☆SUMRISANG☆ - 2 By Dingdi Pachuau

☆SUMRISANG☆ - 2 By Dingdi Pachuau

Ka ngaihtuah tam lo ve bawk a, Lalrina hre chat thei tùrin Jason-a kha Lalrina hmêl leh pianhmang chu sawi loh, a thlalâk takngial pawh ka hmuh hauh lo tih ka hre chhuak a; mahse, a hre chhawm ve zêl ang chu maw ka ti ta ringawt.  Bâkah, kan thlalâk dun tam zâwk ka delete tawh a, țhianhoa kan lâkna bâk chu ka nei tawh kher lo ang. A, a hre ve thuai mai ang.

Țhian hi ka ngaina a, inhmuh khâwm lât lâta chaw ei khâwm pawh kan uar. Ka pa hian min duat a, pawisa thawk chhuak hauh lo hian pawisa hi ka nei thei ve riau a, ka nu leh U Nubawihi hian min zilh phah fo; mahse, min duat ve ve tho tih ka hre kar a, min zilh lai hi chuan ka ngawi kar a, ka zàwm lêm hlei lo va. Ka pain min sawisèl ve ngai loh avàng leh pawisa min petu ber a nih avàngin ka tân ka nu leh ka u min zilhna chhàn léta thinrim kher kha a ngai lo a ni.

Ka nù zêm loh vàng hi nge, scooty pawh hi hmeichhe nù deuh deuh hian khalh se, Vli te, U Nubawihi te ang hian, an inhmeh tâwk chiah ka ti. Bike khalh hi nuam ka ti a, ka inhmeh zâwk ka ti bawk. Ka țhian mipate leh Lalrina bike ngei ngei pawh ka khalhsak fo a, ka pa bulah pawh ka sawi ve tawh nghe nghe; mahse, ani erawhin lei a tum lo bur thung. "Scooty hi khalh mai mai rawh, a âwm a nêm a, in zo tâwk chiah, hmeichhia chuan in inhmeh," a ti țhìn. Hmeichhia niin nula ka ni tih chu ka hre ve tho , sam sei pawh hi mawi ka ti, ka zuah sei ve ngei bawk a; mahse, mipa hîp thei tùr zâwng leh an duh zâwng tùr anga han tih kual vêl hi ka ti ngai lo hrim hrim, ka zuah tawp a, ka thlah mãwl leh tawp a ni mai, rualpui dangte angin makeup pawh ka uar ve lêm lo, a chhan pawh hun a heh bâkah ka inhmeh ka ti thei hlawl lo a ni; strawberry lip gloss erawh engtik lai pawhin ka kawl thung. Ka vun lamah hian ka pachhùn lovin ka nu ka chhùn a, ka hàng lo hlauh hi ka vànneihna a ni ang chu, ka țhiante pawhin 'I ngo a, nang hi chu i vànnei ngawt mai, sum tam tak sênga ngo kan tum lai laiin... vànnei tak i ni' min ti ziah alawm. 

Kan hman tlâng ve bawk a ni, chaw ei khâwm an rawt lehpek a! 'An' ka tih chhan pawh kei chuan ka sawi ve lo hrim hrim a, ka peih vak lo a ni ber ang chu. A hma kha chuan a nuam ka tiin phùr pawh ka phûr țhìn, tunah chuan... kawppui neiin an rawn hruai leh fir fer ang a, ka chuang tawh dâwn asin, Lalrinate pahnih induh lai ka hmuh leh palh hlauh phei chuan... min intih theih khum ka ti mai, hei vàng tak hian ka phûr lo. Mahse, 'E, ka bialpa thar Jason-a sâwm ve ila a țha viau ang chu, Lalrina elsènna hun țha ka nei ve dâwn a ni mai a' tiin ka phûr thar leh ta riau a.

Jason-a chuan ho hi a lo ti khawp mai a, chu chuan ka thin a ti rim thar leh ta tlat pek a, sâwmtu zâwk leh mamawhtu zâwk ka ni tih lam ka ngaihtuahnaah a awm leh tawh lo," Lo kal tawp suh! Ka thil sawi zawng zawng pawh kha theihnghilh vek rawh!" ka ti tuar tuar a, phone chu khumah ka paih zui leh nghâl a. Ka bialpa lem chang tùra ka lo sâwm kha ka ti sual dêr a ni, lo sâwm lo tawp ila țha tùr, ka thurûk ka la hrilh vek zui. "Mipa pawh a ni lo, mipè a nih dâwn hi mipè... rin tlâk loh lutuk mai! Hmeichhe lâk tlâk loh an sawi ang mai!" tiin ka thinrim chu ka âng a, ka insawh tàu bur bur zui a.

Phûr lo zet chuan ka insiam a, ka rilruin Jason-a chu ka àn khum pah mawlh mawlh bawk, ka pain scooty keng mai tùrin min hrilh a; mahse, Mamuana'n min rawn lam ta hlauh mai, kan vêngah an awm ve lo nain vêng ințhenawm lawk kan ni a, a tân min rawn sàwm ve nghâl mai kha a rem ve êm bawk a ni.

Maengate in hnuaiah bawk a nia chaw kan ei khâwm leh dâwn ni, an in hnuai hi a remchâng a, a nu leh pa an fel bawk a, kan țhianzaho in pakhat ti ila kan sawi sual lo ang. College chawlh hun a la nih bâkah hna dang han thawk lâwp lâwpte pawhin hetiang hun hi chu kan miss ngai lo, Aizawl khaw chhûng vek kan ni bawk a, kan inthurual thei phian asin.

Eirawng bâwlin mipa an buai nak nak a, hmeichhia erawh chu kan buai ve hran lo. Kan indaih bawk a, a țhen an lâm a, a țhenin salad kan buaipui a, a țhenin ei siam mipate ei tùr an lo pe bawk a, ei siam lutuk lo mipa lâm an awm ve tho bawk a. A, kan indaih tlâng bawk a ni. 

Kan kim țhep țhawp viau tawh a,  a tlai chhiat tak tak hmain tiin chaw ei deuh thuai chu an rawt a, Jaz-a'n," A la hma alawm, ril pawh a la țâm hman êm hleinem," a tih chuan  Mamuana chuan," Ni e, minute 15 vêl chu lâm rih phawt ang u," a lo ti ve a, kan nui hak hlawm nghe nghe. Làm hi a peih ve a, music a rîk hlek tawh chuan lâm ve nghâl mai thei ang nun kha a nei ve a ni.

A țhen an làm laiin a țhenin thla an lo la a, kawp nei deuh vek an nih avàngin ka chechàng peih hran lo a nia; mahse, Lalrina min țhen tuar anga ka lan ka hlauh avàngin lâm zîngah chuan ka tel ve a, Mamuana chu ka làmpui nghawng nghawng a,  a mood-ah ka chêng leh thuai mai nghe nghe a, nuam lah chu ka la ti zêk zui.

Kan lâm zo ka țhutna lam ka pan phei chu Jason-a hmêl ka hmu ta thut mai! Fiona-i bulah a ni nghe nghe, ka ding chawt a, engtik lai khân nge a rawn luh a? Kalna tùr lah a rawn hre dik chat zui a nih hmèl a, hei a hriat reng alawm, nge, he lai hi a lo hre sa tawh zâwk ni ang? Nge ni a, Fiona-i nèn sâwn an lo inhre sa zâwk? An lo ding dùn bawk sia. Chu pawh chu lo ni se, ho kha a ti hlê sia, a rawn kal pawh ka ring lo asin!

"I rawn kal dâwn lo ni khân ka hre--" ka la țawng lai mêk chuan," Ka tih lunghnùr duh che i ring tak tak tih min hrilh miah suh," a lo ti vat a, min chhàn dàn ai mah chuan a rawn kal chu mak ka ti a, phâwk deuh tak leh khap hauh lo hian ka en deuh reng a, Fiona-i chuan aw a lo thian kharh a," I làm laiin ka lo titipui mai mai chauh a nia," a lo ti a, ka en chuan nui țhâ sì, meinei tak chung hian a mitko chu a'n sàn ãk a, a kal sawn zui ta nghâl a, a tawrhhlelhawm leh maithei a ni. Jason-a chu ka en leh a, ani pawh chuan nui sukin a dinna bula țhutna ruak chu a mitmei ta zauh a, kan țhu zui nghâl a. Chutih rual chuan kan piah lawka Lalrina leh Vli lo țhu ve reng chu ka mitsîrin ka hmu ru nghâl a, tûn hun tluka lem chan nâna hun țha hi a awm tawh lo ang, lo innêl sa tawh kan ni bawk a, lem chan mai mai zawng a har dâwn lo lutuk.

Ka làm nasat avàng chuan lum ka ti  a, ka jacket ka phelh a, ani chuan ka rilru hre sa vek ni àwm tak hian ka jacket chu a lo ban vat a, chutia lo ban ta chu kei pawh chuan ka pe ve mai bawk a. Hawi kualin ka țhiante chu ka'n melh kual deuh a, mitko sàni min lo melh zak zak hlawm tih ka hmuh chuan ka nui ta sak a, Lalrinate lam erawh ka en duh țhak nâng. Hmël thar a nih avàngin tu vakin an la hre dâwn lo tih ka hria, Fiona-i erawh kha chuan a lo hre tawh maithei, an lo titi dùn bawk sia. Han hmêl hriattîr hlawm pawh chu ka tih tùr hmasa ber a ni tih ka hria, kan țhianho tih dàn a ni ve a, kan zînga mi ni lo hi chu outsider kan ti deuh kher țhìn nghe nghe; mahse, a hmanhmawhthlâk loh êm mai, ka hmanhmawh chûk lo ang.

Mahse," Tluangi, țhian thar kan nei dâwn a ni maw?" tia Mamuana a rawn țawng chhuah tâkah chuan tûn hi hun dik tak zâwkah ngaiin," Aw, a nih hi. Han hmêl hriattîr tùr che uin hun remchâng a la awm thei mai si lo va," tiin Jason-a chu ka han en a, ani pawh chuan min lo en ve ràn a, chutah, hawi kualin," Ka țhianpa Jason-a a nih hi," ka han ti a, ka sawi zo chiah chu kut an lo bêng dar dar a, nui sakin ka bêng zui ve nghâl a. 'Ka țhianpa' ka tih chuan 'Ka bialpa a ni' tihna a ni, keini hi chuan kan hre thiam vek. Chumi hnuah mi dangte chu ka hmël hriattîr zui leh a, an hming ka sawi apiangte chu a lu a bûk khum zël a, Lalrina hming ka sawi lai chuan ka ngaihbel deuh nge ni, a lu chu a bûk khum nêp deuhin ka hria.

"Nuam ti deuhin hun hman i tum dâwn nia, i țhiante vek kan nih hi," Maenga'n a lo ti a, Jason-a pawh chuan," Aw le, ka lãwm e, a nuam dâwn khawpin ka hria," a ti phawt a, chutah," Mi thar ber mah ni ila a lawm nân chaw ei kham lama thil in ho tùr ka lo show ang e," a ti zui leh a, kut bêng rî a ring kher mai. Ka en chuan min lo nuih suk a, ani hi a lo inthlahrung ru deuh a ni mai lo'ng maw, pawisa a thawh ve loh avàng maiin? A va ho tak! A rawn kal chu a hek phah duai dâwn a nih hi. Lalrina chu ka mitsìr zauh a, min ngaihven hmèl lêm loh, Jason-a erawh a melh deuh ràn tih ka hmuh chuan a rûkin ka thinlung chhûngril a nui var var mai, ka thil ruahman chu a fuh dâwn e. 

Chaw ei tùr kan han dawh diat diat a, Jason-a'n ka ei tùr min dawhsak thlap mai, lem chan mai mai chu a hneh dâwn khawp hi, hmeichheho zîngah Fiona-i leh Lawmpuii an harh fâl a, Jason-a'n chutia min ngaihsak vêl lai chuan ring zet zet hian an lo 'ehem' dùn a, an nui dùn sûng bawk si, kei pawhin ka nuih lêt a, Jason-a erawh chuan hre àwm hmêl pawh a pu lo. 

Dawhkàn sei pui mai hi kan kîl a, ka hma chiahah Jason-a chu țhuin ka chaw ei chu min vil ka ti mai, a ei tùr pawh ngaihsak lêm lo ni àwm tak hian min en deuh reng a. Kan têt lai ka hre chhuak zawk nghe nghe, a nau Kristie kha a duat țhìn viau a, kei pawh min duat, an ina chaw ka ei châng pawh khân ka ei duh zâwng min zâwtin min suahsak vei thlap țhìn a nih kha, Kristie nèn min duat theih êm avàng khân ka nute bulah pawh u mipa tùr ka ngèn chiam tawh nghe nghe. U Nubawihi kha chuan min duat tho nain ani kha chu hmeichhia a nih bâkah a lian tawh a, kan kàwm phâk ve lo a ni.

Mi dang chu chaw ei pah chuan an titi nak nak hlawm a, chaw chu ei tum anga a lan loh avàng chuan" Chaw kha ei la?" ka han ti a, ani chuan," Ei puar hmasa phawt rawh," a lo ti mai a, ei tum àwm pawhin a awm chuang lo. Hmarcha chu ka hmuh sual lehnghâl a, tomato ràwt pângngai emaw tiin ka ei hlaih a, a thak êm avàng chuan ka irhfiak nghâl awk awk mai, ka helh pah zui, ka tâwt up up thei hial nia. Mi dang chêt hma chuan tho vatin tui bottle a va la a, dispo noah chuan thlîin min pe vat a, ka hnung zàwi tê tê hian a rawn zût zui nghâl bawk a.

Mittui tla phunga ka'n awm chuh! A chêt chhiat theih hle mai, Jason-a rawmawl min pêk chuan ka mittui chu ka'n hrù a, ka hnâr pawh a ping vek mai.

"I chaw ei i han țah ngawt chu le, a eng ber khân nge i lung tichhia a?" Mamuana'n a rawn tih chuan a fiamthu a ni tih ka hre ve tho a," In siam tui lutuk a, ka han ei khân hnuk a ulh char char alâwm," insût hraih chuan ka lo ti ve zat a, an lo nui hak hlawm nghe nghe. Jason-a chuan," Ani hi chu a rilru hi a țha êm mai a, kan sa ei mêk dam lai a lo ngaihtuah thlen leh tawh vàng a nih hi," a lo ti a, chutia a lo ti kher chu ka run deuh a, rum deuh hian ka melh a. 

Chaw chu tlêm a ei ve hlek. Chaw ei kham lamah chuan boruak a nawm êm avàngin in chung zâwl lamah hun kan hmang ve thung a, Jason-a in tùr show chu kan dawm far a, kan titi nak nak hlawm bawk. Jason-a chu ka bul chiahah țhuin a țawng ve zauh zauh a. Sual chhuah nuam ti ta rêng rêng Lawmpuii chuan," Engtik ațang chiahin nge nangni pahnih hi in lo inzui țan le?" a rawn ti chhuak a, rang fahran hian sual chhuah lama a thurualpui, a phìrpui Fiona-i pawh chuan," Ka zawh tum tak! Ni e, interview nei lawk ang u," phûr zet hian a rawn ti ve leh a, he mite  pahnih tak hi chu aw...

Kei chuan an zawhna chu ka chhâng ve mang lo, Jason-a chuan a chhâng zêl a, hmun dang en lovin min en pah reng bawk a, a chhànna avàng chuan ka lo nui sak sak ringawt.

"Kan inzuina la rei lo mah se kan inhriatna chu a rei tawh, nangni ai pawh hian kan inhriatna a rei tawh hial ang chu. Ni lo'm ni?" a rawn tih chuan," A dik," ka lo ti ve a. Maenga chuan," A nih tak chu, in inhriat chian viau dâwn chu a," a lo ti a, ani chuan," Hre chiang ve bawk e, kei aia hre chiang tùr hi chu an awm tam vak lo ang," a lo ti leh a.

Mamuana chuan," Inhriat chian hi a țhatna lai tam tak awm mah se, a țhat lohna lai pawh a awm ve tho ka ti," a lo ti daih thung a, Hazel-i chuan," Kei pawh ka ti ve chiah!" lu bu nghat nghat hian a lo ti a, ngaih dàn nei vek kan nih avàng chuan kan ngaih dàn hrang hrang chu kan sawi tliar tliar hlawm a, Lalrina pek chuan inhriat chian viau ai chuan hriat chian vak loh a duh thu a lo sawi ve zauh pek a, tuna a bialnu Vli hi a lo hre chiang lutuk lo a ni maithei a ni, kei chuan hriat chian tak ka duh daih zâwk sia, kan ngaih dàn a inang lo hle mai, engtin nge maw kan lo inkawp theih zâwk ni?

Zàn a rei tak tak hma chuan haw tùrin kan chhuk ta sang sang a, Jason-a'n lèn kual rih a sawi rîk chuan Lawmpuii pek chuan," Ni e, nuam takin hun hmang rawh u khai; mahse, duhthawh lutuk lo ula," a rawn ti lehpek a, a thurualpui ngar ngar Fiona-i pawh a bãng leh lo," Ni e, chin tâwk neih thiam ula," a lo ti ve leh zauh a, he mite pahnih hi chu ka chùm awk awk châk țhìn.

Bike a rawn ken ka rin tehlul nèn, car a rawn keng zâwk niin. Mamuana chuan," A changtupa a lo thleng tawh bawk a, thlah in ngai lo ang chu tiraw?" nui chung hian a rawn ti fiamthu a, kei chuan," Ngai lo mai rawh se, in haw nghâl vek dâwn em ni? Lêng kual ve rih ula?" ka ti a, anni chuan," Chhûngte'n min hau palh ang," an rawn ti hlawm a nih chu, âwihawm loh hlawm hian!

Kan tlãn chhuak hmasa ber a, kan vêng lam pana kan tlàn loh avàng chuan," Khawiah nge kan kal dâwn?" ka'n ti hê hâw a, ani chuan," Lèn kual kha ka sawi ri ve tawh si a, an hmuh theih lai chuan lem kan chang chhunzawm rih ang chu," a lo ti mai a, kei ai chuan a lo ngaihtuah thui deuh chu a lo nih hi.

Kan tlàn kual thui deuh hnu chuan kan vêng lam panna kawng lamah inherin kan tlãn lêt leh a, zai a play a, ka zàwm pah rât rât a, a hla play-in a zir bawk a, boruak a nuamin motor tlãn a tam lutuk lo bawk nèn, nuam ka va ti reuh mai mai tak!

"Chhuah zauh zauh tùr a nih hi, a nuam êm mai," ka tih chuan," Chhuak ngai lo ang ziazângin!" a lo ti sup a, a thil sawi dàn chu ka run êm avàng chuan a lam hawiin," Ka chhuak hrât viau lo aw, chaw ei khâwm chânga ka chhuah tih lohah chuan ka chhuak ngai bîk bawk lo," ka ti hlar a, rum deuh hian ka melh bawk a. Thinrim viau ka tum laiin ka hla duh ber zînga pakhat music a rawn rîk takah chuan chu lam chu ka theihnghilh leh ta zâwk a, phûr zet hian music rem chuan ka bu nghat nghat zui a.

*A CHÂNG HI CHUAN THURÀWN PÊK LAM AIIN NGAIHTHLÂKSAK LAM HIAN KAWNGRO A SUT ZÂWK CHÂNG A AWM A NIA*