☆KA BEISEINA☆ - 32 By Dingdi Pachuau

☆KA BEISEINA☆ - 32 By Dingdi Pachuau

Damdawi in kawt chu ka thleng ve ngei mai a; mahse, ka hlauthãwng lutuk a, ka che sawn thei lo, taxi ațang pawhin ka chhuak thei lawk lo nghe nghe, driver-in min pui a, ka chhuak thei ta hrâm. Ka taksa pum pui a khùr a, ka taksa a rit ve tawh bawk si a, ka che thei hlawl lo.

Ka nu chu a thâwk lamah buaina a nei thut a, oxygen an pe a lo ni. Remi chuan ka hmêl a hmuh veleh chuan min lo kuah vatin hlauthãwng lo tùr chuan min hrilh mawlh mawlh a, ka kut a vuan pah bawk. Ka nu enkawl ngaiin a awm a, a enkawltu ber tùr ka ni a; mahse, tunah tak hi chuan ka buai ta nuai zâwk a nih ber hi, ka rilru pawhin ka țawngțai hlei thei lo.

Remi leh mi dang dang lo awmte chuan min hnèm malh malh nain ka hlauhthàwnna chu a kiang thei hauh lo, tunah tak hian ka bulah U Hruaia awm se ka ti tak zet a ni. Min hnèm se, min kuah bawk se... ka va ngai tak!! Kolasib lamah buai takin a awm ngei àwm si a, ka bulah awm se ka va ti tehlul êm!!

Ka nu a rawn pângngai chho tih min hrilh hnu pawh chuan ka chhûngril khùr a la reh hlei thei lo va, ka hlauhthàwnna erawh chu tlêmin a kiang ta deuh hlek. Ka han hawi kual a, Remi nu leh pa, ka pa leh Ahlutei pawh an lo awm ve reng tawh a lo ni, ka hmu thut hlawm chu mak ka ti a, engtik laiin nge an rawn kal khâwm pawh ka hre lo.

Ka nu a harh hnu pawh chuan kei chuan ka hmu ve duh rih lo, a hmuh laiin ka țap ang a, ka țah khum ang tih ka hlau a ni, ei tùr min pêkte chu ka sik khem neuh neuh a, thâwk ka la leh hawk hawk țhìn.

"Anne..."

Chu aw lo rîkna lam chu ka hawi vat a, ka pasal aw hi chu engtik lai mahin ka hai ngai lo ang. Engtik laiin nge a rawn kal? Ka ngai asin, nichînah pawh khân ka ngai a, tunah pawh hian ka la ngai reng.

Min rawn pan chuan țhu chungin ka lo kuah vat a, tu mah mi dang ka zah zo lo, ka ngaiin ka mamawh êm a ni. Ka bulah awmin min kuah se, min hnêm se tih kha ka duh a nih kha, ani pawh chuan duat tak leh nghet tak si hian min kuah lét ve a.

"Ka rawn kal hma theih loh avàngin a pawi ka ti, min mamawh dâwn teh rêng nèn! Sorry lutuk aw; mahse, tunah chuan i bulah ka awm tawh a, thlaphãng tawh miah suh," a ti sup sup a, chu a țawngkam tlêm tê pawh chuan ka thlâ a va ti muang chiang êm!! Ani hi ka mamawh ber chu a lo nih hi.

Ka nu chu thla khat deuhthaw damdawi inah chuan a awm a, a dam ve deuh hnuah a duh angin kan inla chhuak a, dam ve deuh angin lang mah se khawiah mah a la kal chhuak peih chuang lo. In chhûngah zàwi tê têin a kal peih chauh a ni, ka duat theihtàwpin ka enkawl a, a ei duh zâwng ni se kan leisak reng bawk. U Hruaia'n awmpui tùrin min ti a, awmpui hming pu mah ila kei ngei pawh hi buaipui chu ka ngai ve pah tho, ka inzo lovin ka rit lutuk si a, ka awm mai mai pawh hi ka hah hluah hluah mai a ni, ani pawh a buai zak zak viau mai. Aizawl leh Kolasib a kàr tawn chhên lo thei si lo va, a hah ve tho si, ka khawngaih roh tawp, sawisèl lah chu a nei hauh lo lehnghâl a.

November thla tàwpah damdawi inah naute nei tùrin ka lût a, inawmpui an rem ti chiah lo nain kei chu buaipui ka ngai êm mai a, kan dîl lui a, Remi'n min awmpui tawp. Ka tih buaizia ka ngaihtuah țhìn a, heti êm êma kan tân an țha mai hi mak ka ti hial țhìn. Chhùn lamah Zami'n min rawn awmpui thung a, ka pate pawhin ka chanchin chu min rawn zâwt reng țhìn. Kan luh ațanga zàn thumnaah harsa takin fapa duhawm zet ka nei ta a, kutke kimin a piang a, a țha a ni tih ka hriat chuan ka nui sak nghe nghe. Ka vei rei deuh hlek a, ka harsat bawk nèn, ka nei zo chu ka chau lutuk a, ka mit a rawn thim sulh sulh a, eng mah ka hre ta lo.

Ka chak lovin ka inhliam nasa bawk nèn, thisen pawh unit 3 lai min pe nghe nghe a, damdawi ina kár hnih chuang zet ka awm hnuah ka chhuak ve ta hrãm a, enkawl zung zung ka awlsam zâwk nân tiin ka pasalte in lamah kan awm ta a, ka la dam chiang lutuk lo bawk nèn, ka mu deuh chawt a ni ber, naute pawh chu ka khawih mang lo, hnute ka pe a, chu zawng chu a ni mai; mahse, ka inthlahrung ru angreng viau, a chhan pawh naute chu a sual reuh tlat mai a, chhùn lamah a muhìl țha thei viau a, zàn lamah erawh a meng ker a, pawm ngei ngei a ngai, chuti lo chu a țap nghâl a ni mai. Ka che hlei thei bawk si lo nèn, min ti mangangin chhûngte lakah ka inthlahrung ngawih ngawih a ni mai, an buaipui vek mai si a, mut tum bîk an awm lo, ka nu takngial pawhin a buaipui êm êm reng mai. Ka pain," I heti reng bîk dâwn lo, ka tu hmasa ber i ni bawk a, i duh tâwkin min han men teh khai, mut duh hun zawng i la nei dâwn khawp mai," a tih chuan ka lo nui ringawt a. A khawih thiam ve lo nain a buaipui tawp a," Ka tupa duat êm êm, ka hmangaih rum rût tùr," a ti deuh chhên mai a ni. U Hruaia ve thung hi chuan ngawi rengin a pawm mai a, a en reng țhìn thung. A sual reuh țhìn si a, a duh hleuh hleuh viau lo ang tih ka hlau deuh țhìn a nia; mahse, a fapa lak ațanga a mit a lâk sawn ngai loh dàn ațang hian a duh hleuh hleuh viau a ni tih ka hria.

Ka pain," I nuin a hming chu sa rawh se," a tih tlat avàngin min hringtu ka nu chuan a tupa hming atân Daniel Lalrinawma a sa a, Daniel tih tak hi chu Nutei rawn phuah a ni. Ka nu chuan," Pathian hi engtik lai pawhin kan tân a rinawmin a pângngai reng si a," tiin, a nitei hming rawn phuah nèn la kawpin 'Daniel Lalrinawma' tih a lo ni ta a ni.  A nîte pahnih, Zami leh Ahlutei hian 'Little Danny' tiin an ko deuh tlat a," A lo len hunah tlangvâl chhe lo deuh a ni ang a, bialnu a neih hunah a sèn laia țah nuam a tihzia kan hrilh țhìn ang," an ti ngei bawk a, anni pawh hian an duat êm êm a ni.

Kolasib lama kan haw hmain ka nu hnênah zàn khat chu kan riak phei ve a, naute hmuh pawh a châk ve bawk nèn, chumi zàn chuan kan vànnei a, naute a fel ve tlat a nih chu, a țap miah lo, muhìl lo mah se a țap miah lo va, a meng kar ringawt! A mak tak tak a ni. Aizawla awm reng theih ni bîk lo ta chu, kan haw ta poh a, ka chét vak a la phal loh avàngin ka pain Zami chu kan bulah Krismas hmang tùrin a ti a, a inthlahrunawm ka ti ngawih ngawih; mahse, amah zâwk chuan," Ka châk daih zâwk! Little Danny ka hmu reng thei dâwn a," a ti mai a, chu chuan tlêmin min ti zia deuh.

Kolasib lamah kan haw chu ka pain min rawn be zut mai a, video call ngatin a nia kan inbiak țhin ni. A tupa chu hmuh reng a duh a, zàn lama min rawn biak hi chuan ka nu pawh a rawn lang ve ziah bawk. Min be êm êm lo nain ani pawh hian a tupa hi a duh ve viauin ka hria a, hetia ka pa bula a rawn lang ve țhìn ringawt pawh hian min ti hlim ru veng veng țhìn. Kei min ngaina viau lo mah se a tupa hringtu ka ni tho a, min ngainatna chin a nei ve tho ang ka ti ve tlat. 

Nu ber ni mah ila kei hi chuan ka fapa hi ka chang ve hman hlawl lo a ni ber,  U Hruaia ina a awm ve châng phei chuan Zami pawhin a chang thei meuh lo a ni e. A duh hleuh hleuh bawk a, puakpuan tel lo hian a âwmah a muttîr a, a chângin a pawm bawk a, a kutte hi a kham ka lo ring țhìn; mahse, ani chuan," Ani ang 10 pawh hi pawm ila a kham thei lo ang," a ti deuh tlat zêl a, chuh pawh hi ka tum ngai lo.

Ka nu pawh a zia chho ve hret hret a, ka inbe reng reng a. U Hruaia'n kan hnêna awmtîr rih mai a duh viau a; mahse, ka nu chuan a lo hnial thung. "Ka țha tawh lutuk alawm, in hman hunah min rawn tlawh leh zâwk dâwn nia, ka tupa pawhin min ngai tawh ang," a ti deuh tlat a, duh se chuan kei pawhin hruai mai chu ka hnial hauh lo; mahse, a duh kha ka ring lo sa hrim hrim.

Krismas leh Kum thar inkârah ka pate chu an paliin an rawn lang hlawl mai a, ka nu ber chuan a rawn pawm hmasa ber a, kei chu min be leh chuang miah lo. Nutei chuan a vawi khat hmuhna a ni bawk a, a țê chèl chùl mai a," A tê reuh sia, a duhawm reuh bawk si, ka duh reuh e!! Ka va hmangaih dâwn tak! A hmêl hian hmangaih a support tlat," a ti làng láng reng a, ka tân chuan nuam ve duh deuh mai asin. A pi leh pu leh a nîte pathumin an duat rawn luih luih mai a ni si a, ka fapa duattute hi ka tân chuan huat theih pawh an ni lo hrim hrim bawk. Ka nu leh Nutei khân min làwm lo viau țhìn kha a nia, tunah chuan ka fapa vàngin kha boruak kha tlêmin a bo țhen ta niin ka hria a, nuam ka ti viau bawk a ni.

U Hruaia ngaihtuah kimzia Kum thar tûkah ka hre chhuak thar leh chiah. Ka nute tân Krismas thilpêk ka pe hauh lo kha a ni a, ka hriat miah lohin blanket țha tak 2 leh mutpuan lum a pe a, Krismas sa tùr, vawksa, bâwngsa leh arsa leh chhang tam tâwk a leisak țeuh bawk a ni àwm e. Chu mai a la ni lo, an duh zâwng leina tùr tiin pawisa tam tham tak a lo pe bawk, Kum thar tûka Bawiha ka han biakin min hrilh ve ta chauh a, U Hruaia pawh ka en phah reng ringawt nghe nghe.

A hnua ka zawh chuan," Enkawltu tùr an mâkpa ka awm alawm, keiin ka ngaihtuah lohin tuin nge enkawl ang?" a lo ti thên a, ka en vang vang a," U Hruai, i tân hian phurrit nih ka duh lo," ka ti sap a. 

"Eng thil nge i sawi ni?!! Ka lalnu, ka tân hian phurrit i ni ngai hauh lo ang, chutiang thu chu sawi tawh miah suh aw, ka tân chuan engkim i ni a, ka engkim i ni a, ka hlimna bul ber pawh i ni. Nun hlimna min pe a, ka lei rohlu fapa duhawm lutuk min pe bawk a, hei vàng hian làwmthu ka la hrilh lo chein ka hre nghe nghe, ka lãwm tak zet a ni," a ti ta duah a, sawi mai tùr hre lo chuan hmangaih takin ka en hau reng ringawt.

"Kan chhûngkua hi kan rual viau lo va, chutiangin nang pawh. Chu vàng chuan, fapa duhawm tak min pêk ang hi tam tak neih ka la duh belh dâwn a ni, ka la duh tâwk dâwn hauh lo, Pathian zârah nang nèna kan fa chãwm zo lo tùr khawpin kan harsa lo bawk a, tam tak nei ang aw. Kristian chhûngkaw lian tak din hi ka lo dream țhin a ni a, nang nèn hian Pathian puihnain kan ti hlawhtling thei ngeiin ka ring bawk a ni," a tih leh hnuah phei chuan ka kuah chawt a, a hmuiah ka fawhsak vawng vawng ringawt. Thua chhàn lêt kher ngai ka ti lo va, thu aiin chêtziain ka lantîr ta zâwk a ni.

Remi pawhin min rawn tlawh ve leh tawh a, ani hi chuan U Hruaia a ngam deuh hlek a," Ka rawn kal chhan ve vang vang bawk a," tiin naute a pawm lai chu a chhuhsak hmiah mai a, ani pawh chuan," E, pawm rawh, pawm rawh," a lo ti ve mai bawk. U Hruaia kal kian hnuah chuan Lalkâwnga'n a rawn biak dàn chu min hrilh malh malh a," Engtin nge i number a neih theih a?" ka lo ti vat a, ani chuan," Ka hre bîk lo, zawh pawh ka zâwt lo, i pêk a nih chu ka ring lo ve ngawt a," a ti a, kei chuan," Pe nâng aw, ka pe duh lo hrim hrim," ka lo ti vat a.

*I NUNA HATSATNA I TAWH ȚHINNA CHHAN TAM ZÂWK KHA CHU  MAW,  'AW' TIA I CHHÀN HMA LUTUK VÀNG LEH 'AIH' TIA I CHHÀN HAR LUTUK ȚHIN VÀNG KHA A NI*