☆SUMRISANG☆ - 21 By Dingdi Pachuau

☆SUMRISANG☆ - 21 By Dingdi Pachuau

Kan chhuah dâwn țêpah Mamuana, Fiona-i leh Hazel-i an rawn lût ve teh tlat a, min rawn hmuh chuan Fiona-i chuan," Nangni nupa chu, in chhuak ve thei tawh a ni maw? A va làwmawm ve!" tiin a rawn phûl nghâl bawrh bawrh a, kei chuan ka kuta lo zâpin," Insûm, zahngai! Țawng zàwi ve deuh la," ka lo ti vat a, kan bul chiaha dawhkàn ruak chu an rawn kîl ve zui a, Hazel-i chuan," Jason-a a dam ve tawh bawk a, Urlâwk zàn lam pawh a sawi hot viau theih tawh ang chu," nui chung hian a lo ti a.

Kal hmasa zâwk leh ei zo hmasa ta chu kan chhuak hmasa ta zâwk a, a kal khàt tawh avàngin kan chhuah dâwn khân lìrthei ken a phal tlat si lo va, muangchângin kan paidal ta a ni. Ka la ngaihtuah deuh avàngin hmun dang dangah pawh ka kal kualpui duh lo va, hawpui leh vat ka tum a ni.

A bâna chelha kal dun chu ka duh viau a, ka țhiante ni lo ka hmêl hriat țhate'n min hmuh ka hlauh bawk si avàngin chelh êm ngam lovin amah nghèng tãlh tãlh thei tùr chuan ka kal thung a, rilru a hlim veng veng a, a țawng châng chuan duh tak hian ka en chho leh hau țhìn a, ka lung hi a âwi ve êm a ni!

"Jason..?" tia hmeichhe aw kan hriat chuan a bânah ka chelhsak vat a, a taksa si chêt chuan ka ding nghâl bawk, ani hi chuan kan induh tawn a ni tih hre tawh teh se, kan inkâra lo inrawlh tum lo bawk se...

"I chhuak thei tawh maw? A va làwmawm ve! Hun pawimawh laiin damin i chhuak thei dâwn a, a tihzia hlê a ni," a rawn tih chuan Jason-a chuan," Ni e, ka dam tawh viau mai. Khawiah nge i kal a?" tiin a be zui ve ta nghâl a. A inchei nalh lehpek hlê a ni. Hriatpuii bulah hian ka inhmu tê chem chem ziah lehnghâl a, ka duh lo tak tak a ni. A chhe lo êm êm reng hi kei chuan hmuh nuam ka ti miah lo, ka dinhmun a ti derthãwng pha thei tlat tih ka ngaihtuah pha ve miau alawm, mi ã ka ni bîk lo.

"Ka pateate inah kal ka tum a, kan dàwr ka rawn chhuahsan chiah a nih chu. I dam tawh bawk sia, eng emaw sawipui che ka duh, sawi tùr a tam tawh si.. Zaninah ka rawn bia ang che aw, i hman ang tiraw?" nui deuh sânga a tih chuan nghet deuh zâwk hian a bân chu ka chelhsak salh a, ka thîkin ka ngaih a țha lo nghâl êm êm ringawt. Eng atân nge a rawn biak dâwn? Eng nge an sawi ang? An inbe rei ang em? Urlâwk zàn hun hmanpui atân a sâwm dâwn tihna em ni? Thil tam tak ka lo ngaihtuah nghâl zung zung mai.

"Hman lohna tùr a awm hleinem," tiin Jason-a chuan a chhâng a, chuti anga a chhâng chu ka ngei ru tak tak! Anmahni pawh en duh lo chuan kan sîra nepnâwi dàwr lam chu ka en daih a, ka hmu tak tak chuang hauh lo, ka rilru erawh ka bula mite țawngah chauh a awm

"A țhat nasat chu. Ka hmanhmawh angreng sia, khawlai a ni bawk nèn, ka kalsan rih mai ang che u, zanin chu aw," tiin Hriatpuii chu a kal zui ta nghâl a, a kal veleh chuan Jason-a chu ka en chho vat a, ka en chhan pawh Hriatpuii kal ta chu a thlìr zui leh zui loh ka hmuh duh vàng a nia, a thlîr zawk a, min rawn en chhukin a nui suk a.

"I lo thîk deuh a ni maw?" a tih chuan," Teuh lo mai! Thîkna chhan tùr ka nei lo, ni lo'm ni?" ka lo ti ve zaih a, a mit meng erawh chiang takin ka en ràn reng a. Ani chu a bu nghat a, min en reng chung chuan," Dik chiah! Ka bula kal hi ka duh ber chu a nia," a lo ti sap a, ka kut chu la kãngin a han fâwp pah zoh a, a thu sawi leh a chêt dàn chuan min ti lãwm bawk a ni ang, ka nui nghâl var var a.

Kan ina min thlah haw a tum chu ka duh lo va," I kal chak thei lo zâwk, ka thlah zâwk ang che," ka ti tlat a, min hnial hneh loh avàng chuan an in lam chu kan pan ta nge nge a. An in chhûnga luh pawh ka tum tawh lo a nia; mahse, min pawt lui ve leh ta tlat a, ka țang zo lo. Nu Sangpuii lo awmin," In va lo lêt hma ve? Nuam in ti vak nange?" a lo ti vat a, ani hi chu a fel ve chiang a nia, a țawng duh bawk si.

"A ke hi kan la ngaihtuah deuh a, vawilehkhata thui tak kalpui zawng, zànah a nat phah ka hlau a ni, car ken chhuah a rem ti mang si lo va," ka lo ti a, Jason-a chuan," Kein kan kal khât êm mai a ka han ti maw le, ka nat phah lo tùrah ngai ila," tiin min rawn en a," Chaw ei nghâl ta che," a rawn ti leh a.

"A, a hmain ka ei tawh kha, a tâwk tawh!" tiin ka lo hnial a, Nu Sangpuii pawh chuan," Ni dâwn tak! Ei nghâl hlauh rawh, mautuai dah țhat ka bai  lehnghâl a, sakhi sa rêp ka bâwl bawk ang a, a tui dâwn asin," a lo ti ve vat a. 

Ka hnial leh a, a hma pawhin ka ei tawh a, ka zak ve tawh alawm. Kan inkawm bawrh bawrh lai hun ang kha chu ni se chuan ka zak lo deuh zâwk ang a, tunah hi chuan engtin emaw tak hian ka zak ru deuh tlat tawh a ni.

Jason-a ," Zànah mi biak tùr ka neih kha, kan thu sawi i hre châk lo em ni?" a rawn tih tâkah chuan ka en vat a, a lo nui suk ringawt. Ka hre châk râpthlâk! Chaw chu ka ei leh ringawt mai dâwn em maw ni; mahse, a zahthlâk ve deuh bawk sia, ka vir hmèl bâkah an thu sawi chu ka ngaihthlâk châk hmèl e...

Ka ei leh ta nge nge. Ka duh aiin ka puar lehnghâl, Nu Sangpuii'n min khawrh min khawrh vàng vek a ni. Ka pum chu ka zût ka zût a, Jason-a chuan nimbu tui min intîr a, chumi pah chuan," I nuteite ina chaw ka rawn ei zàn kha ka hre chhuak," a rawn ti sap a, za vak lo hian ka nui ringawt. Ani kha chaw ka khawrh ka khawrh a nih kha, lian lel lawlin a la ni zui, a lo hrehawm dâwn êm mai tih tunah hian ka chiang ta viau mai.

An țhenawmte nupa an rawn lèn avàngin Jason-a room lamah kan inthiarfihlîm ta daih a, a khumah chuan țhuin a ke chu ka hmehsak a, vawiinah ka kalpui thui ve si a, a lo rawl lutuk palh tâkin ka ti a ni, kan chhuah avànga hrehawm a tuar ka duh bîk hleinem. 

Kan titi pah a, kan nui a, kan inchhaih a, a ke ka hmehsak pawh chuan awmzia a nei ngût lo ang a tih tùr khawpin kan ninhlei dùn a, chutih lai chuan a dawhkàn chunga a phone chu a rawn nghawr ta dar dar a. Ka lo theihnghilh dêr tawh alawm le, Hriatpuii a ni ngei ngei ang. 

A dik chiah, Hriatpuii a lo ni ngei e.

A fel roh asin, loudspeaker a on vei thlap a, on tùrin ka ti tawp si lo va, ka nuih sak a, làwm thu sawi nân a hmuiah ka fawhsak zauh a. Video call a ni lo bawk nèn, a nghâwnga ka kuahna pawh ka thlah duh lo va, thu ho mai mai sawiin a rawn bia a; mahse, a hnu deuhah chuan Urlâwk zàn lam a rawn sawi ta. Ka inrawlh vena chi a ni si lo va, Jason-a'n ka duh loh dàn deuh, eng emaw deuh taka a fiama, a chhàn apiang chuan chimawm chhuahin a bengah chuan ka lo sehsak zêl a, vawi khat phei chu," Nula chhe lo deuh biak hi chu a nuam alawm," tia a nuih hawk hawk phei chuan melh râm râmin ka lam hawiin ka kuai her a, a hmui hnuai lam chu na zetin ka sehsak ta vâwt a.

"A naaa..." tiin a rûm chhuak nghut a, Hriatpuii chuan," Eng nge ni ta?" a rawn ti nghâl vat rêng a, ani erawh chuan," Fanghmìrin min seh a nih àwm hi," tiin a chhâng mai a, ka lo ner khum nâwng mai. Engah nge ka hriat laia nula dang nuam ti taka a'n chhaih kual vêl ni, ka melh râm râm zui bawk a.

Urlâwk zàn an hmannaa tel tùrin a rawn sâwm a; mahse, Jason-a chuan thiam takin a lo hnar a, an inbiak zawh chuan," Khawnge, fanghmìr mi seh na thei zet hi ka'n seh lêt ve teh ang, ka ha a zum țha ve tho," tiin, ka inrin hman hma chuan min rawn bawh bet thut a, ka lo täl ve nasa; mahse, mipa a ni a, min hneh ve chiang êm a ni. Min seh nat ka rin avàngin min fawh dâwn pawh chuan ka hmui chu ka hup tlat a; mahse, ka kut chu a la sawn hneh lutuk tlat

"Na lo têin, na lo têin aw," ka lo ti țâwk țâwk a, nâ tuar tùr chuan ka lo inring ru ve ràn a; mahse, min seh lo chuan duhthawh takin min fâwp ta bawrh bawrh zâwk a, ka rin ang a nih leh si loh avàng chuan inthlah dul vatin ka chhâng lêt thuai a, kan duhãm dùn khawp mai, a hnu deuhah phei chuan hmui seh hlauh lam kha chu rilruah a awm tawh lo chiang; mahse, kan inthlah dâwnah na vak lovin min sehsak ve ta tho a.

"Ha aiah ha, mit aiah mit," a ti sup a, mit khap lo chuan min en chhuk kur a, chutah, ka rin loh deuhin a tho zui nghãl daih a, bathroom-ah lût zuiin tui herh haw rî chu ka hre zui nghâl a, he pa hi a hmui kha ka seh thìsak em ni? Ka seh na ve tho nain nichîn kha chuan a thì lo niin ka hria asin.

"I hmui kha a thî em ni? " tiin bathroom kawngkhàr bula ding chuan ka zâwt a, va luhchilh êm chu ka ti ve deuh a, ka rilru a nuam chiah lo deuh a ni, ka lo seh na viau em ni le tihte ka ngaihtuah a, engati nge ka thîkthu kha ka lo tih chhiat viau mai ni? A fiam ve a ni mai a.

A rawn chhuak har lo, min hmuh chuan," Eng nge?" a ti deuh hû a, kei chuan," I hmui chu a na viau em? Ka tih palh aw, ka ti tak tak! Ka seh tawh miah lo ang," ka lo ti vat a, a hmui chu a thî chiah lo a ni maithei; mahse, a vûng deuh em aw chu ka ti, vûng deuh a ang tlat.

"A na lo, engtin mah a awm lo, en la," a tih chuan ka han en chiang a, ka hlauhthàwna ka rilru a nawm loh tehlul nèn, sehna hnuhma àwm pawh ka hmu ta lo hrim hrim, ka ngaihbel vàngin vûng angin ka lo hmu mai mai a ni ngei ang. 

*******

Group lama Urlãwk zàn hman dàn tùr an sawi luai luai chu phûr fahran lo hian ka chhiar ve zêl a, sawi pawh ka sawi ve peih meuh lo. Ka danglam zo ta a ni ang e, țhiante tel lova awm thei lo deuhthaw țhìn kha ka nia; mahse, tunah chuan Jason-a nèna hun hman ka duh ber tawh. Ka ngaihtuahnaah a chêng veng veng reng a, țhiante nèna bengchheng leh thawveng taka hman khâwm ai chuan Jason-a nèn chauha hman rek rek ka châk zâwk tlat.

Mahse, ka phatsan hlawm thei bîk si lo. A hun a lo thlen chuan phûr fahran lovin ka inchei ve a, Jason-a mit la tùr chauhin ka inchei a ni. Ka lo nghâk a, a rawn thleng har lo, kan chhuak thuai a, car-a kan luh rual chuan," Zanin ang hi chu kan pahnih chauha hman dun ka duh viau laiin țhiante phatsan dáwn angah ka inngai deuh tlat a, hre thiam hrâm mai rawh aw, kan hmangho vek țhìn si a," ka ti nghâl mawlh mawlh a, ani chuan," Hlim takin hman tum zâwk ang, an bula hman ka hreh hleinem," a lo ti mai a, min rawn en vang vang a," Zanin hi zàn dang zawng aiin i mawi zualin ka hria, chu vàng tak chuan ka hauh na hlê dâwn che," a ti leh a, rawn thle pheiin kei pawhin a tih dàn ang chuan ka lo ti ve vat a.

Phûr lo viau e ti lo chuan ka rin ai chuan nuam ka ti leh ta tho a, ka țhiantehoah hi chuan han zah êm êm tùr an awm lo bawk a, ka lâm nasa leh khawp mai. Jason-a pawh ka làmpui tak dâwrh dâwrh a, a ke erawh ka hre reng ve tho, a dam thei ang ber tùrin ka làmpui rêng a ni. Kei chu làm hi nuam ka ti ve a, music țang et awt a rawn rîk tawh hi chuan làm ka châk et et ziah.

Mahse, nuam ti viau e ti lo chuan rei tak kan meng lo va, mi dang zawng aiin kan haw hma ta daih a. A la tlai lêm lo bawk a, khawlaiah pawh mi an la vei suau suau a, motor vei vâk pawh a la tam viau. 

"Kan haw nghâl vat lo ang chu tiraw?" ka tih chuan," Hei kan haw chu a ni mai lo'm ni?" a rawn ti ve thung a, chumi pah chuan a nui suk a, a hmêl hi chu a țha ve chiang a ni. Heti tak maia hmêl țha si, a hma khân eng mitin nge ka lo en țhin le ka ti! Ka lo hai der țhìn nge ni a duhna mita ka lo en ngai loh vàng záwk? A enga pawh chu lo ni se mipa hmêl țha tak chu a ni hrim hrim, a fel bawk si. 

"Haw rih lo ang, hetia i bula awm rih hi ka duh alawm, kan haw nghâl a nih chuan naktûkah daih asin kan inhmuh tawh dâwn," pangchang tak hian ka ti a, a lo nui hawk a, motor la khalh reng chung chuan a kut pakhatin ka chala rawn tawk zohin," Duhawm reuh lutuk mai!" a rawn ti sup a, ka nui ve sak mai. Duhawm min ti leh ta a, a hmain hmêl țha min ti tawh bawk a, nuam ka va ti mai mai tak.

Haw nghâl lo chuan kawng lakah hmun remchâng lai leh hmun hulùm lutuk lo laiah chuan kan ding rih a, pâwna chhuah erawh kan peih lo. Khua a váwt a, car chhûng lum ham ham chu nuam kan tih zâwk bákah páwn lam aiin ri a tam lo zâwk a, kan duh zâwk bawk.

Rei fê chu țawng lovin kan țhu a, a kut lian leh lum zet chuan ka kut chu a hûm tlat a, ho hlê angin lang mah se nuam ka ti a,  ka nui reng mai. A hla play lah chu music cool deuh raih lam a ni a, kan awm dàn nèn chuan inhmeh ka ti viau bawk. 

"Zanin ka rawn chhuah dâwn khân ka nuin kan pahnih inkár chungchâng hi min zâwt a," a rawn tih meng chhuak vatin ka en hau a," Min ringhlel tihna em ni? Engtin nge i chhàn?" hriat châk zet, huphurh deuh tho chuan ka zâwt vat a.

"Ka zêp lo, ka hrilh hmiah mai," a tih chuan," Engtin nge a tih? Thil sawi a nei em? Mak a ti àwm mang e! Min huat hmèl em?" ka lo ti leh zung zung a, min haw ngei ngei ang.

"Engah nge a huat ngawt ang che?! Huatna chhan tùr che a nei hleinem, hlim taka hun hmang tùrin min chah a," a ti phawt a, a aw a thian leh tê tê a, chutah, sawi zawm lehin," Mak a ti lo, min lo ringhlel tawh zâwk a," a ti leh a.

"Chuti chu, ka awm dànah ka lo ti lang nasa viau a ni ang maw? Ka chhûngte pawhin min lo ringhlel daih tawh ang a?!! A, an hmêl hmuh pawh ka huphurh zo ta vek mai," ka ti a. Naktûk lamah kan inhmu țhâm țhâm hlawm àwm si a, Nu Sangpuii hmuh ka hreh ber chiang sa, a fapa bialnu angin min hmu tawh dâwn si.

"Huphurh lo ve, keimah hi min en mai dáwn nia. Thîra siam kan ni lo va, mi ang pângngai kan ni, chu vàng chuan kan induh tawn thei a, kan inngaizâwng thei bawk, thisen inzawm kan ni lo va, unau leh inchhûngkhat lah kan ni hek lo, chu vàng tak chuan huphurh duh suh ang che, hauh pawh i tuar lo ang, lo ngai reng rawh, an hauh che ka phal dâwn hauh lo," tia min hnèmin ka kut chu a chûl hoh hoh a.

*BEIDAWNSAN LOH HI HLAWHTLINNA HMANRAW PAWIMAWH TAK A NI*

Zanina kan chak lawm nân🤗💃💃