☆SUMRISANG☆ - 1 By Dingdi Pachuau

☆SUMRISANG☆ - 1 By Dingdi Pachuau

"Chutiang tùr si, engah nge min rawn chah rêng rêng?! Lo kal malêk rawh! Ka pe lo tawp ang che!" ka ti nghâl buan buan a, thinrim zet hian phone chu ka hmet tàwp nghâl hmak bawk, bang vawm nân hmang lo tùrin ka inthunun hrãm hrâm a, insehruh țeuhin ka phone chu ka hmer ngawt ngawt ringawt, duhsak tâwkin, tui ber tùr nia ka hriat ka hawnsak ve êm êm a. Pawi lo! Pawi tawp lo! A ei lo tawp ang, Popo-a ka pe vek ang.

Minute sàwm vêl a ral hnu chuan in hnuaiah ka chhuk a, ka nu bulah a lo țhu kur zui. Ka han hmu chiah chu ka thin a rim thar țha leh a, a rawn hawi veleh ka hawi sawn nghâl hmak bawk. Lo kal hman lovin a insawi a, hman lo chung siin engah nge a rawn kal? Ka pe tawh àwm chuang lo êm mai! Engah nge," Ka hman lo, mi hmuh lawk tùr ka nei a, de de dei dei..." a rawn tih tehchai ni.

Ka nu chuan," I rawn haw deuh chauh nain i pain min rawn bia a,' Bawihi khân min rawn hruai mai teh se' a ti a, Jason-a nèn hian va hruai ta mai che u, i uin scooty a keng daih si a," a tih chuan," Rawn phur haw nghâl se ni mai alawm," ka lo ti nghat a, an lam pawh ka en duh chuang lo, fridge ka hawng a, tui bottle ka la chhuak ringawt a.

"I u bàn hun a la ni lo, bâkah, an kalna lam a inang lo tih chu i hriat ve tho kha. Jason, va lampui lawk mai la?" tia Jason-a a han râwn kher chu ka ngei ru khawp mai a; mahse, a chungah ka thinrim tih ka nu han hrilh hriat kher chu ngai ka tih lêm loh avàng chuan," Ka kal mai ang," ka lo ti leh a.

"Ka kalpui dâwn che nia," a lo tih chuan," A ngai bawk lo! I mi hmuh tùr chu va hmu ta che!" han tih tuar mai ka châkzia chu a! Ka nu awm lo se chuan ka ti ngei bawk ang, ka thinrim hrîk thlâk nân ka nu hmuh loh tùr lamah rum takin ka meng ringawt. 

"Ka lo khalh ang, chuti lo zawng kan che sual palh rêu rêu ang," nui hmêl pu deuha a tih chuan insehruh țeuhin chahbi chu ka pe a, pêk țhata pêk loha han vawm deuh sawk ka châk asin! Chhûngrilah ka thinurna chu a rawn inzial leh tup tup a, thâwk pângngai pawhin ka thaw țha hlei thei lo hialin a nia ka hriat ni!

Kan tlàn chhuah hma chuan," Thâwk han la kâwk kâwk phawt teh!" a ti sup a, ka melh zawk a, nuihza hmêl pu tawh lo chuan min lo en reng niin! Hma lam enin ka insehruh leh a, he pa min tih thinrim theihzia hi chu aw... A hriat loh tùr ang ber chuan a rûkin thâwk chu ka la a, a sawi vàng ni kher lovin, ka thuin a ni thâwk ka lâk ni.

"I duh chuan min àn khum thei ang, chumi hnuah erawh thinrim phal a ni tawh lo thung ang. Hria maw?" tih pah chuan a tlãn chhuak zui ta nghâl a. Han țè vak vaka àn khum hrep hrep ka châk kher mai; mahse, higher kan kal laia Madam Puii'n 'Țè chiam chiam leh àu vak vak hi a lady-like lo' a tih țhin kha ka hre chhuak zawk a, insehruh țeuhin ka ngawi ràn rán ringawt, 'Lady' deuha awm ka tum ve tawh sia. A thuhrimah eng nge tuna ka thinrim chhan bul ber hi? Lo kal hman lo tùr anga a insawi vàng khân maw? Hei, a rawn kal tho hi... nge, mi hmuh tùr nei anga a insawi kha, tu pawh a hmu thei alawm, ka sal a ni hleinem. Han thinrim tâk viau pawh chu, a naupan chhiatthlâk e. Lady cool leh zaidam tak nih ka tum ve tawh kha maw le, a bialnute an cool-in an zaidam theih êm kha.

"I thinrimna kha i àn chhuahpui loh chuan i thih hnuah i ruh a mawih hma bîk mai ang aw, a hlauhawm a nia," a rawn tih leh chuan râpthlâk ti zet hian ka en nghâl vat a, a thil sawi chu ka la hre ngai bawk si lo, bâkah, tûn ang hunah te thih thu sawi rêng rêng. "I ti râpthlâk e a, tûn ang hunah thih thu sawi suh!" ka lo ti hlar a.

A nui hawk a," Nunna nei mihring kan nia, kan hma hun second khat pawhin kan hre lo va, kan thih hun tùr kan hre lo tihna a nih chu. Chu vàng chuan thinur chiam hi a țha ngai lo, thinur tih hriat taka hmêl insehruh țùnga thih hi a hlauhawm asin, tuna i hmêl pawh kha..." a rawn tih chuan ka hawi sawn nghâl daih a. A ni thei viau lo ang maw? Țawng thu chhe loah, tunah hian thi ta ila a sawi ang tak hmêl hi ka pu ngei ngei ang, miin ' A thinrim laiin a thi a ni maw' min ti ngei bawk ang chu.

"Hmêl țha leh thinur hmêl hi chu a inhmeh lo a nia," dam thluama a rawn tih leh tâkah phei chuan a lam hawi ngam chiah lo hian ka mitsìr ralh a, rawn hawi lovin hma lam chauh enin car chu a khalh a, hmêl țha min ti lo chiang tih ka hriat avàng erawh chuan min sawi el tih ka hria, tu mahin hmêl țha min ti ngai lo, ka hmêl țha lo tih ka hre ve tho bawk.

Ngawi rengin kan tlân ta vang vang a, zai a play chu ka rilruin ka lo zàwm pah a, ka pa lènna in kan thlen meuh chuan ka thinrimna pawh a reh titih dèr tawh. Ka thinrim châng hian min tháwi dam tùrin rimawi ka ngaithla țhìn rêng a, min chhâwk thei viau rêng a ni; mahse, tûn țum hi chu ka play a ni lo, play nachâng a hre hlauh chu a vànneih phah ka ti dâwn nge ka vànneih phah ka ti dâwn zâwk ni.

Cake chu ka pe ta tho a. Rawn kal hman lo angin insawi mah se a rawn kal ta tho sia, a to ve bawk si nèn, a ui Popo-a han pêk ringawt atân chuan ka ui ve deuh bawk a ni. A làwm thu a sawi sup hnuah a haw ta a, a lan theih chhûng chuan ka thlîr ru reng a, min tih thinur theihzia leh min tih hlim theih sîzia ka ngaihtuah pah rauh rauh a.

*******

"Tluangi, in-break ang!"

A fiamthu a nih ringin ka en chho a, ka nui pah deuh a, ani erawh chu a lo nui ve miah lo. He pa hi, a ti tak tak em maw ni. Eng vàng ngawt chuan maw kan ințhen ang? Kan inhau lo va, kan inkârah mi dang an rawn tla zep lo va, kan induh tawn viauin ka hre sia; mahse, hei tunah hian... ka hre thiam lo, a chhan tal min hrilh se.

"Hmeichhe dang i nei a ni maw?!!" ka ti a, "Nei," tia min chhàn ka hlauh leh sî avàng chuan rang zet hian," A țha alawm, a mipa zâwkin i duh phawt ahnu, ka chelh lui lo ang che," ka ti leh zat a.  Ka rilrua chapona rawn chhuak chuan a tei thei dêr lo, a chhan pawh hriat a ngai lo, a duh chuan kan ințhen hmak ang, âng chhuak vak lo tùr chuan ka insûm ve deuh hlek a, bâkah, mipa zâwkin ințhen a duh thu a sawi hmasa a nia, hmeichhe tân chuan a tlàwmthlâk lutuk. Mi dangin a thu sawi hi lo hre phei se chuan, min nuihzat ngawt ang chu.

Thil dang sawi tawh lo chuan ka kalsan a, kei aia duh hmeichhe dang a neih thu min hrilh ang tih mawlh ka hlau a, ka tlâwm zual sauh dâwn si a, chu vàng tak chuan thil dang a sawi hman hmain ka kalsan a ni zâwk mah. Kum 1 chuang zet chu kan lo inkawp ve tawh a, intih thinrimna pawh nei lova han ințhen tawp mai chu, eng nge a chhan ni ang aw tih ka ngaihtuah rauh rauh a, kan inhau miah lo tih ka hria, min rinhlelhna tùrin mipa dang ka ngaihmelh chhin ngai hauh bawk si lo, hre chiang bertu a ni ngei bawk ang, ka hre thiam hlawl lo; mahse, ințhen thu a sawi tawh a, ka dang duh lo. Tu mipa pawh ni se min țhen duhtu chu ka chelh ngai lo tawp ang, eng anga ka duh pawh ni se. Min țhen duhtu na nâ nâ chu ka rilru chapona leh mahni ka induh tâwkna hian a chelh khawtlai ngai lo ang.

Mahse, zàn a lo ni a, ka ngai deuh nghâl ngawt mai a nih chu. Dik tak chuan Lalrina hi chu ka duh ve êm a, tih tak taka ka nihpui hmasak ber a ni bawk. Ngaihzâwng deuh reuh leh star hi chu ka nei ve zauh zauh tho a, han nihpui tawp ang hi chu amah chauh hi a la ni. Phone ka en a, a number ka han hmet chhuak a, a lo online reng; mahse, min rawn text hauh lo. Mãwl chhah, eng aiah nge min rawn text ngawt ang? Kan ințhen tawh alawm. Min rawn text tawh dâwn lo, ka heti zan tin tawh dâwn, a hnên ațangin text ka dawng ngai tawh lo ang a, kei pawhin ka text ngai tawh dâwn lo a ni.

Ka tum lo viau nain kâr khat chhûng chu hrehawm ka ti ve tak zet a ni; mahse, pâwn lamah erawh chuan ka nih dàn ngai rengin ka awm tho, ka țhiante pawhin kan ințhen tih an hre har rêng a, Lalrinate nèn lah inkàwm khâwma ni tin deuhthaw inhmu khâwm lât lât țhìn kan ni a, a hmuh laiin tuar leh hrehawm ti anga lan ka tum lo. Tlàwmthlâk ka ti a, ka mittui phei chu tih tlâk ka tum lo bur, min duh tawh lotu mipa pakhat vàng chuan a tla tùr hi a ni lo tawp.

Mak ka tih leh tlàwmthlâk ka tih tâk ber chu ințhenna thu a sawi ațanga thla khatnaah chiah kan țhian rual zînga mi, kei ngei pawhin ka koh zin ber pâwl, nû zâm leh nungchang pawisawi lo zet Vli nèn an inzui chho ta tlat mai chu a ni. Chu vàng chuan mi dang pawhin kan ințhen tih an hre lo thei ta lo va. Vli nèn an ni tih ka hriat chhuahna chhan pawh Mamuana piancham kan lawm zànah, bathlàra an lo infâwp ka hmuh vàng a ni. Mak ka ti nasa, kal sawn tùrin ka hmu laklawh tawh si, thãwm ka la nei zui nèn min rawn hmu ve nghâl lo thei lo va. Min rawn en dùn hau nghe nghe, awm dàn thiam a harin ka va lài chiang tak! 

Vli chuan," Tluang, in ințhen tawh tho a, i pawi ka sawi lo tiraw?" a rawn ti ta sap a, ka hamhaih, ka lài bawk si nèn, chhàn pawh chhâng lo chuan ka en dùn reng ringawt a. Lalrina'n Vli kâwngah a la kuah reng zui nèn, nuam lo ka ti zual. Lalrina chuan," Ni e, kan ințhen tawh a,  i haw thei lo ang, kei hian hmân ațangin ani hi ka lo duh ru reng tawh zâwk a ni," a rawn ti ve leh a, chu chuan min ti harh kâwk mai, chu vàng chu a lo nih chiah chu. Ka zak ru chem chem a, chuti teh lâwnga han inpuan khum chu! Min ti zakin min ti tlâwm ngawih ngawih kher mai.

"A dik, kan inkawp tawh lo bawk a, in inkawp thei," rang fahran hian ka ti ve ta sawk sawk a, chutah, pângngai thei ang bera țawngin," A țha em? Kan inhaw lo bawk a, ka kalsan ang che u, in thil tih lai kha, chhunzawm leh rawh u," ka ti leh a, inherin ka kal zui ta nghâl a. Ka kal ve sawk sawk nain ka hma lamah chuan kawng a lo awm tawh miah lo chu lo niin, ka intauh lo chauh a ni, lung rem sâng takah ka làwn a nih ngawt loh chuan kal ngaihna a awm tawh lo. Ka ding ta vang vang a, ka kal ve laklawh tawh si a, in chhûnga lût tùr chuan tukverh ațanga ka luh mai a ngai dâwn ta a ni. 

Min țhen ațanga bialnu a nei leh hma lutuk chuan ka thâ a ti na tlat a, min ti thangtlâwm ka ti a, ka induh tâwkna a khawih che pha tlat. Vli a lo duh rûk reng vànga min țhen chu ka hre thiam lo pawh a ni chiah lo; mahse, ka țhiante zînga mi ngei a ni a, mi dang ka hriat ngai loh chu ni se engah mah ka ngai hauh lo ang le. Hetiang a nih chuan kei pawhin engah nge bialpa chu ka neih ve thuai mai loh ang? Ani pawhin a nei thuai thei a nih chuan ka neih thuai loh bîkna tùr ka hre lo.

Mahse, ka ngaihtuah ka ngaihtuah a, dik tak chuan tûn dinhmunah hian han kawp mai tùr ka hre lo a ni, min lo duhtu chu an awm ve maithei, kei pawhin star chu ka nei tho; mahse, Lalrina tluk zo tùr, ni lo, ani aia țha daih, hmêl leh pianphungah pawh a el phâk hauh loh tùr a ngai ang. Vli hi a nùin a zaidam a, kei nèn chuan tehkhin chi kan ni hauh lo, tehkhin arâlah chuan chhim leh hmàr ang hlauh kan ni, kan inang lo chhiava lutuk. Hmeichhe nù tak ka ni lo va, ka zaidam lêm lo bawk. Ka rilrua awm ang ang ka sawi chhuak fo a, ka thin a rima ka ngaih dàn a nih loh chuan ka sawi chhuak nghâl lo thei lo, ka insûm ve țît țêt ngai lo. Ka têt lai ațang tawhin ka kawlh a, ka țhiante ngei ngei pawh ka sual fo rëng a ni, ka thinchhiat avàngin ka rualpui mipate pawhin min ngam lo fo a, ka lian ve thûng tho bawk si a, kan infiam laia min rawn tih buai châng pawhin a hmatâwngah ka țang a, min ti buaitute rêng rêng kutthlâk lova ka chhuah an awm ngai lo; mahse, ka ti hmasa ngai lo thung. Kawlh min ti thei asin, a chhan chu ka sualpuite hi ka hamin ka seh ngei ngei ziah a, chu tak chu an hlauh a ni tih ka hre chiang a, min hlauh phah rêng a ni.

Ka thinchhiat hi ka nulât ve tâk hnu pawh hian a la reh thei meuh lo; mahse, ka têt lai ang êm kha chu ka ni tawh bîk lovin ka hria, bialpa lo neih ve tawh bawk si phei chuan a mawi lutuk lëm lo. Ka nuin min zilh fo a; mahse, ka la sim hlei thei lo chu a ni. " I u nèn in nungchang inang lo lutuk hi chu aw..." a ti vang vang țhìn; ka pa erawh chuan nui huk huk chung hian," Ani hi chu mipa tùr hmeichhiaa rawn piang ngang hi a nia, a puitlin tak tak hunah a zia ve mai ang," a ti țhìn thung, ka u hmeichhia nèn kan nungchang a inang lo lutuk hi kei ngei pawhin mak ka ti țhìn.

Ka u Nubawihi'n," Lalrina nèn in ințhen tawh a ni maw?" tia min zawh chuan," Țhen daih tawh!" rang zet hian ka lo ti vat a. Ani chuan," In induh ve viau emaw ka ti," a ti leh a, engah mah ngai lo ni àwm fahran hian," Chatuan daih inlaichìnna a awm thei hleinem," ka lo ti leh a, a rûkin Lalrina han èlsèn khumna tùr mipa dang ka ngaihtuah kual char char tih erawh sawi ka tum lo, kan țhianho zîngah hi chuan han sàwm mai tùr ka hre hlawl lo a, bâkah, a țha ber ka tih ka thlan ve kha amah Lalrina hi a ni hrim hrim a, amah aia țha an awm lo, kan inpawh hlawm bawk nèn, mi dang nèn inkawp thut pawh ni ila Lalrina'n a man thiam thuaiin ka ring, chu vàng chuan kan țhianho zînga mi chu a tih chi loh ang.

Jason-a hi ka ngaihtuah chhuak ta a, a hmêl ka han mitthla vang vang a, țha dâwn riauin ka hre ta a ni. A nu leh ka nu hi an inkàwm ve țhìn a, ka pu leh a pu hi khaw khat chhuak an ni nghe nghe. Kan têt lai chuan kan ințhenawm țhìn nghe nghe a, a nau hmeichhia Kristie nèn kan inkàwm țhìn a, Jason-a pawh kan bulah a awm ve reng țhìn; mahse, Jason-a pa hna thawhna hi an in ațangin a hla a, kum hnih thum vêl hnuah a pate office quarter luah tùr remchâng tak an hmuh tâk avàngin an insawn ta daih a, kan inkàwm thei ta lo a ni; mahse, tlêm lai lawk khân a pa a pension tâk avàngin kan vêngah an insawn ve leh a, anmahni in ngeiah an rawn awm ve ta a ni. Têt lai hun ang êm kha chuan intlawhpawhin inkàwm thei tawh lo mah ila ka nu leh Nu Sangpuii erawh chu an la inpawh reng a, chawhmeh pawh an inkhai tawn fo. Kei chu ka kawm ber Kristie hmun danga a awm daih avàngin ka tlawh tam lo khawp mai. Jason-a nèn kan inhmuh fuh châng erawh chuan ka be tho a, amah hi a bengvâr êm zâwk a, min rawn tlawh peih a, chuti chu ni lo phei se chuan ka biak hmasak ngai ka ring lo.

Ka thil tum avànga Jason-a ka biak tirh chuan nuam lo ka ti ru ve reng tho a; mahse, Lalrina ka mitthlaah ka dah lui tlat a, he thil hi ka tih ngei ngei a ngai tiin. Jason-a phei chuan ka fiamthu emaw tiin chhàn pawh min chhâng lo; mahse, ka tuang ka ti chhah lui ve tlat a, ka ti tak tak a ni tih hrilhin," Min pui ve mai la? Kan inngaizâwng tak tak dâwn pawh ni hlei lo, ka țhiante hmuh laia lem chan tê chauh kha a ni mai," ka ti a, chutah," I bialnu lam chu ngaihtuah duh suh, lemchanna mai mai tùr a nih hi, kan inkârah eng mah a awm ngai dâwn lo tih chu i hre chiang ber ang chu," ka ti leh a.

"I bialpa chu i duh viau a ni maw?" a tih chuan ka ner nak a," Duh viau ila chuan ka chelh bet tlat ang chu!" ka lo ti mai a, a mipa zâwkin min țhen zâwk a ni tih erawh hrilh ka tum bau lo. A nui suk a, min en vang vang paha," I inhmeh lo ngawt mai, bialpa i nei ve tawh a nia," a tih leh chuan," Ka ring che a nia, sût leh âwih tawh loh! Puih i ngaih hunah ka pui ve ang che," ka ti nghal sawk sawk a, ka chhuahsan zui vat bawk. Ka awm khawmuan chuan rem a tih loh thu min hrilh ka hlau a ni, kal pah chuan kan têt laia kawlh min tih theihzia kha ka ngaihtuah chhuak a, ka len hunah pawh bialpa ka hmuh zawh a rin loh thu leh mipa zawng zawngin min hlauh a rin thu pawh a sawi țhin a nih kha, za lo zet hian ka nui  sak sak a. Anni unau nèn kha chuan kan insual miah lo niin ka hria, ka hriat sual loh chuan; Kristie nèn erawh vawi khat kha chu țawngkam vîn deuh chuan kan inhau ngei mai a, a hnuah erawh țha takin kan inkàwm ve leh mai bawk a.

*MI DANG EL RÊNG RÊNGA HUN I HMAN CHUAN I HLIM THEI NGAI LO ANG, MI DANG NI LOVIN NANGMAH NGEI KHA INEL ȚHÌN ZÂWK ANG CHE. VAWIINAH NIMIN AIA ȚHA NIH TUM LA, NAKTÛKAH VAWIIN AIA ȚHAIN, I HLIM TELH TELH MAI ANG*