☆SUMRISANG☆ - 23 By Dingdi Pachuau

☆SUMRISANG☆ - 23 By Dingdi Pachuau

"Englo a nia, zêp hlen chu ka duh viau a; mahse, thu dik hi tu emaw tal ka hrilh loh chuan min rin chhiat reng dâwn bâkah ka hmangaih êm êmin ka dam chhûng mai ni lo ka thih hnuah pawh min ring thei tawh ngai lo ang tih ka hlau a ni, hnem a ngaih hun lai taka ka kalsan lo thei lo si kha keimah ngei pawh hian inngaihdam harsa chu ka la ti fan; mahse, mipa a ni a, a thih phah lo ang tiin ka inhnèm ta ringawt a ni," a ti leh sep sep a, a sawi kârlakah chuan a thaw leh hak țhìn a. Lo inrawlh hauh lovin a thil sawi chu a dik ngei em tih hriat tumin a mitah ka en kar a, a thil sawi pakhat tê pawh chu hriat hmaih ka tum lo.

A ngawih deuh hlek hnuah," A bul rêt ațangin ka han sawi ang e, a bul ber chu kan chhûngkua ațanga lo ințan daih tawh a ni, kan mualphona tùr a ni tih hre mah ila sawi chhuah ngei ka duh tawh a," tiin a ngawi leh rih a, a hmui chu pet fan fanin a en ngai a en reng a, chutah, zàwi deuh sap hian," Ka pa kha min hringtu ni lo mah se min duatin min enkawl țha a, ka tét lai phei kha chuan ka pa tak tak a ni lo tih ka hre miah lo va, ka ngaina viau rêng a ni. Ka han tleirãwl chho a, mahse, zàn khat chu ka rin phâk loh leh suangtuah ngai loh ka chungah thil râpthlâk tak a ti ta, ka nu leh ka naute zin hlàn a ni a. Ka nuamsam meuh lo room-a ka mut laiin a rawn lût a,' Kha hei hi ei rawh,' tiin damdawi leh tui hi min rawn pe a, ka nuamsam lo tih kha a hre ve tho si a, damdawi ka lo la ei lo bawk nèn, ka ei nghâl a. Rei lo têah chuan ka zawi ta ngawih ngawih a, ka taksa chu che thei lovin a awm ta a nih chu, ka rilru erawh a harh vek a, ka awm dàn chu mak ka tiin ka hlauthãwng kher asin. Ka pa chu rawn lûtin a duh tâwkin min rawn khawih ta a nih chu," a ti sap a, a thu sawi tàwp lam phei chu ka hre chang chang chauh a ni. A hmaa dawhkànah chuan tui hi a rawn far thla kauh a, zawh ngai lovin a mittui a ni tih ka hre nghâl. Mak tiin râpthlâk ti zetin ka en reng ringawt a, sawi tùr rêng rêng ka hre lo!

A insût deuh hraih a, a țah chhuah loh nân thâwk a la kâwk phawt a, sawi zawm lehin," Ruaka ka awm laite chuan video-in a la char char a, 'I nute bulah emaw mi dang rêng rêng bulah emaw han sawi tum vaih teh, i chan tùr chu i hriat ka ring. Nang mai bâkah i nu leh i naute hmakhua a chhe vek ang a, i ngawih theih erawh chuan i hmingchhe kher lo ang, i pa tak ni lo mah ila i nu hian min ring tâwk tih hre bawk ang che,' a ti a, ka rilru leh taksa a nat êm avàngin ka țap thei lo a, ka mittui erawh dan theih lohvin a tla zawih zawih thung. A duh tâwk a ngah hnuah min chhuahsan ta a, rilru na ngawih ngawihin ka mu ngawih ngawih mai a ni. Min vau kher lo pawh ni se ka sawi chhuah ngam ka ring chuang lo va, ka nute mai ni lovin tu mah ka hrilh lo ta rêng a, tûn hi ka sawi chhuah vawi khatna a ni," a ti leh sep sep a, a awm dàn ațang chuan dáwt min hrilh rinna ka nei hauh lo, bâkah, chutiangte chu sawi chhuah ringawt pawh hrehawm deuh mai tùr asin, chu vàng tak chuan thu dik a nih ka ring ta thlap mai.

"Ka pa tak tak lo ni lo ta pawh ni se, chutia ka chunga a chêt duh chhan chu rin dàn ka nei lo va, a thu min hrilh țhian 'Bialpa neih a la ngai lo, mipa chuan in màwina bâk an duh lo' a tih lah chu ka bawhchhe bawk si lo. Chuta țang chuan ka nu awm loh apianga min beisei leh ka hlau ta êm êm mai a, eng emaw chânga ka nuin riah chhuah a tum pawhin ka naute zînga tu emaw ber chu ka riahpui ta ziah a ni. Aizâwla school kala awmna ka neih ațang chiah khân lungmuangin zànah ka muhìl ve thei chauh nghe nghe. A thil min hrilh țhin mipa chungchâng chu ka rilruah ka hre reng a, a thu ka zawm êm êm vàng pawh ni chuang lovin amah ka hlauh êm avàng khân mipa hi ka hnaih ngai lo hrim hrim a, a hma pawhin ka hnaih ngai chuang lo; mahse, nula ka han ni ve a, min duhtu lo awmin kei pawhin ka thinlung duhna ka lo thunun reng thei ta miah lo tih Lalrina ațangin ka hre ta chauh a ni. Ani chauh hi ka hnaih awmchhun leh ngaihzâwng ka neihchhun a ni ta rêng a," a ti leh dap dap a.

A râpthlâkin a zia lo ka ti a, chutiang hun râpthlâk leh nunphung thlâk dáwrh thei khawp hun râpthlâk a tawng chu ka khawngaih tak zet a ni, țawng lo chuan kan ngawi dùn vang vang a, kei chuan sawi tùr ka hre hlawl lo, hnem dàn tùr pawh ka hre lo, a thil tawn chu râpthlâk ka ti ngawih ngawih hi a ni tawp mai; mahse, chutih rual chuan Lalrina a țhen chhan àwm chu ka la hre thiam chuang hauh lo.

"Ka sawi ta duah a, Lalrina ka țhen chhan tak pawh ka la sawi chuang lo; mahse, a inkaida chho vek a, ka han sawi hmasa phawt a nih kha. Lalrina nu boral hma khân Aizâwlah rawn kalin bialpa ka nei tih a rawn hre ta hlauh mai a, a thin a rimin min vau leh ta a,' I țhen nghâl loh chuan thil thleng tùr chu i hriat kha, țhen nghâl ang che, i bialpa ka hriat chhuah hlauh phei chuan a nunna mai bâkah i nunna atân pawh a pawi ang,' a ti hmiah hmiah mai si a. Khatih hun laia hrehawm ka tihzia tak kha... A nu vàngin hun hrehawm tak a hmang mêk a, keiin ka kalsan loh chuan ka chungah leh a chunga thil thleng tùr ka ngaihtuah lo thei si lo. Ka pahrawn sualzia leh nunràwnzia ka hriat tawh miau avàngin Lalrina chungah leh ka chungah ngei pawh a thil sawi chu a ti duh ngei ang tih ka hria a, inngaihtuah rei lovin mipa dang kawp anga langin ka țhen ta a ni. Khatih hun lai khân ka țap nasa asin, zànah ka mu thei lo va, eng mah ka ei thei lo bawk. Lalrina khân ànchhe tinrêng min lawh pawh ni se ka hre thiamin ka pawm thiam vek, ka nat ang thovin a nâ ang tih ka hria; mahse, țhian fel tak tak, amah ngaihsak êm êmtute a nei che u a, ka ngaih erawh a țha deuh hlek. Hun a kal leh hlek a, ka pahrawn chu a thing thlâkna lamah chesualin a thi tih ka nu hnên ațangin ka hre ta a; mahse, engtin mah ka awm lo. Ka rilru kha a lãwm zâwk maithei hial a ni, haw pawh ka haw duh ta lo rêng a, hna lamah thil pawimawh a awm thu ka nu ka hrilh a, a âwih ve mai bawk a. Lalrina ka ngaih êm avàng leh a chanchin zêl hriat ka duh avàngin zahtheih lohna zawng zawng sâwm khâwmin ka text zauh zauh a, min chhàn duh pawh ka ring chuang lo. Ka rin ang ngeiin min chhâng lo va, ka dem chuang lo, ka hre thiam êm êm zâwk a ni. Vawi khat erawh chu a aw hriat ka châk avàngin ka phone chhin ta ngawt a; mahse, chhànna ka hmu chuang lo. Ka thin a rim lo va, ka dem lo va, àwm ka tihpuiin ka hre thiam êm êm zâwk a ni. Hrisêl se, hlim takin a nun leh a hun hmang se ka tihpui a, chutih rual erawh chuan ka țhen chhan dik tak kha hrilh hriat ve ngei a phûin ka hria a, nang hi a rin ber i ni tih ka hria a, ka hrilh ta che a ni," tiin a han tàwp a, thâwk la leh huaiin," Tunah chuan ka rilru pawh a zãng ta hawk mai, Lalrina'n ka thil sawi hi a ring kher lo maithei tih chu ka hre tho a; mahse, nang hi chu ka hmeichhiatpui i ni a, min hriat thiam ka rin avàngin hrilh che hi țha ka ti a ni; mahse, khawngaihin, nang leh Lalrina chauhin hria se ka ti," a ti leh sap sap a.

Kan ințhen hnu chuan ka ngaihtuah lêt vang vang a, Vli thil sawi kha ka ring a, dâwt a sawi ka ring lo. Ka ngaihtuah thui zêl a, a pahrawn chu hlauhawm ka tih bâkah hmeichhe tân bîk a hlauhawm lehzual ka ti a ni. A unaute kha hmeichhia nge mipa an nih a sawi ka hre miah lo va, hmeichhia an lo awm ve phei chuan an ngaihtuahawm tho thei hial lo'ng maw? Mahse, anni zawng a fa tak takte an nih ka ring deuh a, a khawih duh bîk kher lo thei bawk. A thi ta pawh chu Vli tân chuan thâwk huaina tùr ka nih ka ring, kei ni ta ila a ni dâwn chiang tih ka hria a, a sual man a hmu ve taah ka ngaihsak hmiah.

Lalrina ka hrilh ngei a ngai dâwn ta a ni, a hriat hunah engtin nge a lo ngaih ve ang le? A lo âwih ang em? A rilru kha a na êm mai a, dâwtah a lo puhsak mai lo'ng maw? A hmaa ka titipui viau pawh khân Vli lam kha chu a hawi tawh loh hmèl viau mai si a, han hrilh pawh a châkawm viau hran lo ka ti; mahse, a hriat ve ngei Vli chuan a duh si a nih kha.

Jason-a'n Apple min rawn kensak leh tawh a, tunah hi chuan kan chhûngte'n kan chanchin an hre ve ve tawh bawk a, an bulah pawh pângngai taka awmin kan titi thei tawh a; mahse, an awm laia inmelh eng emaw deuh erawh chu ka la duh chiah lo, ka en tam loh phah tawp. An awm loh hnuah erawh insi chêta kan țhut loh leh inkài talin kan țhu țhìn, nuam ka ti tlat a. 

"En teh maw, entîr nân mai mai, eng emaw thil vàngin, ni leh lo, tu emaw min vauna vàngin mi dang kawp anga langin ka lo țhen ta che a, ka hmangaihna vàng leh keimah vànga harsatna i tawh loh nân ka țhen che tihna a nih chu. Harsatna i tawh lai takin a lo ni lehnghâl a, ka țhen chhan che hre miah lo chuan i na êm êm mai a, i thinlung pawh ka lak ațang chuan chuan a lêt vek nghe nghe, a hnu chuan i lakah ka insawi fiah ve dâwn chhin a; mahse, ka text pawh min chhâng lovin biak pawh min be duh lo hrim hrim ta. Chuan, nang ka țhenna chhan che dik tak kha Sam-a hnên ațangin hre ta ang la, eng angin nge i ngaih ang?" tiin ka zâwt kual ta duah a.

A ngawi vang vang a, chutih chhûng chuan a khabe hmul țo siar siar chu ka chùlsak hoh hoh reng a, a khabe phîr deuh țhãih pawh chu ka tawk neuh neuh reng tho. A inhmeh ka tia, a hrawk bâwk pawh hi mipa a nihna tilangtu ka tiin a tipà bîk hliah hliah ka ti mai, ka fawhsak zauh zauh rêng bawk.

"Ka duh tak zet sî che a niha i thil tawn chu a tak tak a nih bawk chuan chu thu ka hriat nî la la chuan ka rawn pan ruak ruak che ang a, vau i tawh leh tawh loh nân ka bula awm tùrin ka hruai daih ang che, ka nupui atân ka nei daih ang che ka tihna a nih chu," a rawn ti chhuak ta a, ka en chho hau a, chutiang lama min chhàn chu ka ring deuh tho nain a bula min hruaia min neih a duh lampang kher chu ka lo ngaihtuah kai lo va, mak ka ti deuh a ni.

"Mahse, chutiang chu fiamthu pawhin tawng suh ang che, tawng hauh suh. Ka țhen dâwn lo che a, min țhen pawh ka rem ti ngai dâwn lo bawk a nia," tia rawn kûn hniamin min rawn fâwp zauh a, ka lo nui sak a," Ka țhen dâwn bîk lo che. Chuan, nula dang nèn min kawp han tum chhin vaih teh, palai ka rawn tîr nghâl a ni mai," ka ti lêt khar khar a.

A lo nui hawk a," Wow!! Hmeichhiain mipa hnëna palai tìrh a tum thu ka hriat vawi khatna. A ropui ve hrim hrim," a ti a, a biang chuan piaisak lehin," Ka zak dâwn teuh lo mai! Mizoramah record ka siam ve dâwn tihna a ni mai a, tûnlaiah chuan tu pawhin a chhe lam emaw a țha lam emaw pawhin record siam an châk vek tawh alawm," ka ti a, chutah, a biang tawn tawnah ka kut pahnih chuan vuanin ka nemsak a, a hmui pawrhah tak chuan ka fawhsak zui ta a.

A hnu deuha kan awm țhat hnuah thu tak deuh záwk hian," Lalrina hmuh ka tum a, hun remchâng hmasa berah. Ka hrilh lâwk che a nih chu aw, thil pawimawh tak hrilh tùr ka nei a... Ãih, kha t'in thîkthu chhe hmêl lo ti lang duh suh, Vli chungchâng sawipui lawk ka tum mai a ni," ka han ti a, ani erawh chuan," Ka hmuhpui thei reng che alawm, nangmah chauha hmuh chu ka phal lo," a lo ti ve thung a.

"A, i thîkthu han pêk chhiat vêl dàn hi, keimah i nih duh hmèl a nia aw," tiin ka han nuih a, ani chuan," Min nuih mah la nangmah chauha i hmuh chu ka rem ti thei chuang lo ang, a theih loh!" a lo ti leh deuh tlat a.

A mitah tak chuan ka en vang vang a, chutah," A țha alawm, min hruai theih phawt chuan duhthusàm a nia; mahse, ka thil hrilh tùr erawh i lo hriat ve a rem kher lo ang tih ka hlau, thurûk min hrilhtu ka zah dâwn êm mai," ka ti ve leh a, ani chuan," Eng thurûk maw?" a lo ti leh a, kei chuan nui chung hian," Ka sawi te chuan thurûk a ni thei tawh nâng, i hre ve vek dâwn asin, kan pahnih tâna pawi tùr a awm dâwn lo,  ka tiam ngam sak. Vli nèna an inkár thil a nia," ka ti ve leh a, mipa pângngai chung lam a ni bawk a, min zâwt nawn tawh bîk lo, a hmêlah lungawi lohna leh thinrimna pawh a lang chuang lo.

Ka thil zir ka la țan chiah lo bawk a, hun ãwl chu ka la nei thei e, a hma thei ang bera Lalrina hmuh ka duh avàngin kan ina lêng tùrin ka sâwm ta a, Vli vànga hmuh ka duh thu erawh ka sawi lang lo hrim hrim, hun thâwl ka neih theih lai hian hrilh vat vat ka duh. Ka rilru a kam țûn reng mai a, a hrehawm duh êm mai.

Jason-a pawh Lalrina nèn kan inhmuh hun tùr chu ka hrilh a, hrilh ve deuh dap loh chuan a lungawi lo palh ang. Ani tih lungawi loh hi ka thil hlauh ber pâwl a nih bâkah min han hauh ve deuh khur pawh hi nuam tihna chin ka nei ve tlat. Min duh ve tâwkah ka ngai mai, chuti ni lo se chuan min hauh a ti na peihin ka ring lo.

Lalrina chu chawhnu dâr 2-ah a rawn kal ta ngei a, Jason-a phei chu a lo thleng daih tawh nghe nghe. Thingpui kan in phawt a, ka nu a awm ve reng sî avàng chuan in chung lama chhohpui mai țha ka ti a, kan chho ta a, Jason-a pawh a rawn chho ve tho; mahse, nakinah chuan ani pawh hi a chhuk leh tho a ngai ngei ang.

Nihliap lian pui hnuaiah chuan kan țhu a, hrilh nghâl vut thu awm hek lo le, eng eng emaw kan sawi mai mai phawt a. Jason-a chuan thawh chhuah pah chuan ka kut a chelh chu la kãngin a han fâwp zauh a," Tui in tùr ka zu la ang e," a ti sup a, min en leh vang vangin a kal sawn zui ta nghâl a, kha maw, ka duhlaia hi chu mi pângngai chung lam a ni ka tih tawh kha, Lalrina thil hrilh tùr chuan hun min pe a ni tih ka hre thiam nghâl a, chutih rual erawh chuan a thîkna a la reh lo tih pawh ka hre chiang leh khawp mai.

Jason-a liam hnu chuan," In hlim zêl a, ka lawmpui che u," Lalrina chuan a ti sap a, kei pawh chuan," Ka lâwm e," ka lo ti ve mai a, chutah, pehhêl kual tawh lo chuan ka thil hrilh tùr chu ka sawi țan ta nghâl a. Ka sawi zar zar a, lo inrwlh lêm lo chuan a lo ngaithla mai a; mahse, a rilrua a thawh dàn emaw a ngaih dàn emaw ka hre thiam lo, a mit meng ka en ngun viau pawh chuan ka man thiam chuang hauh lo.

"A khawngaihthlâk reuh ka tia, a chĕr reuh bawk si a maw, 'Renew leh rawh u' ka ti a ni miah lo, a thil min hrilh ka hrilh leh mai che a nih chu. Han ngaihtuah vang vangin amahah han inchan ta ila duh thlan tùr chu a vâng ve khawp ang, kei ni ta ila a tih ang tho hian ka tih ka ring asin," tiin a tàwp chu ka khãr țha leh a, a la țawng chuang lo, a la ngawi ngal mai.

*MITA HMUH THEIH HMÈL MAWINA HIAN MIT A LA A, MITA HMUH THEIH LOH CHHÚNGRIL ȚHATNA ERAWHIN THINLUNGAH THU A SAWI ZÂWK ȚHÌN*