☆SUMRISANG☆ - 15 By Dingdi Pachuau

☆SUMRISANG☆ - 15 By Dingdi Pachuau

Mahse, min rawn hmu lo nasa, min hrechang ve lo hrim hrim a ni ngei mai. Ka va melh leh chhin zauh lai pawh chuan hlim hmël taka nui hmël pu dùnin an inen a, an induh hmèl tak zet a ni. Inhmeh viau mah se ka va thïk sî tak!! Ka thîk tih ka zëp lo ang, ka thîk miau alawm. Hriatpuii hi chu a chhe lo êm mai a, Jason-a pawh hi ka dem teuh lo, tu mipain nge Hriatpuiite ang hmeichhe chhe lo lutuk tak mai hi nêp phal tehlul ang? An kawp châk êm êm vek zâwk ang chu.

"Saw saw Jason-a, i țhianpa kha a ni lo'm ni? Engati nge..." tiin a ding deuh dat a, ka kut rawn vuana," I be dâwn lo em ni? Hei, in inkârah eng emaw buaina deuh a awm em tihna maw?!!"mak ti awka tih hriat taka a rawn tih chuan ka en zawk a, a lo hmu ve chu a va tihchi lo tak!! Engtin nge ka tih tâk ang? Ka bialpa ngei niin anni hi chuan an hre bawk si a, dâwt ka hrilh mai a ngai dâwn a ni. Ka awm dàn leh mitmei chhui rùin anni pahnih chu a lo hmu ve a ni chiang, engah nge kei pawhin ka va melh leh dâwk dâwk ni...

Za lo deuh hian ka nui deuh hak a, muangchânga kal pah hian," Chutiang a awm lo, a thawhpuinu  a nih kha," ka ti a, ani chuan," Min hrilh hreh duh miah suh," a lo ti leh a, ka thil sawi chu a a âwih chiah lo tih ka hriat chuan hrehawm ka ti ru angreng viau mai. Thil awm dàn en hian dâwtin dâwt dang a hring leh ngèi dâwnin a lang tlat si a. 

"A awm chuan ka hrilh hreh teuh lo mai che, buaina a awm lo, kei pawhin hei tlangvâl ka kalpui ve tho che a, ani pawhin nula a kalpui ve a ni mai a, buaina a awm hleinem," ka ti a, ka nui hak bawk a. Ani pawh chuan min zâwt zui tawh lêm lo chuan thil dang a sawi ta daih a.

Jason-a hi ka ţhian a ni a, dâwt sawia ka ruahmannaa tàntîr reng hi ka tih tùr a ni lo, min duatin min ngaihsak vàng leh ka țhian tak tak ang maia inngaia min țanpui nân ka ruahmanna pawh min rem tihsak mai kha a ni a, ka sàwm tlat vàng kha a ni. Min țanpui ve êm êm a, chuta kârah kei phei chuan a lakah rilru danglam ka la pu zui a, a hre rêu rêu ang tih hlauhawm tak a ni ringawt, ani chuan ka rilru ang a pu ve dâwn hauh si lo. A nau ang deuh si, a țhian ang ni pah tho siin min en ngei dâwn a, bialnu a nei bawk a, chu vàng tak chuan a chunga ka rilru put dàn hi a hriat a hlauhawm hliah hliah. Hetia kan awm zêl chuan thup sèn loh hun ka la nei ngei ang a, hriat hun a la nei ngei ngei ang, chumi hma chuan a chunga ka rilru puthmang hi ka siam țhat a ngai.

Ka ngaihtuah ve nasa țhìn hle a, a châng chuan keimah zâwk hi duhtu ka ni a, ka duh thu hi ka hrilh pawp mai dâwn em niang tih rauh rauh châng ka nei bawk. " Jason, ka duh tak tak che asin, ka bialpa der anga țang lovin ka bialpa tak tak ni rawh, Hriatpuii nèn ka hmuh che u hian ka thïk thei lutuk a, khawngaihin a lam hawi pawhin nui tawh suh aw," ka ti tawp mai dâwn em ni? Han hrilh ta pawp ila, ani'n ngaihzâwng a neih thu leh nula anga min en ve loh thu min hrilh ta se, chumi hnu lama kan boruak chu a hrehawmin a zahthlâk dâwn lutuk bawk si a, ka rilrua ka tum rûk ve rauh rauh pawh chu ka țhulh phah leh țhìn bawk rêng a ni.

Hun a kal a, mihring hi chu kan dam phawt chuan kan buai ni tin ziah a, kei pawh ka dam miau avàngin ka buai chho ve telh telh a, ka thawhna dàwr neitu nèn pawh a hma ai ngawt kha chuan kan inbe tam ta deuhin nuih pawh kan nui ve ta zauh zauh, a lo nui thei ve chiang khawp mai, a nui khât mai mai a lo ni.

Kristie pawh a rawn phür thar leh tawh khawp mai, min rawn be zing leh ta viau bawk. A chhan pawh a u leh Hriatpuii chu an inzui chiang tak tak tawh niin a rawn sawi a, Hriatpuii ngeiin an thlalâk dunna chu IG lamah story-ah a hmang fo a, a lo hmu ve ziah ni àwm tak a ni. Zan khat pawh min rawn biain vawiin lama an ina a uin Hriatpuii lêng tùra a hruai haw thu chu phür zet hian a sawi mawlh mawlh a, a hriat theihna chhan pawh Hriatpuii story ațangin a lo ni nghe nghe a, a proof nân a nu a rawn phone leh chat a, a nu chuan Hriatpuii lo lèn ngei thu leh titi pawh an titi luam thu a lo hrilh bawk a ni. A țawng chhuak ațang chuan a hlim tih a hriat ngawih ngawih mai si a, ka rilru a hre ve hauh lo chu a làwmawm ngawt mai.

Ka ngaihbel ve deuh nge ni, tûn hnai chho hian Jason-a hi a rawn lang khât ta deuh rêng a ni, an inzui tak tak tâk vàng pawh chu a lo ni maithei; mahse, engati nge min rawn tlawh khàt deuh kher le? Min lo ning ru viau tawh zâwk em ni ang? Kei lah hian ka mamawh hunah ka ko a, ka duhna lam lamah ka hruai țhìn mai kha a nia, ka duh leh ka thil ruahman tih puitlinna tùr atân chauh ka hmang a, ani tân chuan a lo ninawm viau ngei ang; mahse, amah avànga ka hlim rûk theihzia leh min fakna țawngkam avàng ngawt pawha ka awm dàn phung hrim hrim ka thlâkthleng tawhzia erawh a hre hauh lo thung ang le.

"Tlaiah ka rawn hmu lawk ang che aw," tia Jason-a'n min rawn biak chuan 'aw' ka pawh ve mai a; mahse, mak ka ti ru ve deuh viau. A chhan pawh tûn hnai chhoah a rawn kal khât ka tih tawh kha, eng atân tak chuan rawn kal tum ni maw? Kan inbiak tam tâk loh dàn ngaihtuah phei chuan... a pawimawh viau a nih ka ring. 

Inrinni ni ve miau hek le, in ka ti fel fai phawt a, Jason-a rawn kal huna ka lan bawrchhawr loh nân tiin ka intifai thuai thuai a, ka lo nghâkhlel mah mah chu a ni. Tlai chu sawi loh tunah dâr 2 êm pawh a la ri lo a nia; mahse, ka phûr sárh lo thei si lo. Ka nu puan(wrap-around) lei thar ka ke rêk thleng hnalha fual chu ka fêng a, a rawng leh a pàr dàn mawi ka ti ve êm mai a, a thar làwm ni pah fãwmin ka fêng ve chhin duh pah rêng rêng  a, ka ke rêk thleng niin ka chawn a lang chuang lo va, a pawi lo ang. Dârthlalangah chuan ka inthlêk ka inthlëk a, mawi ka tiin inhmeh ve viauin ka inhre bawk a, Jason-a pawhin mawi min tih ve ngei ka beisei.

Ka zâi pah rât rât reng a, ka phûr mah mah deuh chu a ni, ka awm dàn min lo hmu rutu awm phei se chuan... a nuih a za ngawt ang chu. Chutih lai chuan doorbell rawn ri ta ral ral chu ka hre thei a, chu pa mai mai chuh! Tlaia rawn kal tùr ang khân a insawi ve si a, a va rawn lang hma leh si ve, hman chu ka hman ve tawh tho a. Ka nuin min rawn koh tâk vakah dârthlalangah chuan inthlêk leh zawkin, hmanhmawh ru tak chuan ka chhuak ta vat a, thil a tih laklawh vàng a ni chiang. Kawng ka va hawn chuan Jason-a ni lovin Lalrina ka hmu ta zâwk a!

"Ah, nangmah elo?! Lo lût rawh, eng nge i rawn tih dâwn teh tlat a? Lo lût rawh, lo lût rawh," mak ka tihna dah bovin ka ti ta sawk sawk a, ani erawh chuan," Mi dang beisei i nei chiang mai," nui hmêl pu deuh hian a ti ve thung a, kei erawh chuan," A, nei hran lo ve, ka pa i ni dâwn emaw ka ti zâwk mah a," ka ti ta thên a.

Min rawn tlawhin a rawn lêng ve hrim hrim a lo ni. In chung lama chhoh hmain thingpui leh a hmeh tùr kan keng chho nghâl a, ka titipui bawrh bawrh a. Kei hi chu ka țawng duh ve hrim hrim bawk a, ka nèl tawhte bulah hi chuan țawng ve duh bawrh bawrh tak ka ni.

Țhiante chanchin kan sawi a, kan in-group video call pah bawk a, vànneihthlâk takin ka ti dâwn nge, Fiona-i leh Lawmpuii chu an buai a ni ang, an rawn tel ve tlat lo; mahse, pawi lo ka ti daih zâwk. Ka rilru hre na se zawng, ka va châk lo dáwn tak! Kan inbiak kual zawh hnu chuan Vli chanchin ka zâwt khut a, an ințhen hnuah a hmu leh tawh em tih vêl a ni ka zawh mai mai ni, ani pawh chuan țha taka min chhângin vawi khat a hmuh tawh thu leh phone lamah erawh a rawn text reng thu chuan min chhâng a. Nizàn lamah pawh text mai duh tâwk lovin phone call ngata rawn biak a tum a ni àwm e; mahse, a chhàn loh thu erawh a sawi tel tho bawk a.

"A ni maw?!! Chu, renew leh mai ula, a inchhìra a sim tawh tho ka ring e, nang lah i la single tho sia," ka lo ti vat a, ani erawh chu ka rin loh deuh hian a lo nui hawk a," Mai mai a! Ni nawn leh tùrin ka țhen hleinem, ka tum tawh lo," a ti ve thung a, kei lah chuan," In induh thiam theih êm kha, in inhmeh ka ti asin. Ka lo sawi tùr chu a awm lêm lo nain țhian kan nihnaah ka ti ngam ve che a, bâkah, hlim taka i awm leh thuai theih nân ani nèn chuan renew leh ula chu ka ti, hnung lama hun liam tawh chu phûm bo daiha tûn hun zêlah leh hma lam hun lo la awm leh zêl tùrah pawh hlim taka hun leh i nun hmang tùrin ka duh che a ni," ka thiam ang tâwka țawngkam țha leh duhsakna awka chhuak chuan ka ti duah a.

"A làwmawm thei ngawt mai, min duhsaknaah ka lãwm lutuk e. Țhian țha deuh deuh leh min duhsak êm êmtute ka nei che u hi chu nuam ka tiin mi vànnei tak hi chu ka ni ve chiang a ni," tiin a chàwl deuh dat phawt a, rawn sawi zawm lehin," Vli nèn erawh chuan min sawi zawm leh chu tum tawh lo hrâm teh, tlang takin sawi ta ila, zêp tùr pawh a awm chuang lo va, keima lamah hi chuan kawp leh tumna ka nei tawh lo, chu chu a ni tawp mai," a rawn ti leh a. A hmêl chu ka en vang vang a, a tàwp ta viauin ka hria. Ni e, a tân a tlàwmthlâk ve êm mai a, mipa a ni bawk a, a rilru a kîr vek tawh a ni ang.

A dàra bensak thap thap pah chuan," A țha alawm, nang berin i tih tlat chuan le," ka ti a, ka nui a, chutah, ding nghâlin," No dahthlâk pahin tui in tùr ka zu la lawk ang e, lo țhu rawh aw, ka rei lo ang," ka ti leh zat a, ka inher chiah chu Jason-a ka hmu nghâl chiah a, ani pawh chuan min rawn hmu ve nghâl a, a lo awm reng tawh nge a lo thleng chho ve chiah zâwk ni ang?

"Ka rawn tih buai loh che u ka beisei," a rawn ti a, kan lam pan chuan a rawn phei nghâl a, kei chuan," I lo thlenna a rei tawh em?" ka lo ti ve thung a, ani chuan," Rei lo ve, hemi chungchângah hian a nia rawn hmuh lawk che ka duh ni," a ti a, lehkha, sàwmna lehkha ni àwm tak, a kâwm mawi taka chei hi min pe nghâl a," Ka hmanhmawh deuh hlek a, zànah ka rawn be mai ang che aw," a ti leh a, chelhna țawngkam ka chhâk chhuah hma chuan a kal zui leh ta daih a. A chêt dàn chuan min tih hamhaih deuh tlat avàng chuan ka en zui vang vang ringawt a.

A liam hnu chuan a lehkha min pêk chu ka en leh a, sàwmna chu a ni chiang a, eng sàwmna nge ni tih erawh ka hre hauh lo thung. Ka thlêk vang vang lai chuan," Ka lo awm ve kur vàng hian a thin a rim a ni ngei ang tiraw? A zia lo hle mai," Lalrina chuan a rawn ti a, ka phu deuh zawk thei hial, a rei lo viau nain a lo awm ve reng a ni tih ka lo mangnghilh daih niin. 

"Engah ngawt maw? Ni lul lo mai, thinrimna chhan tùr a awm lo, a hmanhmawh a tih kha, amah pawhin a sawi reng kha," ka lo ti vat vat a, kei pawhin Jason-a awm dàn kha ka hre thiam chiah lo nain a sawi dàn takah, a hmanhmawh dàn êm êm kha, Hriatpuii nèn an inhmu dâwn ang a, a hmanhmawh deuh a nih ka ring ta ngawt. Lalrina nèn kan lo awm avànga thinrimna chhan tùr a nei lo, ka bialpa hlui mah ni se ka ngaizâwng tawh lo tih a hre ve tho alawm, bâkah, Lalrina hriat dànah phei chuan inngaizâwnga inkawp lai kan ni zui bawk a; mahse, nichin lawk kha chuan khatiang boruak kha chu hmuh tùr a awm lo chu a nih kha.

Samson-ate nupa min sàwmna a lo ni a, kei tehlul hi min la rawn hriain sàwmna min han pe ve a nia, a làwmawm êm mai; mahse, kawng lehlama chhût chuan Jason-a bialnu emaw min tih vàng a nia, ka ni lo tih hria se chuan min pe hauh lo ang le.

Zànah Jason-a chuan min rawn be ta rêng a," An hmu leh châk si che a, khawngaih takin an sàwmna kha tih hlawhtlinsak hrâm tùrin ka ngèn che a ni, an hriat dànah che ka bialnu ang ni mah la i tân nuam tih lohna tùrin an awm miah lo ang, kei pawh i tân pawh nuam tih lohna tùrin ka awm lo ang," a rawn ti nghâl zung zung a.

*MI SAWISÊLA LO EN DIK ZUNG ZUNG ȚHÌNTE HI ANMAHNI DIK LOHNA LEH FEL TÂWK LOHNA HMU THIAM HLEI THEI LO AN NI DUH CHÂWK*