☆SUMRISANG☆- 3 By Dingdi Pachuau

☆SUMRISANG☆ - 3 By Dingdi Pachuau

Țhianho group chu a lùn teh e. Kan inhre chiang ve hlawm bawk a, min kâp nasa hlawm viau mai. Lalrina leh Vli erawh an rawn lang ve vak lo va; mahse, an online ve reng tho, ka thil ziak pawh an hmuin an chhiar ve zêl tih pawh ka hmu a, ka hlim veng veng mai.

Țhianho hun kan hmannaah rêng rêng chuan a tel chho ve ta zêl a, tu mahin an en mi hrang lo va, nuam a ti ve zêl tùrah ka ngai bawk, ka sàwm lah hian a hman leh hman loh lam ka ngaihtuah ngai lo hrim hrim a, a rawn tel zêl tùrah ka ngai tawp mai a ni. Kan kal lamah hi chuan kan inngeih thei viau a, haw lamah hi chuan ka hnial haw ziah thung. 

Zan khat pawh kan haw lamah khalh chak deuh tùrin ka ti a, tlàn chak hi nuam ka ti si a. Ani erawh chuan," Ka speed hi a tâwk chiah," a lo ti tlat thung a, motor tlãn an awm ve nual si a, tlãn chak a duh lo tih chu hre reng mah ila, han hnial ve rêng rêng ka duh avàng chuan," Putar speed dik tak a ni," ka han ti nghat a, a lo nui hak a," Putar speed," a ti a, a nui leh a.  

"I tum hmun pawh hetiang chuan i thleng hma thei nâng, dârkâr khat vêlin i tlai ziah ang chu!" ka ti leh a, ani chuan aw ki ngai reng hian," Ka tlai dâwn ai chuan chhuah lam ka hma thung a," a lo ti leh a, ka rûm nghat a," I va sual tak! Nang kher ka lo sâwm fuh kher kher che hi chu aw..." ka ti vang vang a.

"Chu, i inchhîr leh deuh tihna em ni?" a tih chuan," Aw... mahse, ka thurûk engkim ka hrilh tawh bawk che sia, awmzia a awm tawh lo, inchhîr mah ila i bànsan thei tihna a ni chuang lo aw, bànsan hun ka tihah chauh i bànsan thei ang," tiin ka intlawh khalh nghâl zat a.

Kan kawt kan thlen chuan," I lo lût ve dâwn em?" ka ti zat a, ka chhuk nghâl a, ani chuan," Inchhîr viau mah la ka chhuahpui si che a, ka rawn lût zawk ang e, bialpa fel chêtin le," tia min chhângin a bike chu a hûng fel a, ka lo chek hlak a," Vêl a che! I tlàn muan muan nèn; mahse, thingpui chu i hlawh dâwn tho nia," ka ti leh a, kan inzui lût zui a.

Kan lût chu ka pain min lo en vung vung a," A, nangni pahnih chu in inhmeh reuh phian mai ka ti, inkawp ve te pawh in ang dâwn dâwn alawm," nui sûng hian a lo ti a, kei chuan ner nâng nâng chung hian," Ka duh teuh lo êm mai a! Putar Speed-a tlãn țhìn bialpa neih ka duh lo," ka lo ti vat a, Jason-a chuan," Tûnlai țhalai tak hi chu aw...!!" a lo ti vang vang thung a.

U Nubawihi chuan in lêng a lo nei ve ngei niin, a bialpa a ni ngei ngei ang. Hetiang lam hi a sawi ngai lo va, ka nute bulah chuan a lo sawi tawh maithei a; mahse, ka hriatah chuan a la sawi ri miah lo, a bialpa ni ngei tùr chu a senior ve deuh tawh tih a hriat mai, an inhmeh dùn ngawt ang chu, senior ve ve! Innei daih nghe nghe se a țha ang.

Thingpui sen hâng a duh deuh kher avàng chuan ner nûng nûng chung hian ka chhuansak a, a inla duh khirh kual vêl chu ka ei thlâwt lo, kan inhnial deuh vàng khân min tirh phar vêl a duh a ni tih hriat reng, a tlàn muan muan nèn.

A haw hnuah ka pain," Bawihte, no khat chu min han siam ve leh mai teh, bawnghnute kha han pawlh tam deuh la," a rawn ti a, nichina ka zawh lai khân a duh lo va, mut ka tum tawh chu min ko lêt leh a ni.

Jason-a thingpui sen ka chhuansak la bãng hlek chu ka chhuang țha leh a, bâwnghnute tam deuh taka ka pawlh hnuah ka va pe a," Thank you, a tui ngawt ang," tiin a han dût nghâl hlak a. Nia, bawnghnute kha ka pawlh tam bawk a, a tui viau ang, thingpui siam te hi zawng ka thiam ve êm!! 

"A tak țha ngàng ngàng hlê mai maw; mahse, bâwnghnute i pawlh tam a, a tui khawp mai, i siam tui lutuk e," a tih chuan," Ka siam thiam ve zâwng tak a nia," nui chung hian ka lo ti a, ka room lam ka pan zui ta nghâl a. Mu tùrin ka insiam zui nghâl a, ka inpeih fel meuh chuan dârkâr chanve zet a lo ral leh hman tawh, zàn men rei ka duh ngai loh avàngin țhiante nèna kan chhuak a nih pawhin ka haw veleh ka mu nghâl thuai mai țhìn a ni. Ka hmai a bawl ang tih ka hlauh vàng a nia, U Nubawihi hi a hmai a bawl nasa țhìn a, ka nute hian zàn a men rei țhin hi an chhuanlam a, meng rei lo tùrin an hrilh țhìn. Skin doctor lam pawh a râwn nasa ve viau tawh a; mahse, a reh mawh a nih dâwn hi, tûn thleng pawh hian a la bawl a, chu vàng chuan, ka hmai hi a bawl ve ang tih mawlh ka hlau a ni, a na ngawt ang.

Phone-a dâr zat ka en zauh chuan WhatsApp message a lo awm vàng a, ka han en leh zawk a, Jason-a a lo ni.

*Zanin thingpui sen zet kha chu, thingpui sen ka in tawh azawngah a la tak țha tui ber maiin ka hria, thingpuifê in ngah deuh tih a hriat mai*   a rawn ti a.

Ka nui sak a. Ka pa pawhin tui a tih êm kha; mahse, Jason-a kha chuan a senin a in thung a, a sen hâng duh miau hek. Engtin nge thingpuifê kan ngah tih te chu a hriat ni? Nimin piah khân ka nuin a rawn lei nual a nih kha, a lo hmu ru te hi a ni lo maw? Nge a rawn risk mai mai?

*Chu chu engtin nge i hriat a?*  tiin ka va chhâng a, ani pawh chu a lo la meng ve reng tih hriat tak hian min rawn chhâng lêt thuai a. *Ka hre thei mai maw le* a rawn ti leh a, min hrilh leh duh tawp nâng, ka zâwt tawh àwm lo e.

*A nih tak chu, mang chhia. Mang chhe deuh deuh mang ang che, tlàn- muang-pa*  tiin ka text leh a, nui sakin data ka off a, ka mu țha zui ta nghâl a, a chhiar hunah a ngei teh ang chu.

College ka chhuak ve tawh a; mahse, ka zir zawm tawh rih lo. Dik tak chuan lehkha zir hi ka peih hlawl lo a, college tal chhuah ve erawh ka duh avàngin ka ti hrâm hrâm a ni. Infiamna lam hi nuam ka ti a, infiamna rau rauah pawh Volleyball hi nuam ka ti ber a, ka tui bawk; mahse, ka nute'n min rem tihsak tlat lo a," Eizawn nân a tlâk loh, hmeichhia i ni lehnghâl, hmeichhe tih àwm zawng zâwk rawh," an ti tlat a, tui viau ringawt mah ila chhûngte berin min tuipui loh chuan ka ti lui bîk lo va, thawh nei tak tak si lovin ka la thên kual vêl mai mai rih a ni. Lehkha ka zir peih tawh si lo, school-a inhlawh lah chu hlawh a tlèm bâkah naupang zirtîr lam hi ka tui țhak bawk si lo va, ka zirtîrte mi ang loah ka chhuah țeuh ang tih a hlauhawm, chu vàng chuan ka duh lo. Dàwr nghah tùr chu ka hmu reng; mahse, duh hun huna chawlh theih loh tùr lai tak hian min tih buai țhin avàngin ka la nghâk duh lo a ni, free deuh taka awm helh helh hi ka la thlahlel tlat.

Inrinni tlai a ni a, Nu Sangpuii'n Baibîng rêp buh nèna a bai chu kan chhûngkuain ei ve ngei se tih min duhsak avàngin Jason-a a rawn dahtîr a, ka nu chuan," I nu țhìn hi chu... a tui ngawt ang! Ngawi tak rawh, ka Dawl rêp bai hi i suak haw ve nghâl dâwn nia," a ti sauh sauh a, ani chuan," A ngai chuang hleinem; mahse, a tui ngawt ang," a lo ti ve a, ka nu chuan," A tui ngût pawhin ka ring lo, i nu angin bai hi ka thiam ve mang si lo va," a ti leh a, chutah, Jason-a chu enin," Țhu rih rawh, a hmanhmawhthlâk loh êm mai, țhu rih rawh, thingpui kan in dâwn nia, Kurtai pawh kan neih kha," a ti leh a.

Thingpui sen hâng nèn a tih deuh tlat avàngin ka lum leh a, Kurtai nèn ka va chhawp a, a hnu deuhah ka nuin," A va tak êm êm ve!! Bawihte, a in theih hleinêm, a kha vek! Han chhuang țha leh teh, thingpuifê kha tlêm tê tak tak, a hming chauhin thlâk rawh. A sen hângah chuan thlâk tam a ngai lo," a ti a, kei chuan," Âwihawm loh, a sen thei nâng," ka lo ti mai a, ani chuan," A pãwa siam tùr a nih loh chuan a tak hma a, a hminga thlâk mai kha a tâwk êm êm a ni," a lo ti leh a.

Ka'n in ve chhin a, ka luak lo chauh a ni, a tui loh dànzia mai chuh! A khà tih bâkin ka sawi thiam lo. A dang chu ka chhuang țha leh a, ka nu rawn kalin thingpuifê chu amahin a rawn thlâk a, a thlâk zât ka hmuh chuan mak ka ti nasa mai! A tlêm lulai lutuk a ni. Hmân zàn Jason-a in tùrah khân tuna a thlâk lêt sàwm vêl zet hi ka thlâk àwm si a, nichîna ka lumsak pawh kha hmân zàna ka thlâksak ang zât vêl tho kha a ni ka thlâk ni. Chuti a nih chuan, nichina mi pawh kha ka nuin khà a ti kha a nia, hmân zàna mi pawh kha a kha țha ve khawp ang!

Thingpui va pêk pah chuan," Hmân zàna thingpui kha a khà viau em?" tiin ka han zâwt a, ani chuan," Kha lo ve, a tui ka tih tawh kha," a lo ti mai a, a tui dâwn lo chiang tih ka hre si a, khà ti chung chungin a lo in zo vek chu a ni ngei ang a, eng mah lah chu a sawi hauh si lo.

"Thingpui sen hâng ka lum vawi khatna a nia, thingpuifê thlâk dàn ka thiam lo a nih kha," ka han ti ringawt a, ani lah chuan," Krismas i la hmang tam lo êm a nih kha," a lo ti daih a! 

"Ve che! Kei aiin kum hnih bâkin i upa lo, ka lakah inla upa viau suh," ka lo ti ve leh thung a, ka nu chuan," A mak thei țhìn! I in ve bawk si lo va, Dawl rêp bai kha i lo va suak dâwn em ni ang? Tam deuh hlek khân i suak dâwn nia," a lo ti ta vat a, kei pawh chu ka tho ta thuai a. Ka nuin," A țawng leh pùng pùng țhìn a, a mawi loh thu ka hrilh ngun viau tawh chung pawh hian a la sim hlei thei lo chu a nih hi," tia ka chanchin a sawi zui pawh chu ka hre reng a, nuih pawh ka nui duh lo, Jason-a bulah kher a sawi chu ka duh lo, zaidam deuh deuha min zilh ka duh lo a ni.

Nu Sangpuii Baibing rêp bai chu a tui kan ti tlâng kher mai. Ka nu hian baiah kher hi chuan a tluk lo deuhin ka hria, min rawn suah ve fo tawh a, thak deuh leh al deuh țhak hian a bai țhìn a, kei phei chuan thak ka ti deuh țhìn si a, tui ka tiin ka ei lo phal meuh lo bawk nèn, mittui tla phungin leh hnâr sen vekin ka ei țhìn rêng a ni.

"Ka hmai bawl hi a zual deuh tlatin ka hria, kârleh lam chu  Dr Zonuna ka pan leh mai dâwn em maw ni ka ti deuh a," U Nubawihi'n a tih chuan ka nu chuan," A mak ngawt mai, ka nulât laiin ka hmai a bawl ve ngai si lo va, engtizia nge maw ni le? I inentîr nasa ve viau tawh bawk si a," a lo ti a, ka pa chuan," Zànah i meng rei thei êm a nih kha, mu hma deuh la i zia ngei ngei ang," a lo ti ve thung a.

"A, hmai bawl chi hi kan awm ve hrim hrim alawm, zàn men rei lam a ni lo, ka țhiante pawh an meng rei thei lutuk, an hmai a bawl chuang lo," U Nubawihi chuan a ti ve thung a, kei chuan," Nangmah vàng hian zàn pawh ka meng rei ngam ngai lo, a nat hmèl thei bawk sia, ka hmai hi a bawl ve ang tih ka hlau," ka lo ti a. Ani chuan," Nang chu ka nu vun i chhùn a, meng rei pawh ni la a bawl ve pawhin ka ring lo, i vànnei ngawt mai tiraw? Hmai bawl hi chu a hrehawm ve asin, inchei pawh hi phùrawm loh châng a tam a nia," a ti a, thâwk a la deuh hawk nghe nghe a.

"Pasal i neih hunah a reh vek mai ang," ka pa chuan a lo ti a, kei chuan," Tak tak maw?!! Chuti, lo lêngpa nèn khân innei tawh mai ula,  hmai bawl problem chu solve a ni mai ang, bâkah, in senior dùn ve ve tawh tho bawk a," ka ti vat a, ka thil sawi avàng chuan ka pa chu a nui ta huk huk a, U Nubawihi chuan," Mãwl muk lutuk lo teh, duh duh hi an sawi ngai lo," a lo ti ve thung a, ka pa nui chu ka nu chuan a lo zàwm ve a.

U Nubawihi'n bazàrpui atân min sâwm a, ni tina office kal reng niin a hman ve nîa min sàwm tak khauhah chuan ka chhuahpui a, hmeichhia takin a inthuam a, kei erawh chuan T-shirt ha tawpin kekawr thâwl deuh  ka inthawlh leh tawp a, ka sam pawh a ngai tein ka thlah mãwl leh tawp a.

"I sam hi chu tih danglamsak deuh hlek che ka châk ngawt mai!" a tih chuan," Ka peih lo!" ka lo ti thung a, a chek hlak a, min en vang vang pah hian," I awm dàn hi chu aw, incheina lam hi tlêmin ngaina ve deuh teh, lêrh vàng pawh a ni lo, a mawi bîk a ni," a ti leh a, kei chuan," A ho mai mai, hun a heh si, pawisa a hek bawk," ka ti ve leh thung a, tih ngaihna vak a hre ta bîk lo a ni ang, a ngawi zui ve ta a.

A duh khirh deuh avàngin kan zawng kual nasa a, ka hre thiam reng mai, a senior ve tawh a, a duh khirh pawh hi a àwm ve viau tawh mai. Kan zawn kan zawn hnuah chuan kan hmu ve ta hrâm a, a lei tâk chu min pe pawh ni se ka ha duh miah lo ang, ka duh chi ni mawlh hek lo le.

"Min zawnpui hah êm mai," tiin T-shirt dum mawi zet mai min leisak ve a, mawi ka ti reuh khawp mai. Dàwr ațanga kan chhuah hnuah," Kan chhuak dùn khât sia, i ril a țâm tawh ang, chàwl ang aw," a ti leh a, ka lo hnial lo nasa. Ka tui a hàl tawh bâkah țhut der der ka châk tawh a ni.

A hmêl hriatte restaurant-ah min luhpui a, a la thar ve deuh bawk a ni ang, ka lo la hre ngai miah lo a nih chu! A nuam reuh phian zui a, ka sawi thiam chiah lo, a thawvengin a changkâng ru riau, chawlh pawh a zawngchhangthlâk khawpin ka ring.

Ei tùr kan nghah lai chuan Lalrina leh Vli an rawn inzui lût ve ta tlat mai! Restaurant hi a zau viau hran lo bawk si a, hmuh loh der theih chi pawh a ni lo, an la rawn inkai rial zui a! Kei nèn pawh khân kan inkai ve țhìn tho a, a la chhawm nung zêl chu a nih àwm hi.

An țhut hnuah min rawn hmu ve ta ngei a, Vli chuan min rawn nuih sak a, a kut a rawn vai zauh bawk, ka nuih lêt ve ringawt, tùm khum ringawt thu a awm si lo va. Bâkah, he nu hi chu ka haw lêm lo, huat theih pawh niin ka hre lo va, huat theih tùr pawhin a khawsa ka ti hek lo, Lalrina zâwk saw a ni ka run êm êm chu. Min țhen hnu lawka mi dang a kawp nghâl thei kha ka haw ve hrim hrim, min ti thangtlâwm ka ti a ni, kan inkawp laiin Vli a lo duh daih tawh zui, tlâwm ngawih ngawih tak ka ni.

En loh ka tum pawhin ka lo mitsìr leh țhìn a, Lalrina chuan Jason-a tih dàn a la ka ti mai, Vli ei tùr chu a'n chawh kualsak vêl ve a nih chu! Ve lutuk a! A inla romantic kual vêl chu ka ei thlâwt lo, sawtiang saw chuan Jason-a'n min duat daih tawh, a method apply saw mi tih dàn a copy a nih saw! A rilru puak chhuak pângngaiah sawtianga tih nachâng saw a hmain a hre teuh lo mai!

Ka nui sak a. Ngawi tak rawh se, hun kan la hmang tlâng leh ang chu. Chutih hunah chuan romantic tâwkin a nia kan chêt leh dâwn ni, kan dah nîl khawp ang. Jason-a lahin a lem chan a hnehsawh bawk a, a indah hniam rawih rawihna tùrin a nia ka chêttîr dâwn ni! Ani kher lo saw mipa dang ka duh ve thei tho a ni tih ka hmuhtîr khawp ang.

*MAHNI THINRIMNA HNEHTU CHUAN A HMÊLMA HLAUHAWM BER A HNEH A NI, KAN HMÊLMA CHU KEIMAHNI ȚHEUH HI KAN NI SI A*