☆SUMRISANG☆ - 14 By Dingdi Pachuau

☆SUMRISANG☆ - 14 By Dingdi Pachuau

Ka ril a ţâm ve tho bawk nen, ka ei nghâl mawlh mawlh a, ka rin ang chiahin a tui êm êm bawk. Mizoah hi chuan hmeichhiate hi chuan ei hi kan siam thiam deuh vek tùrah ngai ta ila, mipa ei siam thiam hi chu an la tam viau lo maithei, Mizo mipaah chuan ani hi ka ngaihsàn ber pâwl a ni ngei ang, hmêl ţha leh fel, ei siam thiam ni bawk.

"A tui tak zet a ni," ka tih chuan a lo nui sak a," Ei țeuh rawh," a lo ti sup bawk a. Chutah, thil ka ngaihtuah chhuak thut a, ka phone chu phawrhin thlalâk ka han hmet chhuak a, ka thai sawn zung zung a, thlalâk ka screenshot zînga a kawr min leisak ang deuh chu ka hmuh ta a, kawr pianhmang leh țhui dàn chu inang deuhin a rawng erawh a inang lo thung a.

"Mawi ka tih zâwng tak a nia, i lo hre ru khiau ni awm tak zâwk a ni," tiin ka han nui leh hak a, ka plate-a mi chu ka ei chhunzawm leh mawlh mawlh a, thlalãk chu rei mawi tâwk tak a thlêk hnu chuan phone chu min rawn pe a, ei tùr chu a ei ve leh a.

"Nimin khân eng nge i tih?" 

Ka en vat a, ani erawh chuan min rawn en ve lo, inngaihtuah nân hun ka hmang hlek a, dâwt ka hrilh mai dâwn em ni? A awm loh hlàna picnic kan neih thu han hrilh chu ka hreh ru viau, chutah, kan picnic tùr thu kha ka hrilh hre ve hauh lo bawk si.

"Lalrina 'kan chhuah harhpui e' kan tia..." ka ti ta ringawt a," Kan picnic a," tih ai chuan a tân hriat a nuam deuh zâwk ang ka tih vàng a ni. A rawn țawng loh avàng chuan țawng chhunzawm lehin," Chhuahpui e ti lo chuan keimah ber khân nuam ka ti ber zâwk, huanah kalin tui kan dai a, sangha kan man bawk a," tiin ka nui a, nimin lama ka hun hman dàn nuam ka tihzia kha ka ngaihtuah lêt leh a, ka nui lo thei lo, a nuam ka ti ve êm asin.

"Nuam i tih chuan a țha a nih chu," tiin a bu nghat a, a ding zui nghâl a. Chutih lai tak chuan ka phone chu a rawn nghawr dar dar a, la kãngin ka en vat a, Lalrina a lo ni a, an ina lêng tùrin min rawn sâwm dâwn a nih ka ring. Ka han chhàn chuan a lo dik chiah bawk a, mi dang pawh a biak kual tùr thu sawiin lêng ngèi ngéi tùr chuan min rawn sâwm tak lawm lawm a, chuti na nâ nâ chu tiin 'aw' ka pawh zui ve ta nghâl a. 

Kan inbe zo deuh chiah tihah a phone a rawn ri ve zat a, a chhàn dàn ațang chuan rawn betu chu Hriatpuii a ni tih ka hre nghâl, thîkna thlarau a rawn inlâr vat lo thei lo va, ngaihthlâk rûk duh lo viau mah ila ka bengkhawn lo thei chuang lo, a hminga a koh dànte chuan ka thinlung a dêng sawk sawk ni maiin ka hria a, rilru a nuam viau miah lo. Ani pawh lêngah a rawn sâwm ve a nih ka ring, an inbiak dàn ațang chuan. Lalrinate ina lènpuia sàwm ka tumna pawh chu ka țhulh ru zui ta nghâl a, an inbiak zawh pawh chuan sawi pawh ka sawi ri duh ta lo rêng a ni.

Kan ei leh inna no leh thlèng chu a rem ti lo chungin ka sil lui a, ka sil ve tal loh chuan, ka ei hnem si a, a ei siam lai ka pui hauh bawk si lo, chu achhapah kawr min la rawn hawnsak zui a nia, làwm thu hrilh nawn awn awn ka bat bâkah kan ei inna tih fai hi chu ka tih ve ngèi ngêi tùr a ni.

Lalrinate inah chuan kan țhianho chu kan kim leh țhap a, a pa pawhin min lo làwm der leh viau mai a, a nuam duh angreng. Mi dang lêng pawh an lo la awm ve nual a, kan țhianho kal khâwm chu țhalai țhè țhàw kan ni bawk a, țhalai dang awm vak chuang hek lo le, thingpui kan lumin kan sem zak zak mai. Jason-a a tel ve lehpek lo bawk a, Fiona-i leh Lawmpuii'n min fiam leh zuk zuk țhìn a," Nang chu lo awm mai mai rawh, kan àwl thei che, nakinah i la che nasa dâwn si a, lo inkhêkkhal rih rawh," Lalrina awm lai lai te chuan an ti a, kan ințhen tawhin mi dang kan kawp ve ve tawh tih pawh an hre ve kur si a, an chimawm tak tak a ni. Lalrina za lo zeta a nuih suk suk pawh chuan engah vak an ngai lêm lo a ni ang chu, min fiam an tàwp phah lo va, kei phei chuan melh rum pawh ka peih tawh lo zâwk, ka melh rum poh leh an chimawm zual sauh ziah si a.

Khua a la lum ve tho rih avàngin Jason-a kawr min hawnsak pawh chu ka ha chhuak ve zawr zawr a, inhmeh ka inti ve lutuk. Ka inchei nù deuh hnâp hian nu vak lova ka inchei ai khân nalh ve ta riau leh nù ve ta hnâpin ka inhre deuh tlat a, ka inhriat dàn mai chu a ni a; mahse; mipa mit pawh hi ka la deuh chuan ka hria! Nù tehchiam lo thuam ka inbel erawh hi chuan chêtpui nuam ka tih bâkah mahni pawh ka inring tâwk deuh, nù deuha inthuam hi ka chîng chho zêl ang a, nakin deuhah chuan ka inring tâwk ve thei thuaiin ka ring.

Ka nu pawhin inhmeh min ti ve ngang a ni ang," I kawr hâk chu, i va inhmeh tehlul êm! Hmuh i nuam ser sawr lutuk! I lang thianghlim sar mai a," min ti nghe nghe a, ka pain nui chunga," Vàn angel emaw ka ti dâwn che alawm," a tih phei chuan ka inhmeh tak tak a nih ka ring lehzual a, ka confi sawt bawk.

Hun pawh a liam ve zêl a, Fùr hunpui a rawn inher chhuak a, ruah sûr hnuaia dàwr nghâk tùra chhuah ka ngai ve ta. A phùrawm sârh lo nain ka tih ve țàng țáng a ngai tih hriain nihliap nèn ka chhuak ve ni tin  ta a, dàwr hi kan in ațangin a hla viau lo zâwk a, ka vànnei viau zâwk.

Zàn khat chu birthday lawmnaah kan kal a, Jason-a nèn kan kal nghe nghe. Ruah a sûr hran lo nain chhûm a zîng deuh hlek a, eng ka hria chu ni maw, pawnfèn ka fêng châk tlat pek a, ka fêng ta nghe nghe a. Hetia fèn ve zeuh zeuh hi a țha, birthday lawmnaah phei chuan kekawr hâk aiin kawr fual hâk emaw pawnfèn chhîng deuh fèn emaw an uar daih zâwk bawk si a.

Ka rin aiin mi an lo tam daih mai! Birthday neitupa hi kan țhianho zînga mi a ni ve hauh lo nain kan țhianho min ngaina der êm êm a ni a, amah hi tuai ni chiah lo mah se țawng nêm ve lam niin cosmetics dàwr changtlung ve tâwk tak a nei a, hmeichheho hian kan dàwr nasa ve țhìn a, chu vàng tak chuan min hre ve hlawmin min sâwm vek ta rêng a, mipa chenin kan kal vek a ni. Birthday thilpêk pawh kan keng far hlawm a, a dawng tam ve khawp ang chu.

Hun țan chhoh a ni a, țhianho birthday party ang kha a ni ve thei lo tih chu ka hre tho nain hmêl hriat loh an tam mah mah ka ti a, an inlâk eng emaw hmèl hlawm si, an mit lah chu a nghal hlawm hrep lehnghâl a, kal kan lo ti tlu ta kha pawi ka ti lek lek ta hial mai. Mipa tân hetiang hunah hi chuan han lem deuh sak chu tih dàn pângngai a ni ngei mai, ka dem hran lo, ka dem phâk pawh va ni suh; mahse, mipa an tam mah mah ka ti a, buaina a chhuak mai ang tih ka hlau a ni, a hmingchhiatthlâk dâwn êm asin.

Kan hlim dar dar viau, mipaho pawh ka rin aiin an țawngkam chu a polite daih mai, an hmêl leh pâwn lam lan dàn leh an mit meng ațangin ka lo judge fuh chiah hlawm lo a ni maithei, ngeiawma chê an awm lo. Kan mipateho zîngah lem sek an awm vein ka hre lo va, chu chuan ka awm a ti nuam deuh hlek. Piancham neitupa U Chda pawhin thilpêk a dawng nasa hlê a, làwm thu a sawi mawlh mawlh a, cake lah chu a tui viau bawk a, ei in lam pawh kan hnianghnàr viau bawk.

Music remin kan su dal dal a, music rîk hleka làm inpeih at reng ka ni bawk a, nuam ka ti leh ta viau mai. Hmeichheho chu kan lâm deuh vek a, mipa zîngah Jason-a leh Lalrina erawh an lâm ve pawhin ka hre lo, a mood-ah an chêng ve lo a ni ang.

Ka kerêk ațanga ka chàwn chhoa kut lum thur thurin a rawn chùl tâkah chuan ka țê țhat a, ka lâm tàwp zui nghâl bawk. Thinrim zeta inherin min rawn chûltu kut chu ka nam sawn sawk a, a nui sûng hmêl ka hmuh phei chuan ka thin a rim zual a, insehruh țeuhin ka ben hma chuan ka kal sawn zui ta daih a, ka thin rim lutuk chuan ka kut ka hûm ruh ngat ngat a, chutih lai chuan ka dàrah min rawn kuai leh a, inherin," Min khawih hauh suh, Tenawmpa!" ka ti vak a, music ri bengchheng deuh kárah pawh chuan ka aw chu a ring ve viauin ka hria. Chumi rual chiah chuan ka kut ka vai chho nghâl pawp bawk a, a ri nghâl chawrh mai, ka vai chho na ve deuh bawk a, ka kut pawh a na cham cham thei hial a ni.

A biangah ka vai fuh niin, a rawn hawi mit meng sen rûm ațang chuan a thin a rim hlê a ni tih ka hre nghâl a, kei pawh ka thin a rim ve tho. Thinrim leh thinrim chu kan inmelh kal mai.

"Min bêng ngam a maw?!!" tih leh a kut rawn phar chhuah a rual nghâl a,  lo indanna hman a awm loh avàngin ka lo dawh tawp a, ka maimichhîng thung; mahse, min rawn bêng miah lo! Mahse, ka kat deuh nawk thung.

"I zak chai nange?!! Tu mipain nge hmeichhia kutthlâk ngai!!" tia Jason-a thinrim awka leh tisa hnek no chawk rî ka hriat tâkah chuan ka meng vat a, chu pa chu chhuatah a lo thal hual a, Jason-a chu min hnungchhawn zâwnga kâk deuh haha dingin a kut chu a lo hûm ruh tlat a.

Tunah khân Jason-a'n a hnek tihna a nia! Engtik lai khân nge kan bul a lo thlen hman?!! Ka rilru a nawm hleih theih loh chhan kha he thil lo thlen dâwn vàng hi a ni mai lo'ng maw, ka lo hre lâwk deuh reuh a ni ngei mai.

"I țha em?" tia Jason-a'n duat taka min rawn kuah tâkah chuan nghet zet hian ka lo kuah lêt ve a, a âwmah ka hmai ka phûm a, ka lung a rawn chhe zui bawk. "Haw ka duh,  Jason, min hruai haw rawh," ka ti țiau a, engtik laiin nge hlauhna ka neih pawh ka hre thiam lo, nichin lawk kha chuan thinrimna avàngin hlauh ka nei hauh lo kha a nia, tunah chuan ka taksa chu hlauhna avàngin a rawn khùr dar dar tawh a, Jason-a pawhin a hre chiang ngawt ang.

Thil dang eng mah ka ngaihtuah lo a, ka țhiante leh mi dang rêng rêng pawh ka hmu lo mai ni lovin ka ngaihtuah lo bawk. Jason-a'n a car-a min kuah luh chu ka hria a, ka maimichhîng tlat a, ka kut ka hûm ruh a, thinrimna, zahna, hrehawm tihna leh lungchhiatna chuan min bàwm khat ni berin ka hria.

Car-a hniam deuh sawtah chuan a rawn țhu lût a ni tih ka hria a, a tlãn chhuak mai dâwn emaw ka tih lai chuan ka kut chu rawn chelhin a lamah min pawt hnaiin min kuah leh a, ka sam chu duat takin min chùlsak bawk a.

"Shhh... Eng mah hlauhawm a awm tawh lo, a tàwp tawh e, a tàwp vek tawh e," a ti sup sup a, min hnemna țawngkam chu thuhran, Jason-a ângchhûnga awm nawmzia chu, ka him ngawih ngawihin ka inhria. Heti hian awm reng thei ila ka va ti tak!

Ka phone ri chhên chu a chhâng zawk a, a hnuah erawh a hmet hlum ta daih a. Kan tlàn chhuak a, kan in lam kan pan mai dâwn emaw ka tih lai chuan chu lam kawngah chuan a tlãn miah lo; mahse, eng mah ka sawi chhuak chuang lo, ka tûn dinhmunah hi chuan ina haw pawh ka chãk chuang lo.

Kawng zau deuh leh reh deuh lai bawk si-ah chuan min dinpui a, ka kut chu a la vuan reng a, kan ngawih deuh rèn ráwn hnuah," Tissue paper emaw wipes emaw rawmawl emaw pawh, i kawl em?" a rawn ti chhuak ta a, ka lu ka thing ringawt a, rawmawl hi ka pai ve reng reng țhìn nain zanin chu ka pai lo tlat.

A rawmawl min rawn pe a, ka mit hnawih ve kha a pherh a ni ngei ang chu, mascara ka lo inhnawih ve hlek kher kher chu aw... waterproof a ni bawk si lo.

"Ka mit chu a pherh nuai a ni maw?" ka tih chuan," Tlêm tein," a lo ti mai a, ka mit chu ka han hru a," Ka ti bàl vek dâwn a nih hi," ka ti zui sap a, ka hru leh mawlh mawlh a.

Ka pângngai deuh hnu chuan thil thleng chu chiang deuh zâwkin min zâwt a, a hriat chin leh hmuh chin chu a sawi leh phawt a. Kei pawh chuan thil thlen dàn chu zêp awm hauh lovin ka hrilh ta vek a, a tàwp khàr nân," Pawnfèn ka lo fêng ta kher kher hi buaina bul țanna ber a lo ni, a dik tiraw? Kekawr chu ha ila chuan khatiang kha a thleng tawp lo ang," ka ti zui nghâl bawk a.

Min chhàn hma chuan thâwk a la hawk phawt a," Ni lo ve, i pawnfèn vàng kha chu a ni lo," a ti a, a tàwp leh chat a, chutah," Ka hnek na lo mah mah a ni, thil thleng hriat reng nân a ha pakhat tal kha lo hnek thlawnsak zâwk ila țha tùr!" a ti ta daih a. Mak ti tak hian a hmêl chu ka en a, a thil sawi chu a ka ațanga chhuak a nih duh loh hmèl êm atin a ni.

"Keimah vànga buainaa i tel ngai ta kha pawi ka ti tak zet!" ka ti ta vat a, ani lah chuan," Ka ngaihtuah lêt hian ka thin a ti rim thar leh tlat, mipa zahpuiawm lutuk!" a lo ti leh a, a thin a rim tak zet a ni ngei ang, mi a hnek tlu tawp thei a nia.

"I hnek kha a na àwm ngawt mai, a tlu tual mai a nia," ka tih chuan min rawn en a, za lo zet hian hian ka lo nuih lui sak a, ani pawh chu a țhen ve ta sak a. Ka kut a hmer leh vang vang hnu chuan kan pângngai dùn ta viau bawk nèn, car chu ti nungin kan in lam pan chuan min tlànpui zui ta nghâl a.

*MI CHANCHIN CHHE LAI SAWI SAWI HIAN HLÂWKNA A NEI NGAI LO,  AN LO HRIATIN CHU CHUAN A TI NÂ A, A SAWITU NGEI PAWHIN A TAWRH PHAHIN A HMINGCHHIAT PHAH THEI ȚHÌN*