☆SUMRISANG☆ - BONUS

☆SUMRISANG☆ - Bonus By Dingdi Pachuau

Vawi khat chu chhùna ka va lèn lehin a ke leh a bân vêl ka hmehsak lai  chuan," Engtik ațangin nge min duh țan nia i hriat?" tiin ka zâwt chhin a, ner deuh nâng hian ka en bawk a, fiamthua min chhàn mai mai ka rin lai chuan thu tak hmêl zet hian," Ka fawh hmasak ber che ațang khân," a rawn ti mauh mai. A mit mengah chuan fiamthuna leh nuihzatna a lang miah si lo va, a dik a ni ngei ang.

"Chuti, engah nge min duh thu min hrilh tlang mai loh?" ka ti ve thung a,  ani chuan," Ni e, ka huaisen tâwk lo a ni ber. Nangin nuța leh țhian anga min en laia ka duh thu ka hrilh che chuan min hlau ang a, min be duh lovin min hmuh duh tawh lo ang tih ka hlau tel bawk a ni," a lo ti a, ngaihthlâk nuam ka tih avàng chuan," Sawi zêl rawh," ka lo ti sap a.

A ngawi deuh vang vang a, thâwk a lâk hnuah,"Ka fawh apiang che khân ka thinlung chhûngril ațanga duhna tinrêng nèn ka fâwp țhìn che a ni. I ex ka hmuh apiang erawhin ka thin a rim ziah bâkah a hnênah i kîr leh mai ang tih hlauhthàwnna ka nei ziah bawk," a tih leh chuan," Teuh lo mai! Kìr tum ni ila ka kîr daih tawh ang chu," ka lo ti thung a.

"Ni e, i rilru chhûngril tak ka hre si lo va, i bula ka awm loh châng hian rilru nuamin ka awm ngai lo, kha pa kha i duhin i bialpa hmasa ber a ni tih ka hre bawk si a. Amah tih-el nân lem kan chang zui bawk a, chu chuan i rilruah ani kha a tla na ve tâwk tih a hril tlat. A bialnu nèn an ințhen hnu phei kha chuan ka hlauhthàwnna kha a hma zawng aiin a nasa zual a, nang lahin i lo kàwm ngeih viau bawk si, i rilru a țhat êm avàngin a nu boral vàng leh a bialnu țhen vànga a lunglêng khawhar kha i khawngaih vàng liau liauin i nihpui leh niin ka hre bawk a. Chu chuan min ti thinrimin ka thîk êm avàngin i chungah ka țuan ta a nih kha," a ti leh duah a, ngun takin ka lo ngaithla a, a ke ka hmehsak pawh ka chàwl hial a ni. Rilru țha min tih erawhin min ti hlim viau lo, ka rilru țhat lohzia ka hre chiang ve viau bawk sia, ka lo zak deuh tlat!

"A nih leh, ka nihpui niin i hria a, min hmuh duh loh vang vang hnuah min rawn hmu duh leh thut a, kha kha eng nge a chhan?" tiin ka zâwt leh a, eng nge, ka hre châk alawm, ka zâwt zêl dâwn, a hun lai khân ka tuar nasa ve êm a, hriat hi ka phû ngawih ngawih ka ti ve tlat a ni.

"Ka hmuh zui zêl che chuan ka inzêp zo lo ang a, nang neih tum chein in inkârah ka tla zep mai ang tih ka hlau a ni. Hmuh miah loh che kha ka tum ta ber a, ka rilru ațangin paih chhuah che tumin ka bei nasa bawk; mahse, ka pa birthday zàna kan ina chaw an rawn ei khân i tel ve ta si lo va, ka nuin a chhan a zawh khân i nu khân a sawi ta vek a, i zinna, i zin chhan nia a hriat leh i awm dàn zawng zawng, zêp nei ve hek lo le. Khatah chiah khân i zin chhan tùr àwm ka ngaihtuah ta a, i ex nèn in inzui leh ta emaw tia ka lo rin dàn che dik lohzia hre chhuakin Lungleia rawn phei ve dàn ka dap ta chûk chûk a," a ti leh malh malh a. Duh taka enin ka lo ngaithla kar a, a sawi chu ka âwih vêk, dâwt a sawi ka ring lo.

"Mahse, hna vàngin a nih kha i rawn kal?" ka lo ti ve leh a," Chhuanlam mai mai a nih kha, hmuh che ka duh si a, chawlh ka rawn dîl zâwk a ni," a rawn tih chuan ka en hau a, a hna vànga rawn kal tak takah ka lo ngai asin!

"Eng anga nasaa min àn khum leh thinrim khum huamin ka rawn pan che a, in inkawp lo tih ka rin ngheh bur tawh avàng ka duhna che zual sauhin hlawhtlin ka tum a ni tawp mai. Eng ang pawha ka beih nasat ngai mah se hlawhchham ka tum lo; mahse, vanduaina hi ka tân chuan ka lama țang niin malsàwmna a ni ta hlauh a, malsàwmna ka ti lo thei lo a ni, accident kha tâwk lo ta ila tunah hian melh pawh min la melh peih lo maithei asin," țhen deuh sak pah hian a ti a, ka lo nui ve ringawt. A sawi dik maithei, min duh thu min hrilhna hun pawh ka la pe lo maithei a ni.

Ina ka haw hnuah chuan ka ngaihtuahnaah Kristie a rawn awm vang vang a, chutiangin a nu leh pate pawh. Ka tlawh ngun angreng si a, kan chanchin hi Jason-a'n a hrilh tawh ang em? A la hrilh kher loh pawhin min lo ringhlel ru reng tawh ang em tihte chu ka ngaihtuah a, ka lèn leh hun chu zawh chhin tùr a ni, a nute hi chuan min ringhlel chiah lo maithei, kan inkàwm nasa ve țhìn bawk si a, a damlo ka tlawh ve maiah lo ngai se ka ti.

Ka țhiante pawhin Jason-a accident tawh dàn chu an hre ve tawh a, an fel ve khawp a, an rawn kan ve dial nghe nghe. Kan la inzui rengah an ngai tho a, Lalrina pawh hian kan ni țha leh taah a ngai niin ka hria, min chhaih min chhaih tlat, pawi ka ti lêm lo. Tihian, a fel leh dèr tawh tihna a ni mai a, ka thinrim deuh lai leh a lungngaih lai, ka hnem ve deuh lai khân a hnênah hian Jason-a nèn lem kan chang mai a ni tih kha hrilh ka tum deuh ut ut țhìn kha a ni a; mahse, ka lo hrilh ta lo kha ka inchhîr lo ta viau, ngawih theih riau leh țawng lo insùm deuh pawh hi a lo țha a nih hi ka tih phah hial a ni.

Jason-a ka kan châng apiangin a kut leh ke mai bâkah a taksa hi ka hrûksak ve deuh ziah a, vawiinah pawh chawhma lam khân tui lumin ka hrûksak tawh a, Krismas hmaa dam chiantîr ka duh avàngin hetia ka hrûksaka a kut leh ke ka han hmehsak hian dam hma deuh tùrah ka dah a, ka tih tùrah ka ngai hmiah bawk.

Ka rilrua riak reng țhìn chu ka záwt ta a,"Krismas-ah i nau a rawn haw ang em?" tiin, ani chuan," Haw lo maithei," tiin min lo chhâng a, ka lo bu nghat a. " Engah nge min zawh a?" a tih leh chuan," A, ka ti deuh mai mai a nia, i chanchin hi a hre ve tho ang a, a rawn ngaihtuah ngawt  lo che maw?" ka ti ta zaih a, a rawn haw chhoh hlauh chuan a fing ve tho si a, kan chanchin hi a hre ngei ngei ang a, min ngei ang tih ka hlau, Hriatpuii a duhin a ngaisâng nasa mai si a.

"Ngaihtuah teh rêng mai. E, taka, kan chanchin pawh hi ka hrilh tawh tak asin," a rawn tih chuan ka en vat a, ka thin a phu rang nghâl dawt dawt mai. Ka hmêl ațangin ka rilru a hria a ni ang tih tùrin," Hlauthäwng duh suh, thu dik chu a lakah zêp ka duh hleinem," a rawn ti zui a, zäm angreng tak hian ka hmui chu ka pet zauh a," Mak a ti àwm mang e?" ka ti sap a.

"Umm...mak chu a ti viau mai, ti mah se a àwm tho, in inkàwm nasa si a, a ring pha dâwn lo êm a ni," a lo ti leh a, ka rilru tê tê chuan," A rin loh deuhin Hriatpuii hming aiah ka hming a ri ta daih àwm si a, min ngei ru ngawt ta ve ang," ka ti neuh neuh a. A rì erawh chuan thil dang zâwtin," A nih, i nu leh pate'n an hre tawh em?" ka ti leh a.

"Hrilh chiah lo, Kum tharah ka hrilh chauh ang," a ti leh a," Ni e, hrilh rih suh, ka zakin an hmêl hmuh pawh ka huphurh phah vek palh ang. Kei chuan ka chhûngte ka la hrilh lo vek hrim hrim a, min hauh ka hlauh deuh vàng a nia," ka lo ti ve thung a, a mit menga hriat thiam lohna ka hmuh chuan," Ka hrilh loh chhan chu an duh dâwn loh vàng che ni lovin ka țhian leh ka nuța neihchhun ang i nia, an hriat thiam loh ka hlauh deuh bâkah min zilh ang a, ka lèn chhuah min khap pah bawk ang tih ka hlau a ni. Bialpa ka nei tih an hre lo hrim hrim a, Lalrina nèna kan inkawp lai pawh khân an hre chuang lo, hrilh ka duh teuh lo, a zahthlâk! 'Bialpa ka nei a' tia nu leh pa leh chhûngte hrilh te chu a!" ka ti barh barh a.

Krismas pawh a hnai tak zet ta, kâr khat chauhin min dang tawh. Tunah chuan Jason-a pawh a dam viau tawh a, Kristie a rawn haw chho dâwn lo tih ka hre chiang ta bawk nèn, ka rilru a zãng huai mai. Chutih rual chuan Kristie hian min la rawn be leh tawh miah lo va, a u nèn kan inkawp a ni tih a hriat hma leh a hnu lamah rêng rêng pawh, min ngei deuh a nih ka ring lo thei lo, lehlam takah erawh chuan min rawn bia ang tih chu ka hlau phian lawi a.

Kan chhuah dun hmasakna berah chuan khawlai a chhuak leh thei tawh lawm nân ka treat a, tlàwm a ngai khawp mai a; mahse," Tûn țum chauh hi chu min hre thiam hrâm la," tia tih takmeuha ka ngen hnuah a rem ti ve ta chauh a, duhsak takin a ei duh zâwng apiang chu ka lamsak a, inah a inkhung rei tawh a, a duh tâwkin ei se ka ti a ni.

"Urlâwk zànah dawhthlâk i dawh dâwn em?"

Ka melh ralh a, chutiang te sawi rêng rêng, miin an lo hria ang asin. Ka hawi tawn deuh vat vat a; mahse, kan bul vêla mite pawh chuan a țawng chu an rawn hre lêm lo a ni ang, an rawn hawi lêm lo.

"Tenawm suh!" mi hriat hlau tak leh țawng ring ngam lo hian sehchilh nak hian ka ti a, min lo ngai hur viau em maw ni, vawi khat tê mah ka la dawh thla lo hrim hrim, nula virgin ngat ka la nih hi.

A rawn nui ta hawk hawk a," I rilru reuh chu, i ngai dàm mai mai a nih kha, khatiang lam kha ka sawi a ni lo, Krismas putar thilpêk dawh thlâk ang kha alawm ka sawi, i ngaihtuah a hriat êm mai aw," tiin min la fiam zui a, kei lah chu ka dang duh bîk dèr lo.

"I rawn sawi chhuahna rilru a mak zâwk aw... Krismas putar thilpêk," tiin ka chek hlak a," Tûnlai hunah tu nulain nge chutiang te ti tawh ngai ni? Naupan lai bâkin an ti ngai lo, a thuhrimah Krismas putar thilpêk tia lo âwih rual hmuhin min hmu rêng rêng em maw ni," lungawi lo fê hian ka ti nang nang a, a àwm lo ve êm a ni, nula ngaihzâwng pawh vawi hnih nei tawh ka nih hi.

*Dah loh ai*

To be continued...