☆SUANGTUAHNA NEITU☆ - Țhen 3 - Dingdi Pachuau

☆SUANGTUAHNA NEITU☆ - 10 By Dingdi Pachuau

"Nu, ka tân hian i va inpe zo tak! I han tawh ngawt ang. Ka dam veleh ka enkawl ve char char tawh ang che, zîngah pawh keimah ka tho char char tawh ang," ka nu chu enin ka ti a.

Min rawn en vang vang a.

"Bawihte, ka fanu i ni alawm, i tân ka inpêk zawh lohvin tu tân nge ka inpêk zawh ang? I pa nèn hian kan hmangaih che a, ka fanu neih chhun liau liau i ni bawk. I damloh chhûnga ka enkawl thei che pawh hi ka lâwm alawm, ka hah rêng rêng lo," a ti sap sap a.

"Nu, ka lâwm e. Ka dam veleh ka àwl ve char char tawh ang che, Pathian zârah dam țha tùrah inngai ila. Ka dam țha leh ang tiraw, Nu?" tiin ka zâwt a.

Ka kut chu a rawn vuan a, hmangaih tih hriat taka min melhin," Bawihte, i dam țha leh êm êm ang! Pathian hnênah kan dîl reng a, kan dìlna a ngaithla reng țhin, mihring hian chhànna hi kan duh hmanhmawh êm a, dawhthei taka nghah a ngai ve țhìn a nia," a ti leh a.

Kan duh dàn ngawt hian kan dîl ve țhin bawk a, a duh dàna min chhàn hun hi nghah a ngai zâwk a ni. Dam thuai thuai hi chu ka duh alawm; mahse, mihringin tih theih kan nei hauh lo. A remruatna leh a zahngaihna hnuaia kûn vek kan ni, sawi theih ve kan nei hauh si lo. Kan duh kan thlen a, a mi chhànna nghah chiah hi tih theih kan neih chu a ni mai.

Ka hrisèl loh vàng hian ka inentîr nasa tawh ka tih kha, țawngțai dam thei leh khawih dam thei an tih pawh kan hriat theih apiang chu kan pan ni maiin ka hria; mahse, tûn thleng hian taksa damna tak tak ka nei hauh lo.

Damlo na tak tak, chhûngte kaih leh enkawl ngai, mahni pawha chaw ei thei lo leh inthiar thleng pawha puih ngai, thil engkim tihsak ngai ka hmuh châng hi chuan hetia ka la dam ve ringawt mai pawh hi a malsàwmna ka dawn a nihzia ka hre chhuak fo va, ka zak zâwk țhin, kei aia dam mamawh hi an lo tam lutuk. Kei chuan ka duh duh ka la ti thei a, tunah ka bawksawp ve ta deuh e tih a ni mai a, heti chung pawh hian nu leh pa leh bialpa, min duata min ngaihsak êm êmtu ka la nei zui, vànnei tak ka ni.

Ka damlo lutuk ni si lo hian ka awm a nuam lo reng mai a, țhut pawh ka peih lovin ka mu zel zel reng mai. Nuam lo chu ka ti ve reng; mahse, ka pum lam hi a nuam lo deuh reng zêl a, a hmaa ka inentîr khân ka Hb a hniam lutuk a, thil pawimawh hrang hrang pawh a tih theih meuh loh kha a ni a, a theih ang ang chu kan ti ve tho. Inentîr țhat a ngai khawp mai, chak țha deuh hlek ila, inentîr leh ka duh.

Pc-a a lo lang reng a, ka khua pawh a har vak lo; mahse, ka inthlahrung ru viau tawh. Ni khat phei chu a lo lèn laiin a phone a rawn ri a, a pain a rawn call niin, tih tùr a rawn sawi tih ka hre thei, bak deuh hlur hian a chhâng a, nuam lo ka lo ti khawp mai.

An inbiak zawh chuan lawm lo hmel deuh hlek a pu hian ka hria, a lung a awi chiah lo a ni maithei.

"Pc, min ngaihtuah lutuk a ni. Hei ka dam a, in lamah tih tùr țûl i neih chuan rawn lèn loh rih pawh a pawi lo a nia. Ka mamawh engkim min tihsak a, ka khawhar i hlau êm êm bawk; mahse, i chhûngte ka zah a ni, in lamah tih tùr tam tak i nei ngei àwm si a," ka ti sap. Țawngkam ka thiam loh êm avàng hian a lungawi loh phah ang tih chu ka hlau viau thung.

"Ka hmuh loh che chuan keimah ka khua a har alawm," a ti sap thung. A hmel chu a la lungawi hmel chiah loh.

Ka nuih sak a.

"Ka bula i awma ka hlim theihzia hi sawi ngaihna pawh ka hre lo, khawhar hman miah lovin min siam a," ka ti phawt a, chutah,"Ka hlimna ringawt ka ngaihtuah thei lo a ni, nu leh pa leh chhûngte nei i ni a, hna thawh a ngai ve ngei ngei bawk ang," ka ti leh. A pa kha ka zah, hetah a rawn kal ngun a, kan inngaizawng tih an hre vek bawk.

"I dam țhat hma chu enkawl che ka duh alawm," a ti leh sap.

"Ka bula i awm kher loh pawhin min ngaihtuah tih ka hria, chu chuan nasa takin min tihlim tho tho. Zànah i lo lêng ziah tho a, chhùnah tal hi chuan in lamah țangkai la ka ti," ka ti leh.

"Chu, min ning tihna a ni maw?"

"Ni lo, ka ning ngai lo che a, ka ning ngai bawk lo ang che-" ka tih lai chuan," Chuti a nih a hnu, engati nge min hnial zêl a?" a lo ti vut.

A hriat thiam ka va duh tak em!

A hnuah chuan a haw ve ta hrâm. A chhûngte lakah ka va inthlahrung tak! Ni tin deuhthaw a rawn kal ziah a ni a, ni dangah pawh in lamah thil țûl tih tur a neih ringin ka lo zâwt fo
tawh a, a pa hialin a rawn phone chuan a pawimawh viau ang tih ka ring nghâl a ni.

"Aw Lalpa, ka damna ngawr ngawr ka dîl ngam lo che, mahni hma ka sial lutuk palh ang, damlo tam tak an awm ve tho si a. Damdawi ina damlo na tak tak tuar te, damdawi ina awmna nei lo mahni in lama tuar tlawk tlawkte pawh tiamin, nangin awmpui la, an taksa natnate lâk kiansak la ka va ti tehlul êm! Natna chungah hian thu kan nei ve hauh si lo, nang engkim siama awmtîr theitu hian i la kiang thei ang tih ka hria. Lalpa, i țanpuina ka dîl a ni."

Tlai khat chu chhûng inkhâwmna kan neihnaah ka pa chuan," Bawihtei pawh i damna Pathian hnênah kan dîl fo va, a duh chuan a tidam ang che a, țûl lo a tih chuan i nei reng thei tho bawk. Tirhkoh Paula pawh kha a taksaah hlîng a pêk ve tho kha, natna kan chunga a lo thlen hian mihringte hian kan hre thiam lo țhìn a, amah min hnaihtîrtu hmanruaah hman daih tum tùr a ni," a ti dap dap a.

A dik ka ti khawp mai. He ka natna avàng hian ka țawngțai tam phah viau a, Pathian pawh ka hnaih sawt rêng a ni. Mihring hian thei ve nia kan inhriat lai hian a tel lo chuan eng mah hi kan ni thlâwt si lo va, engkimah amah kan dah hmasa ber tùr a ni tih ka hre chiang telh telh a, a hnên ațangin thil țha tam tak kan
hmuh rualin thil țha lo pawh kan hmu ve tho ang chu.

Ka dam thuai ka ring, chuvàng chuan rilru ngui takin ka awm duh lo. Pathian thil tih mak, a mite kal tlanga a lantîr țhin chanchin ka chhiar nasa țhìn. Kohhran mite țawngțaipuina ka dawng nasa hle a, rilru nguiin ka awm ngai loh phah.

Doctor hnênah kan kal leh a, ka țhat chak loh êm avàng chuan test eng eng emaw kan ti leh. Ka Hb chu tlêm chuan a lo sâng ve deuh tawh, hmasâwnna a ni tih ka hria, ka rilru a hlim leh sawt.

Dam chak viau lo mah ila ka dam țhat leh ka beiseina chuan min ti chakin ka rilru pawh a tihlim a, ngui hmel ka pu duh lo. Ka nuin khawngaih hmel deuha min en leh vang vang țhìn chu ka hmu zauh zauh. Nia, min khawngaih ve ang chu, ka nu a ni miau mai a, a fanu hi damlohnain min tlâkbuak miau si a.

Ka ril a țàm ve deuh pawhin ka thil ei a tui lo viau mai a, ei ka harsat deuh bâkah ka ei ve deuh hlek pawhin min hnawh deuh țùngin ka hria. Doctor hnêna ka natna zawh paha ka sawi chuan ani chuan,"Damdawi i ei nasa a, chuvàng a nih chu. I pumpui hi a lâwng nasa deuh a, i thil ei chu a tuirîl lam ni thei se a zia deuh ang," tiin min chhâng.

Ka thil ei ka thlâk a, thil tuirîl lam deuh chauh ka ei. Doctor thil sawi âwih deuh mai hi ka ni a, damdawi min chawh rêng rêng pawh hi ka ei zo țhak ziah, doctor sawi a nih chuan ka ring êm êm mai țhìn.

Zan khat erawh ka pum a nat deuh tâk êm avàngin damdawi inah kan lût leh ta, awm ngaihna ka hre lo țêp a ni. Ka thlan a tla bawrh bawrh a, ka thil hmuh pawh a phê deuh ruai, ka hmui ka pet fan fan.

Min chiu niin ka hre ta. Ka pum nâ chuan min ti â deuh tlat a, min chiu hnu rei vak lovah chuan ka muta chhuak lutuk, ka chau ngawih ngawih.

Ka harh chuan ka bulah Pc-a a lo țhu reng tawh. Ka kut a lo hûm rauh rauh a, ka harh a ni tih a hriat veleh a rawn hawi vat a, a mit a sen râm mai.

A nui sak; mahse, a za lo takzet a ni tih ka hre thei.

"I muhìl rei lutuk a, ka khua a lo har hman alawm," a ti sap, a aw chu a làwi deuh hlek a, a aw a thian nghâl ta rêng bawk a.

"I awmna a rei tawh em?" Ka aw chu a thâm nasa mai!

"Rei lutuk lo ve, i nuin min rawn phone a."

"Khawnge ka nute chu?" tiin kazâwt nghâl vat.

"A inphih harh lawk a nih kha, i pa erawh inah a haw rih a. Nâ i la nei em? I ril a țâm em?" tiin min zâwt ta sawk sawk a.

Nâ ka neih àwm ka hre hauh lo.

"Ka dam vek tawhin ka hria," tiin ka nui ve sak a, chutah," Ka tui erawh a hâl deuh hlek a," ka ti leh sap a.

Ka pum a nat chângin damdawi ka ei ve tak nain inchiu mai kha ka duh zâwk țhin, min chhâwk hma zâwk tlat si a. Ka nu hnêna ka natna chungchâng kazawh chuan ka pumpui lâwng a nih thu min hrilh a, a lâwng nasa ve hle a nih ka ring ta.

Damdawi inah chawlhkâr khat chuang ka awm. Ka awm chhûngin Pc-a'n zan tin min rawn riahpui ziah, ka nu nèn min awmpui a ni ber. An in a hnai a, ei tùr ka nu tân a rawn keng ziah. Kei erawh chu thil ka ei vak lo, drip kan khai a, thil tuirîl tlêm tlêm ka ei ve bawk.

"I hah tawh ngawt ang a?" ka tih chuan," Hah lo ve, i bulah ka hah thei hleinem," a lo ti thung.

" I chunga ka làwmzia hi sawi ngaihna pawh ka hre lo, ka dam veleh ka pua ang che," nui chung hian ka ti a.

"Ka nghâkhlel, dam vat vat rawh." A hmel ngui thei reuh lutuk hi ka khawngaih, keimah vàng a ni tih ka hria. Dam vat vat min tichâktu pawh amah hi a ni.

Damdawi in ațangin inah inenkawl tùrin kan chhuak a, keimahin ka nin êm vàng a ni pakhat. Damdawi in boruak hi hrehawm ka ti ngawih ngawih, doctor leh nurse fel viau mah se kan in ka ngai tawh a ni.

Ni khat chu ka room sîr tukverh chu ka nu chuan rawn hawngin," Vawiin chu tho chhuak lovin tihian mu mai mai la, towel huhin ka hru fai mai ang che aw, i tho chhuak peih àwm si lo va," a ti a.

"Nia, a pawi lo ang, ka țhut ve deuh hlek chuan ka pum hian min tihah deuh tlat a," ka lo ti sap a.

Ka nu chhuah hnuah chuan ka lo chhîng leh sek a niang, țhenawm pitar țawng lar lar thâwm chuan min tiharh a.

"...cancer an tiin ka hria, ka han tlawh ve lawk ang e," a ti lar lar.

Hm, tu tak chu a tlawh dâwn chu ni maw? Tûnlaiah cancer hi a lâr êm êm mai si a, he natna ngeiawmzia leh râpthlâkzia hi chu aw, tu mahin nei lo se ka ti, he cancer natna hian ka thi ang tih ka hlau. Ka rilru ka kàwm a, thil chi hrang hrang ka ngaihtuah kual. Vawiin chu Pc-a a lo lang lo tlat, an in bulah step an rem dâwn a ni àwm e, min hrilhlâwk vek tawh.

Ka nu chuan inlêng a nei ve ngei a nih chu. Nia, lo lêng hi an awm ve zauh zauh ta, ka dam loh vàng hi a ni ve ngei mai, mi hi an bengvâr hlawm teh e.

A hnu daiha ka nu ka room-a a rawn luh chuan," Nâ i lo nei em?" tiin min zâwt nghâl vat a.

"Nei lo ve, ka țha alawm."

" Țhenawm Pi Zîngi kha a lêng a, a beng a ngawng ve deuh tawh bawk sia, ka thil zawh leh min chhànna a inpèrsan țhìn a, ka nuih a tiza thei lutuk a," a ti leh a.

Ka nu chuan duat takin ka taksa chu a hru fai a, a bulah hi chuan ka zak lo. Ka nu a ni a, min enkawltu a ni alawm.

"Nu, ka chèr phah ve tawh tiraw?"

Ani chuan," Tlêm chuan chêr ve e, thil i ei țha lo êm a, nakinah i dam hunah i ei țha ang a, i khal leh thûr thúr mai ang," nui chung hian a lo ti a.

"Ka dam țha har tawh ka ti tak tak a ni."

Ka nu chu a ngawi deuh reng a, a ngawih tâk rengah chuan,"Nu, Pc-a hian min ngaihsak ngawt mai tiraw? A chhûngte lakah ka inthlahrung zâwk a," tiin titi dang chu ka vawrh a.

"Um, ngaihsak khawp mai, a fel êm a nih hi. Bawihte, țawng vak lo teh, i hah phah ang, zànah Pc-a a lo lêng leh àwm si a, i chakna kha lo khâwl khâwm rih zâwk teh," a ti a.

Ni dâwn tak. Ka țawng ve vak hi chuan zànah ka tuar ziah.

Tlaiah ka țhiante'n min rawn phone a, min rawn kan an rawn tum niin! Ka va hlim tehlul êm! An rawn inthurual a, an tum dàn chuan naktûk zîngah ah an rawn chhuak dâwn.

Ka tân chu aia chanchin làwmawm a awm thei dâwn em ni? Ka rilru a hlim lutuk a, ka dam nghâl vekin ka hria! Ka tân damdawi țha an nih hi, ka beisei phâk miah lo asin.

Zàna Pc-a lo lêng chu ka lo hrilh var a, ani pawh chuan hlim hmel tak chuan," I tâna mi pawimawhte chu ka tân pawh an pawimawh ngei ang, a chhan chu i hlimna thlentute an ni si a. Ka hmu châk ve hlawm tawh khawp mai," a lo ti ve. Ka hmel leh chezia ațangin ka hlim tih a hre chiang ngawt ang chu.

"An fel asin, i țhian țha tak an ni ve thei ngei ang," ka lo ti vat a.

"I tân chuan damdawi țha tak an ni tiraw? I hlimpui dàn rêng ațang hian," a ti leh a.

"Um, damdawi mûm lian an ni alawm."

"A nih, kei ve hi?"

Nuih sak pah chuan," Nang chu ka tân chuan tinrêng damdawi mûm lian pui i ni," ka lo ti ve a.

"Eng ang taka lian maw?"

"Khawvêl aia lian daih!" ka tih chuan naupan chhiatthlâk ka ti leh deuh a, ka ner sak ringawt.

Min lo hmu a ni chiang,"I va cute reuh tak!" tiin ka biang chu a rawn chûl a.

"Ka khal zâwk lo maw?"

A nui sak a, rawn kûn hniama ka chal rawn fâwpin,"Khal tho e, khal tho chungin i cute tho bawk," a ti sup a.

Chu a thu sawi chuan min va tihlim si êm! Ka țhiante lo kal tùr boruak chuan min tihlim tak zet a, Pc-a min comment-na hian a belhchhah bawk.

"Vawiinah i hah àwm sia, ka sîrah hian lo bawk ve ta che?" tiin ka sâwm a.

"Ka hah lo, ka ngaihtuahnaa i awm reng avàngin ka hah miah lo; mahse, ka lo bawk châk tho," tiin muangchâng hian a rawn bawk thla pah a.

*ȚAWNG TLÊM LA, THAWK TAM RAWH. THU ȚHA SAWI ȚEUH AIIN NUNA LANTÎR HIAN AWMZIA A NEI THUI ZÂWK*

☆SUANGTUAHNA NEITU☆ - 11 By Dingdi Pachuau

Ka țhiante chanchin chu ka hrilh ta barh barh a, a hriat hnu pawh a tam khawp ang; mahse, phûr takin, ning miah lovin min lo ngaithla tho, a fel thei a nia.

Ka țawng nasa bawk a, ka sawi zawh chuan ka chau deuh nghulhin ka hria. Ka ngawih deuh vang vang lai chuan," I hlim avàng khân i titi tui si a, ka khap duh lo na chein i chauh phah ka lo ring rêng a," a ti sap, ka bân chu a chúl zai zai pah a.

Ka nuih deuh sak a, ka thaw leh hlè hlê mai.

"I țhiante lo thlen hunah pawh țawng lamah i insùm thiam a ngai ang aw, i hlim êm avàngin țawng vak vak chuang lo la, i dam chian var hunah chauh țawng vak vak lam kha chu i ti dâwn nia."

Ka melh ralh phawt a, chutah,"Ka lo țawng tam deuh a nih chuan min lo khap vat la?"tiin ka kut lehlam chuan ka pum chu ka chûl hoh hoh a.

A thaw deuh hawk a,"An rawn thlen zànah chuan rawn kal ka lo tum hran hleinem. Hun pêk che ka duh a, i hmuh lohna a rei tawh bawk si a," a ti ta sap a.

"Aih, ni lo, lo kal rawh. Hmel hriattîr che ka duh alawm, a nung chunga hmuh che an châk tehlul nèn!" ka lo ti vat a.

"Ka hnawk lo ang maw?"

"Hmm...sual chhuah tum miah suh aw,  i awm loh chuan ka țawng char char ang a, ka chau mai dâwn asin," ka lo ti thung a.

"Ni bawk si, ka ngaihtuah reng dâwn tho si che a, ka rawn kal leh thut thei tho."

Ka țhiante lo thleng tùr chu ka helhhawlh a, ka za chung mai. Zîngah ka pum chu a na leh deuh a, damdawi ei aia inchiu kha a thawh chak zâwk miau avàngin ka inchiu leh ta mai.

Nilêng mai chuan ka rilru a helhhawlh. Ka phûr, ka hlim, damlo ka ni tih pawh ka inhre lo lek lek hial a ni.

Zanriah ei dâwnah an lo thleng, ka hlimzia mai chuh! Țhutthlèngah ka lo mu zân a, an lo thlen lai tak chuan ka țhu chhuak ve; mahse, rei lo te hnuah ka mu leh tho.

Anni pawh an hlim ve tho tih ka hria. Dam țha phei ila chuan hei ai hian kan hlim daih ngei ang, kan han au chèl chúl ang a, țawng hmasak kan inchuh ngei bawk ang...

Ka ei tùr atâna țha nia an hriat an rawn lei nual mai. Thil tuirîl lam ka ei thei tih an hriat vàngin chutiang lam hlîr chu an rawn lei. Ka tân an insèn nasatzia ka hmuh chuan ka lâwm takmeuh a, làwmthu han sawi vak dàn pawh ka thiam lo.

"Țhian kârah làwmthu sawi a ngai lo," Melo-i chuan a lo ti tlat a, mi dang pawh chuan pawmpui tih hriat tak hian an lo bu nghat nghat mai.

"Ka țah in ti chhuak zâwk, ka dam vek tawh ni maiin ka hria," ka ti leh a, Hmangaihi chuan," I dam zêl ang, i dam țhat hunah erawh i rawn zin ve ngei chu a ngai tawh ang," tiin a nui deuh sâng a.

"Kan chhûngkuain kan rawn zin ang," ka nu chuan a lo ti ve a.

Pc-a a rawn lang dâwn lo tak ngialin ka hria a, anni lahin min zâwt sek bawk nèn, ka call ta nge nge a.

A rawn kal ta vat. A rawn lût chu tlêm chuan a lài ve deuh tih ka hria, nula hlîr panga laiin kan lo en țhap a ni si a, lài mah se ka hre thiam khawp mai.

A hnuah erawh a lài ta bîk lo, ka țhiante hi țawng duh tak tak niin, Angaihi'n a be thiam khawp a, nuihza siamin kan nui dar dar reng mai.

Rei tak kan meng lo, min ngaihtuah ve a. Ka tân men rei viau a țha lêm lo bawk, ka mut tam leh ka tân a țha a ni mai.

Khumah chuan Melo-i'n min mutpui. Chhuata mut ho chu duh viau mah ila ka tân a rem ve chiah si lo va, ka khum si chêt chuan mutna an phah ve a, mu pahin kan titi sar sar hlawm a.

"In inhmeh reuh e!" Melo-i chuan a ti chhuak ta phawng a.

"A lo luh laia a laih ve zia kha!"

"A fel reuh hmel khawp mai ka ti, a ngaihsak thiam phian lehnghâl che a."

"Mipa lêrh tak a ni lo tih a hriat theih nghâl, ani ang kha chu chhuah mai mai chi loh!"

Ka țhiante'n Pc-a an fakna chu ngaihthlâk hrehawm ka ti lo ve khawp mai. Mahniin ka nui sak sak, chhûngril lamah a nuam veng veng.

Ka țhiante hi ka tân damdawi an va ni tak êm! Ka rilru a hlim tlat a, natna ka nei a ni tih ka theihnghilh lek lek a ni. Ka bulah an awm chawt reng a, min kàwm pahin inchhûng chêtah ka nu an pui leh vek tho bawk si a, ka nu tân pawh a hahdamthlâk huai huai ang chu.

Ka hlim vàng a ni chêk ang chu, hun chu a kal chak ka ti lutuk! Class kal an ngaih ve tho avàngin rei tak min awmpui thei lo, ni nga lai an châm chung pawhin ni khat ang vêl chauh niin ka hria!

An haw dáwn zànah chuan min kalsan leh ta mai tùr chu ka huphurh lâwk lutuk a, ka hlim lo kher asin, nuih pawh ka nui lui hlei thei lo achhâ a ni. Ka bulah an țhu a, Pc-a pawh tiamin, anni pawhin an haw leh mai tùr chu hrehawm an ti ve tho; mahse, class an ngaihtuah ve tho si. Tunah pawh hian an țhulh rei tawh viau a ni, ka damlo min kan tùrin ni nga ngawt class an țhulh tawh,ka hlimna tùr ringawt ngaihtuahin ka chelh thiang lo.

Ka muhìl hlei thei lo va, anni pawh an meng rei. An haw tùr chu ka huphurh lâwkzia tihlan pawh ka hreh chuang lo, ka huphurh êm a ni.

An haw nî chuan ka ngui ruai mai. Pc-a a lo lêng tho nain ka ţhiante haw ta chuan ka rilru an hawpui ni ve maiin ka hria, ani pawh chuan min hre thiam tak hian min tihhlim a tum ve nasa.

Rilru a hlim loh vàng nge ni, ka pum lam lah chuan nâ a rawn chhuahtîr leh a, ka tuar leh ta ngawt ngawt mai. Țhiante ngaih nèn, khua a va vâr lo tak êm!

Damdawi inah chuan kan lût êm ta lo, kan in bul hnai deuha nurse senior takin min chiu leh mai a, ni dang zawng aiin min chhâwk har ka ti lehnghâl, ka vial ka vial mai a, ka hlauthâwng lek lek hial a ni.

Zànah Pc-a pawh haw lovin kan inah a riak ve a, zanriah ei huna ka nâ chu zàn dâr 8 vêlah chauh chhâwk tak tak chuan min chhâwk. Ka nute tih thlaphàn ka duh loh vàngin min chiu ațanga rei vak lovah chuan 'Min chhâwk ta' tiin ka insawi a; mahse, min chhâwk hauh lo.

Min chhâwk tak tak hnuah pawh chuan eng emaw dik lo chu a awm, ka luak a chhuak nghulh mai a; mahse, ka luak ngam teuh lo. Ka pum a rawn na zual ang tih ka hlau, ka tuar lui ngar ngar.

Ka zia hnuah  Pc-a hnênah khân haw tùrin ka hrilh kha a ni a; mahse, ani chuan barah a khawn hauh lo, chu mai ni lovin a chhûngte phone-in  kan ina a riah tùr thu a la hrilh sauh sauh.

Zàwi tê hian," Pc, hetiang ringawt hi a ni thei lo, keimah vànga hrehawm i tawrh ve zêl hi ka duh lo, min țhen zâwk mai teh. Ka rilru a na lo vang.." ka chàwl leh rih a, thâwk ka lâk leh hnuah chuan,"Hlim taka awm tùrin ka duh che, keimah avànga i buai ve viau mai hmuh che hi hrehawm ka ti a ni," ka ti a, ka sawi thui êm avang chuan ka chàwl leh rih a.

"Min ngaihtuah vàngin ka lâwm e, hlim taka ka awm theihna chu i bulah chauh a ni, min hnar chu tum lo mai teh."

*******

Ka damdawi eiin min chhâwk theih mang loh țhin avàngin inchiu ka ti ta zêl. Chu pawh chuan a daih rei lutuk lo. Kan kohhran mite an bengvár khawp a, min rawn kan ve deuh zut, room ațang hian an țawng hi chu ka lo hre ve vuai vuai țhin a, room-ah erawh min rawn țawngțai tùr ni lo hichu an rawn lût tehchiam lo.

A ni tèlin ka chak lo deuh deuhin ka hria, dam ka hlat hret hret ta chu a nih ber àwm hi. Mahnia khum ațanga thawh pawh ka thei ta lo chu a nia; mahse,ka diary erawh ka la ziak țàng țáng. Ka phone-ah thui lo tê têin ka type mai. Nakinah Pathian zâra ka dam chhuak a nih chuan ka nat dàn ka ziahte hian ka nunhlui min la ti hre chhuak ang a, a nat dàn zawng zawngte va hre fiah tawh dâwn lo mah ila Pathian hnêna làwmthu ka sawina hun a la thleng leh thei zêl dâwn asin.

Tûk khat erawh ka zia deuh hlekin ka hria. Ka harh ve meuh chuan ka nute pawh a lo tho daih tawh niin, inlêng kan nei leh tawh a nih hmel.

Rilruin làwmthu sawiin ka țawngțai a, meng reng chuan ka mu vang vang.

Țhenawm pitar țawng làwng láwng chu hriain ka nui deuh sak; a țawng hi hai der theih ni lul hek lo le, a lo lêng leh tawh a nih chu; mahse, a thu saqi chuan ka beng a verh zar mai, ka va nui rei lo êm!

"....ni alawm, ka fapa naupang ber pawh kha pumpui cancer a nia, ani erawh kha chu zai a nih vàng kha a ni maithei, a tuar rei lo deuh hlek. Zai dam tak tak theih a lo ni si lo va, na tak tuarin a kal tâk kha! Cancer hi chu a ngeiawm êm a ni," a ti làwng láwng a.

Cancer maw? Kei hi ka cancer ve em ni? Ni lo, a theih loh ang! Kawngka a rawn ri rak a, ka harh a ni tih hre lo se ka duh vàngin ka lo maimichhîng vat. Ka che sawn lo va, ka mut dàn ngai rengin ka mu, ka thâwk dan erawh ka thunun a ngai khawp mai.

Ka nuin zàwi tê hian min rawn ko va, ka lo chhâng chuang lo. A ding deuh vang vang a, a hnu deuhah dìm têa kawngkhàr a khãr ri chu ka hre zui leh ta a.

Ka ngaihtuahna a buai nghâl nuai mai. Kei hi ka cancer tihna maw ni? A ni ngei ngei ang. Ka natna tak hi doctor khân min hrilh hauh lo, ka zawh khân pumpui lâwng nasa ang deuh chauh khân min hrilh a, pumpui lâwng a nasat chuan cancer a ni thei chiang tih erawh ka hre chiang ngang mai.

Chuti a nih chuan kei hi ka cancer chiang a nih hi. Cancer lo chu ni ila ka dam chhoh chu a hun ve tawh viau a ni. Ka cancer chu a nasa tawh a ni ngei ang, nasa lovin zaia tih dam theih ni se ka nu leh pa hian pûk chawp pawhin damdawi in țha min panpui ngei ang tih ka hnâr tlukin ka chiang! Min hrilh duh lo va, ka beiseina tihhnual an duh loh vàngin damna thu min la sawipui hrâm hrâm zâwk a nih chiah hi.

Zûk leh hmuam ti țhinte natna nia ka hriat chu kei, zûk leh hmuam ti hauh lo pawhin ka vei ve ta chu a ni si a, mak ka ti lo thei lo. Inthlah chhàwn theih thil ni ta se, kan chhûngte, ka nu leh pate lamah cancer vànga thi an awm àwm ka la hre hauh lo. Chuti a nih chuan kei hi Cancer vànga thi hmasa ber tùr chu ka ni dâwn ta a ni.

Ka rilru a zîng mup mup a, hlauhna ka nei nghâl. Tihian, eng mah ka ei thei lo chho telh telh ang a, na tak tuarin ka thi ve mai dâwn chu a ni si a...

Ka mittui a luang ta zãwih mai. Mahni inkhawngaihna ka nei a, nula chho tìr tê ka la ni bawk si, hetiang natna nei tùr hian ka indah phal thei lo, thih ka la duh lo, Pc-a nèna hlim taka inkawm pawh ka la duh asin.

Ka mittui luang zung zung chu hrûk pawh ka tum lo, he thu hian min tina êm a ni. Cancer hlauhawmzia chu mi tin hriat a ni a, a nasa lo tân chuan a zia deuh, enkawla tih dam mai theih a ni; mahse, kei hi??

Ka en ngai ka en reng a, ka awm dàn chiah chu ka hre thiam lo, ka rilru a mumal lo tak zet a ni.

Țawngțai ka rilruah a lo awm a, ka tum nain ka thei lo, ka rilru a buai lutuk. Țawngțai pawh ni ila eng nge ka sawi chuan ang? Tih damna ka dîl dâwn em niang? Khati chen kha ka lo dîlin tihdam rawngbàwlnaah pawh ka lo kal kkual ve nasa tawh, ka dam chuang si lo, ka beidawng tawh.

Chhùna Pc-a a rawn kal chuan tlêmin ka rilru a lo mumal deuh tawh, he ka natna hi ani hian a lo hre ru ve reng ang em? Nge a hre lo ve tho? Ka nu leh pa hi chuan an hre ngeiin ka ring, ka hriat an duh lo a ni ngei mai.

Room ațanga ka nu chhuah hnuah chuan ka khumah a rawn țhu a, ka kut lain a han hmer vang vang a.

"Nizàn ka mumangah ķa hmu che a, ka ngaihzia che chu a! Min ngai a nih ka ring ve ringawt a," nui sak chung hian a ti a.

"Pc, ka cancer em?" thu danga chhâng lo chuan ka ti ta sap a.

Makti hmel a put loh vàng leh min en nghâl vat loh avàng chuan a hre tawh a nih ka ring nghâl hmiah.

"Ka cancer tih hi i hriatna a rei tawh em?" ka lungngaihna tilang lo hrâm hrâm chuan ka ti leh. Țawng pawh hi hrehawm ka ti asin, tuna ka thil zawh hlauh phei hi chu zawh loh theih ni se ka ti.

Chutah, ka mitah min rawn en a, a mitmenga min khawngaihzia chu ka hmu thei hial, chu chu en duh lovin hmun dang ka melh daih.

"Cancer chu natna pakhat hming mai alawm a nih, țha takin kan enkawl ang che a, i dam vat mai ang," a ti sap, hrehawm ka tih lohna tùrin min la hnèm hrâm hrâm chu a ni sia aw...

Ka ngawih reng lai chuan,"Ka nuin i ei châk ringin eng eng emaw min rawn kentîr țeuh a," tiin ka khum sîra dawhkàn tê lam chu a melh phei a.

A lo kal huna sawi tùra ka lo ruahman sawina hun țha tak nia ka hriat avàngin bawhpelh ka tum lo.

"Pc, min enkawlna, min ngaihsakna leh ka chunga i țhatna zawng zawngah làwmthu(ka hah deuh avàngin ka chàwl leh rih a, thâwk ka lâk leh hnuah) ka sawi mawlh mawlh. Tunah zawng min hmuh ang hian kei chu natna nei, buaipui ngai, eng mah pawh ti thei tawh lo ka ni..." ka țawng zawm thei ta lo, ka mittui a hmuh lohna tùrin ka mit chu ka khap duh lo va; mahse, ka âwmah min hnawh up up thung.

"OmOm, natna tâwk ila ka bula awm tùra ka duh ber i ni, chutiang chiah chu i nih ve ngei ka ring. I bula awm ka duh a, i natnate hi tawrh theih ni se, tawrhsak che ka duh asin," a ti sap sap a, ka kut chu a chûl hoh hoh a.

Ka âwma min hnawh up uptu a reh deuh thleng chuan ka ngawi a, ka mittui erawh a la tling kuau. A thil sawi chuan min hneh êm êm a; mahse, kei, beiseiawm loh hian chelh khawtlài ka duh lo, hlim a phú alawm. Hetia min awmpui chawt lo hian hlimna zawng se, țhalai a ni a, hlim a phû a ni.

"Beiseiawm ka ni lo-"

"Chutiang chu ka ngaithla duh lo, i dam leh thuai dâwn alawm, hlim takin kan awm dùn leh ang," a lo ti vat.

Min kalsan a tum loh hmel khawpin ka hria. Min hnial chu ka ring sa rêng a; mahse, chuvàng chuan ka beidawnsan lo ang, hlimna zawng rawh se. Kei chu ka thi thuai dâwn, kalsan hmasatu nih ka duh loh tehlul nèn; mahse, ka duh dàn hi he natna hian a hre ve hauh lo ang, min râwn hauh lo bawk chu a nih hi.

Mahse, ka duh ang chu Pc-a bulah chuan ka sawi zung zung thei bîk lo, ka lung a chhia a, bâkah, ka chau hma êm èm bawk. Ka țawng dâwn chuan ka țan viau a ngai a, ka kaw chhûng lamah lah min hnawh up uptu kha a rawn kal leh tawh bawk si a, rilru lungchhe țûnin ka ngawi hlè hlé rih tawp.

"Ka kalsan dâwn lo che, ka kalsan ngai lo ang che. Khawngaihin, kalsan tùr che hian min ngèn tawh suh aw, i bulah awm hi ka duh ber ka tih tawh kha," a ti sap sap a.

"Ka bulah i awm reng thei dâwn lo, ka thih hunah.." tiin ka ngawi dat a, ka sawi zawm ngam lo.

"Khawngaihin, khawngaih takin, chu lam chu sawi tawh lo ang," tiin a rawn kûn hnai a, a mitmeng dul deuh raihah chuan tih takzeta min ngenna a langin ka hria.

"Ka khawngaih che alawm," tiin ka insûm hlei thei ta lo, ka insût ta hraih, ka mittui tla lo tùra ka lo sùm ve țang țang pawh chu a rawn chhuak ta nguah nguah mai.

Ani pawh eng ruai chu a ni bîk miah lo, insùm a tum viau tih erawh a lang thei; mahse, keimah zâwk ka insùm theih loh hnuah chuan ani pawh a mittui a tla, ka hmaiah min rawn far koh.

"I natna hi tawrhsak theih che ka va duh tak êm!" ti vang vangin harsa zet hian min kuah a,  kei pawhin a theih angin ka lo kuah lêt ve; mahse, kuah lêt ve tùr pawh chuan thâ a va ngai nasa si êm!

Kan țap dùn. Ka natna dah țhain he pa hi ka khawngaih a ni. Ka tel lova hun a han hmang chho tùr leh mal taka a han tei rak rak tùrte, min ngai êm êm chunga ka thlàna a rawn kal tùrte chu ka mitthla lâek zut zut, chu chuan ka mittui a ko chhuak zêl a, ka lung a tichhe thar zêl.

Ka chau takzet. Cancer ka ni tih ka hriat hnuah phei chuan dam chhuah leh beiseina ka nei lo ti ila a dik ang, ka nute pawh chuan ka hre chhuak tih an hre ta thuai a, ka pa nèn min fuih sauh sauh. Ka tân an țawngțai nasa, min țawngțaina chuan keimahah taksa lamah hmasàwnna thlen lo mah se a hmaa beidawnna thinlung ka neih leh hma hun ngaihtuaha ka rilru buaina kha a chhâwk chiang khawp.

Mahse, thih hi chu ka va la duh si lo êm! Thih hi ka hlau hran taw lo; mahse, thih ai chuan dam chu ka la duh zâwk tho tho. Pc-a hi ka ngaihtuah êm a ni, ka khawngaih lutuk!

Ani pawhin min thlahthlam ngai lo. Kan in chu a in pakhat zâwk ang mai a ni, a rawn kal zut a, min fuih a, min țawngțai bawk. Hetia a puitling chho ta êm êm mai hi mak ka ti, a hmachuan a țawngțai ngai lo a nih kha. Hma a sâwn lutuk hi ka lawmpui a; mahse, lawmpui viau e ti lo chuan ka lung tichhe belhtu a ni zêl bawk si.

Krismas a lo hnai leh țan ta. Ka chau viau tawh a ni, eng mah ka ei hlei thei tawh lo, thil tuirîl takngial pawh. Thisen chaw chu a ni deuh tawh mai, ka kut pawh ka chêt thei lo lek lek tawh, ka phone pawh ka khawih an phal lo ta, ka diary pawh a tàwp chu a ni ta mai e.

A tàwp nân chiah, he ka diary hi, Pc, i lo chhiar hlauh a nih chuan ka hmangaih che tih i hre dâwn nia. Ka mipa tawn hmasak ber i ni a, min enkawlna leh khawhar hman miah lova min siamnaah làwmthu ka hrilh mawlh mawlh che, ka kut lek a har ta, ka ziak thei tawh dâwn lo, ka hmangaih ngawih ngawih che. Ka mit a phê leh țan ta...

(Helaiah hian hmeichhe chanchin chu a tàwp, a diary a ziah theih tawh loh avàngin tihian a tàwp ta a, a mipa zâwkin a ziah zawm ta thung a)

Ka hmangaih chuan natna khirh tak, tih dam theih loh, Pathian chauhin a tih dam theih tuarin a mu reng ta si. Ka hriat țantirha min shock-zia kha!!! Ka room-ah ka țhu hnawk a, ka insûm viau nain ka insûm tluan thei lo a nih kha, ka mittui hi a tla khât khawp asin; mahse, ka beidawng a, ka natpui a, ka mittui ka dang thei lo.

Lehkha ka zir thei lo, ni tina awmpui ka duh. Doctor-in hun rei a nei tawh lo a tih vàngin ni tin, dârkâr tin a bulah, amah enkawla awm ka duh; mahse, nupa kan la ni miau si lo va, ka duh ang pawhin a bulah ka awm tam thei lo.

Ni tin a hniam telh telh tih ka hmu reng, hrehawm ka va ti tak êm! Țawngțai pawh hi harsa ka ti, a chhan chu ka duh ang ka thlen hi a lo thlen ka rin loh miau avàngin, ka rinna a chak lo a niang; mahse, ka manganna hi Pathian hnêna thlen loh chuan thlenna tùr dang ka hre chuang lo.

Ka theih tâwpin tihhlim ka tum a, ka fuih ve ziah bawk. A natna a hriat tirha min han zâwt chiang phei kha chu, dâwt hrilh mai ka châk asin; mahse, dâwt hrilh ka thei si lo. He natna hi chu ka va haw tak êm!

Kan inah ka awm tlêm lutuk a, lehkha zir ka ngaihtuah ngai bawk si lo, ka nu leh pain min hau. A àwm ve tho, tu nu leh pa mah hian ka awm dàn hi an en liam mai mai lo tawp ang, an fapa hmakhua an ngaia an hmangaih a nih phawt chuan. Ka dem hauh lo; mahse, ka hmangaih hi khawhara a awm ka hlau a ni, nâ a lo tuar ang a, a bula ka awm loh laiin min lo kalsan ang tih ka hlau.

Krismas lo thleng tùr chuan ka lakah awmzia a nei lo khawp mai. Ka nghâkhlel lo va, mi zawng zawng deuhthaw hlim tak leh lâwm taka Lal piang lo làwm tùra an hmanghlel hmuh hrehawm ka ti dâwn lutuk, OmOmi lahin hlim chu sawi loh, nâ tuarin a hun a hmang chho mêk zêl a ni si.

A chau chho zêl, hrehawm ka ti. A bulah pachang takin insûm țhìn mah ila ina ka haw veleh ka țap ziah. Ka mangan lutuk țhin avangin ka țawngțai apiangin ka țap ziah bawk.

Țawng pawh a țawng peih ta lo, a nâ lah chu a na zing telh telh mai si, nâ a tawrhlaia a bula awm chu hrehawm tak a ni. A hmel leh a awm dàn ațang chuan a nâ tih hi a hriat ngawih ngawih bawk si, en loh ka duh a; mahse, a bula awm tam ka duh miau avàngin a en loh theih si loh.

Krismas hma ni chiahin damdawi inah a lût a, tunah chuan beisei a chau lehzual tawh. Drip pawh a ei thei tawh lo, a vein hmuh a har lutuk tawh. Kan in ațangin a hnai bawk a, ka kal zut. Ka nute pawhin an rawn kan ve tho, tih theih an nei si lo, min khawngaih viau ringawt, min țawngțaipui thuin min hnèm ringawt tawh. OmOmi nu leh pa pawh chuan sawi chhuak lo mah se tûn țum hi chu an hual tawh lo hle tih ka hre thei mai, doctor pawhin a sawi. Chu chuan ka thin a tina êm êm thung, tih theih lah ka nei dèr si lo.

Țqwng peih chu sawi loh, men pawh a meng peih tawh lo. A mitmeng mawi tak kha hmuh reng ka duh țhìn asin, tunah chuan chu chauh pawh chu beisei phâk a ni lo leh țan ta, ka bei hi a dawng ngawih ngawih, a chângin damdawi inațang chuan chhuakin pâwnah ka va țhu thùl, hrehawm ka ti lutuk hi au vak vaka reh thei ni se chuan nilêng pawhin ka au peih ang!

31 ni a lo her chhuak a, eng kan ang chuang lo, a hniam zual zâwkin ka hria. Naktûk mai hi Kum thar ni a ni tawh, kan tlin zo ngût ang em tih chu ka rilruah a awm, tlin hrâm se...

Ka kalsan lo a ni, engtik hunah nge min kalsan tih chauh ka rilruah a awm tawh a, ka bula mite leh doctor-te hmêlah pawh beiseina a awm tawh lo, keimah ber hian beiseina êng sêt sêt ka la nei deuh berin ka hria; mahse, chu pawh chu, min kalsan ka phal loh vàng chauh a ni. A chiang lo lutuk tawh a, a thaw hi ka en reng ziah. A kut ka vawnsak reng mai, a chèrzia tawh chu, a hmaa nula khal ve tâwk tak ni țhìn kha ruh, vuin a tuam der der ang hi a ni tawh, a kut ka vawn apiangin ka khawngaih lutuk chu ka mittui a hnai ziah.

Chhùnah kan buai ta chiah. A thâwk a rawn buai ta chu, ka buai ve vek. Ka thâw a ipik lutuk a, ka â thei dâwn hialin ka hria. Ka buai nuai nuai mai a, ka meng rim taksa chau bawk nèn, ka mualpho thei mai dáwn. Ka tlân chhuak ta vat.

Pâwnah ka va thaw kâwk kâwk, miin min en deuh hâ hâ tih pawh ka hre tho, engah mah ka ngai lo. Ka hmuhnawm vak lo ang, drug -addict pawh ka ang hial maithei a ni.

Rei ka awm thei chuang lo, ka chhush hlànin min lo peih lohsan ang tih ka hlau bawk si, ka lût leh. A thâwk a lo zia deuh hlek tawh a; mahse, beisei erawh a va chau tho si êm!!

A kut chu ka chûl ka chûl leh ta. Ka vawn lai reng hian min kalsan a tum pawhin min kalsan se ka duh, thlamuang takin a kal thei mahna.

Tlai lamah a thâwk a rawn dik lo leh ta, ka kalsan ngam tawh lo. Mi dang buai êm êm kârah chuan a kut chu ka vuan tlat, ka thlah phal lo. Ka thlah hlauh chuan kumkhuain min kalsan dâwn asin. Ka thlah thei lo, ka thlah lo ang, a thlâ a phâng palh ang.

A nu țap rî chuan min tiharh deuh kâwk. Min kalsan tawh a ni tih hrilh ngai lovin ka hre chiang ngang mai; mahse, 'mahse' ka la ti fan. Min kalsan thei lo ang, ka phal hleinem, ka phal hauh lo. Ka thu lovin min kalsan thei lo ang, kei pawhin a thu ka âwih a, ani pawh hian ka thu a âwih ngei ang.

"Tho rawh, OmOm. Tho teh, kalsan che ka duh ngai loh kha, nang pawhin min kalsan thei lo."

Ka țap chhuakin ka hria. A hnu lam chu ka mang hriat deuh ruai tawh, a bulah ka awm reng a, khawiah mah ka kalsan thei lo. A biang vawt thler chu ka chûl ka chûl a, vawi khat tal a mitme g mawi taka min rawn melh chhoh leh ka beisei tlat, ka ko ka ko bawk.

Ka rilru a harh deuh tak tak chuan OmOmi boral ațangin ni 3 lai a lo liam tawh! Ka la ni deuh chhuih tho nain ka rilru a fîm ve țan tawh a, thil pawh ka ngaihtuah thiam ve deuh ta.

OmOmi nuin OmOmi diary leh a phone min pe a, chu chu rei tak ka chhiar ngam lo va, a phone phei chu ka en ngam lo hial. Mipa hi ka pà thei lo va, amah ka ngaih avànga ka mittui tla hi ka dang thei hek lo. A nâ ka ti êm a ni, ka hmangaihin enkawl kha ka la kham mawlh lo asin.

Thlànah ka kal zut a, nilêng lêngin ka awm țhìn. A khua a har ka hlau a, a lung a lèn ka hlau bawk. Ka tlawh loh chuan a lo thinrim ang a, a lo lungngai ang tih ka hlau a ni.

A diary chu huphurh takin ka chhiar a, mittui phê ruai kâra a hawrawp chhiar nuam zet ka han hmu leh phei chu, min vèl leh chiang khawp mai.

Kan thlalâk leh video-te chu ka en nawn zing hle; mahse, min hnèmtu a ni ngai lo, min tițaptu a ni ziah. Ani nèna kan nunhlui chhui tùr tamzia hi, ka la chhui chho chauh dâwn chu a ni si, chu pawh keimah chauhin. Ani chauh hi ka SUANGTUAHNA NEITU a ni si a, thil dang ka ngaihtuah thei lo va, ka suangtuah thei hek lo. Khuarei hian min hnèm thei a nih ngai chuan min la hnèm ve mahna! Nunhlui hi a thar zêl dâwn chu a nih hi😭

When I am by myself,
Looking at photos and videos,
That we took I've been keeping them for so long;
And with my broken heart,
I see all the pictures of myself;
Living life without you just feels so wrong.

I want you to be here with me,
I know it sounds crazy,
I miss our laugh and I miss everything we used to be;
And even if it is just for awhile,
Then God please give us the time,
I can't deal with the reality;
There's nothing left that I can do,
Cos' my heart's just missing you.

I tried everything,
Every way I could forget you,
Just so I can live my life without you,
Nothing is the same,
It's hard for me;
To erase all of the memories I have with you.

(A kum leh an hming ka tidanglam, a hun leh ni erawh a ngai vek😭)

☆KAN CHUNGA THIL LUNGCHHIATTHLÂK LEH THIL ȚHA LO A LO THLEN HIAN LUNGNGAIA INDAWM KUN MAI LOVIN PATHIAN MIN HNAIHTÎRTU-AH CHANTÎR ILA, THIL ȚHA LO BER PAWH MALSÀWMNAAH A LO CHANG THEI ȚHÌN A NI*