☆KA BEISEINA☆ - 29 By Dingdi Pachuau

☆KA BEISEINA☆ - 29 By Dingdi Pachuau

A ni tèlin U Hruaia min duh vezia chu ka hre chiang chho ve telh telh a, min ngaihsak êm êm a, an in chu hrehawm ka ti ang tih a hlau ni berin ka hria. Ka thil tih engkimah min chêtpui a, kan ina kan chêt dàn leh an ina an chêt dàn a inang lo êm êm si a, ka ti sual palh ang tih a hlau a ni maithei, min țawng khum miah lo mah se ka nu leh Nutei'n min ngaina lêm lo tih ka hria a, țawngkain sawi chhuak kher lo mah se mi â nilêng lo tân chuan min ngaina lêm lotu chu a hriat theih ve tlat a ni. Lehkhabuah leh thawnthu lamahte leh Mizo film lamah pawh mo dinhmun chu ka hre ve fo tawh a, chu vàng chuan a tùr ve rêngah ka ngai a, ka biak țhulh phah lo; mahse, ka pate ka biak ang êm chuan ka be lo deuh, min lo ning ru viau ang tih ka hlau, ka inthlahrung ru deuh a ni.

Krismas chu nuam ti takin kan hmang liam a, ka bulah U Hruaia a awm tlat a, nuam ka ti lo thei lo. Ka țhianteho pawh Remite ina kan kal țumin ka hmu hlawm a, U Hruaia a tel ve avàng chuan kan țhianho titi anga titi kha a rem chiah tawh lo an ti deuh nge ni, an thutak hlawm tlat a, an titi bawrh bawrh ngam lo deuh niin ka hria, Lalkawnga zawng awm  se chuan a zia deuh mahna. 

A hnu deuha Remi nu leh pate leh U Hruaia, sitting room lama an titi tâk hnuah erawh chuan an zia tak tak an rawn chhuah leh ngam ta a, Jim-a chuan," Kumin chu Lalkawnga nèn in awm lo ta a, kan kim lo hûih tawh a, a nuam vak lo," a han ti a, Remi chuan," Sawi sawi ve ngai lo berin a ti hmasa ta ber a, a dawtah tu nge ni ta ang?" a lo ti vat a.

Jim-a chu rawn kûn hnai deuhin,"  Mapuia hian a chân ta duai si a, a hmanhmawh loh vàng vek a ni, kan pastor lah a lo hmanawh nasa mai si, a khawngaihthlâk asin," a rawn ti sur sur a, dawhkàn kîlin kan ințhut hnaih hlawm a, a țawng chu ring lo mah se kan țhianho chuan kan hre vek thei tho.

A thu sawi awmzia chu ka hre chiang ngam chiah lo nain min sawi chhan niin ka hre deuh a, Remi lah chuan lo hre sa ang mai hian," A che satel êm a nih kha, hetiang hunah hi chuan rîk phat a ngai asin," a lo ti ve leh a, chutah," Ngawi tak rawh, chêng thîr ka nei alawm, ka la ral tak ang e," nui chung hian a ti leh a, mi dang chu nui ring ngam vak lo hian an lo nui hlawm a,  Mapuia lah chuan," I ho êm mai a! Chêng 100 ka duh daih zâwk!" a lo ti ve bawk a. An chimawm thiam si, an fiam rawn a, kan chungchângah thil ni àwm tak takin an puan a, kei ngei pawhin thu dik a ni nge dâwt pawh ka hre thiam chiah lo, amah lahin a lo hnial hauh bawk si lo.

Haw kawngah U Hruaia chuan ka kut vuan pah chuan," I țhiante mipa zînga pakhat khân a ngaizâwng che tiraw? A hmaa ka lo lèn paawha lo lêng ve kha," a rawn ti chhuak a, kei chuan," Âwihawm loh e,, chutiang an awm lo," ka lo ti thung a. Ani lah chuan," Zêp kher lo la, ngaizâwng che pawh ni se hei kan innei tawh a, a tân awmzia a awm tawh chuang hleinem," a ti leh a, ka rin deuh; mahse, a sawi chhuah loh avànga ka hriat chian ngam bawk si loh Mapuia'n min lo duh ve reng a ni tih kei pawhin zanin khân ka hre chiang ve chiah a ni a, ani hi chuan a lo hre reng a lo nih hi!

"Min ngaizâwng tih a sawi hleinem," ka ti ve thung a, ani lah chuan," Ka hriat vàng a nia ka hmanhmawh tâk êm êm ni, neih thuai thuai che ka duh laiin nang lahin inngaihzàwn phawt kha i rawt a, ka duh dàn chuan kal thei ila ka hnial ngei ang che, ka rilru kha i hre ve hauh si lo va. Inneihna hi mi pahnih inkâr leh duh dàn inang a ngaih vàngin ka nawr luih che a thiang bawk si lo, chuta kârah i bulah ka awm reng hman bawk si lo nèn, Irene-i nèn kan inngaihzàwn lai ai khân ka rilru a thlamuang lo zâwk," a ti leh ta duah a.

"Chu, Irene-i ai pawhin min lo ring lo a ni maw?" han tih deuh sak ka duh viau nain ka ti ngam hlawl si lo va," Min lo va ring lo tak!" ka ti chhuak ngam ta țâwk a, a nupui hlui hming a rawn sawi chhuak chuan thîkna eng emaw tak min neihtîr tlat a nih chu.

"Ni lo ve, ani nèn kha chuan ni tin deuhthaw kan inhmu thei a, nang nèn erawh chuan kan inhmuh theih loh bâkah hêltu che, kei ai pawha i lo kawm nèl hmasak kha i bulah a awm tlat a, ka rin lohna lam che ni lovin keimah ber hi i tân ka induh tâwk zo thlâwt lo a ni ber mai, mite anga hna sâng thawk ka nih loh piah lamah i tân ka upa mah mah i tih ka ring bawk a, chuan ..." tiin a han ngawi deuh dat a, zàwi deuh sup hian," Pathlawi ka ni bawk si a," a ti leh leh a, min rawn en hauh lovin kawng lam chauh chu a en ngur a.

A thil sawi tàwp ber chuan ka nuih a ti za deuh tlat a, ka nui chhuak hak nghe nghe. 'Pathlawi' tih han sawi chu a nuam a ti chiah lo ve deuh pawh a ni ang, chu tak chuan ka nuih a ti za tlat pek a nih chu.

"Pathlawi zei leh hmêl țha!" ka lo tih zawm sap a, min rawn en zawk a, a hmui petin min hmer nghet salh a, a nui deuh a ni tih a sîr zâwng ațang pawh chuan ka hre thei. A pathlawi hma daih, ni leh lo, a tlangvàl chhoh lai ațang tawh lo ka star kha a ni a, pathlawi a nih leh nih loh hian keimahah awmzia a nei phâk lo, tunah pawh hian ka pasal ni tawh mah se a hma ang tho khân ka la star êm êm tho a, ani hi zawng ka dam chhûnga ka star reng ka ring hial a ni!

December ni 31 zanriah ei hma deuh hretin  ka nu thinrim ãng thãwm ni àwm tak chu kan room ațanga ka chhuah chuan ka hre nghâl a, ka kal lai pawh ka ding chawt nghe nghe. Nuam lo tihna chuan min chenchilh nghâl vat a, eng thilah nge, eng vàng tak chu ni ang maw tia ngaihtuahin ka hmui chu ka pet fan fan a, keimah vàng ni lo hrâm se, a nih loh pawhin kan chhûngkaw zînga mi chungah chuan ni lo hrâm se ka ti tak zet. Kan room lamah ka kîr leh rih mai dâwn em ni ang ka ti rilru rauh rauh a, chutih lai tak chuan U Hruaia room rawn lût tùr chuan min rawn hmu ta chat mai.

Ka lo en reng ringawt a, ka chhûngte dang va pawh chu ka hreh êm a ni, ani lah a rawn kal daih bawk si a, ka tân chuan awm dàn tùr a vâng dâwn êm asin. Ka mumang ni se ţhangharh thut ila.

Ka bânah kaiin room-ah chuan min kai lût ta daih a, a țawng miah lo va, kei pawh ka țawng lo. Sawi mai tùr ka hre lo a ni, ka nu thinrima a àn chhan han zawh phawng lah chu ka hreh ve deuh bawk si, amah hian min hrilh a nih ngawt loh chuan...

"Ka hrilh tawh che kha, ka nu hi chu  a harsa ve deuh țhìn a, a duh hunah hi chuan a âng leh bawrh bawrh mai țhìn a ni," room-a kan luh hnu chuan a ti chhuak ta sup a, a hmêl chu ka lo en reng a, chutah, min rawn enin a nui ta suk a," A chhan bulpui ber pawh keimah vàng a nia, nuam lo lo ti miah suh aw, a àn chhan i ni lo a, ka chunga a lungawi lohna a âng chhuak leh a nih kha," a tih zawm leh a, a nui nain a za hran lo tih a hriat viau a, ka ngaihțhat nâna nui hmêl pu mai a nih ka ring.

"Ka kuah lawk ang che aw," tiin a âwmah min kuah bet zui nghâl a, min kuah nghet tial tial a. A awm dàn chu mak ka ti deuh hlek, ni dangah chuan a duh chuan min kuah mai a, a sawi chhuak ngai kher lo. Kan la innei rei lo va; mahse, min duhin min thlahlel ve êm êm mai a, chutiangin kei pawhin ka duhin ka hmangaih êm êm bawk, sawisèl tùrin a la awm chhin miah lo bawk.

"U Hruai, ka nu chu i chungah eng vànga lungawi lo nge a nih le? Keimah vàng te hi a ni mial lo maw?" tiin a hnungah chuan ka chùlsak a, room-a min kaih luh daih dànah ka nu âng thãwm leh a thil sawite ka hriat a duh lo a ni maithei asin. U Hruaia chunga a lungawi loh avànga han àn chiam ringawt chu, a fapa neihchhun a ni a, a duat êm êm zâwk ang, ka han ngaihtuah kual vêl hian a àn chhan tùr àwm ka hre mai lo a ni, keimah vàng a nih ngawt loh chuan.

"Ni lo ve, nakinah ka la hrilh ang che," a tih avàng chuan ka zâwt nawn ta lo va. Chaw ei tùrin kan chhuak a, ka nu pawh a lo âng tawh bîk lo. Chaw ei lai chuan Zami leh ka pa chu an țawng deuh reng a, Ahlutei a lo inrawlh ve zauh zauh bawk a, U Hruaia pawh chuti tho chu. Ka nu erawh chu a ngawi ngal a, a la lungawi loh hmèl reng bawk a, nuam lo ka ti tak zet a ni. Dik tak chuan a lung ka dum thlâwt lo tih ka hre chiang a, han koha han biak bawrh bawrh pawh hi duh ve țhìn mah ila inzumna chin ka nei tlat a, a fapa tân ka tlin tâwk lohzia ka inhre chiang bawk si. Ka nu min zilhna hre rengin mo fel awm dàn tùr pawh hre ve vek tho mah ila ka be tam lutuk lo, min be peih lo niin ka hre tlat a, hei hian mim ti tîm tlat a ni.

"Lungawi lohna kan neih pawhin zaninah theihnghilh vek tùr, naktûk chu kum thar a ni tawh dâwn a, kum hlui thil chu kum hlui hian liampui vek rawh se, naktûk ațangin rilru thar puin kum thar a nihna angin rilru thar leh thinlung thar kan pu ang. Lungawi lohna neih rêng rêng loh tùr, nei in awm pawhin zaninah kum hlui thlah liam rualin thlah liam ve ang che u, naktûkah chuan lungawi lo hmêl pu lovin hlim hmêl kan pu vek tùr a ni," ka pa chuan chaw eina dawhkàn thawhsan pah chuan a ti a, min melh kual dan dan a. Thinrima sawi pawh a niin a lang lo, a thuphungin a sawi ve hrim hrim a ni ang, a chhan chu a hmêlah thinrimna a lang tlat lo.

Hun ãwl kan neih hnuah U Hruaia chu ka zâwt leh ta nge nge a, ka hre châk êm a ni, bâkah min hrilh a tum tho a, hriat thuai hi a pawina a awm lo tùrah ka ngai.

Ani pawh chuan a sawi ve mai bawk a," Nangmah vànga ka nu kha ãng a ni lo tih hre hmasa phawt rawh aw. Chuan, zêp thu a chêng lo, ka nu hian pastor ni lova hna sâng thawk tùrin min duh a. Pathian zârah ka zirnaah ka tluang viau a, ka chhûngte min beiseina pawh a sâng hlê, kei ngei pawh ka tum a sâng a; mahse, chu lamah chuan ka pên thei ta si lo va. Chuta țang chiah chuan ka nu hi ka chungah a lungawi thei ta tlat lo a ni, ka nu rilru tùr chu ka hre thiam a; mahse, ka duhna leh ka chhûngte duhna lamah ngawt ka kal thei tawh si lo, khatih lai khân ka rilru kha a nâin a hrehawm ve țhìn asin!" tiin, a hun tawn lai a ngaihtuah lêt a ni ngei ang, a mitmengah chuan natna leh hrehawm tihna a rawn lang chhuak a. Ka lo en reng a, ka khawngaihzia chu țawngka hian a sawi chhuak thiam lo ang, a tawn ka rin ngai loh rilru hrehawmna a lo tuar reng si a, chu pawh a mah hringtu a nu hnên ngei ațangin a la ni zui, hrehawm a ti ngawt ang le.

"Ka chungah lungawi lo mah se ka nu a ni a, ka hmangaih loh phah lo va, a duh leh beisei ang ka ni ta lo erawh hrehawm ka ti hlê thung; mahse, Pathian ka dem ngai lo va, A tâna hun leh nun inpêk dâwn tak tak chuan harsatna a rawn thleng țak țak țhìn a, mite chung chauha thleng tùra ka ngaih țhin chu ka chungah ngei a rawn thleng ve ta a ni. Vui thei ka ni lo va, Min hruainaa kal mawp mawp mai tùr ka ni tih ka hria," tiin ka lam a rawn hawi ta thut a, ka lo la en reng si a, mit pawh khap lo chuan kan inen dùn ta ràn mai. 

"Min nei hi i inchhîrin pawi i ti tawh viau em?"

Chutiang zawhna mak tak mai min han zâwt ta chu, ka hre sual em ni aw ka ti hial mai! Mahse, ka hre sual lo a ni ang," I inchhìr thu min hrilh pawhin ka hre thiam viau ang che a, ka dem hauh lo bawk ang che, hrehawm i ti dâwn êm mai," a rawn ti leh a, a kutah chuan rang taka chelhsak pah hian," U Hruai..!!" ka ti ringawt a, ani pasal atân ka nei hi ka la inchhîr hauh lo asin, a nuna a thil tawn min hrilh hriat hnuah phei hi chuan nasa takin ka khawngaih a, ka hmangaih zual sauh bawk.

"U Hruai, ka nei che hi ka la inchhîr ngai lo asin, ka sawi tawh kha, kan inneih zungbun kualah hian hlimna leh harsatna tê ber ațanga a lian ber thlengin a inphûm a, chumi tawng dùna tuar dùn tùr chuan Pathian leh a kohhranho hmaah kan tiam tawh a, ka tiam mai mai lo, ka thinlung leh tih tak zetin ka tiam a ni," ka ti leh a, ani pawh chuan nghet takin min lo vuan lêt a, a mitmengah chuan hlimna leh làwmna a rawn lang nghâl bawk.

"Ka lãwm e, ka tân hian i hlu tak zet a ni."

Ka pasal muhìl hmêl chu ka en vang vang a, a hmêl țha tak hi ka en ning thei lo, hmâna a hmêl țha tak kha a la ngai deuh reng a, tunah chuan a hma ai khân a hmêl a puitling zual ta deuh tih mai a ni. Rilru natna leh hrehawmna tam tak a lo pal tlang tawhin chu chuan nasa takin amahah nghawng a nei a nei ve ngêi àwm si a. Ka nu lak ațangin lungawi lohna hmêl leh thinrim awka a tawng țhìn a, a nupui hlui lak ațangin phatsanna a tawng bawk, a tawn hi a na êm asin, pastor mah ni se mihring ve tho, tisa nei leh rilru na ve thei tho a ni a, hrehawm a ti dáwn lutuk. Irene-i khân lo phatsan lo se, hlim takin awm se ka nu pawh hian a lungawi lohna a ti lang lo ang a, hlim tlâng takin an awm ngei ang.  Mahse, kan hringnun hi kan duh dàn dánin kan her thei lo va, hunin kan duh loh dànin a rawn her kual a, a duh hunah min paih thlu tawp a, tho chhuak hlei thei lovin vaivut zîngah min sawisa țhìn a ni. 

"U Hruai, ka phatsan ngai lo ang che, i tân nupui țha tak nih ka tum ang a, i lungngaihna leh hrehawmna țawmpuitu niin i kiangah i mamawh hun apiangah ka awm zêl ang, ka hmangaih che a, ka hmangaih reng ang che," tiin ka phun sap sap a, ani erawh chu tui taka a muthilh tawh avàngin a thaw sâk sâk a, zanina a thil min hrilh hi naktûk lamah chuan ka theihnghilhsak vek tawh ang a; mahse, theihnghilh tihah khân a țha lo zâwngin ka hre reng lo ang ka tihna a ni ber, amah hi ka ngaihsak sawt ang a, ka hmangaih sawt tawh bawk ang.

A tûk lamah chuan ka pa sawi ang ngeiin rilru thar nèn zîng ka tho a, ni thar leh kum thar a nih vàngin rilru thar put ngei ka duh a ni. U Hruaia rawn harh pawh chu hlim takin ka nuih var var a, a hmuiah fawhsakin ka hmangaih thu ka hrilh zui nghâl bawk. Hei hi nizàna ka ngaihtuah ràn rán kha a ni a, engtiklai pawha hmangaih leh ngaihsak a ni tih hria se ka duh a, hriattîr ngei ka duh vàng a ni. 

Rei tak Aizawlah kan awm thei bík lo va, kum a lo thar ta bawk nèn, Kolasib lamah kan haw leh ta thuai a, kan haw hian Nutei leh Zamite pawhin an awmna lamah min chhuksan leh tawh a, in pawh a reh leh viau tawh rêng a, keini kan han awm lo leh a, a reh leh zual ngawt ang chu.

Dam chuan hun hi a kal ve zung zung a, tu dana lo pawh din theih ni hek lo le, thla a ral a, Pathian zârah ka rai chhoh ve mai ka ring a nia; mahse, ka la rai miah lo, ka thla tin hunbi pawh a ngai têin ka la dawng a. Țawngțaina lamah ka thlen ve nasat tehlul nèn, Malsàwmna min petu hian țûl a la ti lo a ni ang e.

Remi'n min rawn bia a, Lalkâwnga nèn an in-break a lo ni! Engtizia teh rêng nge maw ni dâwn le, an induh tawn viau khân ka hre si a. Ka han zawh chiana a sawi dàn chuan Lalkâwnga'n mi dang nèn a lo kawp a ni àwm e, chu chu Remi'n a man chhuak leh si a, ani lah chuan hmeichhe dang nèn a kawp loh thu sawiin a phâ viau ni àwm a ni a; mahse, a tàwpah zawng a zêp thei ta bîk lo a ni àwm e.

"A pawi lo, hetia kan awm hi a țha a ni ang, rilru hrehawmin na viau mah se ka tuar thei êm êm ang, ka thih phah bîk lo tawp ang! Chhe-hota chu heta Krismas leh kum thar a rawn hman chhoh loh chhan pawh kha a kawpnu vàng a lo nih chiah kha, tenawm roh hian a! Ka lo rin ve tehlul nèn, ka ring ngai tawh hauh lo ang!" a rawn ti sap sap a, kei pawh chuan mak ka ti." A mak e, ka rin ang a ni lo tawp mai! I hre sual si lo a maw?" ka ti ve a, ani chuan," Hre sual lo, ka man chhuak hlauh a, a vànneihthlâk zâwk, man chhuak lo ni ila tunah pawh hian min la kawp reng dâwn tihna a nia, ka ngaihtuah lêt hian khâng hun chhûng zawnga ka lo ring êm êm kha ka inkhawngaih zâwk! Hre chhuak lo ni ila tunah te hian amah ring êm êmin hun ka la hmang àwm sia," a rawn ti leh sap sap a.

Ka khawngaih reuh mang tak e! Ka țhiannu ber, ka tâna inpe zo êm êm leh hlim thei êm êm a ni a, tunah lah a rilru a hrehawmin a na tih hriat takin a țawngka chhuakah pawh a hriat ve ngawih ngawih a ni si a, ka khawngaih lo thei lo, hlim loh hi a inhmeh ve lo va, a rilru a hrehawm chuan kei ngei pawhin hrehawm ka ti lo thei nâng. Lalkâwnga kher kher pawh chu a ti mak rêng rêng ka ti, khati khawp khân Remi kha a duhin a star a, bêm hmasaa sawi chhuaktu pawh a nih nghe nghe kha, a kawp duh ka ring miah lo asin le! Mahse, mihring hi zawng, kan lo mak êm mai a, hmêl ațang lah hian eng mah rin thiam theih a ni si lo, thinlung leh rilru chhûngril kan zu hmu thei tawh si lo va, kan ti sual leh țhìn a nih hi.

Ka thiam ang tâwkin ka hnèm ve a, a hnua ka ngaihtuah lêtin Pathian zârah, ngaihzâwng lamah hian ka vànnei tak zetin ka hria. Ka phû loh êm êm Joshua khân min duh ém êm a, kei pawhin ka duh. Chutah, a vànduai ta hlauh a, chumi hnuah U Hruaia ka tawng leh a, ka tâna mipa țha êm êm leh ka star kumhlun chu. Ka mipa tawn pahnihte hi ka phû loh leh min duh êm êmtute an ni leh zêl a, ka vànnei tak zet a ni. 

Ka pasal chu ka theih tâwkin ka ngaihsak a, nupui felin an pasalte chunga an thil tih dàn tùr nia ka hriat zawng zawng chu tih vek ka tum hi a ni tawp mai. Hei hi a chunga ka tih theih ve tâwk a ni si a, han zah țît țêt pawh ka tum tawh bîk lo. Nupa kan ni tawh a, ka duatna leh ka ngaihsakna ka tih lan zahna tùr chu kan inkárah hian awm tawh lo se ka duh. A chhuah dâwn rêng rêngin, ka kal ve a rem lohna chinah chuan a inthuam dàn ka en fel vek a, a bag leh a ken chhuah tùr thlengin ka dah felsak vek țhìn. Ka che over niin ka inhre chuang lo, nakinah Pathian zârah kan dam chho zêla fate kan neih chhoha ka buai hunah chuan ka ti reng thei lo maithei a, chu vàng tak chuan ka theih lai hian ka ngaihsakna tih lan hi ka duh a ni. 

A thuamhnaw a inchei chhuahna hrim hrim ka vil chawt a, pastor a ni a, mi en bîk a ni tih ka hria, a kamis a mar dak thlarh lo ang tih ka hlau a, zànah ka nawhsak a, a lo haw veleh a pheikhawk ti faiin a mawza ka su nghâl ziah bawk. Mi zîngah a awm tam a, a bengkâwm leh chhûngte a bàl ang tih hlauin ka ensak fo a, a bag chhûngah eng emaw chânga a inen zauh zauh theihna tùr dârthlang tê ka dah ru reng țhìn. Phone-ah inen thei tho mah se phone-ah hi chuan a lang chiang lo țhìn ka ti a, a hnâr leh a mit lamahte mite tâna hmuh nuam lo a lo awm palh thei ang tih ka hlauhpui a, engtiklai pawha a hman theih tùrin a hâk chhuah tùr a kekawrah emaw a bag-ah emaw rawmawl ka dahsak ziah bawk. 

"Rawmawl leh mawza hi ka duh angin i nei tam lo, kan chah mai dâwn em ni ang?" ka tih chuan a nui suk a," Nu ber i nia..." a lo ti mai a. Secondhand lam thil rêng rêngin a inthuam ngai lo tih ka hre tawh a, chu vànga 'chah' sawi pawh ka ni. Kei chuan thil man to ka lei pha ve ngai lo va, kan dinhmunin a lo zir lo bawk nèn, secondhand mawza leh rawmawl tlâwm tak taka lei tùr a lo awm țhìn pawh hi tihzia ka ti thei viau a ni.

Kolasib bazârah lei tùr awm tho mah se amahin chahna tùr min hrilh site-ah chuan ka chahsak ta a, ka en kual dan dan a, a tàwnzau tùr leh a kekawrtê tùr pawh ka chah tel leh nghâl bawk. Mipa a ni a, ani chuan ngai a ti vak kher lo maithei; mahse, kei chuan ngai ka ti ve tlat, a chhiat a țhata mawhphurtu ka ni tlat si a.

Remi pawhin min rawn tlawh leh tawh a, ka khawngaih reuh. Lalkâwnga nèn chuan an lo ințhen tak tak tawh a, Lalkâwnga chu a kawpnu nèn chuan in khatah an lo chêng dùn tawh nghe nghe a ni àwm e. Ka thin a rimpui êm avàng chuan theihnghilh vang vang tùr chuan ka hrilh ve malh malh a, ani pawh chuan," Min tina tak zet a ni; mahse, ka theihnghilh thei ngei ang," a ti ve a, ka thiam ang tâwkin ka fuih sauh sauh nghe nghe.

March thla kan chuang kai leh ta a, tûk khat chu ka awm dàn a dik lo hlê mai a, ka damlo seng seng niin ka inhre hial nghe nghe a; mahse, chhùn lamah chuan a reh leh mai a, chutiang chuan kâr khat chhûng chu zîng tin ka awm ta a, U Hruaia ka hrilh lêm lo nain min hre chhuak lo thei bîk lo va, a ngaih a țha lovin damdawi in min panpui hial a duh a; mahse, chhùn lama a reh zêl avàng chuan eng êmah ka ngai duh lo thung.

"I rai a ni lo maw, Bawihte?" min hringtu ka nuin a rawn tih chuan U Hruaia chu ka en ringawt a, ani pawh chuan min rawn en ve chiah. Kei hi, ka rai a ni thei ang em?!! Ka thla tin hunbi kha... ka hmui ka hup ta vat a, ka rai a ni ngei ngei ang!

*I INRAWLH LOHNA TÙR CHIN HRE RAWH KHAI, CHUTI LO ZAWNG, MI NIN I LO NI PALH ANG E*