☆SUMRISANG☆ - 27 By Dingdi Pachuau

☆SUMRISANG☆ - 27 By Dingdi Pachuau

Ka chhàn theih loh vàng chu nge ni, a rawn pêng haw a, a thãwm pawh ka hre reng a; mahse, hre lo anga awmin ka ngaihsak duh miah lo. Ka tel lova a hlim hawr hawr viau kha ka ngei, keiin nilêng lênga ka thil zir pawh ngaihtuah țha thei mang lova ka ngaihtuah țhin laia min hrechang lo lutuk chuan ka thin a ti rim tlat a ni.

"Min lo hawsan daih a, ka nghah deuh reng hnuah che ka rawn kal a, i lo awm tawh lo va," room-a rawn lût pah chuan a rawn ti a, a awka chhuakah chuan ka hawsan avànga min demna leh lungawi lohna tel deuh tlata ka hriat avàng chuan chu chuan min ti lungawi lo sauh a," Ni e, ka hawsan che," ka ti nghat a, en pawh ka en duh lo.

"Engati nge a? Vawiin lamah eng thil nge thleng?" 

A hriat loh derna chuan min ti na zual. A hre reng sia, hmuh pawh min hmuh nghe nghe kha. Lem a chang thiam kual vêl lutuk chu ka hua, a thuhrimah Hriatpuii ka thîk tih pawh a hre reng a, a lo nuihpui leh țhâw țhâw a, kei ka nui thei lo thung a.

"Hre lo der vêl duh suh, i hriat reng kha," ka tih chuan a ngawi vang vang phawt a, phat dàn tùr a ngaihtuah a ni tih hriat reng reng, min chhâng lawk duh lo te hlei hlei chuan min ti thinur telh telh mai.

"Hria ila ka zâwt dâwn che em ni? Min han hrilh mai la, eng nge ni han sawi teh," a rawn tih chuan," I lem chan kha duh tâwk teh! Hmuh pawh min hmuh reng kha, nge i hlim lutuk a, min lo hmu lo 'der' zâwk? A țha alawm, haw rawh, eng mah sawi a ngai lo," ka ti nghat nghat a, ka rilru chu na viau mah se a hmuh lai kher chuan mittui tlâktîr lam chu ka tum bau lo.

Min thlĕmin thil awmzia min hrilh fiah dap ka ring a nia, a haw zui daih tak tak a nih chu! He pa hi chu, a rilru hi a châng chuan ka hre thiam lo a ni, a châng chuan min duh ve viau niin ka hria a, a châng lahin a heti daih a! Thil awm dàn dik takin min hrilh ve se, chu chu ka phût, ka zêp lo, a kawp lo tak tak a nih phei chuan... ani pawhin thîk ngai hauh lo Lalrina a thîk reng a, hmeichhia ka nih avàngin thîkthu ka nei lo a ni bîk hek lo. Hmm,  ni e, kei zawng Hriatpuiite ang lakah chuan eng mah ka ni lo alawm, model lâr pawh ka ni ve lo va, ka nih loh vàng tak hian a rûkin a lo la kawp reng rêng a, ka thin a tih rim bâkah ka thinlung a ti nâ, ka rin ve tehlul nèn! Vawiin pawh khân bâng hma lo ila chuan khatiang khân a lo awm țhìn a ni tih pawh ka hre chhuak tawp nâng. Ka ngaihtuah thui zêl avàng chuan ka inngaihtuah thinrim chawp zêl a, min duh tak tak lo niin ka hre chho zêl bawk a, na taka kan ințhen hma ngeia hetia boruak a awm lai taka kan pahnih inkâr tih tàwp hi a țhain ka ring.

Chaw ka ei peih lo va, ka lu a nat thuin chhuanlam ka siam ve zaih a. Ka pain," I ute inneih a hnai tawh a, dam țhat a pawimawh teh a nia," tiin damdawi ei tùr min rawn pe a, a ngaihțhat nân tiin ka hmawm nghâl a. A chhuah hnu chuan khumah țhuin vawiin lama ka thil zir chu ka ngaihtuah lêt rauh rauh a, vawiin tlaia thil thleng erawh kha chu ka ngaihtuah duh lo lui ve tlat thung.

Jason-a a rawn kal ni ngei tùr a ni, ka pate țawng hlut ri chu ka hria a, a rawn luh ngei ringin ka mu ta vat a, tlaia insawi fiah lova a haw daih avàng khân ka inngaihtuah thinrim thar leh pah bawk a.

Rei rial lovin a rawn lût ta ngei a, light ka lo off lo chu mãwl ka inti hnuhnawh kher mai. Khumah chuan a rawn țhu a ni tih hriat tak hian a hniam deuh sawt a, lu khuha ka mut avàngin a hmêl awm dàn ka hre thei lo.

"Engati nge i lu chu a lo nat mai mai le aw... Ka lo hmehsak ang che aw," a rawn tih chuan ka ngawi reng a, ka che miah lo bawk. Chutah, ka lu ka khuhna chu a rawn hawng ta dà dá a," Chaw i ei lo a ni tih ka lo hria a, a zia lo tak tak a ni, i damdawi ei chuan a chháwk tawh che em?" a rawn ti leh a, ka chal chu a rawn dek a," Hawh le, ka tung tho ang che aw,  ei tùr ka rawn ken țeuh bawk che a nia, eng mah ei lova mut a țha lo," tiin min tung tho a, ka ngawih reng avàng chuan amah chuan a țawng char char a ni mai.

"I thin a rim phei chuan... thinrim chunga mut hi a țha miah lo a nia, i mu tui thei hauh lo ang," a tih leh chuan," Engah nge thinrim tùra min siam si?" ka lo ti bak hlak a. Ani chuan dam thlap hian," Ei tùr ka rawn ken che hi ei phawt rawh aw, i ril a țâm lutuk tawh ang," a lo ti daih thung a, ka thinrim viau laia a țawng dam thlap mai chuan min ti thinrim zual sauh a.

"Ka ei dâwn lo!" ka lo ti hmak a, bang lam hawiin ka țhu zui hmak bawk. Ani chuan," Khatiang khân awm suh, hmêl țha an thinrim ngai lo, i inhmeh lo a nia," a lo ti leh a, thinrim țûn chung chuan," Ka hmêl a țha lo, hmêl țha pawh min ti bawk hek lo, dâwt a nih kha, haw rawh," ka ti hmak hmak a.

Hnung lam ațang chuan nghet zet hian min rawn kuah ta thut a, ka lo țang nghâl țûng mai. Tàl chhuah ka tum a, ka tãl nghâl phat a; mahse, ka tàl ve laih laih pawh chuan ani chu a che sawn ve hauh chuang lo," Min thlah rawh," sehchilh deuh nak hian ka ti a, ani erawh chu a ngawi ve ta hmiah thung. 

Ka tãl laih laih reng a; mahse, min thlah duh chuang dèr lo. A âwm nghèngin min kuah bet tlat a, ka tàl rei deuh hnuah phei chuan lum ka ti a, ka thàw a sa țan ta mai a, tãl duh tawh lovin ka chàwl ta rih a, ka tàl tâk loh avàng erawh chuan ka thin a rim tawh lo tihna a ni chuang lo.

"I thinrim êm êm chhan hi han sawi teh teh le," a hnu daiha a rawn tih chuan thâwk ka la hawk ringawt a, min kuahna chu thlah dulin a lam hawi thei tùr chuan min kuai her a, ka lo țang țùng thung; mahse," I sawi zet loh chuan ka hre dâwn lo a nia," a tih leh avàng chuan a hmêl pawh en duh lo hian," Eng vàngin nge hmeichhe dang nèn min kawp? Phatmar tum hauh suh, ka hmuh chian khawp che u kha," kûn ngar hian ka ti ta a, ka aw chu a chang khel khawl viau mai.

"Min en phawt la, ka chhâng ang che."

Min lo kawp tak tak a lo nih chu. Cho zeta en chho hian," Hetiang a nih dâwn rau rau te chuan engah nge min duh thu kha min hrilh kher? Kan inkawp hma ațanga i bialnu a ni a, engah nge min tih nat nân kei min bum? Ka bum ve che em?" ka ti ta hmak hmak a, ka sawi chhuak vek ang.

"Ka bum lo che."

Lu thing deuh nak hian ka țhen sak a, ka nuih a za lo lutuk chu ka țah a chhuak záwk! Mahse, țah chu sawi loh mittui tih tlâk pawh ka tum hauh lo, dâwt min hrilh avàng leh min bum avànga mittui tih tlâk te chu a!

"Nimin tlaiah kha nu nèn khân hlim takin in nuih ngei kha maw. Ka mit hian a hmu chiang khawp mai che u, dâwt min hrilh chu tum lo mai teh," ka ti a, ka bân a chelh chu duh lovin ka tih thlâksak dáwn a; mahse,  a hma aia nghet záwk hian a hmer ta thung a. A na lek lek hial a ni.

"Tluangi, min en teh, min en leh phawt teh."

"Min thlah rawh, a nâ a nia."  Kan țawng chhuah chu a inrual chiah a, min thlah lo nain a hma ang êm chuan min hmer nghet tawh lo va, kei pawhin insehruh țûnin ka en ve leh bawk a.

"Ka bum ngai lo che, dâwt pawh ka hrilh lo che, hmeichhe dang duh ka nei lo ka tih kha thu dik a la ni reng a, a ni reng bawk ang. Nimin khân restaurant-ah kan chàwl ho a, min hmuh laiin kan hnunga kan țhiante awm ve reng kha i hmu lo palh a ni ngei ang, kan pahnihin kan chàwl miah lo, chuan, min hmu tih pawh ka hre hauh lo bawk," muangchâng leh fiah tak hian a ti dap dap a, kei erawh chuan," Hlim takin in innuih reng kha, i bânah pawh a chumsak che a," ka lo ti leh a.

"Fiamthu sawiin țawngkamin kan insawisa a, a duh loh dànin ka fiam a, chuvàngin min rawn chùm a nih kha," a tih leh chuan," A thinrim tawp loh kha a, nui awr awrin a rawn chùm che a nih záwk kha," ti fuh inti zet hian ka lo ti leh thung a, chutah," Ani chu a hmêl țha a, model niin a lãr bawk a, mipa tawh phawt chuan kawp in châk vek ang chu," ka ti leh a.

"Chu pawh ni se, nang aia duh ka nei chuang lo, i hria maw?" tiin chiang zet hian ka mitah chuan a rawn en chhuk a," Hriatpuii chu a hmêl țhain a lãr pawh a ni ang; mahse, hmêl țha ka ti daih zâwk che! Keimahah i lãr fê zâwk bawk. Insawithei ta lawk ila,  duh ni ila chuan nang nèna kan inkawp hma daih tawh khân ka lo nihpui thei daih tawh ang chu; mahse, mihring chuan duh zâwng kan neih vek hi, ka duh zâwng a ni ve lo a ni ang, ka duh zâwng tak chu hei ka bulah i awm reng a, hmeichhe dangah ka buai lo," a ti leh kalh kalh a.

Ka thinrim reng thei ta bîk lo. Dik tak chuan kei pawh hian ka duh êm êm a, dáwt min hrilh ka ring bîk lo. Ka duh tluk zet hian min duhin ka ring ve tho, a sawi ang khân a hma ațang tawhin Hriatpuii nihpuina hun chu a nei reng tawh a; mahse, an ni miah lo a nih kha. Hmeichhia zâwkin a pâk viau phei chuan mipa hi chu ãwn sa viau tùra ngaih an ni deuh a; mahse, Jason-a hi chu a ni lêm lo a ni ang, Hriatpuii ni lovin kei min thlang ve chat tlat.

Min duat a, mipa fel tak mai ni lovin mipa țha tak a ni tih ka hre chho zêl bawk. Chutih rualin ka phù lohzia ka hre chho ve zêl a, a phû tâwk ni thei tùrin țan ka lâk ve sauh sauh a ngai a ni. Taima tak leh rilru nei takin tuna ka thil zir hi ka zir ang a, a tâna zahpuiawm lo nih ka duh chuan taima taka ka zir chhuah ngei a ngai a ni.

U Nubawihite inneihni pawh a lo hnai ve zêl a, chhûngte hmun hrang hrang ațangin an rawn kal khâwm țak țak a, nuam ka ti. Ka rin aiin chhûngte pawh kan lo ngah daih lehnghâl a, pasal ka neih ve hunah hêngho tho hi an rawn kal khâwm leh ang chu maw, tlëm tê ai chuan tam ve deuh tak chu a zahawmin mi an ti mawi ka ti. 

Jason-a pawh a bãng bîk lo, engkim min ngaihtuahpui a, min chêtpui a, min thlahthlam hauh lo. Chêtna tùr lah chu a'n hre khawp a, ka cousin hmeichheho pawhin ka bulah an sawi sap sap nghe nghe a, ka bialpa a ni tih an hriat hnuah phei chuan min fiam a," In inhmeh lutuk, ințhen miah s'u aw. Awi, in fate chu an hmêl țha ngawt ang!" te an ti a, a țhenin," In inneih hunah chuan ka intithu ngawt ang, innei ve thuai r'u, ka va châk tawh tak!" an ti bawk a, kum lamah kei aia nau vek an ni a, nuihna tùr an ti tam a nia, Jason-a pawh a nui ve suk suk reng mai.

Inneihni chuan ka inchei uluk ve khawp mai a, mi min chei ka duh tawh bîk lo. U Nubawihite erawh a thiam tak tak chinin an chei a; min chei ve an tum nain ka duh lo va, mi min chei aiin keimah ngeia ka inchei hian ka confi ve zâwk tawh tlat. Ka inuluk ve bawk a, Jason-a pawhin min en leh reng țhìn a, a rûk mai pawh nilovin a langah pawh nuam ka ti a, ka nuam tihna leh  hlimna chu ka thup hlei thei lo, ka nui reng mai a ni; mahse, min fâwp țha ngam chiah lo erawh hrehawm ka ti deuh thung. 

Țhianteho ka sâwm ve vek tak nain rawn kal thei chu panga chauh an ni a; mahse, ka lãwm tho. Lalrina phei chu Vlite khuaah a lo han zin leh daih tawh a! Maenga'n," Anni pawh hi an innei thuaiin ka ring a ni, a zinchilh tlu tlut mai a," a tih chuan Vli thil min hrilh kha ka hre chhuak vang vang a, ni e, a nu khân inneih chu lo phalsak hrâm se...

U Nubawihi awm lo ta chu a reh ve ruai a, chhûngteho an haw leh vek tawh bawk si a, ka nu ka khawngaih ber. Kei chu ni tin deuhthaw ka thil zir vàngin ka chhuak a, ka nu inah a lo awm țhìn a, a khua a har viauin ka ring a ni. Ka han zawh chhin erawh chuan," A, har hran lo ve, a awm lai pawhin ni tin hna avàngin a chhuak țhìn tho alawm," a lo ti mai a; mahse, hna avànga chhuak leh pasal neia chhuak ta daih chu a inang lo sia, a sawi țha duh lo mai mai a nih ka ring.

Ni khat chu Jason-a nèn tlaia kan haw chuan," In khua a har ngawt lo maw?" tiin min zâwt a, kei chuan," I awm chuan har hran nâng," ka lo ti vat a. A nui suk a," I nu leh pate a nia ka tih deuh ber ni, nang pawh a châng chuan a har ve deuh tho ang," a rawn tih chuan," Tak tak chuan, har ve tho e; mahse, an sawi țha duh vak lo va," tiin ka lo chhâng leh a.

"Kan inneih hunah phei chuan an khua a har zual ngawt ang!" min rawn en ralh pah chuan a ti leh a, ka lo nui ringawt. Ni e, nuța kan nei lo va, pasal nei chhuak ve ve tùr kan ni bawk nèn, keiin ka neih hunah phei chuan tûn ai hian an lo upa ve leh tawh ang a, an tân pawh chêt zung zung a harsa ve hret tawh ngei ang.

"Pasal neih loh mai ka duh! A nih loh tal pawhin kan ina rawn lâwi lût duh pasal neih a ngaiin ka ring," ka ti a, ka rin loh deuhin a nui hak hak a, min rawn melh rum ka ring a nia.

"Apple kha i nei tawh lo em? Lei haw ang aw," a rawn ti ta daih a, kei chuan," A la awmin ka hria," ka lo ti vat a, ani erawh chuan," Ni tin ei ziah rawh ka tih kha, i pum ruah lai tak tein ei țhìn la, lu na pawh i nei ngai miah lo ang, damdawi țha a nia," a ti a, Apple zawrhna dàwr bul remchâng laiah chuan car chu a dintîr zui ta nghâl a.

Lalrina pawhin a zinchilh tak tlut tlutah chuan a nu pawhin hnial ngaihna a hre tawh lo a ni ang, a hlawhtling ta nge nge a; mahse, a hun erawh hma lamah ti thei lovin kumin kum tàwp lamah an ti dâwn ta a nih hmèl. A ngèngawl bawk a, a hlawhtling ta hrim hrim chu a lawmpuiawm e, la rei deuh angin lang mah se kumin chhûngin a ni hman dâwn tho a, a zia alawm, rilru hahdam deuh záwkin a awm thei tawh ang chu.

An fiam nasa luai luai khawp mai a, group pawh a lùn mep mep, group hming ni se a hman apiangin an inthlâk chhâwk ka ti mai, Lalrina kahna lam hlîrin an thlâk a, an fiam nain an țawngkam hman a pàwhràw deuh bawk nèn, Vli phei chu lan pawh a rawn lang țha ngam meuh lo.

Jason-a'n," Zanriah kîl laiin ka pain engtikah nge ka neih dâwn che tih min zâwt a," a rawn tih chuan ka en hau ringawt a! Ka mit pawh ka khap lo, chutiang lam chu an lo sawi țhìn tihna em ni? A va zahthlâk tak!

"Engtin nge i chhàn?" tiin ka záwt a, a chhàn dàn ka hre châk a ni. A sawi chhuah châng lah hian ka la ngaihtuah loh thua ka chhàn bâkah ka zir lai ka dah pawimawh rih lo thei si lo va, min thiam lo ru viau maithei a ni.

"I zir zawh hun ka nghah thu ka hrilh tawp mai, ka duh dàn tak chu ni lo mah se i thu tlûkna ka zahsak lo thei si lo che a. Ka nu pawh hian neih tùr ka hmuh phawt chuan nei thuai tùrin min duh tih ka hria, min nawr duh lo mai zâwk a ni. A chhan chu an țhat ve deuh laia tu neih an duh vàng a nia, an chakvak tawh loh hnua tu an neih chuan han pawm vêl ilo fahran pawh an tân a harsa dâwn si a,' Kan enkawlpui theih che lai ngei hian nupui neiin fa nei la,' an ti zauh zauh a ni," a tih chuan dik ka lo tihpui reng a, chutih rual erawh chuan nuam lo tihna ka nei pah tho bawk. Kei lahin ka thil zir ka lo dah pawimawh ve bawk si; mahse, ka ka ka âng tawh a, sût leh mai erawh ka tum duh bîk lo.

"Kan dam ang a, hun leh kumte chu a liam duak duak mai ang, Pathian zárah dam hi hauh tlat ila, engkim a fel vek mai ang," ka ti ve ta ringawt a, ani pawh chuan," Ni e, kan dama rilru danglam tak kan pu ta a nih loh chuan hma lam hunah hlimnain min hmuak tih ngaihtuah tlat ila, kum chu a ral leh zung zung mai ang," a lo ti ve a, chutiang rilru a pu thei leh a rilru puitling viau chuan min ti hlim a, nuih sak pahin a biangah ka fawhsak nghe nghe a.

"Naupang emaw min tih le!" a tih sup chuan ka lo nui hak a," Ti nâng aw... kan thil sawi pawh a naupang thil sawi loh khawp kha maw," ka ti a, a hmuiah chuan fet ru tak hian ka fawhsak leh a,  ka thle sawn tùr chu hneh zeta min chelhin ãm zet hian min fâwp ta mawlh mawlh a, kei pawhin ka chhâng lét rang hlê tho. A bianga fawh zauh hi ka chîng a, hei tak hi a duhkhawp lo țhìn a ni, a duhkhawp lo tih hre reng hian fiam nân tak ka hmang țhìn a ni.

*******

"Tluang, la rei deuh angin lang mah se i lo hriat lâwk atân, țhian atân hman che ka duh dâwn a, i rem ti ang tiraw? Mi dang pawh kha an awm tho nain nang anga pawh fàl deuh ka nei tlat lo, lo inring rawh aw," Vli'n a rawn tih chuan ka nui chhuak hak ringawt a! Sawi mai tùr ka hre lo a ni. Kei hi mo țhian ka ni ang maw? Ka nui lo thei lo.

"Engah nge i nuih ngawt? Țhian bul fel fawk ka nei lo va, ka khawsak dàn chu i hriat tawh kha, kan khuaah phei hi chuan țhian kawm ka nei lo hrim hrim a, Aizawlah ka lo awm rei ve tawh bawk nèn, kan țhianho zîngah rau rau pawh nang hi ka pawh ber i ni leh a. Lalrina nèn in chanchinte kha hun liam tawh a nia, kan theihnghilh vek tawh, hreh phah nân hmang miah suh aw, duh thlang zut zut thei ka ni lo tih hre mah ila min dinpui atân ka duh ber che a ni," a rawn ti leh a.

Sawi mai tùr ka la hre chuang lo.

*HETIA HMUH MAI THEIH I PÂWN LAM INTHUAM MAWINA AIIN I CHHÛNGRIL LAM INTHUAMNA, ȚHATNA LEH TLÀWMNA NUN KHA MITE'N AN RAWN EN CHAT TÙR LEH AN RAWN CHHIARNA TÙR BER CHE CHU A NI*