☆SUMRISANG☆ - 29 By Dingdi Pachuau

☆SUMRISANG☆- 29 By Dingdi Pachuau

Ka hlim vàng nge ni, hun chu a liam duak duak maiin ka hria, dam țhata hlim bawk hi chuan ni khat hi a lo rei lo khawp mai a lo ni, kum a lo tam chhoh hian a ni lehzualin ka hria. Pawi lo, ka thil zir ka zir zo vat ang a, pawisa ka thawk chhuak ve thuai thei dâwn asin.

Zêp reng theih ni hek suh, Vlite inneihnaah ka dinpui dâwn tih chu țhiante pawh chuan an lo hre ve lo thei lo va, ka rin ang erawh chuan min fiam mang miah lo, nuih pawh min nuih lo, ka lo huphurh rûk tehrêng nèn. Fiona-i leh Lawmpuii takngial pawhin," A va phùrawm tawh tak!! Hawh u, mo tih loh chu Tluangi kawr rawng ang ha vek ang u," phûr zet hian an ti a, Jay-a pawh chuan," Kawr thar neihna hun a ni mai a," a lo ti ve a, min fiamin min nuihzui miah lo a nih chu, a phûr ber berah an țang zâwk a, ka lãwm tak tak a ni. 

U Nubawihite nupa pawhin chaw an rawn ei ta zauh zauh a, U Nubawihi ka hmuh apiang lah chuan pasal han neiha rài ve châkna ka nei ta zêl mai a, a rúk tak chuan ka duh lo tak tak a ni. Fa a neih hun tùrte sawiin kan pawm theih hun tùrte kan sawi a, ka pa nèn phei chuan pawm hmasatu nih kan inchuh nghâl dèr mai! Mahse, ani chuan a hming a saksak ngei ang a, chuti a nih chuan pawm hmasak chu ka chang thei maiin ka ring.

A dâwna ruaibut taka buai ai chuan tiin Vli chu ka theih ang angin ka inhmakhuapui a, Jason-a tih buai ka duh lo va, Vlite chhûngkua lah pa uap loh an ni tih ka hriat tawh avàng leh an chhûngkaw dinhmun tùr ka hriat tawh avàngin thil rêng rêng chu a hautak lo thei ang ber leh sum sêng tam lo thei tùr ang ber zêlin ka ruahmanpui bawk a, ani pawh chuan Lalrina inhawng viau mah se a pasal tùr a ni miau a, sum an sèn țeuh leh nakina an buaina ti tam mai tùr a ni tih a hriat ve avàng chuan a theih chin chinah chuan tih buai a duh bîk lo. 

Jason-a'n," I phûr riauin ka hria," tia min fiam chuan," Min fiam lo teh! Ka duh lohzia chu i hriat kha," ka ti vat a, sawi zawm lehin," Mahse, min țahawh ve ngawih ngawih ta chu, ka khawngaih ve bawk si a, huphurh ru tak siin ka hnial ta lo a ni. An chhûngkaw dinhmun ni se Vli sawi dàn ațangin a hriat thiam theih ruak a, ruahmanna siampui pawh hi har ka ti asin," ka ti leh duah a.

Inneih nîa kan thuamhnaw tùr chu mi tih dàn angin hawh ve mai țha kan ti a, hawh man chu Lalrina'n a tum dâwn a; mahse, kei chu Jason-a'n a rem ti tlat lo va, Vli rem ti vak lo chungin keiman ka pe thung ang; mahse, kei pawhin ka pe tak tak dâwn chuang lo, Jason-a'n a tum dâwn a ni. Ka hnial nasa a, a thinrim tâk dâwn miau avàngin a tum tùrah ka dah ta mai. A rawng leh a duh zâwng ka thlantîr a, inhmeh min tih ber ka thlang nalh a, a simple nalh a, a rûk taka ka lo duh ve ber a thlan nalh avàng chuan sawisèlna ka nei lo. Pheikhawk lam chu lei kher ngai lovin kan neih sa kan bun mai dâwn thung a. Man hlannaa hâk tùr leh làwi kawr tih vël erawh chu puan man to lo, a pár, hâk nuam tùr tak kan lei a, țhuitîr tùrin kan dah a, a mil tùr puan inang kan neih sa kan ring leh mai dâwn a ni.

Inrinnia Jason-a lo lêng chu," Hawh, ka lo chei chhin ang che," ka ti pek a, min hnial ka rin tehlul nèn," Pawi hleinem," a lo ti ve mai a, ka han chei ta alawm, a awm țha roh bawk sia, nuam ka ti tawp. Ka han chei zo chu hmeichhe hmêl țha zet a ang ka ti lutuk, a inhmeh phian zui bawk si a, thla pawh ka lâksak nghe nghe a.

"Hun ãwl i neih apiangin lo kal ziah la, ka lo chei ziah ang che," ka ti a, ka thlêk chhên mai. Ani chuan," Ka rawn kal ziah hi maw, hun ãwl nei lo chung chung pawhin nang hmu tùr chuan ka insiam zêl bawk a," a lo ti a, ka nuih sak a," Ni ve leh tho mai, ka lo ngaihtuah chhuak har deuh a ni tiraw?" tiin làwmthu sawi nân a hmuiah chuan ka fawhsak zauh a, min chhàn ve hma erawh chuan ka inla hrang nghâl daih, a hmui ka hnawihsak chu a reh palh ang tih ka hlau a ni.

Ka nu rawn kal chuan," Leh ta mai mai chuan aw!" a rawn ti a, a rawn en vang vang a, chutah," I inhmeh phian lawi a," a ti leh a, kei pawh chuan," A inhmeh tak tak tiraw, Nu? Kei pawhin inhmeh ka ti lutuk a, ka lo thlêk ka lo thlêk mai," ka lo ti ve a. A chhuah hnuah Jason-a chuan," A zahthlâk a nia, mipa ve si hmeichhia anga inchei te chu," a ti sup a, ka nuin a rawn hmuh avàngin a zak tih ka hria, chu vàng chauha sawi a ni tih ka hriat avàng chuan nui chung hian," Model atân ka hmang che tih a hre thiam ve tho alawm, mâkpa atân chuan a iai phah chuang lo ang che," tiin ka han fiam zui a, a nui suk duh chauh.

Eng eng emaw ho deuh deuh hi ka zâwt peih a, ka duh tluk zetin min duh a ni tih hre chiang mah ila ka zâwt bâng chuang lo. Inkahpah deuh deuhin ka rilrua rawn lang apiang hi chu ka zâwt mai țhìn a, ka mood awm dàn azirin zawhna ka zâwt țhìn a nih ber chu, ani lah hian țha tak hian min lo chhâng ve mai zêl bawk a," A ho êm mai, min zâwt min zâwt suh," a tih maite hi ka ring ve țhìn a nia, thu taka min chhàn țhin vàng hi a nih ka ring ka zawh chiam țhin ni.

"Pathianin min lo ngaidam se, lo thi ta ila, i tuar viau chu ka ring a, min țah nasa ang em?" ka ti pek a, ani chuan," Thi lo ang, ka phal teuh lo mai!" a lo ti thung a. Kei erawh chuan," Lo thi ta ila ka ti mai alawm, min chhâng țha ve mai la," ka ti leh a, ani chuan," A theih loh!" a lo ti leh bur a, chutah," Thihna lam kha chu min zâwt tawh miah suh, thil dang min zâwt zâwk rawh," a tih zawm leh a.

"A nih leh, eng anga nasain nge min duh?" ka ti leh zat a, ani chuan," Min duhna zât lét chiahin," a lo ti rang vat a, ka nui sak a, nui chung hian," Ka duhna che hi a zât i hria em ni?" tiin ka zâwt leh a, ani chuan," I hria a, i chhût thei mai ang chu," a lo ti leh mai a, a inla hre vêl leh inla chhâng thiam lutuk chuan ka nuih a ti za ngei mai.

"Kei chuan ka rilru leh thinlung zawng zawngin ka duh che a," ka tih chuan," Ka rilru, thinlung, taksa leh thlarau nèn lam maw le," a lo ti ve leh a, hlim rilru tak hian ka en vang vang a. Chutah," A nih leh, i la virgin em?" tiin ka zâwt ta phawng a. Min chhàn nghâl vat loh vàng chuan nui chung hian," Gin tawh lo a ni maw? Min chhâng hreh chuang suh, ka rin dàn tho a nia," ka ti leh a, mipa hmêl țha leh hmeichhe duh chî tak a ni a, a virgin kha chu a rinawm viau loh rêng a ni. 

"Min zâwt thut a," a tih chuan ka nuih vak vak a, a hnu deuhah chuan," Mipaho hi chu in fing phakar ve ngawt mai, in bialnute hi virgin tùrin in duh a, nangmahni lah virgin in tum ve mang si lo. Hmeichhia in hmuh leh in theih apiang mutpui in tum leh si a, in mutpui zêl si chuan virgin-a bialnu leh nupui neih tùr an vâng dâwn asin, nangni pawh in virgin theih loh hi chuan virgin tùr hian min beisei bîk thei lo ang," ka ti ta duah a.

"Ka tlâwm, ka tlâwm! Sawi tùr ka hre tawh lo," a rawn tih zuai ruih tâkah chuan," Um, tûn atân chuan duh tâwk phawt ang. Le, ril pawh a țâm țan ta ruih mai, eng ei tùr nge kan siam ang?" tiin thu dangah ka luhpui ta daih a.

Vli leh Lalrina tel lohna group kan siam a, pawisa thawh khâwm zât tùrte kan rêl a. Thil ho mai mai pe lova an mamawh tùr tak pêk kan ti bawk a, ka rin aiin an lo inhawng hlawm a, kan thawh khâwm thei țeuhin ka ring. Ka pa pawhin," Vli chu ka hre chiang mang tlat lo, chaw eiah sâwmin rawn riak ve nghe nghe teh se," a tih avàngin a rawn Aizawl remchàn lai chu ka chuh ta vat a, a zak deuh nain zak lo tùr chuan ka hrilh a, ani pawh chu pângngai thei ang ber chuan a awm zui ve mai bawk a.

Ka pate hian inneihnaah ka țhiannu ka dinpui dáwn a ni tih an hriat ațangin min buaipui ve khawp a, ka vawi khatna tùr a ni bawk a, ka nu chuan ka chét sual mawlh a lo hlau pek a, tih dàn tùr min hrilh reng țhìn. Ka pa erawh chuan," Mite pawhin an țhiante inneihnaah an dinpui fo a, an che sual vek bîk hleinem, engah nge maw a chêt sual bîk ang le? I lo hlauthãwng hma thei lutuk a," tiin ka nu chu a hrilh nghe nghe.

Chaw kan ei lai chuan ka pa chuan kan țhian dùn chuan min zilhin min fuih pah a, ka nu pawhin a lo pui zauh zauh a. Ka pa chuan," In chhûngkaw dinhmun pawh Bawihtei hnên ațangin kan lo hria a, hei i țhiannu pa leh nu kan nihna angin i nu leh pa ang tho kan ni a, chutianga min en pawh chu ka duh a ni. In inneih hnuah pawh inthlahrunna tùr a awm miah lo tih i hre reng dâwn nia, i mamawh leh eng ilo vêl i rawn lam țhìn ang a, mo thar tân a mona chhûngte hnêna duh leh mamawh thil eng eng emaw han sawi nuam lote hi a awm ve ngai a nia, chutia ka tih avàng erawh an bulah eng mah sawi lovin i rawn kal țhìn ang ka tihna erawh a ni lo thung a," a ti bawrh bawrh a. Vli pawh chuan nui deuh chung hian," Ka lãwm lutuk, ka hre thiam alawm, ka pa, ka lo hre reng ang e," a lo ti ve a.

Mahse, ka vànduai ka ti dâwn nge ni, ka dam theih tehlul nèn, tlai khat ka haw chu ka awm a nuam lovin ka taksa a na țhûm ringawt a, chaw ka ei peih lo viau nain ei loh ngawt chu tiin, bàr thum vêl chu ka bâr ve a, ka nu hmun ka tih felpui hnuah pindan lam ka pan a, damdawi eiin ka mu zui ta daih a. Jason-a pawh ka text a, rawn lêng lo tùrin ka ti ringawt a ni; mahse, a rawn kal tho a," I awm a nawm lohte chuan rawn ngaihven tùr che ka ni alawm," a rawn ti a.

Ka khua a sik a, ka taksa na țhêm țhûm chu thuhran, ka hrawk a nâin a thîp vîn tûk a, ka lu lah a na nut ngut bawk a, ka thil zirnaah pawh ka kal peih lo. Ka nuin," Boruak inthlâk hun lai ngang hi a ni a, tlâng hri lêng a nih dâwn hi," a tih avàngin ka ngaih a țha deuh a, inentîr pawh ka tum lêm lo; ka pa erawh chuan inentîr chu țha a ti viau a; mahse, min ti lui lo thung.

Jason-a a buai zak zak viau mai. Ka damdawi tùr min ngaihtuahsak a, doctor a râwn thlap a, ei hun tùr a ziak thlap bawk a, office pawh a țhulh phah tawp mai a ni. Ka hnial a, kal tùrin ka ti a; mahse," Kalsan che ka duh lo," a ti bur mai si a, kei lahin min awmpui chu nuam ka lo ti tho bawk si nèn, ka țang zui vak duh lo a ni. Ka taksa na țhêm țhûmte chu min hmehsakin tui sa ver vawra hrûkpuan chiah huhin ka bân leh ka ke a hrù chhuak vek a, ei tùr ka ei theih zâwng tùr min zâwtin a lei a, min siamsak bawk a, min duat khawp mai, min riahpui lo chauh tak tak a ni. Vli'n ka chanchin chu a lo hre ve a, min rawn be vat nghe nghe a. "A pawiin a zia lo tak zet a ni; mahse, lo dam vat vat tum rawh aw, inneih a hnai tawh si a, min dinpui thei lo palh hlauh ang e, i dam chian vat a ngai a nia," a rawn ti a, Aizâwlah a awm leh tawh rih si lo va, Lalrina min kan tùrin a hrilh a ni ngei ang, a rawn lang vat a, eitùr pawh min rawn kensak nual bawk; mahse, Jason-a'n a dah țha vek a, ama min leisakho chiah ka ei min phalsak a nih chu. He pa tak hi chuh! A thîkthu a chhiat êm êm rualin hei hian a ti duhawm tlat bawk si a, huat lamah pawh a kal hlei thei lo, ka nuih a ti za viau zâwk a ni.

"Ka ei atân min rawn kensak ve liau liau a nia, engah nge ei chu i phal tlat loh? Tu nge ei chuang ang?" ka ti nghe nghe a, ani chuan," Ei tùr mi dang an awm alawm, ei rawh se," a lo ti deuh tlat a, amahin a rawn leiho chauh chu min rawn chhawp hnai a. Min duatin min ngaihsak êm êm a, ho ti viau mah ila a thu hnialsak erawh ka tum lo. Min ngaihsak hian nuam ka ti a, ka duhna a zual a, an in leh kan in a kàr tawn sek erawh ka khawngaih viau, chu vàng chuan riak ve mai tùrin ka sâwm fo a; mahse, a riak ngai lo, mawi lo a ti deuh a ni ang. A haw dâwn apiangin kawng lakah fîmkhur tùrin ka chah ziah a, thui lo tê mah ni se a chesual ang tih ka hlau a, ka chah loh chuan ka ngaih a țha thei lo a ni.

Kâr khat zên zâwn in lama hun ka hman hnuah dam lam ka pan chho ve țan ta, țhiante pawhin min ngaihtuah a, min rawn kan loh leh chanchin min rawn zâwt reng a, a nih loh pawhin ei tùr tal min rawn thawn hrâm hrâm a, an ti làwmawm tak tak a ni, țhian țha neih hi chu a hlû a lo ni. Vli pawhin chanchin min rawn zâwt reng reng a, dam thuai tùrin min duh tih ka hria, ka dinpui theih loh a hlau tak zet a ni.

Kei chu ka nat hlekin chaw ka thlah zêl a, thil ka ei theih loh hlekin ka tla nghâl kâwk zêl. Tunah pawh hian ka  hmêl a tla leh kuam tawh a, thil ka ei ve ţeuh pawhin thau lamah hian a kal chak lo viau, ka kekawr kâwng ka han thâwl nghâl êm êm ringawt a, Vlite inneih hmain ka thau hman pawh ka ring tawh lo. 

Ka dam tâk deuh hnuah chuan chhuah pahin thuamhnaw kan hawh tùr chu ka ha chhin leh a, ka lo thâwl hawk tak tak a!! Hun a tam tawh loh avàngin ka tàwn mar zawh ka inring lo va, tlêma țhui têttîr mai țhaa ka hriat avàngin siam țha tùrin ka hrilh ta ngawt mai nghe nghe a ni.

Social media vêla Jason-a nèn kan inkawp a ni tih han pho lan vêla kan pahniha thlalâk han pho chhuah vêl hi ka duh ngai lo ka tih tawh kha, ka chhûngte leh ka țhiante'n an hriat chuan tâwk maiah ka ngai a, eng emaw deuh taka mi hriat loh hlau rêng rênga story-a han hmante hi ngai ka ti ngai lo, a hre tùrte'n an hre kim vek tawh tho a, ka hriat ngai lêm lohte'n kan inkawp tih an lo hriat ve kher kha țûl ka ti lêm lo.

Mahse, ni khat chu țhiante nèna Lalrinate inneihnaa mi tùr thil pawimawh sawiin restaurant-a kan țhut khâwm țhap a, eng nge kan leisak ang tih kan sawiho ve a ni, kan sawi zo thawkhat tawh tihah chuan hmeichhe pakhat leh Jason-a ngei mai chu kan chawlhna restaurant opposite dàwra an lût dùn tùr chu kan han hmu ta a, an hmêl ațang chuan an hlim hmèl viau mai lehnghâl a, hmeichhia chuan nui chung hian a hnungah a bensak nawk nawk zui bawk a, chutiangin Jason-a pawh chuan a samah a chùlsak thuak thuak bawk. Thîkna thinlungin ka en nghâl lo thei lo. A kalpuinu chhe lo viau chuan ka awm a ti nuam lo zual a, a thuhrimah a bula hmêl hriat vak loh hmeichhia an awma nêl taka an nuihpui hi chuan thîk loh tum chhin ka tum ngai lo a ni ang, ka thîk zêl.

Ka țhiante pawh chuan an hmu ve tho a, min han fiam zui nghâl a," A chhe lo angreng sia, i dinhmun a ti derthãwng pha tlat," an ti a, a țhenin," Jason-a chu a ti mak hle mai, hun ãwl a neih chuan rawn hrilh àwm che a nih tehlul nèn," an tih loh leh," Nula kha i hriat mi a ni rêng rêng em? An innèl hmèl khawp mai lehnghâl. Jason-a a demawm tak zet a ni, bialnu nei reng chunga khatianga nula dang bula awmte chu," an ti bawk a, Jaz-a erawh chuan," A hmël hriat țha tak a ni ang chu, mi dang a kawp tihna a ni kher nâng," a lo ti thung a; mahse, a thil sawi chuan ka ngaih a ti țha chuang miah lo, min fiamna chu thu dik tak vek niin ka hria a, fiamthu mah ni se keimah ang thovin an mit mengah erawh chuan ngaihțhat lohna a awm vek hlawm ni berin ka hria.

Ka ngaihtuahnaah thil dang a leng lo, chhuanlam siamin ka chhuak a, an pahnih chu zui rûk emaw ka tum chuang lo, mipain thlah min tum pawh chuan duh lovin ka thil ngaihtuah ti puitling tùr chuan ka thil duh awmna lam ka pan zui nghâl a. Dàwra ka awm lai la la chuan Fiona-i message ka dawng nghâl zat a, ka han en chuan Jason-a leh hmeichhe pakhat chhe lo deuh thlalâk hi a lo ni a, *Hei, nichina a kalpuinu kha, an pic a lo upload nghâl a nih hi* tih message ni a lo ni nghe nghe. Ka han en chiang chu ka tâwt deuh up up a, caption-a meng love pawp pawp pathum lai a dah chuan min ti tâwt lehzual, min lo kawp tak tak a ni mai lo'ng maw? Mahse, a ni thei dâwn em ni? A ni thei lo ang. Min duh ve êm êmin min ngaihsak êm êm a, ka damloh lai pawhin ka bulah a awm reng a nih kha. Tukina kan inbiak laia kan tih tùr kha ka hrilh khân ani pawh thil pawimawh ti tùra a pa nèn an chhuah hma a ngaih thu min hrilh  kha a nia, eng nge a awmzia ni le? Dáwt min hrilh duh mai chu ka ring chiah lo e, ka hmuh mai pawh a ring ve ang chu.

Tlai lamah an inah ka va kal chilh tawp a; mahse, a lo awm lo va, ka phone ka keng bawk si lo nèn, rei pawh awm lo chuan ka chhuak leh a, ina haw nghâl ka peih chiah rih loh avàng chuan ka tlãn kual leh rih a, ei tùrte ka lei ta vêl mai mai a. In ka thlena ka nuin," Khaw nge i kal daih a? Jason-a a rawn kal a, biak che a tum lahin phone i keng si lo," a lo tih chuan," A haw tawh em ni?" ka ti ve thung a. "Haw lo, in chung lamah khian a awm ang," a tih leh chuan ka room-ah ka lût phawt a, ei tùr ka lei chu dahin in chungah chuan zàwi muangin ka chho ve ta a.

Min hnungchhawn zâwngin a lo ding a, ka thãwm a hriat chuan a rawn hawi vat a, inthiam lo hmël ka hmuh ka inrin laiin hrehawm ti hmêl a pu zâwkin ka hria. Min rawn pana muangchânga rawn kalin," Vawiina i thil hmuh kha eng mah a ni lo a nia," a rawn ti nghâl ringawt a, ka chhâng lo va, ka lo en reng ringawt a.

"Ka pa nèn kan chhuah hnuah Sam-a'n min rawn bia a, a cousin Beth-i Aizawl rawn zin chu chhuahpui tùrin min rawn ngèn a, sàwm ve che ka duh viau laiin i țhianteho nèn inhmuh in ngaih thu i sawi kha ka hre ve tho bawk si a," tia a insawi fiah leh pawh chuan ka la țawng chuang lo. Ka țawng loh vàng chuan nge ni, hrehawm tih hmèl tak hian," Fiona-i'n Beth-i nèna kan thlalâk min rawn thawn a, in zavaia kan inzui lai min hmuh thu leh Beth-i leh nangmah chu ka kawp em tih min rawn zâwt nghâl bawk a ni. Ka hman veleh ka rawn pêng haw nghâl a, i lo awm lo va, biak che ka tum lahin phone i lo keng bawk si lo," a rawn ti leh a, ka kut chu a rawn ban dà dá a, ka lo ban mai loh avàng erawh chuan a tîm ta deuh nge ni," Dâwt ka hrilh lo che a nia, Beth-i kha ka ngaizâwng hauh lo, ka nau angin a nia ka en, min lo ngaizâwng deuh a ni maithei; mahse, kei chuan chutiangin ka en lo, nang chauh hi he khawvêla ka duh chu i ni. Chuan, eng emaw tal sawi teh, i țawng loh hian hrehawm ka ti a nia," a ti leh sup sup a.

Ka kekawr ipte zenin ka thil lei chu ka hmaah ka keng lang a, amah chu enin," Hnam dangho tih dànin inhual mai ang, hmeichhe dang rêng  rêngin ka tâ i ni tih an lo hriata an beisei loh nân che inhual tawp mai ang," ka ti ta hlawl a, a hmeichhia zâwkin sawi chhuah hmasak chu a mawi vak lo ang tih hre tho mah ila hetia ka tih mai loh chuan, tihngaihna dang ka hre lo, hmeichhe dangin ani hi ka tâ niin kan inhual tawh tih an hriat chuan an lo beisei ngam lo ang a, an hnaih loh deuh ka beisei a ni.

"Tluangi...!!" a ti hau a, ka thil ken bâwm te reuhtê chu enin min en leh a, mak a ti tih a mit meng ațang chuan ka chhiar thei a. Chutah, a han nui a," Engati nge hetiang hi i tih a? Keimah hian ti zâwk tùr ka ni asin, mipa mãwl tak chu ka va ni êm!" a ti leh a, bâwm chu lain a han hawng a, a mit meng chu hlimna avàng hian a tle ser ser ni maiin ka hria.

Zungbun kan inbuntîr hnu chuan a phone-in kan kut ve ve chu thla a la a," IG-ah ka upload dâwn," a ti sup a, ka lo hnial tawh lo nasa, a hma khân ka hnial țhìn a, tunah chuan pawi ka tih tawh loh bâkin mi tam thei ang berin kan inkawp a ni tih hi hria se ka duh tawh zâwk.

A upload rual chiah chuan ka upload ve nghâl a, țhiante'n min rawn fiam nasa nghâl khawp mai. Min lawmpui thua rawn comment an awm rualin nuihzatthlâk leh ngeiawm lek leka rawn comment pâwl an awm bawk; mahse, pawi ka ti lo chiang lutuk ringawt. Jason-a lo duh vetute comment a ni tih a hriat a, an comment ka chhiar ațang chuan ka vànneihzia ka hriat chian phah deuh deuh a ni.

A hun a lo thleng ve dâwn tak tak ta. Rehearsal kan han nei ve a, ka va han nui nasa tak! Kei hi chu ka mâwl ve hrim hrim a, thil hi ka chîk lêm lo bawk a, Vli zungbun tùr chu ka ken tùr emaw te ka lo ti ve ngawt a! A lo ni lo nasa, ka han sawi chhuak phei chu pastor ho chuan kan nui vek nghe nghe. 

Vlite khuaah man inhlanna hun kan hmang a, Jason-a lo kal ve chu ka phût ngam chiah lo nain min thlah fâl duh awzâwng lo lo niin, min hruai thlap a, ka lãwm tak tak a ni, hrehawm a ti ang tih hlauin ka ngaihtuah ru angreng viau thung a, ka țhianteho nèn han awm tlãng ve țhìn tho mah se ani hi chu ka tel lo chuan a mal bîk ka ti mai, chu chu ka sawi thiam dàn ber a ni; mahse, ani ve thung chuan," Mipa ka ni alawm, min lo ngaihtuah suh," a lo ti mai a; mahse, ka ngaihtuah ru tho.

Keini țhianho zawng kan pui mep mep asin, Lalrina dinpui tùr kan țhian mipa zîngah țhum an han váwr a, a chhan chu an inchuh vek mai si a, an thu buai remsak nân tiin Hazel-i'n țhum vàwr a rawt ta kha a nia, Maenga chungah a tla ta a ni. Ani lahin Vli hnênah chuan," Țhian man min eitîr ve loh vaih aw," tiin a lo vau ru sa bawk a, Jason-a tih loh chuan țhian man kan ei vek ta a ni, mi tih loh dàn a ni em tih lam kan ngaihtuah lo, man ei kha kan duh vek tawp a ni mai. 

Man ei zawng zawngte tân chawhlui min buatsaihsak a, kan ei zawh hnuah 'haw leh hma' tiin an lêng kual a, kan châk ve viau nain mawi chiah lova kan hriat avàngin kan pali chuan in kan nghâk a,  Jason-a pawh a kal ve lo, ka bulah rinawm takin a țhu ngar mai a ni.

Inneih nî a lo thleng a, Lalrinate ka lawmpui rualin keimah chuan ka huphurh kher mai thung a, ka nu min fuihna leh ka chét chhiat a hlauhnate kha ka hre chhuak a, ka inring tâwk lo zo vek maiin ka hria. Jason-a ka text nghe nghe a, ani erawh chuan min rawn biain," Țha takin i tih tùr chu i hlen chhuak ngei ngei ang tih ka hria a ni, i hlatah ka awm dâwn miah lo tih hria la, inring tâwk takin i awm tlat dâwn nia. I zah deuh dáwn chuan thâwk i la vak ang a, muangchângin i thaw chhuak leh țhìn dâwn nia... I mawi dâwn si a, mit lâk sawn har ka va ti dâwn tak êm!" a rawn ti ve ngial a, a thil sawi avàng chuan ka nui chhuak hak hak nghe nghe. Rilru hahdam taka awmtîr dàn hi a thiam a nia, a hmêl țha bawk si.

Biak in chhûngah chuan mipui lam hawiin vawi khat mah ka hawi chhuak lo, ka zàm a zual ang tih ka hlauh vàng a ni. Khurh loh pawh ka tum ve viau a; mahse, ka kaihza thâ hi amahin a rawn khùr leh dar dar țhìn a, chu chu lang lo tùrin ka che deuh sek lo thei lo, inkhâwm chhûng chu rei hi ka'n ti khawp a! Inneih inkhâwmah chuan a la rei ber maiin ka hria. Kan tàwp thei dâwn ta lo emaw ka tih hnuah kan chhuak thei ta hrâm e.

Pâwna Jason-a hmêl ka hmuh chiah chuan ka zàmna zawng zawng chu chawplehchilhin a reh nghâlin ka hria! Min lo en reng tawh a, ka en ve chuan mitko sàn ãk pah hian ka nuih sak a, en reng mai ka duh viau laiin lawmpuina chibai min rawn bûk hlawm ta si a, ka mit chu ka lâk sawn phah ta a ni.

Kan pahniha kan awm dun theih hmasak berah chuan min kuah vawng vawng a, ka chauhzia a hre ve a ni ngei ang, duat takin min kuah a," I mawizia kha, ka en ning thei lo che a," a ti sup sup a, ka nui sak a, a âwma bei tlãn chung chuan ka maimichhîng vang vang a, hetia awm hi ka châk tawh êm asin, a ângchhûngah hi chuan ka hah a dam bâkah ka thla a muang siai siai țhìn si a.

"Kan tih ve hun tùr ka nghâkhlel tawh mang e!" a ti vang vang a, chumi hnuah chuan," Vawiina ka hmu chiah che kha chu e, mo lam en nachâng pawh kha ka hre miah lo a nih chu! Angel hi a rawn inlâr ta emaw ka ti hial asin," a ti leh a, a thil sawi chuan min ti lãwm a, chutih rual chuan amah nèn inhmeh lo ka tih êm avàng chuan ka nui lo thei lo va.

"Tihian muthilh daih theih se!" tiin ka kuah nghet chãih chãih a, a taksa lum ham ham chu ka hre chiang khawp mai, kei pawh chu ka lum phah thei hial a, ka mut pawh a ti chhuak zual a ni.

"I riahpui dâwn lo bawk a, haw tawh ila?" a lo ti ve thung a, ka riak ve ang tih kha a hlau tak zet a, a tak chu sawi loh fiamthu pawhin a phal lo a ni. Vli'n riahpui ngai a ti lëm lo bawk a, riahpui ka tum lo sa hrim hrim a ni.

"Ngawi lawk, a nuam rih alawm," ka tih chuan ka chhîpah chuan a fâwp zauh a," I chàu lutuk a nih hi, he hun hi remchângah lain kan inah ka hawpui daih dâwn zâwk che em maw ni le," a ti a, a hnungzângah chuan na lo tê hian ka sik zauh a.

"Pathian i hlau tih ka hre chiang ve tho aw, a duh loh zâwng tih te zawng i duh bîk lo chiang êm mai," ka tih chuan a lo nui ve hawk hawk a. Chumi hnu chuan car-ah lûtin kan in lam panin kan haw zui ta nghâl a.

Ka sawi hmaih țêp. Zungbun kha amahin a thar a lei tawh a, kan bun ve ve a, en ringawt pawhin a man a tlâwm lo ang tih mi ã nilêng lo tân chuan a rin theih mai bawk. Ka duh hliah hliah bawk a, ka kut chu ka en sek rêng a ni. 'Nakinah chuan inhualna mai ni lovin inneih zungbun ngei ka la bun ve àwm si a' tiin ka ngaihtuah ziah bawk.

Kan veranda-ah chuan kan ding dùn leh phawt a, ka harh chiang leh tawh bawk a, lo lêng lût rih tùr chuan ka han sâwm ngial a; mahse, min hnialin," Intifai thuai la, muthilh thuai tum záwk rawh, i chauh hnîp hnép êm kha," tiin ka kut chu la kãngin a fâwp zauh a, chutah min pawt hnaiin ka chalah a fâwp leh a," Ka bàl teh a nia, makeup pawh ka la ti fai lo," ka lo tih chuan a nui sak a," Ka hmangaih hi a bàl hauh lo, a makeup inhnawih zawng zawng nèn pawh hian ei zawh vek ka châk!" a ti sup sup a, amah nghènga min pawmin duhthawh zet chuan min han fâwp a.

Kan infawh vawng vawng hnu chuan zungbun min buntîrna kut chu la kângin a en vang vang a, chutah, ka mitah tak chuan rawn en lehin," Ka hmangaih che, Remtluangpui, ka hmangaih tak zet che a ni. Ka thâwk țêk țêk chhúng leh Chhimbãl a awm chhûng leh a zàm chhúng chuan ka hmangaih reng ang che. Le, lût tawh rawh le, a tlai chhiat tak tak hmain, ka phal lai hian lût thuai teh, chuti lo zawngin Pathian duh loh zâwng ka ti palh ang e," a tih chuan ka tàwi ngam tawh lo, a ti duh tak tak ang tih ka hre si a.

*THE WAY I SEE IT, IF YOU WANT THE RAINBOW, YOU GOTTA PUT UP WITH THE RAIN*

            ~ Dolly Parton

(Sâp țawng thiam ber ni àwm ang hrimin😃 a thu a țha viau tùrah ngai ang, Rainbow(Sumrisang) tih a awm sia🤣🤣🤣)

A tàwp ta.