☆CHANTÂWK KHUARÈL☆ - 4

☆CHANTÂWK KHUARÈL☆ - 4

By Dingdi Pachuau

A ngawih vang vang lai chuan," Pu Hmaa nèna in intawn dàn ka hre châk hle mai," ka lo ti zauh a, a mit meng sen deuh râm leh lang bui deuh chuan min rawn en a," Ni e tiraw?  Kei, eng mah ni lo leh zu zuar fanu maiin ani pastor fel leh hming țha ka han nei nawlh kha, mi dang tân mai ni lo, ka tân ngei pawh hian thil mak tak chu a ni," a han ti phawt a, chutiang lama ka lo ngaih lêm loh avàng chuan chhàn tumin ka lo äng zuau a; mahse, ka ţhulh leh ta zâwk a.

Amah vêk chu țawng zawm lehin," Ka nu leh pi kalsanin hna ka thawk ka tih tawh kha, inkhâwm ka peih a, ka theih ang angin ka nunhlui lam chu nawh reha theihnghilh vek ka tum țhìn bawk. Kan vêng kohhran kha vêng dang kohhran member ngaihtuah chuan member kan tam lutuk lo va, kohhrana inhmang chho ve ta ngar ngar chu duh aiin ka lo langsàr ta chu niin, lansarh ka duh loh tehlul nèn, U Hmaa chuan min lo hre ta a. Ka phû loh lutuk niin ka tân a sâng lutuk si a, min fiam a nih ka ring hial nghe nghe a, nunhlui ngaihnawm lo tak tak ka nei bawk nèn, chutah, ka thianghlim tawh lo lehnghâl a, ani ni se pastor zahawm lutuk a ni bawk si; mahse, ka hnial theih miah lovin min ûm zui a, min zar hneh bawk si, duh ru ve tho mah ila ka duh lang ngam lo zâwk kha a ni mai a, a chhan chu amah ka hmuh apiang hian ka nihna dik tak theihnghilh ka duh țhin chu ka hre chhuak lo thei lo a ni, amah pawh ka chanchin a țhen a zâr chu ka hrilh ve tho a; mahse, ka hnial viau pawhin tih ngaihna a awm ngang lo,  a tàwpah chuan ka țang zo ta lo va, kan innei ta a ni ti tawp mai ang.

Kan innei chu ka hlim a, nuam ka ti a, mipa min hmangaih tak taktu ka tawng ve ta niin ka ngai bawk. U Hmaa pawhin min duat a, Pathian malsàwmna dawngin kan inneih hnu lawkah Bawihtei ka han pai zui nghâl a, a pian ni phei kha chuan ka hlim tak zet a ni; mahse, thil hi a lo va hriat loh theih tak êm aw ka ti țhìn. Tuna ka sawi tùr hi chu i bulah bâk tu ma bula sawi ka duh lo va, tu mahin an hre lo bawk ang, mitthi tawh chanchin a chhe lama sawi tum lah ka ni hek lo; mahse, thu dik tak a ni miau si a," a han ti leh a, a chàwl leh rih a.

Pu Hmaa chanchin chhe lam a sawi dâwn a ni ngei ang, a chanchin țha lo lam an sawi hi vawi khat mah ka la hre miah lo va. Hre chiangtu deuhte leh mipui nâwlpui pawhin fakna thu bâk an phuh chhuak ngai hek lo. Mi zawng zawng fak a hlawh a ni ber mai, a fanu ni se a duatin a fanu pawhin a ngai a, hmun danga a inkhânaah pawh a hruai hial a nih kha. Engtin tak rawn sawi chhuak ang maw?

"Bawihtei pian hma deuh lawkah bialnu a nei niin ka hria a; mahse, chiang fakin ka hre lo. Inuiresan lama ka pasal ka han ringhlel deuh ringawt pawh chu zia lo ka tiin hrehawm ka ti a, Pathian rawngbâwltu a ni a, ka ngaihtuahna vâk kual vêl mai mai a nih ringin sawi pawh ka sawi chhuak lo rêng a, han rinhlelh zuina tùr pawh ka hmu chuang lo. Bawihtei a han piang a, ka hlim êm avàng chuan chutiang lam chu ka theihnghilh vek a; mahse, a hnuah loh theih lohin ka man chhuak leh ta. A râpthlâk asin! Ka mitthlâ ațanga nawh reh theih hi ka duh tak zet țhìn!" a ti sep sep a, a țawng a ring lo va, a thu sawi tàwp lam phei hi chu ka hre thei chang chang hial a ni.

A thil sawi chuan min țhâwng tak zet. Ka rin loh lam daih a ni si a, engtin nge a nih theih? Vanlali hian dãwt a sawi a ni mai lo'ng maw? A pasal a thah avàngin chhuanlam țha deuh tùr a zawng pawh a ni thei a... mahse, a ni dâwn em ni? 

"Hetah zet hi chuan rinhlelh rual lohin a chiang ta. Zànah Bawihtei mut hnuah ka huaisenna zawng zawng sâwm khâwmin ka zâwt ta a, a thin a rim nasa ta mai. A chanchin sawi ngam tùr ka nih lohzia sawiin ka nunhlui chu a rawn sawi chhuak ta vek a nih chu! Engtin nge, khawi ațangin nge a lo hriat vek pawh ka hre lo, eng mah ka sawi thei tawh lo va, zawh pawh ka tum hek lo. A duh duh a sawi a, min hmangaih avànga min nei a nih loh thu sawiin chu vàng erawh chuan amah chu țhen tum hauh lo tùrin min ti bawk! Chu mai chu la duh tâwk lovin a chanchin ka sawi chhuak a nih chuan ka saruak thlalâk post darhah min vau zui bawk a! Min vautu chu ka pasal ngei, pastor fel êm êm tia mi sawi huai huai kha a ni si a. A râpthlâk asin, i ring thei lo hial lo maw? Kei pawhin ka hre sual a nih ka ring hial a, ka mangchhia a nih ringin ka insik a; mahse, ka mumang chu a ni miah si lo, chuta țang chiah chuan ka tân hun hrehawm, hremhmunah hun ka hmang chho leh ta a ni.

Min vau vàng pawh ni hauh lo chuan a chanchin țha lo lai chu mi hnêna sawi chhuah tumna ka nei lo hrim hrim a; mahse, ka rilru hrehawm lutuk chu ka muhìl thei lo țhìn a, a rûkin ka țawngțai leh ringawt țhìn. Mite hmuhah leh mite hriatah chuan nupa hlim tak leh inngeih tak angin kan lang ngei ang; mahse, ka hlim hlawl lo, ka nun hrehawm lutuk chu Pathian hnênah ka han țawngțai leh ringawt a, chu pawh chu ka rilru tâwt lutuk vàng a ni. Tu bulah mah ka sawi chhuak thei si lo va,  engkim hretu mah ni se ka rilru tâwt lutuk zia phah nân tiin a hnênah chuan țhian hrilhin ka hrilh țhìn, chu pawh chu a rìin ka hrilh ngai lo bawk. Chuan, tuna min puhna 'Amah thata min puhna' hi thu dik lo a ni, ka that hauh lo," tiin a tàwp leh rih a, thâwk a han la hawk hawk a.

Mit khap miah lovin ka en kar ringawt. Amah tluk zet deuhthawin ka rilru chu a buaiin ka ring. A thil min hrilh chu han âwih lo dâwn ngawt ila thu dik a nih ngei ka ring tho bawk si a, lehlamah Pastor Hmaa felzia leh Pathian a rinzia, mite a ngaihsakzia leh hmêl hlim sânga mi tu pawh mai a biak țhin dàn lah chu mi zawng zawng hriat a ni bawk si a, tu mahin an ring chhe ngai lo ang, tunah tak hian han âwiha han âwih loh tùr pawh ka thliar thiam tawh rih lo, mak tihnain ka khat a, ka rilru a buai nuai a ni ber mai. A thah ni lovin a sawi a, a thah a nih loh dàn a la sawi si lo, mi zawng zawngin a thah niin an sawi bawk si, kei ngei pawhin ka ringhlel ve tho a nih kha.

*******

Inkhâwm kan bâng a, haw kawngah ka nu hnênah chuan," Nu, zanina kan thu ngaihthlâk kha eng nge i ngaih dàn?" tiin ka han zâwt a, ani chuan," A, a țha chu ka ti reng a; mahse, kohhran upate a kâp na mah mah deuh em aw ka lo ti a, hrehawm ka lo ti lek lek a ni," a ti a, kei chuan," A sawi ţha viau ka lo ti a. Thu dikah chuan kâp sak sak ngam hi awm se a țha ka ti, kan ram dinhmun lah kan hre ve vek a," ka lo ti ve thung a.

"A dik alawm. Mihring ve tho an ni a,  mi fel famkim, thil ti sual thei lo an ni bîk lo tih hi kan hre tel bawk tùr a ni a, an mawhphurhna a sàn êm avàngin an tân kan țawngțaisak țhìn tùr a ni, sawisêl mai lovin," a tih leh chuan," A dik reng, Pathian tân hna thawkin thil pawimawh ber mihring thlarau an enkawl a ni a, anmahni pawh an fîmkhur tùr a ni a, thlaraua khatin kawng engkimah an fîmkhur tùr a ni, mi pângngai tih atâna mawi kha an tân chuan tih a mawi ve lo; mahse, a dera nungin Pathian rawngbâwl inti chungin an lo bäwl tak tak lo thei tho bawk a, chhûngril lam kan zuk hriatsak kîlh kêlh thei tawh bawk si lo, hetiang mi lakah hi chuan zanina thusawitu ang kha kan mamawh," ka ti leh mawlh mawlh a.

"I duh rum vei reuh phian a!" Nui hak hak chunga ka nuin a tih chuan," Nu, kan pastor mi fel tak takte zîngah hian piangthar tak tak lo hi an awm ve thei thoin i ring em?" tiin Vanlali thil min hrilh ngaihtuah rân chuan ka han zâwt a. A thil sawi khân ka ngaihtuahna a luah reng a, keimaha ka awm châng phei chuan ka rilru a kal ding thei viau a, ka nu min kohna pawh ka lo hrechang lo hial țhìn.

Ani chuan," A, an awm êm dâwn em ni le? Pastor lai ni sia pianthar hauh loh chu a mak dâwn êm mai," a lo ti a. Kei chuan," Hlawh duh vàng leh an hna zahawmna avàng pawhin ni duh an awm ve thei tho lo'ng maw? Tûnlaiah hna a vàn tawh bâkah an nihna hi mi zawng zawng zah an ni a," ka ti ve thung a.

"Ka hre thiam lo le, kei zawng ni ve dâwn ta ila ka ngam hauh lo ang le, Pathian thîkthuchhiatna ka tawng baw ngam lo, a râpthlâk dâwn êm mai," ka nuin a tih chuan ka lo bu nghat nghat a. Ka nu hi Vanlali thil min hrilh kha hrilh ve ta ila engtin tak ngai ang maw? A âwih theiin ka ring lo. Tu mah ka hrilh lo va, U Puia takngial pawh ka hrilh lo. Vanlali khân mi hriat a duh lo va, min ring a,  sawi chhuah ka duh bîk lo a ni.

Ka nu chuan  sermon ngaihthlâk a la kham lo a ni ang, inah pawh chuan TV lamah a ngaihthlâk chhunzawm leh a, a ti ring angreng bawk si a, U Puia rawn lêng pawh chuan," Bei ring ve hlê mai maw," a ti sup a, nui deuh chung hian," Hriat hmaih neih a hlau êm alawm," ka lo ti ve a.

Thusawitu chuan a sawi rei lo va, a sawi zawh chuan TV chu off-in ka nu chu kan bulah a rawn țhu ve a, kan titi lai pawh ngaihven lêm lo chuan," Pu Sângtea hi chuan thu sawi hi chu a thiam ve ngawt mai, thu hi 'a zawng zawng' hian a sawi ka ti mai, làr pawh a lãr, revival speaker-ah chuan kan neih țhat ber a ni hial lo'ng maw?" a rawn ti a, U Puia chuan," Ni maithei, amah a viak a țhain a la țhalai bawk a," a lo ti ve a, kei pawh chuan," A hmêl pawh a țha alawm," ka lo ti ve kher a, ka nu chu a lo nui hak a, U Puia ve thung chuan," A thu sawi ti ngaihnawm thei tùrin tawn hriat a lo ngah tawh bawk a. Chuan... hmeichheho duh zâwng takin a hmêl a fai vang bawk a," min en chung chuan a rawn ti ve leh a.

Revival Speaker ațangin Mizoram dinhmunah kan lût chho a, kan ram dinhmun chhiatzia sawiin kan nun belhchian tlâk lohziaah kan lût chho leh a, ka nu chuan," A, hetiang lama kan chhiatzia han ngaihtuah chhoh zêl chuan rilruah beidawnna a rawn awm thei țhìn a, chhe zo ta vekah kan inngaih phah țhìn a ni. Kan chhe vek ta tihna a ni lo a nia, mi țha tak tak hi an la awm țeuh a ni, mi dang țha lo kan hmu a nih pawhin mahni nun hi fîmkhur ila, intilungngai lo ila, Pathian hi bèl tam ila a țha ber," a ti charh charh a.

A mut hnu chuan U Puia nèn chuan kan inneih hun tùr lam kan sawi ve ta thung a; mahse, rei tak kan sawi hman tawh lo, zàn a rawn rei chho dâwn ta mai si a, naktûk lah ni hlauhawm 'Ni Sakei' a la ni zui a, han men rei viau pawh a chî loh.

"Haw lo mai la?" tiin ka han fiam a, ani chuan," Hàwn reng ka ngai lo țêp tawh a ni," a lo ti ve thung a, kawngka bul thleng thlahin inmang țha nân kan inmuah zuai a, mumanga inhmuh tawn tumin kan inthlah zui nghâl a. Zanin zet chu Vanlali thil sawiin ka rilru a kam țùng lo ve teh tlat a, ka rilru zawng zawngin U Puia pawh ka kawm theih phah a ni; mahse, khumah erawh ka ngaihtuah zui leh tho.

*******

"Judy, mi zawng zawng min puhna ang hian U Hmaa kha ka thah angin ka sawi mai dâwn!"

Ka en hau a! Ani erawh chuan a hmai chu tuai leh pâwk pâwk țhìnin a thaw leh hawk hawk țhìn thung. A hmêlah chuan hrehawm tihna leh lungngaihna nasa tak a lang chhuak a, jail chhûngah hian engtin nge a khawsak a, engtianga nasain nge diriamna leh ànchhia a dawn ang tih ka ngaihtuah thiam phâk lo, nuam takin hun a hmang lo ang tih chu a hriat theih reng a, a rilru ni se a chawlh theih ka ring hek lo.

"Thu dik chauh i sawi ang chu," ka ti ta ringawt a, thu dik tak chu eng nge a nih ka hre chiang bîk hauh lo, dik tak chuan Vanlali thil min hrilh kha dâwt a nih vek chu ka ring bîk lo va; mahse, thu dik a ni vek em tih ka hre chuang lo lai tak hi buaithlâk lai chu a ni.

"Thu dik sawi mah ila tu mahin min âwihsak ka ring lo, ka thahah an ngai vek tho si a, jail ațanga chhuah châkna pawh ka nei tawh chuang lo va, chu vàng chuan, engtin pawhin min hrem mah se pawi tihna ka nei lo, ka tân chuan khawi lai pawh, jail a ni emaw jail a ni lo emaw a inang tlâng vek tawh si a," a ti leh a, a rilru beidawnzia a lang chiang viauin ka hria, nun hrehawm tak tak a lo tem nasa tawh êm mai a, tunah lah heti hi a ni a, kei chuan a taka ka tawn ve miau loh avàngin ka hriat thiampui phâk ve lo a ni.

"U Hmaa kha i thah ni lo ta se, amah vihna chemte ngei kha i keng ngei niin an sawi bawk sia, i finger print pawh an hmu ngei a ni lo'm ni?" ka ti ta a, ka țhiani thu sawi hi thu dik ni se ka ti a; mahse, evidence hrang hrang an lâk khâwm nia an sawi ațang kha chuan a thah ngei niin a lang tlat bawk si a ni.

"Keng e, ka keng alawm. Ka chî-ai  nasa lutuk a, ka hlau bawk nèn, ka thidang dâwn dâwn a; mahse, ka inhûm ruh tlat a," zàwi sap hian a ti a, chutah," Ka rilru tihrehawm viau mah se thah tumna rilru vawi khat tê mah ka la pu chhin ngai lo, lo tum ta ni ila... ni lo," tiin a lu a thing nawk nawk a," Thah ka tum ngai lo ang, ka han sawi mai ang e, vawi khat chu ka nunna lâk mai tumna ka nei tawh zâwk a; mahse, Bawihtei ka ngaihtuah chhuak vat a, chuta țang chuan chu rilru chu ka paih bo leh ta a, amah vàng chauhin ka tuar hrâm hrâm ang ka ti ta zâwk a ni," a ti leh a.

"Nih, khami nî khân i rui niin an sawi a?" ka lo ti leh a, ani chuan," A dik ang, ka damdawi ei ka rui a ni. Ka nuamsam chiah lo va, Bawihtei ka mutpui nghe nghe. U Hmaa rawn haw lai pawh khân kan la mu reng a, min rawn ko a, ka lo hriat lawk loh vàngin a thin a rim deuh nghe nghe. Ka nuamsam chiah lo bawk nèn, mi dang an awm lo bawk a, lemchan a ngaih loh avàngin," Hun in va hmang nuam maw?" ka ti kher a, a bialnu a hmu tih ka hre ve kar si a. Chutia ka han ti kher chu ani a lo thinrim sa bawk nèn, ka samah min rawn kêk ta thut a, tlànchhiatna hun awm hek lo le, ka sam chu a phih ta nghek nghek a," Ka chungchângah hian i lo sawi ve tùr pakhat mah a awm lo!" a ti a, a nat êm avàng leh a thinrim êm avàng chuan eng mah ka sawi ngam lo va, țè pawh ka țê chhuak ngam hek lo."

"Nang, zu zuar fanu, virgin pawh virgin tawh lo lehnghâl, mahni hringtunu leh pi pawh tlànsan duh khawpa mi râpthlâk nupuia ka nei duh che hi lãwm hle rawh. Ka kohna che pawh 'Ka chhâng țha duh lo ve, ka hre lo der e, êk e bãl e' te i han ti vêl a! Ka that duh mai ang che, ka hreh emaw i ti a ni ang e," a ti a, a thil sawi chu râpthlâk ka ti lutuk a, ka hlau bawk si, tàl chhuah ngei tumin ka tãl laih laih a; mahse, ka thei lo." 

"Chemte kha khawia mi nge ka hre lo, ka la hmu ngai lo va, a rawn hawn thar a ni maithei. Dawhkàn chungah a lo awm a ni chêk ang chu, min tin ta zuai zuai mai a, ka hlau lutuk chu ka khawng nghâl vek ni maiin ka hria!" A sawi zâwng pawh chuan a hmêlah chuan khami hun kha a ngaihtuah leh a ni tih hriat tak hian a en ngai a en reng a, a hmai chu a dâng vâr pap a, hlauhna tinrêng hi a hmêl leh mit mengah chuan chhiar theihin ka hmu bawk.

"'U Hma, khawngaihin...' ka ti thei țâwk a, min vit tak tak ang tih ka hlau a ni, a mit meng chu thinrim tih hriat takin a sen vek bawk si a, chuti ang taka a thinrim hmêl chu ka la hmu ngai bîk lo, a meng ã deuh ruaiin ka hre bawk. Min vih duh tak tak hlauin na deuh takin ka tãl leh phut a, amah pawh a che lawihin ka hria, a țê deuh țhawt nghe nghe. Sitting room lamah ka tlãn a, na ti ni àwm taka a rûm rî chu ka hre nain ka hawi lêt ngam lo, thil han ri thûm deuh dut ka hre chhunzawm leh a, a rûm thãwm pawh a reh hmak mai. Minute 5 vêl zet a nih ka ring ka bihrûk kha, ka lu a hai deuh chuai chuai nain Bawihtei ka ngaihtuah bawk si kha ka tho chhuak a, room kal tùr hian choka pal tlang a ngai a, inti huai luiin ka han bih dêk dêk a, choka chhuata U Hmaa lo mu zangthal reng leh a dula chemte lo bûr ngur ka hmuh chuan ka phu nasa lutuk ringawt! Ka khùr nghâl dawt dawt a, 'A thî a ni ngei ang' tiin ka hlauthãwng chuan eng mah ngaihtuah chang hauh lovin ka pan phei a, khùr dawr dawt chung chuan ka han sawi a, a rawn meng si lo. A dula chemte chu ka han phawi ngawt a, thisen a rawn liam chhuak ka ti mai, thisen chhuak tam ta si chu ka hlau lutuk a, a dul chu ka han nem ringawt a, awmzia a awm dèr lo.

Ka lu chu a rawn hai chuai chuai a, ka rilru erawh ti fîm hrâm hrâmin ka tlûk mai loh nân ka kal sawn deuh a, bang nghènga inhûm ruhin ka inkeng khawng tlat a, thisen vàng chu a nih ka ring, ka ni nghulh nghe nghe. Ka ngaihtuahna a buai nuai nuai a, ka hlau pah tho bawk nèn, lu a hai bawk nèn, ka ã vek ni maiin ka hria. Ã lo ila chuan police kha phone thuai tùr ka ni záwk a; mahse, ka ã vek a ni. Police rawn thlen lai pawh ka hre lo, Bawihtei țap rîin min ti harh chhuak chauh a; mahse, ani tân zawng a nu hi tual thattu mai ka ni zo ta si a," a ti chuai raih a.

Kan ngawi dùn vang vang a, sawi mai tùr a vâng êm a ni. Han sawi tùr ka hriat loh bâkah hnem dàn tùr pawh ka hre chuang lo va, ani ni se a melh ngai a melh reng a, a mittui a tling pam bawk, dáwt min hrilh rêng ka ring tawh lo va, ka thinlung chuan a thil sawi chu thu dik a ni tih a pawm nghet thlap tawh. Khawngaih takin ka en reng a, a hnu deuhah chuan a kawrbân hmáwr chuan a mittui chu a han hru a.

"Ka hrilh vek che a, ka thâwl deuh hawk mai. Tunah chuan engkim tuara tâwk thei tùrin ka inpeih ta, engtin pawhin ka chungthu hi rêlin thu tlûkna pawh siam mah se ka vui lo ang, ka tâna Khuanu rorèl, ka chan tâwk tùra khuarèl saah ka pawm hmiah mai ang. Hringnun hi chu a fair lo êm mai a, pian hma ațanga vànduai tùr rênga duan lâwkte hi kan awm a, tum ve sateh pawh ni ila kan tâna khuarèl sa hi chu kan pumpelh thei chuang lo a nih hi. Kei pawhin ka chan tâwka khuarèl sa chu ka pawm thiam mai a ngai a ni," a ti leh sep sep a, a mit khur tla dâk kára a mit meng nung lo zeta beidawnna lan chianzia ka hmuh chuan ka khawngaih tak zet a ni. Ni e, a tân hian hringnun hi a fair hlawl lo, hrehawmna tinrêngin a hual vêl a, a bêng a, a sawisa a, a chhêm lêng vawn vawn a, sâng tak ațangin leiah a nghat leh chawrh bawk a, a tân zawng a hrehawm dâwn êm mai.

"Judy, min lo tlawh țhìn a, ka lãwm tak zet a ni, lãwmna nei lo mihring hmuh chuan min hmu lul suh aw, i chungah hian ka lãwm tak zet. Ka thinlung tâwt tak i hnénah ka leih baw thei a, dawhthei takin min lo ngaihthlâksak a, ka lãwm a ni. Țhian chu sawi loh, ka hmêl hriat nih ringawt pawh zahthlâk ngawih ngawih a nih tawh hnuah i țhian ni tlâk hauh lo leh mi ànchhe tinrêng phurtu hi i țhianah min la rawn chhâl a, ka dam chhûng chuan ka theihnghilh ngai hauh lo ang, a tàwp nân, ka lãwm e," a ti leh sep sep a.

Tunah chuan ka tih tùr dik tak ka hre ta. Tu pawh hian thu dik sawi thei tùrin dikna chanvo kan nei vek a, dikna chanvo chang thei lo tùr khawpa dan chêpte awm țhìn mah se dikna chanvo an neih theih nân aw kan chhuah țhìn tùr a ni a, 'kan mihringpuite dikna leh zahawmna humhimsakin țanpui an ngaihna zâwnah kan țanpui țhìn tùr a ni, harsa mah se' tih chu ka thinlungah a rawn ri tluk tluk mai a, engah nge chu lam hawi chuan ka ke ka pên chhuah loh ang le? Rilru thar leh thinlung thar neiin ka tih tùr chiang taka ngaihtuah chungin U Puia min lo nghahna lam pan chuan ka kal ta a.

*I HUN KAL TAWHA I TIH SUAL KHA THEIHNGHILH LA, I LO HLAWHCHHAM TAWHNA PAWH KHA THEIHNGHILH DAIH RAWH. TUNA I TIH TÙRAH CHAUH KHÂN I RILRU SÂWRBINGIN TI ȚAN NGHÂL LA, A BÂK ENGKIM THEIHNGHILH VEK ANG CHE*

A TÀWP TA

(A thui dâwn lo ka tih kha aw, reh lutuk dãlah ka han thai kawi mai a nia, Pathian zârah dam hauh ila, sitawri dang nèn lo lét vat ka tum ang. Lo dam ula, kan inhmu leh thuai tùrah ngai ang🙏 

Krismas chibai inbûk nân a la hma deuh sia, Krismas hma deuh chibai vek mai u🤗🤝🤝🤝)