☆KA BEISEINA☆ - 30 By Dingdi Pachuau

☆KA BEISEINA☆- 30 By Dingdi Pachuau

Damdawi ina kan han kal chuan a chiang ta, ka lo rai ngei a nih chu!! U Hruaia phûr, lãwm leh nuam ti lutuk chu awm ngaihna a hre hlawl lo, ka nuih a ti za zâwk!! Kan chhûngte a phone kual a, a hlim lutuk chu a awm hlè hlé thei lo, a țhut pawhin a tho leh nghâl zêl a, a din pawhin a ding rei thei chuang lo. Hre hmasa ni ngat ila chuan ka surprise chiang viau ang maw le.

Ka pain min rawn be ve nawlh a, min lawmpui thu a sawi hmasa ber nghe nghe, a awka chhuak ațang pawh chuan U Hruaia ang maiin a hlim ve tho tih a hriat viau. Ka rai ta chu a làwmzia sawi lehin tu a nei ve tawh mai tùr a hlimzia chu sawi charh charhin indìm viau tùrin min rawn hrilh bawk a," I nu pawh a hlim ve ngawt ang, ka la hrilh hauh lo va, in pa khân a lo hrilh tawh a nih ngawt loh chuan a la hre hauhin ka ring lo, zanriah ei hunah ka hrilh chauh ang ka ti a," a rawn ti leh bawk a. Ni e, a hlim ve tho ang, a tû tùr ka pai tawh miau si a. Tu mah ka hrilh ve lo va, U Hruaia'n a phone kual nasa a, tunah hi chuan a hre tùr chin chuan an hre deuh vek hman tawh hialin ka ring.

Zanriah ei tùr chu U Hruaia'n a buatsaih sauh sauh a," Nang chu lo țhu mai mai rawh, ka'n àwl ang che," a ti tlat a; mahse, ka thei lo, ka siam ve chuang lo nain a bulah dingin a ei siam chu ka lo enpui a, a tui hmèl tak zet a ni. U Hruaia nèn hian chaw kan ei vak ngai lo va, a tih ve dàn rêng a lo nia. Kei pawhin ka zàwm ve thei mai a, a țan tìrah kha chuan ka ei tùr chaw tlêm kan chhùm a, ani erawh chuan salad lam hi a ei nasa thung. Thei, thlai rah leh hnah hring lam a duh hle a, a tharlâm kan zawng hrâm hrâm țhìn. Miin chaw eia min sàwmin kan hnial ngai lo va, in lamah chaw ei ngai lo mah se mi inah chuan a hmaa ei tùr an chhawp apiang chu lãwm takin a ei thei vek tho a," Ka ei ngai lo," tih a nei ngai lo; mahse, a ei tam ngai lo thung.

"Nang chuan chaw ei tel rawh aw, tûn ațang chuan chakna tam tak i mamawh chho dâwn tawh si a," a ti sauh sauh a, ka lo hnial duh lo. A siam ang ang, ei tùr min chhawp ang ang ka ei mai ang, ka tân liau liaua min siamsak a ni dâwn si a.

Thil hrisêl hria, leina lama buai ngai lo a ni bawk a, a ei siam pawh a tui e. Ka ei țeuh mai, tui ti taka ka thil ei lai chu min lo en reng niin," Eng nge, ka hmaiah thil kai a awm em ni?" tia ka zawh chuan," I ei dàn kha a tui hmèl lutuk a," a lo ti mai a," A tui alawm, i siam a nia, a tui lo thei nâng. I ei ve duh em? Kha, ei ve rawh," tiin thlèng chu a lamah chuan ka nawr phei deuh a, ani erawh chuan," Ka ei duh tâwk tawh e. I ei dàn kha a tui hmèl êm mai a ka han ti mai a nia, ei châk zâwng i neih chuan sawi hreh suh aw, i sawi hmiah hmiah ang a, kan lei zêl mai ang, Vairêngtê emaw Silchàr emaw thleng pawhin kan tlãn dàwr dàwr mai ang," a ti duah a.

Tlaia ka inbual loh avàngin zànah tui lumin ka inbual a, tui vâwta ka inbual a phal tlat lo pek a! "I damloh phah palh ang," a ti deuh tlat a, ka rualin a rawn lût zui ve zat bawk. Nupa mah ni ila inbual rual hi ka zak deuh tlat țhìn a; mahse, vawi hnih vawi thum kan inbual dun hnuah erawh ka zia ta deuh.

"Pathian zâra kan dam chhoh zêl chuan tuna i dul thêp zai pawh hi nakinah chuan kan nautein a la rawn tâwn puar dâwn si a, i inhmeh àwm reuh!" tiin ka dul la thêp zaih chu a'n chûl a, kei chuan," A mak àwm reuh e tiraw? Ka lang mak reuh ngawt ang," ka lo ti a, ani lah chuan," I inhmeh dâwn lutuk! Ka mitthlain ka hmu lâwk diam tawh che alawm, i chhe lo lutuk," a ti leh thung a.

Ka țhiantehoin min lawmpui thu min rawn hrilh sap sap a, an fel hlawm teh a nia. Remi phei chuan," I rai vat hi ka lawmpui lutuk che, chutih rual erawh chuan kei aia fa i nei hmasa tùr hi mumang ang ka tiin pasal min neihsan pawh hi âwih harsa ka la ti fan tho a ni, nang aia neih hmasak ka tum tehlul nèn," a rawn ti hial a, kan nui dùn leh rih a. Ni e, kei pawh hian ka ngaihtuah lêt châng hi chuan pasal nei ka ni hi mak ka la ti ve tho țhìn a ni.

Thei thûr ka duhin ka râwp viau a, ka ei nasa viau bawk. Ka pa lah chuan Aizawl ațangin eng nge ka ei châk zâwng tih min rawn zâwt reng reng a, ka ei châk zâwng nia a rin min rawn thawn äwl lo a, chubâkah, naupai țan tìr tâna damdawi țha tùr doctor râwn thlapin a lei a, min rawn thawn tel thlap bawk, ni khat lek pawh ka chanchin min zâwt lo hian a awm thei lo ka ti mai, min rawn be chàmchî a, heti taka min ngaihsaktu pa ka nei hi nuam ka ti tlat a, a lakah pawh ka pangchang mai ang tih ka hlau zâwk hial. 

A awm loh hun lai a ni tih ngaihtuah miah lovin Theihai hmin ka han ei châk ta tlat a nih chu! U Hruaia mai bâkah ka pate pawh ka ti buai zak zak viau a ni; mahse, sum a awm hi chuan awm loh hun lai tih pawh hi a awm tak tak thei lo a lo nih hi, ka pa chuan Kâwlchaw Theihai hmin min pe tùr ngatin Kolasib-ah a rawn kal a nih chu! Pum nga lai a lo keng zui a, Theihai pum nga chauh min pe tùra ani meuh Aizâwl ațanga Kolasib-a a rawn lang ta chu zahthlâk ka ti a, a inthlahrunawm ka ti viau bawk; mahse, amah zâwk chuan inthlahrung hauh lo tùra min hrilhin," Rawn zinna hun remchâng a ni mai," a ti ve zaih a, U Hruaia lah chuan," Ka pa meuh a rawn lang ve ta a nia, a mak ngawt mai! A, a pawimawh bawk a ni," tiin min lo fiam zui a, ka hnâr ka hmu lian lûrh lûrh viau a ni.

Theihai ka han ei chu ka dam sawng sawng ni berin ka hria! Tui ka han ti khawp mai a, pum hnih chu ka ei zo thuai nghe nghe, ka pa chuan," Kan lo zawng leh zêl ang, i ei châk apiang chu sawi zêl rawh, tû hmêl țha deuh a lo chhuah theih phah dâwn si a," a lo ti a, tû a awt lutuk chu ka khawngaih zâwk! Kei lahin ka la pai țan dêk dêk chauh a la ni a, nghah chhûng a la rei dâwn si a, chubâkah, eng nge kan hmaah kan tawn dâwn kan la hre bawk si lo, Pathian zârah țha tak leh tluang takin pai tlang thei tùrah inngai ta ila, chuti chung pawh chuan thla riat chhûng nghah a la ngai tho.

Kan kawt vêla pot-a thlài chìnna tùr ka buatsaih pawh chu ka tih zawm thei ta rih lo," Naute insiam chhoh hun lai a ni a, i che sual ang a, i tlu palh ang," a tih loh leh," I fîmkhur tih hre tho mah ila, 'palh' thil awm thei a ni, invèn a țha," a ti a, ho ka va ti tak! Ka tlu kher àwm bîk tawp si lo; mahse, a thu sawi chu ka zàwm lo thei si lo va, thlai rah pawh kan nei har dâwn ta a ni.

Motor-a ka chuan a rem ti rih lo va,  inah ka awm deuh tlawk tlawk a nih ber chu. Chhuat ka nawh pawh min phalsak lo va," Naute len deuh hunah," a ti tlat a, amah chu a che zung zung a, chhuat nawh pawh a lo thiam viau mai, a awlsam viau a, a ti zung zung mai a, ka chét ve a phal miau loh avàngin a che vêl chu ka lo thlîr tawp mai a ni. Ka taksaah harsatna ka nei pawh a la ni si lo va,  ka han sawi ve lah chuan," Tikhân, lo awm mai mai pah khân naute hming sak tùr lo ngaihtuah rawh," a ti daih zêl a, ka sawi chhunzawm hlei thei ngai lo.

Ka nau pai chuan thla hnih thla thum hmêl a hmu chho a, motor-a ka chuan a phal loh vàngin khawiah vak mah ka chhuak ngai lo. Aizawl lamah pawh kan kal thei rih lo va, amah pawh a kal chuang lo. Ka pain eng eng emaw min rawn thawn rualin Ahlutei pawhin ka kawr tùr min rawn thawn tel bawk a, U Hruaia min chahsak nèn chuan rai kawr ringawt pawh ka ngah ta viau, ka ha sêng tawh ngûtin ka ring lo.

Zirtàwpnîa a chhuak chuan a rawn haw lamah mipa puitling tawh pakhat hi a rawn hruai haw tel ve a," Țhianpa Rda a nih hi.  Rd, ka nupui Anne-i," tiin min inhmêl hriattîr a, nui sâng hian ka chibai a, ka hmuh vawi khatna a ni a, han biak zui dàn tùr erawh ka hre lo viau; mahse, Rda chu a lo fel hlauh a, a țawng duh ve viau bawk nèn, a hnu deuhah chuan ka be zui ve bawrh bawrh thei thuai a. 

Ani pawh hi U Hruaia țhianpa a nih chuan a naupang viau tawh lo tih a hriat theih mai a, nupui a la nei lo tih a sawi phei chuan U Hruaia chuan," Țhianpa, i hmu zo lo pawh a ni àwm tawp si lo va, ti ve tawh teh," a han ti a, ani erawh chuan," Hmu zo lo chu a nih hi," tiin a nui phawt a, sawi zawm lehin," Tak tak chuan, he lamah ka awm tawh dâwn bawk a; kan zawng ve tawh poh a ni ang chu. Ka nu lah hian nupui nei tawh tùr hian min tur chhên zui a, bialnu ka nei loh thu ka hrilh pawhin a âwih duh tlat lo, kum upat tawh lamah chuan nei ngei ngei tùrah min ngai a ni ngei ang," tiin a nui zui leh a, U Hruaia pawh chuan," A dik ang, rilru sèn a ngaihzia lah hi an hre duh lo a,  duh hun huna neih theih niah an ngai teh rêng em maw ni," a lo ti ve a, chanchin sawiin an inzâwt mawlh mawlh bawk a,  țhian inkàwm ngeih tak an ni ngei ang le.

U Rda chu zanriah a ei bâkah a riak zui ve nghâl bawk. Champhai lam mi a ni tih ka hriat chuan," A nuam reuh ngawt ang, a boruak khi a țha bawk si a," ka ti a, ani pawh chuan," Nuam ve reuh e; mahse, ka awm khât ta deuh a, sik leh sa a lo inthlâk viau a nih ngawt loh chuan la nuam viau tùrah chuan ka ngai tho," a lo ti ve thuai a.

Vawi khat chu Irene-i chanchin a sawi chhuak zauh a, chu pawh," Irene..." tia min koh vàng a ni. Ka nui ringawt a, ni e, ani tân hi chuan min koh dik nghâl vut chu a har ve ang, min ko sual lutuk chu a inthiam lo hlê a; mahse, inthiam lo lo tùra hrilhin tih sual chu mihring zawng zawng zia a nih thuin ka hnèm ve a.

Zàn khat chu Lalkàwnga'n min rawn be teh tlat a, ka rin loh lam daih a ni. A rui deuh em maw ni lehnghâl ni, amah vàngin ka țhiannu rilru a nâ a, chu chu hre rengin thinrim insûm rilru tak hian," Engati nge hetianga i awm? Ka sawi phâk chu a ni hauh lo mai; mahse, ka țhiannu ve ber a ni a, a rilru a hrehawm chuan kei ngei pawhin hrehawm ka ti ve lo thei lo a ni," ka ti barh barh a.

"Ni e, a dik alawm. Ani chuan thiam lohna a nei hauh lo, keimah hi thiam lo dik tak chu ka ni, eng nge a an? Ka be chák viau a; mahse, min be duh dâwn lo tih ka hre reng si a, nangmah zâwk hi ka rawn be ta che a ni, thiamthu sawi tùr pakhat mah ka nei lo," a rawn ti zui bawk a.

"Eng atân nge biak i duh a?" ka tih chuan," Ani kha ka hmeichhe duh ber a ni tih hrilh thar ka duh a," a rawn ti a, a thil sawi chu ka âwih lo kher mai. A ruih vàng mai maia sawi a nih hi, a bialnu khân rawn hre ve ta se mak tiin a tlàn hawsan duh ngei ang, hei hi mipa lê lo zia dik tak a ni bawk.

"Ni lo ve, Kâwnga. I duh ber i kawp tawh a, hlim rawh khai. Hlim la, ka țhiannu pawh biak buai tum duh tawh suh," ka ti ve thung a, Remi ka mitthlaah a rawn lang a, hrehawm a tihzia leh a rilru natzia pawh ka hre bawk, a hnênah hian a lêt leh duh kher pawhin ka ring lo.

Remi hnênah pawh eng mah ka hrilh chuang lo, Lalkawnga'n min biak thu takngial pawh ka hrilh chuang lo, hringnun chhiar dàn a zir chho ve zél a, amah phatsantu țawngkam thiamin a thlèm thlûk leh mai ka hlau a ni.

Ka pain chhûngkaw inhmuh khâwm a ngaih lawk thu min rawn hrilh avàngin Aizawl lam panin kan chhuak a, kan han tlãn muang khawp mai a; mahse, a zak duh hauh lo. "Naute himna ka ngaihtuah a ni mai a, zahna chhan tùr ka hre lo," a ti mai a, kan tlàn muan êm avàngin Aizawl pawh kan thleng har thawkhat viau; mahse, pawi pawh kan ti chuang lo.

Zànriah ei laiin ka pa chuan Zami leh a bialpa an tlàn dun thu chu a rawn sawi chhuak ta mai a, mak ka ti ngang mai! U Hruaia pawhin a hre sa lo bawk a; mak a ti viau tih a hmêl ațangin ka hre thei.

"A va mak ve! A bialpa a ûm chu khawi lam mi nge ni?" tiin ka pa chu a zâwt a, ani chuan," Khulai an awmna hmuna lehkha zira zu awm ve maw le, amah aiin a la naupang zâwk nghe nghe," a lo ti leh vat a, ka nu chuan " Zahthlâk lutuk mai! College kal lai chauh a la ni zui, tihchi loh lutuk! Rawn haw chho rang rawh se, khutah khuan awm reng a ngai tawh lo rêng rêng," a ti hmarh hmarh a, a hmêlah chuan lungawi lohna hlîr hmuh tùr a awm. A àwm ka ti ve reng tho, nu ber a ni a, a duh loh dàna a fate an awm miau chuan lungawi chu har deuh mai tùr asin, a chàwma a hrinte an ni si a.

*MAHNI NGEI PAWH DÂWT INHRILH ȚHÌN MI LAK AȚANG CHUAN RINAWMNA CHU BEISEI DUH TING SUH*