Skip to main content

☆KA BEISEINA☆ - 31 By Dingdi Pachuau

☆KA BEISEINA☆ - 31 By Dingdi Pachuau



Zami ber a lo la haw bawk si lo va, zilh chiam theih a ni rih bawk si lo, rorèl dàn tùr a vâng an ti riauin ka hria. Kei chu nimin min lawka chhûngkaw mo ve mai kha ka nia, lo inrawlh ve chî nâng! Inrawlh tumna pawh ka neih loh bâkah sawi ve tùr pawh ka hre lo hrim hrim, U Hruaia thu tlûkna ang ang chu ka thu tlûkna a ni mai. 

Pasal neihtîr rih loh chu ka nu duh dàn a ni a, ka pa pawh a ni thoin ka hria; mahse, an induh a, an inru hmingchhe ve tawh a nih si chuan, chubâkah, kârah fa hial a lo piang thei bawk tiin a rilru chu a buai ve deuh tho a, chu tak chu U Hruaia buaina pawh a ni. An thu hmâwr bàwknaah pawh 'Amah rawn haw chhoin palaite pawh rawn kal ve phawt se, an thu rawn ken dàn azirin ni teh se' tih chu a ni ta rih, ka nu erawh chu a lungawi thei ngang lo va," Palai rawn tirh pawh a ngai lo, rawn haw chho rang rawh se, tuin nge ani ang chàwmhlàwm tùr mai mai leh hna thawh pawh nei lo chu mo atân duh rêng rêng ang? Eng thil nge thiam a neih? Zahthlâk lutuk! Amah a intodelh hunah a duh chuan a nei chauh ang!" a ti tàwn tâwn reng a, a thu sawi chu Zami a sawi chhanna a ni tih hre mah ila ka lo inhmeh bel lo thei lo, 'Chàwmhlàwm tùr mai mai leh hna thawh pawh nei lo' a tih kha ka nihna dik tak a ni si a, ka lo zak ru reuh reuh mai.

Zàn mutnaah U Hruaia chuan Zami chanchin chu a sawi sap sap a, mipa ngaihsak lo, bialpa pawh nei ngai lo leh nungchang ti zawk zawk lo a nih avàngin hetia pasal a han ûm ta mai hi mak a tih thu a sawi chuan," A duh zâwng tak a lo ni ve a ni ngei ang," ka lo ti a, ani pawh chuan," A ni maithei le" a lo ti ve leh mai a, sawi zawm lehin," An induh tak tak a nih phei chuan 'A nei lo ang' han ngawt pawh a dik ber lo thei tho a, eng ang dinhmuna ding leh khawsak lamah pawh eng dinhmun pawh lo ni ta se an induh tawn miau chuan a țha ka tihpui vek mai a; mahse, ka hlauh ber chu Zami hian a duh viau ang a, a mipa zâwk hian a duh ve mang lo ang tih hi a ni, Zami aiin a la naupang zui bawk si a," a lo ti leh a. Ka han ngaihtuah vang vang a, thil ni ve thei tho a ni; mahse, ni êm lo tùrah ngai ang.

"Zami hi chu a rilru hi a dâwih a, thu pawh hi a âwih viau rêng a ni. A rilru pawh hi a kheuhbeuh lo; mahse, ka naute pathum zîngah hian rilru nei lo ber leh rilru chak lo ber a ni a, rilru chak loh lutuk vànga lehkha pawh zir sâng lo kha a nia, a chawlhsan tawp mai a ni, a tum pawh a sâng lêm lo," a ti leh sap sap a, eng mah sawi ve lo chuan ka lo ngaithla a, Zami nungchang ni àwma a sawi leh amah Zami ngei chu ka han bùk chhin vêl a, a dik ngeiin ka ring. A sual hauh lo ang, a chapo pawhin ka ring lo, chhûngkaw hausakna leh pa nihna hre ràna khawsa chi a ni lo ang.

Kan haw hnu lawkah palai an rawn kal a, an fapain Zami a rûk avàngin ngaihdam an dîl ringawt a ni àwm e. Ahlutei'n min rawn hrilh a, an fapa nupui atân an rawn dîl miah lo, ngaihdam an rawn dîl ringawt. Ka nu chu a thinrim lehpek khawp mai a, ka pa erawh a ngawi hmiah thung. Zami a rawn haw chho zui nghâl bawk a, a rutupa chuan thlah pawh a rawn thlah lo rêng réng ni àwm a ni. Mak ka ti viau mai a, U Hruaia pawh chuan mak a ti ve deuh tho tih ka hria; mahse, a sawi lang êm êm lo," Ka farnu hi nupui atân êm chuan a lo duh lo a nih hi," a ti ringawt a, chu bâk chu a sawi hran lo.

Zami chan chu ka ngaihtuah a, ka khawngaih reuh tak tak a ni. Ka nu leh pate thinrim dàn tùr pawh a hre sa ve vek àwm si a, chuti chung chung chuan a mipa duh tak chu a zui lui ta tho tihna a ni ngei ang a, a rin êm êm chuan nawmchen nân bâk a lo duh tawp si lo, chu chu sawi loh, thlah pawh a rawn thlah chho miah lo a nia! Duh tak tak chu ni se chuan a rawn ûm rawk rawk ngei ang chu, mipa a nih chuan chu chu a tih ngei tùr a ni, chu chu ka ngaih dàn a ni tawp mai. Zami pawhin a ngaihtuah ve ngei ang a, ka nu thinrim hmachhawn chu thuhran, a rilru a nain hrehawm a ti ve ngawt ang.

Hun a liam a, Remi pawhin min rawn tlawh leh tawh a, a țhian țha ber leh kawm ber țhinin pasal ka neihsan ta daih si a, khaw hranah daih kan awm bawk si, mi dang kan kawm țhinho lah hmun dangah an awm deuh vek bawk a, a lung a lêng ve dâwn êm a ni. Lalkâwnga nèn an ințhen chiang viau tawh a, ani pawh a bialnu kawp nèn khân an la inkawp chhunzawm ta zêl a ni àwm e. A țha, tikhân, pakhat tân rinawm teh se, rinawm lohna hi zawng, a chhuanawm loh bâkah a huatthlala êm mai.

Zan khat chu Lalkâwnga'n min rawn be leh teh tlat a! A rui niin ka hria a, mak ka ti viau nghe nghe. Remi number min rawn zâwt a, pêk pawh ka pe duh lo. A bialnu a ni tawh si lo va, a bialnu nèn an buai tam nân mai mai chuan ka pe duh lo a ni. Tlêm lai deuh khân nuam a tih loh vàng nge țhianho group-ah pawh a awm tawh lo nghe nghe a, a inthiam chiah lo a ni maithei. Zu pawh a in nasa ve tawh a ni ang, rùi chungin min rawn be tlat tawh. 

"Min pe ve mai la?" a rawn tih chuan," Eng atân nge i tih a?" ka ti ve thung a, ani chuan," Ka ti buai dâwn tihna pawh a ni lo, i țhiannu a nia, i thinrimpui ang tih chu ka hre ve tho a nia; mahse, min pe ve mai la?" a rawn ti leh a, biak buaitîr ka duh loh avàng chuan," A, i tân a number neih kha a țangkai tawh lo êm mai, nei lo khân hlim deuh khân awm rawh khai, i dam țha rêng rêng em?" tiin thil dang ka sawipui ta daih a, thil dang ka sawipui tâkah chuan kan inbe rei zui ta lo va.

Min hringtu ka nuin min ngaihtuah theih êm avàng chuan chanchin min rawn zâwt fo a, ka awm dàn chu min zâwt chîk thei khawp mai. A lo tawn hriat tawh ațangin thil nih dàn chu min hrilh ve zêl a, ka awm dàn leh ka video call chânga ka hmêl a hmuh châng hi chuan," I haw hran si lo va, i ngeih zâwk emaw tih mai tùr zâwk lah ni, hmeichhia i nei dâwn a ni ang a?" a ti ve ziah. A eng zâwk zâwk pawh nei ila țha tak leh tluang taka kutke kima ka neih theih chuan a țha a ni mai, ka lung pawh a awi ngei ang.

Ka dul pawh a lo lian chho ve ta deuh deuh a, ka kawr pawh ka tâwt chho ve ta zêl mai, Pathiannia hâk chi phei chu ka tâwt deuh vek tawh nghe nghe.  Ahlutei'n min rawn thawnho kha ka ha thei ber a; mahse, ka taksa a danglam chho zêl si a, ka tâwt chho chak viau, ka nau pai hi ka ngeih chho ka ti mai, ka thau sâwt lutuk a, chu vàng chu a ni. U Hruaia bulah ka sawi chhuak miah lo a nia, a lo hre ve kar a ni ngei ang, min chahsak nual a lo ni a, a rawn thlen nî chuan ka hlim tak zet a ni. Secondhand lei mai ka duh țhìn a, a awlsam bâkah lian tak tak leh hâk nuam tak tak tùr, tlâwm tê têin han lei mai tùr a tam si a; mahse, secondhand hâk a duh loh miau sî avàngin ka lei ngam bîk lo a ni.

A thiam ang tâwkin min duat a, naute duat takin min duat ka tih tawh kha, nuam ka ti a, kei pawhin ka theih ang angin ka duat ve tho. Ka pate lahin ka tâna ei tùr țha an tih chu min rawn thawn chhunzawm zêl a, chutia ei tùr țha țha ei ta chu ka taksain a ngeih a, ka thau sâwt viau mai. U Hruaia lahin a theihna apiangah min àwl a lo tum ve bawk si, chu erawh chu ka duh bîk lo va, a awm laia ka chêt a phal loh țhin avàngin a awm loh hlàn chuhin ka chêt theihna apiangah ka lo che ve zung zung țhìn; mahse, ka hah thei viau thung. Ka dul a len chhoh zêl avàng leh ka taksa a len chhoh zêl avàng erawh chuan ka inzo lo chho ta viau a, ka che vêl hrim hrim pawh chu ka ni luih luih ni berin ka hria. Naute chu a lian viau a nih loh chuan tui ka pai tam viau a ni ngei ang.

Naute thuamhnaw tùr leh a puan tùr, a mamawh tùr engkim chu a pi leh pute'n an ngaihtuah fel vek tawh a, keini nupa tân chuan lei ve a ngai lo hrim hrim a ni ber; mahse, a pa hian a ngaithiam lo va, lei lo bîk nih  a duh lo ta ti mai, a chah nual bawk a, hetah pawh kan kawl țeuh tho a nih chu.

Ka inzawh loh tâk viau hnuah chuan U Hruaia chuan ,"Zami inah a awm mai mai tho a, ka chhuahsan a ngaih châng chea lo awmpuitu atân che chah ang," a ti a, a sawi mai mai emaw ka ti a; mahse, a lo ti tak tak niin, ka inthlahrung ru kher mai. Inah chêtna tùr a tam ve dâwn tehlul nèn, bâkah, dàwr lamah pawh an buai dâwn asin, ka nuin rem pawh a lo ti vak lo thei asin le; mahse, a hnial ngam bîk lo a ni ang.

Mahse, Zami lo awm ta chu ka tân a țha hle mai. Kawm tùr ka neih bâkah ka chêt ai zawng zawng a che vek a, a țawng duh a, kan titi a, a chanchin min hrilh neuh neuh reng bawk. A pasal ûm chanchin pawh chu sawiin a rilru nat thu a sawi ve keuh keuh a, ka khawngaih reuh kher mai. Min hrilh dàn chuan bialpa a nei ngai lo va, duh pawh a duh lêm lo; mahse, a tlànpuipa khân tihtakzetin a bêm a ni a, a tìrah phei chuan duh pawh a duh lo va, a hlau deuh lek lek hial; mahse, a hêl reng tho a, amah a lo hmêl chhe vak lo nèn, a hêl a hèl tâkah chuan amah hawtu ni lo, amah duh ngawih ngawihtu bula awm chu nuam tihna chin a lo nei ve ta hial a, a nêl telh telh a, nèl piah lamah thlâkhlelhna leh duhna neiin a duh ai bâk bâkin a lo duh ta hial a, ani lah chuan nawmchen nân bâk a lo duh si lo.

"Bialpa ka neih ve hmasak ber a nia, hriat thiam a har êm a ni, min duh ve tak zet nia ka hriatna kha ka tih sual liau liau a ni, min lo bum chiang viau si a, min nuihzat ngawt ang. Ka thin a rim a, a rim êm êm chhan pawh kei ni lo mi dang a lo kawp tho vàng a ni, kan inrûk khân a in luahah min hruai a, a tûkah a bialnu chuan min rawn tlawh ta a nih chu! A zahthlâkzia chu maw, a bialnu chuan min țawng khumin țawng chhe tinrêngin min țawng khum ka ti mai. Ka zak lutuk a, khatih lai khân khûk ral chem chema khûk ral daih theih ni se ka tihzia kha! Ka zah bâkah ka chhûngte hi ka zah a, ka khawngaih bawk, keimah vàngin an rilru a nain zahna an phur bawk a," a ti sep sep a, a hmêl chu ka en țhìn a, hrehawm a tih hmèl bawk si nèn, ka khawngaihin ka thin a lo rim ve țûn mai. Chutiang mipa, 'mipa' inti ve si, mipa chêt dàn tùr anga che bawk si lo a tawng chu vànduai ka ti a, ngaihzâwng a neih ngai loh nèn, mipa a rinna a ti chhe nghâl vek mai ang tih ka hlauhpui bawk.

Ka nu a dam țha lo tih Bawiha'n min rawn hrilh chuan hrehawm ka ti tak zet a ni, engtiklai khân nge a lo dam loh ve ngawt ni? Nimin lama kan inbiak pawhin a dam țhat loh thu a sawi miah si lo. Ka be vat a, ani chuan ngaihtuahawm a nih loh thu leh ka ngaihtuah a ngaih loh thu chu min hrilhin keimah zâwk chu inenkawl țha êm êm tùrin min rawn hrilh a, a awka dam tak ka hriat chuan tlêmin ka ngaih a țha leh deuh ngawt a, chumi zànah chuan kan nupain ka nu tân liau liau a dam leh var theih nân kan țawngțaisak nghe nghe. 

"I puar lian tawh si a, i chak viau bîk si lo nèn, kana i kal a nih chuan ka ngaihtuah viau dâwn che tihna a ni a," a ti charh charh a, kei chuan," Zami a fel a, damdawi ka ei țha bawk nèn, tunah chuan ka chak ve tawh viau asin," ka lo ti ve thung a. Ka nu tlawha ka kal chu a phal lo hran lo; mahse, amah a hman si lo va, a tel lova ka kal chu a rem ti chiah lo a nih loh pawhin ka awm lo tùr chu a huphurh a nih ka ring. Kei pawhin ka nu kana Aizawla haw ngei ngei ka tum hran lo, a tel lova zin chu ka huphurh ve tho.

"I nu a ni a, kan theih ngei chu țha ka ti bawk si; mahse, kei lahin tih tùr ka nei chhâwng ve duah a, i kal a nih pawha ka zui ve hman lo tùr che lai tak hi a ni buaithlâk ka tih chu. Thlah lawk che chu ka hman mai ang a," a tih chuan," A ngai kher chuang hleinem, Pathian zârah eng êm a ti bîk nâng," ka lo ti ve thung a. Hun a nei lo lutuk tih ka hria a, ka phût loh bâkah a rilru a hrehawm viau ka hlau a, Pathian hnênah kan dìlsak tawh a, a dam leh vat tùrah ngai ang.


Mahse, U Hruaia chuan a hun chêp tak kârah ka nu kan tùr chuan min thlah ta tho a, amah chu rei pawh awm lovin ka nu a țawngțaisak hnuah a haw zui lehnghâl bawk, a buai ve êm a ni. Ka nu chu ka rin ai daihin a lo na reuh a, a lo chêr kiam mai si a, ka khawngaih tak zet a ni.

Remi a rawn lang vat a, kan sawi dùn a. Ina awmpui ngawt chu thil fel ber a ni lo tih hriain damdawi inah kan kalpui a, an lo admit zui a. Kei raipuar dul kawh luah tawh tân chuan han chêt zung zung a lo harsa tawh a, Remi'n min buaipui vek bâkah Ahlutei a rawn lang ve bawk a, U Hruaia'n min rawn be reng bawk nèn, hlauhthàwn erawh ka nei lêm lo.

Ka pa pawh a rawn lang a, kan inbe tawn reng reng tho a, lo kal a ngaih loh thu pawh ka hrilh ve tho a nia. Ei tùr lah chu a rawn keng tam si a, kan bula awmte pawh kan sem țhen ve hial a ni. Kan mamawhte min zâwt a, ka nu awmna bill-ah chuan buai lo tùrin min hrilh bawk.

Kan awm rei phian mai, amah a țha chak lo êm mai a, natna neuh neuh a lo kawp tam bawk nèn, chûng chu enkawl dam deuh phawt a ngai a ni. Bawiha chu a phar buai berah a țang lo thei lo va, ka khawngaih roh khawp mai. A che fel ve roh khawp a, ka awm loh chhûnga a lo puitling hman viau chu ka lãwm viau a ni. Kei a u lah hi ka che zung zung thei tawh si lo va, ani tlangvâl mawng zâng ber a lo ni hlauh a, tirh berah a țang lo thei lo a ni.

In lama ka awm laiin Bawiha chuan min rawn bia a," U, a theih anga rangin lo kal thuai teh, Nu awm dàn hi a ngaihțhatthlâk loh lutuk!" a rawn ti a, ka thin a va phu nasa tak! Ka khùr chhuak vekin ka hria, hmanhmawh zetin ka thil tih lai chu ka kalsan a, ka bag ka la a, kawngka kalhin ka chhuak zui ta dàwr dáwr a.



*CHAPOPUI TÙR KHAWPA THIL ROPUI HI MIHRING NUNAH HIAN A AWM LO*

 

Comments

Popular posts from this blog

☆KA TÂNA RUAT☆ - 1 By Dingdi Pachuau

☆KA TÂNA RUAT☆ - 1 By Dingdi Pachuau "School ațanga i hlawh ni lo, hmun dang ațanga sum hmuhna dang hlâwk tâwk i neih tâk ațang hian i induh deuh sawtin ka hria, tiraw?" nui chunga a rawn tih chuan ka melh rawlh a, a rûk tak erawh chuan ka nuih a za ngei mai. A fiamthu tih ka hria a, a dik lo hulhual tih hretu kan ni ve ve bawk. Kan pahniha inkârah hi chuan fiamthu hian hmun a luah sâng a, fiam pawh kan infiam nasa țhìn viau rêng a, thutak sawi pawh hian fiamthu sawiah kan inngaihsak fo a, hei erawh thil țha tak chu a ni lëm lo. "I duh duh han sawi la, ka leisak vek ang che," tiin, a hnu deuhah chuan uang tak hian ka chhâng lét a, nui hmêl pu duh miah lovin chapo hmèl tak hian ka'n dâk zui deuh vah a, ani lah chuan," Yess...!! Tak tak aw, Zarda pân ka ei châk tawh lutuk! Chu chu ni leh rih mai rawh se," a lo ti vat a, min rawn kheuh zauh pah hian a meng sawr sawr a, ka lama rawn thle phei deuhin," My name-a a rawn lang e," a ti zu...

☆KA TÂNA RUAT☆ - 35 By Dingdi Pachuau

☆KA TÂNA RUAT☆ - 35 By Dingdi Pachuau Ka tih luih deuh tlat avàng chuan ka awmpui ta nge nge a, ka sawi tìrh lamah kha chuan ka fiamthu emaw a ti a, min chhâng țha duh lêm lo, ka awmpui duh kha a ring chiah lo a ni maithei. A cousin-te lam hman an inti pawh bîk chiah lo va, a nu kha a rawn lang ve leh tawh bawk nèn, a nu kutah an dah ta deuh a; mahse, ani lah chu eng emaw thilah a hman lo leh thut ni àwm tak a ni. Mak ka ti ve deuh hlek a, a fapa thih hlauhthàwnawma a awm laia awmpui hman lo leh thuta a awm chu eng thil pawimawhah tak ni ang maw he ka lo ti ve mai mai a; mahse, U Rintea'n a zin hma zàna min hrilh leh tâk chu Joel-a accident hma ni hnih kalta khân a nu kha a lo zin chhuak tawh a lo ni. A chêtsual thu kha amah U Rintea ngeiin Pi Mawitei chu a hrilh a, ani chuan a zinna ațanga a la rawn haw theih loh thu a rawn hrilh a. A rawn haw hnuah a awmpui ta char char a, kâr khat deuhthaw a awmpui tihah eng emaw thilah a zin chhuah leh a ngai a ni àwm e. U Rintea zi...

☆KA TÂNA RUAT☆ - 33 By Dingdi Pachuau

☆KA TÂNA RUAT☆ - 33 By Dingdi Pachuau Dàwr ațanga kan chhuah dâwn pawh chuan min rawn zui ve zêlin," Pasal i neih tâk ațang khân kan inhmu khât tawh si a, kan inhmu leh lawk tawh lo maithei a ni, chu vàng tak chuan restaurant-ah kan chàwlho dâwn em ni ang? Ka treat ang che u," a ti leh a, ngawiin ka inngaihtuah vang vang phawt a, ka thutlûkna tùr erawh a tìr ațangin ka hre nghâl sa vek, min sàwmna hi rem ka ti lo ang tiin. Amah hi lo normal ta rêng pawh ni se ka pawm chuang lo ang, ka bialpa hlui a ni a, mi min lo hmuh dàn tùr ngaihtuahin a dik thei lo hrim hrim, ka fate nèn kan nia, ka fate tel lo pawhin ni ila, ka duh chuang lo ang, ka pasal hriat loh laia ani hmuh hi thil dik a ni lo. Ka hnial hnu pawh chuan min rawn zui zêl a," A mak e, pasal i neih hnu hian hmêlma enin min en ta tihna a ni thei em? Nge in pain a lo hria ang tih i hlau deuh zâwk? I fate an awm ve reng hi, eng thil mah kan ti thei nâng. A thuhrimah, eng thil nge ti se min tih? Mi sual tak ...