH HIAN ȚAWNG CHHUAH CHAUH A HUAM LO VA, NGAIHTHLÂK PAWH A HUAM TEL THO A NI. INNGAIHTHLÂK TAWN TUM LOVA ȚAWNG TUM RENG PAHNIH INKÁRAH CHUAN  BORUAK ȚHA A AWM THEI LO*