☆CHANTÂWK KHUARÈL☆ - 2

☆CHANTÂWK KHUARÈL☆ - 2

By Dingdi Pachuau

A insawi dàn khân pa a nei lo va, nei lo han ti ila a pa a hre lo a ni zâwk ang chu, a nu khawlai fa a ni ve a, a nu lah hrisêl lo ve deuh mai hi a ni a, harsa takin an inchãwm chho ve bek bek a, dam ve zêl chuan thing delh loh lung delh loh na nâ nâ chu a lo tleirãwl chho ve ta a ni. A nuin a pai țantirh lai chuan a pi chuan hrehawm a tiin zahthlâk a ti a, pasal nei lova khawlai fa han pawm leh ringawt mai chu retheih bawk si nèn, tih tlâk daih a rawt nghe nghe; mahse, a ngam mai bîk si lo, Pathian a hlau ve tho si a. A hnuah erawh nau pai tâk rau rauah naute chu mipa ni tùrin a duh ta tlur thung a, a pian dâwn hnaihah phei chuan mipa a nih ngei ringin mipa hming sak tùr a lo hual lâwk sa diam nghe nghe; mahse, chutiang chu a lo ni ngawt thei bîk si lo, a lung a awi lo lek lek hial a ni àwm e.

Chhûngkhat laina hnai an nei lo viau mai a, a pi ni se vàn laia tla an sawi ang deuh a ni a, belhbul tùr a nei lo, a nu pawh kha a pi khawlai fa tho a ni. Aizawla a rawn awmpui zawk a pi nia a sawi kha a pi hmêl hriat mai  a ni a, awmpuia inhlawh pahin sikul a rawn kal a ni. Mi hlim thei tak kha a ni ve a, a nui sâng thei reng a, a hlim lo ngai lo a ni ang ka ti hial țhìn a nih kha. Amah a lo hmêl țha bawk nèn, a hmeichhiatpui mah ni ila a hmêl kha a țha ka tiin a hlim hmêl kha hmuhnawm ka ti țhìn. Ka ngaihtuah ka ngaihtuah hian mi sual, mahni pasal hial that duh tùr khawpa mi nunrãwng ni theiin ka hre thei lo a ni; mahse, mihring nun leh rilru hi chu kan awmna hmun leh kan hun tawn azirin a danglam thei fo a, keia rin leh rin loh lam lhân kawng ro a su vak lo ang. A thuhrimah, a pasal that tùr chuan mi dang han puh mai theih tùr an vàn bâkah mi sawi dàn hi chu thuhran, thil kal vêl dàn chanchin thar ațanga han chhui kual ve ngial pawh hian a thah ngei niin a lang tlat a ni.

A chanchin chu ka theih ang angin ka chhui chho ve a; mahse, hriat a har khawp mai. Chanchin thar vêla an rawn puan leh ziah bâk lo chu hriat belh ka nei hlei thei lo, Aizawla a rawn awmna a pi ber lah kha a boral ve tawh nge ni, an awmna vêng nia a sawia ka han zawn rûk ve deuh pawhin hmuh tùr a awm tawh loh bâkah a chanchin hriat theih tùr pawh a awm tawh bawk si lo va, chhui dàn tùr ka bangbo viau mai. Keima tâwkah ka buai ve viau ringawt a, hmasâwnna erawh hmuh tùr a awm hran lo. Ka ngaihtuahna ka sêng kual vak vak a, a pa a hre chhuak ve tawh ang em tih leh a nu leh a pite kha an la dam ang em tih angreng, thil țûl lêm lo leh chhànna ka hriat hauh loh tùrte chu a ni ka ngaihtuah ni. Ngaihtuah loh ka tum pawhin zàna ka mut dâwnah hian ka rilruah a rawn awm zêl a, thil dang ka ngaihtuah hlei thei lo a ni.

Ka ngaihven viau chhan ni bera ka hriat tâk chu chhûngte a nei dâwn si lo va, ama tuar tuarin a tuar tlawk tlawk dâwn ni bera ka hriat vàng a ni. Nu leh pi chu a nei ngei mai a; mahse, an rawn ngaihven thei ang em? Chu bâkah, dam pawh an dam tawh kher lo thei asin, kum a lo ral tam ve leh tawh êm mai. 'Țhian' tia sawi tùrte erawh a nei ang, pastor nupui lai a ni a, a nei țeuh ngei ang; mahse, hetia chanchin duhawm lo a neih hnuah hian a țhiante chuan eng angin nge an hmuh tâk ang? Tual thattu chu tuin nge 'țhian' tia chhâl duh tawh ang? A inpuan thu an la sawi hauh lo nain, an sawi dàn hian ani lo mi dang han puh tùr an awm miah si lo va, a inpuan thuai pawh a rinawm viau a ni.

A rûk takmeuhin ka buaipui ve a nia; mahse, U Puia chuan ka awm dàn ațangin thil ka buaipui tih a lo hre thiam a ni chêk ang chu, min zâwt ta a, buaipui ka nei lo tih ka hrilh chuan eng mah min zâwt tawh lo chuan min en ta reng ringawt a. A rûkin ka inthiam lo leh si, a laka thurûk nei anga lan ka duh lo, ani pawhin a nei ngai lo.

"U Pui, englo a nia," ka han ti leh hnuhnawh a, dik tak chuan ka hrilh hreh ve a, ka țhian hlui a ni tih han hrilh hriat kha ka hreh ve êm a ni. 

Ka hrilh vek hnu chuan a tàwp khàr nân," Hrilh che ka hreh ve êm a ni. Mi zawng zawngin a pasal thattu-ah an puh vek a, kei ngei pawh hian han rinhlelhna lohna chhan tùr sawi tùr pawh ka hre chuang lo; mahse, kum khat chhûng zet ka țhian a lo nih tawhna avàng khân a chanchin ngaihven ve hrim hrim hi ka duh a, ka ba tlatin ka hria a ni; mahse, chu pawh chu mi hriata sawi chhuah chi ni pawhin ka hre lo va, i lakah ngei pawh ka zêp ta a ni," ka ti dap dap a.

"Min hrilh loh hian i hre hma thei zâwkin i ring em ni?" a lo tih khauh chuan," Ni lo, chutiang lam a ni lo. Dik tak chuan tual thattu țhian emaw hmêl hriat emaw a chanchin chîk zâwka zâwttu emaw nih pawh thil nuam a ni lo va, mi min lo en dàn tùr leh hnung lam ațanga min sawi dàn tùrte pawh a dàwn lâwk theih vek si a," ka ti leh duah a.

Mamawii chanchin ka ngaihven tih a hriat tawh miau avàngin a theih ang angin min lo ngaihvenpui ve a, han hnialin han sawisêl deuh mah ila awmzia a awm lo, a laka zêp ka nei lo ta leh a hriatpuina ngeia hma han lâk chu thla a muang huai ka ti a; mahse, kan pahnih pawh chuan eng kan ang thei chuang lo. 

Mahse, a hnu deuhah an khua nia an sawi lamah U Puia'n hmêl hriat thar a nei ta hlauh mai a, chu pa chuan Mamawii nu leh pi chanchin chu a lo hre nameuh mai. A nu chu a boral tawh a, a pi pawh chu a tar viau tawh a, awmpuitu a nei bawk si lo va, khawtlâng hruaitute'n an chãwm deuh tawp a, a hrisêl lo bawk nèn, a rilru pawh a kim tawh lo a ni àwm e. 

Chu pa chu a țawng duh khawp mai a, a sawi zêl dàn chuan Mamawii nu khân a rûkin zu a zuar țhìn a, chu chu khawtlâng hruaitute'n an lo hriat chuan an inah lêngin an zilh a, ani lah chu a lo duai vak lo ni àwm tak a ni. Khua ațangin an hnawt chhuak lo chauh nghe nghe a, a nuin a zir loh tlat avàngin Mamawii pawh sawi hat a tling chho ve leh ta a, zu zuar an nih miau avàngin a nu angin zu a in chho ve a, a hmêlin a lo zir ve bawk nèn, mipa kawp tùr pawh a hmu zut a, inzuar țhìn ang deuh te pawhin a sawi nghe nghe. Hre chiang deuhte sawi dàn phei chuan 'kum a tlin hmain mipa sàwm chuang a mutpui hman' niin a sawi nghe nghe.

"Keini lam chuan Mamawii thah a nih kan ring hmiah mai. A chhan chu a nu kha a nasa ve a, hmânah pawh a bialpa nia an sawi a vaw hlum lo chauh tawh nghe nghe, nufa na nâ nâ chu a chhùn lo thei lo ang kan ti ve tlat a ni. Pastor nupui ni reng chung pawh khân a rûka a ruih țhin ka ring hial asin, ani khân a dawh hrâm hrâm ang a, khami nî pawh khân a lo rui ang a, Pastor-a ina haw khân a zilh ang a, ani thinrim chuan a lo vit ta a ni ngei ang, mita hmutute pawhin ruih a nei niin an sawi a ni lo'm ni kha? Rim nei kher lo ruih tùr lah hi tûn laiah hi chuan a tam tawh khawp a," tiin a rawn nui a.

Hei hi mi ngaih dàn a ni tlat a ni. A ruih leh ruih loh chungchâng chu ka hre miah lo va; mahse, a pasal hi a thah ni ngeiin an ring vek tlat a ni. Kei pawhin ka ring lo a ni bîk chiah lo; mahse, ka țhiannu a lo nih tawh vàng nge ni, rilru chhe tak pu leh mahni pasal êm han that duh tùr khawpa rilru râpthlâk han puttîr ka la ngam lo deuh chauh chu a ni.

U Puia chuan," A țawng duh ve hle mai," a ti sup a, kei pawh chuan," A thlunna phelh ang char char a ni," ka lo ti ve a. An inbiak lai khân loud-speaker a on a, ngawi rengin ka lo ngaithla ve kha a nia. Chanchin țha leh làwmawm lam hriat tùr awm hauh lo chu hrehawm ka lo ti ru viau mai, Mamawii nu a boral tawh a, a pi ni se enkawl ngaiin a awm tawh bawk a, enkawltu tùr ber Mamawii lah chuan pasal nei daih tawhin tunah phei chuan Jail lamah hmingchhe theihtàwpin a lût tawh bawk a nia, an chan a chhe tak zet a ni.

"Amah hmuh theih dàn te hi a awm thei mial ang em le?" ka han ti ringawt a, ani chuan," Mamawii chu maw?" a lo ti a, lu bu nghatin," Min hre tawh kher lo maithei a; mahse, vawi khat tal han hmuh leh hrim hrim ka châk a ni. Hmâna ka țhian, tu dang mah ngai lova min kàwm hlimtu, mi hlim thei tak țhìn kha ka hmu leh châk a ni, tunah mi zawng zawng deuhthaw dem rawn leh sawisèl ni tawh mah se khami hun hlimawm tak min hmanpui avàng tal pawh khân hun harsa a tawh lai, mi zawng zawng hawisan a nih lai tak hian a bula awma rei lo tê tal hun hmanpui ve theih ka duh tak zet a ni," ka ti leh sep sep a; mahse, ka hmuh theih ka ring lo chiang viau thung. Engtin nge an inhmuh țhin a  inhmu thei tùrin eng thil nge tih ngai tih lam pawh ka la ngaihtuah chhin hek lo, tual that ang a ni si a, a case a râpthlâk ka ti mai, hmuh an phal pawh ka ring hek lo.

Tlaia office ațanga ka haw dâwn chuan U Puia'n min rawn bia a," Zaninah ka cousin Debo-i birthday lawmnaa kal tùrin lo insiam rawh aw, ka rawn lam ang che," a rawn ti teh tâwng a. A hmain min hrilh lâwk hauh si lo va, min hrilh tlai tawh e, zanin chu kan in piah deuha damlo kan kan tum asin le.  

Ka ngawih deuh reng avàng chuan," Ka ring che, eng mah ken a ngai lo ang," a rawn ti leh a, a ti tàwp zui daih a, a ngaihna ka hre lo tak zet. Birthday ilo vêl hi a ngaina lovin mi birthday-ah pawh a kal ngai lo ni khân ka hre si a, a birthday lawmsak ve ka tum pawhin a duh ngai lo, tuna a țawng dànah lah khân a phùr hmèl viau mai si a, eng vàng tak chu ni ang maw? 

Min sâwm miau mai si a, ka nu hnênah pawh damlo kana ka kal hman loh tùr thu chu chaw ei laiin ka hrilh a, ani chuan," Engtizia nge ni? I hman dâwn lo tih hria ila chuan   chhùn lama ka hman ve deuh lai khân lo va lèn tùr hi a nia aw..." a ti vang vang a, ka inthiam lo ru viau mai.

Ka insiam zo fel tihah U Puia pawh chu a rawn thleng zui ve nghâl a, ka nuin min hmuh chuan," A, kha, khawi lamah nge in chhuah dâwn? Eng mah lah chu min hrilh hauh si lo va," a lo ti vat a, ka chhàn hma chuan U Puia chuan," Ka unaunu Deborah-i piancham lawmnaah ka hruai dâwn a nih hi, lo ngaihtuah miah suh aw, kan rawn haw har lo ang," a lo ti thuai a, ka nu pawh chuan," A nih tak chu. E, hlim takin hun va hmang rawh u, a nuam ve alawm," a lo ti ve leh nghâl mai bawk a. Ka nu hi chuan U Puia hi chu a ring ve tâwk a ni, a rin tâwk tùr hian ani lah hi a awm zêl a, sawisèlna tùr a awm ngai hauh lo bawk.

Bike-a kan tlàn hnu chuan," Hetiang vêla kal hi i duh ngai lo ni khân ka hre sia?" ka han ti a, ani chuan," Duh nâng; mahse, zanin hi chu a nuam dâwn a," a lo ti mai a, a nui hak bawk a. Ka run deuh avàngin nghet zet hian a kâwngah ka kuahsak vak a," Eng nge a nawmna bîk tùr? Kan pahnih chauha i birthday lawmsak che ka tum pawhin i duh ngai lo va, eng nge a chhan hriat chu ka phû ve alawm," ka ti deuh nghat nghat a, ani erawh chuan min chhâng lêt lovin a nui hak hak ringawt a, a hnu deuhah chuan," I inchhîr lo ang," a rawn ti leh ringawt bawk a.

Kan han thlen chuan birthday làwm tùr pawh an lo tam tawh khawp mai a, Durtlângah daih a lo ni zui a, a hla angreng hi ka tia; mahse, ka sawisêl lo. Ani meuhin min sâwm ve a nia, a ti ropui êm mai ti tawh mai ang. Ani meuhin 'A nuam dâwn' a tih chuan nuam tùrah ngai hmiah ang.

Birthday-a kal e ti lo chuan kan hun hman dàn chu a dang khawp mai. A hmêl hriat tu emaw nèn an titi daih a, a titipui chu hmeichhia a ni lo hlauh zâwk a, ka thîk lo mai mai a ni. Kawng lehlamah, hetiang vêlah hian a kal ngai si lo va, titipui tùr a hmu chu ka làwmpui lehling phian lawi a, birthday lawmna boruak a ning lutuk tùr pawh a zia phah deuh ang chu.

A sawi ang takin kan haw har lo va, haw kawngah chuan a titipuipa chu Advocate a nih thu a sawi ve luam a, kei chuan," Titipui tùr i hmu kha ka lo lawmpui viau che asin, min ngaihsak vak lo mai pawh a, an cake kha tui viau lo se chuan ka melh rum thei khawp ang che," ka han ti a, a lo nui hak a.

"Chu, cake tui chuan min chhan him tihna a ni maw?"  a tih chuan kei chuan," A ni deuh ber ang chu," ka lo ti vat a, țawng chhunzawm lehin," Debo-i kha a takah a hmêl țha zâwk a nih kha thlalâka a lan dàn aiin, chuan, a bula mi kha a bialpa em ni?" ka ti leh a, ani lah chuan," A bulah tu nge ding a? Ka lo en hauh lo," a lo ti mai a, a unaunu birthday lawmnaa kalah min sâwm ve êm êm a, a titipuipa bâk kha a hmuh leh a hriat pawh ka ring lo e a.

Kan inah chuan thingpui hâng s in ve leh zawk a, a haw dâwn chuan," Zanin chu i lung ka ti âwi meuh si lo va; mahse, da dup chuan min hawtîr loh hrâm ka beisei," a han ti a, ka melh ràn rán a, a nui miah si lo va, ka ngaih a ti țha lo lek lek a ni.

"Ka lungawi lo der mai mai a nih kha, engah mah ka ngai teuh lo!"

Duhthawh ve tak chuan kan hmuiin kan han inmangțha leh tak mawlh mawlh kha. A tlàn liam hnu chuan mu thei tùrin ka insiam a, ka kawr thlâkin ka hmai ka phih fai a, ka ha ka nâwt a, mu tùrin khum ka dek deuh chiah tihah chuan message a rawn thleng a, ka en chuan U Puia a lo ni a.

*Mitthi kan nei a, ka thleng chauh nain ka insiam nghâl. Tui deuhin i lo mu sûk sûk dâwn nia. Chuan, i duh kha tih puitlin dàn ka ngaihtuah mêk a nia, zanin khân rah țha a chhuah tùrah beisei ila🙏*   tih hi a lo ni a.

*CHAK TAKIN AWM RAWH KHAI, HARSA VIAU MAH SE. TÛN HUN HI I NUNA HUN HARSAT LAI BER A NI PAWH A NI MAITHEI; MAHSE, CHHÛM ZÎNG LEH RUAH SÛR HIAN KIAN HUN A NEI A NIA, HUN HIAN I TÂN MAWI TAKIN NÎ A LA RAWN HER CHHUAHTÎR NGEI ANG*