☆SUMRISANG☆ - 7 By Dingdi Pachuau

☆SUMRISANG☆ - 7 By Dingdi Pachuau

Kan haw kawngah chuan ka en țha vak ngam lo va, ka fawh lêt ve avàng khân ka zah ru deuh tlat pek a nih chu. Eng angin nge min ngaih ang tih mawlh chu ka ngaihtuah lo thei lo a ni; mahse, tih tak takah chuan lem kan chang a, lem chan rau rau chuan a tak thei ang ber kha a ngai miau a, chu vàng tak chuan ka fâwp lêt ve a ni mai.

Kan ngawih dun deuh reng avàng chuan nuam ka ti chiah lo zual a, kan mood on nân,"Zanin chu lem kan chang țha khawp mai tiraw? I hnehsawh lutuk! Khatianga i chêt kha ka lo ring phâk miah lo va," ka han ti ta ringawt a, ani lah chuan," A bu ang thlap ka ni ka tih tawh kha," a lo ti mai thung a.

"Ni e, a bu ang thlap!" ka lo ti ve leh sap a, a dik a ni, zanina a chêt dàn kherah kha chuan sawisèl tùr pakhat tê mah a awm hlawl lo, ka bialpa lem chang mai a ni tih sawi ta pawh ni ila tu mahin an âwih lo ang, kei pawhin ka bialpa tak tak a ni ta emaw ka ti lo chauh a nih kha!

Thawhlehnî a ni a, tûkțhuan kan ei khamah chhuat ka nâwt nghâl a, ka nu pangpâr khàwi singsak ka duh avàngin ka lo inhmakhua lâwk ve a ni. Pangpâr hi ngaina lo mah ila ka nuin a buaipui peih hlë si a, a fanu nula ka awm ve reng a, ani teh hlîr buaipuitîr chu tiin singsak ka tum ve a ni, ka piangthar ta thut emaw a ti maithei a ni.

Chhuat ka nâwt zo țëp tawh ang tihah chuan ka nu chuan," Vawiin chu i nu Sangpuii a rawn lêng dâwn a, eng chhang nge lo siamsak ila țha ang? Nang thil tui i hre thei deuh a," tiin min rawn râwn ve ngei a, kei erawh chuan," A, eng pawh siamsak mah la a lãwm êm êm tho ang, tui a ti vek tho bawk ang, chhang i siam tui thei alawm," ka lo ti thung a. Ani chuan," Kei aiin i siam tui thei zâwk daih! Chhùna i thil siam ka ei rêng rêngin ka duh aia tam ka ei ziah bawk. Vawiin chu min pui la tiraw?" a lo ti leh a.

"Nu hi, in chhùn ei tùr min siamtîr i duh vàng a ni chiang mai," ka tih chuan nui chung hian," Ni chiah chuang lo ve, kei aiin thil tui i hriain i siam thiam zâwk ka tih vàng a nia. Chu, min siamsak tumna rilru i lo nei deuh a ni maw?" a lo ti ve thung a, kei aiin a siam thiam lo zâwk tih ka hre ve tho a, siam tùrin min duh tih ka hriat ve tho avàng chuan," Aw le, ka lo siam dâwn nia," ka ti a," A làwmawm ngawt ang chu," a lo ti vat a, nui chung hian a kal sawn zui ta nghâl a. Ka nu pawh hian thil min tihtîr a duh châng hi chuan min tlawnin min han fak kual phawt ve țhìn a, a fakna țawngkamah hian ka mawih leh suah suah țhìn rêng a ni. 

Nu Sangpuii chu a rawn lêng ta ngei a, a rawn thleng in a rawn lût chiah chu a rawn ri lût leh nghâl barh barh mai, pangpâr chanchin a rawn sawi lût a ni tih pawh ka hre nghâl, ka nu nèn hi chuan an titi hi chu a rual țhìn alawm. Nu Sangpuiia bula awm hi a nuam a, a țawng duh dàn hi ngeiawm deuh deuha țawng duh leh țawng tam ni lo hian hlim hmêl pu hian a titi sârh sârh țhìn a, a bula awm hi a khamawm loh țhìn.

Pangpâr ka singsak hma chuan chhùn ei tùr chu ka siam a, a la hma viau nain siam lâwka nakina tih lum mai theih tùra dah ka duh vàng a ni. Ei tùr ka siam lai chuan chokaah an rawn lût dùn a, min rawn hmuh veleh Nu Sangpuii chuan," Tluangtei chu, eng nge ni i siam a? Eu, a rim a va tui ve!" a rawn ti nghâl vat a, ka chhàn hmain ka nu chuan," Chhùna kan ei tùr a siam dâwn a nih hi, a duh hi chuan a fel thei asin," a lo ti a, a nui hak hak a, Nu Sangpuii chuan," A ni maw? I va fel ve! A tui dâwn tih ka hre reng mai," a ti leh a.

An awm rei hran lo, choka kawngka a inhawn avàng chuan an țawng rî làng láng chu ka hre chhunzawm thei a; mahse, mumal takin ka hre thei lo thung. Ka nuin," Ngaihven hmêl pawh a pu lo, a awm dàn hrim hrim pawh hi..." a tih chu ka hria a, an nui dùn a, an țawng zawih deuh tâk avàng chuan ka hre chiang thei ta lo a; mahse, Nu Sângpuii'n," ... lo deuh hlek, nei chuan ka hria..." a tih chu ka hre leh a, an nui ri ka hre leh a, eng tak chu sawi dùn ang maw? An pahniha an awm tawh hi chuan nuih tùr hi an hre thei sia maw... tleirãwl nuih duh hun lai kha an la pèl hlei thei lo a nih ber hi.

Ka siam zo thuai a, ka thil siamna ka dah fel lai chuan ka nuin," Jason-a hi chu tlangvâl fel tak a ni alawm, hna țha tak a nei a, nakinah nupui țha deuh a la nei mai ang," a tih chu ka hria a, Jason-a hming an sawi rîk avàng chuan ka han bengkhawn ru deuh a, Nu Sangpuii chuan nui chung hian," Nupui țha tak hi a hmu zo ve ngût ang em maw... Nupui hi chu nei thuai mah se pawi ka ti hran lo, a hmu zo a nih phawt chuan. A pa nèn kan la chak țhat lai hian an fate pawh kan enkawlpui tam thei ang a te ka tia, duh an neiha nupui pasal neih hma an duh phawt chuan kei ka hnial lo tawp mai, mi ang pângngai an nih chuan nakina nei tho tùr an ni a,"  a ti barh barh a.

Pangpâr ka singsak lai chuan Jason-a chu ka ngaihtuahnaah a rawn lût vang vang a, hna a nei tih hi chu ka hria a; mahse, eng hna tak nge a thawh ka hre chiang miah lo. Kei aiin kum hnih chauhin a upa a, hna a nei tawh bîk a nia, kan va inang lo tak! Mahse, kei chu lehkha ka thiam loh chu thuhran, ka tui lo ve êm bawk a ni, ka rilru hi lehkha lamah hian a chak lo a ni ber ang chu; thil dang hi chu ka hre ve thei viau chuan ka hre tho a nia.

Chawhnu dâr 2 vêlah Jason-a chu a nu lam tùrin a rawn kal a, pangpâr ka la singsa zo chiah lo deuh nghe nghe. Ka lo la awm hnawk nuaih a, min rawn hmuh chuan," Eng thil nge ka hmuh hi?!! Pangpâr kha i sawisa a ni maw?" a rawn ti a, kei chuan en mang hlei lo hian," Ka duat zâwk a nih hi, làwm thu pawh min hrilh sup sup alawm," ka lo ti mai a, a nui hawk nghe nghe.

"Ka ril a țâm hle mai," a ti sup a, ka en vat a, min lo en reng niin, a kutin a pum a dawm pah tih ka hmuh chuan," Thil i la ei nange? Eng atân nge pawisa i thawh chhuah?" ka ti nghâl vat a, ani lah chuan,"Ka nupui tùr leh kan fa lo la piang tùrte tân a ni ang chu," a lo ti a, ner deuh nâng nâng hian ka en a, Nu Sangpuii titi kha ka ngaihtuah chhuak zawk mai. Ani hian nupui neih thuai chu a duh ve ang em? Hual te hi a lo nei reng tawh zâwk a ni lo maw? Ka lo zâwt ngai miah lo va.

"Nupui te i sawi!! Nang hi, neih i tum hnai tihna em ni? Tu nge nula vànnei tùr chu?" Phâwk zeta ka tih chuan," Ka tum tih ka sawi em ni?" a lo ti ve thung a, kan inen ràn rán hnuah chuan," Ei tùr chu?" a rawn ti leh daih a, ka lo theihnghilh hman țêp alawm le, nupui a rawn sawi chhuah vàng vek.

Nu Sangpuii'n min lo hmuh chuan," I ti zo tawh em ni?" a lo ti vat a, ka la ti zo lo tih ka hrilh chuan," I nu pawh hi enkawl dàn tùr ka hrilh ve nual a nia, pàr pawh a pàr nasat bâkah vul pawh a vul rei duh a. Ngawi rawh, i lo kal leh hmasak berah lei țha ka pêk ang chi chu i hàwn ve chhin dâwn nia, a hnah eng deuh angah kha chuan damdawi pêk ve a ngai a," a ti leh barh barh a, Jason-a'n," Nu, lawk, ka ril a țâm tawh a," tia ka hnunga min rawn nam kal tâkah chuan choka lam pan chuan kan kal zui ta nghâl a. A nuin," A mak thei, i rawn hmanhmawh lutuk a ni ang chu maw le! Thil ei hman lova rawn kal tùr a ni hleinem," a tih zui pawh chu kan hre pha vek a.

Ka la ei bîk loh avàng chuan ka ei ve nghâl a, kan ei zawh chuan an haw nghâl mai dâwn emaw ka tih laiin Jason-a chuan," Ei tùr min pe sia, làwm thu sawi nân," tiin pangpâr ka singsakna hnawk chu ka rem ti lo chungin min then faipui vek a, pakhat ai chuan pahnih thawh chu a sâwt bawk a ni, hun rei pawh kan hmang lo.

Zànah thlalâk min rawn thawn a, vawiina a lo thlen vêl lai khân a rûkin min lo hmehsak tih hriat reng, posi laklawh taka ka ding lai a ni a, ka kekawr khûp lah chu a țawih tawp, ka țawng lai tak a ni tih hriat tak hian ka hmui ka kum phût bawk a.

*Delete nghâl rawh*  tih ka thawn lêt nghâl a, ani lah chuan *I kekawr khûp vàng pawh hian ka delete phal lo*  a rawn ti a, nui lem hmêl chhe zet zet chu a rawn dah tlar tuar bawk a. Hmeichhia ang mai, nui duai duai ringawt. A thuhrimah engti tiha khatianga ding kha nge ka nih le? A mawi lo ve e.

*I ex ka thawn dâwn*   a rawn tih leh chuan ka hmuh phâkah awm ngat se zawng, a ri awk awk ngei ang! Ka bula a awm lo chu a vànnei tak zet a ni. A thawn dâwn lo tih hre mah ila chutia min rawn fiam kual vêl chu ka ngei tho tho. 

*Kei pawhin i pic 'cial' deuh chu ka nei ve tho, i bialnu ka thawn nghe nghe ang*  ka ti lêt ve ta ringawt a, ka nei hauh lo; mahse, tlâwm zâwkah ka țang àwm lo.

*Umm...*   tih ringawt hi min rawn thawn a, a va ngeiawm thiam tak! Ka nei lo tih a hre ve a ni ngei ang. Nakinah hun remchângah a thla ka lâk rûksak ve ang a, min tih ang chiah hian ka ti ve ang maw le. A phone ka check-rûksak ang a, a bialnu pawh ka thawn tak tak ang.

Ka nuin min chah avàngin ka haw lamah chuan Pi Zaii dàwrah chawhmeh ka lei haw pah a, engthâwl leh lungkham nei lo zet hian ka zai pah a, ka rilruin. Ka la sa sual zui, ka nui deuh sak a, sak pawh ka sa chhunzawm duh ta lo va. A ri lovin zai mah ila min lo hretu an awm maithei tih ngaihtuahin ka hawi kual a; mahse, an awm lo a ni ang, min rawn en an awm tlat lo, a ri lova ka lo zai kher chu ka vànnei viauin ka hria. 

Mahse, ka en țha leh ngat a, Jason-a ni àwm tak leh hmeichhe pakhat, a inthuam dàn ațang ngawt pawha chhiat loh hmèl zet nèna inhma tawna an inbia chu ka hmu fuh ta hlauh mai, ka mit khap fak fakin ka han en chiang leh deuh a, Jason-a a ni tlat a ni, a lukhum dum leh a T-shirt hâk ațang sâwn amah ngei a ni. Tu nge a biak saw le? A bialnu a ni ngei ngei ang. Ka tàwi deuh hrat hrat a, hmeichhia a biak chu hriat ka châk bawk si a, eng nge an sawi chu hre dâwn lo mah ila hmeichhia saw tu nge a nih tal hriat ka duh, a sîr zâwng chauha hmu ka nih avàngin tu nge a nih ka hre mai thei  rih lo.

Hmeichhiain a bâna a chelha a en chho ka hmuh chuan engtin emaw tak ka lo awm!! Ka sawi thiam chiah lo, engtin emaw tak ti bâk chuan. A bialnu a nih loh atâkah! A din dàn te saw, a va zei chiang tak! A inthuam dàn pawh saw, nù lutuk bîk ang pawhin a lang lo; mahse, a inhmehin model chhe lo tak a nih duh hmèl lek lek dâwn alawm le! A sam kir buang deuh thar, sei vak lo chu a thlah a, a ngo hmèl bawk sia, a inhmeh riau, hnai takah ka hmu châk e a.

Chu nu chuan a bânah chuan kaiin a kalpui ta, ka en zui zêl a, car pãwlah a luhpui ta daih mai. Hm, a bialnu a nih ngei saw, ka vawi khat hmuhna mah ni se chhe lo ka ti. Kei ve hi, ka han inen chhuk a, kha nu nèn kha chuan inanna kan neih chhun tùr chu kan vun rawngah chiah a ni ang,   Jason-a chuan a nei țha khawp mai, min hrilh duh ve miah lo mah se.

Kan inhmuh leh hmasak berah," I inthup thei si!" ka ti teh tâwng a, ani chuan," Thei ve bawk ang chu," a lo ti awlsam êt a, min chhàn dàn chu ka va duh khawp lo tak!

"Ka ngei che!" ka ti leh a, ka ngei deuh tlat alawm, keiin engkim ka hrilh laijn min hrilh ve si lo va. Ani lah chuan," A va pawi ve! I bialpa min ngei mai chuan i thil ruahman khân awmzia a va nei ta àwm lo ve," a lo ti leh a, thâwk ka la hawk a, ka maimichhîng vang vang bawk a. Ni e, min hrilh ve duh lo mah se ani hi ka mamawh bawk si, ngei thei dinhmunah pawh ka ding lo.

Ka bek tawn tawna a kut pahnihin a rawn dawm tâkah chuan ka meng nghâl vat a, hnai zetah min lo en kur niin, ka lu chu ka chét a, ani erawh chuan nghet zet hian min dawm tlat a, chutih pah chuan rawn kûn hniam deuhin," Ka fâwp dâwn che!," a ti sup a, a sawi zo chiah tihah chuan a hmuiin ka hmui a rawn sîktîr ta nghâl a.

Mak ka tih avàng chuan che lovin ka awm tawp a! A tih dàn ngai têin dìm tak hian a hmui chu a'n chêttîr leh a, ka inhûm ruh ta tlat. Fâwp lêt ve miah lo tùrin ka inhrilh ru mawlh mawlh a; harsa erawh ka va ti tak! Dam tak si, phût lét nei tak si-a mi fawh a thiam tlat a, bâkah, a zei tlat alawm, ka fâwp lêt châk lutuk tlat; mahse, țhiante an awm lo va, he laiah hian lemchan a ngai lo, ani pawh hi...

"Insûm ve deuh teh u! Nuam lah hi in ti nasa mai si ah!" Fiona-i rawn țawng rî ka hriat chuan mak ka ti zual, Jason-a chuan min fâwp tawh lo nain min la thlah chuang lo va, ka en chho hau a, ani pawh chuan min rawn en chhukin a nui suk a, chutah, muangchãng hian min thlah ve ta chauh a.

Țhiante a lo hmuh vàng a nih chiah hi. Lalrina a hmuh tel vàng saw a ni ngei bawk ang, Vli a awm chuang lo va, a ngai kher chuang hleinem le, ka thin a phu rang dat dat viau mai a, a rûkin muangchângin thâwk ka la tawp, ka thinphu rang lutuk hi ka tih reh vat a ngai si a.

Kan inkawm dàn leh ka en dàn a ngai reng emaw ka tih laiin a lo ngai reng tawh vak lo tih ka hre chho ta telh telh mai, a chhan pawh zàn ka mut dâwn apiangin min fawh dàn, kan infawh dàn kha ka ngaihtuah chhuak ziah a, amah ka hmuh apiang lahin a hmui mawlh chu a rûkin ka lo en leh țhìn a ni. A bialnu a fâwp țhìn ngei ang a, min fawh ang tho khân a fâwp ve țhìn ang em tih ka ngaihtuah a; mahse, chu ngaihtuahna chu ka dah bo leh vat țhìn. Min fawh ve dàn te kha chu lemchanna mai mai a nia, a ti tak tak lo, lemchanna a ni, a bialnu chu a tak takin, a rilru tak takin a fâwp ngei dâwn, lem a chang dâwn lo, a tak tak ramin a nia a fawh dâwn ni.

*A CHÂNG CHUAN PATHIAN HIAN MIHRING LAMA I THIL LO RUAHMAN LÂWK VE MAI KHA A THIL RUAHMAN ROPUI ZÂWK THLEN THEIHNA TÙR CHUAN A TIH SUKUKSAK ȚHÌN CHE*