☆SUMRISANG☆ - 8 BY Dingdi Pachuau

☆SUMRISANG☆ - 8 By Dingdi Pachuau

Zanriah ei laia U Nubawihi'n," Bialpa hi i nei ve tawh rêng rêng em?"tia min zawh chuan phâwk zet hian ka en a, mak ka ti lo thei lo a ni, hetiang lam hi min zawh vawi khatna a ni hial ang chu! Min lo en reng a, ka mit chu ka han lèn kual a, chaw ei țhulh meuhin ka nu leh ka pa pawhin min lo en ve reng niin.

"Teuh lo mai! Eng vàngin nge ka neih ngawt ang?!" tiin aw ki sâng zet hian ka chhâng a, Jason-a nèn min lo ringhlel ru reng em ni tih chu ka rilruah a awmin ka awm dànah ka lo ti lang deuh em ni ang aw tih zawhna ka inzâwt nghâl bawk. Ani erawh chu a lo nui mai a," Ka rin dàn vêl chiah!" a ti a, ka pa chuan," Bialpa neih neih a ngai hleinem, hun a la tam êm mai tiraw, Bawihte? Nakinah țha tâwk a la nei mai dâwn alawm," a lo ti ve thung a, kei pawh chuan," Dik chiah!" uar zeta tiin ka pa chu ka kutzungpui ti pirin ka han hmuh zauh a. U Nubawihi chuan," Hmeichhe awm dànin awm hek lo, a inchei dàn lah ni se a mak hliap hluap thei si, a pian pawh hi a chhe hran lo, hmeichhia taka incheiin han inhnawih ve deuh se chuan mipa mit pawh a la ve deuh thei tùr hi a nia, tunah hi chuan miin patil emaw pawh lo ti se ka dem hlawm miah lo ang," duhthawh tak hian a lo ti leh a, ka nui hawk hawk mai. Patil kher kher chu a, ka ni lo nasa êm mai!

Ka nu chuan," Ka hrilh fo alawm, hmeichhe awm dàn leh inchei dàn phung hi chu a awm ve, a duh zâwng ațang rêng hian a dik lo, nula i ni ve tawh a, inthlâk ve tawh teh, a hun ve tawh," a lo ti ve leh a," Ninawm!" ka lo ti hluk a. Ka nu vêk chuan," Tuna i țawng dàn te kha, a mawi lo teh a nia, kan hrilh ngun tawh êm che hi, Bawihte, âwihah chãngin han zàwm ve tawh teh. I hmêl hi a chhia pawh a ni lo, i vun ni se a nalh tâwkin i ngo a, bawl leh ser i nei lo bawk; mahse, i thinchhe lutuk țawngkam leh i inchei dàn hi i sim loh chuan, hêng hi chu eng mah lo mai a ni, nakinah mipain an hlau ang che tih a hlauhawm alawm," a ti leh mawlh mawlh a.

Chaw ei lai hi min zilh hun a nia, ning viau țhìn mah ila ka chaw ei hi a tui tho si a, ka khamsan hma thei ngai chuang lo. An thil sawi hi a dik chu ka ti ve reng; mahse, ka duh dàn dâna inchei hi nuam ka ti a, ka thuam hi nù viau lo mah se mipa ka ni chuang lo, hmeichhia tho ka ni tih ka hre chiang, ka rilru ni se a pà chuang bawk lo, mipa tho alawm ka ngaihzàwna ka rilru pawh ka pêk ni.

"A, nakinah a mipa duh zâwng tak tak a tawn hunah chuan e, in sawi in sawi hi a ngai tawh miah lo ang, a duh tak a la tawng ve lo va, hre thiam rih mai rawh u. A rilru a la thianghlim tihna a nih hi, mipa mit la tùra a inchei hunah meuh chuan, chutih hunah chuan in buai viau zâwk lo'ng maw?" Ka pain a tih tâkah chuan ka lu ka bu nghat nghat a, ka nu chuan," Heti hian lo ti zël suh, thil țha kan sawi a nih hi," tiin ka pa chu a han hau hlak a, ani lah chuan," Thil țha sawi vak vaka zawm chuan si loh chuan awmzia a awm lo, Bible-in engtin nge a sawi kha, Bâwngpui hmaa tuikeplung paih ang a ti em ni kha?" a lo ti leh a, ka nuih a za lutuk a, ka insûm thei lo," Pa, Bible thu i va'n hre êm êm! Ka like pawp pawp che," ka ti a, ka nui vak vak a, ka nu leh U Nubawihi pawh chu an insûm thei bîk chuang lo, kan nui zo ta vek a. 

Mut hmunah chuan ka ngaihtuah neuh neuh a, mipa mai pawh ni lo a mipui mimir hrim hrim hian nù deuh zâm leh nungchang nù lam deuh hlek, zaidam tak hi an lo duh deuh a ni ang ka ti ta. Ka nu leh U Nubawihi hian inchei nù tùr leh thinchhe lo deuh tùrin min hrilh fo a; mahse, thinchhiat loh leh inchei nù deuh hi ka nun phung a ni si lo, hei tak hi a buaithlâk a ni, tu nge thu âwih lo nih chu duh bîk ang? Tunah hi chuan fanu thu âwih lo chan ka chang tlat a ni.

Mahse, engtin nge ka nun phung hi ka thlâk hlawk theih bîk ang? Ka duh dàn leh nuam ka tih dàn, keima nih dàn ve hrim hrim hi hi ka thlâk hlawk dâwn tihna em ni? Chuti a nih chuan keimah kha ka ni tawh dâwn lo tihna asin.Thinchhiat lutuk hi chu hrehawm ka ti ve țhìn tho, a châng chuan zaidam pawh ka tum ve țhìn; mahse, a har, thil kan duh loh zâwng taka a han awma thin a han rima chhûngril lama turtu hian a rawn tur nat tawh chuan e, dam taka țawng hi chu har ve tak a ni, zaidam tân chuan a har lo ang; mahse, kei hi chu thinchhe sain ka piang a nih ka ring hial țhìn, zaidam taka țawng hi ka thei thlâwt lo.

Inrinni chawhnuah vànduaithlâk takin Jaz-a pu accident-in a boral hlauh mai tih group-ah an rawn târ lang a, step-ah a tla sual ni àwm tak a ni a, min țhâwng hlawm khawp mai. Min țhàwn thu, pawi kan tih thu leh kan tawrhpui thu chu kan ziak kûr nguai hlawm a, an chênpui ngei niin a pa pa a ni bawk a, keini țhianzaho pawh chuan 'tlaivàrpui ve țheuh ang u' tiin thu kan ti tlu a. Zanriah ei laiin ka chhûngte ka hrilh a, anni pawh chuan," A va pawiin a va zia lo ve aw! Engtia accident nge a nih a?" an lo ti a, kei chuan ka hriat ang ang chu ka hrilh ve a, ka pa chuan," E, in țhianpa in tawrhpuina in tih lan dàn tùr chu a țha dâwn lutuk! A nuam chinah leh hrawk bâwk chung lam china in tuarpui hi a awm a, taksa hrehawm tùr pawh pawisa lova in tawrhpuina in ti lang tùr hi a țha lutuk tlat; mahse, zàn rei lamah chuan a vâwt maithei a, inha lûm la, mite mit ti kham zâwnga awm lovin țha takin i va awm a ni ang chu, mite mit ti kham zâwngin i va awm ang ka tihna a ni miah lo; mahse, zilhna thu chhâk chhuah hrim hrim a țha, sawi miah loh ai chuan sawi zin deuh hian rilruah a châm duh bîk," a ti dap dap a, a nu thil sawi tùr zâwk ni àwm tak niin ka hria. Ni e, ka pa hian hetiang kawngah hi chuan ka nu hi a àwl hneh viau, mitthi kan neih rêng rêngin, kan tlaivàr dâwn chuan hetiang lam thu hi min hrilh ziah.

Jason-a chu thil awm dàn ka hrilh ve tho tak nain Jaz-ate nèn vêng khat kan nih lohnaah a lo kal ka ring ngam lo a nia; mahse, min lo nghah tùr thu min rawn hrilh chuan ka lãwm ru khawp mai. Ka țhiante hi a țhiante ang tho chu ni mah se dik taka sawi chuan a tân chuan țhian lem an ni a, thil hlimawm leh nuam lam pawh ni loah chuan lo tel ve tùr pawhin ka phût ngam lo nghe nghe.

Tlaivâr tùr chuan kan kal tlai deuh hlek a, Jason-a'n car a rawn thawh chhuahpui a, innghahna tùr kan tih lam pan chuan kan tlãn ta vang vang a. Chawhnua accident a thlen hlimchhàwn deuh lai khân mipaho zawng (Jason-a tih loh)chu Jaz-ate inah an lo va kal dial tawh a, an lo va lang tawh bîk tihna a nih chu, Mamuana'n Jaz--a pawh  chaw ei tùrin an inah a hruai haw daih nghe nghe. 

"Mi vêngah mitthi lumenin ka la tlaivâr ngai miah lo, nang i tlaivâr tawh em?" tiin ka han zâwt a, ani chuan țawngkaa min chhâng lovin a lu a lo bu nghat a, a țawng loh avàng chuan țawng zawmin," A pû tê reuh chu a khawngaihthlâk êm mai tiraw? Putar a ni tawh bawk si a, a na dâwn êm asin," ka ti leh a, ani pawh chuan," Khawngaihthlâk khawp mai," a lo ti ve a.

Kan innghahna hmun kan thlen chuan Maengate leh Zdate an lo la thleng lo va; mahse, rei vak lo hnuah an rawn thleng ve leh thuai a,  rei awm lovin Jaz-ate in lam pân chuan kan tlãn leh ta hlawm a.

An in a zau țha a, mi pawh an lo tam viau. Accident a nih avàngin miin an lo hre nasa viau a ni ang, nula tlangvâl kârah patling deuh deuh pawh ka hmu nual, an khawngaih ve hlawm a ni ngei ang chu, mi thin ti țhâwng chî takin a chesual miau si a.

A vawh ka hlauh avàngin ka puan hnuaiah chuan kekawr lum lam deuh ka hâk thuah kha a ni a, ka ni deuh țeupin ka hriat phah. Tunah tak hi chuan a la vâwt lêm lo va, boruak pawh a la nuam viau. Zài a nuam angreng a, ring taka zai ngam lovin ka theihtâwp chanve chauh chhuahin ka zai a, nuam pawh ka ti, Jason-a pawhin a bei thûm ve thei khawp mai.

Zàn men rei ti țhang lo ta chu, dâr 12 chho vêlah chuan ka mut a rawn chhuak țan a, zài pawh a tui thei hlei thei tawh lo. Ka khap fak fak a, intih harh nâna tui ka in țhin avàng lah chuan ka zun a chhuak sek lehnghâl a, țhiante tu emaw tal sàwm ziah pawh a inthlahrunawm duh viau mai.

Ei tùr sawhchiar an rawn sêm tâkah erawh chuan zài lai ai ngawt chuan a intih harh theih ta deuh a, pâwnah pawh kan chhuak harh ta nghe nghe. Vli pawh a mut a lo chhuak ve nasa niin, kan han sawi sap sap a, Vli leh kei tih loh mi dangho chu zàn lam meng rei țhang deuh vek an lo ni a, an la harh țha viau. Kei pawh pâwnah chuan ka harh deuh kâwk kâwk mai, luh thuai pawh ka rawt duh lo va.

Zàn a rei a, boruak pawh a vâwt ta viau. Jason-a chuan," Vâwt i ti em?" ka beng bulah chuan a rawn ti zauh a, kei chuan ka lu ka lo thing mai a, kekawr lum ka hâk chu ka hmuh pah zauh a. A nui ve suk a, ka beng bulah vêk chuan," Puan bih i inhmeh ka ti," a rawn ti leh a, ner nûngin ka en a, puan bih hi chu ka zei lovin ka ning viau, ka hnawk țupin ka hre țhìn a, ngainat pawh ka ngaina lo viau nghe nghe a ni.

Dâr 2 chhoah chuan ka mut a rawn chhuak leh ta êm êm mai a, ka tum viau chung pawhin ka meng hlei thei thlâwt lo; mahse, mutthlûk chu ka hreh ve si a, tlaivâr tùrin mi vêngah ka kal ve a, mutthlûk leh daih chu ka ti ve a ni; mahse, men luih chu a va har tak êm!

"Car chhûngah chhîng zawk mai ta che, i duh em?" Jason-a'n a rawn tih chuan ka lu ka lo thing a, tlaivâr tùra kal na nâ nâ han kal sawn leh daih chu ka duh bík lo a ni, ka țhian hmeichhiate chu ka han en kual a, Vli pawh a chhuak ngang a ni ang, Lalrina dàr nghèngin a lo muthlu ve tho niin, ka va en lai tak lah chuan Lalrina chuan min lo en ve chiah a, mut chhuak zetin ka hawi sawn zui nghâl daih. 

Engtik laiin nge Jason-a nghènga ka lo mutthlûk ka hre hauh lo, ka harh chuan ka mit ka khap fak fak a, ka mut chhuak lutuk pawh kha a bo ta huai mai. Kan țhutna hi langsàr lo lai deuh, kawkel lai deuh hlek a nih avàngin ka muthlu lai chu min hmuh tam loh ka beisei.

Khua a vâr chiang ta tihah chuan nu leh pa lam an rawn kal ta bawk nèn,  kan haw ta thuai hlawm a. Ka mit a kham ûrh mai a, ka lu a na lûk bawkin ka hria. Vawiin vùina lama va lan leh lam kha chu kan sawi tawh lo va, nilëngin ka muhìl thei dâwn tihna a nih ber chu.

Ka mut a chhuak bawk a ni ang, kan tlàn lai chuan ka lo muhìl hman leh pek a nih chu, ka mu tui bawk a, mumang pawh ka nei lo. Ka harh chuan ka duh aia khua a èn avàng chuan ka han khap fak fak a, chutah, rang lehzual hian ka khap leh a, ka awmna ka hriat chhuah theih lawk loh vàng a ni. Ka khum a ni lo va, ka room pawh a ni lo tih chu ka hria, ka lu chêtin ka han hawi kual a, chutah chiah chuan car chhûngah ka lo mu reng a ni tih ka hre chhuak chiah! Jason-a car-ah khân maw? Khawiah nge ka awm? Amah pawh hi khawiah nge?

Ka seat chu a lo ti âwn diai a, min kaih harh hrehin min mut tlangtîr a ni ngei ang chu. Ka ke ka han chêt sawn chuan a lo kham viau tawh mai nghe nghe a, ka han zi ar ar a. Chutah, driver seat kawngkhàr inhawng ațang chuan pâwna Jason-a lo muhìl ve chu ka hmu zui ta nghâl a, a la mut tui hmèl khawp mai, vai khum ka tih mai țhin angah chuan a lo mu a, tuna kan awmna hi an garage chhûng a ni nghe nghe.

Khaw awm dàn ațang chuan dâr zât tùr àwm ang ka hriat loh avàngin ka phone ka en ta vat a, dâr 11 a lo pèl tawh! Ka mu rei tlak tlak hlê mai maw, ka khum chu sawi loh kan in pawh thleng hman lovin ka muhìl daih chu a ni si a, Jason-a a hrilhhai àwm mang e.

Thãwm ka dim ve tehlul nèn, a harhvâng viau a ni, ka che sat sat rîah chuan a rawn harh ta thuai a. Rawn țhuin," I harhna a rei tawh em?" a rawn ti nghâl a, a aw pawh tho phang tih a hriat viau; mahse, hetiang aw hi a sexy ru tlat ka ti.

"Rei lo ve, ka harh ve deuh chiah. Ka muthilhsan che chu pawi ka ti hle mai, min kaih thawh mai tùr che a nia, keimah vàngin i khumah pawh mu thei lovin kha tah khân i mu a ni àwm si a," ka tih chuan a mit chu nuaiin," I muhìl tih harh che kha ka hreh alawm, i mu tui bawk si a," a lo ti a, chutah," Ka nute an inkhâwm a, hetah chaw ei la, ka thlah haw dâwn che nia," a tih zawm leh a.

"A, ka ti buai nasa tawh êm mai che, ka haw nghâl---" ka la sawi zawh hma chuan," I lo kal dâwn nge kal dâwn lo?" tiin min rawn en ta rùn mai. Nuam lo ka ti ta deuh a, bâkah, ka duh leh mamawh hunah ka koin ka sâwm chhuak a, chu chu ngaihtuah chhuakin ka hnial duh ta lo va.

"I nuin chaw pawh min chhum kêp nâng, chaw ka heh asin," ka tih leh chuan thil awm dàn chu a sawi a, kan tlaivâr kan haw car chhûnga ka muthilh thu a nu chu hrilhin chaw pawh min chhum kêp tùrin a lo hrilh thlap a lo ni a, ka muhìl chu ka harh huna ka chêt buai hlauin min vêng pahin pâwnah chuan a mu ve tih a sawi chuan ani pawh chu a mu tui viau tih thu a sawi nghâl a.

Chaw ei khamah chuan min thlah haw ta thuai a, awm rei lovin a haw zui leh nghâl vat a, kei pawh inbual faiin ka harh phah sawt mai. Ka nute rawn haw chu thil awm dàn ka hrilh dâwn chuan," Jason-a'n thil awm dàn min rawn hrilh tawh a," a lo ti mai a, min ngaihtuah àwm hmêl pawh a pu chuang lo.

Jaz-a pu vuinaah chuan mipaho bawk chu an va lang leh hrâm a, hmeichheho erawh kan mu vek a nih duh hmèl. Kei pawh dâr 2 vêlah chuan ka mu leh a, ka muhìl leh nghâl thei tho a nih chu. Ka nuin zanriah ei dâwnah min rawn ko a, harh chu ka lo harh daih tawh a, ka la tho chhuak lo mai chauh a ni.

Ka záwt ang ka ti deuh nain ka zâwt leh ta lo kha a ni a; mahse, a vawi hnih nân Jason-a leh sam-kir-buangi ka hmuh dun leh tâkah chuan chhûngril lama min turtu a rawn nasa ta khawp mai a, zànah ka va text a.  *Vawiina i kalpui kha i bialnu a ni maw?*  tiin.

Ani chuan  *Tu ber kha?*   a rawn ti daih pek a nih chu! 'Tu ber' ti thei tùrin eng zât fakaua tam nge a lo kalpui bîk ni?!! A luck viau a ni ang.

*I va ngah àwm ve a?*  tiin ka chhâng lêt a, ani chuan  *Ngah vak chuang nãng*  a rawn ti leh lawi a, ka hre thiam nuai lo ve a.

Ka ngaihtuah ka ngaihtuah a, a kalpuinu Sam-kir-buangi kha ka hmuh tawh hnu ang riaua hriatna ka nei tlat pek a; mahse, khawiah nge tih ka hre chhuak thei mai lo thung. Khawiah emaw chuan ka hriain ka hmu tawh ngei mai a, ka vawi khat hmuhnaah kha chuan ka hmuhna a hlat deuh bâkah a hmêl kha chiang takin ka hmu thei lo va, a vawi hnihnaah erawh kha chuan ka hmu chiang thei ta a, chhe lo tak a ni. A sam kir buang kha a inhmeh tawp a, a sam buang hmeh tùr takin a vun a ngo a, chhiat pawh a chhe lo, a pian ni se 'A model zaih' kan tih ang chi a ni a, a chhiat loh dànah a rilru pawh a chhe lo ang.

Chutah, ka ngaihtuah chhuak ta. Ka phone banin Instagram-ah ka lût a, ka hre dik chiah e. Hriatpuii, Model a ni alawm, thlalâk a post hrang hrang chu ka en thla dan dan a, pahnihah phei chuan Jason-a pawh a lo tag nghe nghe, comments pawh ka chhiar chhuak vek asin le! Ka lo chhiar ta kher kher erawh ka inchhír zui zat thung. Jason-a'n IG-ah Account a nei tih ka lo la hre miah lo a, tunah ka hre ve chiah a, Followers lah chu kei aiin a lo ngah daih lehnghâl a, a lo va inthup thei tak!

*KAN HMA LAM HUN TÙR NGAIHTUAHIN KAN BUAI ȚHÌN A, KAN HUN HMAN MÊKA HLIMNA PAWH KAN NGAIHVEN HMAN LO ȚHÌN. TUNA I HUN HMANAH KHÂN I RILRU PEIN HLIM NÂN HUN HMANG ZÂWK TA CHE, I HMA HUN TÙR CHU HUNIN RAWN HRIL ZÂWK TEH SE*