☆SUMRISANG☆ - BONUS

☆SUMRISANG☆ - Bonus By Dingdi Pachuau

In ka thlen hnua ka phone ka en chuan Jason-a'n a lo switch-off daih a ni tih ka hre ta chauh a, ka han on fel chiah chu message tone a rawn ri nghâl ral ral a, ka en a, țhiante message deuh vek, U Chda message pawh a lo tel bawk. Min ngaihtuah hlawm viau a ni tih ka hriat chuan ka inthiam lo ru viau a, eng dang mah ngaihtuah lo khân kei lah kha ka chhuak nghâl daih bawk si a, min ngaihtuah lutuk ang tihte chu lo ngaihtuah ve tal àwm.

Mut hmain group-ah thil awm dàn chu ka sawi chiang a, U Chda erawh nakinah biain thil thlengah khân a inthiam lohna chhan tùr a awm loh thu ka la hrilh ngei ang.

A hnua țhiante hnên ațanga ka hriat dànin Jason-a hnekpa kha a awm dàn avàngin U Chda chuan a hau hrep a, haw nghâl tùrin a ti bawk a. Ani lah chu a lo lungawi lo nasa niin, hnek a tawh avàng chuan a inhrosa zui kûk kûk a; mahse, a țhiante, a rawn kalpuite zînga pakhat a lo fel hlauh zâwk a, a hawpui ta thuai a ni, chuti chu ni lo phei se chuan ka țhian mipateho chuan an khawih hrep ngei ang.

Chumi zàna thil thleng chuan min nghawng lo emaw ka tih laiin rilru lamah min lo nghawng viau a lo ni, ka incheina ka thlâk dâwrh a, ka chàwn lang theiin pawnfèn emaw kekawr emaw ka ha ngai ta lo, ka țhiante leh ka chhûngte tak tak ni lo birthday tih vêlah chuan kal pawh ka tum tawh miah lo bawk. Chhuah nuam ti êm êm reng leh chhuak tùra inpeih at reng mai țhìn kha ka ni a; mahse, tunah hi chuan ka țhiante tak tak bulah lo chuan chhuah pawh ka duh tawh lo, ni tin deuhthawa ka chhuah țhin avàngin hun ãwl ka neih ve dêk dêk tawh chuan inah awm ka duh a, thil țûl takah a nih loh phei chuan ka chhuak ta meuh lo bawk.

Ka nu chuan mak min ti deuh a ni ang," In hi i ngaina thar ta riau mai," min ti nghe nghe a, ka pa chuan," A țha daih zâwk, hmeichhia chu ina awm tam hi a țha, nula lêng chhuak reng nih te hi a mawi miah lo a nia," a lo ti ve thung a, kei chuan," Chuti, a hma khân ka chhuak peih sia, mawi lo i lo ti viau ang a? Mahse, min hau ngai bawk si lo," ka lo ti ve a, ka pa chuan," Aw nang chu ka naute duat leh fel liak liak kha i nia, ka hau phal hleinem che, ka duat hliau hliau, keh thei dawma ka dawm che kha i ni tlat a," a lo ti dam thluam a, a la nui sûng zui bawk a.

"Nula a ni ve tawh a, khatiang țawngkam naupangchhia deuh kha hmang tawh lo teh, mite'n an lo hre rêu rêu ang e," ka nu chuan a lo ti hlar a, engah mah ngai lo tih hriat tak hian ka pa chu a nui hawk hawk a," Nang pawh ka nupui ka duat liak liak ve tho," tiin ka lam a rawn hawi a," Bawihte, i nu hian ka duatna che țawngkam kha a lo thîk deuh a ni thei ang em? Ani pawh hi nang tluk zeta ka duat leh keh thei dawma ka dawm ve țhin tho a nia, chutiangin i u pawh, ka nupui leh fanaute hi ka duatin ka hmangaih êm êm vek che u a ni, nangni aia hlû he khawvêlah hian ka tân an awm thei ngai lo," thu tak deuh zâwk hian a rawn ti ta duah a.

Ka inchei dàn ka thlâk viau ka tih tawh kha, taksa lang tam lo thei ang ber hlîrin ka inthuam a, ngaina lo țan deuh hlek tawh mah ila ka thuamhnaw hlui chu ka hrût chho leh lo thei lo a ni. Kekawrtlâwn ka ha chho leh ta ngar ngar a, kawrah pawh bân bùl tê chu ka duh lo, a bân a tluan lo a nih pawhin ka kiu khuh deuh zêl ka ha a, taksa lo tam lo thei ang ber ka duh a ni mai. 

"Hmuh i hrehawm lek lek țhìn, khua a lum deuh phei hi chuan. Hlên hlûn mai. Mawi lo ni lo se, damdawi ti țhìn leh taksaa thil mawi lo eng emaw thup duh vànga inha tlâwn zuar țhinte pawh i ang thei dâwn dâwn alawm!" ka uin a tih chuan ka nui mai a, ka țhiante pahnih Fiona-i leh Lawmpuii pawhin min fiam zauh zauh tho; mahse, engah vak ka ngai chuang lo, ka nuihsan mai mai, an duh duh sawi mai mai teh se.

Lalrina leh Jason-a erawh chuan min hre thiam a ni chêk ang chu, min fiam chu sawi loh min zilhin min fuih sauh sauh țhìn. Jason-a hi chu ka hmu reng reng thei a, min duatin farnu ang chiaha min en a ni bawk a, thil thleng kha ka thiam loh a nih loh thu leh pawnfèn ka fèn vàng a ni lo tih chu min hrilh fo a, ka rilru a nawm theih nâna ti pawh a ni thei tho. Lalrina pawhin kan inbiak leh kan inhmuh nikhua chânga Lawmpuiite'n min fiamte hian min lo țan vatin ka duh duh dàna ka inthuam theih thu leh ka inthuamna zawng zawng chu inhmeh min tih vek thu a lo sawi vat țhìn. 

Inrinniah a rawn lêng ve teh mial a, hlim takin ka lo chiauau vat a, ka rilru ka hriat chian tawh êm avàng leh kan inkârah inngaihzàwnna lam a awm tawh lo tih ka hriat chian êm avànga hlim taka lo chhàwn vat pawh ka ni rêng a. Ani meuh a rawn lêng ve a nia, a ti țha êm asin. 

Kan titi barh barh a, thil chi hrang hrang sawiin subject pakhat ațangin a dangah kan kai leh dâwrh dâwrh zël a, kan kiangah ka nu pawh awm ve rengin ani pawh kan titi kotlângah chuan a lo inrawlh ve zauh zauh bawk. Chhùn thingpui in hun vêlah chuan," Hna i thawh ve tâk ațang hian hun ãwl i nei lovin chhuahna hun i nei khât tawh si a, vawiin chu thil ei tùrin kan chhuak dâwn em ni ang? Kan chhuak khât tawh êm mai, i duh ber ka treat ang che," a tih chuan ka nu chuan," Ni e, han chhuak teh tak u. Bawihi, kei pawh eng emaw tak chu min rawn hawn pah la aw, i pa nèna kan ei tùr a ni dâwn a, ei khawp ve tâwk tak i lo hàwn dâwn nia," a lo ti vat a,  Lalrina min sàwmna chu zahawm ka tih avàng leh ka nuin min tirh pah nghâl zat avàng chuan hnial ka tum bîk lo, ka nu pawisa min pêk keng chuan kan chhuak dùn ta a. Kein kan kal a, kan kalna tùr hi a hla fahran lo va, bike ken chuan dahna tùr a buaithlâk ang kan ti a ni.  

He dàwrah hian kan chàwl dùn ve fo tawh a, ka duh zâwng pawh a hre viau tawh bawk a, min order-sak nghâl mai rêng a ni. Mahse, a hriat loh tâk chu kan ințhen hnu ațang kha chuan tuna min order-sak ang hi ka ei ngai tawh lo tih chu a ni, o order tawh avàng chuan ka hrilh hre duh ta bîk lo va. 

Ei tùr chu a lo thleng a, kan ei dùn nghâl mawlh mawlh a, ei ngai tawh lo mah ila a tuina erawh a lo la kiam chuang lo a lo nih hi. Ka nute tân pawh ka pack-tîr ang, a tui ve êm asin. A tìrah kha chuan amah ka runluih duh vàng leh ka thin a tih rim êm avàngin leh kan pahniha kan chhuah dun apianga ka ei țhin a nih avàngin amah ngaihtuah chhuah loh nân ka ei duh ta lo vêl kha a ni a,   a hun lai kha chuan ho lo ve tak mai kha a ni a, tunah hi chuan a ho ta riau ka ti, a naupanchhiatthlâk.

Kan ei zawha ka nute ei tùr ka lei fel hnu chuan kan chhuak zui nghâl a, kal pah chuan fiamthu a sawi a, ka lo nui leh sak sak țhìn; mahse, kal paha ka hawi kualna lama ka thil hmuh thut avàng chuan ka nui hmêl chu a reh riai riai hialin ka ring. Jason-a leh Hriatpuii. An inhmeh dùn lehpek hlê a ni. Keimahni ang deuh chiahin ani pawh a țawng a, Hriatpuii a lo nui ve thung, an inen a, an nui dùn leh a. Min rawn hmuh ka hlau ru viau nain an awm dàn avàng chuan ka ring leh chiah lo deuh, an lo la inhmu ve reng reng țhìn a nih dâwn hi tiin ka ngaihtuah a. Ni e, Jason-a hi ka bialpa der tùra ka sàwm kha a nia, a der mai a ni, chu pawh ka țhiante bulah chauh. Nula a duh zâwng a hmuh theih lohna chhan tùr a awm lo.

Lalrina ka kalpui a ni tih chu ka hre chhuak thut a, a thu sawiah ka beng dawhin nuihza deuh ni àwm tak hian ka nui chhuak hawk hawk a, ka duh dàn takah chuan Jason-ate chuan min rawn hmu se ka ti leh tawh zâwk!