☆SUMRISANG☆ - 17 By Dingdi Pachuau

☆SUMRISANG☆ - 17 By Dingdi Pachuau

Kan in chungah lo kal tùrin ka beisei a, ka lo nghâk reng bawk. Kan inkâr hetia a han awm ta mai hi tu thiam loh hmasak nge ni? A hma kha chuan kan inkàwm ngeihin a bulah pawh engkim ka hrilh ngam kha a nia, tunah chuan a inla hrang ta tlat a, ka bialpa tak a ni lo tih chu ka hre ve reng; mahse, min țih tlat leh min pehhêl hi ka duh lo, min biak a hreh êm êm maite hi, natna hlauhawm tak vei ang maiin min țih a... Amah ka duh hluah hluah tawh a ni tih te hi a lo hre chhuak reng tawh zâwk em ni? Ni e, bialnu a nei a, ka tih buai a hlau pawh a ni thei a, a nih loh pawhin hetia ka bialpa lema a chan reng chuan a bialnuin hre thiam lovin an inkârah boruak țha lo a thleng ve thei tih a ngaihtuah te pawh a ni mahna; mahse, ka ti buai lo ang, mi inkâr ti buaitu hi engtik lai mahin nih ka tum ngai lo. A lema bul țanpuitu ka ni a, ti tàwptu tùr pawh keimah ngei hi ka ni, ka thu sawiah ka ding ngei ang, amah ang lo takin.

A rawn kal ta ngei a, chhiat hi chu a chhe mawlh lo chu a ni; mahse, ka thin a ti rim tlat, min hmu hreh lutuk hian ka thin a ti rim lo thei lo.

"Eng thilah nge min hmuh i duh tâk? A pawimawh viau a ni chêk ang chu maw?" a rawn tih chuan a țawngkam avàng chuan amah hnungchhawn zâwnga dingin ka kut chu ka hûm ruh a, a thil min zawh dàn kher kher chu ka ngei takzet a ni. Ka hmu duh a nih chuan a pawimawh tihna a ni mai a, chutia a inla eng emaw vêl lutuk chu, ka thin a ti rim zual, a bialnu nèn hian ka ti buai zêk zâwk dâwn em maw ni...

"Lem kan chan kha i duh tâwk ta tih min hrilh duh a ni ang maw?" a rawn tih leh chuan inher vatin," Dik chiah! Engtin nge i hriat theih zâwk a!! Thil i hre thei hle mai," tiin ka han ti-el ve sak a, ani chu a lo nui hak a," A làwmawm a nih chu. Chu tê mai chu em ni i sawi duh chu?" a tih leh chuan ka thinrimna chu a puak keh ta. 

"Ni lo, thil dang pawh a la awm țeuh! Mahse, ka hrilh vek kher che a țùlna a awm lo. Kan lem chan chu tunah hian ka ti tàwp a, lem chan a ngai tawh lo ang. I duh duh ti theiin i zalèn ta a nih chu, ka ti buai tawh lo ang che, hlau duh suh. Kei chu ka thu sawiah ka ding nghet tlat, mipa tu emaw anga thil sawi tawh hlen chuang lo te ang lo takin. Bul țantu ka ni a, ti tàwptu tùr pawh ka ni tih ka hrilh tawh che kha, tihian kan inkâr chu tûn dârkâr ațang hian a tàwp chiang bal ta e. Chhûngte mit hmuh leh hriatah pawh inkàwm ngeih tak anga kan lan kher kha a ngai tawh lo bawk ang, lem chan a ngai tawh lo a nih chu," ka ti bawrh bawrh a, engati nge ka thin hi a rim êm êm ni, a bialnu nèn ka hmuh dun fo vàngin maw? Ka àn chhuah bawrh bawrh chuan ka zia deuhin ka ring a, ka duh duh ka sawi ta rêng a ni.

"I laka rinawm thei lo tu emaw angin alawm min chhuah le!" a rawn tih chhuah leh sup chuan ka ha chang ka țhial rap rap a," Khatiang khân sawi chai suh, ani ai pawh khân i chêt dàn a mak daih zâwk! Ani chuan mipa takin hmaichhanah ngei ințhen a duh thu a sawi asin, ngawi rengin kal bo a tum ve mai mai lo. Nang ve hi, hmeichhia ang mai. Mipa ka ni chu i inti ve àwm si, mipa ang takin awm ta che," ka ti lêt ta zêk a, ka duh aiin ka âng na deuh bawk a, a zak ve cham cham ang chu.

"I sawi zo tawh em?" dam dapa a rawn tih chuan mit khap duh hauh lo chuan ka en lêt kar a, a hmêl țha taka thinrim hmêl a lantîr duh hauh lo chu ka haw telh telh mai, a insûm thei lutuk bîk chu ka hua a ni. Kei lah ka insûm thei si lo, a hmêl țha takte hi hamsak bawrh bawrh ka châk...

Min rawn pan hnai thutin ka bek tawn tawnah a vuan a, dimna tel hauh lo chuan min rawn fâwp ta bawrh bawrh a nih chu! A chét dàn chu ka rin loh lutuk a nih avàng chuan lo dan emaw lo țan emaw nân hun ka nei lo hrim hrim. Na zet zeta min fawh bawrh bawrha thaw chham deuhthawa min fawh hnu chuan min thlahin," Mipa ka nihzia ka lantîr a nih kha, i cho âr âr bawk a, kan inhmuh tawh loh ka beisei," a ti sup a, eng dang mah sawi leh tawh lo chuan inher nghutin min kalsan zui ta nghâl a.

Khâwng âtin ka ding a, a kal liam tùr chu ka en zui reng ringawt. Ka țap lo ang, ka țap hauh lo ang. Ka eng mah a ni hleinem, inhmuhna chhan tùr pawh kan nei tawh lo rêng bawk. Ani mipa pakhat ve mai vàng khân ka țap lo ang, duh viau mah ila ka duh thu ka hrilh hman chuang lo va, a tihzia hlauh, lo hrilh hman phei ila... ka tân a zahthlâk dâwn asin.

Mahse, a nunràwnna ka chunga a lantîr erawh kha chu mak ka ti a, nâ ka ti bawk. Khatiang ti duh tùrah khân ka dah ngai lo va, ka ring chhin ngai hek lo. Mipa leh hmeichhia chu kan inang lo va, kei chu hmeichhe thinchhe ve tak ka ni a, kan âng chhuak hlawih hlawih a, kan hre rùn lo va, kan àn zawh hnuah a zo dèr, chutiang chiah chu ka ni a; mahse, ani kha chuan dimna tel hauh lovin min tih-el nân hneh chhuh takmeuhin min fâwp a nih kha, ka hmui pawh tûn thlengin a la na vek thei alawm. Engati nge ka chungah a lungawi loh ngawt le? Min hmuh a duh loh chhan leh min pehhêl a tum tlat chhan te... eng vàng nge ni le? A chungah eng thil nge ka tih suala  khati fahrana nâa min fawh ni? Ka àn khum vàng kha a ni thei ang em? Mahse, lungawi lo chung saa rawn kal a ang zâwk.

A, eng pawh ni se, eng nge tih theih ka neih chuan? Min hmuh tawh loh a beisei thu a sawi a, hmmm... kan la inhmu leh khawp ang, ani a dam a kei ka dam bawk chuan engtin nge kan inhmuh loh theih ang? Ani ang hian ka pehhêl ve dâwn teuh lo, tih sual ka nei hleinem.

Zànah hma takah ka mu a, phone pawh ka khawih lo. Khumah chuan ka mu meng kar a, hun kal tawh ka ngaihtuah lêt a, rei ve deuh tawh ațanga vawiin tlai thlengin. Ka hriat loh kârin ka mittui chu a lo tla reng niin, ka han  khawih a, engati nge ka mittui hi a lo tlâk ngawt a? Lalrina ka ngai em ni? Ngai lo chiangbàng! Nih leh, engati nge? Ka rilru a nâ em ni? Jason-a vàng maw? Tun tlaia ka chunga a thil tih vàng khân maw? Teuh lo! Ka mittui chu thinrim zet hian ka hru tãwk tãwk a, he pa hian ka mittui a phû lo, amah vàng hian tla tùr pawh a ni hek lo; mahse, ka hrûk hnuah pawh chuan a rawn tla zêl tho.

Ka nun chu a hlim lo tak zet. Dàwr nghahnaa min dàwrtute hmêl hlim taka lo biak pawh chu hrehawm ka ti a, ka chhûngril a hlim loh miau chuan a langa hlim hmêl put pawh a har ka ti a, ka hna chu ka ning ru ta ngawih ngawih mai. Bànsan hial ka duh thut thut a; mahse, hna min hmuhsaktu ka zah a, kum khat êm pawh thawk lova bàn chu ka hreh ve deuh bawk si; mahse, ka ning ngawih ngawih. Ka hlim lo tak zet a, țhiante bula awm pawhin ka hlim tak tak thei chuang lo. An bula awm ai chuan mahni chauha awm rek rek pawh ka thlahlel ta zâwk hial a, a hmaa khawhar ngaithei lo leh țhiante bula awm reng duh khân fianrial ka thlahlel ta zâwk chu a nia, a hmaa hmeichhe harh var leh thawveng ve tak, hlim thei tak nih leh kha ka châk, tunah tak phei hi chuan khawvêla mi hlim lo ber ka ni hialin a nia ka rin ni!

A sawi ang tak chuan kan inhmu khât ta viau, ni leh lo, inhmu khât pawh a ni lo, inhmu ngai ta lo ti ila a dik zâwk ang. Pathiannîah ka hmu ngai ta miah lo va, a chhan erawh Nu Sangpuii ka zâwt duh bîk lo, ka àn khum vàng khân min ngei khawp a, min hmuh palh hlek pawh duh lovin a rawn inkhâwm duh lo a nih ka ring nghet hmiah.

Lungngaihna, hrehawmna leh buaina hi a mal malin a rawn thleng lo va, a rawn thlen tawh vêk vêk hi chuan a hlãwm hlãwmin, indawt zatin a rawn thleng zut zut ni berin ka hria. Rilru hlim loh lai laiin, ka rilru hre ve miah lo chuan Kristie chuan min rawn biain a ute chanchin chu min rawn sawipui leh chiam a, ngaihtuah lêm lo hian ka 'umm' 'aw' liam vêl mai mai a, ka rilru chhûngril erawh a na ru tak zet thung, duh lo viau mah ila a na miau si alawm. Jason-a chuan Hriatpuii nèna an thlalâk chu IG lamah a lo up thar a ni ang, a sawi dànin. Ka check tawh dâwn lo, lo up vêl mai mai teh se, a bialnu a nia, a thu thu alawm.

Ina ka awm pawhin ka room-ah deuh chawt ka awm a, zànah ka chhuak ngai lo va, ka nute bula ka awm lai erawh chuan hmêla danglamna lantîr loh ka tum ve fan fan țhìn thung; mahse, nute na nâ nâ chuan ka awm dàn danglam ta êm êm erawh a lo hre thiam ve lo thei lo va, dàwr nghâka ka chhuak tih loh hun danga ka chhuak ngai ta lo leh ka awm dàn chu a chhan min zâwtin damlohna ka neih leh neih lohte min zâwt bawk a; mahse, ka dam țhat thua chhângin chhuah ka peih loh thuin ka chhâng mai thung.

Ka awm dàn erawh damlo ang mai ka ni a, thil ka ei a tui loh bâkah ei châkna ka nei lo va, a hming chauhin ka ei ve hrâm hrám a ni ber. Ka awm dàn hi Jason-a vàng a ni lo tiin keimah leh keimah ka inhrilh char char a, thil ei pawh ka tum ve nasa; mahse, ka ei thei chuang lo. Jason-a rilrua ngaihtuah loh ka tum a, lehkhabu chhiar tùr ka dap a, ka chhiar tui thei bawk si lo. Jason-a chu ka ngai ngawih ngawih a, a ei tùr siam tui takte kha ka ngaihtuah chhuah châng phei chuan ka ngai zual sauh a, chu chu duh lovin thil dang tih tùr ka han zawng a, ka ti ve țhìn tho bawk; mahse, rilrua ngaihtuah loh tum erawh zawng ka thei hlawl lo a ni e. 

Thil ka ei thei lo leh ka hlim loh avàng chuan ka nuin ka dam țha lo a nih ringin inentîr a rawt a; mahse, ka hnial tlat thung a. Ka pa chuan," Hmuh theihin Bawihte, i chér tawh a nia, inentîr chu duh mai ta che, a nih loh pawhin hetia i awm chhan hi sawi la, dàwr lamah te hian buaina i nei a ni lo maw? Eng mah sawi hreh miah suh," a lo ti ve a, ka lu ka lo thing a," Awm lo ve, buaina a awm lo; mahse, Pa, dàwr nghah hi ka ningin ka hnê ngawih ngawih, zin thawven ka duh," ka ti ta hlawl a. Zin thawveng ila, boruak dang hîp ila ka zia deuh ang.

"Lungleiah i nuteite hnênah i va zin khawthawng dâwn em ni ang? I va tlawh pah a ni mai ang a," ka nuin a lo ti vat a, ka pa chuan," A țha viau ang chu, nge hmun dangah i duh zâwk?" min ngaihtuah tih hriat zet chuan a rawn ti ve vat a, Lunglei lam chu ka lo ngaihtuah loh lam tak a nih avàng chuan ka ngawi vang vang phawt a. Ka nu vêk chuan," I unauteho pawhin an hmu châk leh tawh viau ang che, va zin duh hlauh teh," a rawn ti leh a.

Chumi țanga kâr khatnaah chuan Lunglei lamah ka phei ve ta vâwk vâwk mai. Ka nutei lah chuan ka zin phei tùr chu a lo phûrin min rawn be sek a, Teteite pawh an lo phúr ve khawp mai bawk, nuam ti takin hun ka va hmang ve thei meuh ang chu maw, beiseina sâng tak nei phawt ila...

Ka ngaihtuah ka ngaihtuah a, kan inkârah inngaihzàwnna a awm pawh a ni si lo va, heti taka kain inkâr chhe ta ka tuar mai hi keimah ka indem a, tihngaihna lah chu a awm dèr bawk si lo. A thu sawi eng ber kha nge ka lâk nata a chunga ka thinrim viau ni tiin ka ngaihtuah a, han hlin fak tùr ka hre chuang dèr si lo. A țawng dàn ngeiawm lutuk vàng kha a ni ang ka ti ta ringawt a ni.

Min hmuh chuan ka nuteite chu an lo țê chùl a, an chhûng lo awm kim țhapin min lo chibai sap sap a, min lo làwm thiam khawp mai, kei pawhin nuam ka ti viauin ka ring. Ka kawm rual Tetei a awm lehnghâl a, ani pawhin keimah vàng liau liauin a customer pakhat a lo hnar phah rih a ni àwm e. Beautician a ni a, dàwr a la nei rih lo nain dàwrtu a nei ve reng reng a, an ko phar ve reng tihna a nih chu.

Inbual ka ngai lo ka ti chung chungin ka nutei chuan tui lum min siamsak a," Insil tho rawh, i harh hawk mai ang," a ti tlat a, insil dâwn tho tho chuan tiin ka inbual ta thuak thuak zâwk a, harh pawh ka harh hawk mai rêng a ni, motor kha ka rùi lo nain ka chuan thui ve deuh a, ka ni deuh chhuih a ni.

Chaw ei khamah TV en pahin kan țhu khâwm laih a, kan chhûngkaw chanchin min zâwt a, lunglènna hun pawh ka nei lo; mahse, zàn mutna lamah erawh ka lung a lêng vawng vawng thung. Kan in leh ka nute ka ngaih erawh ka hre lo va, ngaih bîk nei lovin ka lung chu a lêng ve tawp a ni ber mai. Phone ka en a, dâr 11 a lo ri tawh a, vawiin lamah motor ka chuang thui ve si a, ka mut a chhuah hma ka rin tehlul nèn, ka meng kar reng mai.

Mut chhuak thei hek lo le, țhianho group-ah chuan ka lût a, an lo reh țhap tawh a, message hnuhnung ber pawh dâr 10:42 -a mi a ni. Ka en kual zêl a, Jason-a hming ka hmuh chuan ka tàwp deuh chat a, a la meng ve ang em tih chu ka rilruah a rawn awm zawk a; mahse, ka lu ka thing zui nak a. Amah vàngin tunah pawh hian ka zin khawthawng a ni a, ka ngaihtuah tùr a ni lo, hlim taka hun hman ka tum tùr a ni tiin ka infuih sauh sauh a. A number chu delete ka'n tum deuh thuak thuak a; mahse, 'êm a' ka ti leh ta deuh a, hmet sawnin movie en ka tum ta zâwk a.

Zin khawthawn tum ka ni nain ka lung a lêng tak zet a ni. Jason-a ka hlat ta sauh chuan ka ngaih a ti zual ni maiin ka hria, duh lova theihnghilh ka tum viau pawhin hawina lam apiang chuan automatic-in amah min hriat chhuahtîr zêl a. Tlai a lo nih lahin ka lung a lêng zual a, zàn mutnaah nèn. Tetei khum bula khum ruakah ka mu a, ani chu chhùn lamah a hah deuh bawk nèn, a muhìl hma thei khawp a, kei zawng zàn a rei telh telh a, ka lung a lêng zual telh telh zêl mai.

Țhiante pawhin ka zin a ni tih chu an lo hre ve a, an hriat chhan pawh birthday lawm an sawi vàng a nia, eng ti tùra zin nge ka nih tih leh engtikah nge ka haw dâwn tih min zawh chuan ka haw hun tùr ka hriat loh thu leh ka zin khawthawn mai mai thu chuan ka chhâng a, pawi an tih thu an sawi chuan kei chuan a pawi loh thua chhângin ka haw hun tùr ka hriat loh avàngin ka tel lova lo làwm mai tùr chuan ka hrilh hlawm a, pawi an ti viau nain sawn theih a ni bîk bawk si lo va. Ka tel lova an hmang thei tùr chu lehlam takah chuan tihzia ka ti viau, tun boruakah hi zawng birthday lawm tih pawh ka phûr lo nasa mai si a.

Eng mah ti lova chhùna ina awm ve reng ai chuan tiin Tetei chhuahnaah ka zui ve a, a zia ta phian mai. Vêng ka hmuh tam phah bâkah ina awma thil ngaihtuah vung vung ai chuan ka hlâwk hrim hrim, lo țhut ngawt ngawt ai chuan tiin Tetei chuan min tîr zauh zauh bawk a, a tihzia tak tak. Jason-a ka ngaihtuah tlêm thei ta alawm, ngun takin Tetei thil tih dàn chu ka lo en ve zêl bawk a, a hna chu a thiam bâkah a zeihawiin a che mãn hlê a, a han tih vêl dàn hrim hrim pawh chu a nawm hmèl ka ti, nakinah la tihtîr ve ila a țha ang, rilru pawh a harh sawng sawng mahna.

Ka duh chen chen ka awm thei dâwn bawk a, Tetei chhuak chu ka zui chhuak ve ni tin ta mai a, ka en uluk thei bawk a, kâr khat hnuah phei chuan ka thiam ve dâwn dâwn tawhin ka hria! Hetiang lam hi zir enah pawh ka lo en ngai hauh lo kha a ni a, ka rin ang a lo ni miah lo. Tetei pawh a zir chhuak tawh a, tihian ni tin hna thawhna tùr a hmu ve reng a, thla khatah phei chuan sum a thawk chhuak tam reuh ngawt ang chu, dàwra mi hnuaia thawh ai khân a lêtin a hlâwk daih zâwk ka ti, nawm pawh a nuam zâwk ang; mahse, thawhrim a ngaih ve bâkah taksa pawh a hah deuh bawk ang chu.

Tetei chuan bialpa a nei ve ngei a, chu pa chu sipai a lo ni nghe nghe a, an inbe khât deuh nain an inbiak chhunah erawh an inbe rei thei khawp mai. Lungleia mi tho a ni a, tunah chuan Mizoramah a awm rih lo va, a lo haw chhoh theih veleh palai rawn tirh a tum thu Tetei chuan min hrilh ve sap sap a.

"Kan inkawp rei ve deuh tawh a, duh pawh kan induh viau; ka nute erawh hi chuan min duhpui vak lo va, sual an tih vàng lam pawh ni lovin sipai tak hi ka pa hian pasal atân chuan min awhpui thei lo a ni," a ti sap sap a, kei chuan," Mahse, in induh tawn tlat bawk si chuan..." ka lo ti ve a, ani pawh chuan," Ni e, min duhpui lo tih hre tho mah ila ka hmangaih ve miau tawh si a, ani lahin min duh ve êm êm bawk si nèn, a nih nih kan ni tawh mai a ni ang chu," nui deuh sak chung hian a ti leh a.

Mutnaah chuan ka ngaihtuah neuh neuh a, kei hi chuan pasal chu ka la hmu zo lovin ka la nei dâwn lo chu a ni phawt mai a. Ngaihzâwng pawh nei lo tân chuan pasal neih chu a har ve det ang, Pathian zârah ka dam ve zêl ang a, ka kawppui àwm mi chu Pathianin min la pe ve mai ang chu maw, a teuh ve ber pahnih lahin mi dang min kawpsan ve ve bawk si a, tun atân chuan ka tân zawng pasal tùr chu vàna rah ang a la ni.

Tlaiah ka nuin min rawn bia a," I pa Dinga birthday a nia, chaw ei tùrin min rawn sâwm a, kan va ei dâwn a nih hi," a rawn tih chuan," A ni maw? Pa Dinga chu ka duhsakna min lo hlansak ve dâwn nia. U Nubawihi'n a ei ve dâwn em?" ka lo ti vat a, ka awm loh laia Pa Dinga birthday an làwm chu ka lãwm ru kher mai.

"Aw, kan chhûngin min sâwm a, han awm ve thei hlauh la țha tùr a nia," a rawn tih chuan," A, ka awm loh pawhin puar takin in ei thei tho ang chu," nui chung hian ka ti ve thung a, ani pawh chu a rawn nui ve a," Ni e, kan lo ei kêp mai dâwn che nia," tiin,  "Vawiin lamah in unau chuan eng zât nge in hlawh theih a?" tiin thil dang min rawn zâwt zui ta nghâl a.

Ka nu whatsapp status-ah chuan an thlalâk a rawn ti lang ve chuai chuai a, Jason-a a lan ve ngei ka rin avàng erawhin en châk viau mah ila ka en duh lo, Hriatpuii pawh a tel ve ngei ang chu, a pa la ni mai tùr birthday a ni a, ani ber ber chu a bãng lo tawp ang le.

Pathianni chawhnuah kan lêng chhuak ve a, Theiriat tlâng sângah min lènpui a, hlâ ka tiin chho ka ti mai mai khawp a, ka kal chu ka inchhîr lek lek hial a; mahse, a hmun kan thlen chhohah erawh chuan a nuam ka ti ta phian, a thawvengin a tlâng a sâng bawk a, hawina a zauin  hmun hla tak tak a hmuh theih a, mit titlai viau mah se ka lung erawh a ti lêng ru vawng vawng thung.

A tûkah Rahsi vêngah sam paet tùrin kan kal a, sam kan pawh tùr chu a sei hran lo va, a sambu a tam lo bawk nèn, kan zo hma deuh ang chu. Tetei chuan a han khawih char char a, keiin a puih theihnaah ka lo pui ve char char bawk a. An pa ni àwm tak chuan," Nang chu i hmêl țha phuk phuk hle mai," tiin min en deuh vung vung a, ka nui ringawt. Hmêl țha phuk phuk tih tùrin ka hmai hi a hlai êm êm em ni tih ka ngaihtuah zui rauh rauh a, ani chauh hi 'hmêl țha phuk phuk' min ti awmchhun a la ni, ka hmai a hlài fahran loh nèn; mahse, a làwmawm lamah ngai ang.

A sam a tam lo bawk a, a pawt zo har lo va, a tàwpna tùr a thual nawn leh mai mai lai chuan ka phone a rawn ri a, chhâng tùrin ka chhuak zui nghâl a. Lalrina a lo ni a, ka zin hnua min rawn biak vawi thumna a ni, min ngaihtuah ve deuh pawh a ni mahna.

Kan inbiak lai chuan Bullet bike hi a rawn tlàn phei a, a bengchhen êm avàng chuan ka beng lehlam chu ka hup a, hetiang bike hi chu pà viau mah se ka haw țhìn alawm, a ring leh lutuk țhìn a, ka thin a ti rim țhìn a ni. A tlãn tlang mai ang chu tih laiin kawtah chuan a la rawn ding zui a, a  la ti nung dut dut reng bawk si a, Lalrina țawng pawh ka hre țha thei lo.

Ka hminga min ko ni àwm tak ka hriat deuh vuai avàng chuan chhâng lovin ka hawi kual deuh phawt a; mahse, min hriaa min kotu an awm ka rin loh bâkah hmêl hriat ka nei lo tih ka hre chiang a, ka hming ang pu mi dang pawh an lo awm thei tih ngsihtuah chhuak lehin Lalrina lam chu ka bengkhawn leh ta zâwk a.

"Remtluangpui..!!!"

Ka inher nghâl vat a, min kotu aw ațang chuan tu nge a nih ka hre chiang ngang mai, ka vawi khat hriatna a ni lo nain chutianga ka hming puma min ko lawl erawh ka hriat vawi khatna a ni thung!

*I NATNA AVÀNG KHÂN MI DANG MAWHPUH DUH SUH, MI DANG I MAWHPUHNA  KHÂN I NATNA KHA A LÂK BOSAK THEI CHUANG LO CHE*