☆SUMRISANG☆ - 5 By Dingdi Pachuau

☆SUMRISANG☆ - 5 By Dingdi Pachuau

Kan țhianho zînga inti doctor kan tih mai, 'Dr Hrekim' ti ngata a hming pawh kan phuahsak Jaz chuan dìm tê têin min zùtsak a, ani hi a letling zâwnga piang a ni ve a, hriat pawh a hre ve viau nghe nghe. A ruh chu tliak lovin ka bilh deuh hlek niin a sawi ngei a, Jason-a chuan a âwih loh hmèl kher mai. Haw nghâl mai a rawt nghe nghe a; mahse, kei chuan ka lo hnial thung, tûn ang hun hi kan tawng khât leh tawh dâwn si a, haw daih chu ka ui a ni.

Thlâmah chuan Jason-a chuan min awmpui a, haw duh hek lo i, mi dang min awmpui pawh chu ka duh lo va, Jason-a chuan," A nat dàn dik tak kan hre chiang si lo va, haw duh mai la?" a ti leh țhìn a, kei erawh chu ka lo ngawi mai thung. Ka ke chu kan theihtâwpin kan tuam lum ve a, ka rap țha ngam chiah lo nèn, a na rei ang tih ka hlau viau tak zet. Țhian dangte infiam chhunzawm chu thlâm ațang chuan ka thlîr vang vang a, ka ke avàng chuan ka thin a ur ru țûng mai. Kan chak dâwn asin le, Lalrina pawh ka la ben per hman bawk si lo. Kan hma lam hun tùr kan hriat loh bâkah kan kal leh hun tùr kan hre hauh lo va, nakkum lam daihte a nih phei chuan kan dam thleng kher ang em tih pawh a hriat loh a nia, a pawi tak tak a ni.

Nuam ti tak chuan ka nilêng ve ta tho a, ka lâm thei ta lo erawh a kim lo ta hûih maiin ka hria. Kan haw tùr Bike-a ka lâwn dâwn chuan min lo pui liam liam hlawm a, Lalrina ngei pawh min hlâng chhotu zîngah a rawn tel nghe nghe. Chak vak lovin kan tlãn a, tlãn chak tùra ka hrilh pawhin a tlãn chak duh dêr lo.

"Putar speed hi ka ning ngawt mai!" ka tih chuan a nui hak a, chutiang bâka tih dàn tùr hre hek lo i, a tlãn chak duh chuang bawk si lo. Ka ke dam țha se, han khalh chhâwk ka châk ngawt mai, ramhuai speed-in a nia ka tlànpui dâwn ni.

In kan thlena ka ke chungchâng a hriat chuan ka pa chu a phîlî viau mai a, damdawi in lama tlàn a rawt nghâl a; mahse, U Nubawihi chuan," Ruh lam hre deuh hmêl hriat ka nei, chu chu pan zâwk ang u, ka'n phone nghe nghe ang e," a lo ti a, a han phone nghâl chûk chûk a, mipa a lo la ni zui teh, ka u hi mipa lam a ngaihtuah loh hmèl nèn, mipa hmêl hriat a neih tam hmèl riau mai.

Va pan ngai lovin chu pa chuan min rawn kalchilh zâwk nghe nghe a, ka  lo inbual fai hman tawh a, ka thuamhnaw pawh ka thlâk vek tawh bawk. A rawn thlen hian Jason-a pawh a haw tawh a; mahse, a rawn kal leh tùr thu a sawi thung.

A kut lian chum deuh buang chuan ka ke chu a'n khawih vêl a, nâ chu ka ti ve kher mai; mahse, ka tuar hrâm hrâm a, ka bilh nat deuh hlek avànga dim a ngaih thu leh dam tùr chuan hun a duh rei ve deuh tùr thu chu a sawi dût dût a, a kut a dam lo viau nain a aw erawh a dam phian viau thung. A aw chu a thûm țha si a, a aw ațang ringawt pawhin mipa tê tak chu a ni thei lo tih pawh a hriat ngawih ngawih.

Țhiante chuan group lamah chanchin min rawn zâwt sap sap a, ka theih ang ang chuan ka'n chhâng ve a, ngaihtuah ka ngaih loh thu ka zep tel bawk. Jason-a pawh a sawi ang ngeiin a rawn lang leh a, a fai leh viau tawh mai, ei tùr min rawn kensak nual a, ice-cream chi thum lai min rawn kensak bawk, ka duh tih engtin nge a hriat ni? Khaw lum lai a ni bawk a, a tui leh khep khep dâwn lutuk.

Ka room-ah kan pahnih chauhin kan awm bawk a, ice-cream chu ka ei tuam tuam a, tui ka ti kher mai. Ani'n ka ke chu enin dìm tê hian a'n khawih chhin a, ka lo 'aiah' țhat a, a tkut a la sawn rang kher asin. Chu chu ka nuih a, ani erawh chuan a nui ve lo. Ice-cream bawk chu ka ei chhunzawm leh a," Bànsan tawh mai la?" a rawn ti ta sup a, ka thil ei lai chàwlin hre thiam lo tak chuan ka en nghâl hâ a, ani erawh chuan ka ke chauh chu a lo melh vang vang thung.

"Eng chu maw?" ka tih chuan," Tuna i thil tih mêk hi, an ti hrehawm tak zet che em ni?" a lo ti leh a, chutih rual chuan chiang zetin min rawn en ve ta thung. Kei chuan," Shh..." ti sapin ka kutzungchal chuan ka hmui chu ka dehtîr a.

"Bànsan mai tùrin bul ka țan lo, bâkah, ka ngaihzâwng neih hmasak ve ber a nia, min tih dàn hi ka pawm zam mai thei hleinem, min țhen a nih pawhin keimah ang hian ngaihzâwng nei lovin awm ve rih mai se, chutiang ni lovin min diriam hrim hrim tùrin  ka ti mai, min theihnghilhin ngaihzâwng a nei zui nghâl a nia, pawm zam mai mai chu a har ve asin. Ka tawn ang hi i la tawng ve lo va, i hre thiam lo a nih kha," ka ti ta zêk a, nûr deuh nung chuan ice-cream chu ka ei chhunzawm leh a, lungawi lo deuh mah ila ice-cream tuina chu a bo ve chuang hauh lo.

Ani pawh chuan a sawi chhunzawm tawh lo. Ice-cream ka ei zo chu ka puar ta hle mai, a tui bawk si a, ka duh ai chuan ks puar; mahse, ei zawh loh kha ka ui êm a ni. Ka bulah chuan a lo țhu ve a, a rim tui zet chuan ka hnâr a verhin a rim chu ka hîp lût nghâl raih raih bawk, a rim tui ka ti tak zet, perfume a ngainat ka rin loh nèn, a inti rim tui zêk chu inhmeh lo ka ti ve ringawt a nih chu.  Tlangvâl lêrh deuh hian hmang mai mai se, lêrh lêm lo hi chu fai takin awm tawp se an fai rim hi a rim tui ka ti țhìn a, an fai rim chhilh veka rimtui an hmang țhìn hi ka lo ui țhìn a ni.

"I rim a tui," ka ti chhuak hliai a, ani chuan," Eng maw?" a rawn ti deuh hau a, kei chuan," I rim kha a tui tawp maw le!" ka ti leh a, chutah, nui zuiin,"  Khawi lam nula nge kha i rimtui hmang khân chhài thlûk i tum deuh a?" tiin ka zâwt zui leh a.

"Naupang hriat ve chi loh!" tia min rawn chhâng kher chu ka ngei tâwk a tling. Ner khumin," Kei aia i upatna a tam lo êm mai! Khatin min ti chai suh," ka ti a, a rim tui tak chu duhãm tak hian ka'n hîp lût leh rih a, a lam hawiin," Khawi maw, lo hnai teh, ka lo hnìm țha teh ang che," ka ti leh daih a, ani chuan," Ka bialnu min leisak a nia, i duh em? Ka pe mai ang che," a ti a, min rawn hnaih deuh sauh bawk a. Kei chuan," I bialnu pêk che lo neih daih te chu ka duh teuh lo mai!" ka lo ti thung a, maimichhîng vang vangin a rim tui zet chu ka hîp lût leh vang vang a.

Kan ngawih vang vang hnuah chuan," Thil min lo kensak tam si a, ka chhuah theih veleh ei tùr eng emaw tak ka leisak ve ang che, ka ba tlat," ka ti a, ani chuan," I tih miau chuan le," a lo ti mai a," A ngai hran hleinem," tia min chhàn ka rin tehlul nèn, he pa hi chu a zei lo thei e.

A tûk inkhâwm bànah țhiante'n min rawn tlawh ve sap sap hlawm a, an bengvâr hlawm ka ti hlê mai, ei tùr ni se min rawn kensak deuh vek si a, ka dawhkànah a let rum mai. Ka room lama ka țhiante dãwl zo tùr țhutna a awm loh avàngin sitting room lamah kan insawn a, ka nu leh pate chuan ka țhiante chu an be țhain fel an ti hlawm khawp a, ka nuin thingpui tui takin a siam a, ka pain phûr takin nimin lama a lo lei lâwk cake tui zet chu kan ei tùr atân rawn chhawpin," Thingpui tui tâwk nèn khân ei țeuh rawh u, Bawihtei in rawn kan liam liam hi in fel ka ti êm mai," a ti lûng lûng a, a hmêl chu a hlim sûrh mai a, ka țhiante pawh chuan nuam an tih hmèl viauin ka hria. Ka nu pawh kan bulah a rawn țhu ve a, U Nubawihi erawh a inkhâwm bâng a țhiante ina a pèn kàwi avàngin a la rawn haw ve lo a ni.

Dârkâr khat vêl zet chu an lêng a, an haw dâwn chuan ka pa chuan," Rawn lêng leh țhìn r'u aw, Bawihtei a khua a har dâwn si a," tiin a thlah hlawm a, anni pawh chuan min lo tlawh leh an tum thu an sawi ve tliar tliar a, an haw ta chu a reh ve ruai thei nia.

Ka ke chu ka rin aiin ka hmang ngam hma zâwk!! Mahse, hmang tih lêmah ka la bãi sawih sawih tho a, zakdawh tiang erawh ka hmang tawh lo tihna mai a ni. Inah ka tawm deuh reng a, chhuak thei ni hek lo le. Fùr a rawn ni zui a, ruah a rawn sûr chho țan ta bawk nèn, ina tawm tlawk tlawk ka ninzia mai chuh! Ka ning ngawih ngawih a, țhiante lahin min rawn kan reng thei bîk bawk si lo va, chutih rualin, Jason-a erawh a rawn lang reng reng thung, ka ke chu ka theih leh ngam ang tâwka exer lâkpuia ti che tùrin min ti țhìn.

Ka dam ve deuh hnu chuan kein ka chhuak a, car khalh tùr chu a awm tho; mahse, exer ka duh a, bâkah, ka tawm rei ve deuh tawh bawk a, chhuah ka châk ve tawh hrim hrim, ka nu erawhin a la phal chiah lo deuh a; mahse, ka chhuak lui ta tho. Jason-a chhuahpuiah ka sâwm ve deuh nain hna lamah a buai lutuk a, ka sâwm lui ngam ta lo a ni. Amah lah chuan," Ruahin a nan haw che ang e, i chhuak a nih pawhin haw thuai la, tûn angah hi chuan ruah a rawn tlâk thut thut hi," a la rawn ti zui a.

Ei tùr lei mai mai tùra a chhuak ka ni bawk a, ka thleng thui teh chiam lo; mahse, ka chhuah khàt êm tawh avàngin haw leh thuai erawh ka tum lêm lo thung. Khua a duai a, ruah erawh a sûr lo va, a sûr êm lo ang chu maw. A sûr hlauh a nih teh chuan ka luck lo teh ang chu, nihliap ka keng hauh si lo.

Dàwrah ka lût kual a, ruah sùr lai hun mah ni se ice-cream ka ei châk leh tlat a, a hmaa Jason-a min rawn kensak ang kha ka zawng kual ve a; mahse, a vâng viau a ni. A pângngai tawp chu ka ei châk lêm si lo va, an zawrhna hmun Jason-a han zawh ka'n tum deuh thut thut a nia; mahse, hnaah a buai viau a nih kha, ka tih buai belh palh ang, ka thil zawh tum lah a ho nasa mai bawk si a.

Lunghnûr angreng takin restaurant-ah ka lût a, a neitunu chuan nui sângin min lo chhàwn a, he laiah hi chuan kan chàwl ngun ve tawh a, Lalrina nèn khân, a neitunu pawhin min hre ve tawh viau. Kan ințhen hnua ka chawlh vawi khatna tùr a ni a, rilruah a rawn thar zawr zawr mai.

Ka țhut hnu rei vak loah chuan intiam rual ang hrimin Lalrina a rawn lang ve hlawl a nih chu! Mak ka ti a, ka lo en deuh hû nghe nghe; mahse, ka inngaihtuah chiang a, ka hawi sawn ta vat a; mahse, min rawn hmu hman ve tho tih ka hria, ka lam panin a rawn kal zui ta nghâl a. 

"Mi dang țhu tùr an awm loh chuan ka lo țhu ve mai aw?" a rawn ti a, a rawn țhu nghâl bawk. Ka tân hnial chi a ni lo va, chawlhpui dang ka nei bawk si lo nèn, ka lu ka bu ringawt a.

"I ke chu a dam viau tawh a ni maw? A làwmawm hle mai," a ti leh a, hmuh loha biak loh theih ka duh tehlul nèn, min be hmasa bawk si a, chhàn loh ringawt lah a ni mang meuh si lo, ka ke chanchin min la zâwt zui.

"Nia, dam viau tawh," ti ringawtin ka chhâng a, ei tùr a order dâwn chuan," I order tawh em ni? Duh belh i nei em?" a ti leh a, ka lu ka lo thing ringawt. A ei tùr order-na lehkha nula pakhatin a rawn lam rualin ka ei tùr chu a rawn thleng ve chiah bawk a, 'ei thuai thuai ila chhuak vat vat teh ang' ka lo ti rilru nauh nauh a.

Ka ei nghâl mawlh mawlh a, Lalrina chuan," Muangchãngin ei rawh, ka ei țhensak dâwn lo che a nia," a lo ti a, ka thil ei lai ka hâk țhelh phah nghe nghe. Ka khuh kharh kharh a, tui min lo thlitsak vat a, ka hnung rawn zùt a tum erawh ka lo dang thung. Lalrina bul khera ka che chhia chu ka ngei a, ka thin a rim ru țûng bawk.

Ka khuh a reh hnu chuan," Tluangi, min hmuh hi i châk lo tih ka hria asin, min hmuh pawhin min biak loh hrâm hrâm dàn i zawng tih pawh ka hria; mahse, țhianho chu kan inhmuin kan inbe lo thei si lo va tiraw? Ka khawngaih ngawt mai che. Kei chuan ka biak hreh phah lo che a, ka ngei phah chuang lo che, ka en dàn che hi a ngai reng a ni," a rawn ti ta a nih chu.

Ka thin a rim ru țùng sa bawk nèn, ka thin a sa leh phat mai a; mahse, ka țawng chhuak lo, ka insûm ve thei tlat! Engah nge min huat ngawt ang? Țhenna thu sawitu ka ni lo va, ani angin ngaihzáwng ka nei vat lo bawk. Ani hi chuan min huatna chhan tùr a nei lo hrim hrim, kan ințhen avàng khân a hlimin a lãwm daih zâwk ang chu, bialnu thar a duh vànga a țhennu tân chuan amah țhentu hmuh leh biak chu thil nuam tak a ni thei nâng, hua pawh ni se tu mahin an dem thei lo ang.

"Kum khat chhûng zet kan inkawp lai khân hlimna tam tak min pein min siamsak a, ka mit min tih vàrsak bawk a, làwm thu hrilh che ka duh a ni. Nang pawh mi hlim thei tak leh harhvãng tak i ni a, nangmah ang chiah bialpa țha tak i neih ka duhsak bawk che, Jason-a pawh hi mi fel tak a ni ngei ang. I nuam tih zâwng leh duh zâwng tuipui theitu che, i nihna ang anga en theitu che a nih ngei pawh ka ring. Kei chuan hmeichhia i nihna angin danglam chho ve hret hret la ka ti țhìn; mahse, ka ti danglam thei si lo che a tiraw? I inthlâk danglam ve hret hret hi ka beisei țhìn asin; mahse, beisei bo mai a ni si a, hetia kan awm pawh hi kan tâna thil țha tak tùr a ni ngei ang," a ti ta duah a, a thil sawi awmzia teh nuai chu, làwm thu chu min hrilh phawt mai a! Chuan, bialpa țha tak tawng tùrin duhsakna min hlàn bawk a, a tân danglam tùrin min lo beisei țhìn bawk a... Teh nuai a! Eng kawngah nge maw danglam tùra min beisei chiam le? Hmeichhe nù hnâp awma awm tùrin maw? Makeup inhnawiha no deuh deuha awm tùr leh ka hâk țhìn ka T-shirt lian pui thâwl hek hawk te paih boa taksa phuar deuh haa mipa hmuha lang sexy tùrin maw? Min lo zahpui țhìn a ni ngei ang. Ka rei! Kan ințhen hi a lo țha a nih hi.

*MIHRING HI, PAHNIH CHAUH PAWH HI INANG KAN AWM MIAH LO. TU PAWH HIAN CHAKNA BÎK TÊ TÊ KAN NEI VEK A, HAN INDEUSAWH LEH INNUIHSAWH THEIH KAN AWM LO, KAN CHAK LOHNA ZÂWN LEH KAN CHAKNA ZÂWN A INANG LO ȚHEUH SI A*