☆SUMRISANG☆ - 19 By Dingdi Pachuau

☆SUMRISANG☆ - 19 By Dingdi Pachuau

He pa hi, a duh leh rawn lêng se, ka lo awm kher a țùlna chhan a awm lo ve chiang e... ka bialpa pawh ni hlei lo, ka țhian pawh a ni tawh lo hial ang chu. Chutiang mi thu thua awm tùr pawh ka ni lo bawk, a rawn sawi aiah, ka lêng bo daih ang.

Mahse, vànduaina hi ka lamah a țang nge ni, ka nuin chhuah a lo tum ve niin, ani a chhuaha kei ka chhuah bawk chuan in lo nghâk tùr awm dâwn hek lo, ka pain in chhuahsan vek hi thil țûl bîk takah lo chuan a rem ti ngai miah si lo va. Chu achhapah, parda tam tâwk leh mutpuan sûk tùr a lo awm bawk nèn, ina ka awm ngei chu a ngai dâwn a ni.

An chhuah fel hnu chuan insûk tùr chu ka la khâwm a, machine-ah vawm lûtin ka on ta hluah hluah a, Jason-a chungchâng rêng rêng ngaihtuah duh lo chuan phone-ah zai ka play pah a, ka zaipui leh rawng rawng mai. A nuam ve êm a ni, thiam lua lo mah ila nuam ka ti êm êm tho.

Mutpuan ka su zo phawt a, parda ka nuaitîr leh lai chuan doorbell a rawn ri ta ral ral a. Phûr lo zet chuan ka chhuak a, Jason-a ngei chu a lo ni a, ka melh rum min hmuh chuan a nui suk nghe nghe.

"I rawn lèn dâwn vànga lo awm ka ni lo a nia," ka han ti nghâl ringawt a, ani erawh chuan," Ka hria alawm; mahse, i lo awm tho a, a țha ka ti tho," a lo ti a, in chhûngah chuan min zui lût ta nghâl a. Insûk lai ka neih avàng chuan ka kalsan leh rih a, awm bosan reng thu a awm bîk si lo, a hnu deuha a bula ka va kal leh chuan," I buai àwm hlê mai," a lo ti a," Aw, buai khawp mai," ka ti ve zat a. Dâwt ka sawi hleinem, ka buai rih alawm.

"Min ngaihtuah duh suh, i buai zawh hun ka lo nghâk thei che a nia," a tih chuan," Eng nge i rawn tih dâwn rêng rêng a? Inhmuh tawh loh beiseitu kha i ni emaw ti a?" ka ti chhuak ta khawl a.

"Eng maw? Chutiang ka sawi em ni?" A ngaihna hriat loh hmèl deuh hian a lo ti thung a, thinrim ru deuh hian a mitah tak chuan ka en reng phawt a, a hre lo der vël chu ka ngei a ni," Ka sawi peih vêl lo e a," ka ti ta daih a.

A reh vawng vawng a, pâwn lama motor tlãn ri leh machine rî bâk hriat tùr a awm lo. A aw a han thian kharh a," A hmaa kan awm ang khân awm leh tawh ang, tuna kan awm dàn hi chu a nuam lo êm mai. Kan inkâr a țhat leh theih nân hian eng thil nge ka tih ngai min han hrilh teh," a rawn ti chhuak ta a. Chu thil kher chu ka lo la ngaihtuah ngai loh thil a nih avàng chuan chhàn mai ngaihna ka hre lo, chhâng lovin ka en reng ringawt a, zãwl a dawh tihna em ni? Nuam lo a lo ti tak tak em? Nuam lo ti tùr siin eng vàngin nge a inlâk hran tlat si?

"Kan inkâr a țha lo tih pawh ka lo hre hleinem," ngeiawm zet hian ka ti pek a, a lo thaw hak ringawt a. Sual chu min ti ve ngawt ang le, sual chhuah hi ka duh chuan ka thiam ve êm! Hun liam tawh ka han ngaihtuah lêt a, amah avànga ka hrehawmzia kha. Ngawi tak rawh se, awlsam tak chuan kan inkâr hi ka siam țhattîr hauh lo ang, a duh tak tak a nih chuan a beih ve fat chu a ngai ngei ang.

In chunga parda ka zâr tùr chu min zui chho ve a, min zàrpui a, kan inbe hran chuang lo. Min pui chu pawi ka ti fahran lo va, theih phei se chuan ka thawh ai zawng zawng hi thawk se... Pakhat zàr tùr la awm chu lain ka thing dâwn chiah tihah chuan min lo chhuh vatin a thing pharh pharh a, a zâr zui nghâl a.

In hnuai lama kan chhuk thlâk hnu chuan," Min hrilh tawh la?" a rawn ti chhuak leh a, bangbo zet hian ka en deuh hû a; mahse, a sawi awmzia chu ka hre leh thuai a, ngai pawimawh lo zet hian," Ngaihtuah ve mai rawh," ka lo ti nghat a, ngaihtuah chhuak ve rawh se, ka hrilh kher a ngai lo, a duh phawt chuan a ngaihtuah chhuak thiam êm êm ang tih ka hria.

A ngawi vang vang a, ka en duh lo lui ve tlat si a, eng nge a ngaihtuah ang tih pawh ka hre thei lo; mahse, a hnu deuhah chuan," A nih, rawtna ka nei a nih chuan i pawm dâwn tihna a ni em?" a rawn ti chhuak leh sup a, kei chuan," A naupanchhiatthlâk êm mai a," ka lo ti ve thung a. Thu țha rêng rêng ka sawipui theih loh, inhre chhuak ve se ka tih vàng a ni a, a rin dàn leh duh dàn anga awlsam taka hneh theih chu ka ni lo ang.

A beidawng ve deuh ta nge ni, rei pawh a awm lo, a chhuah hnu chuan ka nui ru var var a. A rin angin ka lo awm si lo va, ka lo pâk huam mang si lo nèn, Hriatpuiite in lamah a kal ngei ang chu, ani'n a lo be țha deuh ang ang a, nuam pawh an ti dùn ang chu, kei chu min ngei ngawt ta ve ang.

Zànah erawh min rawn be leh a," Engtin pawhin min tihbeidawn tum mah la i hlawhtling dâwn chuang lo," a rawn ti charh charh a, ka hmui ka ti pawrh a," E, a va țha ve!" tiin a tâna ngeiawm zet tùr hian ka han chhâng a, ani lah chuan," Ngeiawm deuha min chhâng pawh hi pawi ka ti lo, ka tum a ti ruh sauh zâwk ," a rawn ti leh a, ka nui hak a, ka nuih a za tak tak miau alawm.

"Tu nge ngeiawm zâwk kha? Han ngaihtuah lêt la?" ti fuh inti fahran hian ka ti a, ani chuan," Kha lam kha chu theihnghilh tawh teh ang, bul ka țan țha dâwn alawm, a der mai ni lovin," a rawn ti leh charh charh a, ka lu chu ka thing nak nak a, ani nèna kan inkâr kha ka tân chuan a der mai a ni lo tih ka hre kar a; mahse, ani sawi ve hi chu țhian inkàwm leh inbiak țhat chhoh leh mai kha a ni tih ka hre tho; mahse, chuti chung chung pawh chuan ka be țha har lui ve ngat tho ang. Han tumtír ve hrim hrim ila...

Tháwk lák hawk pah hian,"Han tum chhin ta poh che," ka han ti a, ani chuan rang zet hian," Chiah!! Aw le, lo inring ang che; mahse, tûn țumah hi chuan a der mai mai chuan hmun a chang tawh dâwn lo ka tih tawh kha," a rawn ti leh charh charh a. Ka ner deuh sak a, a țha alawm, a peih rei ngût emaw chu.

A tûk ațanga țan a rawn lâk mai chu ka ring deuh a nia; mahse, chutiang chuan a ti miah lo, a rawn lang nghâl lo va, min rawn text lo va, biak pawh min rawn be chuang lo. He pa awmzia hi ka hre thiam lo, min rawn be bawk si lo leh min rawn hmu bawk si lo chuan engtin nge țan a lâk anga min hneh theih tehlul ang? 

Hmm... keia lo ngaihtuah ve a ngai lo, tunah hi chuan mipa lam buaipui tawh rih lo ila a țha ber, rilru nâin ka awm lo ngê ngê ang chu.

Mahse, a ni thumnaah chiah chuan zîng ațangin min rawn text a, min rawn 'Good morning' phawt a, ka chhâng lêt ve chuang lo, kan inkâr siam țhat ve a tum a ni mai a, lo chhàn lêt țuk țuk ka tum teuh lo, kei kher lo pawhin he a message hi chu an dawng ve ang tih ka hre reng bawk a, lo làwm 'cial' viau ka tum lo.

Chhùnah min rawn text leh bawk a, chutiangin zànah pawh. Zàna min rawn text lai chuan țhianho group-a ka va nuih vak vak laiin a ni a, Jaz-a fiamthu rawn forward chuan ka nuih a ti za êm a ni. A message chu ka en nain ka chhâng lêt chuang lo va, țhianho group-ah erawh ka va nãwi viau thung.

*Tu nge i text a?*  tia Jason-a message ka hmuh chuan ka chhâng châk ta tlat pek a, chhàn lêt loh erawh ka duh viau a; mahse, ka kut ka thunun zo ta lo va, *Tu vak nge ni ang?*  tih tê hi ka thawn lêt ve a, a ngai têin țhianho group-ah bawk chuan ka lût leh nghâl a.

A rawn video-call ta tehrêng a nih chu! Ka phu deuh zawk nghe nghe a, țûl lo lutuk mai! A bialnu ka ni lo va, ka bialpa a ni lo bawk a, kan tûn dinhmunah phei hi chuan video call êma inbe ngam tùr kan ni chiah pawhin ka hre lo, min ngam mah mah!

Ka chhâng lo hrim hrim. A hnuah erawh chuan  *Hetiang zâwng hi chuan rawn uang suh, video call-a inbiakna chhan tùr kan nei lo*  tih hi ka va thawn a, ani chuan min rawn chhâng vatin  *Ka hmu duh che a ni ve mai a*  a rawn ti ve thung a. Kiri, Hriatpuii emaw min ti em ni? Ka nuih pawh a ti za lo e a.

Ka hna ber ka bànsan leh tâk avàng chuan ka ãwl leh ta viau mai a, awm àwl leh ei tui chu ka hnà ber a ni leh ta rih e; mahse, rilru chhûngrilah awm tawp ringawt chu nuam ka ti chiah tawh bîk lo, engtin emaw taka sum thawh chhuah dàn ka zawn ve a ngai tawh a ni, nula awm mai mai nih chu a zahthlâk ka ti ve țan tlat tawh.

Tetei hna thawh ang kha zir chhoh ve ka duh deuh a, tûnlai atân chuan hlâwk ber dâwnin ka hre ve tlat a ni, mi tinin mawi kan duh tawh a, mite ti mawiin, an hlim leh làwmna thlen pahin sum kan la lût char char thei dâwn tlat. Aizawlah ni se zirna tùr a awm ve nual tawh bawk a, a harsa lo tùrah ngai ang; mahse, ka tuichilh thei ang em tih a ni ta.

Țhiante pawh ka râwn duh vak lo va, țhian hmeichheho zîngah pawh makeup leh incheina uar lo ber țhìn kha ka ni si a, min nuihzat ka hlau a ni ber. Fiona-i leh Lawmpuii an tawrhhhlelhawm leh dâwn êm asin. Ka chhûngte pawh hrilh ka duh lêm lo nain ka zir a nih chuan pawisa a ngai ngèi dâwn si a, ka ngaihtuah ka ngaihtuah hnuah chaw ei laiin ka sawi chhuak ta chauh a, kâr khat vêl zet chu a ral leh tawh nghe nghe.

U Nubawihi chuan," I tui leh tak tak dâwn em ni le?" a lo ti a, ka pa erawh chuan," E, i zir duh phawt chuan i zir ngei ang; mahse, kum a laklawh tawh si a, kum thar lamah i ti tawh mai a ni ang chu," a lo ti vat thung a, ka nu chuan," Ngun takin i ngaihtuah dâwn nia, 'zir suh' 'zir rawh' ka ti dâwn lo, nula puitling i ni ve tawh a, i rilru pawh i tih ngheh a ngai, a laklawha bànsan leh hnì hnè ang kha chu a fuh dâwn miah lo a nia," a lo ti ve bawk a. Ka nu a ni a, a fanu hi a rilru a noin a tum hi a ruh fahran lo tih a hre chiang ve bawk a ni e; mahse, hemi chungchângah hi chuan ka rilru ka siam fel ve tawhin ka hria.

Dàwra ka thawhna hlawh kha ka la kawl țha ve reng a, Krismas bazàr nân ka hmang ve hlek ang a, a bãng zawng chu ka thil zirna tùr lamah ka hmang vek mai ang chu, ka pain min tumsak vek inhuam leh viau mah se a țhen a zâr tal lo tum ve theih kha a țha alawm.

Krismas a hnai chho ta viau nèn, kan dam tlâng hlawm bawk a, țhianteho pawh an buai leh mam mam viau tawh mai, krismas laia pawisa neih loh bîk hlau chuan hmeichhe lam phei chu inhlawh theihna awm awmah chuan an inhlawh suau suau a ni ber, kei pawh ka vànneih asiamin ka pain inhlawhna min siamsak hlauh a, thil ziah tùr min pe țeuh a, ka ziak țauh ţauh mai, pawisa nei lo bîk nih chu ka hlau ve tho. Ziah tùr chu a tam angreng si a, zawh ve thuai thuai ka duh avàngin ka hman deuh hlek tawh hi chuan kan common room dawhkànah chuan inchhawpin ka inchap darh nuai reng mai a ni.

Mipa leh hmeichhia chu inang hek lo, hmeichheho kan buai viau lai chuan mipaho erawh zàn lamah an hman thei viau a, Lalrina pawh vawi hnih lai chu a rawn lêng leh tawh a, ka lo indah hnawk êm avàng chuan min tihpui ve tak dáwrh dáwrh a, a tihzia phian mai. Lo lëng zàn tin mai se, ka zo thuai thei ang a...

Jason-a pawh a rawn lêng ve a, Lalrina rawn lèn zàn hnihnaah a ni nghe nghe. Lalrina hian min zâwt miah lo nain inngaizâwnga ințhenah min ngai ni deuhin ka hria, a chhan chu a hriat dàn leh hmuh dànah kha chuan kan inkawp miau si a, inkawp awm dànin alawm a mit hmuh lai kha chuan kan awm ni, rinhlelh rual lohin, keiin a hnu lamah a bulah ni se eng mah ka sawi fiah leh tawh mang bawk si lo va; mahse, pawi ka tih loh bâkah sawi fiah tumna ka nei chuang lo bawk, a ngaih ngaihin lo ngai ve mai mai rawh se.

An pahniha min ziahpui thu a awm loh avàng chuan ka dah țha ta rih a, TV en pah chuan kan titi a, Lalrina chuan TV-a fakna lo langa model chanchin sawi chuan a țawng barh barh a, Jason-a erawh chu a ngawi deuh ràn reng thung. A hnu deuhah erawh fiamthu sawiin kan nui leh ta zâwk a. Nula fel an sawi ang deuhin ka be țha tawn ve ve a, Jason-a chu amah chauh chuan rawn lêng se zawng ka biak vak dâwn loh tehlul nèn, zanin erawh a vànnei lel lawl e. 

Lalrina a haw hmasa a, kawngkhàr thleng ka thlah a, a tlàn chhuah hnuah Jason-a chuan," Naktûkah eng nge tih i tum?" tiin min zâwt leh ta a," Eng atân?" ka'n lo ti zat bawk a.

"I hman dâwn leh dâwn loh sawi phawt la," a tih leh chuan," Ka hre rih lo," tiin ka sual ka chhuah lui ve tlat a, a thaw hak nghe nghe.

"Kan office-in Krismas urlâwk kan hmang dâwn a, gift exchange tùr min enpui la ka ti a," a tih chuan," Mi dang hruai mai rawh," ka lo ti ve thung a, ka suangtuahna mitthlaah chuan Hriatpuii a rawn lang hmasa ber bawk.

"Mi dang hruai tùr ka hre lo," a tih chuan ka lo ner deuh nak a, dâwt a sawi hreh miah lo a nih chu. Engtin nge tìmna tel map lova dâwt a sawi theih ni.

"I nu hruai mai rawh," ka tih chuan mit khap hauh lo hian min rawn en a," Hetiang thilah nute hruai chi em maw ni," a ti phawt a, chutah, nui hmêl deuh hlek pu chung hian," Nula hmêl țha tak hruai tùr awm reng laia nute hruai zawng, a tihchi nâng," dam dap hian a rawn ti leh a.

Nula hmêl țha. Kei min sawina chu ni lul lo ve, ni e, Hriatpuii a sawina a nih hi, ka lo inngaihbel theihna tùr a awm lo hrim hrim, ka hmêl a țha lo.

A haw hnuah min rawn text leh a, *Naktûkah chuan ka rawn lam ang che*  tih tê chauh hi a lo ni a, ka nui ringawt! Leh mai mai hian, nichîn khân 'aw' ka pawh hauh si lo va, engti tiha min rawn sàwm ngawt tum nge a nih le? He pa hi ka rilru leh thinlung zawng zawng chuan ka haw hauh lo, a hmaa kan awm anga inpawh leh innêl khân kan awm leh ngei ang tih pawh ka ring, amah hian a duh phawt chuan; mahse, ka en dàn hi ka ti danglam thei kher ang em? Țhian ang mai chuan ka en thei ngai tawh dâwn lo tih ka hre chiang a, hei tak hi ka thup hlen thei tak tak lo ang, hre lo tùra ka duh chuan kei hian ka hnim hnaih viau loh hi a ngai asin.

A tûkah chuan inah awmin chhuak mai thei tùra insiam ru deuha awmin a thãwm chu ka lo ngaichang ru reng a, ka rin aiin a rawn lang har leh si. Ka chhàn lêt loh vàng khân min rawn ring ngam lo leh si tihna em ni zâwk? Chhùn dâr 12 a rîk pawh chuan a la rawn lang ta chuang lo, hmm... a thil sawiah pawh a ding nghet leh tawh lo a nih hi, hetiang mipa hi alawm nêp ka tih chu.

Thinur ru deuh țùng chuan ka inthlâk leh țaih țaih a, rawn kal leh pawh ni se ka chhuahpui hauh lo ang. Ka inthlâk vek tawh, ka inha nawn leh peih tawh teuh lo mai.

Ka phone a rawn rîka caller id-a a hming ka hmuh pawh chuan ka thinur laklawh chuan chhàn pawh ka tum lo, a ring ral țhak ta rêng a. A rawn rîk nawn leh chuan," Eng nge?" ka ti vîn hlar a. Eng nge ka thinrim ve viau ringawt ni. A bula ka awma ka țawngkam hman dàn leh tuna ka rilru inpèrsanzia hi chu mak tak hi a ni ringawt.

"Tluangpuii maw? Aw, hei phone neitu hian a be duh che a," hmeichhe aw sîn lam deuhin a rawn tih chuan," Hmeichhia bawk maw? Hmm, kalpui tùr chu i hmuh khawp hi maw?" ti rilru nauh nauhin ka hmet tàwp zui nghâl daih a. Ka bulah awm na se chuan ka kêk nawk nawk duh hial ang, tuna ka rilruah angah hi chuan.

Phone chu a rawn ri leh a, ka en reng a, ka rîk tàwptîr leh țhak. Ka duhnaah hi chuan ka sual thiam ve thei viau ka tih tawh kha; mahse, a beidawng duh bîk lo, a rawn ri leh tho.

"Eng nge ni leh ta?!!" Thinrim zeta ka tih chuan Jason-a aw ngei maiin dam dapa pawi a tih thu rawn sawi hmasa berin min rawn lam a tumna lama a chêt sual thu leh tuna damdawi ina a awm mêk thu a rawn sawi tâkah chuan ka meng phâwk nasa ta mai! Hlauhthàwnna avàngin ka thin chu a rawn phu rang nghâl dup dup bawk.

"Engtin nge a nih theih!!" ka ti teh ringawt a, ani erawh chuan," Ka na lo a nia, ka țha. Ka nute pawh ka la hrilh lo a, ka rawn hrilh hmasa ber che a ni," a rawn ti leh a, ka thâ a khùr dar dar a, min țhâwng deuh thut bawk nèn, ka buai chîâi titih dér mai. Ani hian thu a khuh mai mai a ni ang, a na deuh ang a, zai hial ngaiin a awm pawh a ni maithei a ni, ngaihtuahna țha lo a rawn lût zut zut mai.

"I țha tak tak em?! I na lo tak tak maw?!!" ka aw pawh chu ka thunun hlei thei lo, a khùr dar dar tho. Ka kut lehlamin phone ka chelh a, lehlamin ka âwm ka nem tâwk tâwk a, ka thinphu rànzia chu!

*HUN A RAWN INHER ZÊL A, THU DIK HI A NGÉT THEIH MIAU LOH AVÀNGIN RAWN INLAILAN HUN A THLENG NGEI NGEI ȚHÌN*