☆SUMRISANG☆- 25 By Dingdi Pachuau

☆SUMRISANG☆ - 25 By Dingdi Pachuau

"Tluang, ka lãwm tak zet a ni," a rawn ti phawt a, a awka chhuak ațang chuan an chanchin tùr àwm chu ka hre thiam nghâl mai a, ka nui sak nghe nghe a.

"Làwmthu rawn hrilh vat àwm che ka nih tehlul nèn, ka tlai ta deuh a nih hi; mahse, tlai tak tak a awm chuang lo tiin ka inhrilh a, rilru leh thinlung takin ka lãwm tak zet a, làwm thu ka rawn hrilh che a ni. Nangmah vàng liau liauin Lalrina nèn kan inkârah inhriat thiamna a awm leh theih phah a, ka țhian i ni hi Pathian ruat liau liau a lo ni ka ti lo thei lo. Thu mu hnu mah ni se i tân khân ka ngeiawm dâwn tehlul nèn, chutiang chuan min en ngai miah si lo va. Mi fel tak chu i lo ni, i chungah hian ka läwm tak zet zet zêl dâwn a nih hi," awka zãngkhai vaha a rawn tih leh chuan," A țha e, a làwmawm a nih chu. Kha lam kha chu duh tâwk ta ila, nimin lama in boruak kal chhoh vêl dàn min han hrilh chiang phawt teh, ka hre châk lutuk a," ka lo ti ve thung a.

Kimchang takin an inhmuh dàn leh an inchhàn vêl dàn chu min hrilh a, a tìrah chuan Lalrina chu a țawng țha duh vak lo va; mahse, dawhthei taka ngaihdam dîla thil awm dàn dik tak a hrilh fiah leh kêlh hnuah chuan Lalrina chuan hun kal tawh chu hun kal tawh a nihna anga liamtîra thil thleng chu phùm bo hmak a duh thu a sawi a, an boruak țhat chhoh chiah dàn nia a sawi chu," Lalrina'n,' Tunah hian kawp lai i nei em?' tia min zawh thut chuan mak ka ti rilru khawp mai a, ka neih loh thua ka chhàn chuan,' Kei pawhin ka nei lo, a thar zawn leh ai chuan inkawp leh mai ila?' a rawn ti a, ka en hau a, mak ka tih êm avàngin chhàn pawh ka chhâng lawk lo nghe nghe a ni. A hnuah chuan,' Min duh thei tawh dâwn em ni?' tiin ka zâwt sap a, dik tak chuan ka âwih ngam lo a ni, min pawm leh theih kha ka ring phâk lo. Chumi hnu chuan kan boruak chu a nuamin  tlêma tìmna deuh nei mah ila amah zâwk chuan chutiang ka boruak chu hria angin a awm duh hauh lo thung a. An inah min hruaiin zanriah pawh ka ei nghâl daih, ka hnial chung chung pawhin ka haw a phal mai si lo va, nizànah pawh dâr 10 rîk dâwnah chauh min kaltîr phal ve ta hrâm a ni," tiin hlim tak chuan an hun hman dàn chu a rawn sawi siam siam a.

"Engtikah nge țhianzaho kan inhmuh khâwm leh theih ang aw? Hun remchâng hmasa berah làwm ila? Kan inhmu khâwm khât tawh bawk alawm le," a hnu deuha ka tih chuan," Awi, i ti zahthlâk e! Țhiante hmuh pawh a inthlahrunawm zo vek tawh, min ngaih dàn tùr lah ni se ka hre ve vek tho si a," a lo ti ve thung a, kei erawh chuan," Thil nih dàn dik tak an hriat loh vàng a nia, kei pawh ka hriat hma zawng kha chuan ka ni ve tho a," ka lo ti leh a. Hnial deuh mah se țhianho inhmuh khâwm chu țha ka ti tho, ka la rawt ngei ang.

An inrem leh thei ta chu ka lawmpui khawp mai. An pahnih hnihin ka lawmpui, hrehawm an tuar ve ve a, induh tawn reng chungin an ințhen a ngai a, an ințhen hnuah ni se mi dang an ngaihven chuang lo va, hun äwl an inpe ve hlek a ni mai a, chutia an inkâr a lo fel leh thei ta chu țha ka lo ti ve êm êm mai a ni. 

Zan khat chu zanriah ei kham hnu deuh lawkah Jason-a a rawn lût a, lo chiauau vatin a Apple rawn ken chu ka lo lâksak vat a. Ka nu leh pa nèn an titi laiin keiin an in tùr ka lo buaipui a, chutih lai chuan doorbell a rawn ri ral ral a, ka nu ngaihven tùrah ka dah a, in tùr ka siam zo chu an awmna lamah ka va chawi phei nghâl vat a, ka hmuh ngai loh patling pathum lo țhu tel ve ka hmuh chuan ka hawi ã lek lek a, ka pa țhiante an nih ka'n ring ve ngawt a.

Ka kal sawn chu Jason-a chuan min rawn zui ta vat a, chokaah min rawn zui lûtin," I u palai tùrte an ni mial lo maw?" a rawn ti sar sar a, mak ti takin ka en chho hau mai! U Nubawihi palai tùrte maw ni ang?!! A va sawi ri ngai si lo ve! 

"A âwihawm loh e!" ka ti leh ringawt a, ani chuan," A nih duh hmèl êm alawm. Tih hmasak ka tum vei nèn chuan aw...!" a lo ti vang vang thung a. A hmêl chu ka la en reng a, fiamthu sawi ang pawhin a lang lo. A âwihawm loh țhìn e, inneih lam zawng ka la ngaihtuah chhin ngai lo va, fiamthu takngial pawhin la sawi ri chhin suh se.

U Nubawihi palaite chu an lo ni tak tak a, mak ka ti a, chutih rualin pasal a neih daih chuan ka ngaih dâwn bâkah ka ui ngawt ang! Aniin pasal a neih daih te chuan kan chhûngkua chu pathum chauh kan ni tawh dâwn si a, pasal nei lo hian ti hian awm mai mai rih se... ti ila a upa ve tawh tho bawk si a, ka hre thiam ta nuai lo ve, la nei lo se chu ka ti, min àwl hneh alawm.

Ka nu leh pate chuan mi tih dàn pângngai angin an lo chhâng a, 'Kan lo inrâwn khâwm ve phawt ang a' tiin, chutiang chuan chhâng mah se, an rem ti ngei ang tih ka ring nghâl thlap thung.

Vli chu ţhianho group-ah keimah ngeiin ka add leh ta a, ka add hian Lalrina nen an țha leh tawh tih mipaho phei chuan an hre vek tawh nghe nghe, an lo welcome sap sap a, an lo fiam nak nak bawk  a, Vli erawh a online hman rih lo a ni ang, a rawn lang hauh lo.

Mipaho thil sawi dàn aţang chuan hmeichhe lam pawhin thil awmzia an rawn hre nghâl a ni chêk ang chu, an rawn phûr thar vël khawp mai a, ka rawt chhuah ngai hauh lovin mi dang chuan inhmuh khâwma chaw ei khâwm chu an rawt ta mai rêng a. A phûr fâl deuh a ni ang, Lalrina'n chaw ei khâwmna hmun atân chuan an in a rawn hauh nghâl vat a, an lo fiam zui nasa mai a, kei pawh ka nuih a lo za ru viau a ni, an ina chaw ei khâwm țha ka ti reng mai a, hnialna ka nei lo, amah a inhuam phawt te chuan.

U Nubawihi palaite pawh an rawn kal leh tawh a, ka nu leh pate'n inneih dâwn rau rau chuan a hma lama tih vat țha an tih thu an sawi daih tawh a, chu vàng chuan rem thu an sawi ang a, rei nghâk lova inneihna hun kan hman thuai ka ring viau bawk. U Nubawih awm lo tùr chu ka lo huphurh sa êm êm ringawt mai a, ka lo ur lâwk a ni ber ang chu, palaite pawh chu ka lo ngei ru deuh țûn mai a ni.

Lalrinate ina chaw kan ei khâwm dâwn ni chuan kan phûr tlâng hlawm bawk a, an in pawh kan thleng hma hlawm viau asin. Kan vànnei kan ti dâwn nge ni, a pa a lo awm lo va, chutih rualin a farnute pawh inneihna lamah an kal a, ruai an țheh nghâl dáwn ni àwm a ni. A tihchi viau mai, han zah deuh tùr leh mitmei vèn deuhna tùr an awm dâwn si lo va.

Mipain rawng an bâwl a, phûr takin an che sang sang a, Jason-a pawh a bãng lo. A che vêl chu duh tak leh ngaisâng tak hian ka lo thlîr leh doh doh țhìn a, tunah hi chuan ka bialpa der ni tawh lovin ka bialpa tak tak a ni tawh bawk a, duh tak takna mit mengin ka en thei tawh a, a der kha a ngai tawh lo.

"A mak ngawih ngawih! In induh tih chu kan hre ve tho," Fiona-i chuan ka beng bulah chuan a rawn ti sap a, chutih rual chuan ka thlìrna lam thlîr thei lo tùr chuan ka lu chu min her sawnsak bawk a, Lawmpuii ve thung chuan," A, a duh tâwk khân han thlìrtîr mai mai teh, a la duh ve êm rih a nih kha. Nakinah chuan e, melh pawh a melh peih tawh nâng," a lo ti a, Athui chuan zàwi deuh hlek hian," Tlêm laia a zin bo daih chhan kha han sawi ula?" a rawn ti sap a.

Thil hi an inti hre hlawm bawk sia, an lo hre tak tak em maw ni ka ti ru hial mai! Mahse, hriatna chhan tùr an nei ngawt lo tih ngaihtuah chhuak lehin," Han sawi ula?" cho fê hian ka ti a, Hazel-i chuan," In-break ve zauh hun lai hi chu inlaichìnnaah hian awm ve tùr rêng a nia," a lo ti nghat a, mi dang pawh chuan," Dik chiah," an lo ti tliar tliar a. Fiona-i chuan," Khatih hun lai khân in in-break kan ti pawh a ni chuang lo va,"  a lo ti leh a, an inmelh kual a, an nui țha duh hauh lo lehnghâl a, an lo hre ru reng em maw ni le, an sawi chiang chiah duh bawk si lo va, an chimawm hlawm a nia.

"A, ani chanchin hi chu sawi tawh lo teh ang u, khawiah nge a changtunu ber pawh hi a awm le?" Hazel-i chuan a rawn ti ta hlauh a, Athui chuan," Lalrina nèn an chhuak lawk a ni lo'm ni?" a lo ti vat a, Lawmpuii chuan," Hmm... he mite pahnih hi an inneih thuai ka ring deuh tlat, lo ngai reng mah rawh u, ka sawi sual miah lo ang," inla confi zet hian a han ti sar sar a, chutih lai chuan an sawi mêkte pahnih pawh chu an rawn lût ve chiah a.

"Mi chhe sawi chu koh aiin an hnai," ka lo ti sap a, anni pahnih lah chu an rawn inkai rial zui a, kan lo en duh viau hlawm ni maw, Lalrina chuan," In Chawngkawr mit hrê hrû hlawm chu, a va hlauhawm ve!!" nui deuh sûng chung hian a rawn ti a, Fiona-i chuan inla fel zet hian," E, kan hre thiam lutuk che u, in duh tâwk khân inlàwm rawh u, a hawsan țêp tawh che kha, ãm takin le," tiin a lo chhâng nghâl vat a, Vli chu a zak ve tho a ni ang, sen deuh ap ap hian Lalrina lam chu a en chho ta daih a. Ani chuan," In va fel tak! Ni e, min hawsan țêp tawh si a, neitu chan changin min lo àwl zêl mai a ni ang chu," a lo ti thên a," E, kan àwl thei lutuk che u a nia, inthlahrung rêng rêng s'u, tih tùr pawh a awm tawh loh hi," ka lo ti ve a.

Nuam ka va'n ti tak! Lalrina leh Vli ai chuan nuam ka ti lo bîk miah lo ang. Thla kan la a, video-in kan ti thùl, nuam kan ti hlawm viauin ka hria. Chaw ei khama Vli nèn kan țhut dun zawk lai chuan," Hmaichhanah ngei hian làwm thu ka'n hrilh leh teh ang che, ka lãwm lutuk! Nangmah vàng chauhin hlim takin hun kan hman leh theih phah si a," a ti sep sep a, kei erawh chuan," A, țhian kârah làwm thu inhrilh a ngai teuh lo mai! I haw dâwn tak tak maw?" tiin thil dang ka sawipui daih a.

"Aw, chu chu alawm, ka huphurh rualin Lalrina hian ka awm lo rih tùr chu a huphurhin ka haw chu a rem ti lo viau a, ka nuin haw tùra min tih miau avàngin tih vak ngaihna a hre si lo; mahse, ka lo lêt leh thuai chuan ka ring," tiin min chhâng a, chutih lai chuan Lalrina chu kan bulah rawn kalin," In va sawi ril àwm ve! Tluangi, i țhiannu kha a haw loh theih dàn tùr han ngaihtuahpui teh, a haw tùr hi ka lungngaih chu thuhran, ka ngaih a țha lo deuh tlat a," a rawn ti ngal ngal a, kei chuan," Room-ah kan kalh khung tlat mai dâwn em ni ang? A nih loh pawhin an phuar bet ang a, kan khai kãng ang a?" ka lo ti a, ka nui pah a. Vli chuan," A ngaih hi a ti țha lo ringawt a, rei tak ka châm dâwn pawh a ni tawp si lo," a lo ti a, Lalrina chu duh tih hriat tak hian a en a, ani lah chuan thlahlel tih hriat tak hian a lo en lêt ve bawk a, an rilru put dàn tùr chu ka hriat thiampui pha ve ruakin ka hria.

Kan haw har vak loh avàngin ina haw tlang nghâl mai lovin kan tlãn kual leh rih a, boruak chu nuam ka ti viau mai, chhùn lama boruak lum hulh hulh kha a bo zo tawh a, ka bulah ni se ka mipa duh ber mai a țhu bawk si nèn, nuam vang vang tak hi a ni ringawt.

"Vlite nèna in țhutho lai khân eng nge in sawi?" a rawn tih chuan," Eng vak mah, a haw tùr thu vêl mai mai maw le," ka lo ti mai a, ani erawh chuan," Chu chauh chu maw?" a ti leh a, en phei vatin," Ni chiah lo deuh, an pahniha an inkawp leh theih tâk avàngin làwm thu min hrilh bawk a. Chuan, Lalrina khân Vli haw tùr a huphurh thu a lo sawi ve bawk a," ka ti ta duah a. Lalrina thîkna rilru a la pu reng tih ka hre chhuak leh zawk a, nui chung hian a kutah va chûlin," A mak thei! Lalrina kha i la thîk reng tih sawi miah suh, Vli nèn an inkawp leh tawh hi, an induh tawn mahnâk laiin, keiin nang ka duh êm êm bawk che a," ka han ti hnâp a.

*******

U Nubawihite pawh thlaleh ni 30-a innei tùrin thu an ti tlu ve ta rup mai le. An hmanhmawh leh lutuk chu ka ngaih a țha lo va, chaw ei laiin," I rai a ni lo maw?" tiin ka zâwt pek a, min rawn melh nasa mai! Ka pa chu a lo nui a," A ni ngei ngei ang," a lo ti ve bawk a, kei chuan," An hmanhmawh êm alawm, hmanhmawh deuha mi an inneih rum rum hi chuan a hmeichhia hi rai sa a ni duh ëm a," ka ti leh a, U Nubawihi chuan," Ka rai lo, rai sa ni ila Biak in hawngin pasal ka nei thei nâng," a lo ti ve a.

"A, innei an awm ve tho ang, rai sain an inneih fo hi," awlsam zetin ka lo ti a, ani chuan," A âwihawm loh, rai sa tân Biak in hawngin pasal a neih theih loh," a ti ve thung a," A, rai saa innei ka hre ve nual aw, a hmain ka țhiante pawhin an sawi. Ih, an inneih ațanga thla riatnaah fa an nei nghe nghe a ni àwm e," inti hre zet hian ka ti leh a. U Nubawihi chuan," Ka hre lo le; mahse, kei chu ka rai sa lo tih lo hre ve mai mai la aw," mit ko sàn ãka min rawn en phei hian a ti leh a.

Chumi hnu lamah chuan ka nu chuan kan unau chuan thu țha min hrilhin min zilh leh ta a," Biak in hawng ngeia inneih theih hi a ropuiin a hlû a, chutih rual chuan vànduai vànga rai saa pasal nei ta pawh an inneih hnua an nun chhoh zêl dàn azirin ngaihnêpa ngaihnêp loh chi an awm leh a. Biak in hawnga inneia a hnu lawka  Pathian leh kohhran mite hmaa thu tiam bawhchhe nghâl an awm thei a, biak in hawng lova inneia inngeih leh inhmangaih taka dam chhûnga innei ta pawh an awm tho a, inneihna ropui tak hian inneih rei hun tùr a hril lo va, Pathian hi dah pawimawh ber êm êm phawt tùr a ni," a ti dap dap a.

Jason-a rawn lêng chuan," I uin kumina pasal a neih chuan keiniin kuminah kan ti ve thei lo ngei ang a, nakkum kan nghah mai a ngai dâwn ta tihna a ni a, ka thin a rim ngawt mai,'" muang charh hian a han ti a, kei chuan en vatin," I ti râpthlâk e a, pasal neih lam ka la ngaihtuah ngai hleinem," ka lo ti ve thung a.

"Lo ngaihtuah țan tawh rawh, zanin ațangin."

Min rawn en kur avàng chuan ka ner khum sak a," Pasal nei tùr pawhin hlawh ka la neih ve loh hi, hlawh ka neih ve hunah le," ka ti leh a, ani chuan," Hlawh neih kher a ngai lo. Nangman min chãwm dâwn hleinem," a lo ti ve thung a.

"A, ka tân eng mah thawh chhuah neih loh chu, i nupui ni tlâk ka ni dâwn hleinem, tuna ka thil zir hi ka zir zawh hunah ka han practice ve ang a, tlêm tlêmin pawisa pawh ka thawk chhuak ve thei bawk ang a, chumi hunah chuan a zia deuh ang, kum li kum nga vêl a la ngai dâwn a nih chu," ka tih leh chuan a lo chek tlak tlak a.

"Chutiang...A rei lutuk! Ka putar hman tawh ang," a lo tih chuan za tak hian ka lo nui awr awr a, kum nga hnua putar tum nghâl ringawt te chu a, a la tlangvâl dâwn chauh alawm.

*HMUN NUAM LEH HAHDAMTHLÁK KAN TIH HI A HMUNHMA LAM AI MAH CHUAN KAN BULA AWMTE AZIR LEH KAN RILRU AZIR MAI HI A LO NI*