☆SUMRISANG☆ - 9 By Dingdi Pachuau

☆SUMRISANG☆- 9 By Dingdi Pachuau

Khami ka zawh bâk kha chu a bialnu chanchin, ni leh lo, hmeichhe dang chanchin hrim hrim ka sawipui leh tawh lo; mahse, ka ngaihtuah ka ngaihtuah thung. Ani hi chuan eng mah min hrilh ngai lo, min hrilh lo mai ni lovin a nunah tu hmeichhiain nge hmun chang tih chu sawi loh, a hmêl țha tih zâwng takngial pawh a sawi ngai lo, tlêm lai deuha min fiamnaa 'hmêl țha' tih a sawi rîk zauh bâk kha chu. A châng hi chuan 'mipa a nia, hmeichhe duh leh hmêl țha tih chu a nei ve àwm tho si a, min hrilh ve mai àwm' ka ti rilru țhìn a, a chângin 'hmeichhe îtna a nei lo em ni zâwk le? Ani hi Gay a lo ni reng zâwk a ni ang' tih te thleng thlengin ka ngaihtuah a nih chu; mahse, chu êm êm chu ka ring bawk si lo.

Hriatpuii thlalâk a comment dàn kha chu a pângngai mai a, mi nâwlpui comment dàn a ni, han ngaihruat theih tùr thil pawh a awm lêm lo; mahse, amah Hriatpuii zâwkin a chhàn lêt dàn ațang kha chuan a hmeichhia zâwk chuan a duh ngei a ni tih a hriat theih tlat, a hmeichhia zâwkin a hope êm êm laia a mipa zâwk ngawih tlat leh chêt lâk lohte chu, hmeichhia a ti khawngaihthlâk alawm le, a polite loh thlâk.

"Ka inchei dàn leh awm dàn hi a pà viau em ni? Patil ka ang em? Hei hi Lalrina min hnâwl chhan ni tlatin ka hria a," tia Jason-a ka zawh chuan," Ang lo, hmeichhia dik tak i nih kha," a lo ti mai a. Kei chuan," Ni e, hmeichhe dik tak ka ni tih ka hria, ka rilru pawh a hmeichhia thlap. Ngaihzâwngah pawh ni se mipa ka thlang bawk. Ka inchei duh dàn a nù viau loh vàng mai hian patil ka ni tihna a ni lo," ka ti leh a, ani chu lo bu nghatin," Dik chiah," a lo ti ve leh a.

"Mahse, mipate hian hmeichhe nù deuh hnâp lo chu in duh lo a ni lo'm ni? Mipa chuan hmeichhia, tlêma pà deuh hlek chu țhian atân chauh an duh an tih țhin hi a dik em?" tiin ka zâwt ta khauh a, min chhàn hmain a ngawi deuh vang vang phawt a, ka lu bu nghatin," Kha maw, ka ti dik chiah a ni, min chhàn harsa i tih hlê kha," ka ti leh a.

"Hmeichhia in inang vek lo angin mipa pawh kan inang vek bîk nâng," ti chauhin min chhâng leh a, kei chuan," Mahse, a dik tlângpui tho ang, hmeichhia pawhin mipa nù lam deuh ai chuan mipa pà lam chu kan duh zâwk ve tho a," ka ti leh a, min chhâng tawh lo, ani pawh hian hmeichhe nù lam chu a lo duh ve tho lo thei lo.

Krismas rawn hmang tùrin Kristie pawh a rawn haw chho ve hlauh a, kan inhmu khât a, hmun dangah hmu ila chiang taka ka hmuh loh chuan ka hre kher tawh lo ang. A hmêl a țha a, ani pawh a sam chu a buang deuh thar a, a kir deuh bawk. Kan têt lai pawh khân ani sam hi chu kei angin a ngíl ve lo a nih kha; mahse, a inhmeh êm êm thung.

"Inhmuhna chin a va rei tawh tak!" tiin min nuih sâng a, kei chuan," Ni e, inhmuh loh kârin i lo nula tawh hlé mai," ka'n ti zui hlak a, a lo nui hak a.

"Nula ve tawh bawk ang chu, nang pawh i nula tawh alawm, kei aiin i sâng tawh zui! Ngaihzâwng pawh i nei tawh ngei ngei ang, i nei tawh chiang mai," a ti nghâl bawrh bawrh a, hmâna mi ang chiah kha a la ni, ani hi chu a nu nèn an inchhùn a, a țawng duh barh barh viau. Kan têt deuh lai kha ka hre chhuak vawng vawng mai.

"Nei ve bawk ang chu, ka kawp țûn lo chauh," ka lo tih chuan a nuih a za zual a, nui var var chung hian," Ka ring tak tak! Min hmuhtîr ve rawh aw, ka hmu châk tawp! Awii, ka hmu che hi a mak e, a nuam bawk si, ka awm chhûng chu inkàwm ang aw," a ti sauh sauh a, kei pawh chuan," Min kawm peih phawtte chuan," ka lo ti ve a.

Zanriah ei nghâl tùra min tih avàngin ka ei nghâl ve leh ringawt bawk a, hmeichhe pahnih an țawng duh a, chaw ei lai pawh chuan kan ri bawrh bawrh reng mai a, pa ber a rawn inrawlh zauh zauh tih lohah chuan hmeichhiain țawngah ram kan la ti ila a dik ang.

Zanriah ei khamah an chhûngte an rawn lêng ve țak țak a, naupang an tel ve bawk a, an ri laih laih mai. Kei pawh ka awm ve deuh rèn ráwn a, dâr 8 rîk hma deuhin ka haw ta thung. Khua a vâwt țha var var tawh khawp mai a, inthuam lum viau loh chuan ke hnih neia chuan pawh a peihawm tawh loh.

Jason-a'n ke pali nei chiin min thlah a, Krismas hla a play chu ka zàwm a, ka zai vak vak a, kan inkhãr phui nasa mai si a, a rûk tak chuan bengchheng chu min ti viau maithei a ni; mahse, sawisèl a nei miah lo thung, a peih lo a ni ang.

Hunpui lai ngang a ni a, țhiante nèn pawh kan inhmu khâwm zut thei tawh bík lo. Chhûngte'n hunpui laia programme dang siama lo chhuah ve daih kha an phal tawh bîk lo va, a hma ai ngawt chuan chhûngkua leh kohhran lam kan bèl tam ve ta deuh chu a ni. Kristie leh Jason-ate nèn pawh zaipâwlah kan tel zar zar mai, țhalai tawh phawt chu hla remnaah tel vek tùr an ti si a, hla rem tùr ni se kan thiam sa a lo ni bawk nèn, kan hnial thei lo a ni.

Krismas nî taka ka bih tùr ka nuin puan min leisak chu ka bih a, ka pain pawisa min pêka pheikhawk ka lei chu nalh ti takin ka bun a, U Nubawihi'n a duh dàn taka kawr min design-sak ka ha bawk a, ka thawh chhuah tel ve hauh lova ka incheinate chu mawi lo ka tih phah hauh lo va, inthlahrunna leh nuam tih lohna pawh ka nei chuang lo, mawi ka intiin inhmeh ka inti ve viau zâwk a ni.

U Nubawihi'n ka duh vak lo chungin  ka mit tlêmin min cheisak ve a, ka hmuiah pawh lip gloss hnawih mai duh tâwk lovin a lipstick min tahsak hlek bawk. Ka awm thiam chiah lo, ka hmui chu ka pet ka pet mai a, chu chu min hmuh chuan min hau zêk lehnghâl a.

"Tikhân pet pet suh, lipstick kha a reh vek ang asin, zei lo lutuk mai," min tih chuan," Ka hnawih ngai lo va, ka awm thiam lo alawm," ka lo ti a," Lan pawh a lang mang hleinem, tikhân awm tawp rawh. Ngaihtuah rûn lo la," tiin min en leh vang vang a," I makeup leh i thuamhnaw zawng zawng kha a inchawih vêl vek si a, i inhmeh lutuk ringawt. Pathiannî thuama i han inthuam tak tak hi chuan i chhe miah lo, i lang nù zaih bawk a, model pawh i ang ve dâwn dâwnin ka hria," tiin min fak zui luam a, fakna hi chu lem a nuam deuh chu a ni, ka nui sûng a, fak derna a ni tih hre tho mah ila a der mai mai ni lo deuh hleka hriatna ka nei!

Ka nu leh pate pawh chuan ka inthuamna ka inhmeh thu chu min hrilh ve tho a, keimah ngei pawhin mawi chu ka inti ve, min han fak leh kher bawk nèn, chu chuan mahni inrintâwkna min neihtîr a, ka kal hrim hrim pawh chu ka khãwr țût ta bîk lo va, nuam ti takin ka inkhâwm ve thei ta a ni.

Țhianteho nèn vêng inang hlawm hek lo le, Kristie chu ka kàwm ta deuh ber a, Jason-a nèn pawh kan inkàwm deuh tho nain ka kàwm vak lo. Lalrina hmuh tùrin a awm bawk lo nèn, Jason-a tân pawh ka bialpa anga awm kha a ngai ta rih si lo va, a thaw pawh a veng hawk rih ngei ang.

Kristie chuan," Thil ka zâwt mai mai ang che aw, 'Mai mai' tihah a mai mai vak chuang lo va," tiin a han nui phawt a, kan chanchin a lo hre thâwi ta em maw ni tiin ka lo hlauthãwng hman khawp mai a; mahse," Ka awm loh hlànin Mâma nèn hian in lo inkàwm țhìn tho sia, tu nge a kawp ve deuh i hria em? A hrilh tawh che em? Nge i lo hmu ve tawh zâwk?" a rawn tih tãkah chuan min man chhuah ka hlauhthàwnna chu a kiang ta nghâl a; mahse, Jason-a bialnu chungchâng a rawn sawi avàng chuan ka rilruah nuam tih lohna a rawn awm leh nghâl zat a.

"Hriatpuii chungchâng em ni i sawi?" ka tih chuan," Aw...i lo hre tawh tihna !!  Ka rin dàn chiah a ni. Mâma ka zâwt chhin a, min chhâng duh miah lo a nih chu maw le, a hrilh che chu ka ring rêng a! Chhe lo ka ti thei lutuk a, kan model zîngah hi chuan chhe lo ka ti ber hial ang. A sam tih ang chiahin alawm ka tih," tia nuiin a sam chu a'n khawih zauh a, sawi zawm lehin," Bâkah, Mâma thawhnaa an pu ber hi Hriatpuii pa a lo ni leh zêl a, engkim hi a dik chho vêl vek mai dâwnin ka hria. Chhûngrilah hian nuam ka lo ti ve veng veng ringawt mai a ni, a bialpa nih chu sawi loh, a bialpa nau ka ni ve ringawt pawh hi nuam ka ti, inkawp fuh chho reng se ka ti êm mai," a ti leh barh barh a, a hmêlah chuan lungawina hi hmuh theihin a lang a, a rilru zawng zawng hi a hmëlah a lang ka ti mai.

"Chhe lo ka ti khawp mai, ka hmuh dun vawi khatna ațang khân ka ring ve tawp a," ka lo ti ve a, a lo bu nghat a, chutah, nui var var chung hian," I lo hmu dùn tawh a! A țha e, an awm dùn lai chu ka va hmu ve châk tak! Mâma hnênah a hmuh huna min hruai ve tùrin ka dîl a, àwm ang lo a ti lutuk a ni ang, a ngawi hmak mai a nih chu," a ti leh a, a hmêl chu ka en reng a, nuam a tih hmèl êm avàng chuan a țawng hmêl chu hmuhnawm ka ti tlat pek a nih chu.

"Dik tak chuan Mâma hian bialnu a neih ka hre ngai lo va, ka ngaihven lo thei lo a ni. Hriatpuii ber kher a ni hi ka lãwm a, ka phûr a, ka duhpui êm êm bawk, ani meuhin a lo duh ve thei hi mak ka ti zâwk, a phû lo êm êm si a. IG-a a tag ațang khân ka hre ve chauh a, Hriatpuii hi ka follow hrim hrim bawk a, ka han hmu kha chu comment ka châkzia mai kha! Mahse, 'êm a' ka ti a, ka insûm ta hrâm hrâm a ni, min hre chhuak ang tih ka hlau a," a ti leh siam siam a.

Mak tak maiin ka phûr ve lo, ka lãwm hran lo bawk. Hriatpuii hi ka thîk chu niin ka hre lo va; mahse, Jason-a tân ka duhpui ve lo a ni ang, ka phùrpui ve tlat lo. Kristie nèn chuan kan rilru a inang lo ta phawt mai a; mahse, sawi chhuah kher ka tum lêm lo, ani chuan a duhpui ve a ni mai a, chhiat chu a chhe lo thlâwt alawm.

Bakery chhang tui zet chu thingpui nèn kan hmeh a, thingpui a dùt hlak hnu chuan," Ti ta daih ila, Romeo chu min hmuhtîr ve tawh la? Phone i keng tiraw?" a rawn ti a, min rawn nuihin," A chhe lo viau ang chu maw? A chhe thei lo hrim hrim," a ti leh a. Kei chu ka lo nui tãwi deuh tak mai, tu thlalâk mah hmuh tùr ka nei hleinem, Jason-a nèn thla kan la dùn nual a, ani lah ka bialpa tak tak ni lo chuan. Lalrina thlalâk kha chu ka delete vek tawh a, bâkah, kan ințhen tawh a, ani thlalâk hmuhtîr daih thu a awm tawh lo, duh pawh ka duh lo bawk.

"Kan ințhen daih tawh alawm, a thlalâk pawh ka nei tawh lo," tiin ka chhâng ta a, dâwt pawh a ni lo va, ka hrilh hreh chuang lo. Ani chuan," A ni maw? A va pawi ve!! Mahse, a dang țha tâwk, a hma aia țha i nei leh thuai dâwn tihna a nih chu," a ti thên a, a phone chu banin a kheuh niap niap a, mipa thlalâk pakhat hi min hmuhin," Kha kha a nih kha," a rawn ti zui a.

Ngun zetin ka thlêk vang vang a, a hmêl chu a țha hran lo nain a pà viauin ka hria. A ngo vak lo tih pawh a hriat; mahse, a fai viau thung. A mit hmul a buk țha hle a, a khabeah hmul tlêm a zuah a, a sam erawh tlêmin a buk deuh. Chutia a lan dàn ka rilrua ka judge mawlh mawlh lai chuan," U Lura kha chu a fel ve a, kei eng mah ka nih loh tehlul nèn, min duh thiam ve lutuk a, ka phû lohin. Kan hostel piah lawkah in a luah ve a, company lian ve tâwk takah thawkin a naute lehkha zir a chãwm char char a nih chu. Kan inkawp țantirh chuan kan kum a lo inthlau ve pah nèn, ka duh vak lo deuh a, Mâma ai pawh hian a upa zâwk a nia! Kei ka rilru hi a naupang chhia țhìn bawk sia maw, kan inkawp rei theih ka ring lo lutuk a, bâkah, hun ãwl a nei lo ve bawk sia, keiin inhmuh ve deuh zauh zauh ka lo duh ve țhìn bawk nèn, hun a nei lo lutuk chu ințhen hi ka cho âr reng mai a ni; mahse, a rilru a puitling êm a, min dawhin min hre thiam zêl a, tlâwm zâwkah a țang hreh ngai lo, hei kum hnih chuang lai chu kan lo inkawp ve ta a nih hi, tunah hi chuan ka duh tawh lutuk ringawt," a ti leh barh barh a.

"A nih chu, a fel hmèl ka lo ti rëng a ni. Hmeichhe tân chuan aia upa deuh hlek hi a pawi lo, 'min duat thiam duh' an tih kha," ka lo ti ve a, ka nui pah a. Ani pawh chuan," Nia, a theih ang angin min duat ve viau bawk, hmeichhe lama zei vak chi a ni lo ve bawk a. Sawi lo teh, kan nih ațanga thla thum hnuah chauh alawm fawh pawh kan infawh le, a zakzum ve pah bawk nèn, tûn hnua ka sawi chhuah leh pawh hian 'Fawh che chu ka tum ve reng țhìn; mahse, chhûngril lamah ka zãm a ni ang, ka khùr nasa thei lutuk a, zei lo lutuk min tih ka hlau bawk nèn, ka ti lo leh țhìn, che thei lovin ka khawng tlat țhìn a' tiin min chhâng a nih chu. Ka khawngaih zâwk! Kei lahin ka tihtauh khum nasa thei bawk si," a ti a, a hun lai a ngaihtuah a ni ang, a melh ngai a melh a, a nui leh sak sak țhìn a.

Kawngka lamah thãwm a rawn awm a, ka en nghâl vat a, Jason-a a rawn lût zui nghâl a, min rawn enin," Eng nge, nangni pahnih hi in hriat a? Min hmu ngai lo ang mai," tiin kan awmna lama rawn kal phei a rual nghâl a. Kristie ka en a, ani pawh chuan a lo en ve reng chu lo niin.

"Kan rêl hrep che!" ka lo ti vat a, ani chuan," Ka chanchin in sawi a nih chuan min ngaihtuah tihna, a țha a nih chu," a ti thên a, chutah," Mâte, in tùr chu min han siam ve nghâl la," a ti zui zat a. Kristie chuan," I rawn thleng ve chauh a, inti lal thei bawk siah! Ka rawn haw chho lo ang tih hi i hlau ngawtin a nia ka rin ni!" a ti hlak a, nui chung thoin a nia a sawi ni. A tho zui nghâl a, Jason-a chuan țhut țhat pah hian," Engtin chiah nge min lo rèl a?" a ti a.

"Kan rèl dàn che kan hrilh zut zut chein, mi ang lo kan ni dâwn tihna a ni ang asin!" ka lo ti ve thung a, ani chuan," Mi in ang em ni? Mi ang pângngaiin tûnlaiah mi an rêl ngai tawh hleinem, mahni hnaah an buai vek tawh," a ti leh a, Kristie chuan thingpui siam pah chuan," Mi ang lo thingpui siam chu in pawh i in duh lo ang a?" a lo ti hlak a.

Jason-a thingpui in chu a rûkin ka melh leh zauh zauh țhìn a, tlêmin ka ngei deuh tlat. Hriatpuii nèn an chanchin min hrilh duh miah lo chu ka dem ve tlat alawm, keiin amah ring êm êmin ka chanchin zêp nei lovin ka hrilh vek a, engati nge min rin ve loha a chanchin pawh min hrilh ve loh ni ka ti a ni, Kristie nèn erawh rei lo tê kan inkawm chhûng pawhin chanchin kan inhrilh zung zung hman a nia. Mipa a nih vàng hian eng mah min hrilh duh lo zâwk tihna em ni ang? Hmeichhia hi chuan eng eng emaw hi kan inhrilh peih a, thil ho tê tê pawh kan sawi peihin kan inhrilh liam liam a ni ngai a... mahse, mipa pawh ni se kan inkàwm tam tawh tho a, min hrilh ve  mai se, ka phût ve tho.

"Eng nge i ngaihtuah veng veng a?" tia Kristie'n min rawn tawk zauh chuan ka ngaihtuahna ram ațangin ka harh chhuak zawk a, Jason-a lah chuan," A rilruin building sâng a lo sa pek a ni ang," a lo ti zauh a, kei chuan," Nia, a sâng angreng a, sak pawh ka sa zo hman lo," ka ti ve mai a, Kristie chu a nui hak hak a.

A hnuah chuan kan titi zui luam a, subject dang dangah kan pakai a, kan sawi tui thei phian zêl tho mai. Chawhmeh lam kan sawi laiin Kristie chuan an ina chaw ei ve nghâl tùrin min sàwm leh nghâl zat a, kei chuan," Ka ei tawh kha, rawn ei ve tawh zâwk rawh, a hun chiah," ka ti ve thung a, Jason-a chuan," Min sâwm ve dâwn lo maw?" a lo ti nghut a.

"'I bialnu hming i sawi phawt loh chuan' ti rawh," Kristie chuan a lo ti chùl a, kei chuan Jason-a melh ràn chung chuan," Ni e, Kristie sawi ang chuan," ka ti zui ve nghâl a, ani erawh chuan," Min bâwl lo teh u, ka sawi duh tak tak mai tùr asin," a lo ti duh chauh a.

'Chaw ei chu hun dangah ni zâwk mai rawh se' an ti a, ka haw tùr chu an pahnihin min thlah a, a hnungah Kristie nèn țhuin a țawng barh barh reng a, a chângin ka lo inrawlh zauh a, Jason-a phei chu a țawng ve lo.

Ka pain chaw ei tùrin a lo sâwm ve thung a, an hnial deuh lai chuan kan thil ruahman chu ka pa ka hrilh vat a, ani pawh chuan," A nih tak chu. Ni e, in lo ruahman tawh ang chuan hun remchâng hmasa berah in unauin in rawn ei ngei tùr a ni, Kristie pawh kan hmu khât tawh a, chaw eipui pawh kan châk ve hrim hrim tawh a ni. Bawihtei'n in inah a rawn ei tawh a, in rawn ei lêt ve ngei chu a ngai," a ti ve ta a.

Ni 30 tlai lamah chuan chaw ei tùrin ka va lam a, kan inhrilh sa vek tawh a, an lo inpeih ve viau tawh. Nu Sangpuii chuan," I rawn kal rau rau chuan vawk vun ka bàwl hi suak phei ve rawh, i pain tui a ti ve ngawt ang," a ti a, ka hnial hma, hma chuan a suak chhuak nghâl mawlh mawlh a, chaw eia ka sàwmte'n chawhmeh tùr min suah hawtîr a nih ber chu.

"I va'n khalh thiam tawh êm êm!" tia Kristie'n min fak chuan," Thiam ve tawh a ni mai, khalh tam hi a ngai ve a, ka pa pawh ka phur ve fo tawh asin," ka lo ti ve a, Kristie chuan," I thiam tawh lutuk! Kei chu ka la thiam ve hleinem, bâkah, zir tùrin hun ãwl ka nei thei rih lo a ni, thiam ve ngei erawh chu ka la duh," a ti leh a.

"Hmeichhe motor khalh thiam chu a țha lo, mipain khalh thiam se a tâwk chiah," Jason-a'n a lo tih chuan," A nih leh, Hriatpuii'n a khalh thiam ve lo tihna em ni?" Kristie chuan a lo ti vat a, min rawn melh pah ralh bawk a.

"Thiam e," a lo ti mai a, Kristie a lo khêk râih a. Jason-a chuan," Ani chu a puitling tawh alawm, a fîmkhur thiam tawh a," a ti leh a, a sawi dàn ațang pawh hian Hriatpuii lam a țang sa nghâl at tih a hriat hliah hliah, bâkah, a lo hre chiang viau tawh a lo nih hi.

Kristie chuan," Ani pawh a puitlin tak tak hmain a thiam ve daih tawh tho ang chu," tiin a lo hnial a, kei erawh chu ka ngawi reng thung. Hriatpuii chu a puitling tawh a nih chu, a hre chiang ang. Keini ve hi chu naupang chhia ang chauh alawm kan nih, chu vàngin, a chanchin pakhat tê pawh min hrilh ve duh loh hi, hrilh tlâkah min ngai lo tihna. Ka la puitling tâwk lo va, ka la fîmkhur tâwk lo va, a chanchin pawh min hrilh duh lo rêng a.

Mahse, zêp lovah chuan ka vui ru tak zet.

*RILRU LAM CHANCHIN ZIR MI PAKHAT CHUAN 'MITE'N AN NGAIH DÀN TÙR CHE LEH AN EN DÀN TÙR CHE I DÀWN TAM POH LEH I NUN A HLIM LO TELH TELH ANG' A TI*

DIK I TI EM?