☆SUMRISANG☆ - 26 By Dingdi Pachuau

☆SUMRISANG☆- 26 By Dingdi Pachuau

U Nubawihi pasal neihna tùrah chuan inbuatsaih vak dàn ka hre lêm lo va, in leh a vêl ni se a fai sa reng a, man eitu leh chhûngkhat laina hnai ei tùr lo inchhêkkhâwl ve deuh kha kan lo inbuatsaih theihna ni maiin ka hria. U Nubawih chuan kawr a duh dàn thlapa a design chu a hmain a lo țhuitîr diam tawh niin, ka kawr tùr leh ka nu kawr tùr pawh chu a lo țhuitîr tho a, chu pawh chu min hrilh miah lo, kawr thar ka nei leh dâwn tihna. Inneihna lo awm țhìn pawh hi kawng țhenkhatah chuan a țha riau, kawr thar neihna hun țha a ni ve tlat.

Vli haw ațanga kâr khatna vêlah, zàn khat chu min rawn be teh tlat a, group-ah hi chuan a rawn lang ve zauh zauh tak nain inbiak tak hi chu kan ti meuh lo va, kei pawhin mak ka ti deuh rêng a ni.

"Tluang, ka rilru a hrehawm ngawt mai. Lalrina lunglêngin palai rawn tirh a tum ngawt thu nichin khân min rawn hrilh a, engtin nge ka tih tâk ang? 'I rawn haw har si a, hetia palai ka rawn tirh hian ka rawn hruai ngei an ngai ang a, remchâng takin ka rawn hmu pah thei dâwn che a ni mai a' a rawn ti a, 'A la hun rih lo tunah chuan' tia ka hnial deuh lah chuan 'A pawi lo, ka hmu thei dáwn tho che a, bâkah, hlawhchham tùr tal pawha rawn tîrh ka tum tho tho' a ti mauh mai si a, hnial leh ngaihna pawh ka hre tawh lo. Ka khawngaih lutuk tho a; mahse, tûn dinhmunah hi chuan pasal nei thei niin ka la inhre chiah bawk si lo, ka rilru a ti buai, a rawn ti mai mai lo niin ka hre bawk si a," thaw deuh hlap hlap hian a rawn ti barh barh a.

"E, inneihna hun nuam tâwkin kan hmang thuai dâwn tihna a nih chu!" awlsam zet hian ka lo ti a, ani erawh chuan," Tluang...!!" a rawn ti țhat a, ka lo nui hak a, rawn țawng lehin," A hma khân a sawi thawi tawh a, ka haw hma khân; ka nuih mai a, a lo ti tak tak a ni ngei ang. Dik tak chuan hlawhchham tùr tih hriat saa rawn kal tùr chuan ka khawngaih lâwk a, hrehawm ka ti dâwn êm a ni," a rawn ti leh a, kei chuan thu tak deuh zâwk hian," A, hre thiam mai rawh, i dinhmun hre saa rawn tirh a tum tho chuan tih vak ngaihna a awm lo,   lo tîr se, i chhûngte pawhin an lo rem ti phian zâwk maithei asin," ka lo ti ve leh a.

"A, rem ti lo ang. Kei leh ka nu bâk hna thawk thei kan awm rih tlat lo va, ka naute pahnih lah school kal lai an la ni ve ve bawk si, ka nu nèna kan thawh chhuah tlêm tê hian kan la chãwm ve hrâm hrâm a ni," a rawn ti leh sap sap a, kei chuan," A lo nih tak chu, a buaithlâk ve rih hlê mai maw?" ka ti phawt a," Mahse, palai chu a rawn tirh pawhin thinrim phah nân hmang chuang lo la, a duh viau vàng che leh a hauh viau vàng cheah i ngai hlauh dâwn nia," ka ti leh a.

Chumi hnu chuan Lalrina leh Vlite pahnih chungchâng chu ka ngaihtuah kual a, Lalrina chuan a duh tak zetin chàn leh mai mai  a tum tawh lo tak zet tih a hriatin ka hria, nupui atân hiala neih tumin palai tirh a tum a nia, a lo danglam hneh hlê a lo ni. Thu dik a hriat hma kha chuan Vli lam hawi kha chu a tum tawh lo viau kha a ni a; mahse, hmangaihna hi zawng, a lo mak a nih hi, thinlung a sâwi danglam vek thei tlat a, thinlung na taka hliam a nih hnuah pawh dam taka inpawm leh theiin thinlung a suih zawm leh thei a nia, a ropui êm asin.

Lalrina chuan palai chu a tîr ta ngei a, Vli nu erawh chuan palaite bulah chuan an chhûngkaw harsatna leh an dinhmunte chu tlang taka lo sawiin a fanu chu pasal nei mai thei dinhmuna a la din rih loh thu thleng chuan a lo hrilh dap a ni àwm e. Vli'n min rawn hrilh ve vek a, Lalrina sawi ang ngeiin an khuaah chuan han kal vein an inhmuh vêl dàn pawh a rawn sawi lang zauh nghe nghe. Lalrina nge nge chu, amah han inpalai làw láw zâwk se, a nu chuan a lo rem ti phian záwk lo'ng maw ka ti hial a ni.

Jason-a bula Vlite chanchin nuam ti taka ka hrilh ve siam siam lai chuan ani chuan," Anni pawh chuan min tih khalh an tum chu a nia... Engtikah nge kan tih ve dâwn?" fiamthu hmêl pu hauh lo hian a lo ti a, ka lo thaw hawk a," Ka la ngaihtuah chhin lo ka tih tawh kha, nakînah tuna ka thil zir hi ka zir zawh hnu daih lamah kan la ngaihtuah ve chauh ang chu," ka lo ti a, ani erawh chuan," Lo ngaihtuah țan rawh ka tih tawh kha, hetiang chuan kan fate'n mi fate an ngam dâwn lo tawp mai! A țha ka ti lo viau a ni," a ti leh vang vang a, a aw chhuak chu naupang lungawi lo deuha țawng chhuak hi ang ka ti lutuk a, ka nuih a zat êm avàng chuan ka nui chhuak hawk hawk nghe nghe a.

A nghâwnga kuah pah hian," Mi fate an ngam dâwn lo tih mai mai, kan fate chu kawlh viau tùrin ka duh dáwn teuh hleinem, an lo ngam loh viau tâk leh, kei an nu hian anni chhan nân chuan ka sualpui hmiah mai ang chu! an ngam lo viau dâwn a nih phei chuan an kàwm miah lo bawk ang," fiamthu țawngkam hriat miah lo hian ka ti ve ta thung a, a tukkhum sam chu ka chùlsak pah bawk a.

Ani erawh chuan," Ka fiamthu miah lo a nia. Chu, i țhiante pawhin an tum tawh a, engati nge i duh ve tlat loh? Min duh tâwk lo tihna a ni thei ang em?" a lo ti leh a, ka kuah ang ang chuan a awm tawp a, min kuah lêt ve lo. He pa pui roh hi, a lungawi loh phah ringawt em maw ni, a va ti ho tak. Hmmm... a duh leh min kuah lêt lo tawp rawh se, ka duh tâwkin ka kuah thei tho.

"Ka duh loh vàng che a ni lo, ka duhzia che chu i hriat chian tawh khawp hi maw; mahse, inneih lam hi chu... hetia min ti buaitu awm miah lova kan pahnih chauha inlawm hi ka la duh rih alawm, hun ni se kan la nei dâwn chauh a. Bâkah, nakînah ka thil zir hi ka han zir chhuak ang a, pawisa thawk chhuakin i duh zâwngte ka leisak thei che ang a, chuan, pawisa chu ka khâwl zêl ang a, kan pahnih tân leh lo la piang tùr kan fate tân chutianga thawh chu ka duh a ni, a țha dâwn êm asin, ka ngaihtuah thui i ti ngawt lo maw?" ka ti ve leh a, a tukkhum sam ațangin a bengah ka pakai phei a, a bengkâwm chu ka tuaisak neuh neuh reng a.

"Um.. Ka rin aiin i lo ngaihtuah thui daih mai! I lu bûrah hian bâwng êk khawro mai mai a lo awm bîk hauh lo nia!" tia min rawn enin a nui ta suk a," Mahse, i thil sawi tâk erawh kha chu mipa ka nihna angin ka ngaihtuah zâwk tùr a ni ang chu, ka nupui leh fanaute chu ka chàwm tùr an ni a," a ti zui leh zat a. Ka nuih sãih a, a mawhphurhna tùr a hria chu ka chhuang, a bianga fawhsak zauh pahin," Mahse, inneih lam kha chu a la hma ka ti tho tho," ka ti leh a. 

A hnu deuha,"I țhiante pahnih mawlh chu... anni pahnih ber kher lehnghâl! An fate kan fate'n an phâk lo tùr mawlh chuan a ni min ti buai ni..." a tih leh vang vang chuan a hmêl chu chiang tak hian ka en a, 'Anni pahnih ber kher lehnghâl' a ti a nih kha, chutah, thil ka ngaihtuah thiam chho ve ta chiah! Lalrina, ka bialpa hlui ni tawhin nupui neih khalhin fa a neih khalh tùr chu a la nâ tih ka ngaihtuah chhuak thiam chiah a ni. Ka lu ka thing deuh nar nar a, a va ho mai mai tak êm!! Thîk ngai miah lovah a thîk a, el ngai lovah a el bawk a, mipa hi hetiang kawngah hian tlâwm viau niin an lo inhre țhìn rêng em maw ni le? Kei chu hmeichhia ka nih vàng nge ni, engah mah ka ngai hauh lo, an duh leh lo nei diah duahin football team khat daih pawh lo nei ang hmiang, amah (Jason-a) nèn kan hlim dun phawt chuan a tâwk tiu teu viau, an inneih hmasak leh fa an neih hmasak leh hmasak loh lam chuan ka rilruah awmzia a nei lo, thîkna lah ka nei ve hek lo, an chungah erawh rilru chhia ka put loh chu thuhran, țha takin hlim takin innei thei se ka duhpui, fa pawh tam deuh nei rawh se, Jason-a nèn kan inneih ve hunah Pathianin rem a tih chuan kan la nei ve țeuh mai ang chu.

*******

Vawiin chu ni dang zawng aiin kan bâng hma a, Jason-a'n ka bàn hun min lo nghâk ziah țhìn kha a ni a; mahse, vawiin chu nghâktu-ah ka țang ve thei dâwn tlat mai. Muangchânga ka nghahna tùr lam pana ka kal lai chuan ka phone a rawn ri a, ka han en chuan Vli a lo ni a.

"I buai em?" a rawn ti phawt a, kei chuan," Aih, buai lo ve, eng nge ni ta?" tiin zãng vah hian ka chhâng vat a, ani chuan thâwk lâk hak pah hian," Englo a nia, chawhma khân Lalrina a rawn lêng a, ka nu bulah min neih ngei theih nân a khawngaihna a rawn dîl a nih chu! Sawi ngaihna pawh ka hre lo, ka lo khawngaih lutuk a!! Ka phû loh a ni tih hre mah ila ka thinlung duhna hi ka hnâwl thei bîk si lo, min neih a duh tih phei hi chu tûn thleng pawh hian ka la âwih hlei thei lo hial zâwk a ni. Tichuan, Lalrina chuan kan chhûngkaw harsatna chu kan inkâra inneih rem lohna atân leh amah hnar nân hmang lo hrâm tùrin ka nu a rawn ngèn a nih chu," a rawn ti sap sap a.

Lalrina zet chuh! A duhnaah chuan ka rin aiin a lo huaisen daih mai ka ti! Ka ngaihtuah thui zêl a, a ti țha ka ti tak zet a ni. Vli neih loh a hlauh viau chuan chu bâka kawng dang țha zâwk a awm thei lo, ru ringawt ta se, a nu leh chhûngte rilru a ti na emaw a ni ang a, thianghlim takin an innei thei lo phawt tihna a ni ngei dâwn bawk a. A, a theihtâwp takmeuh chhuahin Vli neih theih dàn a dap a, a huaisenna zawng zawng sâwm khâwmin, humsual dai miah lo lehnghâlin, a ti țha lutuk, a tih dàn hi ka rilrem zâwng tak a ni.

Chu thil chuan min ti hlim a, ka nui ru var var reng mai. An innei dâwn ngeiin ka ring, a nu tân pawh lo hnial chu a nuam lo duh dâwn êm asin, a fanuin a lo duh ve tho bawk ang a, han hnial țhak chu a ngam bîk lo ang, a hun leh nî erawh bichilh tak chuan an ruat kher lo ang, inbuatsaihna hun an neih a ngai ve ang a...

"Jason-a maw? Sawi lo mai teh!" tia hmeichhe pakhat țawng rî chuan ka ngaihtuahna ațangin min ti harh chhuak nghâl zawk mai. Tu Jason-a nge an sawi? Ka Jason-a a ni thei mai ang em? Muangchânga kal ka ni bawk a, anni pawh chuti bawk, an țawng ka hriat chhunzawm zêl theih nân ka muang zual sauh a, chu nu chuan," Chhe lo ka ti nasa!! Hriatpuii hian hauh mah mah țhìn lo phei se chuan aw... Niminte khân a hauhzia kha!! Vawi khat chauh tal pawh min han melh zauh se, ka ãwn nghâl ruai ruai thei ang chu!" tiin a nui ar ar a, a țhiannu ni ngei tùr chuan," Hriatpuii hi chu a lãr ve êm a, amah a lo chhe lo tho bawk nèn, mi dang pawh hian chuhpui enah an en lo ni maiin ka hria, a lo nasa ve tho bawk sia maw, bâkah, an awmthei bawk sia," a lo ti ve bawk a, an țawng hriat chhunzawm zêl ka duh tehlul nèn, kan kalna lam a inang tlat si lo va, an liam thleng chuan ka en zui reng ringawt a.

Hriatpuii hming an lam rîk ațang khân mi dang Jason-a a nih ka ring lo hrim hrim, ka Jason-a bâk a ni lo thei lo. Ka hriat loh lamah hian an lo la inzui fo em maw ni le? A ni ngei ngei ang, kei lah ngaihțha fêin ka lo awm der der a, ka dinhmun a lo derthãwng ru viau a lo ni. 

Tunah tak hi chuan Lalrinate vànga ka rilru hlimna kha lâk bo ang hmak a ni tawh. Ka hriat loh lama Jason-a chanchin an sawi dàn chuan ka rilru a luah bâkah Hriatpuii chanchin an sawi tel leh kher a, min ti dik lo zo vek. Entin nge an sawi kha? Nimin lamah an lo chhuak dùn rêng em ni? Niminah chauh lo pawh an chhuak dùn zauh zauh ngei ngei ang, ka hmu phâk hauh si lo. A thuhrimah, a bialnu ni hauh lo chuan engtin nge a lo hauh êm êm theih a? Eng dànin nge a lo hauh ve ngawt? Jason-a hian phalna a lo pe em ni?

Min lo nghahna țhin hmun ka thlen chuan phone la chhuakin a number ka hmet chhuak a, call ka tum lai tak chuan ka piah lawk restaurant ațanga," Jason...?" tia hlim nui rî ka hriat avàng chuan chu lam chu ka hawi ta vat a, Hriatpuii ngei maiin hlim nui hak hak paha Jason-a bân a chumsak nawk nawk chu ka hmu zui ta nghâl a. Ka thil hmuh avàng chuan ka ding dat a, ka phone chu ka hmer ngawt ngawt bawk. Ka hmuh loh lamah hetiang hian hun a lo hmang țhìn a ni chiang mai. Vawiin chu kan bàn hun hma daihin kan bâng si a, ka bàn a la hun miau loh avàngin ani pawhin ka bàn a la ring lo a ni ngei ang a, ni dang ang chu ni se chuan Beràm no hmêlhem lo angin ka bàn hun angah min lo chãngin min lo nghâk ngei ang, tuna a awm dàn ang hi chu ka mitthlâah pawh ka mitthlà chhin ngai hauh lo bawk a nih hi le.

Engati nge? Inneih ka la duh loh vàng khân em ni ang? Nge ka hmuh a rin loh lutuk vàngin sawti sâwn a inchhaihtîr nawk nawk? Ani pawh sâwn nuam a ti a nih saw nui hmêl a pu alawm. Hm, nula chhe lo deuh tak chhaih hi chu tu mipa pawh hian an nêp hlei thei lo a ni ngei ang, a hlim hmèl teh hâwrh lutuk chu ka ngei, ka ko vak zâwk dâwn em maw ni, engtin tak nge a awm tih hriat a châkawm zâwk e a!

A rawn hawi ta! Ka hawi sawn vat thung a, inherin chak zet hian kan vêng lam pan chuan ka kal ta dàwr dáwr a, min rawn koh zui emaw min rawn ûm zui emaw ka ring deuh a nia; mahse, ka ngaihchàn rûk deuh pawhin chutiang thãwm rîva chu ka hre miah lo. Thui ve tâwk tak ka thlen chuan ka kal muang ta deuh a, ka hah ngei mai, ka hnâra ka thâwk luh leh chhuah boruak a len loh avàng chuan ka kain ka thaw hawk hawk reng a, engtziaa chak deuha kal nge maw ka nih le? Thil sual ti tlãnchhia ang mai alawm ka nih, tih sual ka nei em ni? Teuh lo mai!

In ka thlen hnu lawk chuan ka phone a rawn rì a, amah a lo ni nghe nghe a, chhàn pawh ka chhâng duh lo. A hnuah phei chuan a rî chu mi dangin an hriat loh nân ka silent ta daih nghe nghe a, a duh tâwkin rawn phone rawh se, ka chhâng chuang lo ang. A duh leh min biak tum char char se, a tum reng erawh ka ring hran chuang lo. Nuam a tih êm kha maw, min hrechang tawp lo a nih kha, bâkah, min rawn hmu reng a, min rawn ko lo va, min rawn ûm zui lo bawk.

*MIN NGAIPAWIMAWH HRÂM HRÂM ȚHÌNTU, KAN LAK AȚANGA ENG MAH HMU LÊT LO TÙR AN NI TIH INHRE RENG CHUNG PAWHA MIN BÀNSAN LOTUTE HI KAN TÂN AN HLU ȚHÌN*