☆SUMRISANG☆ - 20 By Dingdi Pachuau

☆SUMRISANG☆ - 20 By Dingdi Pachuau

Damdawi inah chuan ka va kalchilh êm lo va; mahse, ina a haw hnuah zànah ka nute nèn kan va kan a, Popoa pawhin min lo hre chiang tawh lo a ni ang, min lo ngur dâwn dâwn a; mahse, Pa Dinga'n a han hau țhat a, a reh ve mai, a hnuah erawh min hre leh lutuk a, min rawn nûl ta reng zâwk a.

Jason-a chu a insawi nat loh ang aiin ka va hmu na daih a!! A kut dinglam chu a lo intuam lûk a, a lu pawh tuam niin a khûp pawh a pilh duai a, a bãi saih saih nghe nghe. A chétsual dàn chu Nu Sangpuii chuan kan hriat theih tùr chuan a lo sawi mawlh mawlh a, mi chêtsual zâr a zo vàng a lo ni nghe nghe a, a vànduai khawp mai; mahse, a nunna atâna hlauhawm tak a ni lo hlauh záwk a, vànduai vànnei a nih deuh chu; mahse, ka rin aiin a lo na tho tho.

A room ațanga puitlingho an inthiar fihlìm hnu chuan kei chu ka la awm reng a, khuma a țhu chu a taksa hmun hrang hrang an tuamsak leh a khûp pilhte chu ka en kual sek a," Khati khân min en reng suh, a na lo ka tih tawh kha," a rawn ti chhuak nghe nghe a, kei erawh chuan," A khawi lai kha nge nâ ber?" ka lo ti ve thung a, ani chuan," A na êm êm hlawm lo, ka khûp erawh hi chu a thîp ve deuh," a ti a, a ni ngêi ang, a pilh sen nasa êm mai.

"Inthiar a hrehawm dâwn a nih kha," ka ti leh a, a lo nui hawk a," Ber kher chuan," a ti zui sup a. A khuma țhut ve pah chuan," Zanin chu, mut a har ve det dâwn a nih kha tiraw? Engati nge damdawi ina awm rih i tih mai loh le? Zàn mut tawh hnuah eng emaw pawh thleng thut thei a nia," ka han ti leh barh barh a, hetiangte chuan damdawi inah awm rih se a țha daih zâwk ka ti. Nâ a tih deuh chãngin nurse-te'n nachhâwknain an jection thei mai ang a, inah chuan tuin nge jection ta ang? Doctor han ràwn mai tùr lah an vâng dáwn bawk si.

"Chu, min ngaihtuah viau tihna a ni maw? Hriat a nuam hlê mai, nâ han tawrh meuh chuan min ngaihtuah ve ta a nia," a lo ti duh chauh a, melh rum nghâlin," A ninawm! Khatiang zâwng khân ka sawi lo aw," ka ti tê tê a, sawi zawm lehin," Min rawn hrilh tirha ka hlauhthàwnzia kha, ka thâ pawh a khùr chhe vek alawm, i thi mai ang tih ka lo ngaihtuah a," ka ti leh a, damdawi ina ka kal duh loh chhan pawh kha a lo na viau ang a, ka țah khum mai ang tih ka hlauh vàng a nia, ka inthunun thei lo ve bawk si a, mualpho chiam kha a hlauhawm ve tlat.

"A pawi ngawt mai," a lo ti sup a, kei chuan," Ni e; mahse, i vànnei hlauh a, chutih rual chuan ina i awm deuh rèn ráwn chu a ngai rih dâwn a nih hi; mahse, Urlãwk zàn tih vêl hmang hman chuan i dam chiang hman tho ang, lungngai miah suh," tiin ka han hnèm ve a. Ani lah chuan," Ni tin min rawn kan la, ka dam vat vat mai ang," a lo ti thung a.

"Ve a che! Rawn kantu tùr che chu i neih țhat viau kha, zanin pawh hian hmuh ka lo inring asin, a rawn kal tawh em ni zâwk?" ka han ti a, ani chuan," Tu chu maw? Hei i lo kal a, a tâwk viau, dam pawh ka dam sawt nghe nghein ka hria, ni tin i theih loh pawhin zan tin tal chu rawn kal ziah tak tak ang che," a lo ti leh mai a, chutianga Hriatpuii ka tih chhan ber a'n hre lo der kual vêl chu ka ngei, a hre reng tih ka hre ve kar bawk si a.

A kut tuam lûk chu ka en kual vêl a, dìm tê hian ka khawihsak chhin nghe nghe. Ka dìm viau emaw ka tih lai chuan nâ tih hmêl tak hian a rawn 'aiah' deuh tuarh a, ka phu zawk mai. Kûnin a kut na lo lam chu a hûm ruh a, ka lo tawk fuh na deuh a ni ngei mai, hrehawm ka ti a, ka inthiam lo lutuk chuan sawi mai tùr pawh ka hre lo, ka ngawi reng a, ka inthiam lo leh hrehawm ti chu ka mittui a parawl kuang nghe nghe; mahse, a rawn dâk chhuak a, a nui sûng hmêl ka hmuh takah chuan min tih der tih hriain a malpuiah ka chumsak sawk a, ka mittui chu hru hulin," I va sual tak! Ka tawk nâ che emaw ka ti hman alawm, mãwl leh lutuk mai!" ka ti zui bawrh bawrh a.

A sawi ang deuh tak tak chuan ka ngaihtuah ru ve tho bawk si a, a tûkah pawh chuan ka va kan leh a, han țhàwn deuh dawt ka tum a nia; mahse, a bul chêta Hriatpuii lo țhu ka hmuh chuan thãwm dìm deuh tho chuan ka tawlh lêt a. Nu Sangpuii lo kal, Jason-a room-a luh tum nèn chuan kan insu lo chauh a ni, ani lah chuan ka tawlh lêt a ni tih hre hauh lo chuan," Khawnge i kal dâwn? I lo thleng chauh emaw tih a? Hei, in tùr ka lo keng nghâl asin," a ti zui a, kawng a inhawng reng bawk nèn, a țawng chu Jason-ate chuan an hre ngei ngei ang chu.

Ka awm chhûng chuan ka țawng mang lo a, ei tùr ka kensak ve pawh chu ka pe lo țêp tak tak a ni, Hriatpuii'n a lo kensak ve nual bawk si a, kei ai thlâwt chuan a leisak tam zâwk bawk nèn, nuam lo ka ti ru khawp a; mahse, kensak ve ni na nâ nâ, han hawn leh daih pawh chu.

Nu Sangpuii leh Hriatpuii chu an titi bawrh bawrh a, a chângin an nui leh ar ar bawk a, kei chuan lo nuih tùr ka hre ve lo. Ka ipik țûn ni maiin ka hre zâwk, hetiang hi a ni ang tih chu lo hre láwk ni ngat ila chuan ka kan lo chiang ngawt ang chu!

Ka phone a rawn rîk avàng chuan ka tho ta vat a, ka țawng rî an hriat vak loh nân tiin ka kal sawn deuh bawk a, Lalrina chuan," Rawn tlawh zawk che ka tum a nia, i lo awm lo va," a rawn ti a, kei chuan," A nih chu, a va pawi ve aw... ka chhuak lawk maw le, khawnge tunah i awm?" ka ti vat a, ani chuan," Jaz-ate dàwrah, thil en tùr ka neih bâkah hmuh ka duh tel bawk a," a rawn ti a," A nih tak chu, i rei lutuk dâwn chuang em ni? I haw lamah min rawn tlawh haw leh la, chumi hunah chuan ka lo awm hman tawhin ka ring," ka han ti leh zat zat a, ani pawh chuan min rawn tlawh hàwn tùr thu chu sawi vein kan inbe tàwp zui ta thuai a.

Ka ding deuh rèn râwn phawt a, a hnua ka luh leh chuan Hriatpuii chu haw tumin a lo ding uaih tawh a. Nu Sangpuii chuan," Lêng reng thei la  țha tùr hi a nia; mahse, i rawn lang thei hrim hrim hi a làwmawm, i hman veleh lo lêng leh rawh aw," tiin a thlah a, ani pawh chuan a lèn leh vat tùr thu sawiin Nu Sangpuii nèn chuan an chhuak zui ta nghâl a.

"Kei pawh ka'n haw ve nghâl mai--" ka la sawi zawh hma hma chuan," A theih rih loh! Min khawngaih lo'm ni? Tlangvâl apumpa, eng mah ti thei lo va ina han awm tâk reng mai chuh!" a lo ti sup a, a rûk tak chuan ka khawngaih ve deuh a, sawi mai tùr pawh ka hre lo nghe nghe. Sawi tùr ngaihtuah chuan ka ngawi deuh reng phawt a, a hnu deuhah chuan amah vêk chuan," La haw rih suh, ka ngai che alawm," a rawn ti leh sup a.

"Daw peih! Khatia inlâk pangchan vël kha a ngai lo," tiin ka chek hlak hlak a," A awm laiin i zum dûk a, țîk pawh i ti ngam lo, i ngaih te chuan chelh rih mai ta che, pà lo leh lutuk mai!" ka ti leh zat zat a, a ngaih ka ni lo tih ka hre chiang ve êm bawk a ni.

"Ka rilru chhûngril hi i hre chiang lo a ni tiraw? Ka han hrilh ang che, ka ngaih ber chu tunah ka bulah i awm mêk a; mahse, chuti chung chung pawh chuan ka la ngai tho che a ni," a ti dam dap a, hmun leh hmuna fiamthu inthawh khumte chu a! Ka nui ta hak a, ner deuh nâng paha ka va en chuan ani chuan nui hmêl pu hauh lo hian min lo en kar thung a. 

"Ni e, ka rilru dik tak hrilh hre tùr che khân ka lo pà tâwk lo a ni maithei; mahse, tunah hi chuan khatiang kha ka ni tawh lo, ka duh che a ni tih thu pawh hi ka zêp tawh lo ang. Ka duh che a, chuan, hmeichhe dang rêng rêng duh ka nei hauh lo," min en ràn chung hian chiang fek fawk hian a rawn ti ta kalh kalh a.

A thil sawi chu a ti tak bawk si a, sawi mai tùr hre lo chuan mak ti takin ka en reng ringawt a, chutah, ka nui leh ringawt a; mahse, eng nge ka nuihna chhan pawh chu ka hre chuang lo, ka hamhaih lutuk vàng a nih ka ring ta ber. A thil sawi chuan min ti lãwm viau tùr a nih laiin ka thin a ti phu su dup dup a, engtin emaw tak hian awm nawm lohna riau ka nei, ka hlauthãwng deuh em ni aw ka ti a; mahse, engah ngawt nge ka hlauhthàwn ang ka ti leh bawk a.

"I bialpa hlui nèn--" a tih laiin room pâwn ațang chuan Nu Sangpuii chuan," In ril a lo țâm tawh em? Thingpui leh a hmeh tui tâwk ka rawn keng a nia," a rawn ti làng láng a, amah pawh chu rawn lang zui nghâlin tray-in thingpui no hnih a rawn chawi a, chumi chungah chuan tray tê deuh hlekah chhang tui hmèl zet hi a rawn chhuang tel bawk a, Jason-a thil min hrilh vànga ka hamhaih vàngin lo puih nachâng ka lo hre lawk lo zui a, dawhkàn chunga a nghah dâwn chiah chuan tho chhuak hluaiin ka va pui a, tray tê chu châwi kãngin ka che chhe zui ta, tray erawh ka thlauh êm lo nain chhang erawh dawhkànah chuan ka ti baw ta vek mai. Ka zahzia mai chuh!! 

"Awi leh!! Sorry lutuk!" ti buai nuaiin chhang bua chu ka chhar zui nghál mawlh mawlh a, chhuata a tla thla lo hlauh chu a tihzia tak tak a ni! Nu Sangpuii chuan ka zah viau a hlau a ni ang, min fiam zui a," Mo thar che sual ang ni ta la, i zak àwm mang e," tiin a nui hak hak a, Jason-a pawh chuan," Ka rilrua lo awm ve chiah i rawn sawi," a lo ti ve bawk a, an thil sawi chuan min ti zak lehzual sawt, za lo zetin ka țhen ka țhen ringawt mai a ni.

Nu Sangpuii chu la awm ve reng se ka tih tehlul nèn, a chhuak leh nghâl daih si a, hamhaih leh zak ru takin ka hmui ka pet ka pet a, Jason-a chuan," Thingpui leh a hmeh kha min rawn pe ve dâwn em ni ang? Damlo ka ni sia," a rawn ti a, ka en vat a; mahse, ka hawi sawn leh rang khawp mai. Tuna min ena a mit men dàn kha, khatiang khân min la en ngai hauh lo tih ka hria.

Thingpui ka pêk lai pawh chuan min lo la en reng tih ka hriat avàngin a mitah ka en lêt ve duh hauh lo va, ka che vêl lah chu ka khawr êm êm zui a, min en zãm vek ti ila a dik ber ang chu.

"I va ngawichawi ta ve a? A hma ang khân țawng leh bawrh bawrh rawh, țawng bawrh bawrh hi i inhmeh bîk, i ta liau liau a ni," a rawn tih chuan ka hmui ka ti pawrh a, en duh chuang hauh lo hian," Sawi tùr ka hre lo, chuan, min en reng lo khân nangmah kha țawng rawh," ka lo ti ve thung a, thingpui chu ka dût hlak a.

A lo nui hawk a," Min en miah lo pawhin i lo hre thei a! I hmêl țha êm vei a nih kha. Khaw maw, ka bulah hian rawn țhu teh, min hlat chuan ka ngai zual che a nia," a rawn tih leh chuan," A ho mai mai, thingpui kha in mai mai rawh," ka ti tlat a, țhu duh lovin dawhkàn bulah chuan ka ding reng a.

"Ka thu i âwih dâwn lo maw?"

Lalrina rêng rêng ka hrechang tawh hauh lo, kan inah a rawn pêng haw dâwn tih pawh ka mangnghilh vek!! Haw ka sawi rîk deuh ațang chuan Jason-a chuan phal lovin a kut na lo lam chuan nghet zeta ka kuta min chelhin min thlah duh teh tlat lo va," Ka chelh reng dâwn, min hawsan ka la phal lo," a ti tlat a, a nu rawn kal lai pawhin min thlah duh chuang lo.

"Zanriah hetah ei rawh aw, chaw ka chhum kêp che a nia," Nu Sangpuii'n a tih chuan," Aw, ei rawh se, a lo ei khât tawh lutuk!" tiin ka chhàn hma chuan min lo chhàn khalh a, mak tiin ka melh hau ringawt! A lo țawng ran theihzia hi mak ka ti a ni.

"I nu pawh ka hrilh tawh kha," a nuin a tih leh chuan," Chutiang ringawt te chu..." ka ti a, sawi zawm leh dàn tùr pawh ka hre lo, ka riat nawi ta vêl mai mai a. A nu chhuah hnu chuan," Min thlah tawh teh, ka haw lo ang," ka han ti a, ani chuan," Tak tak?? A nih chuan, ka fâwp thei che ang em?" a rawn ti ta mai! Phâwk zeta en hau pah hian," Jason..!!" ka ti țhat a.

"Yes..???"

Ka inrin hman hma chuan a lamah min pawt ta dâwrh mai a, ka delh chiang teh e. A kut na lam ka țhâm tel zuiin ka hre lehnghâl a," Jason?" hlauthãwng zeta ka tih leh chuan ka tukkhuma dawm pah hian min fâwp zui nghâl ngàwng ngáwng a, a chét dànin min barakhaih êm avàng chuan chêt sawn mai ngaihna pawh ka hre lo va, ka inngaihtuah chhuah theih meuh chuan duhthawh takin kan lo infâwp mawlh mawlh tawh a!

A âwma na lo têa ka nem chuan," A rei tawh lo ang," ti supin min fâwp leh rih a, kei chuan," I nuin min rawn hmu hlauh ang e," ka ti ve thung a, ka inngaihtuah harh ve tawh a, kan pahnih chauhin inah hian kan awm lo tih kan hriat a ngai, a nu pawh rawn lût thut thei reng a ni, min rawn phâwk a nih hlauh chuan...

Ka hmui a rawn seh fawh tâkah chuan," A naaa..." ka ti vak a, min thlah dul deuhin," Thil dang i ngaihtuah vàng a nih kha," a ti phawt a, min fâwp leh zauhin," I zãm lutuk tawh lo ang chu maw," a ti leh a, a nui deuh suk zui bawk a.

A ni tak tak alawm. A chhan ka hre mai bîk lo, tleirãwl ngaihzâwng nei thar hlim ang maiin ka zah thar khawp mai a, ka làiin ka zãm êm êm mai a ni. A nu bulah ni se ka la che chhe zui a, kha pawh kha ka zàm vàng a ni tih ka hria. Dik tak chuan zanriah kîlho pawh chu ka huphurh zo vek tawh, ka chêt chhiat kha chu thuhran, an fapa nèn kan awm dàn hi han hre hlauh phei se...

Zanriah ei kham hnuah pawh ka haw nghâl mai lo, haw a phal lo tlat a," Car hi i khalh haw ang a, i thleng thuai dâwn tho alawm," a ti leh tlat a, kea ka haw chu a rem ti bîk hauh lo. A hma kha chuan hmeichhe car khalh kha țha a ti vak lo kha niin ka hre sia, tunah lêm a phal leh ta viau si.

"I thlen veleh min rawn hrilh rawh aw, i thleng tluang a ni tih ka hriat hma loh chuan ka ngaihtuah reng dâwn si che a," a tih chuan ka bu nghat a, a room ațanga kan chhuah dâwn chuan duhthawh zet hian min han fâwp leh rih a, kei pawhin ka hnial bîk miah nâng.

In ka thlena ka phone ka han en chuan a êng thei ta miah lo mai! Ka han hmet kual a, a êng chuang lo. Ka hmeh kual ka hmeh kual hnu chuan a lo in-switch off daih tih ka hre chiah. Engtik laiin nge chutiang chuan a lo awm ni. Ka han on a, message a rawn lût nghâl zut zut a, ka han en ve thuak thuak a, Lalrina message ka hmuh veleh chuan ka chek ta hlak a. A va zia lo tak! Min lo biak a tum ngei àwm si a, vawiin tlaiah lah inah ka haw ta hauh si lo. Ka lo mangnghilh chiang hlê a a ni.

Message ka en lai chuan Jason-a phone call a rawn kal a, ka han chhàn chuan," Min rawn be dâwn lo a ni maw?" a rawn ti nghâl a," Biak che ka lo tum chiah a," ka ti zui ve zat thung. Ani hian ka phone hi a lo switch off daih a ni zâwk lo ang maw? Ka battery a la tam viau si a, ka phone ni se mahnia in-switch off tùrin a la tar viau bîk hek lo.

"Ka phone hi i lo switch off a ni maw?" ka ti leh a, ani lah chuan zêp pawh tum chuang lo chuan," Off ang chu, miin an rawn biak buai che ka duh lo a nih kha," a rawn ti ta mai rêng a. La duh tâwk lo chuan," I ex khân a rawn biak leh che ka duh lo a nih kha, mipa dangin an biak che pawh ka phal lo," a rawn tih zawm leh a.

"Inlâk strict tum nghâl ngawt suh, mipa țhian lah ka nei țeuh a, kan inbiak i phal lo ngawt thei lo," ka ti ve thung a, inlâk strict tum nghâl êm êm ringawt mai! Ani pawh a hmêl hriat hmeichhiate biak phal lo ngawt ila a duh dâwn bîk em ni? 

"I ex kha, kha pa kha i biak ka duh lo, a en dàn che kha ka duh lo a ni," a rawn tih leh chuan," A va ninawm! I thîkthu kha rawn ti chhe viau suh, ka lêrh viau loh hi," ka ti ve leh a, a ninawm alawm, Hriatpuii be lo tùrin ka ti bîk tawp si lo.

"I lêrh lo tih ka hria e. A, inhnial lo teh ang, naktûkah rawn lêng leh la aw? I rawn lêng leh ang tiraw?" a rawn ti daih a, thâwk ka la hawk phawt a," Vawiinah nilêngin ka lo lêng tawh a, chu mai ni lovin zàn dâr 9 thleng ka awm bawk tih kha hria la," ka han ti a, ani lah chuan," Vawiin kha chu hun kal tawh a nih kha," a rawn ti leh daih a.

Ni tin chuan ka kan bîk lo nain ka kan reng reng tho a, a langah hi chuan ka han vîn hlak hlak na a, ka rilru chhûngrilah erawh ka hlim viau thung. Ka duh êm êm khân min duh lêt ve tlat tawh a, a laka inlâk luhlul lam kha chu a lang tawh lo! Min en dàn mawlh hi nuam ka ti, a lakah hi chuan hmeichhe nu hnãp ni maiin ka inhria a, hmeichhia ngawih ngawih nia inhriatna min neihtîr bâkah mipain hmeichhia a en dàn tùr dik takin min en ni maiin ka hre bawk. Chuan, ka laka a pangchan châng hian nuam ka ti tlat pek a nih chu, ka hmeichhiatpui dangte hian nuam ti ve hlawm tak ang maw.

*AN HRIAT CHIN TÙR BÂK BÂK HRILH HRIAT KHER A NGAI LO, I MIMAL ZAHAWMNA VAWNG ȚHA RAWH*