☆SUANGTUAHNA NEITU☆ - Țhen 2 - Dingdi Pachuau

☆SUANGTUAHNA NEITU☆ - 5 By Dingdi Pachuau

Ka nui hak. Min fakna thu chu hriat a nuam ka ti, ka shampoo hman rim a hria a ni ngei ang.

"Ka shampoo hman rim kha a nih dâwn chu."

"Chu pawh a ni lo, i rimtui ve hrim hrim," tiin ka nghâwng vêl chu a hmui chuan a rawn nûl thuak thuak a.

"Hei, awm țha teh, i chhúngte an rawn lût thut ang e," ka ti sap, tuna kan awm dàn hi min hmuh hlauh chuan ka zak ngawt ang.

"An lo lût hauh lo ang," mahni inring tâwk tak chuan a ti sap a.

Ka țhiante, an ngaihzâwngte nèn an awm dàn an sawi țhin angin kan awm ve; mahse, ka nu thil sawi kha ka hre chhuak a, ka strict ta deuh. Ka kâwng achin hnuai lam chu deh pawh ka phal lo.

Infawh pawh ka thiam ve ta, ka zei tawh viau chu ka ti lo; mahse, lo chhàn lêta fawh lêt ve dàn ka thiam ve tawh.

"I thiam tawh ngawt mai!"

Thaw deuh hakin," Eng chu maw?" ka ti hap a.

"Infawh hi maw le. Ka fawh hmasak ber che kha i la hria em?"

Hre lutuk! Ngaihtuah lêt leh ringawt pawhin ka zak, zei lo ber mai kha ka ni miau a.

"Theihnghilh daih rawh!" ka ti sap a.

"Ka phal teuh lo mai! Mipa nangmah fâwp hmasa bertu che ka ni a, min chhàn i thiam lohna kha a thianghlim alawm, ka tân a hlutzia i hre thiam phâk lo ang," a ti duah a.

"A zahthlâk, sawi tawh suh," ka lo ti a.

"Kan pahnih bâkin kan hre chuang hleinem; mahse, tunah chuan hma i sâwn tawh khawp mai, ka zirtîr thiam viau bawk che a," mitko sàn ãk hian a ti a.

"Inla zei viau lo mai teh!" ka lo ti hlak a.

"Zei ve bawk alawm, Kolasib nula hmelțha kha ka han chhãi thlu ve ngat mai che a nia."

Ka sawipui chhunzawm duh lo.

Nilêng deuhthawin ka lêng. Chhùnah ei tùr kan siam a, a pi leh a nau pawh kan siamsak. A nau chuan min en duhin awmze nei tak taka a u a melh chu ka hmu fo mai.

"Ei țeuh rawh."

"Ka ei țeuh chuan hei ai hian ka khal mai dâwn asin," nui chung hian ka ti a.

"I kâwng a fêk tho alawm."

Teh daih chuan!

"Chutiang lam chu sawi tawh lo ang, Damdawi in nèn hian in in hi a inhnaih angreng sia, a nuam lo duh ngawt lo maw?" ka ti ta daih a.

"Eng vàng chuan maw?"

"Ih...ka hre chuang lo, an thâwm in hre phâk reng àwm sia, ka ti mai mai a nih chu," ka ti a.

"An thâwm kan hre pha vak lo, ka room lamah phei hi chuan tukverh ka hawng vek a nih loh chuan ka hre ngai lo. Mitthi i hlau a ni maw?" a ti leh daih a.

"Hlau lo ve, engati nge chu chu min zawh a?"

"Ka zâwt mai mai che maw le."

Kan inchhâng tâwk viau mai.

Ka haw dâwn chuan a nu pangpâr chu pot 3 min lâksak, car-ah a dah lût a, a nauin min lo hmu ve reng bawk sia, nuam lo ka ti ru khawp mai.

"I nu kan dîl hmasa tal lo va?" ka ti hnuhnawh a.

"A ngai lo, a tam lutuk! Tihian, i lo kawl ve rih ang a, in kawtah lo pâr ve tawh rawh se, a zin ve tihna a ni mai," te a ti ta vêl mai mai.

Ka duh ber ber pathum a ni nain a nu neih tam ve deuhho ka thlang ve a ni, chuti lo duh taka a neihho a ni ve tho sia, a ui ang tih ka hlau a ni.

"I nu chuan a hauh phah lo tak tak ang che maw?" ka ti țha leh a.

Ka kut rawn vuan pah chuan," Engah nge min hauh ngawt ang? Ka enkawl vek a nih hi, tui ka pêk tùr a tlêm ta deuh sawt dâwn tihna a ni mai," a ti a, ka kut chu a hmer vang vang a.

Zànah ruah a sûr maithei a ni, khua a dur deuh tlat. Ni lang si lovin khua a dul deuh ruih a, ka bulah ani hi awm lo se chuan ka nunkhua a dul ruihin ka hre ngei ang.

"Zanin chu ruah a sùr ang tih ka va hlau ve! Ka rawn lêng thei dâwn si lo," kan tlàn chhuah hnu chuan a ti nang nang a.

"Sûr mah se raincoat i rawn ha ang a," nui chung hian ka lo ti a.

"Ka ti duh tak tak mai ang aw," a ti phawt a, chutah," I nu leh pa lakah a inthlahrunawm dâwn êm mai, ka lo lèn loh tal pawhin kan inbe tho ang chu tiraw?" a ti leh a.

"Nia, e taka, thil pakhat i la tihloh ka hre chhuak!" ka ti ta thut a.

Min rawn en a, kawng lam en leh nghâlin," Eng chu? Han sawi la?" a ti a.

"Min la țawngțai lo."

Nui chung hian min rawn en zawk a, hawi sawn leh nghâlin," Mi ka țawngțai ngai lo, ka tifiam a nih kha," a ti a, a la nui sûng reng.

"A ni maw? A nih, țawngthu chhe lovah, lo damlo ta vak ila, lo thi dâwn ta ila, min țawngțai thei ang em?" ka ti leh a.

"Ka țawngțai ngai lo."

Teh tawp chuan.

"Ka țawngțai ngai lo, Sunday-ah ka inkhâwm ve țâwk a ni mai," a ti leh a.

Mak ka ti deuh nain ka tilang duh lêm lo, țawngțai ngai miah lo hi an awm zauh zauh tih ka hre tawh a, ani ber kher hi a lo tel ve reng ang tih erawh ka lo ring pha hauh lo asin.

Ka țawngțainaah dìl tur ka hriat belh leh ta e.

Pangpâr pot chu amahin min hùnsak thlap. Pangpâr dang ka neih veho pawh pàr an tum ve țan tawh a, a nalh dâwn viau e.

"Ka hna thawh tùr min lâk hêksak a, ka lâwm e," a ti deuh ngei.

"Nakinah i nu chu pangpâr dang pêk lêt leh ka tum ang-"

"Ni lo, pe lo ang, a pot dang pawh saw mi pêk țhen a la ngai, cycle pawh ka khalh theih loh phah tawh a nia! A pangpâr sâwn hmun a luah khat vek," a ti leh nang nang a.

"A mawi hlawm êm kha! Cycle chu kawngpui khawi laiah emaw khalh la ni mai alawm," ka lo ti, mi dang han pêk leh daih chu a uiawm dâwn êm asin.

"Mawi ti tùrin a en hman tak tak chuang lo, pangpâr ngaina lo ber hian ka tawrh phah mai mai a ni," a ti leh a.

"Mawi i ti ve lo em ni?"

A nui hawk a.

"A hmeichhia êm mai a. Motor hlîrin pár se chuan mawi ka ti ve mahna!" a ti duh chauh!

Zànah chuan ruah a sûr ta tak tak! Lehkhabu ka chhiar mai mai, ka pa lehkhabu hlui ka hai chhuak a, 'Tidamtu Kut' tih a ni nghe nghe.

WhatsApp-ah thlalâk min rawn thawn nual a, video nèn. Vawiina an ina ei tùr ka siam lai te, a nu pangpâr hmuna ka ding lai te leh a room-a ka țhu mai mai laite a lo ni.

Video erawh a lâk lai ka lo hre miah lo, pangpâr bula ka awm lai tho a lo nia, pangpâr bula kùna an rim ka hnim dan dan lai kha a lo ni.

Rei zet kan inbiak leh tâk kha.

Ka la hre chiang lutuk lo nain min duh ve viau chuan ka hria, kei pawhin ka duh. Hmeichhe dang hi a kawp lo niin ka hre bawk, heti khawp hian min buaipui ve a, hmeichhe dang kawp tel ni se ka hriat tawh ka ring.

Result a chhuak a, a pass chiang khawp mai, a ti țha viau bawk. A mak ve ngawt mai, lehkha a zir khàt hmel tehlul nèn, lehkhathiam lo tak chu a lo nih loh tawp hi.

Kan inkawp tluang ve zêl. Min duat a, min ngaihsak viau bawk ka ti. Nuam ka ti a, ka rilru a tihlim bawk.  A bula ka awm phei chuan ka hrisél lo a ni tih hi ka theihnghilh deuh ziah lehnghâl, ka tân chuan damdawi țha tak chu a ni.

Mahse, a tân ka țawngțai ta ziah thung. Engtikah emaw inhmuh chhuahna a neih vena tùr leh țawngțai thiltihtheihzia a lo hriat nân tiin ka țawngțai ta ziah. Inhmu chhuak se, inkhâwm tawp ringawt lovin inkhâwm chhante hria se ka duh.

Ka taksa damna tùr pawh hian ka dîl ziah. Tunah min tidam vek lo mah se engtik niah emaw chuan ka hrisèl lohna zawng zawng hi min lâk kiansak vek ka beisei tlat a ni.

*******

*Ruah sûr hi ka va haw tak!*

A àwm ve tho, lo lèn a tum a; mahse, ruah a sûr ta sia.

*Pangpâr tui i pêk hah ngai lovin Pathianin a pêksak cheah ngai mai la😀*  tiin ka chhâng a.

*Ka thin a rim a, ka pe vek tho!*

A inhmeh ka ti lutuk! Zaidam tak a ni lo va, thinchhe tak pawh a ni chuang lo, ka bulah phei chuan a thinchhe lo, min duat viau.

Vawiin chu ka nuamsam lo leh deuh a, kan inbiak lai erawh chuan damlo hmel ka pu duh lo, ka aw pawh a zângkhai thei ang berin ka thunun.

Ka khua hi a sik leh ringawt mai țhìn, ka inentîr nasa tawh a, doctor-te pawhin tihngaihna an hre bîk lo, damdawi hi ka inchhawp reng mai a ni.

*Khaw chhia hi kei aia ning an awm pawhin ka ring lo* a rawn ti leh.

*Chuti em ni? A nuam riau ka lo ti mai asin, boruakte hi a lo ti vawt ve a* ka ti thung a.

*Ka lo lêng țhin pawh chu min lo ning àwm țhìn hle mai, ka thlâkhlelh ang che hian min lo thlahlel ve miah lo a lo nih hi, a țha e*  a rawn ti ta!

A thinrimna tùr thu sawi ka nei em ni le? Message chu ka en lêt a, chutianga thinrimna tùr ka hmu hauh lo. Khi laia khaw chhia nuam ka tih khi em ni le? Lâk kawih tùr a awmin ka hre lo asin.

*I ngai sual a nih kha, boruak a tivawt ve a, chu chu alawm nuam ka tih chhan. Thinrim lo teh*  ka va ti a.

Ka nghâk deuh vang vang a, a reh vang vang mai.

Ka ti dik lo ve deuh bawk a ni, khaw chhiat vànga a lo lêng thei lo lungnih loh lai takin keiin nuam ka tih thu ka lo sawi ve bawk si a, a thinrim pawh hi a àwm ve tho mai.

*I thin a rim tak tak lo tiraw? Ka tihpalh aw, ka tihpalh lutuk, thinrim lo hrâm rawh*  tih ka thawn leh a.

A hmu reng tih ka hria; mahse, min chhâng chuang lo. A awm dàn hian ka rilru a tikhingbâi țan deuh tlat. Kan la inkawp rei fahran lo; mahse, ka tân mi pawimawh tak a ni tawh.

Ka mut dâwn chuan ka țawngțai a, ka tân chuan ka dîl mang lo, Pc-a tân hlîr a ni deuh mai. A dang chu Pathian hnêna làwmthu sawina a ni leh, Pc-a min tawntîr avàngin hlimna ka chhar a, ama hriatpuina ngeia hmangaih ka duh si a.

Ka va mangțha leh hrâm.

A thinrim rei loh hrâm ka beisei. Heti taka ka nun tihlimtu leh min thlahlel ve ngawih ngawihtu hi ka phú lo va, awm dàn tâwk ka lo thiam lo pawh a ni maithei a ni. Ngaihdam dìl ka la bâ a ni, a tel lova hun hman ka huphurh țan dèr tawh lehnghâl.

Zîng tin deuhthawa a message min hnutchhiah ziahtu khân tukin chu min hnutchhiah ta lo tlat! Ka rilru a tinuam lo tak tak tawh, a lungnih loh laia khatiang ka lo sawi kher kher kha ka tihsual liau liau a ni, ngai kawi duh tân chuan a ngaih kawih theih tlat a ni.

Ka tih dàn ni miah lovin keimah zâwk chuan ka va 'Morning' ta zâwk, a thiam lo zâwk ka ni miau si a, boruak tih țhat duh chuan a ngai tlat.

Mahse, chhànna ka dawng chuang lo.

Chutiang boruak a nih vàng chuan nilêngin ka awm a nuam lo va, khua a lo nuam vak lo bawk nèn, ka room ka chhuahsan mang lo, khumah ka tawm deuh reng mai.

Tlai lam ei rèl hun a lo nih chuan ka nu pui tùrin ka va tho ve, ruah a la tla siap siap, peih lo chung chunga tho ka ni a, ka sam pawh huih țha lo chuan ka va chhuak phei a.

Ka nu țhutna piaha Pc-a lo țhu reng ka hmuh chuan ka ding deuh chawt! Eng nge a lo tih? A lo kalna a rei tawh ang em? A thin a rim tawh lo em ni?

Zawhna hlîr.

"I lo tho tawh maw? Rawn koh che ka lo tum chiah a," ka nu chuan a lo ti a.

Pc-a ka en a, ka nu ka en leh a, kan inkâr boruak hi a hre ve ang em? Nge an lo sawi dùn tawh zâwk?

"I lo kal elo? I awm rei tawh em?" tiin Pc-a chu ka be ta zâwk a.

Ka sam hnawk deuh nuaih chu enin ka inthuamna chu a en leh a, chutah," I dam țha lo tih ka lo hre miah lo," a ti daih a.

"Ka dam tawh alawm."

"I eng nge nâ?"

"Ka dam tawh ka tih chu."

Ka nu chu lo inrawlh vatin," Hei, in tùr ka thlit che u aw, Bawihte, sitting room lamah ka dah dâwn a nia," a lo ti a, tray-in no pahnih chu a chawi sawn ta nghâl bawk a.

"I thinrim tawh lo em?" ka ti sap a.

"Rim, i dam loh pawh min hrilh lo."

"Ka damlo lo, ka nuamsam lo hlek chauh a ni, nula hrisêl lo ngang hi ka nia," tiin ka nui deuh pah a, ka nuih erawh a za tak tak hauh lo.

Bêlbâwm chhûnga chhang dahnaa mi chhang la chhuak pah chuan,"I lo lèn ka ring miah lo asin," ka ti leh a.

"Ka awm mai mai thei tawh lo alawm."

Sitting room-a ka nu thingpui dah chu inin,"Thinrim tawh lo teh, a hrehawm a nia," ka ti sap a.

"Nizàna ka lo lêng thei lo khaw chhia nin nâklaia, nangin nuam i lo ti kha ka thin a rim lo thei lo a ni," a ti ve thung a.

"Khaw chhia nuam ka tih chhan chu a hnuah ka sawi kha. Nia, ka sawi dàn kha a dik tâwk lo deuh a ni, ka tih dik loh a ni," ka ti a.

Min en reng pah chuan," Tunah hi chuan i damloh min hrilh loh vàng hian ka thin a rim tawh zâwk. Lo kal lo phei ila chuan ka hre dâwn miah lo tihna a nia," a ti nghut nghut a.

"Ka tawrh țhan a nia, engah vak ka ngai hleinem. Ka bula i awm chuan ka dam vek alawm," ka ti ve hnâp.

"Inentîr la?"

"Damdawi ka ei a, tunah chuan ka dam tawh, ka ti tak tak!" ka thil sawi chu âwih se tih ka duh êm avàngin uar deuh takin ka sawi. Dâwt ka sawi hran lo, ka mut vàngin ka lan damloh hmel mai mai, tunah chuan ka bulah a awm tawh bawk a, ka dam tawh.

"Ka thinrim chhûng khân keimah ka inhrem. Chuvàngin, thinrim leh ka duh tawh lo, i bula hlim taka awm ka duh ber."

Nuih sak pahin,"I thin ka tirim tawh miah lo ang," ka lo ti ve a, kan inen vang vang a.

Tunah chuan ka hlim leh ta e.

*'A HAR ÊM A NI' TIH HI INDÀLTÎR LO LA, A HAR ÊM AVÀNGA TIH THEIH LOH A NI LO TIH HRIA ANG CHE*

☆SUANGTUAHNA NEITU☆ - 6 By Dingdi Pachuau

Ramzotlangah pawh kan awm rei ve ta, kohhranah ka nu leh pa an tàl tam tâk avàngin mite pawhin min lo hre ve ta zêl a, kei pawh kohhran țhalai lamah ka theih ang chinah ka inhmang ve tawh, hmel hriat pawh ka ngah ve ta. Hrisêl lo viau mah ila ka theih ang tâwkah chuan ka tlânchhe lo, ka duh bîk lo. Hmel thar chan ka chan avàngin mi ngaihven ka hlawh deuh a, a hmei a pain ka hriat lêm lohte pawhin ka hmingin min ko nawlh nawlh ta hlawm, hma ka sâwn ve takzet.

IGNOU-ah Bachelor Degree chu Pc-a tihpuiin ka bei ve ta, assignment tih tùr tam tâwk ka nei. Chhùn leh zànah hun âwl ka nei tam a, ka ti char char mai. Pc-a a lo lènin min tihpui bawk a, ka ti sâwt khawp mai. Ani pawh hian MZU-a zawm a tum ve a nia; mahse, a zawm lo, IGNOU-ah a ti ve. A chhan ka zawh chuan Aizawla va awm kha a peih lo ni àwm tak a ni. Pawi pawh ka ti chuang lo, ka bulah ka hmuh phâkah a awm reng dâwn tihna a ni mai a.

Zan khat a lo lêng chu," Naktûk chu eng nge i tih dâwn?" tiin min zâwt a.

"Kan group-in Biak inah hnatlâng kan nei dâwn a, kan bàn hmà chuan lehkhate pawh ka zir ve ang chu," nui chung hian ka ti a.

"A, zirna hun a la tam êm mai a, naktûk chu țhiante nèn picnic kan sawi asin!" a ti sap a.

"A nih tak chu, hlim deuhin hman in tum dâwn nia," ka lo ti a.

"Lo kal ve zâwk mai la? Ka mal dâwn êm asin, an bialnute an hruai vek ang a, min khawngaih lo em ni?"

Mi dangin an bialnute an hruai si chuan a mal viau ang a, a khawngaihthlâk ngawt ang. A va buaithlâk tak! Chhàn dàn tùr min tihaihchham zo vek.

"Lo kal ve mai rawh. Hnatlàn hun chu a la tam e, bâkah, chhuak tùra ka sàwm vawi khatna che a nih hi. A nuam viau dâwn asin," a ti leh a.

"Khawiah nge in picnic dâwn a?"

Phûr zet hian,"Hamletate huanah a nia, a nuam lutuk! Picnic spot atâna an ruahman mêk a ni bawk a, a changkâng tawp maw le!" a ti sârh sârh a.

A châkawm khawp mai; mahse, hnatlàn kha ka țhulh thei lo ang, kan group hnatlâng a nia, a pawimawh zîngah, ei leh in buatsaihtu tùr zîngah ka tel tlat a ni.

"A châkawm viau mai; mahse, hnatlànna chu ka kalsan thei lo ang, kan hnatlàn vawi khatna tùr a nia, ei leh in buatsaihtuah ka tel bawk si a, a pawi ka ti takzet a ni," ka ti.

Kan ngawih dun vang vang hnuah chuan,"Min khawngaih ve mai la?" a ti leh sap a.

"Ka khawngaih lutuk che alawm; mahse, khawngaihin, min hre thiam hrâm zâwk la, ni dangah tiin kei pawhin rilru nuam deuhin ka zui che ang a?" ka ti ve thung a.

"Hnatlâng tùrte chu an tam tho ang chu," a ti leh țâlh a.

"Awm ve nual tho e," ka tih chuan," Chuti, lo kal ve mai la, pakhat lek i awm loh vàngin an thawk nêpin an thawh tlèm phah tawp nâng," a ti leh zél a.

"Ni khawp mai, kei tehlul chuan eng tham mah ka thawk lo ang; mahse, ka kova tla a ni ve tlat sia, ni dangah sawn hrâm zâwk ula?" tiin ka ngèn hrâm hrâm a.

"In group-ah chuan bialpa i nei a ni lo maw?"

Ka en hâ mai! A thil sawi chu thil âwihawm loh lutuk a ni si a, ani pawh hian fiamthu a thawh a ni ngei ang!

"Fiamthu thawh lo teh a!"nui chung hian ka ti a.

"Ka fiamthuah i ngai a ni maw? Ka fiamthu lo nasa!" tiin, a nui ve hauh lo, a thinrim hmel lek lek zâwkin ka hria!

Hlim lo zetin a haw ta. Ka sawi fiah ve fê hnu pawhin a lung a awi thei lo,mi dang ka neiah a ngai deuh tlat. Kei lahin hnatlàn chu țhulh ka tum si lo, a lung chu a âwi fahran lo a ni. Min ring lo angin lang mah se, mi dang ka neih lohzia chu a hre chhawm zêl dâwn alawm le.

Ka mu tùr chu rei zet ka khum bulah țhingțhi ngatin ka țawngțai. A chhan chu kei pawh ka hlim bîk lo va, chutia ka bialpa ber rilru hlim lo taka a haw chuan min tihlim lo ve tho tlat a ni.

Pathian chuan engkim hre vek mah se ka harsatna chu ka thlen. Mi chuan ho an ti ngawtin ka ring; mahse, kei chuan ho lua awm ka ti thei lo, rilru nuam lo taka awm ai chuan harsatna thlen hmiah mai zêl hi ka duh dàn a ni.

A lung a awi ngang lo a niang, min mangțhana text pawh ka dawng lo. Keimah zâwk chuan ka va text a; mahse, a en lo, a phone a la khawih hman lo a niang.

Thil a kal dik leh thluam ang chu maw...

A tûkah chuan rilru khingbai ru angreng tak chuan Biak inah chuan ka kal a, ka thlen meuh chuan group member-te chu an lo awm nual tawh, min lo be hlut a. Kei pawhin ka rilru nawm lohna chu paih bo rihin kan tih tùrte chu kan sawiho ta zâwk a.

Picnic-naah chuan a kal ta a nih ka ring, zîngah khân ka text a, min reply ve mai nain 'Morning' tih vêl chauh a nia, a lung erawh tlêm chuan a awi ve deuh tawh a ni maithei, min rawn chhâng ve sia. Han biak pawh ka duh viau nain ka tibuai ang tih ka hlau deuh a, ka insûm hrâm a ni.

An fel hlawm khawp a, ei tùr lam buatsaihtu tùrah khân min ruat ve nain a hming mai a ni, min àwl hneh khawp mai. Kan tam lutuk hran lo va, a harsa lo bawk.

Kan hnatlâng chu kan bâng har lo. Ka haw tùr chu kan leader Pu Maa chuan," Awmawm, ka lo thlah pah ang che chu, in in piah lawkah khân ka kal dâwn tho a," a ti a.

"A ni maw? A, a ngai lo ang."

"Lo chuang rawh, i inthlahrung a nih kha," a ti leh a, kea kal lâwp lâwp chu ka hreh hran lo nain ni a sa angreng a, kea kal chuan ka thlen har dâwn avàngin chuan mai pawh chu ka hnial lo.

Kan thleng thuai ta rêng a. Kan ina lût tùr chuan ka sâwm nain nui chung hian min hnial a, kan in piah deuh lawka ţhenawmte inah chuan a phei ta zâwk a.

Ka nuin min lo chiauau thuai a, haw hma min lo ti viau a niang," In va zo hma ve! Dâr 3 vêl daiha in lo haw ka lo ring a!" a lo ti a.

"Nia, țhiante an thawk chak a, kan zo hma thei alawm. Chubâkah, kan leader U Maa'n min rawn phur leh hlauh bawk a," ka ti a.

"E, i va vànnei ve! I ril a țâm êm?"

Ka ril a țâm lêm lo nain thingpui chu ka'n in leh hrám kha. Ka inzawhah ka inbual a, ka nu pawh puih tum lo chuan ka room-ah chuan inkhungin lehkha(ka zirlai) ka en hlek a.

Zanriah ei hma deuh hlekin Pc-a'n min rawn bia.

"Tu nge phurtu che kha?" thil dang sawi lo chuan a rawn ti nghâl.

"U Maa.  Min lo hmu maw?!! Picnic-naah chuan i kal ta nange a?" ka lo ti hû.

Ka thil sawi inzawm lohzia chu!

"U Maa chu tu nge?"

"Kan group leader-" ka la sawi zawh hma chuan," Kha pa vàng khân picnic-naa kal tùra ka sawm che pawhin i hnial a, tiraw?"a ti ta nghut nghut mai!

"Ni lo, Pc, khawngaihin, i hre sual a ni, kan hnatlâng zo kha kan in lamah a kal dâwn tho a-"

"A lo remchâng leh zêl a nih chu tiraw?" tiel tih hriat tak hian a ti leh a.

Engtin nge min lo hmuh le? Bâkah, a lo thîk chu a mak ka ti, ka ngaizawng lo nasa mai si, nupui nei lai a ni nghe nghe. Chutianga a lo ngai thei chu mak ka ti thlâwt, sawi fiah dàn tùr pawh ka hre lo.

"Pc, chutiangin sawi lo hrâm teh, engtin nge chutiang hawi zâwng chuan min ngaih theih? Khawngaihin, hetiang hi sawi lo hrâm teh." Ka țap pùr lo chauh, ka awm loh dàn anga min lo ngai chuan ka rilru a tina takzet.

"In inphur kha ka hmu chiang êm!!"

Kan inphur ve miau bawk si a, min lo hmu ngei ang; mahse, a ngaih ang ni lovin, min thlah haw satliah mai a ni.

"I ngaih ang khân ni lovin kan in piaha kal a ngaih tho avàngin min phur haw pah mai a ni."

Ka thu sawi chu ring se ka ti takzet.

"Insawi fiah a ngaih tawh chinah chuan eng emaw awm a awm țhin," a la ti țâlh.

A thu lâk dàn chuan min tithinrim lo, min timangang zâwk a ni. Nizàn ațanga lungawi lo tawh kha a ni si a, kan inkâr a chhiat phah daih ang tih ka hlau.

"Khawngaihin, ka thu sawi chu âwih hrâm rawh," ka ti leh ringawt, tih vak ngaihna ka hre lo a ni.

"Eng nge i sawi a?"

A sual chimawm thiamzia hi!! Ka thu sawi kha a hria, a han hre lo lui der vël a nia...

"Pc, a mak e...mipa dang kawp duhin min hmu em ni? Duh dang neiin min hmu thei maw? A mak ka ti," ka ti sap a.

"Ngawi lawk aw...tunah hian engkim theihnghilh ka duh, ruih ka duh a ni. Vawiinah picnic-naah ka kal duh lo a..."

A rilru na leh a lungawi lo aw chuan min tina ve kher asin, tuna a ngaihtuahna ang hi thil awm dàn a ni si lo, a thil hmuh kha a ring êm êm si.

Ka dem hauh lo, kan inphur min hmu miau a, mit ngeia min hmuh si chuan chu chu a ring ngei ang, ani lungawi lo sa tawh bawk nèn, a zêldin kual vak ngei ang a.

Ka lo inphurhtîr kha a pawi ta a ni. Lo hnial lui ve ta țàng țáng mai ila hetiang hun hi ka tawng àwm tawp si lo, ke khân lo kal hlè hlè ila aw...

Zanriah chu tui ti lo zetin ka ei, ka ei tlêm lutuk chu ka nu ngaih a țha lo deuh a, vawiin lamah ka chau deuh a nih a ring a niang.

"Bawihte, vawiin lamah chuan in thawk nasa a ni maw? I chauh hmel tlat," a ti a.

"Thawk nasa lo ve, ka chau lo. Ka ril a țâm vak lo a nih kha," ka ti ringawt.

Chaw eina ka seng fela ka sil zawh chuan ka room lamah ka kal deuh nghâl, ka nute chuan lehkha ka zir tùrah an ngai ngei ang, zir ka tum rêng.

Mahse, ka phone ka khàl neuh neuh phawt, min rawn text ka ring deuh ngawt, a nih loh tal pawhin mi rawn call ka la ring fan; mahse, a reh khawp mai.

Ka va call mai dâwn em niang? Mahse, ka va tibuai mai lo ang maw? Keimah vàngin a rilru a nâ a, ruih a duh a nih kha. Tunah hian a rui viau tawh ang em? Va call ta ngawt ila min lo vìn hrep zâwk lo ang maw?

Ka rilru a tibuai takzet. Tihngaihna ka hre si lo, thu dik lo vàngin a ruih phah a nih phei chuan, a pawi dâwn lutuk. Rui lo hrâm tal se.

Ka call ta nge nge.

Mahse, min chhâng lo, a ring ral țhak. Vawi thum ka call a; mahse, a ring ral zêl mai. Ka beidawng ta deuh, insawi fiahna ang deuh ka ziak chhuak a, WhatsApp lamah ka thawn ta thung, a hmuh hun hunah a chhiar ve ang a, a hre thiam mai ang chu maw...

Tih tùr dang ka va hre ta lo êm!  Tihngaihna dang ka hriat chhun chu țawngțai mai a ni ta, ka țawngțai ta tawp. Ka rilru buainate chu a hnênah ka thlen tawp mai, ka țawngțai zawh hnu chuan tlêm chuan ka zia deuh.

"Ka rilru i tihnatzia hi i hria em?"

Ka muhìl țêp tihah min rawn phone ta khiah a nih chu. A aw chhuak chu a buai deuh nakin ka hria, a sehchilh dàn ațang chuan a rui hle a nih ka ring bawk.

"Pc, mi dang ka ngaizawng lo, ka kawp lo bawk che," ka ti ve a, ka aw chu a thâm chhalh mai, ka lo muhìl lek lek tawh tlat a.

A nui hawk mai.

"Ka lo ring lutuk che a ni tiraw?!"

Ka țhu chhuak hlawl, min ring lo angin lang mah se min rawn phone hrim hrim hi ka lâwm, min rehsan hlauh ta se chuan beiseina ka nei lo ang, tunah hi chuan beiseina a la êng sêt sêt rih e.

"Khawngaihin, ka thu sawi hi âwih hrâm teh, naktûkah lo lêng la, kan sawi dùn dâwn nia aw."

"Sawi tùr eng nge la awm?" te chu a ti lawi a.

"Pc, khawngaihin, mipa dang ka kawp hauh lo, chu chauh chu ring tùrin ka ngèn ang che."

A rui bawk si a, thil dang sawi ka duh lo, a ruih lungpuam lai chuan insawi fiah dâwn pawh ila awmzia a awm chuang lo ang.

"Benga hriat ai chuan mita ka hmuh hi ka ring țhin zâwk asin."

Eng mah a sawi felpui theih loh, zanin atân chuan ka thu sawi a âwih duh pawhin ka ring lo, hun ka neih veleh ka hrilh fiah leh ang, dâwt leh rinthu avànga kan inkâr chhe tùr hi ka ngai ngam lo a ni.

Ka rilru a va nuam lo tehrêng êm!! Ka rilru hrehawm chuan ka natna a kai chhuak lehnghal a, ka mu leh rèn ráwn tawh. Rilru hrehawmna ka neih apiangin ka taksa hian a tuar ziah a, hei vàng hian ka rilru tihhrehawm hi ka duh lo va, ka hêl theihna chinah chuan ka hêl hrâm hrâm țhìn, tunah erawh a ngaihna a awm lo, Pc-a hi ka rilru ka lo pe tak zet a ni tih ka hre chiang ta ngang bawk.

Thil hrilh fiah tùra ka call pawhin min chhâng duh lo va, ka message lah min chhâng lêt hek lo. Hmu tùrin ka chhuak thei si lo va, rilru hrehawm takin hun ka hmang a ni.

Ka țhiante pawhin min tihlim zo lo, ka bulah awmin min hnèm se, Pc-a nèn kan inkâr chu a dik leh vek mai ang tih thu min hrilh se chuan ka zia deuh mahna; mahse, ka bulah an awm si lo.

A rûkin țap chungin ka țawngțai fo va, Pathian hnênah chuan ka buaina chu ka thlen lo thei lo, kei chuan ințhen ka duh lo va, he buaina hi ka ching fel thei lo ang; mahse, Pathian tân tih theih loh a awm hleinem.

Ngaihzawnga buaina Pathian hnêna thlen chu ho viauin a lang maithei; mahse, kei chuan ho ka ti ve thei lo. Pc-a hi ka tân a lo ruat a nih ngat chuan min pêk lêt ka beisei tlat, a rilru luhlul zet hi a tinêm thei ngei ang, a chhan chu a țanna hi a dik lo miau si a.

Zan khat chu Pc-a chu a rawn lang hlawl mai! Mak ka ti viau nain ka ngaihtuahna pakhatah erawh chuan 'ka țawngțai chhànna' tih a lo lang vat. Lêng tùrin ka awka leh message chuan ka sâwm kal thei lo tih ka hre ve tlat.

Sitting room-ah puan nuam sinin ka mu hlãn a, ka nawmsam lohna chu ka nu leh pa lakah chuan thup viau mah ila, min hre tho, ka natna rawn chhuah chhan erawh an hre lo. Ka pain 'Tidamtu Kut' kha a riin a chhiar a, ka nu nèn kan lo ngaithla a ni.

"E, lo kal rawh, Pc. I rawn lang khât kher mai, i dam țha maw?"

Ka nu hi chu a țawngkam hi a țha a nia. Ka pa pawhin a thil chhiar chu ti tàwpin Pc-a chu a melh ve zawk a; mahse, ri lovin a chhiar chhunzawm leh ta nghâl a.

"Nia, in lamah tih tùr neuh neuh hi a awm ve a."  Chhuanlam a siam a ni tih ka hria, kan inkâr hi buai lo se chuan a lo lang leh zut ang, a hma kha chuan zan tin deuhthaw a lo lêng miau alawm.

Rui hmel a pû pawhin ka hre lo. Kei pawh chu ka tho chhuak a, lu hai deuh bûr chuan ka țhu a, ka sam sei angreng tak chu a hnawk nuaiin ka ring.

"I dam țha em?" ti sap pahin min rawn melh a.

"A chiang lo leh deuh a; mahse, a zia leh tawh e," ka chhàn hmain ka nu chuan a lo ti var, a lo hre pha pek a ni maw!

"A ti mai mai a nih kha, ka dam țha a nia," ka lo ti sap thung.

"Engtik ațangin nge i dam loh a?"

"Ka dam țha ka tih chu. Eng nge i thawh țhin zâwk a?" tiin ka chungchâng min zawh zui zêl ka duh loh avàngin thil dang ka zâwt.

"A tam mai," a ti ringawt. Zawh zui zêl ka duh ta bîk lo, a sawi duh lo a ni ve mai.

"Thingpui ka'n chhuang ang e, kurtai tui deuh kan nei a nia," tiin ka nu chu a tho ta nghâl a.

Ka pa a țhut ve reng avàng chuan thil dang sawi chhuah chi a ni si lo va, kan ngawi dùn deuh vang vang.

"I chhûngte an dam țha em?"

Sawi tùr a vâng lutuk a, hetiang vêl hi ka zawh loh chuan kan ngawi dùn rei dâwn riau, ka pa țhu ve khur hian sawi tùr a ti vâng êm a ni.

"Um, an țha."

Min chhâng tãwi bawk si, sei deuh hlekin min chhâng ve se chuan ka lài deuh hû lo tur a nia.

"Bawihi, i nu chuan room-ah min lo pe mai teh se aw, muzâl pahin ka'n chhiar ang e. Pc, lo inkàwm r'u aw," tiin a tho ta daih a.

Room-a ka pa a luh hnu chuan kan ngawi dùn vang vang a, a hnu deuhah Pc-a chuan,"I dam țha lo tih tal chu min hrilh ve tùr i ni asin," a ti ta sap. Min demna awka chu ka hria; mahse, ka hai der lui.

"Ka hrisèl lohna bawk kha a nia, damdawi ka ei a, ka țha tawh alawm," ka tih lai chuan ka nu chuan thingpui leh kurtai chu tray-in a rawn chawi phei a.

"Kha u le, i pa chu a tluzâl ta a ni maw? Ka'n pe ve nghâl ang e," tiin kan no chu dawhkànah a dah a, no pahnih chu chawiin an room-ah chuan a keng lût ta nghâl a.

"In rawh, kurtai kha a tui a nia." Kurtai hi ka ngaina hran lo; mahse, kan pahnihin kan awm leh tawh a, țawng tùr a vâng êm a ni.

"Min ngei em?"

Ka en ta hâ mai!

"Engati maw?" ka ti leh hû.

"Keimah vàngin i damlo si a..."

"Nangmah vàng a ni lo, ka dam tawh ka tih tawh kha," ka ti ve thung.

"Mahse, ka inmawhpuh lo thei lo, i thu sawi ka âwihsak duh si lo che a, bâkah, phurtu che kha nupui fanau nei tih leh kohhrana inhmang tak a ni tih ka hre tawh bawk a," a tih chuan mit khap lêk lo chuan ka en reng a.

"Dâwt ka hrilh lo che, khati khân min en reng suh, i mitmeng a lian si, ka hlau deuh che a nia," a ti leh, a nui deuh sak bawk.

"Ka thil hrilh che kha i âwih ve ta maw?"

"Min hrilh lai pawh khân âwih che ka duh; mahse, in inphur kha ka hmu chiang êm che u alawm," a ti leh a.

"A nih, engtin nge i âwih leh theih si?"

Min en vang vang phawt a, chutah," A pawimawh tawh lo ve," a ti ta daih.

Ka țawngțaina Pathianin a chhâng tih ka hria, ka rilruin làwmthu ka sawi nghâl mawlh mawlh bawk.

"Amaherawhchu, thil pakhat ka ngèn duh che a."

Ka en reng a, ani pawhin min en ve reng.

"Sawi la?"

"I dam veleh kan pahnihin kan picnic ang."

*THU TIAM MAI MAI SUH, I TIAM A NIH CHUAN RINAWM TAKIN VAWNG THUNG ANG CHE*

☆SUANGTUAHNA NEITU☆ - 7 By Dingdi Pachuau

Kâr khat a ral hma chuan ka dam ta mai. Ka dam țha hma riau asin! Ka rilru a hlim leh tawh vàng a ni tih ka hria, rilru a hlim hi chuan taksa pawh hi a dam chhawm ve mai zel chu a nih hi.

Ka dam țha tawh bawk a, kan sawi tawh angin picnic tum chuan kan inbuatsaih a, ka phûr lo ka ti phal lo, ka phûr takzet.

Ei tùr ken țeuh a tum a niang, bike-a kal ta mai lo chuan an car a la chhuak a, kan kal tumna hmun ka zawhin," Thlen hunah i hre mai ang," a ti chauh mai si a, hre châk viau mah ila ka zâwt zawm ta bîk lo.

Inah lûtin Basket lian angreng deuh hi a rawn khai chhuak a, a kut lehlamin polythene lian angreng tak a rawn khai tel bawk a.

"Eng nge ni țeuh?" ka lo ti vat a, a polythene khai chu ka lo ban vat bawk.

"Kha, hei zawk hi," tiin basket chu min pe, a lo rit teh chiam lo ve. A chhûngah chuan eng tak awm ang maw?

"Ei tùr vek em ni?"

"Um... i ei țeuh ang chu!"

"Hmmm, kan ei zo vek thei lo tawp ang!" hmui tipawrh târh hian ka ti a.

"Ei zo vek ang! Ei zawh loh leh i hàwn vek tal ang," a ti leh a.

Lungleiah hian picnic spot awmna ka hre hauh lo, ka zâwt ngam tawh bawk si lo va, min phurhnaah kal tawp mai ang.

Ei tùr kan ken chu a la duh khawp lo a ni chêk ang chu, dàwrah lûtin eng eng emaw kan lei belh leh a, mak ti takin ka en ralh ralh a, ani erawh chu a nui sak sak duh chauh!

Pûkpui lamah kan tlân, helamah hian picnic spot a awm ngei a niang chu maw.

Zai kan ngaithla pah a, nî sa ar mah se tlân kan ni bawk a, thlifîmin min chhêm pah tho. Tori Kelly hla a ni a, ka thiam zâwng tak a nih vàng chuan ka lo zàwm ve rât rât a.

"Khua a dur ang e!"

Ka melh ralh a," Ka zai vàng chuan maw?" ka ti pah nghat a.

"Khaw chhe hnuaia picñic chu a hit vak lo ang," a ti leh, min rawn en duh hauh lo.

"Lungngai suh, a chhe hauh lo ang," tiin pâwn lam hawiin ka zaisan leh ta daih a.

Dârkâr khat deuhthaw kan tlân hnu chuan kan hmalama huan ni àwm tak hi ka hmu ta a, pangpâr pâr ni àwm tak tak pawh chu ka hmu țan.

"Huan a ni em? A nawm hmel tawp."

Ka aw ațang chuan ka phûr tih a hria a ni ngei ang, a nui hak a.

"Nuam e, picnic spot tùra ruahman mêk a nia, an la peih fel chiah lo va," a ti hap a, kawng zau nuam takah chuan kan tlân par par zêl a.

"En teh, pangpâr mawizia saw!" ka ti chûl a.

A ni lah tak a. Mawi tak an ni, rawng chi hrang hrang niin, pangpâr chi hran hran a ni bawk. An pâr rimte chu hre thei hialin ka inhria.

"I hàwn țhen dâwn nia."

In, sâng deuh ir era sak, lian fahran lo, a chung dî vek kawtah chuan kan ding a, motor hnung lama basket leh polythene-a ei tùr eng eng emaw kan dah chu la chhuakin inah chuan kan lût a, a chunga dî hman a nih vàng chuan a dài nuam khawp mai.

"A nuam reuh hle mai!"

"Nuam lo i tih ka hlau asin," tiin a thil khai chu dawhkàna dahin tukverh leh kawngka a hawng nghâl a, thli a rawn thaw lût nghâl heuh heuh mai.

"Nuam lutuk ringawt!"

"Pool pawh a awm asin; mahse, i chèn erawh ka phal lo, i dam loh leh phah palh ang," a ti deuh tlat.

"Thawmhnaw pawh ka keng lo hrim hrim," ka lo ti a.

"Bikini nèna i awm lai ka hmu châk asin le," min thlêk vang vang pah chuan a ti a nih chu!

"Ngawi țâwt rawh!"

Kan nui dùn hawk hawk.

Kan hun hman dàn chu duhthusàm a ni. Bathlàr ni hlim chinah chuan țhutna kan hûng chhuak sauh sauh a, phah tùr puan kan ken chu phahin kan zâl dùn mai mai a, thlî a thaw heuh heuh bawk si a, nuam tak a ni.

"Kan buai lai khân ka ngaih theihzia che chu a," a rawn ti chhuak phawng mai a, ka sam chu a khawih neuh neuh reng a.

"Kei pawh, ka dam loh phah nghe nghe kha," amah en chung chuan ka ti ve sap a.

"I dam tawh a, i dam loh ka phal tawh miah lo ang," a ti a.

"A țha alawm, dam loh chu ka duh tawh bîk miah lo, hrehawm ka tihzia kha."

Min rawn hnaih sauh a, a bân lum thar thara min rawn kuahin," Ka tihrehawm tawh miah lo ang che, ka phal ngai lo ang," tiin ka biangah chuan a rawn fâwp zauh a.

A lam hawiin ngun zet hian a mitah chuan ka lo en a, ani pawhin min lo en lêt ve tho. A tarmit vuahna a hnârkàwn chu a inrîn deuh kalh a.

"OmOm, ka duh che, ka duh lutuk che."

Min duh ve tih hi chu ka hre ve chiang, kei pawhin ka duh alawm, ka mipa duh hmasak ber a ni a, ka bialpa hmasa ber a ni bawk.

"Kei pawhin...ka duh che," ka ti lêt ve sap.

Muangchângin kan infâwp a, kan uluk dùn khawp mai. Hun kan ngah a, hmanhmawh kan duh lo pawh a ni maithei a ni.

Min pawmin min kherh bet chual a, țan pawh ka tum lo. Kan induhna a alh chhuak ve a ni mai a, tàwptîr mai ka tum bîk lo. A fâlin kan inhmu khât a, kan âmin kan duhthawh ve a ni mai.

A duhthawh telh telh a, a thaw pawh a mumal lo țan ta deuh, a hnu deuhah phei chuan a thaw huam huam mai, a kut pawh chu a ninhlei khawp mai a, dap tùr lah chu a hre nasa, min chùl kual vêlna chuan keimahah pawh nghawng a rawn nei chho țan.

"Pc..."

Ka hmui chu a hmuiin a rawn chhilh zat avàngin ka țawng zawm thei lo, duhthawhna tinrênga khatin min fâwp a, ami fawhna runthlâk zet chuan ka thluak fîm pawh a tinu zo dâwn.

"Tunah hian...ka mamawh lutuk che."

Ka kekawr kâwng a rawn țham fuh tâkah chuan," Pc, hetiang hi kan ti thei lo," thaw hap hian ka ti ta hlawl, ka nu min zilhna ka hre chhuak zawk a ni. Thianghlim taka bialpa nei tùr leh Pathian duh loh zâwng leh a phal loh zâwnga khawsa lo tùra min hrilh țhin kha.

"Ka mamawhzia che hi..."

"Tàwp ang!"

A la tàwp duh hauh lo, kan kut chu a insual țan ta, aniin a duh tihhlawhtlin a duh a, keiin ka lo hnial thung. A chak ropui si, ka hneh hauh lo ang.

"OmOm, khawngaihin..." a aw thâm deuh țuak, khùr deuh dar dar chu ka hre chiang ngang mai.

"Țawngțai hmasa phawt ang." Tih ngaihna ka hre tawh hlawl lo, hei hian min pui hrâm teh se.

A thawk țha ngang mai, a che lâi a tàwp nghâl chawt.

Insiam țha sawt sawtin rang zetin ka tho a,"Kan pahnih hian kan la țawngțai dùn miah lo tih ka hre chhuak chiah," ka ti leh, ka aw pawh chu tlêmin a khùr ve tho.

Muangchânga rawn thovin min hnungchhawn zâwng chuan a țhu a, lo en kher lo mah ila nuam a ti fahran lo tih ka hre thei, kei pawhin nuam ka ti vak bîk lo.

"Țawngțai rawh," a ti nghut.

"Kan pahnihin-"

"Ka thei ve lo!" A aw chu a pàwr mah mah.

Ka tlânchhe lo ang, ka bialpa hmaa țawngțai ka zah si chuan engtin nge ringtu țha ka nih theih ang? Thil kan tihsual teuh êm kha.

Ka țawngțai ta. Kan pahnih tân, thianghlim taka kan induh theih nân leh a duh loh zâwnga kan awm loh nân ka dîl nuai mai.

Ka țawngțai zawh veleh chuan tho vutin min en chuang lo hian," Lo awm rawh, tui ka'n chêng lawk ang e," a ti sap a, a kal ta nghâl.

Ka chhâng lo, a kal ta chu ka en zui vang vang ringawt. A thin a rim ang em? A lungawi lo viau maithei a ni, a tihtauhchuan tihngaihna a vâng khawp ang le.

Kan chesual teuh hle a ni. Ka thianghlimna ka hloh teuhzia ka hre chhuak uar uar a, a hun takah Pathianin min rawn hriattîr niin ka hria. Làwmthu ka sawi mawlh mawlh.

A rawn lêt leh chuan a thin a rim lo a niang, pângngai zet hian," I ril a țâm tawh em?" a rawn ti nghâl a.

"Țâwm vak lo, nang?" ka lo ti ve vat a.

"Țâm deuh tho."

Puar leh fànna ni vak lo deuh chu kan phawrh a, kan puan phah chungah bawk chuan keng pheiin kan țhu nghâl a.

"I thin a rim em?"

Min rawn en zawk a, ei tùr chu en leh nghâlin," Rim lo ve, engah mah ngai suh," a ti sap.

"Min ngei em?" ka ti leh.

Chiang zetin rei fê min en phawt a, chutah," Ka ngei lo che, ka duh sawt che," tiin a rawn thle phei thut a, ka hmuiah chuan na zet hian a rawn fâwp a, ka hmui hnuailam a seh pah zauh bawk a.

"A naaaaa....!!"

Nui hawk hawk hian," Ka âwih chiam chiam lo êm mai," a ti duh chauh!

"A na tak tak!" uar zet hian ka lo ti thung a.

"A nêp thlerh thlerh êm mai a! Nichîna ka thil tawrh kha a hrehawm fê zâwk," a tih tâkah chuan ka ngawi ta daih.

Ei tùr kan ei a, in tùr nèn. Car tape a play pah bawk a, a chângin min làmpui dâwrh dâwrh bawk a, lâm thiam lo hle mah ila ka hnial duh bîk lo, kan pahnih chauh pawh chuan kan hlim ve hle a ni.

Thil ka ei nasa lutuk a, ka puar khawp mai.

"Kan ei bãng hi hàwn vek ang che," a tih chuan," In lamah i naute leh i pite pawhin an ei ve duh ang," ka lo ti a.

"Duh lo, ka rawn lèn huna kan ei tùrin i lo dah țha dâwn nia."

Pangpâr chi hrang hrang an chìnna lamahte chuan kan kal a, kan inkai rial nain thla kan la dùn mawlh mawlh tho.

"A mawizia hi!"

"Hêng pangpâr ai hian i mawi daih zâwk!"

Min fakna avàng chuan ka nui sak a, dingdihlîpin a biangah ka fawhsak zauh bawk.

Pool bulah pawh chuan thla kan la dùn leh bawk. Kan kal leh hun tùr a hriat si loh a, tam deuh lâk ka duh, tu mah min chîm buaitu an awm bawk si lo va, hetiang hun free lutuk hi kan nei khât tawh viau ang.

"Engtikah nge kan kal leh theih ang?" kan haw lam kawnga kan tlàn lai chuan ka ti a.

"Nuam i ti viau a ni maw?"

"Lutuk!" uar zet hian ka lo ti a.

"Kal leh thuai tùrah inngai ang, thu han âwih êm êm phawt la."

Nuam ka ti êm a, zêp a ngai ka ti lo. Ani pawh a hlim ve tho chuan ka hria, kan nuih dùn nasat viau kha maw.

Zan tin deuhthaw a lo lêng leh ta. Kan inngai a, kan inthlahlel a, ka lo hau hran lo; mahse, lehkha zir tùrin ka hrilh ve fo. Țha takin a pass lo ang tih ka hlau alawm, kum tàwp kan hnaih leh mai tawh a, zirna hun kan ngah leh tawh vak lo. Kum inrual rengin kei aiin a zir sâng a, mipa a nih vàngin hlawhtling se ka ti, nupui fanau chãwmtu tùr a la ni dâwn si.

Kolasib lam țhiante pawh an țang khawp mai, exam a hnai tawh si, krismas boruak rawn nam chho țan nèn, Chikki-ah chuan țan an ngaih thu an rawn sawi kûr dup mai.

*Lungngai s'u, țha takin in pass vek ang*  ka ti a.

Melo-i : Inla bialpa nei viau lo teh! Kan hmuh ve lah i remti mang si lo.

Rbi : Kan chhuhsak a hlau a niang🙈

Hmangaihi : A hmelchhia a nih hi a hriat reng alawm. Hnâr lian pui, meng kalh rulh rulh chi a ni lo thei lo.

Pc-a thlalâk hi min dîl ziah a, ka post duh ngai lo țhin a nia; mahse, zanin chu ka'n post ve ang e.

*A nih, kha ka lo dah kha, inchhuhsak âwih loh* tiin Pc-a nèn Pool bula kan lâk dunna chu ka post ta a.

An hmuh dàn an rawn sawi sap sap.

*A chhiat vak loh hi.*

*A lêrh hmel loh riau mai*

*Engtin nge a duh theih zâwk che😀*

*In inhmeh dùn lutuk!*

*Chhuah miah suh*

*Ka rin aiin a lian lo*

*Tarmit vuah ve ve, in fate mit a chhe àwm teh e!*

Keimahin ka nui kar kar.

*******

Țhalaiin Advance Krismas kan hmang dâwn a, programme buatsaihtu tùr zîngah min telh ve leh ta. Eng angin nge min hmuh ni, eng ka nih loh tehlul nèn, Pathian zârah duhsakna ka va dawng tam tak!

*En teh, Advance Krismas programme buatsaihtu-ah min telh ve leh a nih chu* tiin Pc-a chu message ka thawn a.

*Tute nèn?* tiin min rawn chhâng.

*Kan awm nual mai* ka tih chuan *Mipa an awm ve em?* a rawn ti leh.

*Um, 3 an awm ve a nih hi* tiin ka chhâng.

*Melh hauh suh ang che* a rawn tih chuan ka nuih a za lutuk. A thîkthu hi a pe chhe ve thei si a, hei vàng hian mipa bulah ka awm tam loh phah khawp mai. A bula ka awm lai phei chuan kan kohhran țhalai mipa ka hmuh ve te pawh ka biak loh phah fo, induh min ti hlawm țhin ngawt ang.

*Thîkthu chhepa😝😝😝* tih ka thawn leh.

*Chhia e, mipa dangho chu melh hauh suh ang che, ka ti fiam miah lo* a rawn ti țha leh.

*Yes, Boss😀* tiin ka chhâng. Melh pawh ka melh peih hlawm lo ang, bialnute pawh an nei ve tho ang a, anni pawhin min melh peih bîk tawp nâng.

November thla a ral a, khua pawh a vawt leh tawh khawp mai. Programme buatsaihtu zîngah tel mah ila item nei tùr zîngah kan tel ve lo thei lo, kan inruat tel vek tho. Kei pawh group zai tùrah ka tel ve tho, ka thiam ang chu.

Kan țang hlawm khawp mai a, zànah hla zir tùrin ka chhuak ve zauh zauh. Mi panga kan awm a, kan inah țheuh zànah a chhâwkin kan zir, a tàwpna berah kan inah kan zir a, ka thiam ve tawh khawp mai.

Pc-a lo lèn lai a ni a; mahse, ka nute nèn choka lamah an awm daih thung. Dâr 9 thleng kan zir a, thingpuite kan in hnuah an haw ta chauh.

An haw hnu chuan," Kan zai kha eng nge a an? Kan thiam ve tawh viau tiraw?" tiin ka zâwt a.

Ani chuan,"Thiam lutuk tawh, zir pawh a ngaih tawh loh kha," a lo ti awlsam êt.

"A hlathu hi by-heart a la ngai a."

"A thui hran loh kha,i thiam hman lutuk ang," a lo ti leh mai a.

Tluang takin hun chu kan hmang thei dâwn ta, zàna hmang kan ni bawk a, Mizo takin inchei tùr an ti a, ka nu puan hlui ka la chhuak a, zo thei ang bera inchei ve ngei ka duh. Pc-a ka bia a, kan inchei dàn tùrte chu phûr fahran hian ka hrilh ve a, ani pawh chuan phûr fê hian," Thla lo la țeuh rawh aw, ka hmu châk che a nia," a lo ti ve var a.

"Tehrêng mai, video nèn lam maw le," ka tih chuan," Lo kal ve a châkawm mang e!" a lo ti vang vang a.

"Lo kal ve la?"

A nui hawk." Ni lo ve, hlim deuhin i hmang dâwn nia; mahse, i mit kha mipa lamah lèn kual suh ang che," tiin min la chah leh hrâm.

Leh nge nge a.

Kan inbiak zawh hnua ka kawr hâk tùr ka zawn buai lai chuan phone call a lo kal ta hlauh. Ka han en a, number chauh.

"Hello?"

"Awmawm, Thlamuana ka nia, i buai viau em?" a rawn ti.

Thlamuana hi programme buatsaihtu zîngah khàn a tel ve. Ka hria, sawi dawt lova awmze nei fea min fiam zauh a chîng, tlangvâl fel tak chu a ni; mahse, ka duh lo, bialpa ka nei tawh tlat. Nei lo pawh ni ila ka type a ni lo tawp ang.

"Buai lo ve, eng nge ni ta?" ka ti ta vat.

Mi dang pùr tùr an buai vek avàngin min rawn pùr a lo ni, zanina kan chhang ei tùr lam belh a ngai lo niin. Ka chhuahpui leh rih, a la hma hlauh chu a tihzia khawp mai.

Motor-in Chanmari-a mi kan zu phur a, Biak in choka-ah kan dah nghâl thlap. Kan in thleng min thlah leh thlap a, ka chhuk tùr chu min fiam zuk zuk.

"Zaninah i ei țeuh thei ang, i buai nasa bawk a."

Nui sûng chung hian,"Nang pawh i ei țeuh dâwn nia," ka ti ve a.

"Ka rawn lam ang che aw?"

Pc-a ka hre chhuak zawk a, a phal dâwn lo chiang tih ka hriat vàngin," A ngai lo mai, ka lâwm e," ka ti a.

"A harsa hleinem, ka rawn kual dâwn tho a."

Ka hnial lui tho.

Mahse, chaw ei khama kan insiam zawh chuan kan kawtah a lo ding leh reng tawh! Han hnial leh chiam chi a ni tawh si lo va, duh vak lo chung chuan ka chuang ve ta hrâm.

*MIN CARE ÊM ÊMTUTE HI KAN TINA FO A, MIN CARE MIAH LOTUTE VÀNG HIAN KAN NA FO THUNG*

☆SUANGTUAHNA NEITU☆ - 8 By Dingdi Pachuau

Kawnga kan tlàn lai chuan min en zak zak pah chuan min fiam zauh zauh a, kei pawhin a inthuamna chu kâwkin ka nuih ve tho, a inchei hmanlai thiam phian asin.

Kan biak in Hall kan thlen chuan an lo awm țeuh tawh niin, kan pahniha kan inzui lût chu min lo en duh khawp mai, kan incheina vàng a nih ka ring a; mahse, țhutnaa kan țhut dun hnua min rawn en dàn hlawm chuan awmzia a nei, Thlamuana nen min dem bel dâwn, min fiam leh nasa dâwn chiang lutuk!

Programme hlimawm tak kan hmang a, tu pawh mai chu âwl bík awm lovin tih tùr chanpual kan nei vek, kei pawh nasa tâwk tâwkin ka zai, a hla thu kha ka thiam bel vek tawh tlat a.

Ka phone chuan thla ka la ve nasa khawp mai. Pc-a thawn atân ka duh alawm, a hmuh hunah chuan a nuih a za ve khawp ang. A hmuh hun tùr ngaihtuah chuan ka nui sak sak a.

Kan bâng hma thei lo, a tàwp lamah request programme hmangin kei pawh zak chung chungin ka mawng hmang ngei maiin ka hming ka'n ziah kha, khûk chem chema khûk ral daih ka châk lutuk.

Zàn dâr 10:30 pelhah kan bâng ta țâwk. Thlamuana motor-ah bawk ka chuang leh; mahse, mi dang pawh an inhnawh ve țeuh tawh a, kan pahnih chauhin kan ni tawh lo va, a zia e.

In ka thlena mu tùra ka inpeih meuh chuan ka phone sana chuan dâr 11 a ni tawh tih min hrilh. Pc-a text nân chuan a tlai tawh mah mah ka tih vàngin ka text ta lo mai, naktûkah ka text ang a, thlalâk pawh ka thawn mai ang.

Ka muthilh hmain zanina ka thlalâk chu en kual lehin kan hun hman dànte chu ka ngaihtuah kual leh bawk a, a hlimawm ka ti, ka dam țha ve viau bawk si a.

Zînga a hmuh atân tal tiin ka thlalâk chu ka thawn ta tho, ka selfie-na vek a ni. Ka bul vêla mipa lo lang awmna erawh ka thawn tel lo, a lo thîk leh ringawt palh ang.

Zîng ka thawh veleh ka phone chu ka en vat a, a message hmuh ka inbeisei bâkah ka thlalâk a comment dàn ka hre châk lutuk a.

Mahse, hmu vek tho siin a rawn comment lo va, message a hnutchhiah hek lo. Mak ka ti deuh hlek, tunah dâr 7 a pèl tawh a, a la tho lo ang ti dâwn ila ka message a 'seen' vek bawk si. Ngaihțha vak lo chuan ka tho chhuak a, nakinah ka phone chhin ang, ani hi a lo dam țha lo pawh a ni maithei asin.

Chaw ei hma deuhin ka call; mahse, a ring miah lo. Engtizia nge ni ang aw? A battery a low lutuk ang a, switch off-in a charge pawh a ni maithei a ni.

Chhùn lamah pawh chuan call tumin ka hman veleh ka tum chhin zêl, a tlang thei lo zél, a ni êm êm tawh lo. A phone a chhia a nih loh tal pawhin a thi hmak a niang.

Amah hian min rawn call a tum dêr mang lo a niang, a chhûngte number ka hre bawk si lo. Hria pawh ni ila ka call ngam kher chuang lo ang, rilru nuam vak lo chuan ka nilêng ve mai.

Zàn lamah erawh ka mut dâwnah min rawn call ta, phûr zetin ka lo chhâng vat.

"Hello?" pawh tibuai peih lo chuan," Engtizia nge ka phone tlang theih miah loh che a?" ka ti nghâl tâwng a.

A reh deuh vung vung a, ka ngaih a ti țha lo hman țêp ang tihah chuan," Eng mah sawi tùr a awm tawh lo, kan tàwp ni rawh se, i tlangvâlpa chu i nei thei ang," a rawn ti ta hmuk a.

Eng thil nge ka hriat hi?!! Ka hre sual lo tiraw? Engtizia nge chutiang thu chu min hrilh ringawt a?!!

"Zêp a ngai lo, i ngawih reng dànah khân thu dik tak a ni tih ka hre thei bawk, ka hmu dùn bawk che u. Min rawn call buai a ngai tawh lo ang," tiin phone chu a hmet tàwp hmak mai.

Ka hre thiam lo lutuk ringawt! Che lovin ngawi rengin rei fê ka awm dàn ngai chuan ka awm reng.

Tikhân kan tàwp maw?!! Eng vàngin maw?! Ka ngaihtuah kual nasa.

'I ngawih reng dànah khân thu dik tak a ni tih ka hre thei bawk' a ti em ni kha? Eng thu dik nge? Eng lam nge sawi a tum ni ang le?

Ka hre thiam lo lutuk!

Call ka tumin a theih loh zêl. A thil sawi awmzia kha ka hre lo lutuk si a, hetia kan inkâr a titàwp ringawt mai pawh hi a awmzia tak hriat fiah phû ka inti ve asin, a ni lo'm ni? A ngaihna ka hre thlâwt lo a nih hi.

Min block a ni ngat mai. Hmeichhiate chauh hian mipa hi an block țhin emaw ka tia, mipa pawhin hmeichhiate hi min lo block ve țhin tho a lo nih dâwn hi.

Krismas nuam lo zetin ka hmang, ka pian ahnu lama ka la hman nawm loh ber kum a ni hial ta ve ang; mahse, ka fianrial tam thung. Pc-a vàngin hlim lo viau mah ila Pathian hmaah ka inbun ruak nasa a, kawng lehlamah chuan min țhen thut hian min țhâwng viau mah se Pathian ka be tam a, ka hlâwk phah viau tho.

Nawm lohna ka nei leh țhin, Pathian pawh ka kar nasa, ka taksa natna hi min lâk kiansak tùrin ka dîl ngawrh viau. Mite hlim tak leh hrisêl taka an lêng ka hmuh hian ka awt țhin, taksa dam țha ver vawr neiha duh tâwka han tàl ve hi ka châk țhìn.

Mahse, țûl a ti ngang lo a niang, kei aia dam mamawh hi an tam lutuk miau si a ni. Kei chu hrisèl lohna eng emaw ka nei a ni ve mai a, ka duh duh ti theiin ka la awm a, ka duh duh ka ei thei a, ka zung theiin ka e thei bawk, harsatna awm miah lovin, chubâkah, nî tin a tharin ni thar duhawm tak ka hmuin nu leh pa min hmangaiha min duat êm êmtu ka la nei cheu. Hêng hi a malsàwmna ka dawn vek a ni, kei hi ka lo duhâm lutuk a lo nih hi.

Tuna ka chan tâwkah hian ka lung a awi tùr a ni, ka chunga thil thleng zawng zawngah pawh. A chhan chu Pc-a min pe a, ani hnên ațang hian ngaihzâwng induhna leh inngaihsak tawnna nawmzia leh hlutzia ka hre thiam ve a, ngaihzawng neih nawmna leh ințhen hnua rilru hrehawm theihzia ka hre ve ta bawk, hringnuna thil thleng țhin tam tak ka zir chhuak thar țeuh a ni.

Khaw vâwt lutuk avàng chuan ka chhuak ngai lo, inkhâwm tùr pawhin ka chhuak zen zen lo. Ka ruh a na ngut ngut zêl a, mi zînga awm ka inthlahrung, inah heater leh tuilum ip nèn ka țang dùn a, chutiang chu ka nî tin hun hman dàn chu a ni deuh mai.

Ngaihtuahna kal ding lutuk tùr dan nân lehkhabu chhiar tùr ka dap țhìn a, ka zirlai ka zir loh chângin lehkhabu țha ka chhiar mai zêl. Ka pa hian lehkhabu țha a ngah a, Pathian thu lam te, GK lam te leh chanchin ngaihnawm làwrkhâwm tih te a ni nuk, novel lam erawh a nei lo a niang ka la chhiar miah lo.

Melo-i pawh a bialpa nèn an ințhen a, group-ah chuan kan hnèm tliar tliar, kei pawhin ka hnèm ve. Ka chanchin erawh ka sawi ve duh lo, min hnèm ang a, awmzia a awm vak dâwn chuang si lo va, hetia mahnia tuar chhuah mai hi ka duh zâwk a ni.

January thla a ral a, Pc-a chu a reh vang vang reng. Call ka tum buai peih tawh lo, ka call tlang thei chuang si lo va, bâkah, ka biak a duh tawh lo tih a hriat reng a, chuta kâra biak tum ve chhên pawh chu thil țha ber pawh a ni lo; mahse, thil hre chiang hmasa lova kan inkâr thu a tàwp ringawt erawh chuan rilru a tidam thei meuh lo.

Min rehsan thei a nih chuan kei pawhin ka tum ve tùr lah ni; mahse, ka lo duh hman lutuk tawh a, hriat chhuah loh tum chu a har ka ti. Lehkha ka zir dâwnin ka hre chhuak ziah a, zîng ka thawh veleh ka ngaihtuah chhuah hmasak ber a ni bawk a, chutiangin zàn ka mut thlengin, a har êm a ni. Ni tinin a message dawn ka inring a, ka nghâk ru deuh reng a, min rawn call erawh ka ring pha lo thung. Message tal chu ka la beisei fan, ka beisei sâng viau a ni. Ka rilrua ka beiseinate hi hre ve phei se chuan, min nuihzat thei ngawtin ka ring!

February thla a lo inher chhuak leh ta, ka nute pawhin kan inkâr a tàwp tih an hre tawh a, eng vak sawi lo mah se ka tân an țawngțai țhin. Ka pa chuan ka tâna Pathian ruat chu a lo lang ve leh mai ang a ti a, ka nu erawh chuan Pc-a theihnghilh thuai chu ka tân a țhat ber a ring thung. Ka nu leh pa hi ka zah êm êm, ka hrisêl lovin ka țawp si a; mahse, an phun ngai lo. Ka tân bâng lovin an țawngțai țhin, ka nu phei chuan ka taksa damna tùr min dìlsak ziah.

Inentîr tùra ka nu nèn kan chhuahin tum loh deuhin Pc-a chu ka hmu thut mai! Ani erawh chuan min hmu lo ang, a chhan chu a rawn hawi ve tlat lo. Rickshaw-a kan chuan laiin a nia, kawng sîrah nula pakhat, chêr lam deuh nèn an lo ding dùn a, nula thu sawi chu ngun zet hian a lo ngaithla.

Ka thin a phu dawt dawt! Min rawn hmu ang tih ka hlau lutuk ringawt, ka hmui ka hup vat a; mahse, vànneihthlâk takin ka ti dâwn nge, a rawn hawi ve lo hlauh!

Ka thinlung chhûngril natzia hi a hre thiam phâk ang em le...!!!

Kan tlàn pelh hnu chuan ka thinphu chu ka dawm deuh vang vang a, ka ngaihtuah zui ta. A dinpuinu chu a bialnu a ni ang em? A va nei hma àwm ve..kan ințhenna kha a la rei lo êm asin, kei phei chuan nî tin a hming ka la lam reng a, a tân ka la țawngțai ziah. Ngaihzawng lam ang tùrin Pathian hnênah ka thlen lo, a nunin Pathian a lo hmuh ve theih nân ka dìlsak zâwk țhin asin.

Ka ngaihtuah ngut ngut mai a, ina kan haw hnuah pawh ka ngaihtuahna ata ka paih bo thei tlat lo. Ka mitthlaah an lo lang zêl, ka taksa natna hi chu ka tuar țha tawh a nih vàngin engah vak ngai lovin ka dah țha thei mai a, ka rilru lam nâ erawh hi chuan min vaw chau takzet.

Ka taksa chak tâwk loh avàngin ka taksain a tuar a, doctor-in damdawi leh ei tùr țha tak tak min chawh țeuh chu kan lei haw nghâl a ni a, ka nuin min siamsak nghâl chûk chûk a, ka nu ka zah êm avàngin ka ei lui, ei erawh ka va châk lo tehlul êm!

Ka khumah chuan ka mu chàwl vang vang a, ka thil ei hlek chuan ka luak a ti chhuak hialin ka hria. Ka pum a let but but a, ka chil a rial nasa nain luak lo tùrin ka insûm țàng țâng. Ka hmui ka hup char char a, a hnu deuhah chuan a zia ve ta.

Ka maimichhîng vang vang a, ka mitthlaah chuan Pc-a leh nula ding dùn bawk chu a rawn lang leh ta, duh lo teh mah ila ka mitthla ațang chuan ka nuai bo thei si lo.

Ka phone chu ka khàl reuh reuh a, ka va call chhin dâwn em niang? Ni lo, ka call theih tawh loh kha. Call thei pawh ni ta tehreng ila min chhâng duh chuang tawp nâng!

Fb lamah ka han lût a, kan inhriat țanna kha Fb ațang ngei hian a ni lo'm ni kha. Ni tak e, hetah hi chuan min block lo ang. Ka va text chhin teh ang.

Eng nge ka va sawi chuan ang? Min reply loh phei chuan a zahthlâk duh ngawt ang.

Eng chu maw ka va sawi ang?

Ka ngaihtuah rauh rauh a, hmm, ka hre chhuak, min țhen chhan dik tak kha hrilh fiah ve ka phû asin, kha ngei kha ka zâwt ang. Ka va beisei leh dâwn tihna ni lovin thil awmzia, thu dik tak ka hre duh a ni mai.

Messenger lamah chuan ka lût leh a, a lo online nghe nghe, a lo hring vât mai.

Ka thin chu a va phu nasa tehrêng ve!

*Pc, khawngaih takin, thil awmzia hi min hrilh hrâm teh*  tih hi ka va thawn a.

Min block lo va, a hmua a chhiar ngei bawk tih ka hre nghâl e, engtin tak min rawn chhâng ang maw? Ka thiphu ri chuh, a ri dup dup nia maw le!

Min chhàn hun chu ka nghâk, ka zâm
êm êm mai a nih chu! Ka bialpa ni leh tùrin ka va sâwm pawh a ni lo va, chutia ka han zâm êm êm mai chu mak ka inti zâwk!

*Eng thil awmzia?*  tih tê hian min rawn chhâng.

Hm, ka hlawhtling tho. Min rawn chhâng tal alawm, hre thiam lo der mah se ka zâwt chhuak tho ang. Ka tuang ka tichhah lui ve tlat a.

*Kan inkâr a tàwp chhan kha maw le, hrilh fiah chu ka phû vein ka hria*  tiin ka rilru dik tak chuan ka chhâng lêt.

Hrilhhriat hi ka phú ve asin.

*Thlamuana sakawr i ni lo'm ni?*

Chu thu ka han chhiar zet chuh, mak ka ti ngang mai!!  Thlamuana sakawr. Engtin nge chutiang chu a nih theih??!!! Tu sakawr mah ka ni lo, ka nu leh pate fanu ka ni, sakawr ka la ni chhin ngai lo.

*Ka va hre thiam lo ve...* tih ka thawn leh.

Ka hre thiam lo rêng a ni.

*I hre thiam lo 'DER' a nih chu!*  tiin min rawn chhâng.

A thîkthu chhiatzia leh a țawngkam mawi loh theihzia chu ka hre ve tho, ka hre thiam lo der lo va, ka hre thiam lo tak tak a ni zâwk.

*Khawngaihin, neih lêt che ka tumna a ni lo a nia; mahse, ka hre thiam lo tak tak a ni*  ka la tilui ve zêl.

Min chhâng dâwn tawh lo emaw ka tih hnuah chuan a message pakhat a lo thleng ve leh ta.

*Ka thîkthu chhiatzia i hria. Khati chung pawha kha pa status-a i thlalâk hlîr mai hmuha 'ka hmangaih♥️', 'My horse' tih leh 'Tu man min chuhpui thei lo ang, ka tâ a nih hi' tih vêl han hmuh chuan bum ka lo awlsamzia ka hre chhuak maw le! Thla la dùnin a motor-in lèn pawh in lêng dùn a ni lo'm ni? Nula fel tak pawh hian lem an lo chang thei tho tih ka hre chhuak tawh a*  a rawn ti duah mai.

Hm, Thlamuana nèn Advance Krismas kan hman dâwn nîa chawhnu tlai ve deuh tawh taka chanmari-a chhang kan zu la kha min lo hmu a ni ngei ang chu. Chuan, status a sawi khi chu WhatsApp status a ni ngei ang, Thlamuana number hi chu ka save miah lo, ka țhian a ni lêm lo va, save kher kha țûl ka ti lo a ni. Lo save ve ta ila a status a sawi khi ka hmu ve ang em le? A fiamthu mai mai pawh a ni thei tho asin, a uang kual vêlin ka thlalâk a hmang kual vêl mai mai a niang.

Kan ni țha leh dâwn pawh a ni chuang lo va, chuvàngin, thu dik tak hrilha theihnghilh vang vang ka duh.

A message ka thawn tùr chu uluk taka ngaihtuahin ka ziak ve ta a.

A hmuh hunah chuan min ring chhe lutuk tawh bîk lo ang chu maw. Min ngai lêrh lutuk a, mipa lak ațanga ka inthiar fihlìm ve hrâm hrâm țhin nèn, a lakah chuan eng tihna mah ka lo ni lo a niang e...

Ka muthilh theih loh avàngin damdawi ka ei ta ringawt. Ka taksa nat vàng pawh a ni lo, muthilh ka duh a ni tawpmai, rilru leh taksa hahdam taka muttîr ka duh ber mai.

Zîngah ka harh har khawp, min rawn kai tho bawk si lo nèn, dâr 8 dâwnah ka tho. Ka nu eirawng bàwl sa hlîr mai tui ti takin ka ei leh dâwn a nih tâk hi.

Dâr zât ena ka phone sana ka en chuan messenger noti lo awm vàng chu ka hmu nghâl. Rin ka nei nghâl vat, a dik pawhin ka ring.

Pc-a a lo ni tak tak! Ka thin a phu leh dup dup țan.

*I dam țha em?* tih tê hi a lo ni. Ho hmel deuhin a lang a, ho lo ka ti riau. Tukin zîng dâr 3-a a rawn thawn a la ni zui, a meng rei àwm hle a ni.

Ka chhâng ang nge chhâng lo ang aw?

Chhàn a pawina a awm chuang nâng, chhâng mai ang.

*Ka dam țha e, ka lâwm e*  ka ti deuh thlap, over min ti ngawt ang!

Nilêngin ka rilruah a message mawlh chu a awm leh ta,ka dam țha em tih min zâwt ringawt a nia, han lâk special riau tùr a awm hran lo; mahse, rilru erawh a luah viau si. He pa hian min tihrehawm viauin hre mah ila min tihlim thei hle bawk si, chu a message pakhat tê chuan min tihrehawm miah si lo.

*Ka âwih lo, ka mumanga ka hmuh chein i dam țhat loh thu i sawi tlat*  tih message a rawn thawn leh tawh!

Min la ngaihtuah ve viau a ni thei ang em? Ni lo, bialnu a neih kha.

Hm, a bialnu a ni ngei tih ka hre hauh lo, an dung dùnin an țawng dùn mai chauh a nih hmel kha. Amah angin thil ka zêldin thei lo ang, a țha lo lama zêldin chuan thil țha lo tak a thleng thei tih a taka tawngtu ngei ka nih hi.

Ka zêldin ve lo ang.

*I zêldin thu bàwl mai mai a nih chu*  ti chiah hian ka va chhâng.

*Thlamuana sakawr mah ni la, damlo tùr chuan ka duh miah lo che a nia*  a rawn ti leh.

A thil rawn tih dàn kher kher chuh, ka au vak lo chauh! Thlamuana sakawr ka ni teivet lo, tu sakawr mah ka ni lo!

Ka text tawh lo ang.

*'HUN KA NEI LO, KA BUAI' I TIH RENG MAI CHUAN HUN I NEI NGAI LO ANG A, I BUAI RENG BAWK ANG*

☆SUANGTUAHNA NEITU☆ - 9 By Dingdi Pachuau

Zàn ka mut dâwn hnaihah chuan damdawi ka ei a, chutih lai chuan current a rawn thim thut, a va thim țha kher êm!! Ka phone awmna chu ka rin dap tawp a, ka zawng rei lutuk lo ve.

Ka han ti êng a, messenger noti a lo awm leh vàng tawh!

Ka chhiar ang a, ka chháng lo ang.  Thlamuana sakawr min tih chhûng chuan ka chhâng ngai tawh lo ang.

Current chu a rawn awm ve leh mai bawk a, khuma țhu thla pah chuan message chu ka han chhiar a.

*Han insawi fiah ve teh*  tih zawng hi a lo ni.

Eng atân maw? Insawi fiah a țùlna chhan ka hre tawh lo, min țhen chhan ka hre ve tawh tho, kha pa Thlamuana kha a thîk vàng lek a nih kha. Kei hian insawi fiahna tùr ka nei lo, rinthu a kalpui vak chhûng chuan inlaichìnna țha kan nei thei ngai lo ang.

Ka chhâng lo, ka luhlulna a cho chhuak ve leh tlat tawh thung.

Thlamuana'n status-a min hman vàng mai maia thu chiang pawh hre hawt lova min ţhen a duh a, min zawh chian ve phawt tùr a nia. Ani Thlamuana lah lo ngaizawng ve deuha lo sawi ve deuh chu ni ila ka hre thiam, a lak ațangin ka inla hrang ve hrâm hrâm a, min thîk hlauh vàng chiahin. Thu dik hre hmasa lova thîkthu vànga ințhen rum rum duh ziah hi ka ngaizawng tawh bîk lo ang.

Ka chhàn duh miah loh avàng chuan a beidawng ve deuh a ni maithei, min rawn text tawh bîk lo; mahse, zînga ka thawha phone ka en chuan a message a lo awm leh rân tawh tho.

*Insawi fiah ve tal la?*

Ni lo ve, insawi fiahna hun min pe duh hauh lo a nih kha. Mi sual ber pawhin thiam thu sawi hun chu a nei ve țhìn, kei chuan ka nei hauh lo a nih kha.

Ka insawi fiah pît ang!

A lo beidawng awzawng lo mai! Min rawn message ta zut mai, ka chhâng chuang lo nain ka chhiar ziah thung. A message pakhat erawh chuan ka mit a la ta deuh, ka thin a tiphu deuh dut dut, ka chhiar nawn leh a.

*Ka rawn lêng dâwn, ngaihdam dîl tùr chein, thu dik tak ka hre tawh* 

tih hi a ni a. Kha maw, thu dik lo chuan a daih rei lo rêng asin, hlim leh lâwm taka Krismas hmang dùn ve thei pawh a thîkthu chhiat lutukna avànga a mit a del vàngin hun kan hmang dùn thei lo va.

Ka rilru a hlim viau nain ka huphurh deuh tho. Min hmuh huna chhia min ti tùr chu ka ngai ngam lo deuh, ka chêr tawh a, a hma ang khân ka khal tawh si lo. Chubâkah, amah vànga chhe ta viauah min ngai ang tih ka hlau bawk.

Lo lêng rawh se, ka lo be țha hâwrh lo ang.

A lo lêng tak tak! Pângngai takin ka lo chhàwn ve tho nain ka lo làwm hâwrh lo, mak chu min ti ve maithei a ni.

Ka nu a fel a, a lo chiauau peih deuh. Ka pa erawh chuan lehkhabu a chhiar leh tawh a, a lo țawng ve lo.

Khami zàn ațang khân zan tin deuhthaw a lo lêng leh ta, ngaihdam min dîl mawlh mawlh, tlêm chuan ka induh khum ve nain ka duh ber kha a ni miau mai si a, tuin nge a duh tak chu hnarin ngaihsak lo reng thei ang le?

Kan inngeih leh hnuah chuan thil awmzia chu a sawi a, Thlamuana khân a țhiante a lo tih fiam kual vêl a lo ni a, chu chu amah Thlamuana kâ ngei ațanga a hriat dàn a ni.

"Ka hnek bur lo chauh a ni, khatianga i thlalâk a status-a a lo hman ve vàng pawh khân hnek a phû a; mahse, hnek ta ila i thin a rim àwm si a, chu vàng chauh chuan ka hnek lo mai mai a ni, nang pawh i thlalâk a hman vàng chuan i thinrim lo em ni?" a ti duah a.

Thlamuana nèn hian kan inbe tawh lo hrim hrim a, khami zàn Advance Krismas kan hman zawh hnu ațang khân. A number ka save lo va, ka huat viauna chhan tur ka hre lo. A fiamthu a ni ve mai a, han thinrim viau kha a țûl ka ti lêm lo, hun kal tawh a ni bawk a, theihnghilh daih ka duh zâwk.

"Theihnghilh zâwk ang," ka tih chuan," Amah vàngin alawm kan ințhen le, ka thin a tirim a nia," a la ti zêl a.

"A thuhrimah, i thîkthu hi a chhe lutuk a, mipa dang pawh ka kàwmin ka be ngam hlei nem, ka pa pawh hi i la thîk hialin a nia ka rin ni," ka tih chuan a nui vur vur duh chauh!

"Nia, ka pumbilh duh che alawm," a ti.

"Nula i dinpui pawh ka hmu ve tho, i bulah ka sawi buai lo. Eng emawah te chuan han titipui châng pawh a awm ve ang a, bike emaw motor emawa han inphurh châng pawh aawm ve ang, thîkna tùr hi melh reng loh tùr," ka ti leh a.

"Min thîk ve lo em ni?" mitko sàn ãk a a tih chuan,"Nangmah anga thîkthu chhe lutuk nih ka duh lo alawm, țûl lovah buaina a tam duh," ka ti ta khauh mai.

"Min duh tak tak lo tihna a nih chu!"

"Duh lo che ila i bialnu ka ni dâwn em ni?" ka tih chuan," Ni leh bawk si," a ti leh lawi a. Inrual chiah ni mah ila a châng chuan kei aia nau daih ang chiah rilru hi a pu ţhìnin ka hria.

"Thlamuana sakawr i ni tak tak ang tih ka hlauhzia chu a!"

Ka ngawi ta hmak. Țawng leh tùr chuan min thlêm rei ve khawp mai, khatianga sawi ka duh lohzia kha a hre reng si a, ka ngei ve thlâwt!

Kan han inzui țha leh chu min duat thiam ta khawp mai. Min ngaihsak a, min ngaihven êm êm reng mai. Kei pawhin ka theih tàwpin ka ngaihsak ve a, eng emaw han inhnial deuhna kan neih ve pawh ngawih hun a hre thei khawp, mak ka ti țhin. Kei lah ka hrisèl țhat loh avàngin ka rilru a na hma ta riau a, ka thin a chhe thar ta riau bawk. Chuvàng chuan eng emaw deuh hlekah chuan ka tèr at zêl mai a, chutih hunah chuan ngawih a chuh ta vat țhìn. Ka thiam lohnaah pawh ka pàwr ta țhìn a, ngawi rengin min lo en mai zêl, a ngawih daih si chuan thinrim reng thu a awm si lo, ka thinrim a reh hnuah zaidam takin thil awm dàn min hrilh fiah chauh țhin.

A nungchang a thlâk ta riau hi mak tiin ka ngaihtuah ru fo. A hma kha chuan a thinchhe hran lo nain a zaudam lutuk bîk lo a nih kha, tunah hi chuan mi zaidam tak a ni tlat tawh.

"I zaidam tawh e, a mak ka ti."

A nui var var a,"A ni maw? I thin hi a chhe reuh tawh sia, kei ka zaidam mai loh chuan kan inkâr a chhe ringawt dâwn asin," tiin a la nui var var.

"Ka awm dàn hi ka hre thiam bîk chiah lo, heti êm êma ka thin a chhe ta mai hi."

"Ka bulah i awm tam tawh lutuk a, min chhùn zo tawh a nih kha," a lo ti mai a.

"Ka sim deuh chu a ngai a ni tiraw? Nangin min lo dawhthei ta hlauh a. Kan ințhen lo mai a ni. Ka lâwm e aw," te chu ka ti leh rih a.

"Ka kalsan tawh dâwn lo che, làwmthu phei chu sawi lo teh, ka thil tih sual ang kha ka tisual nawn tawh dâwn lo, hremhmuna awm leh kha ka duh tawh lo a ni," a ti sap sap a, duat zet hian min kuah bawk a.

Ka dam țhat châng a awm a, nuam ka ti ve hle țhin. Ka dam țhat hian a daih rei lo thei êm mai pawh a, chuti chung pawh chuan a hlim thei ang berin min siam ka ti mai, ka damlohin min rawn awmpui ziah. A hman thei bawk a, kan inah hmuh tùr a tam khawp mai.

Ni khat chu ka nuamsam lo lutuk a, khumah ka mu nghe nghe. A rawn kal leh ta ngei a; mahse, ka nawm loh êm avàng chuan ka tho chhuak peih lo. Ka room-ah chuan ka nu nèn an rawn lût a, ka nu chuan thingpui sen dal deuh raih hi thingpui inna no chuan a rawn châwi lût khu vang vang a.

Pc-a chu ka lo nuih sak a, a za lo kher mai. Ani pawh chuan min nuih ve sakin,"I peihsam lo viau a ni maw? Damdawi i ei tawh em?" tia min zâwtin ka khumah chuan a rawn țhu ve nghâl a.

"Aw, ei tawh, min chhâwk har taqh khawp mai," ka lo ti sap a.

"I eng lai nge na ber a?"

"Ka hre chiah lo, ka na vêl vekin ka hria," ka ti. A ni chiah alawm, khawi lai ber nge nâ ka hre thiam lo, ka khawsik chuan ka taksa a tina vek ni berin ka hria a ni.

Nilêngin min awmpui a, ka chàwn leh ka bânte chu min hmehsak a, a theih ang ang chuan min enkawl ve niin ka hria. Rawn kal lo se chuan hrehawm ka va ti dáwn tak! A titi zauh zauh a, kei ve thung chuan ngawi rengin a hmel chu ka en leh vang vang țhin, ka khawngaih tlat zu nia.

"Min țhen daih ta che."

Ka kut min hmehsak lai a nia, chutia ka tih tâkah chuan a che lai chu a tàwp chiang lutuk ringawt! Min rawn en nghâl vat bawk.

"Eng maw?!!"

"I hriat kha, min țhen daih rawh ka ti."

"Hre lo angah min ngai rawh," tiin ka kut chu a hmeh chhunzawm leh a.

"Ka ti tak tak! Ka hrisèl lohzia chu hei, i hre chiang tawh viau alawm. Ka dem lo ang che, ka ngenna angin min pawmsak zâwk ta che," ka ti leh sap. Ka rilru tak tak a ni, ka hrisêl si lo va, min țhen daih se, min theihnghilh daih se...

"Nang kalsan tùr che hian min ti lo hrâm ang che, ka ngèn a che. I dam leh vat dâwn alawm, engah nge i beidawn a? I dam țha vat dâwn," a lo ti vat a.

Engmah ka sawi ta lo. Hrisèl țhat hi ka châk ve hliah hliah tawh, heti tak maia ka hrisêl lo chho ta hi mak ka ti, thil tihsual eng emaw tak ka nei a nih ka ring ta rum rum mai.

"I dam țha thuai mai ang, thil țûl lo ngaihtuah vak vak suh. Sual viau mah ila kan duh kan dìl tlat chuan Pathianin min chhâng țhìn an tih kha," a ti sap a.

"Min țhen daih mah la ka dem hauh lo ang che," ka lo ti ve thung.

"Ka țhen dâwn lo che, i țha leh thuai dâwn bawk."

Ka dam chho ve leh mai bawk. Hrisêl tak nih hi chu ka va châk tak, ka țawngțainaah pawh ka thlen ziah, min chhâng dâwn lo a niang, nge kei hi ka beidawng hma lutuk zâwk? Kei aia natna hrehawm lutuk tuarte ka ngaihtuah chhuak leh zawr zawr a, ngaihdam ka dïl leh țhin bawk.

Kan zirlai chu kan exam ve ve ta, kei chu ka zir nêp êm a, ka duh angin ka ti țha lo. Ani erawh chu a ti țha ngawt ang, a rilru a chak êm mai.

Vànduaithlâk takin subject hnuhnung ber exam tùra ka inbuatsaih ve laiin ka damlo leh tlat mai a, exam lui thei ziazâng ka ni lo. Ka exam neih tùr ni hma nî chiahah damdawi inah ka lût a, exam tùra chhuah chu a theih hauh loh. Mihring hi chuan kan hma hun tùr hi kan va hre lo tehlul êm! Ruahmanna chauh hi kan tih theih tâwk a ni, a hlawhtlinna erawh Pathian chan liau liau a ni, tih theih ve kan nei hauh lo.

Damdawi inah chuan ka han awm rèn ràwn a, ka nat dàn tak hi ka hre thiam lo. Ka kaw chhûng lam, ka thin bàwr vêl, ka pum chhûng lam pawh hi hi a ni tel thei tho ang chu, a na lutuk a, a tìrah chuan engah vak ka ngai duh lo, a na vak lo va; mahse, chawhnu lamah a na ta lutuk a, ka thlan a tla bawrh bawrh thei. Ka nu ka hrilh vat a, a rang arangin ka pa phone-in, damdawi inah chuan kan lût ta chûk chûk a ni.

Kâr khat chuang ka awm, Pc-a pawhin min rawn awmpui nghe nghe. Damdawi in khuma ka mu bâm min hmu chu ka duh lo khawp mai, ka khawngaih a ni. Mi dangte chuan bialnu hrisêl tak tak neiin hlim takin an nui awr awr thei a, kei ve thung hi chuan rilru hrehawmna leh rualawhna bâk a chungah hian thlenin ka inhre tlat lo. Hrehawm ka ti thlâwt a ni, tunah phei chuan damdawi inah hial ka awm tâk hi.

"Doctor-ten ka natna tak an hre thei rih lo va."

Nui sak hian," I chhuak thei țêp, vawiinah i chhuak thei tawhin ka lo ring hial asin," a ti a, hlim hmel deuh hian ka lo en hâ a.

"Tak tak maw? A va làwmawm dâwn ve tiraw?" ka tih chuan ani pawh chuan," Tehrêng mai! Ka țawngțaipui ziah che alawm," a lo ti a.

Mit khap miah lova en kar chung hian," Min țawngțaipui maw?! I țawngțai ngai loh kha," ka ti sap, ka âwih thei lo a ni.

"I damna tùr a nih phawt chuan tiin ka ti ve tawh alawm, min chhâng ngei bawk ang," a ti sap a.

Ka va lâwm tak! Ka damna dîlin a lo țawngțai ve tawh chu a ni sia, ka lâwm lo thei lo. Damdawi in khumah ka awm a ni tih pawh ka theihnghilh lek lek hial a ni.

"Ka lâwm e aw, ka làwmzia hi sawi ngaihna pawh ka hre lo hial a ni. Ka chhuah hunah làwmthu sawina hun kan hmang dâwn nia."

Ka chak thar sawtin ka hria. Ka rilruin làwmthu ka sawi mawlh mawlh, ka natna vàngin a lo țawngțai ve țhìn tawh chu a ni tak si a, chanchin làwmawm tak a ni.

Ka chhuak ve mai bawk. Ka la chak lo êm êm a, ka pum hi a puar deuh țùngin ka hre bawk. Ka hah hma khawp mai a, ka chêt deuh hlek chuan ka thaw hawk hawk lo thei lo, ka hah lutuk hman zêl.

Ka țhiante pawhin min rawn phone a, chanchin min rawn zâwt tliar tliar. Damdawi in ka awm lai kha chuan min be thei lo va, phone kha ka keng lût lo hrim hrim a ni.

Ka zia viau tih ka hrilh hlawm a, min ngaihtuah avàngin làwmthu ka han sawi tel hrâm bawk a, anni erawh chuan tih theih an neih loh avànga hrehawm an tih thu an sawi a; mahse, min lo țawngțaipui reng thu min hrilh thung. Kei chuan," Chuvàng a lo nih chiah chu damdawi in ațanga ka chhuah theih ni," ka lo ti a.

Class kal a ngai lo bawk a, Pc-a pawh a rawn lawr zut mai. Ei tùr țha țha, ka taksa tâna țha tùr nia a hriatte chu min rawn kensak ziah. Ka lâwm viau a; mahse, a chhûngte lakah ka inthlahrung ru khawp, a nu thil lei sa a rawn keng țhìnin ka ring tlat.

"A làwmawm lutuk tlat; mahse, i rawn keng tam thei lutuk a, min rawn kensak pawhin tam lo tê rawn ti tawh la, rawn ken pawh hi ngai ka ti miah lo; mahse, i làwm loh zâwng sawi ka duh loh vàngin ka sawisêl duh lo che a ni," ka ti duah a.

"I chak thuai thuai ka duh alawm. Min sawisèl duh lo chuan sawisêl lo mai teh, ka rawn kensak tho dâwn si che a," a lo ti thung.

Ka thaw hak a.

"Nia, ka sawisêl lo ang; mahse, ngenna ang deuh thungin aw niang. Thil min rawn kensak pawhin tam vak lo ni tawh rawh se aw," ka ti a.

Min en vang vang a, chutah bu deuh nghatin," A țha alawm," a ti ta boh a.

"Kan pahnihin țawngțai ang hmiang? Làwmthu sawi ni pah fàwmin," ka tih chuan," Nia.." a ti sap a.

Min hnial lo chu ka lâwm takzet. Kan țawngțai dùn thei tùr ringawt pawh chuan min tihlim a ni, ka hrisèl lohna hi Pathian hnênah vuiin min lâk kiansaka damna min pe tùrin ka dîl fo a nih kha; tunah chuan he ka hrisèl lohna hi mi pakhat tân chuan malsàwmna a lo ni reng mai si a, ka lâwm lo thei lo a ni.

Kan țawngțai dùn ta a, damna ngawr ngawr dìl ka duh lo, Pc-a tân chuan ka dìlpui zâwk a ni. Ka natna hi chu a duh phawt chuan a tidam thei chiang si a, țûl a tih hunah min lâk kiansak mai dâwn a ni. Tunah pawh damdawi in ațangin ka chhuak tawh a nia, ka dam zêl pawh ka beisei êm êm a ni.

"Min ngaizâwng hi i inchhîr em?" tiin ka zâwt ta khauh.

A ngawi kar a, ngun zetin min en reng thung.

"Thu dik takin min chhâng mai la, a harsa viau em ni? I inchhîra min kalsan i duh pawhin-"

"Ka inchhîr lo. I hria maw? Ka inchhîr lo, ka inchhîr ngai lo ang, nang hi ka tân Pathian rawn tirh i ni," tiin min chhâng ta daih!

Min chhànna chu ka rin loh lam daih a nih vàngin țawng leh tùr ka haihchham ta tlat.

"Nangmah vàngin Pathian hnênah ka țawngțai ve phah a, a hma chuan ka țawngțai ngai miah loh kha. A awm ngei a, ka țawngțaina pawh min chhâng ngei ang. Min chhâng lo a nih pawhin ka țawngțai zêl tho ang," a ti sap sap a.

A kut chu ka vawnsak a, ka thinlung a tihhlimzia hi hre thei se ka ti.

"Hei, i țawngțaina, kan țawngțaina chhànna chu kan hmu chho zêl a nih hi tiraw? Hrisèl loh pawh hi a mah min hnaihtîrtu a ni thei a, kan duh zâwng ang takin min chhâng vek kher lo mah se kan tâna a ruat kawng hi chu tu mahin kan sawisêl thei chuang hauh lo. Tunah kei pawh hi dam lovin, țha chhuak kher lo mah ila-" ka tih lai chuan ka hmui a rawn hup vat a.

"I dam dâwn alawm, chutiang sawi suh, i dam chiang ang, i dam theih nân i tân ka țawngțai tlut tlut mai ang," a ti leh sap a, a mit menga tumruhna chu chiang takin ka hmu theiin ka hria.

"I dam dâwn, khatiang lam kha chu khawngaihin, sawi tawh miah lo ang che."

Kan sawi ta lo rêng.

Ka tho kâng ve luau luau a, ka mu leh țhìn bawk a, chutiang chu ka ni tin hnà a ni ta. Ka țawngtai uar sauh a, taksa damna ngawr ngawr dìl hi fuh ber lova ka hriat avàngin damna ka la chan zêl avànga làwmthu sawiin Pc-a tân ka dìlsak zâwk țhin.

Min rawn kan ziah a, hun âwl kan neihin kan țawngțai dùn țhin. A chhûngte mitmei ka vêng tel lo thei si lo va, an in lama hna țûl thawk ve tùrin ka ti zauh zauh, ani lah chuan ka thil sawi chu engah mah a ngai hauh si lo, a luhlul ve thei a nia.

Zànah ka nuin min riahpui țhìn a, ka muthilh hnuah hian thovin ka khum sîrah mittui tla chungin a țawngțai țhin tih ka hria. Ka damna tùr min dilsak rualin engkim chu Pathian kutah a hlàn thlap țhin. Ka nu ang nu hi mite hian nei ve se aw ka ti vawng vawng țhin.

*'NAKTÛKAH KA TI MAI ANG' I TIH CHHÛNG CHUAN I NAKTÛK A LO THLENG NGAI LO ANG*