☆SUMRISANG☆ - 11 By Dingdi Pachuau

☆SUMRISANG☆- 11 By Dingdi Pachuau

Lalrinate haw hnu pawh chuan Jason-a chu a la awm a, kan țawng zauh zauh a. Min la kuah reng avàng chuan," Tunah chuan lem chan a ngai tawh lo a nia," ka han ti sap a, ani erawh chuan," An hmuh lai chauha lem chang lo hian an hmuh loh lai pawh hian practice zauh zauh a țha, kan theihnghilh palh loh nân," a lo ti thung a, nghet zeta min kuah lehin," Dam țha chho zêl tawh rawh aw, damdawi ei țha la, mu hma bawk la, nungchang cool deuh reih rawih hi i inhmeh ve lo a nia," a ti duah a, ka sama a fawh leh zauh hnuah chuan min thlah zui ve ta mai a. Chutih lai tak chuan a phone a rawn rì a, enin a phun sup a," Yes, Hriatpui?" tia chhângin a ding zui zat a. Hmeichhe aw ka hriat zui tâkah chuan Hriatpuii a nih ka ring nghet nghâl bur, thîknain ka thinlung a rawn luah zui nghâl bawk nèn, ka hmui chu ka pet fan fan a.

An inbe rei lutuk lo. Ka bula a rawn țhut leh chuan ka induh tâwkna vàng nge, Hriatpuii chanchin lam chu ka zâwt duh hauh lo va, thil dang daih ka sawipui, chu pawh ka rilru a danglam țan tawh a ni tih a hriat loh nân a ni. Ka nuin min rawn koh tâk hnuah phei chuan awm pawh kan awm rei ta lo, ani pawh a haw zui ta thuai nghe nghe a.

Ka rin aiin ka khuh chu a reh mawh daih mai. Ka nu chuan inentîr mai tùrin min ti reng a; mahse, natna eng emaw tak, entîr nân TB ang te a lo nih palh ka hlauh avàngin ka kal duh hauh lo va, "A dam țêp tawh ang," tiin 'Thlasik lai chho vêla hritlâng âwmnâ chu a reh mawh, hun a duh rei' an tih țhin chu ka changchawi tlat a, luhlul ve chi ka lo ni bawk nèn, min nawr lui thei bîk lo.

Tûkțhuan kan kîl laiin ka nuin," Pipii chuan nizànah palai hmêl a hmu ta a nih chu, pasal chu a nei dâwn ta ngei a nih hmèl," a tih chuan rang fahran hian," Tu Pipiii maw?" ka lo ti vat a, U Nubawihi chuan," Ka nutei fanu Pipii a ni ang chu, tiraw Nu?" a lo ti ve a. Ka nu chuan," Aw, ni e, i nutei, Lunglei Vênglai. A hmaa kan inbiakin a sawi thâwi deuh tawh nghe nghe a, ka lo ûksàk lutuk lo va, a mipa phei chu Zarkawta mi saw a ni àwm e," a ti leh a.

"Engtin nge an inhriat le?" mãwlmang zeta ka lo tih leh chuan," Pipii nèn office khatah an thawk tlâng a ni àwm e, an innei thei te a nih ngai chuan Aizâwl lamah an rawn invuan ngei ang le," a lo ti leh a, ka pa chuan," Kan inah an rawn innghat nghe nghe ang chu, keini lo innghahna tùr dang an nei nâng," a lo ti ve charh charh a.

Mite hi chuan ti hian pasal tùr hi an hmu mai zêl a, duh takin an nei mai a, an fakawm ngawt mai, an duh tak an nei ni tùrah ngai ila, an kum a tam tawh vàng lam ni pawhin ka hre meuh lo. Kei ve hi, ka han ngaihtuah a, dam chhûng atâna kawppui tùra ka duh tùr ka han ngaihtuah ve chhin a, ka hre mai lo, 'thihnain min țhen hma loh zawng' tia han tiampui tùr atân êm chuan tunah tak hi chuan duh êm êm ka nei lo a ni ang, ka rilru a la inpeih lo pawh a ni mahna. Entîr nân, Jason-a hian min duhin min lo hmangaih ta se, keiin duhin hmangaih ta bawk ila, chuti chung chung pawh chuan dam chhûnga kawppui tùr atân êm chuan ka la innngaihtuah nasa viau ang. Pasal neih lam hi ka la ngaihtuah ngai lo hrim hrim a, ka la ngam loh bâkah ka la duh lo a ni ber ang chu.

Ka khuh pawh a dam fel tawh a, tunah chuan zànah pawh ka chhuak ngam ve leh tawh; mahse, a hma anga harh ver vawr leh enghelh nei lo kha ka ni ta lo deuhin ka hria. A chhan chu thil ngaihtuah ngut ngut ka chîng chho ve țan a, hei hi chu Jason-a vàng a ni tih ka hria. Hna thawh nei lova awm mai mai hlâwk lohzia pawh hre thiam chho ve țanin eng emaw tak thawh tùr ka enghelh chho ve ta bawk a, Pipii chanchin sawia ka nuin min fuihna chuan keimahah hna a thawk ve a ni ang, ka hna thawh theih tùr leh nuam ka tih ve tùr pawh melh ve țanin, ka rilru a piang thar ve țan a nih ber chu.

Pipiite lah rin aia hmain an innei dâwn lehnghâl a, Lunglei lam daiha awm an nih avàngin kan inhmuin kan intlawh zut thei lo va; mahse, chanchin erawh kan inhre pawh ve reng reng tho a, ka pa sawi ang deuh khân kan inah an rawn innghat dâwn zui a, kan buai ve nak nak dâwn viau a ni; mahse, kan buai khât êm mai, a țha lamin kan buai dâwn zui a, chhûng-leh-khat inpawh tlàn zual nân pawh a țha rêng rêng e.

U Nubawihi'n ka thawh tùr àwm chu min ngaihvenpui ve reng a, ani hian hmêl hriat leh țhian a ngah a, an fel hlawm a, an zârah ka thawh tùr àwm tâwk chu ka hmu thei mai ang; mahse, Pipii pasal neih hma chuan min hmuhsak lo se tiin duhthu ka lo sãm thung, chawlh ve ngei kha ka duh dâwn si a ka tih vàng a ni.

Inrinniah U Nubawihi'n min chhuahpui a," Chhuak lawk ang," a tih vàngin hnial lovin ka zui ve mai a, kan haw leh thuai tùrah ka ngai a ni; mahse, beauty parlour-a min luhpui tâkah chuan kan rei zêkin ka ring ve ngawt a, ka ring dik chiah bawk. He dàwr hi a lâr ve thawkhat a, ke lèr ațanga lu chhîp thlengin an khawihsak thei vek an ti țhìn.

Amah a inkhawihtîr dâwn emaw ka tih laiin," Hei a mit hmul leh a sam hi tih danglam deuh ka duh a," tiin min râwn hmasa hauh lo chuan a duh dàn leh mawi a tih dàn chu min buaipuitupa tùr hnênah chuan a hrilh ta mawlh mawlh a, chu pa lah chuan nêm no deuh hlâi hian," Mawi tâwkin ka tihsak dâwn nia, min ring tawp rawh, a inhmeh tùr chu hetia ka en vang vang pawh hian ka hre thei," a ti zat zat a, a kut chu no tak tak hian a phar kual vêl a. He pa thiamzia hi ka țhiante'n an sawi fo tawh a, ka la tlawh ve ngai lo nain TV-a faknaah pawh ka hmu fo tawh a, hetianga țawng no nêm hi a lo ni tih erawh ka hre ve chiah.

Ka mit hmul a khawih phawt a, nâ ti viau mah ila engtin mah ka awm duh lo, chutiang chiahin ka sam a suasam chhûng pawh chuan Chèngkawl ang maiin ka lo ngawi reng a, țawngkam khat tê pawh ka chhâk chhuak lo, amah pawhin min be lêm lo va, ka be bîk lo, 'suasam' tih țawngkam hi a mawi vak lo maithei a; mahse, ka hmang lo thei lo. Kei chuan ka sam hi ka su fai a, ka khuih tawp a, ka thlah leh tawp a, ka khawih danglam ngai lo. Ani hi chuan kum khata ka khawih ang zât deuhthaw vawiin hian a khawihin ka ring hial! A sei zâwng a tan a, ka ui hran chuang lo, a duh duh dànin suasam mai teh se, vawiin chauh chu. Bâkah, ka lu a han khawih vêl chu nuam ka ti tlat, ka mut pawh a chhuak selh selh maiin ka hria.

"I inhmeh lutuk! Ka khawih tawhah chuan i la inhmeh ber nghe nghein ka hria," a tih no hlâi chuan ka meng chhuak a, ka mut a chhuah êm avàngin ka maimichhîng reng a ni. U Nubawihi pawh chuan," A mawi lutuk tlat! Nang hi chu pan man hi i awm ve ngawt mai, hetianga mawi lutuk tak maia i chhuah theih hi ka ring rêng a!" tiin a lo fak ve hlak bawk a, chu pa hlim hmêl chu hmuh a nuam khawp mai.

Dârthlalangah chuan ngun zetin ka inen ve a, keimah pawh ka inhai lek lek hial a ni! Mawi ka inti em ka hre chiah lo. Ka sam dum ngîl sei sang țhìn kha tlêmin a lo tãwi ta deuh hlek a, chal sam tlêm neiin ka sam pawh a lo ngîl tawh lo! A rawng pawh a lo dang daih a, a hmâwr lam phei chu ka ngei deuh chiin a lo eng buang vâr lek lek mai! Mahse, chuti chung chung pawh chuan sawisèlna țawngkam khat pawhin ka chhâk chhuak lo, ka va changkãng tawh tak êm! Ka țhiante'n min hmu thut ta se, min hai ngei ngei ang, ka lan dàn a danglam êm tawh mai.

Haw kawngah chuan," Pipiite an innei dâwn si a, hun teptèr lutukah chuan kan buai tawh dâwn a, tuna kan hman hun laia i tih loh chuan ka tia, i lan mawi loh ka hlau sia maw," U Nubawihi chuan a ti malh malh a, kei chuan," Ka inhmeh em ni?" ka lo ti ve thung a, ani chuan," Hmeh lutuk ringawt! I inhmeh kha ka ring sa hrim hrim a, pawisa hman ral pawh a inchhìrawm loh alawm," a lo ti leh a.

Ka pate pawhin min lo hmuh veleh chuan," Mi dang daih emaw ka tih dâwn che chu le! I inhmeh hle mai," an lo ti a, ka pa phei chuan," Sam hmâwr lam tuiêk țanah chuan i la inhmehpui ber àwm mang e!" a ti deuh vang vang a, a nui sûng zui lehnghâl a. Ka nu pawh chuan," I inhmeh tak tak hlê mai, Bawihte; mahse, a hmâwr lam i ti danglam bîk kher kha chu a țûl viau ka ti lo khawp mai a, tûnlai mite'n mawi in lo ti a nih pawhin kei chuan țûl ka ti lëm lo; mahse, i inhmeh hlê tho bawk si," a ti ve leh duah a. 

A tûka inkhâwmnaa Jason-a'n min hmuh pawh chuan min en duh hle tih ka hmu thei reng a, inhmeh min ti ve tho ang em le? Nge ka lang danglam viau zâwk em ni ang? Ka mak a ti ang nge mawi min ti ang?

"Ka hai țêp che alawm le!" inkhâwm bànah chuan a ti a, ka lo nui mai a, amah vêk chuan," I țang thar riau mai," a ti leh a, kei chuan," A ngai ve bawk alawm," ka lo ti ve mai bawk a.

Țhianteho nèna kan inhmuh pawh chuan ka sam thar leh hmël thar chu inhmeh min tih thu an sawi tliar tliar a, Fiona-i chuan," Țang nasa maw," mi dang hriat phâk loh tùr si, Lawmpuii hriat theih tùr si chuan a han ti sap a, Lawmpuii chuan," Loh theih nâng! A thangtlàwmthlâk ve êm bawk a ni, tunah tak hian a rûk tak chuan tu emaw chu a inchhîr tawh viau ang, renew pawh a rawn tum maithei a ni," a ti sar sar bawk a, mi dangin an țawng an hre pha ve si lo va, an ngeiawm dùn hrâw hrâw a nia, an nghal si.

Pipiite innei tùra an rawn phei chuan eng thil dang mah kan ngaihtuah thei tawh bîk lo, kan buai ve nghâl vek a, mahnia duh anga tàl mai mai theih a ni tawh bîk lo. Ka thuin ka țhianteho chu inneihnaa kal ve vek tùr chuan ka sâwm ve vek a, ka thu ve theih hun lai ka ti a ni.

Pipii hi kei ai chuan a u hret a; mahse, U Nubawihi ai chuan a nau zâwk thung. Tuna a pasal tùr nèn hian kum 10 zetin an inthlau a, an hmëlah erawh a hriat hauh loh thung. An kum inthlau deuh mah se a mipa zãwk chuan a nau en ang a, a duat thei deuh zâwk ang chu.

U Nubawihi'n inneihnaa ka hâk tùr kawr fual vâr min leisak a, kawr fual vâr tihah mo kawr nèn chuan a inang hauh lo, kei chu a chhîng deuh a, ka chàwnpuar a khuh lo deuh chiah chiah. Chhîng ka ti mah mah a; mahse, min leisak ve liau liau a ni bawk si a, ka sawisèlsak duh lo a ni.

Inneih nî a nih avàngin Pipii chhang chiah Tetei'n makeup min hnawih ve bawk a, ka sam pawh min siamsak vek bawk. Hetiang lama thawk hi a lo ni a, zei pawh a zei thlarh mai. Min hnawih zo ka han inen chuan mawi ka intih ai mahin ka hur hmèl ka ti! "Ka hur hmèl e," ka ti chhuak nghe nghe a, ka țawng hre phaho chu an lo nui nasa mai.

"Hur hmèl loh kha, i inhmeh lutuk tlat! Confi tak khân awm rawh," U Nubawihi'n a rawn ti a, Tetei pawh chuan," Ni e, i confi poh leh i hmêl țha a ni mai," a lo ti ve a; mahse, makeup hmang ngai lo tân chuan confi chu a har ve det tho, ka mit khap a nuam lo va, khap zâwnga rit deuh lûka hriatna ka neih bâkah ka hmui a hnawih pawh ka hmu sen mah mah a, ka melh thlâk apiangin ka hmu theiin ka hre ziah bawk.

Car-a ka len ve dâwn loh avàngin Jason-a car-ah ka chuang ve daih a, Zarkawt lam panin kan tlän ta vang vang a. Jason-a lah chuan min fiam zuk zuk a, Nu Sangpuii leh Pa Dinga chu an lo nui leh țhìn, kei erawh chu ka nui vak ngam lo, mithmul lem min vuahsak chu a tla ang tih ka hlau a ni, ka han khawih ngam bawk si lo va, khap pawh a nuam lo, a sei mah mah a niang.

Biak in kan thlenin Jason-a hnênah chuan," Ka mit hmul hi a dik lo em?" tiin ka zâwt ta hial a, ka nui ka nui ve si a, a lo dik loh ka hlau a ni. Ani erawh chuan," A dik vek, a mawi, i mawi," a lo ti deuh duah a, ka hmui chu pet deuh fan fanin," Ka hur hmèl viau em?" ka ti leh a, a lo nui hawk mai.

"Engah nge chutiang te min zawh a? I inhmeh, i mawi ka tih tawh kha. Inrintâwkna nei rawh, mo ai pawhin i mawi daih zâwkin ka ring hial asin!" a lo ti êrh a, ner sakin a bânah ka chumsak a, chutiang fak derna âwihawm loh lutuk chu a ka ațanga chhuak atân a inhmeh lo, a tak takin min fak zâwk se...

Mo leh a țhiannu pawh an mawi e, an chei mawi khawp mai. Moneitu pawh tlangvãl hmël chhia a ni hran lo va, a dinpui a țhian pawh a chhe miah lo. Inneih inkhâwm chhûng zawnga ka lo ngaihtuah chu pasal ka nei ve ngai te a nih chuan kawr fual vâr simple taka design ka ha ang a, ka țhiannuin a pãwl duk lam deuh ha se, pangpârah pawh a vâr pahnih leh a pãwl duk pakhat. A pãwl duk tihah hian ka mitthlaa ka hmuh chu a mawi lutuk, a țhui dàn tùr zawng zawng pawh ka hmu nghâl vek.

Hazel-i'n min rawn nghawk deuh salh tâkah chuan ka ngaihtuahna ram ațangin ka harh chhuak ta nghâl a, ka en deuh hâ a, mi dang chu an lo ding deuh vek tawh niin, ka ding zui ve ta nghâl a, tlêma tlêmah ka che chhe lo chauh a lo ni.

"A ngaihtuahna ramah a lo chêng nasa lutuk a," Hazel-i'n a tih làng lâng chuan Lawmpuii chuan," A mak thei ngawt mai, zàn lama an hun hman dàn tùr a lo ngaihtuah a ni ang chu," a lo ti hlak a, ka mwlh hrãwk mai. A țawng ring lo hlauh a, kan bula mite pawhin an hre pha vak lo ang. Lawmpuii, Fiona, Hazel, Lalrina leh Maenga an rawn tel ve thei a, mi dang erawh an hman thei ta ngang lo a ni. An ti țha ka ti tawh tho tho, hman lo inti chung chungin an rawn kal hrâm hrâm hlawm a, ka fak tak zet a ni.

Lalrina'n min en leh vung vung țhìn pawh chu ka hmu ru reng. Ni e, mak min ti viau ang, hetiang hian ka inchei ngai si lo va, makeup chu thuhran, ka incheina leh ka sam te hi, ka țhiante tân thil thar a nih bâkah ka tân pawh a ni ve tho mai a, dârthlalanga ka inen châng apiangin mak ka la inti ve tho.

"Moneitupa best saw, a chhe miah lo," Fiona-i'n a tih chuan," Nia," ka lo ti ve a, Maenga chuan," Ka hria asin; mahse, nupui a nei tawh a," a lo ti vat a, pawi tiin kan lo 'aw' vawng vawng mai. Amah Fiona-i ber chuan," Nupui nei tawh pawh ni se a chhe lo tho," a lo ti leh a, chutah, zawi deuh sapa," A pathlawi hun nghâk rilru teh ang," a tih zawm leh tâkah chuan kan nui ta vek a.

Inneite thla kan lâkpui ve hnuah chuan thil kan ei a, keimahni ngei pawh chuan thla kan la ve mawlh mawlh bawk a, Maenga chuan," Mo aia chhe lo tih ka nei, vawiinah tak hi chuan," a han ti a, Lawmpuii chuan," Tluangi i sawina a ni chiang. Het, chutiang sawi suh, lo thîktu che an awm ang e," tiin Jason-a chu a han melh zauh a, a nui pah bawk a. Jason-a pawh chuan," Chhe lo in lo ti ve tho elo? Ka mit a tla lo chauh a ni," a lo ti ve a, min rawn enin a meng zîm deuh a,  fiamthu mah ni se nuam ka ti viau a, chutih rual erawh chuan ka zak ru tho bawk.

Lalrina'n," I lang dang ngawt mai. A hma khân khatiangte khân lo inchei daih tawh la, i inhmeh hle si a," tia min fak chuan ka nui lui sak a, min en duh nia ka hriat kha a lo dik a nih hi. Ka inhmeh ve tak tak pawh a ni ngei ang, nge ka inchei nù ta viau chu min fakna zâwk ni ang?

Chaw dawh tùrin kan kal nghâl a, in hnuai lam hmun rem zetah hian a ni a; mahse; ka pheikhawk bun a sàn deuh avàng chuan ka ke a kham tawhin a na tak zet tawh a, chaw dawh tùra intlar pawh chu ka huphurh tawh viau a ni.

Ka rilru hria ni àwm tak hian Jason-a chuan," Lo țhu hahdam rawh, ka lo lâksak ang che," tiin țhutna lam min panpui a," I inbun sâng sì a, i kè kha a kham tawh ang tih ka hria a ni, lo țhu chàwl vang vang rawh," tiin ka ke nghahna tùr thingtum ni àwm tak chu min pawh hnaihsak bawk a, ka hnial buai peih lo," Ka lãwm e," ka ti sap a, ka pheikhawk chu phelh nghâlin ka ke chu thingtumah chuan ka nghat a, ka chàwn chu ka chùm dat dat a.

"Ka lo hmehsak lawk dâwn che em ni?" a rawn tih chuan a lo la kal sawn lo tih ka hre chiah. Ka chhàn hma chuan rawn țhu hniamin ka ke chu a'n hrãwm nawk nawk a, a nuam kher mai, ka chàwn pawh chu nemin a han hmet deuh bawk a," I chau ngawt ang. Nilênga hetiang sâng bun hi chu a hahthlâk dâwn hian ka hre khawp a, in chhel hi ka ti zâwk asin," a ti a.

"Nalh tum chuan a ngai alawm," ka ti ve thung a, ani pawh chuan," A dik alawm, i nalh rêng bawk a," a lo ti zui leh a, ka en chuan min lo en ve reng a, a bânah chuan chumsakin," Ka ning, min fiam reng lo teh u," ka ti sap a.

"Ka fiam lo che, vawiina inkhâwm zîngah khân i nalh ber, mo ai pawhin i nalh daih zâwk!"

*MIHRINGIN HUN A NEIH REI LOHZIA HI, VAWIINA MIHRING KHA NAKTÛKAH CHUAN MITTHI A NI THEI. HUN REI LO TÊ I NEIH KHA A ȚHA THEI ANG BER ZÊLIN HMANG ANG CHE*