☆SUMRISANG☆ - 12 By Dingdi Pachuau

☆SUMRISANG☆ - 12 By Dingdi Pachuau

Dârthlalang hmaa ka din apiangin Jason-a min fakna chu ngaihtuah êm êm pawh ni miah lo hian ka hre chhuak fo a, Pathianni a lo thlena ka inkhâwm tùr ka inchei apiangin mawi min tih ang chi khân inchei ka tum ve ziah ta bawk. Ka incheina, ka thawmhnaw hâk vàng khân nge mawi min tiha ka makeup hman ve vàng kha ni ang tih ka ngaihtuah rauh rauh fo a, nge ka sam ka tih danglam vàng zâwk hi ni ang? Inhmeh min tih vàng em ni? A, a eng bera pawh chu lo ni se, inchei hi a țha, Jason-a fakna ka dawn phah a.

U Nubawihi'n ka thawh tùr hna min hmuhsak chu dàwr nghah a ni a, chu pawh chu a țhiannu țhianpate dàwr a ni nghe nghe. A țhiannu țhianpa nu leh nula pakhatin an nghâk țhìn a, nula chuan thlaleh lawkah pasal a nei dâwn ta si a, an duh hmanhmawh viau nghe nghe a ni àwm e. Dàwr hi kan in ațangin a hla hran lo va, chu vàng tak chuan U Nubawihi hian min duhpui a ni. Kein minute 15 vêl kal a ni mai a, scooty ken a ngai lo ang a, kal lam leh haw lam manah sum ka sèn a ngai dâwn lo ta a ni.

Thawh țan hma hauh ațangin peih lo lâwk viau mah ila hna dang han thawh mai tùr ka hmu si lo va, lehkha ka zir zawm peih tawh si lo nèn, 'thawk chhin ve hrim hrim teh ang' ti rilruin kârleh lam ațanga thawk tùr chuan kan inbe fel ta a.

Chaw kan ei laiin ka hna thawhna tùr chungchâng chu kan sawi khâwm a, ka pa chuan," Thla hnih khat i han thawk ve chhin ang a, hrehawm i tih tâk viau leh i bànsan leh thei tho alawm," a ti a, ka nu erawh chuan," Hrehawm tihna êm êm tùr a awm hleinem, mi pawhin an thawh theih chuan engah nge hrehawm i tih viau bîk ang?" a lo ti ve thung a, ka u chuan," E, i thawh chhuah ngei pawisa i hmuh hunah chuan e, nuam i ti viau ang, thawh zêl i duh ang," a lo ti ve bawk a.

Ka țhiante pawh hrilh lêm lo chuan ka han thawk ve țan ta a, a ni khatna ațang chuan hrehawm ka'n ti țan nghâl ringawt a! Mahse, ka chhûngte erawh ka hrilh chuang lo. Min zawh pawhin," Hrehawm ti tùr pawhin a ni khatna chauh alawm," ka ti mai a, a rûk tak erawh chuan bànsan mai ka duh nghâl a; mahse, ka inthlahrung ve deuh hlek a, hna min hmuhsaktu zahawm ka ti a ni.

Dàwr neitunu chu thau lam niin ka hmuh tirh phat ațangin ka nêl lo nghâl tawp a, nui hmêl a pu bawk si lo, ka biak lahin a rùl tâwk chauhin min chhâng a, a hmai a hnawih nasain a mithmul chu sîn tê, chiang zet si hian a line kulh bawk a, min melh leh kur kur țhin avàng chuan hlauhawm ka ti a ni. Ka che sual palh hlauh ang a, min àn khum hrep ang tih ka hlau, chu vàng chuan ka chêt sual palh hlauh loh nân ka theih ang tâwkin ka fîmkhur a, thin a phu dup dup duh kher asin.

Dàwr ka nghah thu ka țhiante tu mah ka hrilh lo ka tih kha; mahse, Zirtàwpni chawhnuah dàwrah chuan Athui a rawn lût ta tlat mai a, lo chhàwntu ka ni lo thei si lo, min han hmu thut leh ka hmu thut mak kan intih dunzia chu! Mahse, ani hi chu a fel a, a țawng ring ve vak ngai lo. Kan thil zawrh en pah chuan min hmu mak a tih thu chu ring lo tê hian a sawi sep sep mai a, dàwr neitu ka pi pawhin min rawn ngaihven hran lêm lo. Fiona-i leh Lawmpuii chu ni na se chuan an phûl leh hlut emaw kha a ni ang a, ka piin min hauh phah zêk maithei a ni.

Ka dàwr nghahna neitu ka pite hi Seventh-Day kohhran an nih avàngin Inrinni chu ka ãwl thei a, a zia ka ti angreng. Hlawh min cut-sak dâwn chuang bawk si lo va, ka theih ang tâwk chuan țhahnem ngaihpui ka tum ang, ka pi hi hlau ru viau mah ila thawk țha lo min ti ang tih ka hlau a, ka theihtâwp chu ka chhuah ve a ni.

Kâr hnih chuang ka thawk ta, ka pi nui chu ka la hmu chuang lo. A nui ngai lo a nih ka ring ta deuh a, a nih loh vêk pawhin a nui thei lo tal a ni ang, ka tih chhan pawh dàwrah hna ka thawk tih hriain ka țhiante an rawn kal deuh huk a, min rawn dàwr ve nual bawk; mahse, chuti chung chung pawh chuan nui hmêl a put phah chuang lo. Engtin nge hetiang mi hi an awm theih aw ka ti a ni,eng thil mah hian a nuih a tiza ve lo a ni ang.

Ka u sawi ang takin thla tàwp ni tàwp bera ka thawh hlawh ka la ve chu, ka hlim tak zet. Keima pual liau liau hian pawisa ka la thawk chhuak  ngai hauh lo va, a thla bî ang phei chuan. Mite hlawh angin tam lua lo mah se ka hlim loh phah chuang hauh lo, hman pawh hmang țhen phal lovin a kimin ka hàwn thlap a, ka chhûngte bulah intithei zetin ka han hmuh zui a.

Ka pa chuan," I hlawh lak hmasakna ber a ni bawk si a, hriat reng nân eng nge i nu nèn hian min leisak ang aw?" a lo ti vang vang a, U Nubawihi pawh chuan," Kei pawh ka duh ve tho a nia," a lo ti ve bawk a, ka nu erawh chuan pawisa khawih neuh neuh pah chuan," E, a hlu vet vet êm mai, amahin kawlin khâwl țha zâwk rawh se, mi hnuaia a inhlawhna ațanga a thawh chhuah liau liau a ni si a," a lo ti thung a, nui var var chung hian," E, lungngai mah ta che u, in thil tùr chu ka leisak vek ang che u, ka la thawk chhuak dâwn chauh alawm," ka ti zung zung a, ka pa chuan," Khawi maw, ka fanu duat thawh chhuah pawisa kha ka lo khawih leh teh ang, nuam ka va ti chiang tak êm!!" tiin ka nu kuta pawisa chu a'n ban leh a.

Ka pawisa thawh chhuah hmasak ber hriat reng nân ka chhûngte chu an mamawh nia ka hriat, man to lêm lo ka leisak vek a, ka hman bãng zawng chu ka dah țha a, ka duh zâwng ei tùr lei nân pawh ka hmang phal lo, ka khâwl phawt ang a, ka neih tam hunah ka hmang chauh ang.

Jason-a'n ka chhûngte thil ka leisak a ni tih a lo hre ve a," Min leisak ve dâwn nange?" tiin thu tak deuh si, vui hmêl pu chuang miah si lo hian min zâwt a, nui hmêl a put loh avàng chuan chhàn dàn tùr ka bangbo deuh hlek a, kan chhûngkaw member a ni ve si lo va, bâkah, ka thil leisakho lah thil man to a ni bawk si lo nèn," A, a ho e, a tlâwm hlawm alawm, i duh ve teuh lo êm mai!" ka ti ta ringawt a.

"Engah nge ka duh loh ngawt ang?" a lo ti thung a, kei chuan," I duh tak tak lo tawp ang," ka ti leh a, ani lah chuan ka rilru hria ni àwm fahran hian," In chhûngkaw member ni ve lo mah ila i bialpa ka ni ve tho a, ka pawimawh viau tho lo maw? Min leisak chu a àwm ve hliah hliah," a rawn ti leh a, a thil sawi dàn avàng chuan ka en hau nghe nghe.

Ka bialpa tak tak pawh a ni chuang lo va, han leisak ve ringawt pawh... ani hlawh nei a nia, a hlawh lah keia hlawh tlêm tê nèna khaikhin chi lah a ni hek lo; mahse, țawngkamah hrim hrim hi chuan ka zah hran loh bâkah ani lakah hi chuan dang mai mai ka tum lo.

"Nang pawhin hlawh i nei reng a, eng thil mah min leisak chuan loh kha, i bialnu ka ni ve tho," ka han ti lui ve ngat a, a huat deuh hlek ka rin bâkah," Ka tlâwm e," tia min chhàn ka ring deuh a nia; mahse, ka rin loh deuhin a rawn nui chhuak hawk a," A dik ve leh reng mai ka ti, i thluak tê hi chu aw..." a lo ti ve mai a.

A tûk tlaia dàwr ațanga ka chhuak chiah chu min lo ko a, car-ah min lo nghâk a ni chêk ang chu," Thil pêk tùr che ka nei a nia," a lo ti a, ei tùr eng emaw a lei a nih ringin ka pan ve mai a, ka mitthlaa ei tùr rawn lang vàng chuan ka ril chu țâm tharin ka pim pawh a ri khal rawih rawihin ka hria! A bul ka thlen hma hma chuan," Ka ei châk tawh teh a nia," ka han ti teh ngawt a, ani erawh chuan a car hma lam țhutna, a țhut lohna zâwk lam kawngkhàr chu hawngin," Lût phawt rawh le," a ti a, eng mah sawi lo chuan ka lût ve nghâl mai a.

Kan tlàn chhuah hnuah chuan," Ka va khawngaih reuh che e. Engati nge ril țâma i lo awm rêng rêng ni? Chàwl lawk ang aw," a ti sauh sauh a, kan in lam min panpui ta mai lo chuan car chu a her lêt leh a, hnial pawh ka hnial hman lo. Pawi lo, ka ril a țâm miau alawm.

Car khalh pah chuan a kut vei lam chuan bâwm lian vak lo, a len loh ang aia rit nalh reuh si hi ka mal chungah chuan a rawn dah a, mak ti taka amah ka en rual chuan ka rilru chhûngrilah phùrna nasa tak a awm thung. Rawn hawi chuang lo hian," I duh ngei ka beisei," a ti sup a, eng thil nge a nih a sawi si lo va, eng vànga min pe ngawt nge a nih? Nimin lama kan thil sawi vàng kha em ni ang?  Chu pawh chu ni se, heti teh thuta thil min pêk hi ka ring lo asin.

"Ka hawng nghâl dâwn!" Ka phùrna chu ka thup zo thlâwt lo, min chhàn hma hma chuan ka hawng nghâl a.  Clutch lian lêm lo, mawi zet si hi a lo ni a, lehlam lehlamah stone hi a inbel khat vek bawk a, lek sawn zâwng chuan a de sep sep reuh a, mawi ka ti lutuk chu chu clutch lak aţang chuan ka mit pawh ka la sawn hlei thei lo a ni, mit pawh ka khap phal mang lo.

"A va mawi tak!! A to ngawt ang! Min lei tùr i va'n hre êm êm!! A to dâwn tih ka hre reng mai, a tâwk reuh sia, a mâwi ka ti êm mai," ka ti mawlh mawlh a, ka han lek kual vêl a, ka lung hi a va han awi hliah hliah tak êm!!

"A làwmawm a nih chu," a lo ti sup a, lungawi zet hian seat chu ka nghèng ar ar a, clutch chu ka âwmah ka pawm vawng vawng a, ka mumang mai mai a ni ang tih ka hlau. Ka mumang a ni ang a, ka țhangharh rualin a bo daih ang tih ka hlau a ni.

Min hruainaah chuan lungawi takin ka zui zêl a, kan tlàn thui lo, kawng sîra restaurant lian vak loah chuan min luhpui a, ka ril a țâm tih pawh ka lo theihnghilh dêr tawh! A thil min pêk a mawiin ka duh lutuk a, min ti puar ni maiin ka hria, ka hlimin ka lãwm bawk a, thil ka ei thei pawhin ka ring lo.

A ni tak tak a! Kan thil ei chu a tui nge tui lo pawh ka hre lo, ka kaah ka barh lût mawlh mawlh a, ka țhial a, ka lem a ni mai. Eng emaw vànga hlim leh rilru helhhawlh hian thil tui leh tui lo pawh hi a lo hriat hran loh theih a nih dâwn hi, damdawi tui lo leh kha zet pawh ei ni ila tunah tak hi chuan ka hre tui lo chuang pawhin ka ring lo.

"Eng nge leisak che i duh?" tia ka zawh chuan" Kei pawhin ka zawh loh che kha," ti ringawtin min lo chhâng a, dik tak chuan han leisak ve mai tùr ka vàn a ni. Hmeichhia hi chuan duh hi kan ngah a, kan duh zâwng han lei mai tùr pawh a tam; mahse, ani chu mipa a ni a, Lalrina ka leisak țhin ang mai mai kha chu leisak ka duh bîk si lo. Kei aiin sum a thawk chhuak tam a, leina tùr pawh a ngah daih zâwk tih pawh ka hria; mahse, ka leisak ve ngei a ngai si a.

*******

Kristie'n min rawn bia a," En teh, nimin khân Hriatpuii'n pic thar a rawn up a, Mâma nèna an lâk dunna ngei. An inhmeh dunzia mai chuh!! Ngawi lawk, link ka rawn thawn ang che," a rawn ti sauh sauh a, a hnu deuhah," Comment kha va drop ve nghe nghe teh," a rawn ti leh a," Aw le," tiin ka chhâng ve mai bawk a.

Stalker ka ni chu ka ti chiah lo nain Jason-a thlalâk up erawh ka check dâwk dâwk zauh zauh a, mi dang erawh ka en ngai hran lo. IG lamah hi chuan ka active lêm lo, whatsApp hi ka duh tâwk viau, Fb pawh a rualpâwl tâwk chauhin.

Thlalak chu ka en ta ngei a, Hriatpuii hi chu a chhe lo ve êm a ni. Tu mipa mai pawhin an kawp châk vekin ka ring hial, a âwm bâwr leh a mawng bâwr lah hi a tâwk reuh si a. Comments ka chhiar thla dan dan a, Jason-a pawhin a lo comment ngei alawm, meng love pawp pawp emoji ngeiin, hei chuan awmzia a nei ngei mai, a rûkin an lo inkawp nghet viau tawh a nih chiah hi, a rûk pawh a ni tawh lo, hei mi hmuh theihin an târ lang reng alawm. Rilrua vei nei deuh rùn chuan a comment-na chu ka en reng a, *Hei hi em ni in nu chu?*  tia comment han drop pawh chu ka duh viau nain ka ti ta êm lo, Hriatpuii'n a tag ve miau a, comment pawh hi a àwm ve tho alawm le ka ti ta mai; mahse, rilru erawh a thawven phah chuang lo.

A tûk tlaia dàwr ațanga ka chhuah chuan pâwnah, kawng zau deuh laiah min lo nghâk leh reng niin, min lo ko leh a, ka en phei chuan T-shirt dum ka leisak ngei mai kha a lo ha a, man to tak ni lo mah se a inhmeh kher asin. Ani'n a'n hâk meuh chuan a man a to lo tih pawh a hriat miah loh, a inhmeh tak zet.

"Khawiah emaw min kalpui lawk la ka tia," a tih chuan," Khawiah maw? Kan rei ang em?" ka lo ti vat a, ani chuan," Rei lo ang, kan kal hmain ei tùr tui deuh kan ei phawt dâwn nia," a lo ti zat a, ka ril a țâm tih a lo hre leh tawh a ni maw? Ka hmêlah hian a chhiar theih em maw ni le?

Ei tùr eiin dàwrah kan chàwl phawt a, Zàrkawt lamah tlãnin high field bul lawkah min dinpui a, eng mah ka zâwt lo, min hruainaah ka zui tawp a, ka puar peng pawng ta bawk nèn, ka mood a fuh viau a, helai vêla ka kal khàtzia sawi chuan ka phûl hlut nghe nghe a.

Kan luhna ina tlangvâl ni àwm tak wheelchair-a lo țhu ka hmuh erawh mak ti takin ka en reng ringawt a, sawi mai tùr pawh ka hre lo. Jason-a chuan," Vawiin lam chu hei kan rawn tlawh ta nge nge che aw, eng nge i lo an? Khawnge Zopâri hi? A lènsan leh tawh che a ni maw?" tiin chu pa chu nêl tih hriat tak hian nui chungin a be nghâl bawrh bawrh a, chutih lai chuan room ațangin nula pakhat hi a rawn chhuak ve chiah a, min rawn enin," Jason-ate chu, in rawn kal tak tak maw?! Lo țhu r'u, kan lo beisei reng tak na che uin in hman kan ring chiah lo leh deuh a," nui sâng hian a rawn ti ve nghâl a.

Kan țhut hma chuan Jason-a chuan chu mite pahnih chu min chibaitîr ve ve a, nula tlangvâl ni lovin nupa an lo ni a, a mipa zâwk chu Samson-a niin a nupui chu Zovi a lo ni a. Kan țhut hnu chuan Zovi chuan," Tluangpuii pawh a tak ngeiah kan hmu thei ta a, a làwmawm khawp mai. Lêng reng ang che u," a ti sauh sauh a, chutah," In rawn lêng vang vang sia, thingpui tui lutuk tak maiin ka lumsak ang che u," a ti leh a," A ngai lo, puar sain kan rawn kal a," Jason-a'n a tih pawh chuan," A, in in ve hrim hrim tùr a ni, in pui sâng kai manah," Samson-a chuan a lo ti ve tlat a, an pa țhut dàn a siam remsak hnuah Zovi chu a tho ta nghâl a.

An nupa nun hrehawm dàn tùrzia chu ka ngaihtuah a, an la țhalaiin an hmêl lah a chhe lo dùn bawk si a, mipa pahnih titi lai pawh chuan chutiang daih chu ka lo ngaihtuah a, Jason-a'n ka beng bula," Mak vung vung ve! Mi â i ang dâwn dâwn a nia!" a rawn tih sup tâkah chuan ka harh chhuak thut a, a lam hawiin hnai zetah chuan kan inmelh dùn ta ràn a. Chutih lai tak chuan," Induhin inthlahlel viau mah ula, thingpui hi in phawt teh u, a tui dâwn teh a nia, khatiang kha chu nakin deuhah in chhunzawm mai dâwn nia," tia Zovi a rawn țawng chhuah chuan Jason-a lak ațang chuan hawi sawnin ka biang sa deuh hat hat chu ka dawm zui nghâl a, Samson-a a lo nui hawk hawk a.

"Kan nu hi a duh hunah chuan a kâwlhrâwng thei teh mai a nia, a hmël en ang hi a ni lo, Tluangpuii pawhin i hriat thiam a ngai ang," a tih chuan Zovi chuan," A, Jason-a chêt ngeiawm theihzia kha han ngaihtuah lêt la, khatiang mai mai kha chu eng mah a nih loh kha," a lo ti ve thung a, Jason-a ka en chuan ani pawh chu a lo nui ve tho. Hêngho hi țhian inkàwm ngeih tak an ni ngei mai, an han inchhàn kual vêl dàn ațang pawh hian hriat pawh an inhre chiang viau tih lah a hriat reng. 

Thingpui in lai chuan Zovi chuan nêl taka min biain a țawng bawrh bawrh reng a, an titi dàn ațang chuan Jason-a nèn inkawp nghet tak kan nih an ring tih a hriat mai, Jason-a'n eng mah a sawi fiah loh avàng chuan kei pawhin ka sawi fiah chuang lo, a duh dàn a nih ka'n ring deuh teh ngawt a. Min en hran loh êm avàng leh min fiam bawrh bawrh reng avàng chuan kei pawh, mahni tâwka harh leh țawng duh ta na nâ nâ chu, ka țawng ve ta bawrh bawrh a, ka fiam lêt a, kan nui a, kan boruak chu a hlimawm tak zet a ni. Ka rin ang ni hauh lova an nupa inkâr boruak zãngkhaizia, an induh tawnzia leh an inhmangaihzia ka hmuh chuan mak ka ti a, duhawm dùn ka tiin an ngaihsànawm ka ti ta tlat pek a nih chu.

"In inhmangaih tawn tih a hriat reng mai sia, in duhawm dùn ka ti, chuan, ka ngaisâng viau bawk che u a ni," ka han ti hluai mai pek a, Zovi chuan nui chung hian," Kan fan no. 1 i ni maw?" a han ti fiamthu a, Samson-a chuan," A va làwmawm tak êm! Keimahni ang thoa hlimin țhianpa Jae-a nèn hian in awm dun zêl ka beiseiin ka duhsak tak zet che u a ni, mihring lamah kei chu hei in hmuh ang hian heti mai hi ka ni a; mahse, nupui țha lutuk, vàn angel tluka thianghlim ka nei a, ka tân chuan engkima engkim a ni. Ka chakna niin ka nunna pawh hi a kutah hian ka nghat hial tawh a ni,"a lo ti a, hmangaihnaa khat mitmeng hian Zovi chu a melh a, ani chuan nui sânga en lêt pah hian," Hmangaihna chuan engkim a tuar chhuak țhìn, Pathianin a zawm tawh chu mihringin țhen suh se," a lo ti sap a, an kut chu an invawnsak a, an va han hmuhnawm dùn tak!

A hnu deuhah chuan," I lâm thiam viau tih ka lo hria a," Samson-a chuan nui hmêl pu deuh lek lek hian a rawn ti chhuak a, Zovi chuan phûr zet hian," Ni dâwn tak! Lâm ila?" a rawn ti zat a, thoin phone chu a la a, a kheuh neuh neuh a, TV nèn chuan connect-in," Ka làm lohna pawh a lo rei ta, lâm ang u," tiin min rawn pawt tho a, music a play lah chu a țang țha awt awt bawk a, chhúngril lam a rawn tho țha at at khawp mai.

Kan lâm a, lâm pah chuan Samson-a kut chu kan vuan a, kan làmpui a nih deuh ber chu. Jason-a pawh kan pawt tho a, kan ri lè lú mai. Ka zak duh bîk lo, Samson-a leh Zovi chu hun hlimawm hmanpui ka duh a, an hlim dùn viau tho nain boruak chu zängkhai taka hman ka duh bawk avàngin ka lâm pawh hun dang zawng aiin ka uar. Kan lâm a, kan nui a, zai kan lo zàwm pah bawk a, naupang inkàwm khâwma lungkham nei lêk lova lâmho kan ang ka ti.

Kei ngei pawhin nuam ka ti. Kan haw tùr chu min uiin chaw ei ve nghâl tùrin min sâwm a, kan hnial avàng chuan lêng leh vat tùrin min sâwm ta zâwk a, hun remchâng hmasa bera lèn leh intiamin kan haw ve ta a. Kalkawngah chuan an chanchin chu kan sawi zui a, an bula awm nuam ka tih thu leh fel ka tih thute chu ka sawi barh barh a, ani pawh chuan a țhiante nèn an inhriat dàn leh an inkawm chhoh dàn chu min hrilh ve pah bawk a.

"I bialnuah min ngai chu a nih kha," ka tih chuan," I ni reng alawm," a lo ti mai a, ka dang titih dêr mai! Ka en hau a; mahse, a hnuah erawh chuan lu bu nghat nghat pah hian," Ni tak e, ka lo theihnghilh țêp alawm," ka ti ve leh mai a, thil dang sawiin," Kawr kha i inhmeh hlê a ni," ka han ti zui daih a, ani lah chuan," A làwmawm e, ka inhmeh tùr i thlang thiam a, thuamhnawah hi chuan a dum hi mawi ka tih ber a nia," a lo ti ve leh a.

*******

Lalrinate inah Lalrina nu damlo kanin kan țhu țhap a, Lalrina chhang chiah nulain a nu chu buhhàwp hi fiantêin tlêm tlêm a pe hlek hlek bawk a, keini pawh ngawi rengin kan țhu țhap mai. Kan inkawp lai ațang tawh khân Lalrina nu hi a lo insawisêl tawh a; mahse, doctor-te'n a taksaah cancer zungzâm an hmuh lawk loh avàngin damdawi eiin a inenkawl chho ve mai a, na reng a nih loh vàngin an ngaihthah ve pakhat bawk a, tun hnaia an hriat chhuah hnuah erawh a lo nasa hlê tawh a, a rang ber chi a lo ni bawk nèn, beidawngin phai lam ațangin an rawn haw ta ringawt a ni.

Mipa a nih avàngin Lalrina hmêlah chuan lungngaihna emaw hrehawm tihna emaw a lang lo va, chu pawh chu ni se a rilru chhûngrilah erawh chuan hrehawm a ti ve ngawt ang le, mahni hringtunu damlo chau taka mahni pawha ei in thei lo bula hun hman chu a hrehawm dâwn êm asin.

*HUN HI KAL CHAKIN A CHÂNG CHUAN THLÂWK ANGIN HRE ȚHÌN MAH LA I HUN HMAN THUNUNTU CHU NANGMAH KHA I NI A, I THUNUN DÀN AZIRIN I HUN KHA A HLÛIN A HLU LO MAI A NI*