☆KA BEISEINA☆ - 27 By Dingdi Pachuau

☆KA BEISEINA☆ - 27 By Dingdi Pachuau

Ka pasal nèn kan chhûngte chènna Aizawl chu chhuahsanin Kolasib lam panin kan tlãn chhuak ta vang vang a, ni a sa țha viau a, Krismas a hnaih tawh avàngin khua erawh a vâwt ve sûk tawh bawk. Kawrlum lian pui ka hâk chuan ka intuam hlûn a, seat-ah ka ke ka hlâng chho vek bawk a, a lum nuam viau a ni.

"Naupang tê i ang reuh mang e!"

Ka en phei vat a, ani chu lo nui sukin a kut vei lam a rawn phar chhuak nghâl a, ka lo vuan vat a, a kut lum thar thar vawnsak chu a va nuam tak! 

"Naupang tê an ka duh bawk lo aw, nula dik tak, ni leh lo, pasal pawh nei hial tawh ka nih hi." Naupang tê ang min ti chu ka duh lo tak tak pawh a ni chuang lo, ka han hnial kual ve a ni. A kut lian zetin ka kut a hûm bo deuhthaw chu ka en reng a, ka nui sak a. A nuam ka ti, a kut lakah chuan ka kut chu kut note ni maiin a lang. Ka rilru a hlim a, tuna kan awm dànte hi mumang a ang ka ti a, tak tak a ni lo ang tih ka hlau.

A nui hawk a," Naupang tê i ni lo tih chu ka hre chiang tak zet; mahse, tuna i awm dàn tak kha, hmeichhe naupang tê, duhawm zet i ang êm a ni, i țhut dàn mawlh khân a ti ang zual che," a rawn ti leh a, ka țhu khãwr hleu bawk sia, ka tawm tê nasa bawk nèn, a sawi hi ka ang tak tak ngawtin ka ring.

"I kut hi a lo va'n lian êm êm!" ka ti ve leh daih a, ani lah chuan," Mipa kut a ni alawm le," a lo ti thung a, ka en phei chuan nui hmêl a lo la pu reng a, ka lei chhuah khum zauh pahin," Mipa kut rau rauah pawh a mipa kut bîk hliah hliahin ka hria," tiin ka han fak hlak a.

"O thank you, my sweet honey!"

A thil sawi vàng chuan ka nui ta hak hak a," Vêl a che! Țawng țialin min rêl kher suh, ka hre thiam ve tho a nia," fiamthu hian ka ti a, kan pahnih chuan kan nui zui leh hak hak a. Kan boruak chu nuam ka va ti tak êm! Ka hlim a, ani pawh a hmêl tak rûn lova a nui ve hawk hawk hian min ti hlim zual a ni.

A hnu deuhah chuan,"Ka mumang mai i ni ang tih ka hlau ngawt mai!" ka ti chhuak sap a, a hmêl pawh en lovin kan kut inbelhbawm chial chu ka en ràn reng a, ani chuan ka kut vuan nghet sauhin," Mumang atân chuan ka phal ngai hauh lo ang che," a lo ti ve sup a.

Kan tlãn chak hran lo va, kan thlen meuh chuan khua pawh a chawhnu ruih tawh mai.U Hruaia lo khawsakna, kei leh Remi ngei pawhin kan tlawh tawhna hmun ngei kha kan han thleng leh ta a, a hmaa ka hmuh dàn nèn erawh kha chuan a inang lo ta riau, a lang țhing țhep ni maiin ka hria, chhuk mai lo chuan ka hawi kual vêl phawt a, kawta pangpâr leh thlai hnah hring awm tawh loh vàng chu a ni ngei ang. Ngawi tak rawh, a la hring leh dap dâwn chiang lutuk tlat, pangpâr mai bâkah thlai pawh ka chîng ang a, nakin lawkah chuan tûn dinhmun hi ngaihruat thiam theih pawh a ni tawh lo ang.

"Ka in tlâwm takah hian ka lo làwm a che."

Ka hawi kual lai vêl khân chhukin kawng a lo va hawng hman a ni chiang mai, nui sânga min en hian ka țhutna lam motor kawngkhàr chu a lo hawng dèr tawh nghe nghe! A che rang ngei mai, nuih lét sakin," I chhuk lai ka hre miah lo nia!  Kei lah chu ka lo la țhu reng a," ka ti chhuak niah niah a,  ani chuan," E, i duh chen chen i țhu thei ang, nang chu Lalnu i nia, i chhiahhlawh hian eng nge tihsak theih che ka neih, Ka Lalnu?" nui miah lo hian a lo ti a.

"Min ti zak dâwn a nia!" Ka zak deuh tak tak alawm, chutianga min ko vêl chu. Hetiang hian tu mahin a fiam pawhin min la ko ngai bawk si lo a, ka pasal mah ni se ka làiin ka zak tho a ni.

"Zakzum reuh lutuk mai!" ti supin ka inrin hman hma chuan a rawn kûn lût a, min rawn fâwp dâwn emaw ka lo ti; mahse, min pawm chhuak ta thung a, min zo êm êm bawk si a, a tân chuan naute, zo taka kan pawm ang vêl hi ka nih ka ring.

"Miin min hmu ang e!" ti sapin a nghâwngah chuan ka kuah a, ka hmai chu ka phûm bo zui nghâl daih bawk. Miin min lo hmuh hlauh chuan a zahthlâk dâwn bâkah min lo sawi zui palh ang, Pastor a ni si a, hmingchhiatna lah hi a ho thei viau bawk si.

Sitting room țhutna dûp nuam taka min nghah pah chuan," Lo țhu chàwl rawh, bag ka rawn khâi lût ang a, coffee tui tâwkin ka siamsak  dâwn che nia," a ti a, rawn kún hniamin min rawn fâwp zauh a, ka chhàn lêt hma chuan dingin a chhuak zui leh nghâl vut a, ka en zui reng ringawt. Min duat viau chuan ka pangchang lutuk ang a, a nupui ni siin a enkawl ngaiin ka awm zâwk ang tih pawh a hlauhawm hial zâwk, ka duat a ngai zâwk daih si a.

Coffee tui taka a siam kan in hnuah chuan room lamah kan thuamhnaw ka dah fel a, min rawn pui ve nghâl a. Rei pawh a ni lo, kawng a rawn ri a, U Hruaia chu chhàwn tùrin a kal ta vat a, a hnungah ka zui ve nghâl a. Kan haw tih hriaa rawn lèn tumte an lo ni a, U Hruaia chuan be nghâl bawrh bawrhin an inchibai a, kei ngei pawh min rawn chibai hlawm a, zah hun a ni lo tih hriain hlim hmêl puin ka be hlawm a. Patling pathum leh pitar pahnih niin kum 60 chin chung lam vek an ni tawh ngei ang tih an hmêl leh an sam lan dàn ațang chuan a hriat theih a, an upa hlawm ve tawh sia, an bengvâr hlawm ka ti tak tak a ni.

An fel hlawm tawp ka ti, ka pite pahnih lah chu an nui duh bawk sia, an nui leh har har țhìn a, an bula awm a hahdamthlâk ka ti viau a ni. Kan thleng hlim ve deuh chauh a ni tih hriain lèn pawh an lêng rei lo," In buai rih dâwn êm mai, in awm ve reng thei tawh ang a, hun remchâng dangah kan lo la lêng leh dâwn nia," an ti a, kawtkai thlengin kan thlah a.

Ka eirawng bâwl min pui a, Aizawl lamah khân chawhmeh tùr kan lei nual a, a tihchi khawp mai. Kan han che sâwt lo dùn khawp mai a, min kuah buai loh leh ka che lai min lo ti buai a, min pawm kãng thùl, a châng leh," Lawk," tiin min han fâwp leh rih țhìn bawk a, kan hun hman dàn chu a hlimawmin a nuam ka ti tak zet a ni, hetiang hian Irene-i nèn khân an awm ve țhìn ang em? Tuna chimawm ru tak si; mahse, duhawm tak sia ka chunga a chèt dàn angte hian ani chungah khân a ti ve tho ang em? A ti ve tho ang, a duh êm țhin kha... Chu thil chu ngaihtuah zui duh lo chuan ka lu ka thing nak a.

Ka lung a lêng hran miah lo nia; a lèn ka rin tehlul nèn. Chaw ei kham hnu lawkah kohhran hnârkàitute an rawn lêng khap khap a, chibai kan inbûk leh liam liam bawk. U Hruaia kawm ve țhinhote an ni ngei àwm si a, ani tân chuan an upa hlawm tawh ka ti.

Ka nuin min rawn bia a; mahse, rei lo tê chauh tak tak kan inbia, inlêng kan nei a ni tih hriain min be rei duh bîk lo a ni, thil chinchâng hi chu a hre ve lutuk, min biak reng a châk ang tih chu ka hria; mahse, Aizâwl ațanga kan chhuah dâwn khân kan inbia a, Kolasib kan thlen hnu lawkah kan thlen tluan thu hrilhin ka be leh zawk a nih kha, min ngaihtuah ve êm mai a, hmun hranah kan awm ta daih bawk nèn, a àwm ka ti ve tho mai.

Kan nupa chuan kan han awm ve ta rak rak a, chaw eia min sâwm nawlh nawlh tâwk an awm ve reng a, min duhsak êm êm hlawm chu nuam ka ti. U Hruaia pawhin min duatin min ngaihsak êm êm mai a, a chhuah dâwn rêng rêngin ka kal ve àwm chinah chuan min hruai zêl a, ina keimah chauha ka lo awm hi a phal lo ni berin ka hria." Ka khawngaih che alawm," a tih loh leh," Ka bula i awm loh chuan ka ngai ang che, i lung a lo lêng palh ang," a ti tlat zêl a, a châng chuan naupang chhia ka ti ru ve deuh țhìn a; mahse, hetia a awm châng pawh hian nuam ka ti êm êm, min thlahlelin min ngaih vàng a ni tih ka hre ru ve tlat.

Kan inneih hnu lawk khân Nuteite pahnih kha an awmna lamah an chhuk leh thuai kha a ni a, an tum dàn chuan Kolasib lama min zui ve lawk kha an tum a ni a; mahse, kei ka lo damlo chho zui nghâl nèn, an tân an zirlai chawlhsan reng kha a tihchi loh a, Remi'n min zui hman bîk si loh avàngin kan nupa tê chauh khân kan kal ta a nih kha, a hnua Remi'n min rawn biaknaah min zui lo a inchhìrzia leh nuam lo a tihzia min rawn hrilh keuh keuh a, ka han hnèm viau nain nuam a ti thei meuh lo a ni ang, amah chauhin min tlawh tùrin a rawn kal ta vang vang a.

U Hruaia chuan a lo làwm hle a," I rawn kal ta sa sa, châm ve deuh la, Krismas hmang tùrin kan haw tlâng dâwn nia," a ti sauh sauh a, ani erawh chuan," Châkawm viau mah se chuti chen chen chàm chu ka hman bîk lo alawm, kan inah ka pawimawh lutuk a, ka tel lo hian an che hlei thei țhìn lo," a lo ti thung a.

Zànriah ei laiin Remi chuan Irene-i chanchin a'n zâwt lehpek a nih kha! Ka țhiannu hi chu aw, mitmeia khap lah hi a hre thiam duh dèr lo lehnghâl a, eng eng emaw chen hi chu hriat châk ru ve tho mah ila U Hruaia mood a tih chhiat ka hlauh vàngin ka sawi chhuak duh ngai lo a ni. Ani U Hruaia pawh chuan a hriat duh ang chu a lo hrilh ve zêl mai a, ka țhiani lah chuan," A chanchin i hre thei hlê mai, in la inbe țhìn em ni?" a ti leh khauh mai a, ka lo îp zawr mai. Chu zawhna zet chu, a chhànna hriat ka châk rualin ka hre châk lo tho bawk, lo la inbe țhìn ta se... ka thîk ngawt ang!

"A pu nèn hian kan inbe nasa ve țhìn alawm, min ngaina der vein a lo upa ve tawh bawk nèn, biak loh hi a har ve êm a ni, a tunuin a rilru a tina êm êm mai bawk si a, biak duh loha a rilru tih hrehawm ka duh lo a ni," tia U Hruaia'n a chhàn chuan," A nih tak chu, a pu chuan a tupa anga a en deuh che vàng a ni ngei ang, anni pahnih pawh an la inkawp tluang zêl chu a țha a nih chu, inkawp tluang zêl teh se!" a ti leh mai a, an titi chhûng zawng chuan ka lo inrawlh ve lo hrim hrim, U Hruaia chuan Irene-i chanchin sawi mah se a mitmengin min kalsan lo a, a nupui hlui chanchin a sawi chu lo thîk deuh pawh ka tum chuang lo, a chhan chu duh tak leh thlahlel taka min en leh vang vang țhìn chu ka hmuh ve kiau vàng a ni.

Zàn mutnaah chuan min kuah sauh sauh pah hian," Zanin chu ei zawha pum hmawm vek mai che ka duh!"  a ti sup a, fet zet hian min kuah bawk a. Ka nui hak phawt  a," Min pum hmawm thei bîk nâng, ka len ve êm hi," ka lo ti thung a, a lo nui hawk a," Thei teh rêng mai, ka'n țan ang e," a ti a, ka en hau lai chuan duhãm zet hian min rawn fâwp ta nghál a, a duhãm thiam êm êm khawp a, a sawi ang tak takin min ei zawh vek tum ang hrim chuan min keih mawlh mawlh a. Chumi pah chuan a kut chu ka taksa hmun tin maiah chuan a vah kualtîr bawk a, kei pawhin duhthawh zetin ka lo chhâng lêt a, a duh tâwka min tawh theih tùr chuan ka taksa chu ka lo insiam rem ve zêl bawk a.

Nupa kan ni a, nupa hlimna chu kan chèn ve ang chu, nupa kârah chuan thil sual a ni hauh lo. Mipa hrisêl tak a ni a, a duh ang pêk theih loh hi ka hlau zâwk a ni. Hlimawm taka nupa nun kan chen hnu pawh chuan min thlah mai phal lovin min la kuah reng a," Ka taksa nghènga i awm reng hi ka duh a ni," a ti tlat a, kei pawh chuan ka kuah lêt ve chial a. 

Zàna ka harh chuan ka thaw huai mai. Ka mit chu ka khap fak fak a, room-a zero bulb kan chhit tlaivàr țhin avàng room chhûng chu a thim êm êm hran lo. Heta kan awm hnuah hetiang hunah hian ka la harh ngai lo hrim hrim, ka mumanga U Hruaia a lo accident vànga harh ka ni a, ka mumang a ni chu ka lãwm tak zet a ni. Ani chuan min lo la kuah reng a; mahse, min kuah nghet tawh lo, a la mu tui viau bawk a ni ang, ka lu ka chét sawn pawh chuan a rawn harh lo rêng rêng. 

A muhìl hmêl chu hnai set sawtah ka en a, a khabe ațangin ka en chho a, a hmuiah, a hmui fawh nuam tak leh tlêma lang pawrh deuh lek lek ngei chu. Hei ngei hian ka thluak chenin a thunun thei țhìn a ni a, zei hi chu a zei ve thlâwt. A hnâr zum mâwi tak en chhoin chutah a mitah, a mithmul sei sawng sawng erawh hi chu a er hran miah lo, a seiin a tam a, a dum țha êm êm bawk. A mitko hmul ni se a buk țhain a dum țha hle a, a luhlul ve thawkhat ang tih pawh a hriat theih mai. He hmél putu ngei mai hi ka duh êm êm leh ka hmangaih êm êm ka pasal chu a ni, a hmêl a țhain a fel a, min duatin min ngaihsak êm êm bawk, hetiang mipa țha, pasal atâna ka nei thei hi Pathian malsàwmna ropui tak ka dawng a ni ka ti lo thei lo, min han duh ve thei ringawt mai pawh hi ka tân chuan han ngaihtuah lét cheuh cheuh pawh hian thil mak tak chu a ni tlat a ni. An chhûngkaw dinhmun leh kan chhûngkaw dinhmun han khaikhin phei chuan... mumang mai a ang zâwk, ka mumang a ni em aw tiin ka insik ru fo țhìn rêng bawk.

A hmaia chùlsak chu ka châk tak zet; mahse, a mu tui roh sia, ka ti harh ang tih ka hlau, châk viau mah ila ka insûm țàng țáng ta zâwk a. 

A tûkah erawh thawh ka hai a, a thawh lai pawh ka hre lo rêng rêng nia! Min la rawn kai tho zui, zahthlâk hian! Ka țhiannu rawn zin lai a ni lehnghâl a, a tihchi loh tak tak a ni,  nizàna ka harh suakbàk vàng vek.

"Ka naute, tho tawh teh!" tiin ka biang a rawn chûl zai zai a, ka mumang ram ațangin ka harh zui ta a ni, mi awm loh lai hi chuan 'Ka Lalnu' tia min koh a chîng a, khum lamah erawh 'Ka naute' ti hlîrin min ko thung.

Ka meng siar siar a, hnai zetah min lo en chhuk rùn niin. Ka mit chu ka han nuai a, amah vêk chuan," I dam țha lo chu a ni lo tiraw?" a rawn ti leh a, ka lu chu chêt sawnin," A tlai tawh viau elo?" tiin ka khap fak fak a, ani chuan," Tlai vak lo ve; mahse, i thãwm a awm loh chuan ka khua a har tlat a," a ti sup a, ka hmai chu a rawn chûl leh a, chuta țangin ka nghâwngah a chûl thla leh ta zêl a, a mit erawh chu hmun dangah a lèn lo, min en reng a, a mit pawh a khap lo.

Thuamhnaw inbel pakhat mah ka nei lo tih ka hre chhuak zat a, chutih rualin he inah hian Remi a awm ve reng a ni tih ka ngaihtuah chhuak bawk. Chu vàng tak chuan ka rizai sin lai chu ka nghâwngah ka pawt chho vat a, ani chu a lo nui hawk mai. Room-a kan awm reng chuan a fuh lo ang, mi pawh an rawn lêng thut thei tlat.

"Khawngaihin, kawr hâk lawk tùr min lo pe mai teh?" ka ti sap a, ani lah chuan," Kawr i ha nange? Tunah khân eng mah i inbel lo maw? Va sexy dâwn tak!" meng sawr sawr chung hian a lo ti zui a, ka hmui chu ka pet a, a hre ve reng sia, nizàna min hlihsaktu pawh kha amah ngei hi a ni.

"Min lo lâk thuai mai teh, Remi pawh a ngaih a lo țha lo tawh mai ang tih a hlauhawm; bâkah, mi pawh an lo lêng lût thut thei a, kan chhuah vat a ngai a ni," ka ti leh a, ani pawh chu a tho ta thuai a, kawr hâk tùr chu min rawn pe nghâl a.

"Vawi khat chuk keuh pawh ka hlawh dâwn lo maw..."  Khuma țhuin a kawr min pêk hâk ka tum lai tak a ni a, chutia a rawn țawng chhuah leh tâkah chuan chàwl datin ka en vat a, ding ngurin min lo en reng a, 'A naupan chhiatna a lo lang leh ta' ti rilruin," Ka ha pawh ka la nawh loh hi," ka ti a, ani lah chuan min chhâng lo chuan min en rùn reng ringawt a.

Ka thawh chhuah chuan Remi'n min lo fiam zui a," Pasalte kaih thawh ngiat tlatte chu a," a lo ti hlak a, a lo nui sûng nghe nghe. Lei chhuah khumin U Hruaia bawnghnute min lo thlit chu ka ban zui nghâl a, zîng tinin ka in ta ziah a nih hi.

Remi chu a sawi ang takin a châm rei thei lo, a haw leh thuai a, a haw dâwnah U Hruaia'n kawr mâwi tâwk tak a leisak ve nghe nghe," Min rawn tlawh a, i phû hrim hrim, ka làwmthu sawi nân ni rawh se," a ti tlat a, Remi pawhin a hnial duh bîk lo a ni. Han châm deuh thei se, Krismas hmang tùrin Aizâwlah haw tlâng thei ila a țhat tehlul nèn; mahse, a buai ve țhinzia ka hria a, ka chelh lui duh lo.

"Krismas-ah Krismas putarin eng nge pe che se i duh ang?" tia min zawh chuan ka en vat a, a ti fiam emaw ka tih vàng a nia; mahse, a lo nui miah lo, a lo thutak nasa mai niin.

"Nangmah ka nei tawh che a, eng thil dang mah ka mamawh tawh hleinem," ka zah lohna zawng zawng sâwm khâwmin ka ti a, ngai ka ti lo rêng a ni. Ani ka bulah a awm tawh a, ka pasal a ni tawh bawk a, thil dang duh leh mamawh ka nei lo.

Min rawn fâwp a," Min chhàn dàn vàng a nih kha, duhawm reuh lutuk mai!" a ti sup a, a thil sawi chuan min ti hlim veng veng thei nia! A țawngkam khat chauh pawhin min ti lãwmin min ti hlim thei a, ka rilru leh thinlunga hna a thawh nasatzia hi hre ve thei ta se ka pasal mah ni se a lãwm ve thei ngawtin ka ring.

"A nih, nang?"

Min en vang vang phawt a, chutah, ka pum lam en chhukin," Nangmah ang tak naute," a ti sup a, min rawn hnaihin ka pum chu a rawn dawm a," Hetah hian nakinah chuan kan naute a la rawn awm ve àwm si a, ka va duat dùn dâwn tak che u êm!" a ti daih a, ka rin loh lam daih thil a nih vàngin chhàn lét ngaihna pawh ka hre lawk lo, ka en reng ringawt.

Kan hma hun tùr chu ka hre láwk hauh lo va; mahse, Pathian zârah fa chu kan la pawm ve ngei chu ka beisei a, ka ring bawk. Tunah chuan kan la innei hlim deuh chauh a ni a, fa a neih nghâl chûk chûk theih loh. Ka ngaihtuah tâk chu heti khawpa naute awt si chu engati nge Irene-i nèn khân an neih loh ni? Nge an vànduai? An inchènchilh rei ve viau a nih kha, an chî a inhamtawng lo pawh a ni ve thei tho mai, nupa inhmeh tak leh hmêl țha dùn tak an ni a, fa pawh nei ta chiah se an fa chu a hmêl țha dâwn tih a chiang sa a nia, fa a awt a, a pa lahin tû a awt viau bawk a, fa kha han nei ta chiah se Irene-i khân mipa dang a ûmsan kher ang em?

"Ka nawr lui duh hauh lo che a, ka nawr luih theih pawh i ni lo va, innawr luih theihna thil pawh a ni hek lo. Rai leh rai loh chungchâng chu Pathian thu thu a ni nain ka duh dànah chuan rai thuai thei la chu ka ti, rai i la duh rih lo emaw i la inpeih rih lo emaw a nih pawhin damdawi chu ei miah suh aw, khawngaihin ka ngèn che a ni."

*RUAHMAN LÂWKNA ANG THLIP THLEPIN THIL HI A KAL THEI VEK LO TIH HRIA LA, CHUTIANG HUN A LO THLEN PAWH CHUAN RUAHMANNA DANG NÈN INHER MIL THEI TÙRIN INRING RENG ANG CHE*