☆SUMRISANG☆ - 24 By Dingdi Pachuau

☆SUMRISANG☆ - 24 By Dingdi Pachuau

Chumi ni ațang chuan Lalrina chu ka hmu ta lo vang vang a, ka thil hrilh vàng khân a thinrim nge thinrim lo pawh ka hre thiam lo. A rilru hriat tumin a hma zawng aiin țhianho group-ah ka lang nasa a; mahse, ani erawh chu a rawn lang tam lo khawp thung, a ngaihtuahna a buai kual vêl a nih ka ring ve ringawt. Ka sawi tùr chu lo awm ve lo mah se ka rilru chhûngril takah chuan inpawm leh thei se chu ka ti, an induh tawn ve țhìn si a. A hma kha chuan Lalrina'n Vli a kawp theih nghâl vat avàng khân runluih nân Jason-a hial ka țahawh kha a nia, tunah zawng a hma zawng aiin ka hlim tawh a, ani chungah ngei pawh rilru chhia ka pu thei tawh lo, ka țhian a nihna lah a bo chuang lo va, hlim takin awm se ka duh a ni mai.

Jason-a'n," Eng thil nge maw i ngaihtuah le? Min en teh," tiin ka khabe chu a rawn kuai her a, ka bula a rawn țhut lai ka hre miah lo niin. Vli leh Lalrina awm dàn tùrah chuan duhthu ka lo sãm vêl a, hlim taka awm dùnin an țhianteho pawh kan lo hlim dar dar viau a ni.

Ka nuih sak a," Englo maw le, Lalrinate pahnih chanchin tùr kha ka lo ngaihtuah mai mai a, i lo țhut lai ka lo hre miah lo nia," ka ti a, a rûk tak chuan ka inthiam lo viau mai, amah ngaihtuah chang lo lêka thil dang daih ka lo ngaihtuah chu a thinrim loh hrâm ka beisei.

"Engti zâwngin maw?"

Ka hrilh ve ta a, Vli thurûk ber erawh kha chu ka hrilh chuang lo, ani pawh chuan," A lo nih tak chu maw le; mahse, lo ngaihtuah buai chiam a ngai dâwn em ni? Puitling ve ve an nia, an duh hre rual an ni bawk a," a lo ti ve mai a, ka thil ngaihtuah avàngin a thinrim lo tih ka hriat chuan ka rilru a hlim sawt a, a bianga fawh zauh pah chuan," Duh loh theih loh pa, engtin nge i rilru hi a zàu êm êm theih bîk le? I thinrim mai ka lo hlau deuh ania," ka ti sap a, nui sângin lungawi zet hian a hmêl chu ka thlîr vang vang a.

"Khatiang khân min en reng suh, ka rilru i tidanglam palh ang e!" a hnua a rawn tih chuan," Engtin nge ka en che? Han sawi teh, mawh, sawi vat teh," cho zet hian ka ti lêt a, min en vang vang phawt a, kei pawhin ka en lét kar tho. Chutah, ka beng bulah rawn kûn hnaiin," A bedroom ruih mai," a rawn ti ta sup a.

Chu pa mai mai chuh! Chutiangin ka en lo hrim hrim! A bâna chumsakin ka melh rum a," Dâwt sawi suh, i va sual tak!" ka ti a, ka chum nat lutuk erawh ka hlau ve tho a, tlêm chuan ka dìm ve deuh chuan ka hria. Ani erawh chu a lo nui hawk hawk a, min fiam mai mai a ni tih pawh ka hriat phah. Chu pawh chu lo ni se en bedroom tih chu hur mit meng tihna a nia, ka duh chuang lo.

Chutih lai tak chuan a phone a rawn rì a, phone a la chhuak chu caller id ka va ensak ve kher pek a, Hriatpuii a ni tih ka hmuh chuan ka tûm deuh hmak a, he nu hi, ka thîk lo thei lo. An inbe rei lo nain an inbiak chhûng zawng chuan ngun zetin a hmêl chu ka lo en ru reng a, duh hmêl leh hlim hmêl a pu em tih ka lo enthla ve a ni.

"Eng chungchângah nge hmuh che a duh a?" an inbiak zawh chuan ka lo ti nghat a, ka hre ve duh alawm. Kei pawhin Lalrina nèn kan inhmuh dâwn pawhin ka hrilh thlap a nih kha, min hrilh ve ka phût tlat a ni, ka inthiam lo bîk lo.

"Hna lam chungchângah a pain min hmuh a duh ni àwm tak a ni," a tih chuan," Engati nge ani kherin a rawn hrilh che a? A mamawh che a nih chuan a pa chuan rawn biak zâwk àwm tak che a nih vei nèn, a mak hle mai," awmze nei zet hian ka lo ti ve ngat a, ani pawh chuan," Nia, a pawimawh a nih chuan min la rawn be mai ang chu," a ti ve leh mai a. Chutah, min rawn enin a han meng zîm deuh a," Ani kherin min rawn bia chu i lungawi lo deuh a ni maw?" tiin a mit chu min siai zui sak a, kei erawh ka lo meng tãl tap ringawt.

"I lungawi loh hi chuan nuam ka ti ngai miah lo. Bâkah, ani kha thîk a ngai hleinem, ka duh chu nangmah hi i ni a, hmeichhe dang rêng rêng duh ka nei lo tih ka hrilh tawh che kha, kha ka thu sawi kha a la ngai reng. Tu hmeichhia pawhin min lo bia se thîk an ngai lo, ka thinlungah hian i lal ber reng ang," ti duahin ka kut chu a la a, a thin zâwn chu min dehtîr zui a, a thin phu dap dap ri ka hre zui nghâl.

"Ka hre tho a; mahse, ka thîk lo thei lo a ni, thîk loh chhin lawh ka tum ngai lo, ani nèn phei chuan in inkungkaihna a țhat hmèl bawk si, kan inngaihzàwn hma ațang daih tawhin in inhria a, IG lamah pawh in thlalâk i upload a, dik tak chuan ka thîk ve chiang êm a ni," tiin ka chhâng leh a, ka rilru dik tak ka hrilh hrehna chhan tùr ka hre hran lo.

Min kuah a, ka hnung chûl hoh hoh pah chuan," Ka va duh reuh tak che êm! Zêp hnìhnè nei bawk si lo, rilru tlang, rilru thianghlim leh fel, nang ka nei che hi chu mipa vànnei tak ka ni," a ti sup sup a, min fakna chu thu dik lo mah ni se nuam ka ti tho tho, thu tak tak ni phei se chuan...

Tunah chuan ni tin ka thil zirna lamah ka chhuak ve tawh a, ka țhiante erawh eng nge ka zir tih ka hrilh lo, Lawmpuii leh Fiona-i'n min nuih leh palh ang, an sual ropui mai si a, ka thiam tak tak hun, ka zir chhuah hunah pawh anni pahnih hi chu ka chei duh miah lo ang, min lo țahawh ngawih ngawih ta a nih pawhin chhe deuhin ka chei dùn ang.

Zan khat chu Jason-a lo lêng chuan," Thla a êng lutuk asin, in chungah thla êng kan han làwm dâwn em ni ang?" tiin min sâwm a, in tùr kengin kan chho a, a lo êng nuam khawp mai lah tak a, ràl lehlama high mast chuan a rawn èn phâk tho nain thla êng chu a hliah thei chuang lo.

"A êng nuam hle tak mai. Current hi off vek ila a nuam zual ngawt ang," ka ti a, Jason-a nghèng chuan vàn lam chu ka hawi a, thla bial zàn a ni a, arsite pawh an lang ve tho nain an êng lo riau, thla èn ţhat êm vàng chuan a ni ang. Khua a thiang êm êm a, chhûm hmuh tùr pakhat mah a awm lo bawk.

"Kan han off-tîr vek mai dâwn em ni ang? Mimal tinte ka'n phone kual ang e," nui hawk hawk chunga a tih chuan," A hautak ve ngawt ang le, ngai tak tak ta se, thla êng pawh kan làwm hman miah lo ang," ka lo ti ve a, kan nui dùn bãwk bãwk a.

"Vawiin chu office-a kan thawhpui U Siama pa damlo kan kan a, an khawngaihthlâk tak tak a ni, ngawi lawk, ka hmuhtîr ang che," tiin a phone chu a han phawrh a, a han hmet zung zung a, video pakhat hi min entîr ta a. Hmeichhe naupangin putar kut leh ke chu a lo hrûk faisak a, putar mu reng chu Siama pa chu a ni ngei ang. Hah hmèl tak hian a thaw leh kâwk kâwk țhìn a, hmuh a nuam fahran lo, a khawngaihthlâk ka ti a, a bula awm pawhin rilru a hrehawm duh ngawt ang. Hmeichhe naupang chuan," Àpu, tuar hrâm hrâm rawh aw, i dam leh thuai mai ang. Pathian hnênah kan țawngțaipui reng che a nia," a ti vei reuh a, a pu chuan chauh hmêl tak hian a tunu ni ngei tùr chu a en ve reng a, a chau deuh ang a, a țawng peih kher lo pawh a ni maithei. 

Naupang chuan," Àpu, hla ka saksak ang che aw, i duh deuh țhin kha a nia," a ti leh a, a pu lu chùlsak pah chuan 'Isua hnênah ka him ang' tih hla kha a sa a, a pu mittui chu a tla zawih zawih a, hmeichhe naupang pawh chuti tho, sak pawh a sa tluan thei lo nghe nghe. Kei ngei pawh lungchhiain ka mittui chu a lo tla ve zãwih a, en pawh ka en chhunzawm thei ta lo nghe nghe a, phone chu Jason-a ka pe ta ringawt a ni.

Insùt hraih pah chuan ka mittui chu ka han hru a," An khawngaihthlâk hle mai, ka khawngaih tak zet a ni," ka ti sap a, ani chuan duat zeta hnung lam ațanga min rawn kuah pah chuan," Ka nautê hi chu, i thinlung hi a nêmin a va thianghlim tak êm!!" tiin ka chhîpah chuan a khabe chu a rawn nghat a. 

"Ni lo, mi rilru sak ber pawhin an khawngaih putu tho ang," ka lo ti leh sap a, ka mittui rawn luang chu ka han hre leh a, ka hnár pawh a ping nghâl țûp thei nia. Jason-a bul a nia, mittui tlâk chu ka zak lêm lo.

"Khawi maw," tiin min kuai her a, ka khabeah chuan rawn dawmin min en vang vang phawt a, chutah, muangchâng hian ka chalah a rawn fâwp ta a, ka lo țah nuih deuh hak a, a duh tâwk mai dâwn emaw ka tih lai chuan ka mit vei lam hnâwng chep chu a rawn fâwp leh a, chutah, ka mit ding lamah. 

Chàwl deuh datin," Ka Chhimbãl te-reuh-tei!" ti leh sapin a âwm nghèng chuan min pawm ta hlè hlé a, he lai hmun hi ka himna kulhpui leh ka thlamuanna hmun chu a ni chiang alawm. Nuam ka ti a, ka him veng veng țhìn a ni.

"Chhimbãl ber kher, han sawi fiah nghâl vat teh," ka ti a, a lo nui hawk mai. A thinphu ngaithla pah chuan," He thil hi keimah vàngin a phu rang ve țhìn em?" ka han ti leh daih a, a thinphu hi ka lo ti rang ve țhìn rêng em tih ka hre châk tlat.

"Teh rêng mai, kan han test dâwn em ni?" a rawn ti a, min kuahna chu thlahin min en vang vang phawt a, chutah, ka kut chu a la a, a kawr tlâng lam ațang chuan a taksa lâwng tawk thei tùr chuan min zen chhohtîr ta mai, a taksa lâwng ka han dek chu ka za chuai maiin ka hria a, ka tàwp nghâl chat bawk.

"Tihchi loh lutuk!" ka ti sap a, ka kut pawh ka la lêt nghâl vat bawk. A lo nui hawk a, a hmêl pawh en ngam lo chuan," Hetiang chu a țha lo ang," ka ti leh a, tunah tak hi chuan a thinphu aiin ka thinphu a ran ka ring daih zâwk! 

"Nula thianghlim!" a lo ti sup a, min rawn kuah leh a tum pawh chuan ka lo țang deuh hlek a, ka thinphu rang lutuk chu a hria ang tih ka hlau a; mahse, min kuah lui ta tho. Min kuah rei deuh hnu chuan kei pawh ka țang țùng ta bîk lo.

"Hlau miah suh, engtin mah ka ti dâwn lo che," a tih leh tâk hnuah phei chuan ka kuah lêt ve ngam leh ta a, kan inkuah chial leh tâk hnu chuan," Le, chhimbãl kha, sawi fiah tawh la," ka ti ta a.

Thâwk a la phawt a," Chhimbãl hian rawng hrang hrang a nei a, rawng hrang hrang mumal taka a inrem khâwm hian a mawi êm êm mai a ni. A mal tê tê pawh hian an mawi a, an màwi dàn erawh a inang lo vek thung. Mi țhenkhat chuan țing rawng kan tih mai hi mawi an ti lovin an ngaina kher lo maithei; mahse, a tel lo chuan chhimbãl rawng hi a kim thei tlat lo thung. Chutiang chiah chuan nang pawh hian rawng chi hrang hrang i nei a, a chângin i thin a chhia a, a chângin i zaidamin i nun a nêm leh viau a, a châng lahin i luhlulin mi ngaihsakna nei lêk lo leh mi engah mah ngai lo ang hmiahin i awm thei bawk a. Chutianga nungchang hrang hrang inpawlh khãwm chu nangmahah hian a awm vek a, țing rawng ang mai khân i thinchhiatna hi ngainatawm loh châng awm mah se nangmah ti-nangmahtu kha a ni tho a, khami tel lo kha chuan i kim thei hauh lo. I têt lai ațang tawha thinchhe ve tak kha i ni a; mahse, i inhmeh tlat, nangmah kha i ni reng tho a, duh loha paih bo theih i ni chuang lo. A kual thui duah duah i ti lo maw?" a rawn tih chuan," I hrilh fiah thiam hle mai, a ngaihnawm ka ti," ka lo ti a, chutah," A nih, eng rawng nge Chhimbâlah chuan mawi i tih ber?" tiin ka záwt lêt zat a, ani chuan," A vaiin le, țing rawng pawh rawng dang zîngah mawi lo ber angin lang mah se a tel lovin Chhimbäl a awm thei lo," a lo ti khauh a, lungawi zet hian a âwmah chuan ka bei hlè hlê a.

Zàn khat chu ka mu țêp tawh tihah hian Vli'n min rawn phone teh tlat a! Mak ti zet hian ka phone chu ka en rèn ràwn phawt a, a hnuah ka chhâng ta chauh a.

"Engtin nge ka tih ang?!! Lalrina'n inhmuh a rawt a, naktûk chhùn khian. Ka hmu ang em? A chunga ka thil tih vàng khân la thinrim rengin min hmuha min chhuahchhàl a duh em ni zâwk ang?" a rawn ti teh ngawt mai a, a awka chhuak ațang lah chuan a hlauhthàwn hmel viau lehnghâl a, engti tiha kei min rawn râwn daih nge maw a nih ni.  Lalrina chuan ka thil hrilh kha a âwih tihna em niang? Zawh chian tumin inhmuhpuiah a sâwm a ni ngei ang, umm, step khatin hma kan sâwn e.

"A thinrim hmèl em?" tiin ka han záwt phawt a, ani chuan," Whatsapp lamah min rawn text a, kei chuan ka be hmasa ngam tawh teuh lo mai!" a rawn ti leh a, kei chuan lu bu nghat nghatin," A țha lamah ngai ang, chutiang lamah chuan ngai lo phawt la, ani berin inhmuh a rawn rawt chuan hmu mawlh rawh, a thinrim pawhin dawhthei zâwkah i țang ang a, ngaihdamte i dîl bawk ang a," tiin ka hrilh malh malh a.

"Mahse, Tluang, hmuh châk viau mah ila ka hreh ru ngawih ngawih! Mahse, Aizawla ka awm remchàn laia ka hmuh loh chuan hmuhna hun ka nei tawh kher lo maithei bawk si a, hmu tùr chu min duhpui chiah maw?" a rawn tih leh chuan a rilru tùr àwm chu ka hre thiam ve ruak a, ka khawngaih ru viau mai bawk.

"Aw, inhmu rawh u, puitling ve ve in ni alawm," ti ringawtin ka chhâng a, ka sawi thui duh lo. Beiseina siamsakin ka ti-beidawng leh si ang tih ka hlau a ni, an inhmu ang a, an inbiak chhoh dànin an hma lam hun tùr chu hril teh se.

Chhûngril lamah ka lo phùrpui ve tawp a, naktûk lama an hun hman chhoh dàn tùr chu ngaihtuahin ka muhìl har hrep lehnghâl, an inkâr boruak țhain inkawp leh thei ngei se tih chu ka duhpui tak zet a ni.

Ka lo helhhawlh a ni chêk ang chu, a tûkah pawh chuan kan thil zirah chuan ka rilru ka pe thei lo va, ka rilru hmun dang daihah a awm ti ila a dik ang. Chhùn a lo nih phei chuan an inhmu tawh ang em, an inbe tawh ang em, tu nge țawng hmasa zâwk ang tih vêl mai maite chu ka ngaihtuah a, Lalrina chu mipa a nihna ang leh inhmuh rawttu a nihna angin a țawng chhuah hmasak chu ka'n ring deuh teh ngawt a.

Tlai a lo ni a, Vli'n min rawn be mai si lo va, va biak ngawt lah chu ka hreh ve deuh bawk si. Lalrina va zawh lah chu a tihchi rih miah loh, an inhmu dâwn tih ka hria ang tih pawh a ring pha tawp nâng, Vli kher kher pawh chanchin min rawn hrilh ve vat tùr a nia, a ti ang lo êm mai.

A reh vang vang a, a reh rei êm avàng chuan an inkâr chu a țha lam a nih ka ring ngam ta lo a, țha lam ni se chuan min rawn hrilh ve vat ka ring, an inhmuh hnuah a rilru a hrehawm ang a, min rawn hrilh duh ta kher lo a ni ang ka ti ta a ni. Ni e, ka lo buaipui chiamna tùr a awm hleinem, ka duha ka suih zawm theih lah an ni hek lo, sawi tawh angin puitling an ni a, an rilru chhûngril pawh anmahniin an hria.

A tûkah zîng dâr 7 vêlah Vli chuan min rawn be ta chiah a, chhàn erawh ka phûr lutuk lo deuh, nimin lamah khân Lalrina'n a thil tih dàn a hriat thiam loh thu leh an inkâr pawh nimin avàng maia a țhat a rin chuan loh thu min rawn hrilh ang tih ka hlau a ni.

*MIIN AN TREAT DÀN CHE KHA CHU AN DUH DÀN A NIA, LO SAWI VE THEIH DÀN LEH MAWHPHURHNA I NEI LÊM LO; MAHSE, AN TREAT DÀN CHE I LO CHHÀN LÊT DÀNAH ERAWH MAWHPHURHNA PAWIMAWH TAK I NEI VE TAWH THUNG*