☆KA BEISEINA☆ - 33 By Dingdi Pachuau

☆KA BEISEINA☆ - 33 By Dingdi Pachuau

"A han ngeiawmzia chu maw, min la duh reng thu leh min ngaih țhin thu sawi reng chungin a hnu lawkah a bialnu nèna an pic min rawn thawn a nih chu! Chu pawh hnung lam ațanga a kuaha a nghâwnga a fawhsak lai! Hmm... ka thîk tùrin a rawn thawn a nih chu! Ka tih dàn kha a la hre reng a ni. Englo a nia, ka țhen tirh khân ka rilru a nat êm avàng khân a thîkah tiin ka hmêl hriat mipa pakhat nèna kan thlalâk ka thawn pek a, khami vàng khân phuba a rawn la ve ta nge pawh ka hre thiam lo," a ti barh barh a.

"Engah nge chutiangte chu i lo thawn rêng rêng a?" ka tih chuan," Ka rilru a ti na ve êm a nih kha. Min duh hmasa tê tê a, ka duh ve tâk viau hnuah hmeichhe dang min kawpsan leh daih a, ka tlâwm êm asin! Min ti beidawng a, hetiang hian kan awm ang tih lo hre lâwk ngat ila chuan ka chhâng hauh lo ang, min duh thu kha min lo hrilh lo malêk se țha tùr hi a nia," a lo ti leh a, a țawng lai hmêl chu ka lo en deuh reng a, ani erawh chu a zak ve deuh nge, en pawh min en țha duh lo. 

"Tunah hian i la na reng tho em?" tiin ka zâwt ta thung a, min rawn en zawk a, a hawi sawn leh nghâl daih. A kut tin tuai tuai chung chuan," Ka hmangaih alawm," a ti chhuak ta sap a, a hmui chu a pet zui vang vang a, thil dang zawh belh a ngai ta lo. A chiang ta, chiang êm êm ta chu, Remi hian Lalkâwnga kha a lo duhin a lo hmangaih tak zet a ni tih hi a ni, tunah pawh hian a rilru chu la na hlê mah se a la duh reng a, a la pawm thei reng ngei bawk ang.

"Min rawn biak a tum fo a, block tawp ai chuan tiin number dang ka hmang mai a, ka chhûngte number hi engtin tin nge a neih pawh ka hre lo, min rawn be leh hlawl țhìn. Ka hrilh kîlh kĕlh duh lo che a nih kha, min rawn biak apiangin a zu ruih lai pawhin ni se min ngaih thu hi a rawn sawi ziah a, a inchhìr thu leh pawi a tih thu lam erawh a sawi ngai lo thung. Ka chhâng ve ngai lo va, ka lo ngaihthlâksak ringawt țhìn," a tih leh tâkah phei chuan ințhen tawh mah se an pahnih inkárah hian eng emaw a la awm reng tih a hriat mai. Pakhatin a rawn be zauh zauh a, pakhat lahin a lo block ngai lo va, a thil sawi a lo ngaihthlâksak ziah a... 

Remi haw hnuah U Hruaia bulah pawh chuan ka sawi a, ka țhian țha ber a ni a, Remi ka khawngaih thu ka sawi chuan," A tâna Pathianin a ruat a nih chuan an inkawp leh ngei ang. Kan duh dàna kan awm țhin vàng leh hun kan hman țhin vàng hian Pathian min ruatsak hi kan hai fo a, kan duhna kan hmuh len zâwk miau țhin vàng tak hian Pathian min ruatsakah kan ngai țhìn a, Pathian râwn chung leh a zài ngaia kan awm loh vàng hian kan lo ti sual rem rum țhìn zâwk a lo ni," a ti kalh kalh a, ngun takin ka lo ngaithla a, a dik ngawtin ka ring.

Kan ngawih deuh vang vang hnu chuan,"U Hruai..." ka ti sap a, min rawn en chhuk vatin," Ka naute..?" a ti sup a, kei chuan," Hawh, zanin chu thil hlui tawh sawi mai mai ang? Ka zâwt che ang a?" ka ti a, ka nui pah deuh bawk a. Ani lah chuan," I duh apiang min zâwt rawh," awlsam zet hian a lo ti thên a.

"Irene-i kha i ngaihtuah chhuak zauh zauh țhìn em?" tiin ka zâwt ta hlawl a," Dâwt inhrilh âwih loh," ka ti zui zat bawk a. Ani chuan," Kâr khatah vawi khat ang vêl chu ka ngaihtuah chhuak ve maithei," a ti mai a, dâwt a sawi leh sawi loh chu hriat tumin a mitah tak chuan ka en kar a.

"Next?"

A bân chûl chûl pah chuan," A nih leh, in inneih hma khân Pathianin a ruatsak ngei che niin i hria em?" ka ti leh a, ani chuan," Aw, ka duh êm avàng khân Pathianin min ruatsak niin ka ngai hmiah," tiin min chhâng leh a, thu dik min hrilh ngei niin ka hria.

"Ka sawi tawh ang khân ka duh êm avàng khân ka duhna kha ka hmu lian ber a, Pathian kuta engkim dah hmasa tùr ka nih laiin ka duhna kha ka dah hmasa zâwk a, ka duh dànin thil ka kalpui ta a nih kha," a tih leh chuan," Pawi viau mah se keiin a zár ka lo zo ve thung a, Pathian thil rèl dàn hi chu a mak êm asin," ka lo ti sap a.

Min kuah beh pah hian," Ka tâna țha ber tùr emaw ka tih kha a lo ni lo va, ka tâna mi pawimawh ber tùr chu a lo ruat fel diam tawh zâwk si a," a ti sup sup a, ka samah chuan a hmai a rawn phum a. Thâwk la hawkin," Ka nun ti hlimtu ber nia ka hriat kha ka nun ti beidawngtu a lo ni a, ka nun beidawnna lak ațanga min khai chhuaktu, nun hlimna min petu ka nupui hi ka hmangaih êm êm che a ni. Fapa duhawm tak min pe tawh bawk a, he khawvêlah hian awh rêng rêng ka nei tawh lo, ka tâna mi hlu êm êm pahnih ka bulah in awm tawh si a," a ti leh a, ka biangah rawn vuanin chiang zetin kan inen a," Ka hmangaih che, ka naute," rawn ti leh supin a rawn kûn hniam a, dìm duat tak hian min rawn fâwp zui nghâl a. Min hmangaih thu a sawi chuan min ti hlim bawk a, uar zet hian ka lo chhâng lêt ve nghâl zat a.

A hnu lamah chuan Joshua chungchâng a rawn sawi chhuak ve ta thung a," Ka thîk theih leh ka thîk phâk miah loh ni mah se ka thîk țhìn tho asin, a chhan chu i rilru zawng zawng a nei vek niin ka hre tlat a. In chanchin kha Ahlutei hnên ațangin ka hre chiang ve viau a, i têt deuh lai, vûr zuara ka hmuh che tih loh kha chu ka hmu ta lo vang vang che kha a nia. Ka han hmuh leh thut che khân nula fel tak i lo ni tawh a, i chanchin ka hre chho ta bawk nèn, hnaih che ka duh viau na khân hnaih hleih theih loh khân i awm tlat a, Pathian hnênah ka dîl nasa asin; mahse, tûn țumah hi chuan nang ka duhna che aiin Pathian ka dah lal hmasa a, engkim a dik chho ta vek mai a ni," a ti leh sup sup a, ngun takin ngaihnawm ti takin ka lo ngaithla a, nuam ka ti, kei ve mai heti taka min lo duh ve hi mak ka ti a, ka mumang mai mai a lo ni ang tih te ka hlau rilru hial. Dik tak chuan hmân ațanga ka star ngar ngar kha a ni a, a nupui ka han ni ta mai te hi a châng chuan ka la âwih thei lo hial asin! Mumang mai niin țhangharh rual rualin engkim hi a tàwp vek mai ang tih te ka hlau țhìn.

Ka dam chian tâk hnuah chuan Zami pawh Aizâwl lamah a haw ve leh ta rih a, ka pain la awm tùr chuan a ti nain ka inthlahrung ve tawh a, ka nu dàwr nghâk pawh a puih theih bâkah a hmaa a dàwr nghah pawh kha nghah leh theih reng a ni a, kawng engkim deuhthawah min àwl ti ila a dik ang, chu bâkah, kawm tùra a awm ringawt pawh ka tân chuan a nuam lutuk; mahse, haw ve rih phawt rawh se, ka dam tawh tho bawk a, a duh chuan nakinah a lo kal leh thei tho alawm.

A haw hnu chuan ka buai ve rak rak viau mai a, min lo àwl hnehzia ka hre chiang kuar kuar bawk; mahse,  Danny-a a fel ve tawh a, a mu duhin a tlei ve tawh a, a zia viau. Bual ber hi ka huphurh chu a ni, ka zei lo teh thlâwt lutuk a, kei aiin U Hruaia'n a zei zâwk! Ka thlauh palh ang tih leh ka chelhna a pît palh ang tih ka hlau țhìn a, chu vàng chuan ka lo chelh na deuh țhìn a ni chêk ang, ka bual hi chuan a țap ve ziah. 

Thil pawimawhah U Hruaia Aizawl lamah a kal zawk a, min riahsan a duh loh avàngin zîng takah kalin zàn dâr 8 vêlah a rawn thleng a, a chau ngawt ang chu. Danny-a mu tawh chu a biangah a fawhsak vang vang a, chumi hnuah ka kutah a rawn chelh ve ta thung. A tih ve dàn a nia, a chhuah apiangin a lo haw veleh a fapa a fâwp hmasa ber ziah a, a pianna a la rei viau lo nain tih țhanah a nei tawh a, khap buai pawh ka tum lo. A ngai ve a ni mai a ka ti țhìn.

"I chàu àwm mang e, inbual phawt nge i duh chaw ei? I ril a țâm tawh àwm sia, ka siam nghâl dâwn em ni ang?" tiin ka zâwt a, vawiinah a buai char char tih ka hria a, chhûngte pawh a tlawh hman lo a nia, a chàu dâwn lutuk tlat.

"Tunah chuan ka chàu tawh lo ve. Ka in-charge full leh tawh alawm," a lo ti mai a, a nui suk a. Chaw ei tùr chuan kan inkai phei a, kan room kawngkhàr erawh inhawngin ka dah a, Danny-a a lo harh palh pawha a thãwm ka hriat theih nân ka ti a ni.

"Min lo eisan mai tùr a nia, i ril a lo țâm tawh dâwn si," a tih chuan," Țâm hran lo ve, thingpui ka in a," ka lo ti mai a,  a chhuah rêng rêngin a lo haw tlai dâwn pawhin chaw ka lo eisan ngai lo. Zami pawh khân thei hi min ti khawp mai a," Lo nghah kher a ngai lo, eisan daih ang," a ti țhìn a; mahse, ka eisan ngai chuang lo.

"Min lo nghâk dâwn tih ka hriat vàngin a nia ka rawn hmanhmawh êm êm ni, zanriah pawh ei nghâl tùr a awm reng, mi dang phei chuan an ei vek dâwn nghe nghe; mahse, in lamah min lo nghâk rengtu, min lo thlîr rengtu ka nupui duh tak hi ka eisan thei lo a ni," a ti leh duah a, min rawn en a, ka lo nuih sak a, ka tel lo chuan a ei mai mai bîk lo ang tih ka hre ve tho a ni.

Chaw chu kan ei tam lo dùn viau, a hmingin kan ei ve mai a ni, riltàm hun a pèl duai tawh a, a ei tam theih loh a ni. Ka tih fel chhûngin U Hruaia'n Danny-a a lo va en leh rih a, ka ti fel zo thuai a, ka va luh chuan," Kan inbual dùn dâwn em ni ang?" a lo ti a, ka en hau a," Chaw kan ei kham chiah sia, a tihchi rih lo ang, nghâk rih lawk ila... tiraw?" ka ti ve thung a, ani pawh chu a lo bu ve nghut a. Ka inbual tawh a; mahse, inbual dun a duh chuan ka inbual leh mai a ni ang chu.

Khumah chuan kan țhu dùn a, Danny-a puan ka thleh țhat lai chuan," Vawiinah Irene-i ka hmu a," a rawn ti chhuak sup a, ka en teuh tak tak! Mak ti deuh anga lan ka duh lo a; mahse, mak ka ti thlâwt, puan ka thleh lai pawh ka chàwl dat nghe nghe a ni.

"A ni maw?" ka ti ta ringawt a, ka aw pawh chu ka thunun nasa viau, a pângngai viau chu ka lãwm hlê mai. A hmuh thu a sawi hi mak ka ti lutuk ringawt, min hrilh kher bawk sia, eng atân nge min hrilh kher le?

Ani chuan," Um, kawngah a nia, min be nghe nghe a," a lo ti leh a, tunah hi chuan ka en tawh. Kawngah a lo bia a, engtiin nge Aizawlah a rawn chhoh ni ang? U Hruaia hmuh tum hian a rawn chho tihna em ni?

"A la hmêl țha reng em?"  A nui hawk a, min rawn en ve ta," Hmêl țha i lo ti reng elo?" a tih chuan rang zet hian ka lu chu ka bu vat a, amah vêk chuan," Hmeichhia tak hi chu, mahni hmeichhiatpuite pawh hi hmêl țha hi in ti thei zêl chu a nia," a ti leh phawt a, chutah, sawi zawm lehin," Um, a la pângngai viau; mahse, a chêr deuh tawh thung a," a ti leh a, kei chuan," Mahse, a la chhe lo tho ang," ka lo ti ve thung a, min rawn hnaih sauh pahin," Ani aiin a lêt tam takin i hmêl a țha zâwk, hmêl bâkah i nungchang zawng zawngte, ka nupui i nih vàng leh ka fapa nu i nih vàng pawhin a lêt sâng tamin ka duh zâwk bawk che," a ti leh a, ka kutah rawn chelhin a lamah min hawitîr a.

"Ani kha ka tân eng mah a ni tawh lo va, ka khawngaih ru viau zâwk a ni. Ka hmuh chiah khân ka mitthlaah i rawn lang nghâl a, ani nèn khân khaikhin chi-ah pawh ka ngai lo che,  ka tâna engkim leh ka tâna eng mah ni tawh lo chu khaikhin chi ni hek lo le. Ka hmu a ni tih pawh hi zêp ka duh deuh a; mahse, eng nge a țùlna? I lakah hian zêp neih ka duh lo va, zêp tùr thil a awm pawhin ka hre lo. Ka tân nang aia hmeichhe hmêl țha an awm lo a, nang aia duh lah ka nei hek lo, ka hmangaih che a, ka fapa nèn hian ka engkima engkim in ni," a ti leh ta duah a, zanin zet chu, a țawng tam ve lutuk a, mak ka ti deuh hlek, zan dang aiin a danglam deuh tlat a ni, vawiina mi dang ûmsantu, a nupui hlui a hmuh vàng a nih ka ring deuh ngawt a.

Rei lo tê kan inbual dùn zawk a, a bula kan mut pawh chuan Danny-a chu a harh lo rêng rêng, vawi khat chu a rawn tãl ve ngei mai; mahse, a che lo zui leh nghâl a, a mu tui ve ngang a ni ang, a pain a fawh leh pawhin a harh chuang lo.

Remi nèn kan in-video call a, naute hmuh a duh vàng a nia, ka han entîr chuan," A biangah ka va han piai châk leh tawh tak! Duhawm hmuah hmuah lutuk mai! Han ti harh deuh teh," a rawn tih chûl chuan," Tihchi nâng! Mi mu tui lai tih harh ngawt chu a, a khawngaihthlâk," ka ti deuh tlat a, a haw ngang mai.

"Inti fapa nei duhawm viau suh aw, ka neih ve hunah chuan i châk lo ngawt ang!" a rawn tih chuan ka nui hak hak a," I nei har àwm êm mai ! i neih tùr bera lahin bialnu a la nei a nia, kawng a la bo thui lutuk!" tiin ka han fiam zui a, Lalkâwnga ka sawi chhan a ni tih a hre thiam ngeiin ka ring.

A rawn hre thiam ta chiah rêng a. Ner deuh sak hian," Nizàn khân min rawn be leh a, a rùi pawhin ka hre lo nghe nghe. Min la duh thu bawk a rawn sawi leh a," a rawn ti leh ta nge nge a," Engtin nge i chhàn?" ka lo ti leh vat a, ani chuan," Làwmthu ka hrilh deuh tawp mai, min hrilh ve ziah si a, chhàn dàn tùr pawh ka hre zozai tawh lo," lu thing deuh nar nar chung hian a ti a, Lalkâwnga chanchin hlîr chu kan sawi chho leh ta a, a han sawi dàn ațang leh a hmêl ațang chuan a la duh reng tih hi a hriat ngawih ngawih, Lalkâwnga hian a bialnu chu țhen se, inkawp țha leh mai se ka ti; mahse, zu a in kher a, ka ngei tlat.

Kan inbiak tàwp dâwn lam chuan," Lo zin ve lawk ula ka ti êm mai, a live ngeia Danny-Bawihduata hmuh leh pawh a châkawm tawh alawm," a rawn ti a, kei chuan," Kan rawn kal zawk maithei, U Hruaia'n a sawi deuh a," ka ti a, ani chuan," Lo zin vat r'u, ka hmu châk tawh! Chuan, in rawn zin chuan châm ve reng rih bawk ang che u," a ti zui leh zat a.

U Hruaia chuan a lo ti tak tak a! Hun ãwl a neih laiin zàn khat riak tùrin Aizáwlah chuan kan zin a, ka pa lo làwmzia chu, in kan luh ațangin naute pawh ka chang lo leh nghâl zat a, ka nu rawn haw pawhin a kut a sil phawt a, a rawn pawm zui leh nghâl. Nuam ve duh deuh asin, a tu mah ni se ka fa a ni a, a tupa hi a duat a nih chuan kei a nu pawh hi min haw tak tak lo ang tih ka ring thiam ve tlat a ni, a chhan chu a tupa hringtu ka ni miau a.

U Hruaia'n ka nu min tlawhpui a, ei tùr a leisak nual a, pangpár a ngainat avàngin bâwr khat a leisak bawk. An mamawh tùr nia a rin hi chu a leisak ngei ngei țhìn a ni, ka han khap ve deuh nain a zàwm dâwn chuang si lo va," Keiin ka tih lohin tuin nge ti ang?" a ti tlat a, ka sawi duh ta lo a ni. Ka nu hlim hmêl chu hmuh nuam ka ti a, a lo dam viau tawh bawk nèn, Danny-a a han pawm ve dâwrh dâwrh pawh chu hmuhnawm ka ti a, phone-ah inhmu fo mah se phone leh a takah hi chuan a dang a, a tupa hi a ngaiin a làwm ve êm êm mai si a, ka lung a ti chhe lek lek hial a ni.

Bawiha chuan kan haw leh hmaa chaw ei ve ngei tùr chuan min sâwm a, U Hruaia chuan," Zàn khat chauh riak tùrin kan rawn kal chu a nia; mahse, zanin hi kan riak leh mai ang, chuan, zaninah chaw chu kan rawn ei ang," a ti a, ka nu hlim hmêl ka hmuh chuan," Nu, Bawihtea pawh i pawm rei thei deuh dâwn a nih chu," ka lo ti vat a.

Zanriah ei tùrin kan kal hma deuh a, Remi pawhin a lo ei ve dâwn, chhùn lamah kan inbe fel vek tawh a, ani hi chu a rawn inbengvàr hmiah zêl. Ani pawh a lo awm daih tawh a, kan va thlen hnuah U Hruaia'n chawhmeh kan lei phei chu a siam leh rih a, tlêmin kan ei har ta deuh.

Chaw kan la ei lai, U Hruaia chu a kham tawh tihah phone call a dawng a, pâwnah a chhuahpui nghâl daih a. Remi chuan," In pa chuan nula phone call a dawng chiang mai," tiin a nui țhû a, ka duh loh deuhin ka rilruah Irene-i a rawn lang nghâl zawk, pâwnah a chhuak daih bawk si a, a ni ngei ngei ang; mahse, ni leh lo, a ni lo ang, ani ni se a chhâng duh dâwn em ni?

*HRINGNUN HI CHU A MAK VE NGAWT MAI. INHRE NGAI MIAH LO KHA KAN HAN INHRIA A, ȚHIAN KAN HAN NI A, ȚHIAN AȚANGIN ȚHIAN MAI NI LO DEUH, ȚHIAN MAI PIAH LAMAH; CHUMI HNUAH CHUAN LA INHRE NGAI LO ANGIN KAN AWM LEH ȚHÌN BAWK A*