☆SUMRISANG☆ - 16 By Dingdi Pachuau

☆SUMRISANG☆ - 16 By Dingdi Pachuau

Pathianni mah ni se anniversary ang leh birthday angte chu sawn  theih ni hek lo le, min rawn sâwm ve miau bawk si a, Jason-a nèn chuan chawhnu dâr 2 vêlah kan chhuak a, kan thlen chuan Zovi chuan min lo làwm chùl a, tu vak an lo la awm loh avàng chuan mak ka ti angreng hlê a, sàwmna meuh meuh siam ve ta chu an lo awm deuh nual tawh ka ring deuh a nia.

In pawh an lo chei vek tawh a, an chei dàn chu a vul chûk lo nain a tâwk reuh a, a simple mawi ka ti mai, a tâwk tiu teu viau ka ti, hei aia nasa chuan chri se chuan a mawi lo ang. Sam-a leh Jason-a chu an titi nghâl bawrh bawrh a, Zovi nèn chuan an choka lamah kan inzui lût ta thung a.

"Anni pahnih inhmu tawh hi chu an ri nghâl bawrh bawrh ziah a, min ngaihven ve ngai tawh lo rêng rêng," tiin Zovi chu a'n vui der nang nang a, a hmêlah erawh lungawi lohna rêng a lang lo thung. "Lo țhu rawh, in tùr ka'n thlî ang a, kan in dâwn nia," a ti leh siam siam a, chutah," I hman lo ang tih ka lo hlau lutuk a, mi dang vak kan sâwm bawk si lo nèn, nangni in rawn hman ta hlauh a," ti leh siam siamin in tùr chu a thlî a, a hmeh tùr rawn chhawp nghâlin," Ei rawh, anni pawh ka va pe ve ang e," a ti leh a, kei chuan," Ka lo pui ang che," ka lo ti vat a, ngai a ti lo nain ka pui lui ta tho a.

A țawng siam siam reng a, a bula awm hi a nuam ka ti, a hahdam ka ti mai. Kei pawh hi ka țawng duh a; mahse, Zovi nèn hi chuan kan awki a inang lo viau thung a. Ani hi chu a dam dap a, kei erawh chutiang chu ka ni ve lo. 

Zanriah tùr kan buatsaih laiin Nupa ni àwm tak, kum 60 pèl ve ve tawh tih hriat tak hi an rawn lût ve a, Zovi chuan a lo welcome vat a, kei erawh chuan ka hriat ve lêm loh avàngin ei tùr lam ka lo buaipui a, a hnuah mipa pahnihte'n an lo kàwm theih avàng chuan Zovi nèn bawk chuan zanriah ei tùr lam chu kan buaipui leh ta a, a lo buaipui sa nual tawh avàngin siam a hautak lo va, rei lo tëah kan peih thuai mai nghe nghe a.

Zanriah tui tak kan kïl hnuah kan țhu khâwm leh tal tal a, eng eng emaw sawiin a chângin fiamthu an thawh a, kan nuiho dar dar a, boruak a zãngkhai hlê a ni. Tuna kan boruak hlimawm takah chiah hian rilru pêk ka duh avàngin thil dang rêng rêng ka ngaihtuah duh lo va, ' Zàn a rei tak tak hma' tia ka pute nupa an haw hnuah pawh chuan keini chu la haw ve lovin kan la hlim dar dar viau tho mai.

"Champhai lam ațanga grape tui an siam 'cial' tâwk min rawn thawn a awm tak asin, in ve chhin r'u aw, a thlum tui tawp a," Zovi'n a rawn tih chuan," Kan rui palh ang a," nui chung hian ka lo ti vat a. Ani erawh chuan," Um tawp tui a nia, a ruih theih pawhin ka ring lo, ka tem chhin tawh a, a thlum tui tawp tih chiah ka hria, in ve hrim hrim r'u," a lo ti a, tho chhuakin grape tui chu a va la a.

A thlum tui tak tak hlê mai. Zu rim chu a nam ve deuh nain tui ka tih chi tak a nih avàng chuan ka in ka in a, ka pum chu a sa deuh ham hamin ka hria, ka in zêl a, a hnuah ka beng leh ka biang a rawn sa leh ham ham a, kei hi ka rui deuh a nih ka ring ta.

"A ruih theih loh em kha?" tia Zovi ka zawh chuan Sam-a chuan," Tam deuh i in chuan i kai thei maithei a ni, alcohol lam chi hrim hrim i in ngai lo a nih chuan," a lo ti a, kei chuan," In ngai nâng aw, zu in nihte chu ka duh hleinem," ka lo ti vat a, an lo nui hlawm a.

"Eng nge, ka in ngai lo tak tak! A lum țan riauin ka hria," tiin ka kut chuan ka hmai chu ka zâp a, Zovi chuan," Fan ka lo on ang e," tiin a tho vat a, a on zawh chuan zai a han play chhunzawm nghâl zat a, music rem chuan ka lû ka bu nghâl tlat tlat a, ka phûr leh nghâl sârh mai a ni.

"Lâm ang," tia Zovi'n min rawn kaih chuan ka hnial lo chiang; mahse, ka noa in tùr la bãng chu ka in leh rih phawt a, ka in zo vek. Ka din chhuah chuan ka taksa chu a zãng deuh haih a, chu chuan min ti phûr zual! Han chêt vêl hrim hrim chu a nuam haih haih kher mai.

A hnuah Sam-a leh Jason-a chu kan làmpui ve leh dãwrh dãwrh a, ka va nui nasa tak! Zovi nèn chuan làm dàn chi hrang hrangin kan làmpui a, hnam làm thlengin kan hrût chhuak vek!

"In va chau hma tak! Kei chu ka fit asin," tiin ka la lâm zar zar a, Zovi leh Sam-a chu an țhu deuh chiah a, Jason-a țhut tum erawh chu la phal lovin ka la kuah a, ka làm luihpui tlat a, Zovi leh Sam-a chuan min lo nuih tlâwrh tlâwrh a.

"Min en reng suh, ka biang lah hi a sa hum hum a, a sen țûn vek tawhin ka ring, ka thil in vàng kha a ni thei ang em?" Jason-a'n min en rùn reng avàng leh ka biang sa vung vung avàng chuan ka han ti a, a nghâwngah kuahin ka la lâm nghal nghal reng tho a, music a ring ve pah bawk nèn, ka țawng deuh làwng láwng nghe nghe.

"I inhmeh phian," a lo ti ve thung a, ka va âwih lo tak! Âwih lo tak ka ni, ka chhe sen țûn zâwk ang. Ani lah chuan inhmeh min tih mai la duh tâwk lo chuan," I lang sexy tlat zâwk bawk," ka beng bulah chuan a la rawn ti zui a, ka en chho a, nui hmêl a put deuh avàng chuan min fiam mai mai tih hriain a bengah chuan ka tuaisak nak nak a.

Nuam ti viau mah ila awm reng theih a ni bawk si lo va, kham lo tak chung chuan zàn dár 9: 30 pelhah kan haw a, kan haw kawngah pawh chuan lum ka tih êm avàngin glass ti hniamin thlifîm ka inchhèmtîr heuh heuh a, chumi pah chuan zanin boruak nuam ka tih thu leh Zovite nupa fel ka tihzia chu ka sawi barh barh reng a, tlàn pawh kan tlãn rei lo khawp mai.

Kan kawt kan thlen chuan kan inmangțha a, ka chhuah dâwn chuan ka kutah a rawn vuan a, ka hawi lêt leh rih nghe nghe. Kawtthlêr êngin min rawn èn pha ve deuh riai ruai a," Hlim taka Sam-ate nupa siama hun hlu tak min hmanpui avàngin ka lãwm e," a rawn ti sup a, kei chuan," Chutiang sawi a ngai hleinem, kei pawhin an zînga ka tel thei kha ka lãwm a,  nuam ka ti hlê bawk a ni," ka ti ve vat a.

Kan ngawi leh vang vang a, ka kut a la thlah bawk si loh avàng chuan ka hamhaih, awm dàn tùr ka hre lo ru viau a, han tàl chhuah ringawt lah chu min chelh ve êm êm a... Chutia min chelh lah chu nuam ka ti ru riau mai lehnghâl. Chutah, a lama min pawh hnaih pahin amah pawh chu a rawn kûn hnai a, a hmuiin ka hmui a rawn sîktîr tâkah chuan ka inhûm ruh âwt mai; mahse, a rei lêm lo, a hmui a rawn chêta duhthawh taka min fawh tâkah chuan ka lo chhâng lêt vat a, kan infâwp chhunzawm nghâl mawlh mawlh bawk.

Mut hmunah chuan ka hmui chu ka tuai leh ringawt țhìn a, nuam ka ti a, mak ka ti bawk a. Duhthawh takin kan infâwp dùn a nih kha, kan bulah kan țhiante an awm lo va, lem chan a ngai miah lo; mahse, kan infâwp a, a der a ni miah lo, a der mai maiin kei chuan ka fâwp lêt miah lo, ani pawh khân a der maiin min fâwp bîkin ka hre lo, a duhthawh êm kha.

Car ațanga ka chhuak ka laihzia lah kha, ka ke pênte kha a dik thei lo va, ka pën nawk nawk ni berin ka hria, ka thin lah kha a phut nasat bâkah ka thâ a khùr nasa lutuk a, kawngkhàr pawh ka hawng lawk thei lo nghe nghe a nih kha. Eng vànga khatianga min fâwp kha nge a nih ang? Kei lahin ka chhâng lêt țha bawk si, bialnu kawp lai a nei reng tih pawh ka lo theihnghilh daih a nih kha. A, zanin kha chu boruak khân a zir ve êm a ni, ka thil in khân hna a thawk a ni ang ti tawh mai ang.

Kan awm dàn avàng chuan a tûk lamah pawh țhian anga va text pawh chu ka inthlahrung zo ta, rilru erawh a hlim deuh veng veng ringawt a. Hna ka thawhna lamah pawh ka buai loh lai chuan ka lo ngaihtuah leh țhìn, min ti hlim tak zet a ni; mahse, ka va hlim rei lo tak! 

Ninģàni tlaiah Hriatpuii nèn bawk ka hmu dùn leh ta. Dàwr ațanga ka haw lamah a ni a, hlim taka an nui dùn ka hmuh chuan min rawn hmuh hlauin ka biru vat nghe nghe, ka thin a phut nasat bâkah ka hlimna chu vawilehkhata len bo nghâl ang a ni bawk. Engati nge min hmuh ka hlauh ringawt le? Ka thin chu a phu dup dup a, ka âwm dawmin tháwk ka la hawk hawk a. Hriatpuii'n a bân a chelhsak tlat ka hmuh phei chuan ka thinlung chu chemtêa vih ang mai hian a na ngut ngut maiin ka hria. Lem chan ngaih miah lohnaah min kuahin min fâwp a, chu pawh duhthawh fahranin a nih kha. Tunah lêm, min hria leh min ngaihtuah ang pawhin a lang hauh si lo, ngaihtuah chu sawi loh, khami zàn phei kha chu a theihnghilh hmin dèr tawh a ni ngei ang.

Pathiannia kan inhmuh chuan ka melh zawk ringawt a, min rawn en hmain ka mit ka la sawn daih, a chhan chu ka rilru a tihnat rualin a chunga ka rilru puthmang dik tak hi a hria ang tih ka hlau ngawih ngawih. Min rawn biak pawh chuan a mita en duh lovin ka chhâng a, a bulah rei pawh ka awm lo; mahse, ka haw tùr chu min lo nghâk tlat a, a bulah ka chuang leh ta nge nge. Ka chhuak tùr chu min chelh lehin, Pathianni kal ta zàna a kan awm dàn kha la theihnghilh lo tih hriat tak hian khatiang chiah khân kan awm leh a, a duhthawh leh khawp mai, mi veivâk an awm lo hlauh a, kan vànnei mai mai a ni.

Tlaia lo lèn a tum thu sawiin a tlãn chhuak a, ka phûr kher asin. Tunah chuan kan inkâr pawh kan sawi chhuak tawh ngei ang a, țha takin kan awm dùn thei tùrah ngai ang. Amahin a sawi chhuah phawt loh chuan sawi chhuah ka hreh ve rih si a, hmeichhia zâwkina sawi chhuah hmasak chu zahthlâkin ka hre ve tlat, Jason-a nèn kan inkârah kher phei hi chuan ka zak zual, ka nu țhiannu fapa a ni bawk si a.

Ka lo nghâk ve reng a nia; mahse, a rawn lang hauh lo. Han phone êm chu ka hreh ve deuh a, 'a hman lo deuh rih a ni ang' tiin ka nghâk leh a, a buai deuha a tlai deuh dáwn chuan min rawn hrilh ve mai tùr a nia. Ka nute an rawn haw a, an rawn haw hnu rei vak loah Lalrina leh Maenga an rawn lêng teh tlat a, ka nute pawhin an lo be hlut nghe nghe. Kan pathuma kan awm hran hnuah erawh Lalrina chuan a nu boral tawh mah se a piancham a pain a lawm dâwn avàngin a țhiante min rawn sâwm kual a lo ni a.

"Ho ka ti viau nain ka nu birthday kha ka pa hian a lawmsak ziah a, a boralna kum êm a la vei bawk si lo nèn, ka sawi țiatsak duh lo a ni, i lo kal thei ang chu tiraw? Naktûk zàn khi a nia," a tih chuan," E, thei tùrah ngai ang," ka lo ti vat a, Maenga'n phone call a chhàn avàng chuan ka lamah rawn ãwn pheiin," In inkâr a țha ang chu maw?" a rawn ti zauh a.

Ka nuih sak a," Engah nge a țhat loh ngawt ang?" ka lo ti ve thung a, ani chuan," A țha a nih chu, chuti, rawn sàwm kual pawh i ngai lo ang chu tiraw? A inthlahrunawm viau nain lo tel ngei la ka duh a, mi dang pawh an rawn thei vek tùrah ka ngai a," a ti a, a jacket ațanga a kut veilam a rawn dah chhuah ka hmuh chuan," Engati nge a i kut chu?" ka ti hlut a, a intuam nasa angreng si a, a ti na viau a ni ngei ang.

"Ka ti palh a, ka bawh ât a," a lo ti mai a, ka lo chek tlak tlak a," A na ngawt lo maw?" tiin ka han ensak a, ka hmu thei chuang lo nain a tih palh dàn min hrilh ațang chuan a na thawkhat ang tih chu a hriat mai.

A kut chu dìm tùr leh fîmkhur țùlzia chu ka hrilh malh malh a, ani erawh chuan," A na lo, a tìrah a na ve deuh țêp ringawt. Ti leh daih ila, nakzàn chu, i hah deuh dâwn a ni. Dàwrah nilêngin hna i thawk ang a... mahse, zàn khat chauh a nia," a ti a, kei chuan," Hahna chhan tùr a awm lo, a ho lutuk," ka lo ti vat a, kan piaha Maenga ding chu enin," A va han be rei tak! Tu nge maw a biak le?" ka ti leh zat a. 

Jason-a chu a rawn lêng ta miah lo. Zànah ka phone a, a la tlang thei hauh lo zui a, ka thin a ti rim țûng mai; mahse, eng emaw rokhawlhna a nei thut pawh a ni maithei asin. Ka rilruah a awm deuh reng a, a tûkah pawh ka ngaihtuah a, biak erawh ka tum tawh rih lo. Rokhawlhna dang a nei a ni ve mai a, va biak buai kher kha a țûl ka ti ta lo a ni, chhuahchhàl ka ang dâwn êm asin.

Mahse, tlaiah Hriatpuii nèn bawk ka hmu dùn leh ta. Lalrina nu birthday thilpêk ka leinaah a ni nghe nghe a, eng nge maw an en ve ni? Ka va melh leh lai tak phei chuan insi chialin an lo ding dùn a, chutah, Jason-a chuan Hriatpuii hnung lam ațangin a kâwngah a kuahsak a, chutih pah chuan a bengah eng emaw hi a hrilh pah a, Hriatpuii a lo nui sak bawk a. Tunah hi chuan rinhlelhna pakhat mah ka nei tawh lo, min duh àwm takin min fáwp a, ka beiseina ti sâng tùrin beiseina min siamsak bawk a; mahse, amah vêkin chu beiseina chu a țhiat leh si, ka thin a va ti na lehzual tak êm! Ka thin chu a tâwt up up a, eng ber nge ka lei pawh ka hrechang lo, ka chhuak dàwr dáwr mai a ni.

Hmuhna chhan leh biakna chhan tùr êm êm ka nei ta lo bawk a, tunah chuan hmuh pawh ka hmu khât ta, Pathianniah hi chuan biak in khata lawi kan nih miau avàngin kan inhmu lo thei lo va, kan inhmuh chhunah pawh biak pawh hmasak ka hreh deuh ta tlat a, bâkah, ka thin a ti rim ru tlat bawk a, amah pawhin min pumpelh a tum niin ka hre țhìn. Kan inhmu khât a, a rawn lêng khât a, inhmuh khàt leh a rawn lèn khàt si chuan biak pawh kan inbe khât lo thei lo. Ka nu pawhin mak a ti deuh nge, min zâwt hial a," A rawn lêng khât ta riau mai, nangni hi in inhau deuh em ni?" tiin, kan inhauh loh thuin ka chhâng ringawt a, chutiang bâka chhàn ngaihna ka hre lo a ni.

Țhianteho erawhin eng mah an hre lo bawk a, group lùn dàn pawh a la a ngai rêng. Min fiam reng a, Lalrina nèn pawh min la dem bel tho. Ka chhâng lêt ve peih lo, Lalrina nèn hi chuan kan inkawp ngai tawh dâwn lo tih ka hre chiang a, chhàn enah pawh ka en lo. Min dem dùn fo mah se Lalrina erawhin min rawn be reng reng tho a, kei pawhin țha takin ka lo chhâng ziah a, Jason-a vàngin hlim lo pawh ni ila ani hriatah hi chuan ka lantîr ngai lo ang.

Chak pângngai taka ka kal lai chuan min tâwk zâwnga rawn kal mi pahnih ka hmuh chuan ka thin a sa phat mai. Jason-a chuan ka hmuh lai reng chuan a kokiah kuahin eng emaw hi a hrilh leh sap a, an la nui dùn zui. Engah nge ka hmuh dun chhên ni? Duh leh ka hmuh theih loh lamah an duh tâwkin inzuiin induh rawh se, ka hmuh theiha an rawn inlâr ziah hi ka ning. Bâkah, Jason-a hi ka rin ang a ni lo, min hmusit kual vêl niin ka hria, nge min intih theih khum zâwk ni, ka thîk rù tih a hria a ni ang. Chu pawh ni se, a sual ve hrim hrim, a țhian leh a farnu anga a en kha ka ni a, a nu țhiannu fanu ka la ni cheu bawk, hetia min hmêlma en ringawt hi a dik lo, sawi fel a ngai.

"Jason, ka be thei che ang em?" Hawihhàwm der pawh ka peih lo, ka bia ang a, ka àn khum phiar phiar ang, mipa dik tak ang pawha awm ngam hlei lo, mipa chu a thu sawiah a ding nghet țhìn a ni ngai a. Ani ve hi... hmmm, eng nge a sawi pawh a hre tawh nâng.

*I CHAN LOH AVÀNG KHÂN CHÂN TA DUAIAH INNGAI LO LA, A AIA ȚHA ZÂWK I TÂN HUNIN A LA RAWN INHER CHHUAHPUI TÙRAH NGAI HMIAH RAWH*