☆SUMRISANG☆ - 28 By Dingdi Pachuau

☆SUMRISANG☆ - 28 By Dingdi Pachuau

A hnua ka ngaihtuahin mãwl ka inti lutuk chu ka insik vak ringawt a. Ka hnial dàn kha a ho êm alawm, "A tihchi loh lutuk!" ti ringawtin ka hnial pek a nih kha! Tu nge mahni ex inneihnaah mo țhiana țang ngai? A àwmin a ang lo lutuk!! Ka țhiante zawng zawng bâkah Jason-a pawhin eng angin nge a ngaih ang? Chutiangin Lalrina pawhin.. A, a tihchi dâwn loh lutuk ringawt! Ka ngaihtuah ringawt pawh chuan ka lu chu ka thing nawk nawk a.

Kristie'n min rawn be nawlh a, mak ka tiin ka inthlahrung angreng khawp a, ani erawh chuan a u nèn kan inzui chu a hriat daih tawh thu leh min lawmpui thu rawn sawiin kan inkawp erawh mak a tih thuin a rawn tlip zui a, chhàn lêt dàn ka hre lo khawp mai a," Ka lãwm e," ka ti ringawt. Biak pawh kan inbe rei lêm lo, kan inbe khât tawh a, chutia min rawn be zâwk ta chu, kan inbiak zawh hnu chuan ka thaw huai thei. Mi sual a ni lo va, min lawmpui thu min hrilh chu ka lãwm tak tak a ni, min huat deuh mai kha ka ring deuh a nia.

Vànneihthlâk takin kan ti dâwn nge, U Nubawihi chu an inneih ațanga thla hnihnaah a ruak lo nghâl a, kan chhûngkua chu lãwm tak kan ni. A senior ve deuh tawh si a, a rai thuai lo ang tiin ka lo hlauhthàwnpui deuh a nia; ka hlim viau emaw ka tih laiin ka nu leh pa an hlim zâwk, an sawi lo thei lo, chanchin làwmawm kan hriat tûk tlaiah an nupa chuan zanriah ei tùrin ka pain a sâwm ta nghe nghe a, anni pawh an rawn kal a, an hmêl ațang ngawt pawhin an hlim tih a hriat viau. U Nubawihi hi a pasal neih hnu hian ka pate'n chaw eia vawi khat an sàwm bâk kha a la rawn kal nawn leh miah lo va, tuna a rawn kal hi a ni leh mai, min ngai lo viau ni hian ka hre țhìn a. Ka han sawi châng lah hian ka pa chuan," Pasal neih tawh chuan mahni in lama haw haw leh tlawh deuh zut maite hi thil țha leh mawi a ni lo, ani pawh rawn lêng lo tùrin ka hrilh a nih kha. In lamah an buai ve thei a, hmeichhe tân phei chuan thawh tùr in chhûngkhurah a tam thei viau a ni," a lo ti țhìn.

Lalrina pawh a phûr sûrh sûrh khawp mai. Kumin chhûng ngeiin nupui a nei thei dâwn ta chu a nia, a dìl chhuah liau liau a ni a, a phûr viau pawh chu a àwm khawpin ka hria, nupui a neih dâwn zet chuan an in pawh zâu țha tâwk chiah lovin a hria a ni ang chu, zâu hek hawkin an extend a, hma lam hun atâna lo inbuatsaih lâwk a duh a ni. Anni pawh an unau an tam bîk loh avàngin fa neih țeuh a duh dâwn si a tiin in chu an tih len belh a lo ni.

"Zanin chu thla êng làwm ila," tia chhùn lama min sàwm avàng chuan zàn lo thlen hlàn chu ka nghâkhlel khawp mai a, hun pawh chu ni dang zawng aiin a kal muang ta riauin ka hria a, tlaia min rawn lam lai pawh chuan ka phûr lutuk tawh chuan," Vawiin hun kal muanzia hi tiraw? A ding ta emaw tih tùr a ni," ka ti hial nghe nghe. Ka phùr êm êm chhan pawh an inah hun chu kan hmang dâwn a, a nu leh pa an awm dâwn lo zui bawk, ei tùr amahin a siam vek dâwn bawk a, a tu leh dâwn êm a ni.

Zanriah pawh tlêm tê chauh ka ei. Ka pate pawh ka dîl tawh a, hmun ka tih fel vek hnuah ka insiam zui nghâl a, min rawn lam a tum viau nain ka hnial tlat avàngin a rawn kal dâwn ta lo, scooty ka la chhuak a, an in lam panin ka tlãn ta vang vang a.

Popo-a'n min lo bauh deuh khar khar a, min hmuh loh vàng a nia, Jason-a'n a lo hau vat a," I pi a nih kha, khatia i tih te chuan nakinah a duat lo mai ang che," tiin a hau malh malh a, ka lo nui sak a," Pu chhùn lo lutuk mai!" tiin ka han fiam zui hlak a. Popo-a pawh min hmuh chian tâk hnuah chuan a mei chu a vai lauh lauh a, rawn kal hnaiin min rawn nûl thuak thuak bawk a.

A lum deuh avàng leh mi dang an awm chuan loh avàng chuan ka sam chu sâng angreng takin ka țâwn a, jacket pawh ka hlîp daih. Ani pawh chuan," Boruak hi a lum lam hret chu a ni tiraw?" a lo ti ve a, kei pawh chuan," Umm... jacket pawh ka hlîp tawp mai asin, min melh vak lo mai rawh," ka ti vat a, chutah," Eng nge ei tùr chu i siam dâwn? A tui leh dâwn sia, ka ei tam theih loh hlauin chaw ka ei tlêm teh a nia aw," ka ti zui leh zat a, a nute an awm loh avàng chuan mitmei vèn tùr a awm hran lo bawk a, ka  duh duh ka sawi mai.

Chaw ei kham chiah e ti lo chuan ei tùr chu a siam nghâl a, ka lo pui ve ti ila ka lo chhaih a ni zâwk mah ang chu, ka lo ti buai char char a, a chângin hnung lam ațangin ka lo kuah thùl; mahse, min vin chu sawi loh a them pawhin min sawisêl miah lo. A siam zawh hnu chuan a pindan bathlàra thla êng làwm tùrin ei tùr keng chuan kan kal zui ta nghâl a. A tukverh dárthlalang ațanga a pindan êng a lo chhuah theih avàngin light kan off a, thla lah chu a êng țha kher mai, lehkha pawh kan chhiar thei ang a tih tùr khawpin a nia a èn ni.

A lum deuh bawk a, ani pawh a inha bùl ve viau. A T-shirt bân chu a tan luih a ni ngei ang chu, a zak ațangin a nâk thlengin a inphel thla huai ve ve a, kekawrbùl thâwl deuh hek hawk a ha bawk. Mipa dang chuan ha se chuan a kawr hâk chu țhing ka tiin pawnchhia emaw ka ti hialin ka ring; mahse, ani hi chuan a inhmeh êm êm tho, a pà thlâwt a ni.

"Sexy min ti viau suh," a rawn tih tâkah chuan ka zak ve deuh hlek a, ka hawi sawn ta nghâl daih bawk. Ka lo en duh viau bawk lah tak a ni, innêl viau mah ila khati êm êma en kha chu ka zak ve deuh tho.

Ei tùr ka ban dà dá lai chuan," Ka mitah hian thil a awm tlat, min han ensak lawk teh," a rawn ti a, ka kut ka la lêt rang viau. Phone phawrhin flashlight ka on vat a, ka han ensak a. Ngun zeta ka en lai chuan min rawn fâwp thut mai pek a, ka phone ken lai pawh ka thlauh țhelh nghe nghe a ni; mahse, a chêt dàn chuan ka thin a ti ur teuh lo mai, rang zetin ka chhâng lêt zui ve nghâl zat a. A hnu lama kan boruak chu nuam tak a ni, boruak a lum kan ti nain kan insi chét reng a, a taksain min ur ham hamna pawh chu ka kawr puan chhah lêm lo tak ațang chuan a hriat chian theih khawp mai.

"Thla êng khi en ve ta che," min en reng avànga ka zah deuh avàng chuan ka ti salh a, hrehawm erawh ka ti chuang hauh lo. Ani chuan," Thla ai chuan en che ka duh zâwk alawm, i hmuhnawm ka ti zâwk daih a," a lo ti mai a, ka nui hak a, zàwi têa a hmai nem hersak pah chuan," Min en reng chuan ka lai chhe zo vek mai ang," ka ti phawt a; chutah," Thlaah khian i láwn ve châk em?" tiin thil dang ka sawipui ta daih a. Ani lah chuan," Thlaa làwn ai chuan nangmaha làwn hi ka châk zâwk!" a lo ti leh nghâl a, a thil sawi avàng chuan ka en hau nghe nghe. Hetiang lam hian min fiam ngai lo va, mak ka ti ve êm a ni.

"Chutiang thil sawi suh!" ka ti țhat a, ani lah chuan," Eng nge, ka bialnu bulah chuan ka duh leh châk záwng chu ka sawi ve bawk ang chu. Mipa alawm ka nih!" a lo la ti zui a, a la thu tak êm êm zui, sawi leh mai tùr hre tawh hek lo le, a hnungah ka bensak kãwrh ringawt a, ka bialpa mah ni se khatiangte kha chu a zahthlâk, nupa pawh kan la ni si lo.

"Mipa hi hmeichhe bula in awm hian khatiang lam hlîr kha in ngaihtuah țhìn a ni maw?" tia ka zawh chuan," Teuh lo mai! I bulah chiah," a lo ti vat a, âwih lo zet hian a hmêl chu ka en vat a, ani lah chuan," Mahse, ka insùm theih khawp hi maw, a fâla kan awm pawhin hun remchâng ka zawn ngai hauh loh hi," a lo ti leh a. Kei chuan," Nia, nang chu i fel êm alawm, hei vàng tak hian a nia ka duh zual che ni, inneih hma hauha lo chêtsual te chu a țha hauh si lo va, thil țha lo chu i ti duh lo ang tih ka ring tlat bawk a," ka ti leh a.

"Mi felnu!" tiin min han pawm kãng lawp a, ka lo țê țhat thung, min pawm käng chung chuan min fâwp vang vang a. Nuam ka va ti sî êm! Chumi hnu lama kan hun hman dàn chu ka lo suangtuah ve țhin dàn ang a ni, ka bula awm hian min ti hlim êm mai a, hun hi ding se, zanin hi ral thei lo se ka ti. 

Vli min sàwmna leh ngenna kha tu bulah mah ka la sawi chhuak lo va, a chhan pawh min nuih nasa dâwn êma ka hriat vàng a ni pakhat. Jason-a erawh nakinah ka la hrilh chhin ang, a hun a la hla deuh bawk a, ani pawhin a hriat hunah mak a ti ve ngawt ang chu.

Ka thil zirnaah pawh chuan țhian ka chhar chho ve ta zêl a, mi hausa fanute pawh awm tho mah se hausa lëm lo pawh kan awm tho bawk a; mahse, an fel hlawm viau ka ti. An țawng duh hlawm a, kei hi țawng duh lo ber ka nih ka ring hial, chawlh kan neih ve laia an titi pawh hian kei chu țawng ve lovin an thil sawi leh fiamthuah chuan ka lo nui ringawt mai țhìn a ni.

Social media an khawih nasa ve hlawm a, chhe lo chanchin an sawi peih ve viau hlawm a, ka hre peih lo viau chung pawhin Hriatpuii leh model dang dang chanchin leh an inchei dàn, mipa chhe lo deuh deuh story update tih vêl an sawi chu a hriat loh theih loh, an titi tui ber a ni miau mai a, model tam zâwk hian tuna kan zirna neitu hi an rawn pan ve reng reng bawk nèn, an titi ber an ni pawh hi a àwm viau.

"Henry-a leh Puipuii hi an inkawp a ang ka ti, an story update pawh a inan ngei kha," Dingi chuan a han ti a, a bula țhu Betheli chuan," A mipa zâwk hi chuan a tih vak loh hmèl ka ti mai mai a; mahse, a hmeichhia záwk hian a zar ve ëm mai a, a lo chhe lo tho bawk sia, a hnial zo kher lo ang, a hmaa mi kha chu tluk dâwn kher lo mah se ani pawh hi a chhe hran chuang lo, a sam a mawi thei bawk si a," a lo ti ve thung a, hetiang hi ni tin ka hria ti ila ka ti sual tam kher lo ang. Tuna an sawi hi a mipa hi chu ka hre ve ngei a, model lãr tak a ni ve a, chhiat pawh a chhe vak lo. Puipuii erawh ka hre lo a niang, a hmêl mitthlaa lang tùr pawhin ka hre lo, hmêl thar a ni maithei a ni.

"A hmaa mi i tih chu Hriatpuii i sawina a ni tiraw? Ni dâwn tak! An nih ve zuai tawh tak kha maw le; mahse, Hriatpuii'n a țhen ta kha a nia, a țhen chhan nia an sawi nèn lah khân an inkawp zui tih pawh a awm chuang si lo va, eng nge maw a awmzia ni? Kawp mumal tak hi a nei lo a ni ngei ang," Candy'n a lo tih chuan Dingi chuan," Awi, a țhen chhan nia an sawi mipa chhiat loh sizia kha! Hriatpuii'n IG lamah an pic pawh a upload kha, ka lo save hmak mai asin! Chhe lo ka ti lutuk!" a lo ti vat a.

"Jason-a chu a chhe lo alawm, hna nghet țha tak a nei bawk a, Hriatpuii hi chuan a duh tih a lang reng, a pic upload apiang a lo comment ziah dàn ațang hian ka hre thei mai," inti hre zet hian Nunfeli chuan a lo ti ve bawk a, thlalâk an inhmuh hlawm a ni ang, phone an inensak tel tel a, țawng ve lovin an phone en ve lo mah ila ka Jason-a bâk an sawi lo ang tih ka hria a, nuam ka tih rualin lehlamah Hriatpuii thîkna ka nei thar chho leh a. 

*******

Vli khân a lo ti tak tak a! Min rawn biak lehin a rawn sawi a, ka han hnial a, hnial dàn chi hrang hrangun ka hnial a, biak pawh kan inbe rei phian. "Mi dang ti mai teh, kei chu a tihchi loh," ka tih pawh chuan," Mi dang tih tùr ka hre lo. En teh, țhian ka nei lo ka tih tawh kha, ka unaute zîngah ni se hmeichheho chu naupang tê tê, kum 15 hnuai lam vek an la ni bawk si, min hre thiam hrâm rawh, nang lo chu tih tùr ka nei lo. Lalrina pawh ka râwn chhin tawh a, ani pawhin nang tluk tùr an awm loh thu a sawi ve tho, kan inkâr țhat leh theihna chhan pawh nangmah i ni a, nang hi chu ka ring ngam tawp che a ni mai, chu vàng chuan, ka harsatna hi min hriat thiamsak hrâm zâwk la, nang lo chu țahawh ngam ka nei lo a ni," a rawn tih tlat avàng chuan hnial leh zël dàn tùr pawh ka hre tawh lo.

"I hreh chhan àwm chu ka hria alawm, ka hre thiam reng mai che; mahse, ka tih ngam awmchhun i nia, nang i nih loh chuan ka nu hi a ni leh mai a, khawngaih takin min dinpui hrâm mai rawh aw, țhian dangte kha țhian angin ka en ve lo tihna a ni chuang lo nain nang anga nèl leh ngam, țahawh ngam ka nei lo a ni ang chu, a tìrté ațanga ka rilrua lang hmasa ber i nih bâkah mi dang ka ngaihtuahnaah an awm lo tawp bawk, a mak lutuk!" a rawn tih leh malh malh phei chuan hnial thei ni pawhin ka inhre tawh lo, hnial dàn tùr pawh ka hre tawh lo hrim hrim bawk.

Jason-a pawh chu thil awm dàn zawng zawng ka hrilh ve ta nge nge a, a rem tih lo bur ka rin viau laiin," I thu thu a nia, lo sawi theih ka nei hleinem," a lo ti mai a, ka en vang vang phah nghe nghe. Lalrina a thîk thei viau kha a ni si a, tunah engati nge rilru dang a pu ta em ni? A rem tih loh thu a sawi miah lo nia. Rem ti lo se ka tih rilrûk nèn, chhuanlam ka nei țha dâwn mai sia; mahse...

Min rawn enin," Vli khân min rawn be tawh alawm, a dinhmun i sawi ang chiah khân min hrilh ve tho. I rilru tùr àwm rawn sawiin thil awm dàn a sawi a," a rawn ti ta! Mak ka ti zual," A ni maw? A rawn be tak tak che maw?" ka ti mawlh mawlh a, âwih har ka ti deuh mah mah a ni.

"Min rawn be tak tak e. Ka lo inrawlh vena tùr a awm lo va, i thu tlûkna tùr a nih thu ka hrilh bawk," a rawn tih leh chuan ka ring ve ta deuh a, Vli chuan Jason-a ka vêngthãwng niin a hria a ni ngei ang, a phal ka rin loh a lo hlau pawh a ni mahna.

"A common lo hi ka ti khawp a! Ex nupui neih nîah a nupui țhianah i țang dâwn tihna a nia, thil ni thei leh thil tihchi-a ngaih loh thil pawh a lo ni mahna; mahse, Vli kha a mangang ve viau chu a nih kha a, țhian a nei ve nual che u a, nang a rawn thlang chat che a, i fel ëm vàng hi a ni ngei mai," tiin min han fak zui kher a, ka ner khum sak a, a lo nui hawk thung.

U Nubawihi pawh Pathianni chawhnuah an pain a rawn lènpui ta zauh zauh a, a dul chu a puar lang ve viau tawh a, an pa lah chuan a duat hmèl si a, rai chu nawm hmèl ka ti ta viau mai. A nulât laia ei tùr a ei tam vak ngai loh nèn, tunah chuan a râwp a ni ang, a hmaa chhawp rêng rêng chu a ei fai duak duak mai, thei thûr lah chu a'n duh khawp lehnghâl a, a ei atân liau liau ka pain a chhuah apiangin nimbu rah a hmuh apiang a rawn lei haw ziah bawk.

"Rai hi a nawm hmèl ngawt mai," ka ti chhuak phawng a, kan kim țhep țhawp laiin a ni nghe nghe. Ka pa chuan," A va mak dâwn ve!" a lo ti mai a, ka nu erawh chuan," I la tawn hriat loh thil a nih vàng a nih kha, thil nuam a ni hleinem, nau a len hnuah phei chuan a lo rit a, kan rit hnuk mai asin," a lo ti ve thung a, kei chuan," Tûna U Nubawihi pum tiat ang vêl hi a nuam ang, thil a ei țha duh mai bawk sia maw, a ei țûn țûn reng reng hi a nawm hmèl ber," ka lo ti a, an nui ta dar dar mai. U Nubawihi chuan," Pakhat tân chauh ka ei tawh lo va, mi pakhat dang ka ei kêp a ngai tawh alawm," a lo ti ve thung a, ka pa chuan," Dik chiah! Ei in insùm a ngai miah lo. Nau țha taka lo piang chhuak thei tùr chuan ei țûn țûn kha a pawimawh," a lo ti ve vat a.

Jason-a bulah," Kan inneih hnua ka rai ve hunah min duat viau ang em? Ei tùr ka ei châk apiangin tam tâwk tâwkin min siam ang em?" tia ka zawh chuan phûr tih hriat tak hian," Teh rêng mai! Tuna ka duat lêt sawm hnih zet hian ka duat belh ang che," a lo ti vat a, kei chuan," Eng nge, a lêt sawm hnih kher chu?" ka lo ti a, ani chuan," Duat dâwn lutuk tih sawi uarna a nih kha, ka va nghâkhlel tawh tak!" a ti a, a nui sâng bawk a.

*A NGAIHSAK CHE TIH A SAWI MAW?  ȚAWNGKAA SAWI MAI AI CHUAN A CHEZIA LEH THIL TIHAH A LANTÎR EM TIH EN ZÂWK RAWH*