☆SUMRISANG☆- 6 By Dingdi Pachuau

☆SUMRISANG☆- 6 By Dingdi Pachuau

"Mipa sual tak ni duh ila chuan eng mah hrilh lo chein, ngawi rengin ka țhen thei che; mahse, chu chu ka ti duh lo. Mipa ka nihna angin thil kal dàn phung pângngai zàwmin ințhen thu ka sawi a, nang pawhin rem i tih thu ngei i sawi bawk a nih kha, kan inkârah hian hriat thiam loh tùr leh han inhuatna tùr thil a awm lo a ni tiraw? Han ngaihtuah vang vang mah teh."

Kal pah chuan a thil sawi chu ka ngaihtuah lêt a, huatna tùrte zawng ka nei chiang êm mai ka ti ve tlat. A hmain Vli a duh rûk thu a sawi kha," Hmãn ațangin ka lo duh daih tawh," a ti a nih kha, thu dik a nih chuan a rilru a lo uirê reng tawh tihna a ni a, a taksa ngei pawh a lo uirê reng tawh maithei asin, chu bâkah, hmãn a tih kha kan inkawp hma daih a sawina pawh a ni thei tho, chuti si, engah nge kei kha min duh thu a sawi si? Vli a lo la remchàn loh avàngin kei kha min kawp ta rih zâwk em ni ang? A ni ngei ngei ang, 'Vli nghah chhûng' tiin, kei lah khân ka lo hre hauh si lo, rinhlelhna pakhat tê pawh ka nei ngai lo kha a nia...

Motor horn ri tuarh avàng chuan ka phu zawk a, ka ding chawt a, ka hawi kual a, ruah a sûr sung sung tih leh motor min chìl hlauhawm khawpa hnaiin kawngah ka lo kal a ni tih ka hre ve chiah!! Ka ding sawn ta vat a, driver pawh ka en ngam lo, ka thil ngaihtuah vàng vek! Mi ã emaw min ti ngei ngei ang.

Engtik laiin nge maw ruah pawh chu a lo tlâk ni? Chung lam chu ka huh deuh vek tawh nghe nghe a, ka kekawr iptea ka phone ka hre chhuak a; mahse, ka zu zen ngam tawh lo, ka kut a huh vek tawh si a. Ka theih ang tâwka hmanhmawh chuan ka kal ve a; mahse, ruah a sûr ve bawk nèn, a har khawp mai.

Ka bula motor rawn ding dat ri ka hriat rualin ka hminga min rawn ko ri ka hre nghâl bawk. En lo pawhin tu nge tih ka hre chiang lutuk, engti tiha tûn ang huna rawn tlãn nge maw a nih le?

"Lo lût thuai teh!" a ti nain Nihliap kap parhin a rawn chhuak nghâl zat a, min rawn kuahin motor-ah chuan min luhtîr zui a, ani pawh a rawn lût nghâl. A motor chhûng ka ti huh vek dâwn a nih hi, thil dang rêng hrechang lo va ngaihtuahnaa chèn veng veng hlâwk lohzia leh țhat lohzia hi chu aw...

"I car duh tak chhûng ka ti huh vek dâwn a nih hi," ka ti sap a, ani erawh chu a ngawi reng a. Kan in lam min panpui mai dâwn emaw ka tih lai chuan kan in lam pana tlãn ta mai lo chuan an in lam pan tùr ni àwm tak hian min tlànpui ta. A ngaihna hre lo zet hian ka en phei hâ a, a la ngawi ngul reng a, min rawn en lovin kawng lam chauh chu a en ding ngar bawk a.

"Khawiah nge min hruai dâwn? Min thlah dâwn emaw ka ti?" hre thiam lo taka ka tih chuan," Lo ngawi phawt rawh," a rawn ti sup a, min en chuang lo. Ve ngel ngul chuan a! A sawi vàng ni kher lovin ka be tawh bîk lo ang, a duh duhnaah tlãn rawh se. Ka kut chu a theih ang anga hru hulin ka kekawr ipte chu ka zen a, ka phone ka phawrh chuan a lo la huh lo hlauh.

An in kan thleng thuai a, car ațanga ka chhuah chuan vâwt ka ti ve țan ta bawk. Ruah a la sûr reng a, min kaiin an in chhûng kan luh pawhin min la kai reng a, a room lam min panpui nghâl a. A room hi kawngka luh chiaha ding lamah a awm a, a chhûngte hmêl ka hmu miah lo.

"Bathroom-ah khân lût nghâl la, tui lum khân intleuh la, rei suh ang che. Towel chu drawer-ah khân a awm ang a, i hâk tùr khumah hian ka lo dah ang," tiin min chhuahsan zui leh ta nghâl a, he pa hi chu aw!! Mahse, hnial ka tum lo, a vâwt tawh êm mai. Bâkah, a room chhuat ka ti bàl vek dâwn tlat.

Tui lum chuan ka intleuh a, a va nuam mai mai tak! Ka lu pawh chu ka su leh a, nimin lama ka sûk tho mah ni se a huh deuh vek tawh tho si a. Shampoo a kawl thlap vei roh a, a lu a buk loh tehlul nèn, sahbawna sûk mai mai àwm, a lo inuluk thlap thlap hlê mai ka ti.

A sawi angin khumah chuan ka hâk tùr a lo dah thlap. Ka han inthawlh zung zung a, T-shirt chu ka ha thei mai a, kekawr erawh ka tân chuan a lian mah mah a ni. Dârthlalanga ka inen chuan ka nui hak a, ka mak hnawlh hnawlh êm bawk a ni.

A rawn lût a, thingpui ni ngei tùr hi noah a rawn keng lût khu vat vat a, dawhkànah dahin," I in nghâl dâwn nia," a ti a, kei chuan," Khawnge i nute hi an awm a?" tiin ka zâwt zat a, ani chuan," An lêng an lo la haw lo," a lo ti leh mai a. Chu vàng a nih chu an hmêl ka hmuh loh ni, anni pawh ruahin a dang a ni ngei ang chu.

Thingpui ni lovin coffee tui tak a lo ni a, ka in zawh hnu chuan ka taksa pawh a rawn lum țan a, coffee chu ka kham lo ru viau, a siam tui thiam tak zet a ni. A room chu ka han en kual a, a zau țha a, a nuam viau, room chhûnga thil awm rêng rêng ațang chuan mipa room a ni tih a hriat hliah hliah maiin ka hria.

Min thlah haw leh a, haw kawngah chuan eng vànga ruah sûr hnuaia kal nge ka nih min zâwt a, kei chuan," Ka ngaihtuahna ka lo kàwm tui deuh a nih kha," ka lo ti mai a, min rawn en zawk nain ka lo en duh lo va, ka thil sawi chu a âwih pawh ka ring chuang lo.

"Nihliap tal ken chhuah tùr che a nia, tûn ang khuaah chhuah dâwn hi chuan Nihliap ken ngei ngei tùr," a tih chuan," Aw le, ka lo hre tawh ang e, Boss," nêm duaiiin ka lo ti a, ka țawng dàn kher chu, a ngei teh ang chu.

Inah a rawn lût lo, a tlãn chhuak leh nghâl a, ka en zui vang vang a, a nute lêng a hruai dâwn a ni ngei ang, ka lo zâwt lêm lo va, min buaipui avàng pawhin làwm thu ka hrilh hauh lo tih ka hre chhuak leh vat a, bengvâr lo min va ti dâwn tak! Làwmna rêng rêng nei lo angah min ngai bîk lo ang chu maw. Nakinah ka text tawh mai ang.

Zanriah ei laiin ka nu chuan awm mai mai lova eng emaw tak ti ve tùrin min zilh a," Lehkha i zir peih tawh lo a nih pawhin tûnlaiah thil dang dang zir tùr a tam a, mahni intodelh thei tùrin eng emaw tal hi chu i tih a ngai a ni. Mite pawhin an thawh àwm tâwk tê tê hna zawngin an thawk ve a, hna thawh neih hi a țha a ni," a ti dap dap a, U Nubawihi pawh chuan," Ni e, Bawihte, 'kumin chhûng chu ka chàwl rih ang' i tih pawhin nakkum lamah chuan eng emaw tak chu tih tum ve rawh aw, sawrkâr hna thawh kher tum loh tùr, i tuina lam tak i thawh kha a țha a ni mai," a lo ti ve malh malh a.

Dik tak chuan eng nge ka tuina ka hre hlawl lo a ni. Volleyball kha chu ka tui ngei; mahse, min phalsak si lo va. Lehkha zir chu ka peih tawh miah lo, chuti a nih chuan sumdàwnna lam hi ka buaipui ve dâwn em ni ang? Dàwr lamte hi? A nih loh pawhin Online shopping lam te? Nge motor silna hmun ka buaipui zâwk mai dâwn ni?

Vli birthday July ni 31 a lo inher chhuak a, khua pawh zîng ațangin a țha teh tlat a, vawiin chu nuam deuhin kan hmang thei dâwn a ni ngei ang. Kan tih țhin dàn pângngaiin a hma daih ațangin kan sawi hot tawh a, lawm dàn tùr kan sawi a, kan hmun ngai Maengate in hnuaia lawm leh kan rêl a ni. Keini țhianho hian tih dàn phung mak ve angreng tak kan nei a, birthday chu kan nei vek alawm; mahse, 'kum khatah mi pathum birthday bâk lawm loh tùr' tih Dàn kan nei a, kei, Zda leh Hazel-i birthday nikum lamah kan làwm tawh a, kuminah chuan Vli, Lawmpuii leh Mamuana birthday kan làwm ve thung ang. Birthday lawm nân hrim hrim kum tìr ațangin pawisa kan khâwl vek a, a nuam thei ang bera lawm nân leh sum lama kan buai loh nân kan ti a ni.

Lalrina bialnu a nih avàngin Lalrina nèn engtin emaw tak an awm ngei dâwn tih chu hriat sa a ni a, nikum lama ka birthday-ah pawh khân kan lâm dùn a nih kha. Vawiin chu a buaithlâk dâwn khawpin ka hria, ka phùr dàn ka phûr zar lo, Lalrina bialnu hlui ka ni tih an hre vek si a, kan inpawh hlawmin kan inngam hlawm a, na tak leh zahthlâk tak tak pawha min fiam an awm leh ngei ang, Lawmpuii leh Fiona-i an tawrhhlelhawm leh khaw ang le; mahse, Jason-a a kal ve dâwn tho a, ani hi inphen nân ka hmang mai ang chu.

Ka chhûngte ka dîlin ka hrilh vek tawh a, zanriah pawh ka ei tam lo. Jason-a kan ina a rawn luh kher ka duh loh avàngin páwnah ka lo nghâk a, kan țhianho thil tihnaa a lo tel ve ta țhìn leh min hruai țhìn tih an hriat chuan ka thurûk kha an hre chhuak palh ang tih ka hlau a ni.

Keima tâwkah ka inchei nalh ve deuh hlek a, Vli a nalh dâwn si a, min hêk lutuk ang tih ka hlau ve deuh a ni; mahse, a hnua ka ngaihtuah chuan ho ka ti leh hnuhnawh viau a, Lalrina mit lâk tum ang hrima han inchei ve deuh tâk chu ka ti leh a, ka hmui tlêma ka hnawih sen ve pawh chu ka tuai reh leh daih nghe nghe.

Kan thlen chuan an lo ri dup dup tawh a, lâm pâwl an lo awm tawh bawk. Boruak a lum lo va, a vâwt lo bawk a, làm pawh a nuam dâwn e. Music rem chuan ka hân bu nghat nghat a, làm nuam ti pâwl lam pawh chuan lâm pahin min lo hui zoh zoh hlawm a, kan la kim loh avàngin innghah khâwm nân kan la lâm thei rih a nih hmêl.

Kan kim har lo, mi thar hmêl pawh kan hmu e, Zda bialnu thar a lo ni a, sam tãwi niin tê lam, ngo ving veng hi a ni a, tarmit a vuah a, a inha tight viau nain a inhmeh hlê thung. A hming chu Rosalyn a ni a, a țawng duh a, a titi ve nghâl barh barh thei mai.

Kan lãm a, kan țhut hnuah birthday neitunu a rawn lût ta zân zân a, a chhe lo khawp mai, kut kan lo bêng dar dar a. A hnuah Lalrina a rawn lût ve leh a, a rawn dinpui chat bawk. Vli chuan a birthday hmang tùra lo kalte làwm thu min hrilhin birthday banner chu mawi a tihzia a sawi a, duh tâwka ei leh in lam pawh eia in vek tùrin min sâwm bawk. A nui sâng reng a, a hmêl hmuh a nuamin a hahdamthlâk a, a inchei nalhin a makeup hman pawh a inhmeh viau ka ti.

Chumi hnuah chuan Maenga'n birthday cake mawi tak chu a rawn nawr lût ta a, a la hmuh miah loh  avàng chuan phâwk zet hian a lo en a, cake mawi tak a hmuh chian theih tâkah chuan a kut pahniha a biang chu dawmin hlim hmêl tak hian a nui ta var var a. Cake hi birthday neitu hmuh lâwk kan phal ngai lo, a hriat lohin mi dangin kan duh dàn takin kan order țhìn a, in-surprise nuam kan tih vàng a ni ber ang chu.

Piancham hla kan sa a, chutih lai chuan nikum lama ka birthday kan lawm kha ka mitthlaah a rawn lang zut zut mai. Lalrina cake ka barh a, ani'n min barh bawk a, chumi hnuah kan infâwp a nih kha. Ka thil mitthla lêt duh lo chuan ka lu ka thing nak a, kha hun kha chu a liam tawh a, tûn hunah hian ka rilru ka pêk a ngai tawh, ka thil ruahmanah ka chiang êm êm tùr a ni bawk.

Lalrina nèn cake chu an inbarh a, an infâwp ve leh ta ngei bawk. Ka thîk lêm lo; mahse, Lalrina saw ka ngei. Mi dang thãwm luai luai kârah chuan Cake chu Jason-a ka barh ve a, a hnârah ka la tih kaisak zui! Ka nuih khiah khiah a, phone phawrha thla lâksak ka tum chuan ka kut chu a rawn man a," Ti miah suh," a ti a, la nui hawk hawk chung hian," Popo-a hmuh atân ka duh alawm, ka han entîr mah ang a, a pu cute-zia a hmuh ve hunah chuan a nui nasa ve ngawt ang," ka lo ti chùl thung a; mahse, ka hmehsak hman chuang lo.

Ei tùr dang kan ei hmain kan lâm leh phawt a, làm hi chu a nuam ve alawm. Jason-a duh lo chung chu ka pawt lui a, mi dang lâmho chu kawp nei veka an làm vàng a nia," I làm ngai loh pawhin ka bula lo din ve kha a ni mai, bâkah, ka bialpa i nia, inkawp veka an làm hi, min rin a ngai alawm," a beng bulah chuan ka ti sà sá a.

Kan lâm a, tih dàn tùr ka hrilh zêl a, a thiam ve reng. Lawmpuii chuan kan bula rawn làm pah hian," In inkuah fet lutuk! Duh aiin in inhnaih mah mah lehnghâl!" a rawn ti vak a, a aw a ring si, an rawn hawi ta țhupin ka hria, he nu tak hi chuh!

Thlah dul deuh ka tum chu Jason-a chuan min rawn kuah nghet ta sauh mai, ka en chhoh chuan min rawn en chhuk ve rùn a, Lawmpuii vêk chuan," An infâwp ngam lo ang," a rawn ti leh a, rum zet hian ka melh phei nghâl hrãwk a, a lo la nui süng zui.

"I ninawm!" ka ti lêt vak a, ani lah chuan," I ngam loh vàng a nih kha, kei chuan ka ngam a," tiin, a bialpa biangah chuan a han fâwp zauh a, lâm ve loho chuan kut an lo bêng dar dar mai. Cho zeta min rawn enin," I huai ve viau țhìn khân ka hre sia. En la, ani pawhin a ngam chuan engah nge i ngam loh bîk ang?" a rawn ti leh ngei a, Lalrinate lam a mitmei pah zauh bawk. e nu hi chu aw... Jason-a hi ka bialpa tak tak ni se zawng fawh mai mai te chu ka ngam nasa lutuk ang, ani aia nasa leh fet theihtàwp pawhin ka fâwp ngei ang chu maw le!

Lalrinate chu an lo infâwp vawng vawng niin! He pa hi chu a va tenawm tak! Nikum lamte kha a hre chhuak ve lo em maw ni, insùm ve deuh tal àwm a ni, ka va tlâwm vawng vawng zual tak! Țhianteho lah chuan kut bêng meuhin an làwm a; mahse, nikum lama kan infawh pawh khân an lo tih ve tho kha, kut an bêng hluah hluah tho a nih kha. 

Fiona-i chuan," He lamah chotu an nei tlat mai," a rawn ti làwng láwng a, kan en vat a, Jason-a nèn kan pahniha ding dùn chu min lo kâwk niin, ka'n en kual chuan min lo en leh ta țhup vek mai.

"An ngam ang," tih leh," Ngam lo ang," tiin thâwm an chhuah a, an va ti ho mai mai tak! Jason-a chu ka en chho a, ka sàwm lai khãn hêng thleng thleng hi chu ka ngaihtuah pha miah lo, bialnu pawh a nei ve ang a, infawhte chu, a tihchi nâng.

Ka meng ve reng a nia, a rawn kùn hniam lai pawh ka hmu miah lo a nih chu! A hmuia ka hmui a rawn sîktîr tâkah chuan, ka phu zawk ni chuan ka hre lo va; mahse, mak ka tih avànga chêt nachâng hre lovin ka khawng niin ka hria! Nghet zeta min kuahin a hmui chu a rawn chêttîr chhunzawm a, ka lo dawh ve tawp, hla takah kut bêng ri ni àwm tak hriain ka inhria! A tàwp mai loh avàng leh min fawh dàn chu nuam tihna riau ka neih tâkah chuan ka lo che ve ta a, ka kut chét thei hek lo i, a chêt rual chuan che thei ber ka lu chu ka chêt ka chêt ve ta mai a ni.

*KAN NUNAH HIAN MÎ, CHÂM REI LO TAK TAK, KAL BO TA THUAITE AWM ȚHÌN MAH SE AN THIL MIN ZIRTÎR  CHHUAH ERAWHIN KAN DAM CHHÛNG A DAIH THEI ȚHÌN*