☆SUMRISANG☆ - 10 By Dingdi Pachuau

☆SUMRISANG☆ - 10 By Dingdi Pachuau

31 zàn lam erawh țhianzahoa hman khâwm an rawt a, kan duh vek. Dik tak chuan kan țhianhoah hian kohhrana inhmang tak kan awm lo va, kohhran țhalai member nihna zâwnah erawh chuan hunpui lai ngang a nih avàngin eng eng emaw chêtna tùrah chuan min ruat hlawm ve tho a; mahse, 31 zànah erawh chuan àwl kan tum vek a nih hmèl. Zànlai inkhâwmah erawh 'tel ve hman ila' tiin kan rêl ve tho a; mahse, kan tel leh tak tak hlawm ang em maw...

Jason-a ka bialpa anga hruai pawh ka hreh ru tawh a, hrilh pawh ka la hrilh duh lo, bâkah, Hriatpuii nèn pawh hun hman dun an lo tum ve maithei asin. Tum ngei ang, tûn ang hunah chuan an hmang țhìn alawm; mahse, Jason-a hi hrilh lovin hruai lo ta ila, ka țhiante'n zawhna min zâwt ngei dâwn a, tûn ang huna ka kalpui loh chuan min ringhlel mai ang. Kristie ni se, eng mah a hre ve si lo va, ka thlim a ngai dâwn tihna a la ni zui, lehlam takah chuan ka rilru a nuam lo ru viau a ni. Hruai ve dâwn ta ila Jason-a'n a hre lo thei dâwn bawk si lo, ka rilru an ti buai.

Mahse, vànneihthlâk takin ka ti dâwn nge ni, Kristie unautehovin hmanho an lo rël ve hlauh lo niin,"  Kan inhmu khât hlawm sia, lo kal ve rawh aw, a zahthlâk loh," tiin min sâwm ve zâwk ta nghe nghe a; mahse, thiam takin ka lo hnial thung, an unauho inhmuh khâwmnaa lo tel ve ngawt chu a tih chî loh a ni. 

"En teh," tiin a hawi kual phawt a, chutah, min rawn hnaih sauhin ka beng bulah chuan," Mâma phone ka chhànsak a, Hriatpuii phone call a ni nghe nghe, a sawi dàn kha chuan Mâma nèn hman dun an tum a nih hmèl! Ka lo phûr tawp," a ti sar sar a, a u bialnu nei chu a phûrpui hlê a ni tih a aw ațang chuan a hriat hliah hliah.

Jason-a chu ka hrilh lo ta law law, hun ãwl pêk ve ka duh a ni, ka inthiam lo lêm lo, Mahnia kal erawh ka hreh rûkzia hria se chuan min kalpui hrim hrim ang! Chuti khawp chuan mahni chauha kal chu ka hreh ve a, kal loh daih theih dàn awm se ka ti hlê a ni; mahse, hmanho rawtin thu kan lo ti tlu tawh a, ka țhulh thei lo tih ka hria. Jason-a kal loh chhan chhuanlam țha ve tâwk tak han siam tùr erawh ka ngaihtuah kual char char thung a, âwihawm êm êm tùr ka ngaihtuah chhuah a ngai a ni.

Ka kal ve ta ngei a; mahse, ka hlim lohzia chu a! Hlim lo viau mah ila ka hmêlah erawh lantîr ka tum hauh lo thung, țhiante lah chuan Jason-a kal ve lo chu a chhan min zâwt sek a, ka ning hlawm tak tak! Ka nin êm vàngin ka làm deuh reng phah bawk; mahse, partner chu ka nei ve tho, Zda nèn kan inkawp zar zar a, a bialnuin an khaw lamah a hawsan daih sia, ka khawngaih partner a nih ber chu, nge min khawngaih partner zâwk ni.

Inthiarna lama ka kal ka lêt leh lamah Lalrina nèn kan intâwk a, kan intâwk laklawh ve tawh si a, hmuh loh der ngawt theih a ni tawh lo; mahse, biak hmasak erawh ka tum chuang lo. Ani erawh chuan min nuih sakin," Zanin chu i lâm nasa bawk si a, i chau ngawt lo maw?" tiin min bia a, kei chuan," Ka infit alawm," tiin ka lo chhâng mai a.

Kal sawn mai ka tum chuan," Tluangi, ințhen tawh mah ila țhian kan nihna a bâng chuang lo va, kei chuan țhian țha tak angin a nia ka en zêl reng che ni, țhiante pawhin kan chanchin an hre vek a, min en dàn a dang chuang lo. Chu vàng chuan nang pawhin min biak hi hrehawm ti suh, kei pawhin ka biak bawrh bawrh che hi, țhian ang ni lova i ngaihzâwng hlui anga min en chuan nangmah kha i inti hrehawm mai mai ang," a rawn ti ta duah a, a thil sawi chu dik ti tho mah ila ka la run deuh reng tho a, chu vàng tak chuan chhàn pawh chhâng țha duh lovin," A dik alawm; mahse, kei chu min ngaihtuah duh suh," ka ti a, ka kalsan zui ta nghâl a.

Mi fel leh nungchang țha tak ni lo mah ila ruih theih lam hi chu ka ti ngai bîk lo va, țhiante'n cigarette zùa beer an dawm far pawh hian ka ti ngai lo. Hemi zàn erawh hi chuan beer ka tem ve tlat, dik tak chuan fîm taka hun hman ka hreh ve a ni. Lalrina leh Vli hlim taka an awm dùn ka hmu lo thei bîk lo va, hmun khata awm tlâng ve ta reng leh mit del bík lo ta chuan hmuh loh theih ni hek lo le. Ka thîk lo, ka thîk lo nasa; mahse, an hlim hmêl chu dik tak chuan ka awt a, chutianga hlim ve chu ka châk a ni, chu bâkah ka rilruah chhúngrilah Jason-a a awm reng tlat a, duh lo teh mah ila ka rilru ațangin ka paih chhuak thei mai si lo, min ngaihtuah miah lova Hriatpuii bula hun a hmang tùr chuan ka rilru a ti na deuh tlat a ni.

Zanlai inkhâwma tel chu ka ngaihtuah ta lo law law, hman chu ka hman reng; mahse, ina awm ka thlang zâwk! Maenga'n car-in min thlah haw a, a hla play lah chuan ka țah a ti chhuak deuh teh ngawt a,  mal ta riaua inhriain ka inkhawngaih a ni ber ang chu! Beer can khat ka hûm ru haw ràn a, room-ah lem leh sek ka duh tlat a ni. Ka nute an lo mu tawh hlauh chu a tihzia tak tak, ka room ka pan nghâl vat rêng a.

Ka thuamhnaw thlâkin ka inphih fai a, khumah țhuin mut erawh ka la tum rih lo. Beer inin phone ka khawih neuh neuh reng a, Jason-a hming ka hmet chhuak a, he pa hi a haw ve tawh ang em le? A hmang nuam bawk ang maw. A message tùr ka type mual mual a, ka thawn nghâl a, a hmuh hun hunah hmu mai rawh se.

A tûk ka harh veleh chuan phone ka en vat a, dâr 7 pèl tawhin message a lo awm tuar bawk. Tho chhuak lawk lovin ka zi ar ar phawt a, chumi  hnuah che lovin ka mu leh rih phawt a, ka maimichhìn leh vang vang hnuah ka tho ve ta chauh. Vawiin hi Kum thar a ni tawh tak! Ni dâwn tak e, kum thar a ni, ka upa leh sawt dâwn.

Ka inphih fai hnuah ka phone chu ka en a, țhiante'n kum thar chibai min rawn bûk sap sap hlawm a, ka han chhâng lêt ve a, Jason-a'n ka message thawn kha  *good, good, good*  tiin min rawn chhâng lêt a, kum thar chibai min búkna chu ka chhâng ve nghâl a, ka thawn hnuah nizàn lama message ka va thawn kha ka chhiar nawn leh a, a lo va ho mai mai tak! A țûl duah lo tak zet bawk! Beer effect kha a ni thei mai ang em?

*I hmang nuam bawk em? Nuam viau ang chu, ni e, nuam deuhin hmang rawh khai, hlim hi a țha a ni, hlim takin khawvêl hi chu hman tùr, a fing apiangin hlim takin an hmang țhìn. Kan nunna hi chhûm rei lo tê lo langa ral leh mai ang hi a ni si a, chu vàng chuan a hlim thei ang bera hman zêl tùr*

Ka chhiar nawn leh pawh chuan ka ziah ni àwm lo tak a ni ka ti rilru a, chutiang teh duah ka va thawn chu ka zak ve lek lek bawk, ka zah loh theih ve tehlul nèn. Beer in tawh miah loh tùr a nih hi, a thawh dàn a dik tlat lo, ka in tawh miah lo ang, tûn minute ațang hian ka sim nghâl hmak. 

Ka inkhâwm tùr chu ka phûr sârh lo kher mai, ka lu lah chu a na deuh fek fekin ka hre lehnghâl a; mahse, kum bul țanna, ni thar hman hmasak ber țanga han phùr loh nghâl êm êm ringawt chu ka duh loh avàngin ka intihlim lui hrâm hrâm a, hlim hmêl ka pu lui hrâm hrâm a ni, harh ver vawr, enghelh nei lo leh hlim reng thei ang rilru put leh kha ka duh ngawt mai.

Jason-a ka hmu ru reng a, kei ang lo takin nizàn lamah a che țhain a hmang nuam bawk a ni ang, hmuh a nuam a, a inthuamna pawh a inhmeh zaih; mahse, hmu angin ka awm duh hauh lo, ka be hmasa duh lo a ni ang chu, ka zah ru deuh tlat ringawt a nih chu. Kristie erawhin min rawn panin min rawn be nghâl a, nizàn lama an hun hman dànte chu min hrilh sârh sârh a, ani hi chu a hlim lo ve ngai lo a ni ang, hlim hmêl a pu reng thei bîk a, a nuam ngawt ang chu.

"I lo kal duh ve mang si lo va, a nuam ve reuh asin. Tute nèn nge in hman ve? I hmang nuam em?" tia min zawh chuan hun kan hman dàn chu ka hrilh ve luam a, ani chuan," A țhat hlauh chu. Hlim taka i hmang chu a țha e, ka rilru pawh a nuam sawt mai," a lo ti leh a.

Ruai ka țheh peih lo viau nain ina ei teh ngawt chu ka duh bîk chiah lo va, bâkah, kum thar nî a ni ve si a, ka țheh ve ta hrâm a ni. Mi dang haw hma daihin ka haw a, mi bula awm nuam ka ti lêm lo, bâkah, ka hnâr leh ka ka inzawmna lai ka ti mai, a na thîp hlar mai a, ka hritlâng dâwn a ni maithei.

In chungah ka awm a, țhutthlèngah chuan țhuin khua ka thlîr kual pah a, ka rilru chhûngril chu a hlim hlawl lo a ni ber mai, tlai ni liam tùr kâwl lama pil lek lek pawh chu mawi ti tak pawhin ka en lo, keimah ang lo taka nguai taka ka awm chu ka inhmeh lo tak zet a ni; mahse, chu vàng ngawt erawh chuan ka hlim ngawt thei bîk si lo. Maimichhîng vang vangin kan in ràla nula leh tlangvâl bike-a inphur thãwm ni àwm tak, chak zet zeta an tlãn thãwm chu ka ngaithla a, ka maimichhîng vang vang a.

Ka phone a rawn rì a, en mang hlei lo chuan ka chhâng a," Khawnge i awm a?" Jason-a'n a rawn tih chuan," Ka awmnaah," ti ringawtin ka chhâng a, ani chuan," I awmna chu alawm ka zawh che," a rawn ti dam leh thluam a," I hriat ve zêl a ngai lo," han tih mai ka châk deuh a; mahse  ti ta lo chuan," Kan inah," ka ti ve ta thung a.

A rawn kal niin, phone-a zai ka play avàngin ka lo ngaihven lêm lo va, a lo kal pawh ka ring lo hrim hrim. "A va lêng àwm ve?" ka bul lawka a rawn tih tâkah chuan ka meng ve ta chauh a, maimichhîng leh nghâlin," Lo țhu ve rawh," ka ti sap a, ka țhutna bul chu ka bêng thap a, ka maimichhìn loh chuan a hmël ka en reng palh ang, bâkah, ka hlim lo hmêl leh mitmeng hmu tam lo se ka duh.

"Nizàn khân min thlim a ni maw?" a rawn tih chuan," Engah ngawt chuan maw?" ka lo ti vat  a, phone-a zai chu ka ti tàwp zui nghâl bawk a, ani erawh chuan," Ka ti deuh mai mai maw le," a lo ti daih thung. Hun ka pe a, thlim ta daih angah min han chhuah a... a pawi lo, a duh duh chu sawi mai mai rawh se. Hriatpuii nèn hun hman dun an tum tih kha lo hre lâwk lo ila chuan ka sâwm ngei ngei ang, chuan, ani erawhin chhuanlam siamin a theih remchàn loh tùr thu min hrilh ngei bawk ang a, Kristie'n min hrilh hlauh kha a vànneihthlâk tak zet a ni.

Kan ngawi dùn vang vang a, a hnu deuhah chuan," Ka haw leh nghâl mai teh ang, ka rawn pêng lawk tak tak a nih hi, vawiin lamah khân ka hmuin ka be chiangkuang mang bawk si lo che a, ka rawn tlawh zawk che a ni," a rawn ti leh a, nuih sakin," I fel țhìn e!" ka ti phawt a, chutah," A la hma alawm, thingpui hâng pawh kan in ang chu," ka ti leh a; mahse, han chelh rih pawh chu duh viau mah ila khawiah emaw pawh a kal duh thei a, ka bialpa a nih loh bâkah ka tirhchhiah pawh a ni hek lo va, a laka ka rilru a dan deuh tâk ațang leh ka en dàn a dik loh deuh tâk ațang hian a hma anga a laka ngampa tak, pangchang leh ngènngawl taka khawsak kha ka inthlahrung zo tawh a ni. 

Kum thar, ni khat nî a liam a, chumi hnuah mi tin mai chu an hmaa tih tùr awmah chuan an buai chho leh țan ta, school naupang pawh an bãng chuang lo, zirna chhunzawm leh tùrin an inbuatsaih a, Kristie pawh a awmnaah a chhuk leh tawh a, kan inkàwm nêl leh hman viau tawh si a, a awm lo ta chu a ngaihawm vei reuh phian mai.

Ka invêngin a rûkin ka inthunun chho ve nasa a, thil ho mai maiah chuan Jason-a pawh ka be buai tawh bîk lo va, chhuak tùr pawhin ka sâwm tawh lo. Inhmuh châng leh a rawn lèn châng chuan țha takin, hmêl ațanga eng mah hriat theih loh tùrin ka be tho a; mahse, phone erawh chuan thil țûl takah a nih loh chuan ka be mai mai ngai tawh lo. Chuta kârah ka chhuakin Hriatpuii nèn bawk ka hmu dùn leh tawh a, an inkârah thil hriat sual palh thlen theitu leh thil ho têa thîkthu awm thei a nih avàngin ka theih angin ka inla hrang ve bawk a ni. Jason-a nèn kan inkârah eng mah a awm lo tih chu ka hre tho a; mahse, unau piang hmun kan ni lo va, nula ka lo ni ve bawk nèn, inngaizawngte inkârah eng emaw hlekah rinhlelhna leh hriat sual palh awm thei a nih vàngin chu thil chu ka lo vêng lâwk ve a ni. 

Hriatpuii pawh hi hmeichhe nù zâm chi a ni a, a pian a nalhin a chhe lo êm êm a, mipate duh chî tak a ni ngei ang. Jason-a tân a rûk takin duhsak lêm lo mah ila anmahni ber an induh tawn chuan a țha, lo sawi ve tùr ka nei lo. Hriatpuii nèn ka hmuh dun leh hnu ațang phei kha chuan ka hlatsan zual sauh a, an ina ka nuin min tirh dâwn takngial pawhin Jason-a awm loh hun tùr àwm chãngin  chutiang chuan hun remchâng ka melh ta țhìn a ni, ka awm dàn hi a hahthlâk chu ka ti a; mahse, ka rilru a dik loh tawh miau avàngin a hma ang khân ka awm thei tawh si lo, amahah hian ka inzum zo tawh ti ila a dik ang. Keimah anga mi mãwl a nih loh avàngin ka awm dàn, ka hlatsan hret hret a ni tih hi a hriat thiam ve tho chu ka ring; mahse, eng mah erawh a la sawi chhuak lo.

Tunah chuan ka rilru sûkthlêk leh thil ka ngaihtuah dàn pawh a lo danglam ve țan ta. Jason-a chunga ka rilru a danglam tâk êm vàng pawh hi a ni maithei, Lalrina han hmuha han biak vêl pawh, a sawi ang deuh khân ka thei chho ve ta viau mai, amah han ngei deuh leh amahah han beisei deuh ka nei tawh lo bawk a, kan inhmu zauh zauh bawk nèn, ka tum ve bawk a, be hmasatu pawh ka ni ve thei ta, a hma khân amahah beiseina chhe tê ka lo la nei deuh reng em ni le ka tih phah hial a ni. A lo harsa lo hle mai si, a hma kha chuan melh pawh kha ka melh duh lo kha a nia, ka lo va ã tak êm ka ti tawh! Fair taka min țhen avàng lah khân ka'n lungawi lo ve ngawt a, a duh phawt chuan sawi kher lo pawhin ngawi rengin min țhen thei tho a nia. A rilru dik tak min hrilh hreh lo va, kei aia duh a neih avànga lo lungawi loh êm êm mai kha!  Zah ahnêkin ka lo ngei ve êm êm kha a ni a; ka lo mäwl ngawih ngawih êm a lo ni.

Kum hlui thlah zàn ațang khân ka hritlâng ka ti mai, a reh ve mai ringin damdawi pawh ka ei duh lo kha a nia; mahse, ka rin angin a reh hlei thei ta mai lo va, pik lutuk ni si lovin awm nuam lo lek lekin min siam a, ka ning tak tak a ni, țhianho inhmuh khâwmnaah pawh zàn lam a nih chuan ka țhulh ta rih a, vawi hnih lai ka țhulh tawh a nih chu. Damdawi ka han ei chho a, hritlâng hrim hrim chu a han zia chho ve dâwn mai a; mahse, khuh lamin a zui ve nghâl bawk nèn, hnawk zet zetin ka khuh chho a, inentîr ka duh si lo, ka nu leh ka uin min nawr reng a, ka pain," Dam lam a pan tawh a nih kha, a khuh hnawk tawh kha," a lo tih chuan ka thaw a veng huai huai mai.

Țhiante pawhin bengvàr chhuahin min rawn kan ve tliar tliar a, han kan tham êm ka nih loh avàng leh ho ka tih êm avàng chuan ka inthlahrung angreng khawp a, ei tùr țha nia an hriat min rawn kensak ve nual hlawm bawk nèn, mahnia ei ai chuan tiin an awm lai reng chuan ei khâwm tùrin ka siam a, kan eiho leh rih bawk a, hetia ei khâwm hi a nuam ve mai mai, tui pawh a tui bîkin ka hre țhìn.

Lalrina leh Vli an rawn tel ve hman loh avàngin a hnuah an pahnihin min rawn kan leh ngat a, tlai lamah niin in chungah ni lum ai pahin kan titi a, Vli han biaka han nuihpui leh titipui pawh chu hrehawm ka ti tawh lo, mi hrang daih ni lovin kan țhiante zînga mi tho kha a ni reng bawk a, harsatna ka nei tawh hran lo, chu bâkah, a hmaa ka awm dàn kha ka ngaihtuah lêt hian ka zak tawh zâwk a ni, kei aia Lalrina'n a duh tâk zâwk avànga han biak țhat duh loh deuh tlat ang kha, a lo naupanthlâk êm mai.

'A dam țha lo ber chét chét chu' tiin Vli chuan ka rem ti lo chung chungin in tùr leh ei tùr siam tùrin in hnuai lamah min chhuksan a, ka nu a awm tho bawk a, a chêt a buai êm lo ang chu ka ti. Lalrina nèn kan lo țhu mai mai a, hawi kual vêl pahin nunhlui lamte kan sawi chhuak a, kan inkawm chhoh țan dànah lûtin kan thil tawn nuihzatthlâk deuh deuhte chu sawiin kan nui dùn a, ka nui nasa deuh nge ni, ka nui khuh ta bawrh bawrh a, Lalrina chuan min rawn hnaihin ka hnung chu a rawn chùm dat dat a, ka khuh nasa deuh bawk nèn, ka mittui chu a tla phung bawk a. Rawmawl chuan ka mit chu ka hru mawlh mawlh a, țap ka ang ngawt ta ve ang.

"Inenkawl țhat i ngai a nih kha, pitar i ang zo mai dâwn. Inentîr hi a țha ber asin le, duh mai ta la?" Lalrina chuan a ti a, kei chuan aw thâm deuh chhawlh hian," Ka dam lam tawh a nia, a reh ve vat mai ang," ka lo ti thung a, ka khuh nasa deuh a, ka thâwk zâwngin ka âwm a na tel deuh tlat.

"He laiah bawk!" rawn titu lam chu kan hawi rual nghâl vat a, Jason-a ka hmuh chuan a hna thawk haw a ni tih ka hre thei nghâl mai, ina haw lovin min rawn tlawh kawi tihna a ni.

Min rawn pan phei zêl a," Vawiin lam chu i lo zia em?" tiin ka kutah chuan a rawn chelh a, ka samah chuan a fâwp zauh a, țhutthlèng bânah chuan țhuin min kuah zui a, a awm dàn chuan min tihamhaih lek lek nain chhûngril lamah erawh nuam ka ti viau thung, hetiang hi ni reng se, min care-a min duat êm êm ang hian ka bialpa niin ni tin hetiang hian hun hmang thei ila tiin duhthu ka lo sãm hman hial a ni; mahse, a tak ramah chêng zui leh nghâlin Lalrina a awm avàngin ka bialpa lem a chang a ni tih ka ngaihtuah chhuak leh ta a.

Vli pawh a rawn chho ta thuai a, a rawn inkeng chho bâwr ve khawp a, Lalrina'n a lo pui thuai a; mahse, Jason-a chanai tùr chu a rawn ken chhoh tel ve loh avàngin a chhuk leh rih a, ka han au zui deuh nain a chhuk lui ta tho a.

Thil kan ei chhûng pawh chuan Jason-a chuan min kalsan hauh lo va, min kuah a remchàn loh pawhin min si chêtin, min dek rengin a țhu tlat a, lehlam takah chuan nuam ti viau mah ila ka nuih a za zâwk! Tunah hi chuan a lem chan hi chan chhunzawm a ngai hran tawh lo asin, Lalrina chunga ka rilru puthmang a pângngai tawh a, min țhen avànga thungrulh duhna ka nei tawh miah lo tih hria se chuan... mahse, tunah hi chuan hrilh tumna ka nei rih lo, nuam ka ti ve tlat rih.

*I THIL TUM TIHLAWHTLING TÙRA RUAHMANNA I SIAM KHÂN AWMZIA A NEIH TAM LOH CHUAN I RUAHMANNA KHA THLÂK DAIH LA, I THIL TUM TAK ERAWH KHA CHU THLÂK NGAI SUH*