☆KA BEISEINA☆ - 28 By Dingdi Pachuau

☆KA BEISEINA☆ - 28 By Dingdi Pachuau

U Hruaia thil sawiin ka ngaihtuahna a luah khahzia chu, thui takin thil tam tak min ngaihtuahtîr hial mai. Irene-i khân U Hruaia fa hi pai duh rih lovin damdawi hial a lo ei țhìn em ni ang tih ka ngaihtuah a, a lo nih chuan U Hruaia hian a hmangaih êm avàngin rilru na takin a thlîr liam ve mai țhìn em ni ang? A nih loh pawhin Irene-i khân fa neih rih loh a sawi mawipui a ni thei mai ang em? A thil sawi dàn ațang kha chuan a rin theih thuak tlat si a ni. Fa a awt viau a, chutiangin a pa pawhin tu a duh bawk, min fiam fo a nih kha, min fiam dàn khân Irene-i kha a fiam ve țhìn tho ang em? Fa lah kha an nei hauh si lo va, vànduai vànga la nei lo an nih chuan Irene-i tân khân a hrehawm duh viau ang a, chuti a nih loha la nei duh lo hrim hrim emaw a nih chuan ka pa chu a ning ru viau thei ngawt ang le.

Krismas hmang tùra Aizâwl lama kan haw dâwn zànah inlêng kan nei ve nak nak a, heta Krismas hmang ve mai tùra min sâwm pâwl an awm bawk a; mahse, fiamthu thoin a nia min sàwm ni. Hetah kan hmang dâwn lo tih leh naktûkah Aizâwl panin kan haw dâwn tih an hriat avànga lo lêng, min rawn thlahte an ni a, fiamthu nèn kan ri nak nak reng a, ka kawm rualpui awm lêm lo mah se ka pasal nih leh hna vàngin ka kawm an ngai a, upa viau hlawm tawh mah se hringnun zin kawng an lo zawh thui tawhin harsatna pawh an lo pal tlang tam tawh a, chutiang lamah chuan tawn hriat an lo nei tam tawh a ni, thil pawh ka hre tam thei zâwk ngei ang.

Zàn mutnaah inkuah rialin kan chhûngkaw chanchin kan sawi dùn sep sep a, Krismas an hman țhin dànte chu min hrilh pah a, kumin pawh Nutei leh Zami an rawn haw thei dâwn a, a cousin hmun danga awmte pawh, nuam viau tùra a ngaih thu min hrilh lai chuan," Kum tin Krismas in hmang khâwm ziah tihna em ni?" tiin ka lo ti vat a, ani chuan," Um, ka pa hian loh theih loh takmeuh a nih loh chuan hunpui na nâ nâ hi chu hmanho a duh tlat zêl a, kan zàwm țha thei khawp. Ka naute nèn hmun danga kan awm lai pawh khân Krismas leh Kum tharah hi chuan kan haw ngei ngei țhìn," a ti a.

"I nauteho ka koh khân tu mah ka û si lo va, tûn hnu deuha ka ngaihtuah hian an thin a rim ang em aw ka ti ta, Ahlutei hi chu ù a rem lo ve êm mai a, chutiangin Nutei pawh; Zami tak hi chu ka hre thiam chiah lo, an ngai haw lo ang tiraw?" tia ka sawi chhuah chuan a nui huk a," Ngai haw lo ang, an duh daih zâwk bawk ang. Bâkah, hmeichhia hi chuan nula țheuh țheuh, in ù hi in duh lo țhìn riauin ka hria, i nulât lai khân i ni ve tho lo maw?" a rawn ti ta thung a, ka chalah chuan a khabe a rawn nghat zui zat bawk.

"A, min û an awm khân nuam ka tih theihzia chu a! Mahse, ka hming hi a buaithlâk deuh a, a lo țial ve deuh bawk nèn, min û hreh hlawm niin ka hre țhìn," ka lo ti leh a, ka ti tak tak. Bawiha leh a țhianteho khân min û ve țhìn a, nuam ka ti țhìn viau, ka thù ve hmèl êm a.

"Dâwt i sawi miah lo maw?" tiin min rawn en ta thung a, a nui duh miah lo, kei pawhin en ve karin," Teuh lo! Thu dik tak a ni tih ka tiam ngam sak," ka lo ti lét a, ka nâk kheuh zauh pah chuan," Tak tak?" a ti leh a, ka chhâng thei lo, dèk ka hua a, ka eu zawk mai!

"Dâwt i sawi chiang, kha, min chhàn theih miah loh kha aw," tih pah chuan min kheuh leh a, ka tãl nasa ta mai. Ani lah chuan," I lãm thiam lutuk tlat," tiin, a tàwpsan duh dèr lo, a hnuah phei chuan a zahngaihna ka dîl ta hial a, tih tùr eng eng emaw min tuksak zet hnuah kan tàwp thei ta hrâm a ni, kan thãwm hria lo awm ta se mak an ti ngawt ang chu.

A tûka kan tlàn lai chuan," Ka nu hi tlêmin, a khirh deuhin a țawng duh deuh țhìn a, i hre thiam hrâm hrâm dâwn nia aw, a țawng i hria a nih pawhin nuam lo tih phah nân chuan hmang duh miah suh aw," a ti a, ka kut chu nghet zet hian a hmer pah bawk a, kei pawh chuan a kut chu hmer lét vein," Aw le, ka hre reng ang e; mahse, ka bula i awm phawt chuan eng thil pawh tawn ka inhuam vek alawm, 'a nuamah leh a hrehawmah pawh' kan tih tawh kha," thutak zet hian ka ti a, duh tak hian ka en phei a, ani pawh chuan min rawn enin a nui ve suk a; mahse, motor khalh lai a ni a, min en rei hman lo, kawng lam chu a en leh ta vat a.

"Ka lâwm e, Ka Lalnu duh tak," tiin ka kut chu a la kãng a, a fâwp ta zauh a, nuam ka va ti leh mai mai tak! A chêt dàn hi ka duh thei êm a ni, a tàwnah hian ka luang liam a ni ber mai.

A kut leh a kut chu ka en tawn țhìn a, mak ka ti hial záwk a ni, a inlen hleih nasa mai si nèn; mahse, ani zawng a sawi tawh ang khân mipa a ni a, pa lian ve tak a ni bawk a. Kei lah khal vak lo, a sîn lam deuh chi ka lo ni bawk nèn, kan kut en ringawt chuan pafa kut ni àwma mawi a ni.

Kan tlãn tluang bawk a, ka rin aiin kan thleng hma daih mai, ka pain min lo dawngsawng leh a," Ka fanu thar chu i rawn puar haw ka lo ring tawh asin le," tiin min lo fiam zui leh nghâl zat bawk a, ka nui ringawt. Pa uapna hnuaia ka awm ngai loh vàng nge ni hetia ka pain min lo dawngsawng țhìn hi nuam ka ti tak zet a, min tiphuisui bîk ka ti dâwn nge, a hahdam bîk ka ti. A fel leh fel loh lam ka ngaihtuah lo va, a uapna hnuaia chhûngkua kan awm thei hi a thlamuanthlâk ka ti hrim hrim.

Zàna Ahlutei rawn haw chuan min rawn hmuh veleh nui sângin," In rawn thleng tih ka hriat khân rawn haw hma ka duh viau a; mahse, kan buai zual lutuk a," a rawn ti nghâl a, kei chuan lo hre thiam takin," Buai ngawt ang, i inhralh țha leh àwm sia," ka lo ti ve a, ka bula țhutna ãwlah chuan rawn țhu ve nghâlin a han thaw huai a," In rawn thleng tluang a, a làwmawm. Mâma hlim hmêl pawh kan hmu leh thei ta a, chàu viau mah ila a manhla tho tho e," a rawn ti leh a, U Hruaia chu ka en vat a, ani chu a lo nui suk a," Kei aia ka nupui i be hmasa zâwk kha i ti țha e, tûn țum chu. Chuan, eng tikah nge kan mâkpa tùr chu min hmuhtîr ve dâwn? Nge hna thawk hian i lêng tar mai dâwn zâwk?" a ti zui zat a, ani lah chuan," Lèn tar chu pawi pawh ka ti lêm lo, a nat vung vung loh chuan," a lo ti mai a, room ațanga ka pa rawn chhuak phei chuan an țawng chu a rawn hre ve hman chiah chiah a," Lèn tar lam kha chu rilruah dah loh tùr aw, in hmu zo a nih chuan pasal hi chu neih ve ngei ngei tùr a ni, nakina in buai loh nân," a rawn ti ve nghâl a. Ahlutei chu tho vatin," An sawi țan leh dâwn ta. In duh chuan lo sawi chhunzawm r'u, ka inthlâk dâwn," a ti a, a bag chu banin a room lam panin a kal zui ta nghâl a, ka pa chuan," I hmêl hi a chhia pawh a ni tawp si lo va, engati nge bialpa hi i la neih miah loh ni?" a ti zui a, ka pa thu sawi chuan ka nuih a ti za ru viau mai.

Ka nu rawn thlen hnu rei lo teah chuan chaw ei kan siam nghâl a, chaw ei pah chuan titiin Kolasib lama kan khawsak dànte chu min zâwtin an țawng barh barh a, ka nu erawh chuan eng mah min zâwt ve lo chuan a dàwr chungchâng hlîr a sawi thung. Mi fing tak ni lo mah ila ka nu hian min làwm tehchiam lo tih chu ka hre thiam ve tho a, bâkah, U Hruaia pawhin a khirh deuh tih pawh min hrilh tawh kha, kha vàng khân ka rilru ka siam rem hman tawh a, a chungah lungnih loh ka tum hauh lo. A fapa nupui atân hian min duh viau lo ang tih ka hre sa a, ka dinhmun ni se ka hre chiang viau bawk a, ka dem lêm lo, tunah pawh hian direct takin min la be miah lo; mahse, hei hi kan inneih thutiamah khân ka chham tel vek a, U Hruaia ka hmangaihnaah hian eng harsatna pawh tâwk dâwn ila ka thutiam kha a derthàwn ka phal ngai lo ang.

"Nakinah Nutei leh Zami an lo haw ve hunah zànah kàwn chei fangin kan lêng chhuak ve dâwn nia, kumin chu an cheimawi zual viauin ka hria," Ahlutei'n a rawn tih chuan ka pa pawh chuan," Ni e, in unau in kim țhap hunah in lêng chhuakho dâwn nia, kei lahin ka ho peih tawh mang si lo che u a," a lo ti ve chuar chuar a. Ka nu erawh chuan," Kàwn chei fang rual pawh in nih tawh loh hi, țha takin dàwr nghâk ula a hlâwk fê zâwk," a lo ti hluk a.

"A mak thei êm mai, Bawihi phei chuan a nghâk reng reng alawm le, intihlima chawlh hun pawh an neih ve a ngai, hna kan thawk ang a, chawlh hun pawh kan nei ve bawk ang, hna thawh tlawk tlawk tùr a ni ngai lo," ka pa chuan a ti a, ka nu chu a ngawi ta hmak mai. A hmêlah erawh a lungawi vak lo tih a hriat mai a, melh pawh ka melh ngam vak lo, vawi khat ka melh zawk a ni mai.

Mi dang chu an titi chhunzawm a, hrehawm ka tih a hlau deuh a ni mahna," Anne, naktûk chu dàwrah rawn kal ve mai mai la, thleng thar țha tak tak a tam asin, i bial hlui i rawn fang ve pah a ni mai a?" nui chung hian Ahlutei chuan a ti a, kei chuan," A châkawm ngawt ang chu, inah tih tùr dang a awm loh chuan," ka lo ti ve mai a. Ka pa chuan," Inah chuan che tùr an awm alawm," a lo ti vat a, U Hruaia erawh chuan," Kan rawn kal dâwn nia, rei erawh kan awm hman lo ang, a nute kan va tlawh kual ve leh ang a," a lo ti thung a.

A hmain Remi leh ka nu pawh ka be tho a, kan haw a ni tih pawh an hria. Remi chu rawn lèn a duh viau a; mahse, a zak ve deuh tlat a, kei pawhin ka ti lui duh lo a ni. Inhmuh hun chu kan la nei tho tùrah ka ngai a, naktûk rum ruma ka nute tlawh erawh kha chu ka lo ngaihtuah ngam miah lo va, inah tih tùr țûl tiin kan awm rih ang chu ka ti ve kha a nia.

Mut hmuna," Ka sawi tawh kha, ka nu hi chu hriat thiam a ngai țhìn, i rilru tih hrehawm phah nân hmang miah suh aw," a tih chuan," Min hrilh tawh a, ka hre tawh alawm, a thil sawite kha a dik lohna a awm hran lo, chhûngkaw tân țhahnem a ngaih êm vàng a nih kha," ka lo ti ve thung a. Min en vang vang a," Ka naute hi chu aw, i rilru hi a va țha tak êm! Ka nei che hi mipa vànnei tak chu ka lo ni," a ti sup sup a, chutah," Engtin chiah nge ka nu hi i hmuh rêng rêng min han hrilh teh?" a ti ta khauh a.

"Țhahnemngai tak leh chhûngkaw tâna inpe zo tak nu a ni," tiin ka chhâng a, ani chuan," Ni lo, a nungchang lam a nia ka tih ni," a lo ti thung a, chutah," Zêp neih hauh loh tùr aw," a ti leh a. Ka chhàn hma chuan ka ngawi vang vang phawt a, chutah," Kan induh tawn hma khân lo hria ni ila chuan ka rilru a dang deuh maithei; mahse, tunah chuan eng thil mahin a ti danglam thei lo ang, Pathian leh kohhrante hmaah thu kan tiam tawh kha," ka ti ve ta a.

Eng mah sawi lo chuan min en vang vang leh phawt a, chutah, min kuah nghet sauh sauh a, ka chhîpah a khabe nghatin min kuah ta reng a, min kuah nghet si a, thâwk pawh a harsa lek lek a ni; mahse, min kuah ang ang chuan thu âwih takin ka awm a, ka tãl hek lo. Rei angreng tak min kuaha kan ngawih vang vang hnuah chuan," Ka lãwm e, ka naute," a ti sup a, chutah, min thlah a, ka hmuiah lungchim takin a rawn fâwp ve ta thung a.

Zîng khat thawh ka hai tih loh kha chu thawh ka hai tawh lo va, ka thawh khalh ta ziah bawk; mahse, thawhsan hi a har tawp, a phal lo țhìn a, min kuah bet leh reng țhìn. A tân nupui țha tak nih ka tum tlat a, nupui țha tih tùr nia ka hriat hi chu ka ti ve zung zung țhìn rêng bawk, tunah hi chuan kan la innei hlim deuh bawk a, nau ka la pai buai lo bawk nèn, ka thâ pawh a la țha viau.

Ahlutei dàwrah kan kal a, a lo lùn lehpek kher mai, a zawrh zînga kawr ka duh ber chu la tùrin min ti na a, ka lâksak duh lo, kawr ka ngah tawh a, hâk sèn loh ka nei hial tawh a ni. Kan chhuah dâwn chuan," Ei tùr ka chah mêk asin, ei ve leh rih phawt ula?" a ti a, U Hruaia chuan," A, kan ei lo rih mai zâwk ang e, puar deuh khân lo ei zâwk mai rawh, i hah êm kha," a ti thung a, kan chhuak ta thuai a.

Ka nu chu a dàn ngai tein inah a lo awm a, in pawh a lo ti fel viau mai. Ka zin chhuahsan ngai lo tluk kha a ni a, rei ve tâwk tak kan inhmu tawh lo bawk a, ka han hmu leh chu ka dam suai suai maiin ka hria, chutih rual erawh chuan ka hnuk a ulh titih deuh tlat mai a, ka mittui pawh ka khap per sak nghe nghe a ni.

U Hruaia chuan thingpui hmeh tùr a lei a, hlim taka thingpui kan in lai chuan ka nu chuan," Hunpuiah chuan chhûngkaw kima chawhlui kîlho in duh ngei ang a, in pelhê thei tawh lo ang, chu vàng chuan, zanin chu hetah zanriah ei ve nghâl mai ta che u, hun remchâng in neihchhun a ni mai àwm si a," a ti a, U Hruaia chhàn tùrah ka ngai hmiah. Ani chuan," Chaw kan heh dùn riau asin, kan ti hautak lutuk ang che u tih pawh a hlauhawm," a lo ti ve thung a, a nui sûng bawk a.

U Hruaia chu a tlãn chhuak leh rih a, thil pawimawh tih tùr a nei lawk a nih ringin ka zâwt hran lo va; mahse, zanriah hmeh atân Bâwng sa leh sangha a lo va lei niin, thlai hnah lam pawh a rawn lei tel nual bawk a.  Ka nu chuan," Awhaw.. a ngai lo asin maw... i rawn lei tam bawk si, ei pawh kan ei sêng nâng, hàwn țhen ang che u," a ti chùl a, a rawn lei tam lah tak a, Bawiha nèn chauh chuan an ei rei ve khawp ang le.

Remchângah lain Remi chaw ei tùrin ka sâwm ve nghâl zat a, ani erawh chuan," Awi, a pawi e!! Ka rawn ei hman lo, chhuahna tùr ka nei a," a rawn ti a, kei chuan," A mak thei!!" ka ti phawt a; mahse," A, ni dangah hun remchâng a la awm leh êm ang chu maw," ka ti leh ta zâwk a, a rilru ka ti hrehawm ang tih ka hlau a ni.

Mâkpa chuan eirawng a bâwl suah suah a, ka pa hnênah hetah zanriah kan ei dâwn a ni tih pawh kan hrilh vek tawh bawk a, lungmuang tak leh rilru hlim sârhin ka lo pui ve a, a chângin a rawngbâwl chu ka lo ti buai bawk a, ka nu pawhin min lo nuih min lo nuih mai. Bawiha pawh a rawn haw har lutuk lo va, kan inhmuh loh hun chhûng a la rei vak loh nèn, ka hmu sâng ta sawtin ka hria, a lo țhang leh hman a ni ngei ang.

Hlim takin kan titi pah a, U Hruaia chuan ka nu chu 'a pî' tlat mai a, ka hre thiam lo lek lek a ni. 'Nu' ve mai àwm ka ti rilru a, nakinah ka la sawi chhuak chhin ang, a nu rual a ni ve tho a, bâkah, a nupui nu a nia, nu ve mai se a dik lohna a awm hauh lo.

Haw kawngah ka sawi chhuak ta ngei a, ani chuan," Ka pì khân a dik chiah alawm, mipa tân chuan a nupuia nu kha a pizawn a nia. I nu chu ka pizawn tihna a nih chu," a lo ti mai a, kei chuan," Chu pawh chu ni se, tûnlaiah chuan an 'nu' deuh vek tawh tho alawm, ko ve mai la?" ka ti ve leh thung a, min rawn enin a nui sak a," I rilru a lo na deuh a ni maw?" a tih chuan," Âih..." uar zet hian ka lo ti a, a nui zui ta hawk hawk mai.

" 'Ka pi' ka tih khân ka ti dik chiah a, ka ngainatna a nêp phah chuang hauh lo, ka nu ang chiah thoin a nia ka en ni, nangmah hringa hmangaih taka enkawl sei liantu che a ni bawk nèn, engah nge ka ngainat loh tehlul ang? 'Ka pi' tia ka koh vàngin ka en dàn a dang hauh lo bawk a ni," a hnu deuhah chuan a rawn ti leh ta a, ka ngawi reng ringawt. Lehkha kan zir lai khân Mizoah kan zir țhìnin ka hre deuh a; mahse, a rei ve tawh êm mai a, ka hre chiang ngam tawh lo a ni.

Nutei leh Zami rawn haw ni chuan U Hruaia nèn Lêngpuiah kan lo hmuak a, thlawhna ka la chuang ngai lo va, hnai takah ka la hmu ngai lo bawk nèn, an rawn țum tùr chu ka lo thlîr reng a, ka lo phûr ve khawp mai. U Hruaia chuan," Hun remchâng kan neih hmasak berah kan zin ve dâwn nia, khawi laiah nge kal i châk ber?" tiin min zâwt a, kei chuan," India ram chhûngah maw?!" ka lo ti vat a, a lu a lo bu nghat a. 

Zami chu a țawng barh barh reng a, Nutei erawh chu a țawng tam lovin U Hruaia'n a biak loh phei chuan a țawng lo hrim hrim. A bengah earphone a vuah a, biak buai a duh lo a nih ka ring ve tawp a, an lo thlen țantirha," I chau em?" tia ka biak bâk kha ka be chhunzawm ta bîk lo, Zâmi'n a țawng kêp vek ti tawh mai ang.

Nutei nèn kumah chuan kan inrual ber a; mahse, chhûngkuaa naupang ber leh duat rawn a ni bawk a, a nu leh pa leh unaute'n an ngaihsak bawk nèn, a pangchang thiam khawp mai. An rawn thlen zànah pawh chuan a chawhmeh duh ber siamsak a ni a, ka pa chuan," Ka Duati a lo haw tawh bawk a, a duh zâwng hlîr kha siam tawh ang che u," a ti a, ka nu pawh chuan," Ni e, lehkha zir awmchhun a ni tawh a, kan duat hi a phû hliah hliah, a awm chhûng chuan a duh apiang a eiin a in ang," a lo ti ve bawk a, naupang ber ta chu an duat rawnin keh thei dawmin an dawm tlâng tih a hriat hliah hliah.

Zanriah ei khamah kan chhûngkaw kima thil min rawn leisak chu an phawrh diat diat a, kei takngial pawh min rawn hre ve reng chu mak ka ti a, ka lãwm veng veng mai. U Hruaia chu inkhâwmnaa ah tùr bag țha tak an rawn leisak a, a savun lah chu a țha tawp a, to pawh a to ngawt ang. Ahlutei nèn chuan perfume min rawn leisak ve ve a, a rim chu a changkãngin a rim tui veng veng mai.

Nutei'n," Pudding tui tâwk ka ei châk," a tih chuan ka pa chuan kan ei siamtute chu a ko vat a, an rawn phe nghâl vat vat a, rei lo têah kan inkimin bowl lian vak loah hian an rawn chhawp ta far a. Ka han hâwp chhin hlek a, tui ka ti kher mai; mahse, Nutei ve thung chuan tlêm a hàwp hlek hnuah," Hetiang hi chu a hnèawm tawh ka ti, a dang ka duh," a lo ti daih thung a, a dang han siam mai tùr a lo awm tawh si lo, an han buai deuh laih laih a, lei mai an sawi rîk vuai vuai tawh lai chuan," Ka ei châk leh tawh rih lo," a rawn ti leh ta daih a, lei an tum pawh chu an țhulh leh ta rih a ni. 'Mihring dinhmun leh khawsak phung inan loh theihzia hi chu aw' ka ti rilru vawng vawng ringawt, kumah inrual mah ila ani zawng a dinhmun hian a zir êm a, duh duh neia ei thei a ni a, a pangchang deuh a nih pawhin a mawh lo ve. Kei chuan ka dinhmun ka hre chiang a, hetiang thil pawh hi ka ei ve ngai lo, tuna mi pawh hi tui ka ti êm êm bawk a ni.

U Hruaia'n," Kum inrual tlâng pawh hi rilru a lo inthlauh theih viau a ni tih zanin khân a chiang lehzual," a tih chuan ka en vat a, a sawi chhuah chhan chu ka hre thiam chiah lo deuh a. Amah vêk chuan," Ka naute hi chu kawng engkimah i puitling êm êm vek mai a ni," a rawn ti leh a, ka ngaihtuah a, ka hre thiam ta ruak mai. Nutei nèn min khaikhin a ni.

"U Hruai, kan dinhmun a inang lo êm mai. Ani zawngin nu leh pa leh u, duat êm êmtute a nei a, duat rawn a nih bâkah a dinhmunin a zir lutuk! A duh duh nei thei dinhmunah a ding a, a duh apiang tihsaktu tùr u pathum lai a nei bawk che u. Kei, pa nei lo leh fa u zâwk nèn chuan tlêm tê pawha khaikhin chi kan ni lo. A dinhmunah hian ding ve ta ila ka pangchan dàn tùrzia mai chu a! Ani zawng pangchang thei dinhmunah a ding miau a, a mawh hauh lo," ka ti ta duah a. Kei, hmeithai fanu leh ani, Ex - MLA fanu tlum ber zawng khaikhin chi ziazâng kan ni mawlh lo a ni.

"Khatiang rilru puitling i put vàng tak khân a ni ka duh êm êm che! He khawvêlah hian piang nawn leh thei dâwn ta pawh ni ila nangmah tho kha nupui atân ka nei nawn leh duh tho ang che, vàn ramah pawh chhawm chhoh zêl che ka duh hial ang!"

*MIIN NANGMAHAH DUH KHAWP LOH LAI AN NEIH PAWHIN PAWI TI SUH, ANMAHNI NGEI PAWH AN INDUH KHAWP CHUANG LO A NIA*