☆SUMRISANG☆ - 13 By Dingdi Pachuau

☆SUMRISANG☆ - 13 By Dingdi Pachuau

"In ti làwmawm tak zet a ni, in rawn lèn vàng nge ni, hei vawiin phei chu Bawiha nu pawh a harh țha riauin ka hria, ni dang zawng aiin buhhàwp pawh a ei țha, rawn lêng ziah rawh u, a làwmawm êm mai," Lalrina pa chuan a ti mawlh mawlh a, Maenga chuan," E, a làwmawm hlauh a nih chu, kan hman îk îk chuan tih theih nei êm êm lo mah ila kan rawn lêng ziah ang," a lo ti ve a, a sawi ang tak hian Lalrina nu tân hian tih theih chu kan nei hauh lo va, kan țhianpa nu a ni a, kana a fapa rilru hrehawm leh ipik țûn tùr han tihrehsak țhen ve hlek hlek hi kan tih tùr dik tak a ni.

A hnu deuhah erawh chuan Lalrina'n in hnuai lama chhuk thlâk a rawt avàng chuan kan chhuk thla ta dial a, in hnung lam bathlàrah chuan țhuin zial zu mite'n an duh ber zial chu an fâwp khu hlat hlat a, Lalrina hmêl chu ka en ru hrek hrek țhìn a, a langah chuan hlim hmêl puin nui angin lang mah se a mit meng ațang chuan a hlim lo tih a chhiar theihin ka hria, ka khawngaih roh hnûp hnûp hlê a ni. Ka bialpa hlui, min țhena bialnu nei nghâl thei mai mah ni se, a hun laia ka huat nèn khân, tunah hi chuan huatna ka nei tawh lo, tunah tak phei hi chuan ka khawngaih viau tawh zâwk a ni, a nu vàng hian a rilru a hlim lo hlê si a.

Mi țha tak ni bîk lo mah ila a nu chu ka țawngțainaah ka hre ve reng a, a damna ngawr ngawr chu ka dìlsak hran lo, a dam chhuah leh pawh ka ring chuang lo, Pathian thil tih mak a lo thleng a nih ngawt loh chuan, a lo thlen pawh ka ring chuang lo va. Hetiang lamah hi chuan ka sual ve a, ka țawngțaina hi ka ring zo lo ka ti dâwn nge, doctor-te meuh pawh an beidawn tawh chuan an dam zawh ka ring ngai lo hrim hrim. Chu vàng tak chuan Lalrina nu pawh hi a taksa damna lam ai chuan amah kal thei tùra a inpeih theih nân leh a pasal fanaute tân ka dìlsak a ni mah zâwk.

A tawrh chu a lo na ngang a ni ang, kan kan ațanga chawlhkâr hnihnaah a peih lo ta nge nge a, kei phei chuan vawi hnih chauh ka kan hman a nih chu, a rûk deuh tak chuan ka inthiam lo viau a, ka kan zing thei lp chu Lalrina a zahawm ka ti. Ani pawh mipa mah ni se, a nu boral chu a tuar na tih a hriat ngawih ngawih a, a khawngaihthlâk khawp mai. A farnu leh an laina hnai hmeichhiate ang chuan a țap chhuak ve bawrh bawrh lo nain a țah a chhuak tih chu a hmêlah a lang reng mai a, mipa a nih avàngin a insûm hrâm hrâm a ni ngei ang, a mit chu a sen râm a, mut a hmu țha lo tih pawh a hmêlah a hriat ngawih ngawih.

A khawngaihthlâk ka tih tawh tehlul nèn, chumi tizual tùr chuan Vli nèn an inkâr a chhe chho ta tlat mai a, a chhan pawh Vli chuan mipa dang nèn a lo kawp ru reng niin!! Chu chu Lalrina'n a man chhuak ta si a, a nu boral vànga a rilru a nata a hrehawm sa dâwn teh rêng nèn, țhianho kan nih miau avàngin kan hre thuai lo thei bîk lo, a chhan pawh țhianho group chu Vli'n a leave ta daih si a, chuta țang chuan kan hre ta hlawm a ni. 

Țhianho chuan kan lènpuiin kan hnèm laih laih reng a, hun ãwl kan neih phawt chuan kan lêng ti ila a dik ang, a tân tih theih kan neih tâwk a ni tlat si a, mala awmtîr kan duh lo a ni ber ang chu. Vli nèn an buai chho ta bawk nèn, mipaho phei chu hmeichhe lam aiin an lo hman thei deuh zâwk bawk a, tu emaw berin a awmpui rãwt ti ila a dik ang.

Jason-a pawhin ka sàwm ngai lovin min rawn sâwm zël zâwk a, ka nute pawhin Jason-a bula ka kal dâwn chuan ka chhuah an phal zêl mai a, a tel lova ka chhuah dâwn erawh hi chuan eng nge ka tih tùr leh ka kalna chin tùr min zâwt ta ziah thung. Ka nu chìn thar a ni a, ka pa hi chuan min záwt chîk ngai lêm lo, ka nuin Jason-a a han ring leh lutuk bîk chu a châng chuan ka thîk deuh lek lek a, a fanu zâwk pawh min ring lova mi hrang zâwk lehnghâl a han ring deuh tlur mai chu a ngeiawm ve deuh tlat a ni.

Lalrina chu a nu a sûn nèn, Vli nèn an inkâr a chhe ta bawk nèn, a rilru leh taksain a tuar kawp ka ti mai, a lang pawrin a tla kuam mai a, hun rei chu a la ni miah lo, chaw a ei theih loh bâkah zàn lamah a mu țha thei lo va, chhùn lamah hna a thawk tho bawk si nèn, a taksain a tuar bîk lo thei lo.

Kan țhianho chuan chhuah harhpui kan rawt a, a hun leh a hmun tùr pawh kan sawi khâwm nak nak a, Inrinni kan hman tlàn ber nî a nih avàngin Inrinni zîng hma taka kan chhuaha kan tum ram pana kan tlàn vang vang chuan zîng dâr 9 pelhah kan thleng thei ang a, duh leh zànah pawh kan haw mai ang a tiin kan rêl a, kan kalna tùr hmun hi a hlat ve deuh avàngin tlàn ve vang vang a ngai dâwn a ni.

Kan rèl nî ber kher chu Jason-a hman loh nî a lo ni a, kan rël fel vek tawh si a, a bulah pawh ka sawi lang duh ta lo tingtang a, Ningània a zin chhuak tùr chu Inrinniah a rawn haw chauh dâwn a lo ni. Ka zawh chhan min zawh pawh chuan ka nè nè liam ta mai mai a, kan rèlho lai hian a awm ve mang si lo va, a vui palh ka hlau ru ve deuh a. Țhianho group-a ka add duh lo chu a tihzia hlauh ka ti ru khawp mai, an sawi hot nasa si a, a hmuh ve kur chuan a zia lo dáwn êm asin. Ka add ve duh loh chhan pawh ka bialpa tak tak a ni si lo va, bâkah, kan titi a ho thei bawk nèn, chu vàng chu a ni pakhat.

Dik tak chuan Lalrina tih hlim tuma a rilru lâk pèn tum mah ni ila mi dangho chuan kan châkin kan phûr hlum lo chauh ni berin ka hre zâwk, kei pawh ka phûr lutuk ringawt. A hma nîah pawimawh tùr kan la khâwm sa vek a, kei pawhin ei tùr ka lei duhãm ve khawp mai. Zîng hma ve takah scooty-in ka tlãn chhuak a, kan innghahna tùr pawh ka thleng thuai nghe nghe, Maenga leh Mamuana kan nghâk a, anni pawh nghah rei an ngai lo. Car-a leng lo Athui ka phur a, bike keng an awm bawk a, kan chuang kim vek thei ta e.

Kan kalna tùr hmun hi Jaz-ate huanah a ni a, lui bulah huan an nei a, a peih peihin chakai, kaikuang leh sangha man kan tum ang a, lui kam vêlah pawh chawhmeh kan zawng pah bawk ang. Thlâm lian ve tâwk tak an nei a, chaw chhum tùr ni se a awm sa vek bâkah bungbêl pawh a awm sa vek a, a nuam dâwn khawp mai. Hetiang lamah hian ka chhuak vâk khât a, nuam êm êm tùrah ka ngai ve tawp mai a ni.

Kawng chu a țha lutuk lo nain a tlàn theih ve viau tho, ruah sùr bur bur hun lai chu ni nâ se zawng kan tlãn lo viau ang chu! Chhuk ulh a awm lo va, tlàn pawh kan tlãn tluang viau. Dâr 9 rîk hma hretin kan thleng a, ka phûr nghâl zek zek mai. An thlâm lah chu an han sa kãng sâng mai mai khawp a, a thawveng ngawt ta ve ang, a hnuaiah thing tum lian pui pui a awm țeuh bawk.

Ei tùr leh pawimawh kan kente chu thlâmah chuan kan chhohpui a, ka rin ang ngeiin a lo thawveng nuam viau bawk a; mahse, lui lamin ka rilru a lâk zâwk miau avàngin ka indah fel sawk sawk a, ka pheikhawk bun chu tlawh phelhin slipper ka inthawlh a, ka tlãn thla zui ta nghâl vat a, mi dang pawh an che ve sung sung tho.

Tui chu ka dâi a, khaw lum hnuaiah chuan a nuam kher asin. Tui chu a lo tam vak lo va, chènna tham pawh a awm lo; mahse, chutia dài vêl pawh chu nuam ka ti êm êm tho. Eng chena rei nge luiah chuan tui dâia ka awm pawh ka hre lo, ka harh chhuah meuh chuan ka han hawi kual a, ka hmuh theih chinah chuan kan kal chhan ber Lalrina ka hmu ta miah lo va,  ka piah deuh lung chunga țhua inti zai thiam zeta zai ar ar Fiona-i chu koin," Lalrina hi a lo chhuk ve nange a?" tiin ka han zâwt ngawt a, ani lah chuan," Ka hre miah lo," ti ringawta min chhângin a zài chhunzawm leh nghâl a, a lung a àwi hmèl hliah hliah mai. A aw hi a mawi lo pawh a ni hran lo; mahse, ka ngaithla thiam lo nge ni, ka beng a fah lo ka ti zâwk dâwn ni, khuain a chhiat phah ang tih ka hlauthãwng!!

Thlâm lam pan chuan ka chho ta vat a, Lalrina chu Maenga nèn chuan an lo awm ve ngei a; mahse, Maenga chuan games a khèl a ni maithei, phone a lo kheuh neuh neuh a, Lalrina erawh chu tukverhah a lo dâk vang vang a, ka lût a ni tih pawh a hre lo a ni ang, a rawn hawi miah lo.

Kan kal chhan ber a ni tih hriain ka aw ka han thian phawt a," Lalrin, lo kal rawh, tei kual mai mai ang," tiin ka han sâwm a, min rawn en a, a thaw deuh huai a, ka rin loh deuhin a rawn ding chhuak zui ve mai a, Maenga chuan," Kal fâl lutuk lo ula aw, thil țha lo te kha in ti palh hlauh dah ang e," tiin min fiam zui a, ngei zet hian ka melh ralh a, amah lah chu a lo la nui hak hak zui, kan inngamtlâk leh lutuk țhìn hi chu a buaithlâk deuh țhìn chu a ni. 

Mi dang lahin min lo hmu lo thei bîk lo va, kan nunhlui hre vek an nih vàngin an lo 'ehem' tliar tliar a, ka ngei hlawm lutuk a, ka chhiatkhum vak vak hlawm ringawt. Fiona-i leh Lawmpuii phei chu an han over fâl leh nalh a, chimawm taka chêt leh țawng hi an pianpui ve rêng a ni ang tih tùr a ni.

"A changtupa awm loh hlànin va renew leh r'u aw," pakhatin a rawn ti a, pakhat lahin," Remchâng lutuk! Va chesual bawrh bawrh r'u," a rawn ti zui bawk a, Lalrina pawh a nui ve hawk mai. Na zeta khawn dun ka va châk tak! A hun leh hmun te hi thliar thiam ve tal se, tûn ang hunah hi chuan hetianga infiam hi chu a tih chi loh êm mai!

Zawi muangin kan kal a, țawngpui mai tùr ka hre lo va, amah zâwk chu rawn țawng chhuak hmasaah țangin," Engah mah ngai duh suh, kan zînga an fiam ngam ber i nih vàng a nih kha," a rawn ti a, ka nui ve ringawt a. Ni e, min ngam êm êm a, na tak tak huat theih si lohin min fiam a; mahse, ka chunga an rilru chhiat vàng a ni lo tih erawh ka hria, min ngaina a, min ngam ve êm êm ringawt mai a ni. 

Huana thei kung hmingte chu ka zâwt chho țan a, ani pawh chuan a hriat apiang chu min hrilh ve zêl a, kan țawng bawrh bawrh reng mai. A hnu deuhah phei chuan fel min tih thu leh amah ka ngaihtuah avànga a làwmzia chu min hrilh ta hial a, kei chuan," A, țhian kan nia, làwm thu inhrilh a ngai hleinem, i ti zahthlâk êm mai," ka ti ve thung a.

Chuta țang chuan a nu chungchângah kai chhoin Vli chungchângah kan kai chho leh a, thing buk hnuaiah țhuin an chanchin chu chiang takin min hrilh malh malh a, chutiang tehkĕlh chuan ka lo la hre hauh lo nghe nghe a, a tawrh chu a lo na êm a lo ni, a nu a chân phawt a, chutah, a bialnuin a han phatsan leh a, mite chuan 'ngaihzâwng inkâr mai mai' an lo ti pawh a ni maithei; mahse, mipa tân chuan a thil tawn hi a tlàwmthlâk ngawt ta ve ang.

"Ka thil tih rah ka seng ka ti mai, i chunga ka thil tih kha; mahse, a bul țantu niin kan inkâr ti tàwptu ni mah ila ka thil tihin min vuak lêt avànga rilru na lo thei ka ni bîk si lo. Mihring ve tho ka ni a, Vli avànga nat rei viau hi chu ka tum lêm lo; mahse, ka nu a lo heti ve leh ta bawk si a, a châng phei chuan ka nu chunga thil thleng hi duh lo teh mah ila keimah vàng ni hialin ka ngaihtuah țhìn." 

A sawi zawh veleh chuan lo inrawlh vatin," Engah ngawt nge nangmah vàng a nih ang?! Eng vàngin nge i inpuh chhiat ngawt? Thihna leh natnate hi chu mihring kan nih chhûng chuan kan tuar vek dâwn alawm, tu thiam loh mah a ni lo, chutiang zâwng chuan ngaihtuah tawh miah suh," ka ti nghâl mawlh mawlh a. Thihna hi chu a tàwp êm mai a, a nu thihnaa amah a inpuh a nih chuan rilru hrehawm tàwpin hun a hmang reng dâwn asin.

"I chunga ka thil tih vàng khân min hrem nân Pathianin a hmang a ni ang," a ti zàwi leh sap a, a lam hawia amah en reng chung chuan," A ni lo, mipa leh hmeichhia chu an induh a, an inngaizâwng a, eng emaw vàngin an ințhen ve leh a, hei hi hringnun khawvêl chu a ni alawm, a chângin kan hlim a, rei lo têah kan lungngai leh a, a hnu lawkah kan hlim leh a, kan hlim reng thei lo ang bawkin kan lungngai reng bîk lo a nia. Tunah hian rilru takin i la hlim thei rih lo a nih pawhin nakinah i hlim leh thuai mai ang. Thihna hi mihring tawn tùr a ni a, chutiangin ngaihzâwng ințhen pawh, chu vàng chuan, nang pawh inthiam lohna tùr i nei lo va, khawvêl hun inher dàn leh hringnun kal dàn a ni tih pawmin hre thiam la, inmawhpuh tawh miah suh ang che," ka ti leh malh malh a, hetiang hi a bula ka sawi ka la ring chhin ngai lo, ka inrin loh chu thuhran, țawngkam phuh chhuah tùr  ka hre ta lutuk leh ka inla puitling ta vêl lutuk chu keimah tak pawh chu mak ka inti hial zâwk nghe nghe!

"Rilru naupangchhe ve deuh kha i niin ka hre sia!! I lo puitling ta hle mai, ka tluk lo hlê mai che," a rawn tih chuan ka hawi sawn a, ka hmui chu ka pet fan fan a, a zahthlâk ka ti rilru leh hnuhnawh!! Puitling min han ti a nia, ka puitling tak tak hauh si lo, amah ka hnemna chauh a ni si a.

"Ka puitling teuh lo!" ka han ti leh rih a, a lo nui hak a, kei pawh ka nui ve tho. Chuta țang chuan kan titi kan thlâk leh a, thil ho mai mai kan sawi a, chutia kan titi tâk mai mai lai tak chuan," Hei, lo hawi r'u," hmeichhe aw hian a rawn ti a, kan hawi rual dùn chiah nghe nghe. 

"Hmmm... in va chhe lo dùn tak! Group-ah ka'n post nghâl teh ang," Lawmpuii chuan phone khawih mawlh mawlh pah chuan a rawn ti vau vau a, Lalrina chuan," In va ho tak e aw!" a lo ti sap a, kei erawh chuan," Pathian thil siam harh ber pahnih zînga pakhat zâwk!" ring lèng làwng hian ka ti a, Lawmpuii lah chuan huat ahnêkin a làwm zâwk emaw tih tùr hian a nui khêk uar uar a.

A hnu deuhah chuan," Lo kal tawh r'u, sangha kan man tawh dâwn a," thu tak deuh zâwk hian a rawn ti a, keini pahnih pawh chu thovin kan zui ta nghâl a, sangha man te chu a nuam dâwn êm asin, ka phûr lutuk.

Nilêng chuan nuam ti takin kan hmang chho a, Lalrina pawh kan bulah zël a awm ve a, a rilru pawh a zäng ve deuh huaiin ka ring. Thil ngaihtuah ngut ngutna hun kan siamsak lo tlat a, kan hlim mood-ah chuan a rilru zawng zawng pe ve vek kher lo pawh ni se vawiin na nâ nâ chu a chanve vêlin a hlim ve tho ang, kan hlawhtling ka ti tho tho.

A tûkah Jason-a nèn inkhâwmnaah kan inhmu ta chauh a, nimin lamah ka hlim deuh hlek a, nizànte khân text àwm tak ka nih vei nèn, group lamah kan titi nasa hlawm lutuk a, a zin a rawn haw a ni tih pawh ka hre chhuak ve leh chiah. 

"Eng nge min lo hawn?" ka'n ti ve leh thâwr a, ani chuan," Ka zin a ni tih i hre chhuak leh chiah a ni maw?" a rawn ti ve thung a, lu thing pahin," A teuh lo e! Ka hre ve reng alawm," ka ti ve leh a, dâwt ka hrilh tih chu hriattîr ka duh bîk țhak nâng. Ani chuan," Nizànah pawh min rawn zawh duh miah loh kha," a rawn ti leh a," A...kha kha chu i chau ang tih ka hlauh vàng a nia, ka be buai duh lo che a nih kha. Eng thil maw min rawn hawn?" ka ti ve leh nghâl zaih a.

"Lo lêng la, i hre mai dâwn alawm," a tih tâkah chuan," Yessss... nuam dâwn lutuk! Ka lo lêng dâwn chiang," ka ti nghâl zung zung a, nula ni mah ila thil thar hi chu ka làwm ve tho, tlâwm tè pawh ni se mi min leisak leh hawnsak a nih phawt chuan ka hlim loh phah ngai chuang lo.

Inkháwm bàn veleh ka haw a, ka inthlâk fel hnuah Jason-a thil min lo hawnsak lam tùr chuan ka chhuak leh ta nghâl a, ka rilru a hlim veng veng mai. Ka phone tawh lêm lo nain nichîna kan inbiak khân ka kal hun tùr ka hrilh tho kha a nia, a lo awm tùrah ngai ang.

Amahin a lo awm a, a nute an la haw ve chiah lo a ni ang. Chhùn ei tùr a lo siam mêk a, ka va thleng fuh tak! A siam tui leh dâwn sia, min sâwm lo pawh ni se ka ei ve nghâl daih tho ang; mahse, ei lovin min hawtîr dâwn lo tih ka beng hi ka mit a ni lo tih ka hriat chian tlukin ka chiang.

Cotton kawrfual nalh zet mai hi a lo ni a, a âwm vêl chu a inchei nalhin a changkâng hlê a. Hetiang êm êm min hawnsak hi chu ka ring pha lo asin le! A to ngawt ang, a mawi bawk si. 

"A mawi lutuk ringawt! Mahse, a to àwm sia, a inthlahrunawm e," ka ti ve ngial a, mawi ka tih êm avàng chuan ka en reng a, ka bialpa lem a chan tâk ațang leh ka inchei dàn min fak ațang khân nù deuh hleka inchei ka duh ve tain makeup pawh ka hmang ve ta zeuh zeuh rêng a ni.

"I inhmeh dâwn tih ka hre sa a."

"Nia..." nui sâwng chung chuan ka ti ve a," A mawi êm mai a, a inhmeh loh theih loh ang. Ka inhmeh loh hlauh chuan min hawnsaktupa a zahawm viau dâwn si a, inhmeh viau ka tum ang," ka ti leh a, ka nui hak hak a.

Ei tùr a siam zo țêp tihah chuan," Ka lãwm lutuk aw, ka haw nghâl mai dâwn em maw ni le," ka han ti fiam a, ka ti tak tak teuh lo, a ei siam eipui ve ka tum tho tho; mahse, ka fiamthu a ni tih a hre lo nge ni," Haw nghâl lo ve, hei ka siam zo alawm, lo țhu rawh," a ti a, ka țhutna tùr stool sâng er awr chu a kein a pawt chhuak zui nghâl a. Ka nui sak a, ka țhu zui nghâl chat bawk.

Kitchen island-ah chuan ei tùr plate hnih rawn chhawpin in tùr a rawn chhawp tel leh a, noodles kan ei tùr chu ka han en a, a tui hmèl tak zet, a nih dàn tùr ang tak khân min han chawhpawlhsak leh se chuan... a va tui zual dâwn tak! Ani lah chuan ka rilru hria ni àwm tak chuan ka plate chu lain a han chawk kual vël phawt a, nui sângin ka lo en a," A tui dâwn lutuk!" ka lo ti hap a. Kan têt lai khân hetiang hian Kristie nèna kan ei tùr kha min chawhpawlhsak ziah țhìn a nih kha.

"A ei theih e."

*MI, A DINHMUN LEH A THIL PAL TLANGTE HRE LO LÊK LEH NGAIHTUAH MIAH LOVA LO SAWISÈL CHIAM CHIAM HI A FUH BER LO FO*