☆SUMRISANG☆ - 18 By Dingdi Pachuau

☆SUMRISANG☆ - 18 By Dingdi Pachuau

"Aw, nakinah ka rawn be leh ang che aw,"  tiin Lalrina chu ka be tàwp tê tê phawt a, min rawn kotu lam en pah chuan," Jason Lalduhawm!" ka ti lêt ve zat a, eng nge ni vei, ani pawhin ka hming pumin min ko lawl tho alawm, ka ko ve thei tho, kei chauh hian hming pum ka nei bîk lo.

Ka rin loh deuh chuan a rawn nui hawk a," Ve khà khà reuh che hian! Eng nge khatah khân i tih? I nuteite in a ni tih chu sawi hauh suh, i bial tharte in a ni ang maw?" a rawn ti zui nghâl zat a, a thil sawi dàn leh țawngkam chu ka ngei lutuk a," I ngaih dàn dàn le," tia inher nghatin in chhûngah chuan ka luhsan nghâl daih a. A zawhna ka chhàn rengna chhan tùr ka hriat loh bâkah eng nge bial thar tihte kha a rawn sawi chhuah, min lo ngai lêrh viau a lo nih hi.  Pawi chai lo, ani min ngaih dàn mai mai, engah mah ka ngai lo ve.

Tetei'n a tih zawha kan chhuah chuan Jason-a chu a lo awm tawh lo va, ka thaw huai mai. Eng nge maw Lungleiah a rawn tih ve dâwn ni? Ka zin phei vàngin a rawn zin phei ve ringawt te hi a ni ang e, mi tih thîk, ka ngaisâng lo, amah zâwk hian bialnu thar tùr a rawn buaipui zâwk dâwn a ni ang chu! A, a duh leh buaipui mai mai ang hmiang, ka lo ngaihven a țûlna a awm lo.

Zanriah kîl laiin Tetei chhang chiah Chhana chuan  Krismas Urlâwk an neihnaa an hun hman dàn tùr chu a sawi barh barh a, Tetei chuan," YMA-in a ni lo'm ni huaihawt dâwn? Engati nge min telh ve loh le?" a lo ti a, ani chuan," Ni e, nang chu i buai thei si a, an telh ve duh lo che a ni ang," tiin a lo chhâng a, an tlum ber Bawihpuia chuan," A nuam viau ang, YMA ka ni châk ve tawh ngawt mai, ka nih hunah pawh la ti chho ve zêl se, la ti tàwp lo se ka ti," a lo ti nuah nuah a.

"E, kum a ral chak alawm. Pathian zârah kan dam ang a, nakkum kum lawkah chuan member i ni ve thei tawh ang a, i duh tâwkin i tel ve thei tawh ang chu," a pa chuan a lo ti ve a, Tetei pawh chuan," Matric hi han pass phawt la, țha tâwkin pass kha tum bawk la, YMA member chu i ni thei thuai mai ang," a lo ti ve a, ani hi a la nau ve deuh a, an chhaih ber leh an fiam ber pawh a ni rêng a ni.

Anni chu an chhûngkaw member an tam deuh a, inkàwm tham leh han inchhaih tham an awm bîk a, Tetei tân pawh nau mipa an awm bawk nèn, a nuam ngawt ang. Eng emaw chânga han tirh mai atân pawh an remchâng dâwn êm asin.

Tetei țhiante an rawn lêng a, mut daih bîk a màwi chiah loh avàngin ka țhu ve reng rih a, an titi hlut a, fiamthute an sawi chuan ka nuih pawh a lo za ve viau mai. Min biak chuan țha takin ka chhâng ve mai a; mahse, ka țawng tam lo khawp mai thung. Ka in lêngte, ka țhiante an ni lêm lo bawk a, țawng tam viau kha a țûl ber lêm lo, nèlawm lo lutuk ang chuan ka lang bîk lo ang chu maw.

An lêng rei lo va, keini pawh Tetei nèn kan mu har lo, Bawihpuia tih loh mi dang chuan TV enin, inkhèl an en țhap a. Ka nuih an ti za angreng, hmuhnawm an tiin an lo țang ve bawk si a, an țan lah chu a inang țhap em maw ni nghe nghe ni. Inkhèlte ai chuan anmahni hi an hmuhnawm zâwk hialin ka ring.

Rei lo te hnuah Tetei chu a muhìl leh mai a, kei erawh chuan vawiin lama Jason-a nèn kan inbiak dànte kha ka ngaihtuah lêt a, inbe rei lo viau mah ila ka tih dànah khân ka lung a awi viau tho mai. Min hmuh tawh loh beiseitu khân min rawn hmuin min rawn bia a, eng nge maw a rilruah awm rêng rêng ni? Ka hmuh hmasak leh ka biak hmasak a ni lo hrim hrim kha ka lãwm a ni. Chuti chu ni lo se, " Min hmuh tawh loh i beisei a ni lo'm ni? Engah nge min rawn biak si?" te kha a ti thei a, kei chu chumi lakah chuan ka la fihlîm rih tlat a ni.

A Bullet rawn khalh kha a lei thar a ni ngei ang, ani chu hlawh nei a nia, a duh duh a lei thei alawm. Hriatpuii pawh a phur fo tawh ang chu, fet zet zetin an inphur dùn ang a...  kan inkâr țhat lai kha chu ni se chuan kei pawhin ka khalhsak chhin chiang viau ang le. 

Message tone a rawn ri a, ka phu deuh zawk nghe nghe, phone chu ka silent zui ta vat a, Lalrina a lo ni a, a muhìl thei bîk lo a ni ang. Kan han inchhâng zar zar a, tunah chuan a mal ve tawh a,a lung lèn zual châng deuha han biak mai tùr Vli a nei tawh si lo va, a khawngaihthlâk hnûp hnûp roh asin, kan inzui țhin laite kha a ngaihtuah ve ruk ruk țhìnin a nia ka rin ni.

Bathroom-ah ka lût zawk a, ka luh hlàn chuan Message dang a rawn thleng leh tawh a, ka han en a, Lalrina leh bawk emaw tiin, ka han en chuan ka tih chu amah ni lovin Jason-a ve thung a lo ni! Eng atân nge maw min rawn text ni? A number la delete lo mah ila biak tumna chhe tê mah ka nei lo hrim hrim a, min be duh lotu leh min hmuh duh tawh lotu hi biak châkna ka neih loh bâkah hmuh tumna rilru ka pu duh lo, a rûkin ngai viau mah ila.

Ka open ve tawh tingtang si a, ka chhiar ta poh a. *I va meng rei ve! I hmai kha a bawl ang e*  tih tê mai hi a lo ni a. A va ho tak, a ho ka ti lutuk chu ka thin a rim țûn zâwk. A thu a awm lo ve chiang e, ka duh leh ka meng rei ang a, duh leh ka mu hma ang a, ani lo buaina tùr a awm lo, chhàn pawh ka chhâng lêt lo ang, chhâng tùrin zawhna pawh min zâwt chuang lo bawk a.

A tûk lamah erawh chuan Tetei chu inneihna lama mo chei tùr a nih avàngin ka zui a rem ta lo va, inah ka awm ve leh ta a.  A rem ti lo chungin ka nutei insu ka pui a, in ka ti felin chhuat ka nâwt chhuak vek bawk a. Inbual ka tum rilrûk lai tak chuan," In awm em?" rawn ti rî ka hriat chuan ka phu deuh zawk a, ani hi, rawn lèn a tum a ni chiang mai. Ka nutei'n a lo chhàwn a, Room-ah ka lût hman si lo va, thinrimin ka insehruh a, a rawn lût pawh chu ka lo en duh lo. Engtin nge helaiah hian ka awm a ni tih a rawn hriat? Ka nuteite in a rawn hre chat thei a nia, a bike rî ka lo hre hauh lo chu ka inngei, eng nge ka lo ngaihtuah pek ni.

"Lo țhu rawh khai," Ka nutei chuan a lo ti vat a," Eng nge i duh le? Tetei țhian i ni ang chu maw?" tiin a be chhunzawm nghâl bawrh bawrh a, ani chuan," Ni chiah lo ve, Tluangi nèn hian kan inhre zâwk a, Lungleia ka rawn phei remchàn lai a nia tiin ka rawn tlawh a nih hi," a lo ti a, a rûkin ka lo ner sawk sawk, fing phakar lutuk mai! Hetia a tih tlat chuan ka tân lo biak loh a mawi dâwn lo, ka biak loh chuan ka nutei'n mak min ti dâwn êm asin.

Be lo thei lo dinhmuna ka din miau avàng chuan ka be ve ta a, en pawh ka en țha duh vak lo, ka nutei hmuh loh lai erawh chuan ka melh rum țhìn thung. A nuih a za țhìn a nih ka ring, a nui leh suk țhìn a, ka melh rum châng pawh chuan engah mah ngaih loh hmèl tak hian pângngai takin min be reng tho, ka nutei a lo inrawlh ve zauh zauh bawk a. A nu leh a pa chanchinte a zâwt a, ani ehi chuan Nu Sangpuii leh Pa Dingate a hre ve vak lo.

Ka nutei zawhna ațangin Lungleiah hnà vàngin a rawn phei a ni tih ka hria a, ka rilru a hnîm deuh rawih mai. Keimah vànga rawn phei ve emaw te kha ka ti vêl kha a nia, a àwmin a ang lo lutuk! Ka lo indah sâng mah mah a ni, a eng mah ka ni lo tih hi hre chiang viau tawh tùr ka ni asin le, mãwl leh lutuk!!

A lêng rei ve tho a, a haw dâwn chuan țawngkam țha leh fel ta chu, ka nutei chuan zanriah eiah a'n sâwm nghâl zat a, insehruhin ka lo ngawi reng thung, a lo 'aw' nulh ang tih ka hlau. Ani erawh chuan," A châkawm viau nain zanin chu chaw ei khâwm kan nei dâwn a, ka hnial mai ang che," a lo ti a, ka làwmzia mai chu a! Ka nutei chuan," A nih tak chu, naktûk tlai pawh a la awm tho alawm tiraw? I number Bawihi'n a nei tho ang a, a hun tùr chu kan la inhrilh țha tùrah ngai ang. I haw phei hma chuan vawi khat tal chu i rawn ei ve hrim hrim ang chu," a ti leh a, ani pawh chuan," Teh rêng mai, ka lo ei ngei ngei ang," a lo ti ve leh a.

Tetei chu a rawn haw har deuh hlek a, chaw pawh kan lo eisan daih nghe nghe. A rawn thleng chu a inti chau khawp mai a, chaw pawh a ei peih lo, chawhnu dâr 3 vêl khân a inhnawh puar hlek tho a, chu vàng chuan a ril chu a țâm tehchiam lo a ni àwm e. A hlawh a țha a, chàu deuh mah se a phúin a țha tho alawm kan tihsak ta mai.

Mutnaah Jason-a bawk chuan min rawn text leh a, *I nutei kha a fel ka ti khawp mai*  tih tê mai hi min rawn thawn a, ka chhâng lo. Fel a tih thu min rawn hrilh ve a ni mai a, ka chhàn lêt ve kher a ngai lo.

Mahse, a dang min rawn thawn leh a, *I zin rei tawh si a, ka rualin haw phei ve tawh mai la?*  a rawn ti leh a. Zahna hi chu a va tlachham ve ham ham tak! Ka haw phei a nih pawhin a rual chuan ka phei kher lo ang, a thu thua awm tùr ka ni lo. A duh leh a thu thu ana Hriatpuii a tih ang chuan min tih tum hlek suh se. A thuhrimah min hmuh pawh beisei tawh lo kha a nia, eng aiah nge min rawn tlawh a? A ruala haw phei tùrin min la sâwm zui.

*Ka haw phei a nih pawhin i rual chuan ka phei nguar ang* tia chhàn lêt hrãwk chu duh viau mah ila 'êm a' ka ti leh deuh a, àn hlâwk deuh ka ang dâwn êm mai a,  *Ni lo ve, ka lãwm e* tiin ka chhâng lêt ve ta zâwk a ni, min hre ngai lo chuan chhiar ta se, fel hmèl min ti ngawt ang!

A reh zui ta vang vang a. He pa hi, ka va haw tak! Min rawn text tê tê a,  a message ka ngaihchàn leh reng laiin a reh leh daih a, a ngeiawm ve tâwk a ni. Ngawi tak rawh se, chaw a rawn ei hunah a hre khawp ang, ka thil ngaihtuah avàng chuan ka nui sak a.

A tûk tlaiah zanriah ei tùr chuan a rawn kal ta ngei a, ka nutei chuan a lo be nghâl bawrh bawrh a, ka patea leh Tetei pawh an bãng chuang lo, min țawng kêp vek ka ti mai, ka tân chuan a làwmawm tak zet a ni e.

Chawbêl bulah ka țhu a, inhre sa kan nih avàngin ka nutei chuan ka bulah Jason-a chu țhu tùrin a ti a, a rûkin ka nui var var. Chaw kan han ei a, duhsak takin chaw ka khawrh țeuh phawt a," I zak palh ang, ei țeuh rawh," ka ti a, chumi hnuah," I ban ngam lo palh ang, ka lo suah ang che," tiin chawhmeh chu ka suah leh ta țeuh țeuh a, a thlèngah pawh a leng lo țêp. "A tâwk tawh," a tih hnuah pawh chuan," E, i puar loh kan hlau alawm, ei zawh vek tùr," tiin a dang ka suah belh leh a, a rûkin ka nui var var reng. A ei zawh meuh chuan a puar ve khawp ang le, zàn pawh a mu țha thei lo hial maithei a ni.

Zanriah ei kham hnuah pawh chuan a haw nghâl thuai bîk lo va, titiin kan țhu khâwm a. Ka melh ru deuh nain pum puar hrehawm ti ang pawhin a awm hauh lo nia! A ei zo vek sia, engtin nge hrehawm ti ang pawha a awm loh theih ni ka ti rilru nauh nauh a, ei a thei chiam lo tih ka hre ve tho bawk si nèn, duh lo ru zetin ka melh ru ka melh ru mai a ni.

A haw hnuah chuan Tetei chuan," I țhianpa chu a chhiat loh nasat kha," tiin min fiam zui a, chhâng lovin ka nui ringawt. Ka sawi fiah kual vêl peih lo, a ngaih ngaihin ngai mai mai teh se. 

Mahse, mutnaah chuan min rawn text ta a, a puarzia leh mut pawh a mut hleih theih loh thu min rawn hrilh chuan ka nui chhuak hawk a, Tetei chuan," Eng nge i nuih a?" a rawn ti vat a, Tetei ngaihtuah chang miah lovin ka lo nui chhuak a ni tih ka hriat chuan ka inthiam lo deuh a," A, fiamthu an rawn post hi maw le, a nuihzatthlâk lutuk a," ka ti ta ringawt a. Ani pawh chuan ka thil sawi chu a ring ve mai a ni ang chu, min zâwt chhunzawm ta chuang lo, chhûngril lamah ka ngaih a țha reuh reuh a, ka lung a awi viau a ni.

Lungleia ka awm chhûng chuan Tetei chuan a thil thiam chu a theih ang angin min zirtîr ve a, nuam pawh ka ti phian mai. Facial kan ti a, mithmul kan pawt bawk a, makeup hman dàn hrang hrang, Thlasik leh Nipui laia hman dàn tùr, rawng inchawih dàn tùr chi hrang hrang pawh min hrilh nasa, ka hre reng thei ngût ang em tih a ni tawh. 

Ka pain," Bawihte, nuam i la tiin i la awm kham lo viau em? Chuti a nih loh chuan i rawn haw phei ve tawh mai dâwn em ni ang? I ngaihawm tawh êm mai," a rawn tih chuan min ngai tak tak lo pawh ni se ka haw a hun ve viau tawh a ni tih ka hre thiam ve mai a. Ni e, thla khat ang deuhthaw alawm ka awm tawh ni, ka nuteite pawhin mak min ti tawh ang, nula a pumpa ve meuh zinna hmuna chàm reng te chu...

Ka haw tùr chu min ui der ve hle a, zin leh vat tùrin min chah hlawm nghe nghe. Kei pawh chuan ka zin leh thuai tùr thu chu ka hrilh hlawm ve ngial a, ka zin leh hun tùra ka rin chu Tetei pasal neih hunah a ni daih tawh ang chu, an innei theite a nih ngai chuan.

Ka zin haw zàn chuan rin loh deuhin Jason-a a rawn lang hlawl mai a, ka nu chuan a lo be vat a, kei erawh chuan ka hmu lo der hmak thung a. Min rawn biak tâkah erawh chuan ka chhâng ve tho a; mahse, chu pawh a rùl tâwk chauhin, ka biak țhat húrhna chhan tùr ka hre lo a ni.

A haw har lêm lo, a haw dâwnah," I motor chuang i chàu àwm si a, mu hahdam hma rawh," min ti a, ka nute a  mangțha chhunzawm nghâl daih. A beng a rawn ti vâr lutuk chu ka ngei ru deuh hlek a, a hma zawng pawha rawn kal tawh ngai hlei lo kha a nia, eng a hria nge ni ka ti lo thei lo, min beisei te hi a ni rêu rêu ang e, teuh lo mai!!

Tunah chuan ka rilru pawh a zia tawhin țhianho group-ah pawh ka lang tam ve leh deuh tawh a. Ka zin ka haw a ni tih an hriat chuan an rawn lêng ve liam liam a, an rawn kim țhap thei lo thung a. Ka zin haw tûk zànah Mamuanate group an rawn lang a, a tûkleh zànah Lalrinate group zâwk, an fel hlawm liam liam a nia. Rei tak zin bo leh hmun hla taka zin daih treat-in min treat ka ti mai, ka zinna chanchin min zâwt liam liam a, ka thil thiam chhuah ka hrilh phei chuan hmeichheho chuan min nuih vak vak hlawm a.

"Khawvêl hi a makin a hmanhmawh tawh a nih hi, nang meuhin chutiang te chu i rawn thiam tawh a nia," Fiona-i'n a tih chuan Maenga chuan," Engah teh ngawt chuan maw? A thiam theih lohna chhan tùr a awm bîk hleinem," tiin min lo țan vat a, kutzungpui ti pirin ka lo hmuh vâ vâ a. Fiona-i chuan hmui ti pawrhin," I lo thiam pawh chu a ni maithei; mahse, kei chu min chei miah suh ang che," ngeiawm zet hian a ti leh a, kei pawh chuan," A, ka chei lo ang che, lungngai duh suh, 'Min chei loh chuan ka thi dâwn' pawh ti mah la, ka chei chuang lo ang che," ka lo ti lêt ve a, kan inngam bawk a, kan thil sawiah chuan mi dang chu an lo nui dar dar a.

A hnu deuhah Lalrina chuan," Dam takin i rawn haw leh thei a, a làwmawm ngawt mai. Tunah chuan kan kim leh țhap tawh a, rilru pawh a nuam sawng sawng tawh. Pakhat lek pawha kan kim loh hi chuan rilru hian âr bo hi a zawng leh tlat țhìn," a rawn ti chhuak a, Athui chuan," A inla țawngkam thiam mai mai asin!" a lo ti zauh pek a, kan nui leh ta vek mai, Lalrina khân a sawi țhat ve tehlul nèn, Athui țawngkam khat tê khân a rawn ti ho zo leh vek tlat.

An haw tùr chu pâwnah ka thlah a, kan invai liam hnua in chhûnga ka luh chuan ka phone a rawn rì a, tu tak ni ang maw ti rilru pah chuan ka phone chu ka phawrh a, Jason-a hming ka hmuh chuan ka ner deuh sak a, eng atâna min rawn biak tum chu ni maw.

"Hello?" pawh ti peih lo chuan," Aw..? Eng nge?" ka han ti vîn deuh nghâl ringawt a, țawngkam mawi lo tih lam pawh ka ngaihtuahnaah a awm lo, eng thil nge a hriata min rawn tih buai sek ni.

 

"I ngaihawm reuh êm mai a, i thinrim awka vîn pawh hi hriat a châkawm ka tia," a rawn tih chuan ka chek hlak a, mi tih-el vêl dàn hi chu a hre ve teh mang e, min ngai lo tih leh ka țawngkam vîn a hre châk lo tih ka hre chiang ve êm!! 

"A lo nih tak chu!"

A rawn nui hawk a," Ka ti tak tak, min be miah lova i awm ai chuan min vin deuh țhat țhat pawh hian ngaih a țha zâwk tlat mai a nih chu! Naktûkah eng nge i tih dâwn?" a rawn ti zawm teh daih a!

"Ka hre lo," ka ti ve mai bawk a, ka hre rih lo tak tak bawk sia. Khua te han vâr phawt se, hunin a la rawn hril ang chu ka ti.

"Ka rawn lêng ang, lo awm rawh aw."

*MI HAUSA MIN NIHTÎRTU CHU PAWISA CHAUH HI A LO NI LO; INHMANGAIHNATE, INȚHIAN ȚHATNATE, HLUTNA INHRIATSAK TAWNTE LEH CHHÛNGKUA INHMANGAIH TAWN DIAL DIALTE HI MI HAUSA MIN NIHTÎRTU BER ZÂWK CHU A LO NI*