☆KA BEISEINA☆ - 26 By Dingdi Pachuau

☆KA BEISEINA☆ - 26 By Dingdi Pachuau

Kan inneih dâwn hnaih lamah chuan dàwrah pawh ka kal tawh lo, ka inthlahrungin Ahlutei ka zah viau a nia, U Hruaia'n," Kal tawh lo mai rawh, a teptèrah ah i buai palh  zâwk ang," a ti tlat a, Ahlutei bulah a sawi nge a sawi chu hria ni àwm hrimin ani pawh chuan kal tawh lo tùrin min ti a," Mâma nupui tùr i nia, in inneih hmaa ka lo chhawr fê viau che chuan min ngei palh ang, lo inawm no zual rawh," nui chung hian a ti a, inawm no dàn tùr pawh ka hre chuang lo, han inpuahchah viau dáwn pawh ni ila ka thiam chuang lo; mahse, chàwl tùra min tih tlat avàng erawh chuan ka chàwl ve ta tawp mai, an thu âwih loa ka buai palh hlauh chuan...

Țhian țha hi an lo hlû teh e. Remi'n min pui char char a, eng mah sawisèl a nei ngai lo, a hman chângin Didiki a lo lang ve bawk a. Ani erawh hi chu a puar lang ve tawh a, indim a ngaih vàngin ka phût ngam lo hrim hrim bawk; mahse, amah zâwk hian rawn kal a duh tlat a, ka chhawr țangkaiin ka râwn nasa khawp mai, pasal lo nei tawh a ni bawk a, Remi nèn kan pahnih ai thlâwt chuan thil tih dàn tùr leh a kalhmang pawh a hre deuh e.

U Hruaia pawh Aizâwl lamah a tâp tam ta deuh hlek, min ngaihtuahin mamawh ka neih leh neih lohte min zâwt reng a, inthlahrung lo tùrin min hrilh reng bawk. An inah pawh ka tlângnèl loh hlauin min hruai zauh zauh a, a pa nèn phei chuan kan innêlin kan inbe bawrh bawrh thei tawh a, a nu nèn erawh kan inhmu khât thung. Dàwr lamah a tâp deuh reng si a, a àwm ve tho mai. 

Zan khat erawh chu an ina zanriah kan kïl laiin a nu chuan U Hruaia hnênah chuan," He lamah i awm deuh reng si a, i hna lamah a pawi thei dâwn lo em ni?" tiin a han zâwt a, ani chuan min rawn enin," Pawi lo ve," a ti mai a, a nui suk bawk a, a pa chuan," Nupui a nei dâwn a, a buai ve bawk ang chu," a lo ti ve a, a nu erawh chuan," Nupui nei dâwn tih vanga buai chiamna tùr a awm lêm em ni? Vawi khatna pawh a ni tawh lo lehnghâl!" a ti leh hlak a, ka hawi chhuak ngam tawh lo, nuam lo ka ti ru ngei mai.

"Chaw kha puar takin ei țeuh rawh khai, kha i chawhmeh duh zâwng tak pawh ka siamtîr kha, chhûngkaw tân i thawk rim hlê si a," pa ber chuan tiin duhsak tak hian chawhmeh chu a suahsak a, a nu chuan," Ni rêng asin, ka thawh rimzia hi, ka thute hi han âwih lo ngam tùr in ni hleinem," a lo ti leh a, Ahlutei chuan," Anne, nang pawh ei țeuh rawh, i ei nêp riauin ka hria. Mâm, sa ti ţha laite kha suahsak la?"a rawn ti ve leh a, kei chuan," Ka ei ţeuh, ka puar tawh zâwk a... Ka puar tawh asin,"tiin U Hruaia sa min suah chu ka en a, ka ti tak tak a ni. Ani chuan," Kan la ei țan chauh alawm, puarna hun a la ni lo," a lo ti thung a, a pa pawh chuan," E, kan ei țeuh ang chu. Ei tak tak hmaa i puar nghâl mai chuan i chak thei lo ang a, in inneih hnuah pawh naute i pai thei lawk lo mai ang," a ti leh a, Ahlutei chuan," Paaaa....!!" a lo ti vat a, kei pawh chu ka zah avàngin ka biang a sa hat hat mai. Ani lah chuan," Thu dik lo ka sawi hleinem, inneiin fa nei thuai se, tu mawng ben pawh kan châk ve tawh a, a àwm ve ber nang lah hian i ngaihsak mang si lo," a ti leh duah a, Ahlutei chu a nui tãwi tak mai.

Chaw ei kham hnu lamah a room kan en kual leh rih a, mi pahnih țhut theihna tâwk tùr țhutthlèng thar a lo lei leh tawh a, dressing table mawi tak pawh a lo inhûng vàng mai. Ka en deih reng a, a room-a bungruate rêng rêng hi a țhain a to dâwn tih a hriat hliah hliah mai si a, keini tân chuan engtiklai maha kan neih phâk ve loh tùr hlîr ni maiin ka hre țhin.

"Ka pa thil sawi vàng khân i zak viau a, zah a ngai hauh lo a nia, ka hrilh lâwk ang che, ani chuan engah vak a ngai ngai lo, a fiam fo dâwn che a nia, zak duh tawh miah suh," a tih chuan amah chu ka en vat a, min enin a lo nui sâng a, chutah, a bân pahnih chu a han phar duai a, ka pan vat a, min kuahin kei pawh chuan a kâwngah ka kuah ve vat a. 

"Ka nu erawh hi chu tlêmin a khirh ve deuh hlek a; mahse, hrehawm ti miah suh, i bulah ka awm zêl dâwn a, tu mahin an ti na lo ang che, ka phal dâwn miah lo," a ti leh sup sup a, nghet zeta min kuah avàngin kei pawhin ka kuah nghet ve sauh sauh a. Ni e, a nu hi chu ka la hmu tam lo nain ka la nêl vak lo va, chaw ei laiin khatiang khân a țawng ve deuh bawk nèn, ka rilru a lo hrehawm ru hman viau a nih kha.

"U Hruai, ka nu nèn chuan kan la inhmu tam lovin a thawk rim tih ka hria a, a khirh deuh a nih pawhin a àwm lo miah lo, nasa taka thawktu tân chuan thinchhiat a awl bâkah han khirh ve deuh pawh hi a àwm viau a nia, ka hre thiam lutuk. Kei lah hian ka phû loh lutuk tak mai pasalah ka nei dâwn che..." ka la tih lai mêk chuan ka hmui chu a rawn khãr ta hmiah mai, sawi zawm ngaihna a awm lo.

Kan inthlah dul deuh hnu chuan," Khatiang kha chu sawi tawh miah suh, ka ngaithla duh tawh lo a nia," a ti sup a, ka hnâr chu a'n tuai hlak bawk a. Chutah, hawi sawnin," I hmuh angin hei room chu bungruain a khat mawi tâwk tawh a, bungrua rawn chhawm chiam a ngai lo ang aw, hetah hman sên loh leh sin sèn loh kan nei a, a àwm hliah hliah chin chauh tak tak i rawn chhawm dâwn nia, a dang chu in lamah i dah țha ang a, i nu leh i nau tân a ni mai," a ti zui leh zat a.

Kan inpeih thawkhat ta, kâr khat vël chu hun a la awm nain naktûk maia pasal nei tawh mai tùr angin ka inhria a, ka huphurh rilru deuh a, chutih rualin ka helhhawlh tho bawk, pasal ka nei ve tawh mai dâwn chu a ni tak si a, a hma kha chuan kei aiin Remi'n a neih hma zâwk ka ring țhin kha a nia; mahse, hei ka neih khalh dâwn chu a ni ta mai si, hun kal kual vêl dàn hi a mak tih loh rual a ni lo.

Kan inneih nï a lo inher chhuak ve ta, mumang ang mai niin ka hria. Ka hlim a, chutih rualin ka lungngaiin ka lung a lêng lâwk bawk. Ka rilruin thil tam tak ka ngaihtuah a, ka nu leh Bawiha an pahnih tê chauha an awm tawh tùr chu ka khawngaih a, ka ngai lâwk a, anni pawhin min ngai ve tho ang. Hlim taka kan awm hona in ngei chu ka chhuahsan a lo ngai ve ta si a, ka nuin damloh leh theih loh nî lo tâwk ta se, Bawiha mipa a ni a, ani chuan kei angin a enkawl thiam lo tawp ang, kei chu hmun dangah a hmuh phâk lohah ka awm tawh dâwn si, chûngte chu ka ngaihtuah kual a, ka mittui a parawl kuang mai.

"Eng nge i ngaihtuah a?" Remi chuan a rawn ti sar sar a, en pawh en ngam lo chuan sîr lam ka hawi a, ka mittui hru zauh pah chuan," Eng vak mah!" ka ti ringawt a. Kan in chhuahsanin U Hruaiate in lamah kan lâwi phei tawh dâwn a, room-ah kan la awm rih a ni.

"Khati khân awm suh, i nuin a hmuh che chuan hrehawm a ti dâwn asin, i mit hnawih pawh kha a pherh hlauh ang e, khawi maw," tiin min han en dik leh rih a, kei pawh inngaihtuah lungchhe chhunzawm duh lo chuan ka rilru ka siam a, a hnuah kan chhuak zui ta nghâl a.

Ka va chau tak! Nimin tlai khân ka khua a rawn sik thut a, damdawi ka ei nain zankhuain min chhâwk hlei thei lo va, tukin lamah erawh a man sâng deuh ka ei ta ringawt a, chu chuan min chhâwk ve ta chauh a nih kha. Vawiinah lah kan inneihna min lawmpuitu mipui tam tak kârah hun kan hmang a, nawm loh sawi theih hauh lovin nilêngin hlim hmêl put a ngai a, zàn lamah ni se a la tàwp mai thei si lo, ka chau hluah hluah a ni mai, mut thlawp ka châk ber.

"I chau tak zet a nih kha, tui lumin i intleuh zawk ang a, i mu nghâl dâwn nia, i khawngaihthlâk reuh mang e!" U Hruaia'n a rawn tih chuan ka lo muthlu lek lek niin, ka han inthing harh a, nui hmêla U Hruaia en pah chuan," Ka meng hlei thei lo a ni, ka va nêp tak!" ka ti sap a; mahse, ka chau êm a ni, ka taksa ni se arawl țhûm bawk.  Ani erawh chuan," I chau a nih kha, han inphelh zung zung la, chumi chhûngin i intleuhna tùr ka lo siamsak ang che," a lo ti leh a, bathroom-ah min luhsan zui ta nghâl a.

Kan mut dâwn chuan Pathian hnênah inhlànin kan țawngțai phawt a, làwmthu sawiin kawng engkimah a vènna leh hruaina kan dîl a ni. Tui luma ka intleuh zawk ațang khân ka dik loh țan tawh avàngin, kan han mu chu ka khùr chhe lo chauh a ni, chhûngril lamah ka khua a sik țan leh er er tawh a, damdawi ei chu ka duh reng ; mahse, han dìl kha ka hreh ve a ni.

"I va sa ve! Anne, i khua a sik chiang mai?!!"

A buai ta chûk mai. Damdawi min pe a, a nawm theih dàn tùr berin min muttîr a, vâwt ka tih hlauin min kuah bawk a, ka ti buai viau leh a mangang viau chu ka khawngaih zâwk. Lawițhat zàn a ni ve a, chutiang lam lah chu kan hawi thei hauh si lo.

Zankhuain ka khua a sik a, nuam lo ka tiin ka inthlahrung ngei mai, pasal neih zàn ațanga min buaipui ngaia ka awm chu nuam lo ve tak a ni. Chhûngte kaih thawh a tum chuan ka phal lo tlat a," Khawsik vàng mai maia tih buai ka duh lo," ka ti ve tlat a, ani pawh chuan ka thu chu a âwih ve mai a; mahse, ka mut hma chu chhìn khat tê mah a chhîng lo va, vâwt ka tih hlauin min kuah char char a ni.

"Naktûkah inentîr tùrin kan chhuak nghâl ang, nizàn lamah ni se i khua a sik tluan zak bawk a, a hrehawm dâwn êm mai, vawiina hun kan hmannaahte khân hrehawm i lo va ti dâwn tak êm!!" a ti sup sup a, kei erawh chuan," Vawiin khân ka khua a sik hleinem, ka taksa a rawl țhêm țhûm tih chauh a ni," ka lo ti ve thung a, chutah," A zia lo ngawt mai,   Pathian zârah ka damlo khât asin le! Kan inneih zànah ber kher lehnghâl, ka ti hnual ngawt lo che maw?" ka ti niah niah a, ani chuan," I rilru leh taksa a hah rimtawng a nih kha, naktûkah doctor kan pan ang a, i țha thuai mai ang," a lo ti ve a, ka hnung chûl hliau hliau pah chuan," Hun kan la hmang dùn dâwn chauh alawm, Lawițhat tûkah pawh Virgin-in i la awm dâwn tihna a ni mai a," a ti leh a, a nui hawk a," Ka chân daih dâwn tihna pawh ni hlei lo, dam ver vawrin Làwițhat zàn chu kan la hmang mai ang chu, kan lo khêk tihna a ni mai," a ti awlsam leh êt a, kei pawh ka nui ve sak ringawt.

Doctor-a kan kal pawh chuan ka taksa chauh vàng leh ka rilru ka hman nasat vàngah a lo puh a, damdawi țha vitamin țha tak tak min chawh nual a, rilru hmang hah lo tùrin min chah bawk a, U Hruaia pawhin a hre ve vek tho a, haw kawngah chuan," Ka duat viau che a ngai a ni, keimah vàng a nihna chen a awm tlat. Thil țûl lo ngaihtuah vak vak lo la, rilru hahdam takin awm tum ang che aw, i nu leh i nau pawh ngaihtuah viau suh ang che, kan awm bo vang vang dâwn tihna a ni lo va, i tlawh thei dâwn tawh lo tihna lah a ni hek lo, kan tlawhin chanchin pawh kan inhre pawh reng reng dâwn alawm," tiin min hrilh malh malh a.

Min duat liam liam hlawm khawp mai. Ka pa (U Hruaia pa) chuan ka dam chian tak zet hma chu Kolasib lama liam a phal lo va, U Hruaia naute lah chuan ka chêt hlek pawh an phal lo bawk. Ahlutei ka nèl ber leh ka hmuh zin ber a nih vàngin a bulah chuan ka ngaih a ngam ber a, ka pa bulah pawh chutiang tho chu. Ka sual vàng nge, ka nu leh Nutei hi ka la nêl lo deuh a, ka chungah an sual pawh a ni chuang lo, an bulah ka thlâ a la ngam lo deuh mai a nia. Mahse, a la rei lo ve êm mai a, hun han kal deuh se ka zia mai tùrah ka ngai.

U Hruaia min duatzia chu, nuam ka ti veng veng mai. Ka lung lêng tùr pawh a hnawt boin ka nu pawh ka ngaih a nêp viau. Ei tùr leh in tùr tui tak tak min hluiin min pe reng a, damdawi ka ei hun chat chatah min pe a, ka taksa pawh a dam chakin ka khawsik phei chu a awm tawh lo hrim hrim. Ka belh chian cheuh cheuh hian ka phû lohzia leh ka vànneihzia ka hre chiang telh telh a, nupuia min neih zànah nupa nun min chenpui thei lo va, tûn thleng hian nupa nun min la hmanpui miah lo a ni, ka dam țhat tak tak hun a nghâk a nih pawhin hei leh chen min nghâk thei hi a dawhthei ka ti thlâwt. Mipa hrisêl țha tak a ni a, min ti lui pawh ni se ka hnial ngam dâwn loh tehlul nèn, hriat thiamna ngah tak mipa chu a ni chiang alawm.

A vawi khat nân Kolasib lam kan pan dâwn zànah nupa nun chu min chenpui ta a, min duat a, min dìm a, min tih nat a hlau ngawih ngawih ni berin ka hria. Duat takin min kuah bet chial a, ka chalah fâwpin," Muhìl rawh le, ka naute, i chàu lutuk palh ang e," a ti a, chau deuh tho mah ila ka mut a chhuak thei lawk lo thung. Che lova ka mut reng avàng chuan ka muhìlah a ngai a ni ang, ka hnung a chùlna chu a zàwi telh telh a, a hnu deuha a tàwp tâkah chuan a muhìl ta a ni tih ka hai lo, kei erawh chu a muthilh hnuah pawh chuan ka la harh reng thung a.

U Hruaia hian min duatin min kohna ang deuh hian naute enin min en ni berin ka hria. Kan inupat hleih ve deuh bawk a, lehlam taka ngaihtuah chuan a àwm ve deuh tho. An tê ber Nutei nèn hian kan inrual deuh reng si a, kum 10 dâwnin kan inthlau a nih chu. Kei hian ka duat thiam ve ngût ang em? Zanin khân a nupui hlui kha a ngaihtuah chhuak ang em? Kei ve hi, ka zei lo ropui mai si a, ka ti lãwm zo meuh ang em? Min nghâk rei bawk si a...  Vawiin chhùn lama ka nu thil sawi ka ngaihtuah chhuak leh a, a sawi dàn ațang kha chuan Irene-i kha chu a la duh tih a hriat viau a ni, Nutei nèna an titi kha ka hre vuai kha a nia, ka va pawh ngam ta lo nghe nghe a nih kha. U Hruaia hian a chhûngril lamah a la duh ve reng tho ang em le? Nge, kei hi a lunglèn hnem nân min nei ta mai zâwk? Kei lo nula tam tak, amah duhtu leh chhe lo tak tak leh neinung tak tak an tam àwm vei nèn.

"I muhìl thei nange? Nge i nuam lo em ni zâwk?"

A aw thâm deuh hlek chu a sexy ka ti kher mai. Chu lam erawh chu ka ngaihtuahna ațangin ka dah bo vat a, min man chhuak chiang bawk si nèn, ka zêp duh ta lo mai." U Hruai, thil ka zâwt ang che aw,  engati nge i nupui ni tùra kei kher hi min thlan? Mi dang an tam hlê si a," uar zet hian ka ti chhuak ta nge nge a, min chhànna dik tak ka hre châk a ni.

A aw a han thian phawt a, chutah," Ka nupui ni tùrin ka duh ber che a ni. Pastor nupui nih hi thil nuam tak a ni lo ang tih chu i hre thiamin ka ring a; mahse, chuti chung chung chuan ka belh chian cheuh cheuh che hian nang aia tling zo tùr ka hmu lo a ni. Nupa hlim tak niin ka rawngbàwlna min țàwiawm țha ang tih ka hria a, chubâkah, ka nupui nia i pasal nih ka duh bawk a ni," a ti ta duah a, ka lo rin anga 'Ka duh che a, ka hmangaih bawk che a, chu vàng chuan ka nupui ni tùrin ka thlang che a ni' tia min chhàn loh avàng chuan mak ka ti deuh hlek a, ka ngawih phah deuh reng nghe nghe; mahse," Ka lãwm e," ka ti ta tho a, ka lãwm tho sî a ni. 

"Chutiang ngaihtuah chuan maw i lo mut theih loh a? Ka naute tak hi chu aw... muthilh tum hrâm teh, naktûkah motor-ah i chuang dâwn si a, i chau lutuk palh ang e," a ti leh sup sup a, duat takin a âwm nghèng chuan min kuah leh chial a, a thinphu dat dat chu ka hre chiang kher asin. He thinphu hi ka ti rang ve tawh em le? A nupui ka ni tawh a, zaninah pawh nupa nun kan chèn a nih kha, ka rilru ka ti paukhauh a, min hmangaih thu la sawi chhuak miah lo mah se tûn ațanga hun rei vak loah hi chuan sawi chhuahtîr  ngei ka tum ang a, țan ka la bawk ang. A nupui atâna min nei hi ka lâwm a, min nei duh ringawt pawh hi ka lãwm tawh tho a; mahse, ka la duhãm leh tho tho, a taksa mai nei lova a rilru chhûngril leh a thinlung zawng zawng, amaha engkim mai hian min duhin min hmangaih se tih ka duh, chumi tùr chuan ka theihtâwp ka chhuah ang a, ka hlawhtling êm êm ang.

*ȚHIAN SUAL KAWP SUH LA, AN ZÎNGA TEL CHÂK HEK SUH*