☆DOZER☆- 1 By Dingdi Pachuau

☆DOZER☆ - 1 By Dingdi Pachuau

"Tunah chuan eng mah ngaihtuah buai lovin ka awmpui thei tawh che a, thlamuang takin i awm thei tawh ang," tiin ka țhiannu ve êm êm, ka tét tê ațanga hostel-a ka awmpui țhin, min ngai êm êmtu Angaihi chu ka nuih sak a, a khumah chuan ka țhu ràn a, ani pawh chuan nui sak chung hian," Ni e, ka thla a muang siai siai tawh, sawi tùr lah chu a tam tawh mai sia maw?" a lo ti ve a. Damdawi ina awm mah ni se a hlim hmêl chu hmuh a nuam tak zet a, na nei hmêl pawh a pu lo; mahse, a natna ka hre chiang a, tuar chhuak thei lovin rei a daih kher dâwn lo tih ka hria a, chu vàng tak chuan hun rei lo tê a la neih hi chu kalsan lova hlim taka hmanpui theih ka duh a ni. Nimin khân ka awmna leh hna thawhna hmun Goa ațangin Aizâwl hi ka thleng ve chauh a, ka chauh deuh avàngin Angaihi pawh hi ka tlawh nghâl duh lo nghe nghe, hlim tak hmêl pua hmuh ka duh vàng leh chau leh nguai bér búr hmêl pua min hmuh ka duh loh vàng a ni, tunah hi chuan ka harh vâk tawh a, awmpui tùr pawhin ka inpeih êm êm tawh a ni. A nu Nu Machhungi'n a awmpui deuh châwt a, a hman châng chângin a chhang chiah Mami, Durtlânga pasal nei tawhin a rawn awmpui ve bawk. Thla khat a awm tling țêp tawh a, a chêrin a dawldâng hlê a, a natna pawh hi amah pawhin a hre chiang; mahse, na nei hmêl leh beidawng hmêl pua ka hmuh ngai loh avàngin mak ka ti hlê țhìn a ni, tunah pawh hian kei aiin a rilru a hrehawm loh hmèl zâwkin ka hria!

"Engtikah nge Lungleiah chuan i phei dâwn?" tia min zawh chuan," Phei pawh ka tum lo, ka awmpui dâwn che alawm," tiin ka lo chhâng a, a lo nui sak a," Ka inthlahrung viau nain ka lãwm bawk sia, phei tùr chuan ka ti lui lo mai ang che," a ti leh a. Min ngai a, kan inhmuhna a lo rei tawh bawk nèn, a hun hnuhnung hmanpui hi a tâna ka tih theih awmchhun a nih tawh avàngin awmpui chu ka tum nghet bur a ni.

Ka chhûngte ka be zauh tih lohah chuan ka phone chu ka off char char a, Angaihi nèna kan hun hman hi thil dangin min rawn ti buai lo se tih ka duh a, kan pahniha hun hlimawm tak hman dun ka duh bawk, chutih rual chuan a rilru tùr ka ngaihtuah tel ve tho a ngaih avàng chuan ka chanchin làwmawm lo lam erawh ka hrilh ngam lo thung. Ka hmêla hlim lo hmêl a hmuh ka duh loh avàngin thil dang rêng rêng ka ngaihtuah duh lo va, Benson-a lam phei chu ka ngaihtuahnaa a rawn luh dâwn pawhin thil dang ka ngaihtuah tùr ka dap nghâl vat țhìn a ni.

Nâ êm êm tuar lo chuan a awm ve thei zêl a, a nâ a rawn chhuah dâwn veleh nurse duty ka ko vat a, a chîu nghâl zêl mai a, chu vàng chuan nâ tia a vial ngawlh ngawlh lai ka la hmu lo, a tuar chhuak dâwn lo tih a chhûngte leh amah ngei pawhin an hre chiang a, na tak tuar hman lova chìu zêl mai kha țha an ti a, chu vàng chuan a nâ a chhuah dâwn chuan ka tlãn vat țhìn. Awmpuitu hming chu ka pu ve tho nain Nu Machhungi leh Mami an rawn kal ve reng reng a, bâkah, rawn tlawhtu an awm ve reng bawk. Rawn tlawhtu apiangin a tâna țha tùr nia an hriat ei tùr țha tak tak an rawn kensak zêl  a, ani lah chuan a lo ei thei êm êm lo va, a ei chhun lah a tam lo nasa bawk si nèn, damlo awmpui e ti lo chuan ka thau țûn țûn mai ang tih pawh ka hlau hlel lo ve.

Pângngai reng angin lang mah se ni tinin a hniam hret hret tih ka hria a, dik tak chuan a bula hlim hmêl put luih reng pawh hi har ka ti ru țhìn khawp mai. Eng emaw chânga a en ngai a en leh vawng vawng țhìn ka hmuh châng phei hi chuan a rilru tùr ka ngaihtuah țhìn a, hrehawm ka ti tlawk tlawk mai țhìn a ni.

"Te, khatiang khân min en teh suh, ka duh lo. Mihring chu thi tùra lo piang chhuak vek alawm kan nih, a țhen kan thi hma deuh ang a, kan chàwl hma deuh dâwn tihna a ni mai a, engah nge khatiang khân min en fahran ni? Kal thei mai tùr hian ka inpeih tawh êm êm asin," a rawn tih chuan ka mittui chu a rawn tling nghâl kal kal a; mahse, a hmuh duh lo chuan hawi sawn deuhin," Kha lam kha chu sawi lo teh ang, hlim taka hun an dun hi ka duh a ni," ka ti sap a, ka hnar ka tuai pah zauh bawk a.

"Sawi lo pawh ni ila a hunin min la rawn nang dâwn tlat si a, vawiin chu sawipui che ka duh tlat a ni. Hun hlimawm tak tak kan hmang dùnin hrehawm pawh kan tuar dùn tawh a, khâng hun hlimawm tak tak min hmanpui theia i țhian ni tùra ka lo piang chhuak hi ka lãwm a ni. Lãwm lo thei ka ni hleinem, kum 27 lai he khawvêlah hun ka hmang ve ta a nia, kum pawh la tling lo leh ka kum ang chen kum hmang hman lova boral an tam êm êm laia heti chen kum ka han hmang thei hi ka vànnei asin. Tuna ka natna vàng hian Pathian lakah hian ka vui rêng rêng lo, heti chen hi min hruaiin nang min tawntîr a, țhian țha hlutna min hriattîrin hringnun hlim takin ka hmang thei bawk. Mihring hi chuan duhthusàm neiin kan hma lam hun tùr pawh kan lo suangtuah lâwk ve țhìn a; mahse, hma lam hun hria leh nunna thua thu nei miau hek lo chu suangtuahna duhthusàm sàm châng a awm lo thei lo țhìn, chumi avàng erawh chuan hma lam hun atân suangtuahna neih loh tùr tihna a ni lo, nang pawh i dam ang a, hna țha tak i nei a, bumtu Benson-a tih loh pasal țha tak i nei ang a, hma lam hun hlimawm takin i hmang dâwn nia," a ti ta duah a. A țawng ring lo nain a sawi thui bawk a, a hah deuh tih a hriat mai, a âwm dawmin thâwk a la deuh ham ham a.

"Țawng vak vak suh, tlêm tê têin thu tãwi tê tê sawi zâwk rawh, i chauh phah ang," ka lo tih chuan a nui sak a, a mit mengah erawh chuan a nuih a za lo tih a hriat viau. "Chutin ka chau lutuk bîk lo a nia, titipui che hi ka duh a ni. Heti lam hi min sawipui duh lo viau mah la Benson-a vànga i nat viau hi ka hlau a ni. Nang duh khawp lova mi dang a kawpsan thei  che khân min ti thinur a, min ti nâ a, a phû loh tawp nang ngaizâwng theia a awm kha làwm tâka ruanga hmeichhe dang a hawisan che kha inchhìr hun a la nei ngei ngei ang, keimahniin phubâ la lo mah ila hun hian phubâ hi chu a rawn la ngêi ngêi. Chu vàng chuan, amah avànga i natnate lo dam zêl se, ani aia mipa țha i phù ang ngeiin mipa țha leh rin tlâk leh innghahna tlâk tawng ngei bawk ang che, hlimna tam tak i phû a, hun hian rawn her chhuahpui mawlh che rawh se," a ti leh dap dap a. A thu tak nasa mai si a, țawng lo tùrin khap pawh ka khap duh tawh lo, a duh duh sawi se, lo ngaihthlâksak zâwk ang. Nakinah chuan țawng tùrin eng ang pawhin duhin ko ko mah ila a țawng tawh lo ang a, ka kohna pawh min chhâng tawh hek lo ang.

"Ka na tawh hleinem, a tìrah kha chuan hrehawm chu ka ti ve ngei mai a; mahse, tunah chuan ka rilruah pawh a awm tawh lo. I bulah ka awm tawh a, ani chuan ka ngaihtuahna a luah pha tawh lo," tiin ka chhâng a, ka chunga thil thleng vànga a rilru tihhrehawm belh ka duh loh bâkah a bulah hi chuan ani chanchin kha sawi chhuah loh tawp hi ka duh chu a ni.

"Ka sawi ang khân hunin a ti dam che ang a, nangmah hmangaih êm êmtu leh nang ngei pawhin i duh leh hmangaih i la tawng ngei ang. Chutih hunah chuan tuna i natnate hi chu i hlimna ti zualtu a ni tawh ang a, ani ngaihtuah chhuah pawh i duh tawh hauh lo ang. Hringnunah hian natna min thlentute pawh kan tawng fo a, hun hlimawm tak tak pawh min hmanpui ve fo tho a nia, natna min pe țhìn mah se zirlai pawimawh min zirtîrtute an lo ni a, hringnun ti famkimtu an lo ni ve țhìn bawk. Kan duha kan tawna kan duh loha kan tawn loh theih an ni vek bîk si lo va; an lak ațanga zirlai kan zir chhuah erawh inzir nân hmang thiam ila, chu chu mi fing awm dàn a ni ngai e," a ti leh sap sap a. Ngun takin ka lo ngaithla a, kan kum a inrual chiah a nia, a thil sawi dik lutuk leh a rilru sûkthlêk puitlin bîkna chuan amah ka tluk lohzia min hriat chhuahtîr a, Pathian hian a siam fuh bîk riauin ka hre zual. Hei vàng hian Pathian hian a duhin a hmangaih bîk ang a, a hnêna kal thuai tùrin a duh a ni ngei ang.

Ka pa Aizawl rawn pheiin a rawn kan ve bawk a, ka lãwm kher mai. Awmpui reng mah ila ka chhûngte pakhat tal rawn lang ve thei se tia ka duhthu ka lo sàm rûk reuh reuh lai a ni ve si a, ka lãwm zual a ni. Heta ka patea erawhin vawi thum lai a rawn kan ve tawh a, hmai pawh a uang ve deuh. Ka pa erawh chu hna thila rawn kal pah a ni bawk nèn, a awm rei hman lo va; mahse, a rawn lang hrim hrim chu ka lâwm a ni.

Chhùna a muthilh laiin a rawn țawng vei sep sep a, a muhìl niin ka hre si a, ka han en chiang a, muthilh chu a muhìl ngei mai, a țawngvài a lo ni zâwk. Ka han ngaithla chiang a, ka nuih a zat rúk viau laiin a duh êm êm țhin a bialpa boral tawh Siamtea hming a rawn lam rîk tel tâkah erawh chuan ka ngaih a țha lo deuh nghâl ngawt a. Ani kha kum nga liam taa accident avànga boral ta kha a ni a, khatih laia Angaihi'n a tawrh natzia kha... a ã dâwn emaw tih tùr hial a ni a, kei pawh a bulah ka awm reng phah nghe nghe a nih kha.

A mumang chu zawh ka duh viau laiin amah zâwk chuan zànah chuan rawn sawi chhuakin," Vawiin chhùna  ka mumangah khân mak deuh maiin Siamtea ka hmu hlawl a nih chu! Hun danga hmuh ka tum êm êm laiin ka hmu thei miah si lo va, vawiina ka muhìl zet kha chu a nuam tak zet a ni, ka han harh phei kha chuan ka ngai zui ngawih ngawih mai a ni," a ti sap sap a.

"Nia, a hming i rawn lam ri nghe nghe a, engtin chiah nge i lo hmuh a?" tiin ka zâwt chhunzawm nghâl zat a, ani chuan," Ka hmuh țan dàn tak ka hre lo va, kan lo inkai rial a, kan hlim dùn asin. A thi tawh a ni tih hre reng mah ila mitthi àwm hmêl rêng rêng a pu lo va," Min kalsan tawh suh aw," tiin ka lo ngen chiam a, ani chuan," Kalsan leh lawk che a ngai tlat, rei erawh a ni tawh dâwn lo, lo nghâk fan fan rawh aw, ka kiangah i awm reng tawh ang," a lo ti nghe nghe a, ka kutah duat tak si nghet ru tak si hian min chelh a, hlimna hian ka khat a, motor rîin min tih harh tâkah khân ka thin a rim asin aw," a ti leh sep sep a, a mumang chu ngaihtuah lêt tih hriat tak hian a maimichhîng a, Siamtea chu a ngai tak zet ang tih ka hre chiang êm êm bawk. Chutah, sawi zawm lehin," Hmuh leh vat ka châk! A bula awm reng theih kha ka duh a ni, a bulah kha chuan nâ ka nei lo va, hlimna hlîrin ka khat a ni," a ti leh sep sep a.

A mumanga Siamtea a hmu chu ka lawmpui rualin ka ngaih erawh a țha thei chiah lo, min kalsan thuai dâwn nia hriatna ka nei tlat pek a. Chuta țanga zàn hnihnaah chuan ka rin dàn ang deuh chiah chuan buaina kan nei ta, a buai lai ka la hmu ngai si lo, ka chîãi vek a, Mami awm lai a lo ni hlauh zâwk a, chuti chu ni lo se chuan engtin nge kan awm ang tih pawh ka ngaihtuah thiam lo, ani chuan buai ve miah lovin doctor leh nurse a ko vat a; mahse, nunna chunga thu nei thei doctor leh nurse an ni bîk lo, chuta țanga rei vak lovah chuan a nunna chuan a chelh zo ta lo, a tàwp ta!!! Engkim mai chu a buai nuai nuai ni berin ka hria, ka țap chhuak hauh lo va; mahse, ka mittui erawh dan rual lohin a tla zawih zawih thung. Chhùn lamahte  kha chuan a nulain a la țawng ve tak sep sep a, heti teh thut tùr hi chuan ka ring bîk lo, rei a daih kha chu ring bîk lo mah ila heti teh thut hi zawng, a rang mah mah a ni.

Chiang lo ruaiin ka țhiannu chu ka thlah liam a, ka țap hlei thei lo ber chuan min ti tâwt zual a ni. A nâ kha a lo na êm mai a, a tân pawh kal thuai kha chu a nuam zâwk ngei ang; mahse, ka nâ a ni, a sawi kha ka țâwmpui ve lo, kal mai tùr chuan ka la ngai ve êm asin, ka phal lo, a la upa bawk si lo,ka natpui ngawih ngawih lo thei lo a ni. Mi fel tak a ni a, heti maia min liamsan hi ka la âwih thei lo. Ka ngaihtuah thui zêl a, Siamtea nèn chuan hlim taka inhmu an awm dùn tawh ngei tùrah ngai ila, min rawn hre chhuak ve ang em? Nge min hrechang hauh lovin hlim takin an awm dùn zâwk ang?

Lungleia ka phei pawh chuan ka boruak chu a hnîmin han hawi vêl ila engkim mai chu a chul rup maiin ka hria, ka hlim thei lo va, nuih phei chu hla tak a ni. Ka pa chuan min hre thiam takin," Bawihi, mi puitling i ni a, rilru pawh puitling taka i put a ngai a ni, chhel taka awm tum la, tu mahin an hnèm zo tak tak lo ang che, chu vàng chuan nangmah i pawimawh ber, i rilru sûkthlêk i tih danglam a ngai," tiin min sawisêl duh lo chuan min zilh ta zâwk a. Dik ti viau mah ila ka hlim thei chuang si lo, engkim hi a ninawm ni berin ka hria. Ngaihtuah chhuak duh lo viau mah ila ka rilruah Benson-a a rawn lang leh țhìn bawk, ka rilrua a rawn lan apiangin ka lu ka thing leh nawk nawk țhìn. Ani kher phei hi chu Angaihi pawhin min duhpui tawh hlawl lo a nih kha, paih bo vang vang tùr a ni tawp mai.

"I rilru ti thawveng tùrin khawiah emaw zin chhuah te i duh em? Han zin kual hian thil thar hi kan tawngin kan rilru leh taksa pawh a harh țhìn asin, hetia awm reng ringawt hi chu a țha lo. A thuhrimah, amah ngaia kûr reng tùrin i țhiannu pawh khân a duh hauh lo ang che, Bawihi, inti harh hrâm hrâm teh, i zin duh phawt chuan sum lam kha chu ngaihtuah buai lo la," a tih leh chuan thâwk lâk hawk pah hian," Aw le, Pa. Ka lo ngaihtuah dâwn nia," ka lo ti ve a, ka rilruah zin chhuah lam chu lang chhin eih lo mah se min ngaihtuah tih ka hria a, hnial fithlâksak țhak chu ka duh bîk lo.

Nu Machhûngi'n Angaihi journal kha min pe a, a ni tin hun hman dàn ziak kîlh kĕlh lo mah se hun nuam a tih deuh nî erawh chu chipchiar takin a ziak ve thung a. A tàwp lam ațanga chhiara phêk thum lai chu vawi khat ka chhiar tawh a; mahse, ka mittui a koh chhuah tam êm avàngin a phêk dang erawh ka chhiar thei lo a, ka khup leh tawp mai a ni. Zan khat erawh chu tih tùr ka hre lo lutuk chuan ka han kêu leh chhin a, hei chu nikum hmasa March thlàa kár tàwp chawlh kan hman dun dàn vêl kha a lo ziak a, a ziak chipchiar reuh sia, mitthlaa kan hun hman dàn hmu lêt rauh rauh pah chuan ka chhiar chhuak dap a, a chângin ka nui a, ka mittui a tla leh țhìn bawk a. Ka chhiar zêl a, phêk lehlamah ve thung chuan May thlaa a nu Sangi fanu Lci-te nupa honeymoon hmanga an kalna hmun lama kal ve chhin a châkzia a ziah lanna a lo ni ve thung a, heti hian a ziak a.

~Lci'n min rawn bia a, an kalna hmun nawm reuhzia min rawn hrilhin a rawn rák chùl a, kei erawh ka nuih a za ru hlê thung. Mite chuan honeymoon hmang tùrin Paris lam emaw Dubai lam emaw khawpui dang nuam tak leh mawi tak tak an pan țhìn a ni ngai a, ani erawh tu khàwkhà hriat ni lêm lo hmunah hlim tak leh lungawi takin, nuam a tih thu hahîpin min la rawn hrilh thei a nia! Ka han nuihzat viau tak nain an kalna hmun thlalâk min rawn thawn chuan mak tak maiin kal châkna ka nei ve zui nghâl mai a nih chu. A àwm tho, a nawm hmèl reuh êm alawm le, hun remchâng awm veleh Teruati sâwm ila, ani pawh a kal duh ve ngei ngei ang, ka kal châk reuh mai mai mang e~

Hei hi, a la dam țhat deuh lai khân min hrilh tawh tak e! Mahse, hun ãwl kan neih hun kha a innang thei lo lutuk a, ani a hman laiin kei ka hman lo va, kei ka hman laiin ani a lo remchâng lo leh bawk a, ka tel lovin a kal duh bîk si lo, kan kal dùn ta miah lo nghe nghe a nih kha. A hmun hming chu ziak lang lo mah se min hrilh lai kha chuan a sawi lang ve ngei mai a; mahse, tunah hi chuan ka han ngaihtuah lêt ngial hnu pawhin ka hre chhuak zo ta ngang lo, Sèrchhîp dist-in a huam phâk chin, khaw chhak lam deuhah a awm tih erawh ka la hre riai ruai thung.

A kal ta bîk lo kha a ni a, tunah zawng engtikah mah a kal dâwn ta si lo va, kei a țhiannu lah heti zawng hi ka ni mai si, a kal châk êm êmna hmuna kal chu a châkawm ve reng mai; mahse, mahni chauha kal zawng ka ngai ngam lo, nuam tih chu khawi lamah, ka lunglèn a zual dâwn tih ka hre chiang êm a ni. Ani mi hlim thei tak bulah kha chuan thil hrehawm leh hun hrehawm deuh pawh kha tàwn a nuam a, hlim taka hun hmangin tu dang mah ka mamawh ngai lo kha a nia; mahse, tunah zawng... ka mal ta ngawih ngawih chu a nih hi.

Ka pa chuan min tur reng lo nain zin harh tùr chuan min duh tih ka hria, ni e, dik tak chuan in hi nuam ka ti hlawl lo alawm, ka naute pahnih an awm bawk si lo, ka pa leh ka nu lah hi office leh thil pawimawhah an chhuak reng a, min kàwm hlim tùr an awm lo, awm pawh ni se ka kàwm peih kher chuang pawhin ka ring lo. Chuan, lo zin harh dâwn ta ang ni ila, khawiah nge ka zin ang? Mizoram chhûng hi ka hre tehchiam lo va, zin chhuaka han kalna tùr hmun nuam deuh phei chu ka hre hauh lo, vai rampùr ni se ka han ngaihtuaha ka han mitthlà zâwng ringawt pawhin ka luak a ti chhuak tawh! Tunah phei hi chuan thlâkhlelhna chhan tùr lah ka nei tawh hek lo. Chu bâkah, zin chhuah pawh chu lo tum ta teh rêng ila, Angaihi a tel ve tawh dâwn bawk si lo va, khaw lum hnuaia mahni chauha tei rak rak chu ka huphurh a ni.

Têt té ațangin kan inah hian ka awm ngai lo tluk a ni a, chutiang bawkin Lungleiah ngei pawh hian awm ngai lo tluk ka ni, hostel-a ka awm daih țhin avàngin. Chu vàng chuan țhian ka nei lovin ka mal a, hostel lamah țhian ka neih zâwk avàngin kan in hi ka thlahlel lêm lo va, chawlh huna haw pawh hi ka huphurh ru zâwk țhìn. Tunah pawh hian țhian kawm tùr pakhat mah ka nei lo va, ka cousin-teho ni se Aizawl lamah an awm vek a, inhmu ngai zen zen lo ta chu ka nêl hlawm tehchiam lo va, in pui bera awm ka patea fate erawh ka naute pahnih ai pawhin ka nêl zâwk thung!

Ni tina ina awm ngawt ngawt mai chuan kan rilru a ti tâwt tawlh tawlh ni maia ka hriat avàngin phone ka on ta sauh sauh a, Mizorama hmun nuam deuh, han zin kual nâna phùrawm ve deuh tùr chu ka en kual ve chhin ta poh a, hmun reh deuh reih rawih, mahni chauha chawlh veng veng theihna tùr hmun ka duh a ni deuh mai. Kan inah hian mi dang an awm loh chuan a reh lo pawh a ni bîk chuang lo va; mahse, a awmna hmun hian a zir lo ve êm mai a, a hmun a ualau a, pâwn lama țawng ri nuai nuai leh motor thãwm bengchheng hi ka ning hluah hluah, hei hian mi ti tâwt zualin ka hre țhìn nghe nghe.

Mizoram map nèn ka țang kawp a, hmun hrang hrang chu ka en kual a, Champhai dist. chu ka en chîk deuh bîk a. Chutah, thil pakhat ka ngaihtuah chhuak thut mai, Angaihi khân 'Hah chawlhna Rûn' a ti em ni kha? A nih loh pawhin 'Hah damna Rûn' ti talin a sawi ngei ang, a kal châkna hmun kha. Ka han google chhin a, 'Hah damna Rûn' chu a lo awm tak tak a! Hei hi a sawi kha a ni thei ang em le? Mahse, a lãr vak loh hmèl e! Hmun lãr ve deuh chu hriat a awlsam ve êm hi, hei hi chu Angaihi sawi bâk kha ka la hre tlat lo. A awmna hmun chu Phaizâwl niin Sèrchhîp dist chu inti ve kalh tho mah se Sèrchhîp dist-a khaw hming hrang hrang ka en kual pawh chuan Phaizâwl khaw hming chu ka hmu hauh lo, mak ka ti ru kher mai.

Ka google zêl a, thlalâk panga lai hi en tùr a lo awm ve a, ka han en kual chuan a hmunhma awm dàn chuan Switzerland ram phùl hmun hring dup, chawlh hmanga zin ka châkna țhin min ti hre chhuak a, in sak dàn hmangah erawh Philipines rama low budget style-a in an sak ka hre chhuak thung. Hei hi Hah damna Rûn thlalâk a nih tak tak chuan a nuam reuh phian ang, in chu a fel faiin a tê fel ãt mai a, a tâwk reuh ka ti tawp. Angaihi'n kal a châk êm êm chhan pawh kha hei vàng hi a ni ngei ang, ani kha in tê fel ît êt làwm chi a ni bawk a, nawm hmèl a tihzia hahîpin min rawn hrilh a nih kha. 

Kâr hnih hnuah ka phùr ve deuh lai takin zin tùr chuan ka chhuak ve ta a, thil țûl zawng zawng phone ațangin ka ti fel sa vek tawh a, ka kalna tùr Phaizâwl lam pana motor-a chuan vang vang chu a ni tawh mai.

*'MI DANG LAK AȚANGIN THIL PHÛT LÉT NEI NGAI SUH' HI AN TI TEH CHÂWK A, A NIHNA TAKAH CHUAN MI KAN VA HMANGAIH HIAN AN LAK AȚANG HIAN PHÛT LÊT ENG EMAW HI CHU KAN NEI VE LO THEI LO*

Dik i ti ve tho em?

(Ka han ti ve leh rãwih a, eng nge maw a an dâwn ni? Satel leh raih mai dâwn a ni)