☆SUMRISANG☆ - 22 By Dingdi Pachuau

☆SUMRISANG☆ - 22 By Dingdi Pachuau

In kan thlen chuan a tlai ve tawh tho si a, lêng rih tùr pawhin ka ti ngam tawh lo. Ka chhuah dâwn chuan," E, taka, ka theihnghilh țêp," tiin seat hnung lamah chuan eng emaw hi a han ban a, parcel lian lutuk lo, khìn nalh si hi min pe a, eng nge ni ang tih hriat tumin ka han thing chhin a, a sakhat bawk a ni ang, a chhûnga awm chu a ri luk luk miah lo.

"Zanina ka hnên atânga i dawh thlâk a nih kha," a ti a, a hmêl chu ka en deuh hau a, a thil sawi dàn kher kher chu; mahse, huat enah pawh ka en lo, a hnên ațanga thilpêk ka dawng chu ka lãwm a ni tawp mai, eng nge a nih erawh ka hre châk et et thung a.

"Eng nge a nih min hrilh duh àwm chuang si lo va, ka zâwt lo mai ang che. Chuan, ka lãwm lutuk e aw," ka ti a, nui sângin a lamah chuan va ãwn pheiin a biangah chuan ka va fawhsak a, chutih lai chuan lo inher thutin a hmui leh ka hmui chu a intawng zui ta nghâl a.

"Hei leh pawh," tiin bâwm te reuh tê hi min pe leh a," Jason...!" ka ti sap ringawt a, keiin eng mah ka pe ve si lo va, ka inthlahrungin nuam lo ka ti ve deuh a ni. Sum a nei ang tih chu ka hria a; mahse, a bialnu ka nih avàng ngawtin thil min pe țeuh se tih ka duh chuang lo.

"Kha kha chu naktûk lamah hmuh ka lo inbeisei ang," a ti sup a, hei hi chu a pâwn lam lan dàn ațang hian tlereuh a nih ka'n ring deuh ngawt a, bengbeh emaw sana emaw ngûn emaw, a nih loh pawhin brooch mawi tak, chutiang chu a nih ka ring   tlat.

A tûk inkhâwmnaah chuan nizàn lama bengbeh min pêk ngei chu ka beh a, a mawi a, inhmeh pawh ka inti ve khawp a, ani pawhin min en vang vang a, inhmeh min ti ve tho a nih ka ring, nuam ka ti; mahse, WhatsApp status tih leh Fb story, IG  tih vêla pho chhuah kher erawh ka tum hran lo, ka làwmzia a hre chiang a, kan inkawp avànga ka hlimzia pawh a hria, kan induhna leh kan inlaichìnna social media vêla tih lan chiam kher kha ka duh lo a ni, mi min lo hriatpui chiam kher ai chuan amah hian hre chiang se a țha ber.

Nu Sangpuii erawh hmuh ka hrehin biak pawh ka hreh viau mai, a fapa nèn kan chanchin engkim a hre tawh si; mahse, chuti chung chung pawh chuan a hmêlah leh cheziaah min ngeina emaw min duh lohna tùr emaw eng mah a lantîr miah lo a nih chu, a dàn ngai angin min be bawrh bawrh tho a, kan bula mite hriatah han ngaihbel theih tùr eng thil mah a sawi lang chuang lo, a fel ka ti tawp.

Krismas a nih avàngin thlâ kan la ve a, kan chhûngkuaa kan lâk lai chuan U Nubawihi chuan ka bengbeh chu a rawn hmu fuh niin," Eu, a va mawi ve!! A to ngawt lo maw? Engtik laiin nge i lo lei hman? Khawiah nge i lei?" a rawn ti ta sek sek mai a, en duh map lo hian," Thilpëk ka dawn a nih hi, engtin nge khawia mi nge tih ka hriat bîk ang?" ka ti ve thung a, intithei zet hian ka hawi sâng kual vêl a. 

"Hei nang nu hi, i bialpain a pe che a ni maw?!! Wowww..!! Changkãng sâwt--" a rawn tih leh lai mêk chuan a țawng rin avàngin 'bengchheng suh' tih nân ka kutzungpir chuan ka hmui chu ka han sîktîr a, ani pawh chuan a hmui chu lo hup ve vatin a mit ko chu a sàn ãk zui a.

Jason-a nèn pawh chuan kan la dùn nghe nghe a, haw pawh kan haw har lo. Biak in lamah kan inei puar tawh avàngin ei tùr siam a ngai lo va, in chung lamah chhovin ni lum ai pahin nizàn lama min pêk Apple chu kan ei dùn a, a ei tam duh miah lo, a hmingin a ei ve hlek chauh.

"I ei tlêm e," ka tih chuan," I ei atân ka pêk che alawm," a lo ti mai a, kei erawh chuan," Min pe tam si, ka ei rei ngawt ang," ka ti ve leh a, apple zai lèp chu ka hmawm zat a, ani lah chuan," Ni tin i ei ang a, i ei zawh veleh a dang ka pe leh zêl ang che, chuan, i hrisêl ang a, i damlo dâwn miah lo tihna a nih chu," a lo ti leh a.

"A, chûngte chu Pathian thu thu a ni ang chu, dam leh damlohah kher hi chuan thu kan nei lo e," ka ti ve thung a, nui deuh chung hian ka en a. Ani erawh chuan min rawn hnaih sauh pahin thu tak hmêl zet hian," Damlo miah suh ang che, ka rem ti dâwn miah lo a nia," a ti sup a, ka thil țhial lai chuan ka hmuiah rawn fâwp zauhin," Damloh chuan, pawi zâwk ang," a ti leh sup a, a nui suk zui a, a hmêl țha ka tih êm avàng chuan a biangah chuan ka piaisak vak a.

Krismas leh kum thar inkârah pawh chuan hmun dangah pawh kan kal hran lo, ka țhiante nèn pawh kan inhmu lo rêng rêng! Jason-a nèn kan inkawp tâk ațang hian țhiante ka thlahlel lo sâwt khawp a, dik tak chuan țhianho group-ah pawh ka active peih tawh lo, eng emaw tih khâwm te hi an rawt ang tih ka hlau hluah hluah tawh, tunah hi chuan Jason-a nèna hun hman dun hi ka thlâkhlelh ber chu a ni tawh mai.

Kum hlui thlah zànah silver țhi hraw țha deuh, fual țha tak leh baseball cap dum dak hlarh pein a ui Popo-a biscuits pawh ka pe tel bawk a, a mit mengah chuan làwmna ka chhiar thei a, ka hlim veng veng mai. Min kuah vang vangin," Ka lãwm e, kei mai ni lova Popo-a i ngaihtuah tel vàngin ka lãwm tak zet a ni," a ti sap sap a, țhi chu," Min awrhtîr nghâl la," ti zuiin ka awrhtîr zawh chuan lukhum chu a khum zui leh nghâl bawk a, a inhmeh ka rin ang ngeiin a inhmeh lutuk, a inhmeh mah mah zâwk a ni.

"Ka rin ang chiahin i inhmeh a nih kha, i tã sa ni àwm tak a ni," ka tih chuan," Ka khum ngun teh ang chu!" tiin a nui suk a, rawn kûn hniamin min rawn fâwp zauh a, a lukhumin min dàl deuh vàng chuan phawhsak leh rihin ãm zet hian ka lo chhâng lêt a.

Hun ãwl kan neih phawt chuan kan awm dùn deuh zêl a, chhûngte tân pawh rinhlelh loh theih loh kan ni ve bawk a, zanriah ei laiin U Nubawihi chuan a rawn sawi chhuak ta khauh mai. Ka nu erawh chuan," Âwihawm loh loh! An inkàwm nasa ve a nih hi," a lo ti a, min rinhlelhna a nei ve lo a ni ngei ang. 

"A dik tho a; mahse, tunah hi chuan a nungchangte hi a danglam ta êm a ni, țhiante hmu tùrin a lêng chhuak zut ngai tawh lo va, Jason-a nèn erawh hmuh dun tùrin an awm reng thung a, ni lo'm ni?" U Nubawihi'n a tih leh chuan ka pa chuan," A chhuah khàt phahna a nih chuan thil țha tak a nih chu, ngaihzâwng neih chu sual a ni hleinem, mi ang a ni ve ta tihna a ni mai a, tiraw Bawihte?" a ti ve thung a, za lo zetin ka lo țhen sak ringawt a, ka chanchin hlîr an sawi avàng chuan nuam lo ka ti rilru kher asin.

"Mahse, ka lo ngaihtuah mai mai a, Jason-a kher hi chu, an chhûngkua leh kan chhûngkua kan inpawh ve angreng si a, tu mahin hma lam hun tùr kan hre hauh lo, eng emaw zeuha intih thiam lohna awm thut--" a la tih lai mêk chuan ka pa chuan," A khai a! I lo ngaihtuah thui lutuk a nih chu, a ngai hleinem, chûngte chu hunin a la rawn hril mai ang," a lo ti awlsam leh êt a, ka pa thil sawi dàn chu ka rilrem zãwng tak a ni zêl mai.

Min ringhlel tawh tho bawk a, chutia min sawi reng chu nuam ti lovin ka tho ta daih a, chumi pah chuan," Kan induh tawn a, tuna hma lam hun tùr lo lungkham chiamte chu a," ka ti hlak a, ka zak ve tho; mahse, hrilh ka duh ve pah tho bawk si a. An thil sawi zêl erawh hriat chhunzawm duh lovin ka kut leh ka hmui ka sil sawk sawk a, an chaw ei chhûng chu room-ah ka tawm bo ta daih a.

Chhûngte bulah tum loh deuhin ka sawi chhuak ta si a, kawng lehlam takah erawh chuan ka rilru a zãng deuh huai thung. Zêp theih reng a ni bîk lo va, tunah chuan inthlahrunna leh hriat chhuah palh hlauhna kha a awm tawh lo ang a, thlamuang takin ka kàwm thei tawh ang chu.

Apple kha ka nghei phal lovin min leisak zêl a, ka nuin min hauh phah a," A to asin, inleitîr tawh suh, a pêk che pawhin 'Ka duh lo, a ngai lo ve' te ti ve ta che, mãwl leh lutuk mai, pawisa a sêng țeuh țeuh dâwn asin," min ti hrep ringawt a, ka rilru a na ru angreng khawp a, ka inleitîr a ni tawp si lo va, amahin min leisak liau liau a nia, ka hnial ve châng pawhin min leisak zêl tho a nih kha.

Ngaihzáwng ka nei ve chu ka nu tân zilh bûr ka ni ringawt mai. Min zilh reng a, U Nubawihi pawhin a nei ve reng sia, kei min zilh tlut tlut ang hian a zilh ve ngai hauh si lo, a hnuah phei chuan min haw deuh bîk a ni ang ka tih phah ta ringawt nghe nghe a, ka pa erawh chuan mi fiam zuk zuk a hrât thung. Jason-a a rawn lèn châng pawhin a lo titipui ve suah suah zêl a, hrehawm a ti ang tih a hlau ve pawh a ni mahna; mahse, hrehawm a tihna chhan tùr àwm erawh ka hre hauh lo thung a.

Jason-a office a kai leh tawh a, kei pawh ka thil zir tùr lamah ka rilru pein, buaipui tùrin ka chhuak ve ta zauh zauh a. Tûn țum chu tu ma buaipui ngai lova keimah ngeia tih puitlin ve ka tum avàngin mi dang ka be buai lo khawp mai a, keimah ngeiin engkim ka buaipui ve ta vek a ni. 

Chhùna restaurant-a ka chawlh lai chuan Vli ang deuh mai hi ka hmu a, ka han thlêk ngun deuh a, amah ngei a lo ni; mahse, a hma ai chuan a lo chér deuh tawh a, a sam a lo ti tãwi deuh ta bawk. Ka thlêk ngun bawk a, ani pawh chuan min rawn hmu ve nghâl a, min rawn panin za lo zeta țhen lui sak pah hian," Ka lo țhu ve thei ang em?" a rawn ti a, Lalrina chungah rãwng viau mah se țhian hlui a lo nih tawhnaah ka haw hran tawh chuang lo va," Lo țhu rawh, inhmuh a khât hle mai, i dam țha maw?" ka ti nghâl vat a.

"Dam țha alawm, in dam țha zâwk maw?" a rawn ti ve nghâl a, țha takin kan inbia a, a thil chah a rawn thlen hnu chuan," Zawh àwm che a ni em ka hre hauh lo nain țhian kan lo ni tawh țhìn tho bawk a, ka záwt ngam ang che, Jason-a nèn khân in la inzui reng em?" a rawn ti a.

Thil ei pah chuan chanchin chu kan inzâwt zêl a, kan inhrilh pah bawk a, nakinah chuan kan inhmu remchâng tawh kher lo maithei tih ngaihtuahin zak duh hran lo chuan Lalrina nèn an ințhen dàn chu a thuphungin ka zâwt mai mai a. Ani erawh chuan," Sawi dâwn chuan sawi tùr a tam lutuk! Hun remchâng kan neih leh veleh ka la hrilh vek dâwn che nia, i phone number i la thlâk lo tiraw?" a lo ti a, ka lu chu ka bu nghat a.

Kan ințhen hnuah ka țhiante ka hmuh khàt tawhzia chu ka ngaihtuah chhuak thut a, an dam țha vek hlawm ang chu maw. An chanchin hre chiang tùrin ka biak khàt hlawm bâkah bialpa tak tak ka neih hnu hian ka thlauh thla ta hlawm viau mai a, nikhua lo pawh ka inti ru khawp mai. Vli hmu kher lo ila chuan hetiang thil pawh hi ka ngaihtuah chhuak kher tawp nâng.

Jason-a nèn kan inhmuh leh veleh chuan ka thil ngaihtuahte chu sawi chhuakin Vli ka hmuh dànte chu ka hrilh ve a, ani pawh chuan," I țhiante an ni a, keimah vànga i thlahthlam hi chu ka duh hauh lo, kan inkawp hmaa i țhiante an nia," a lo ti ve a, ho mai mai a tih ka rin tehlul nèn, a rilru chu puitling ka ti khawp mai.

Ka thil zirna tùr pawh chu ka ti fel ta thuai a, tu ma puihna tel lova ka ti fel thei chu thawk țha hi ka inti khawp mai a, ka pa pawh chuan," I duh hi chuan i felin thil pawh i ti thei a ni, tuna mi pawh hi i pass chhuak leh vek mai ang," a lo ti ve a, ka nu erawh chuan," Puitling i ni ve tawh a, i hma hun tùr hi chu nangma sual chhuah vek a ngai, i hlawhtlin leh nangma tân a țha ang a, nakinah pasal a chhia a țha pawh i la duh ve ang a, i hmu zo a nih chuan. An chhûngte tân chhenfâkawm loh lutuk i nih chuan nangmah i zakin hrehawm i ti ang a, chutiang bawkin i chhûngte pawh," tiin min zilh leh nghâl mawlh mawlh a. Dik viau mah se min zilh reng hi a châng chuan ka ning, ka pa ang hian min fak ve ta mai mai zâwk se...

Zan khat chu Vli chuan min rawn be ta nawlh mai a, a tìrah chuan number ringawt a nih avàng chuan ka chháng duh lawk lo nghe nghe a; mahse, a hnua ka chhàn chuan Vli a lo ni a, inhmuh a duh thu leh engkim min hrilh a duh thu chu a rawn sawi ta a.

"Tihian min hrilh mai la?" ka tih chuan," Sawi tùr a tam lutuk a, bâkah, ka hman lo leh thuai dâwn a, chu vàng chu a nia," inthlahrung aw tak hian a rawn ti a, eng tak chu ti dâwn ni maw ka ti rilru a, min hmuh a duh a nih chuan lo hnial thu leh chhuanlam siam vak thu a awm bawk si lo va, kan inhmuh hun tùr leh kan inhmuhna tùr hmun chu kan sawi dùn a.

Kan inhmuh hun tùra kan ruat ni a lo thleng a, ka thil zir tùr kan la zir țan chuan loh avàng chuan hun thâwl tak ka la nei bawk a, a rawn thlen ve meuh chuan amah nghâkin minute 10 chuang zet ka lo țhu vàng tawh a ni. A tlai deuh avànga pawi a tih thu chu a rawn sawi nghâl barh barh a, in tùr leh ei tùr kan lam hnu chuan a chanchin lamah chuan kan lût ta a.

"A hma khân min zâwt tawh bawk a, ka hrilh vek tawh ang che. Lalrina kha tlangvâl dang ka kawpsan hauh lo va, kawp pawh ka kawpsan ngai hek lo ang, dinhmun khirh taka ka din vàngin kawp anga lan ka duh a, ka lang ta rêng a, ani pawhin min țhen ta chiah bawk. A hun khân a zir lovin a hun lo tih pawh ka hre ve tho a; mahse, duhthlan tùr ka nei lo a ni," a ti ta kalh kalh a, ngawi rengin mit pawh khap hauh lo chuan ka lo en reng ringawt a.

*HLAWHCHHAM I HLAUH VÀNG MAI KHÂN TUM CHHIN LOH PHAH NÂN HMANG SUH, HLAWHTLING TÙR CHU TUM CHHIN VE PHAWT A NGAI ASIN. NAKINA 'KA LO TUM CHHIN VE LO A NI' TIA I INCHHÌR LOH NÂN HAN TUM CHHIN VE PHAWT TEH LE*