☆DOZER☆ - 10 By Dingdi Pachuau

☆DOZER☆ - 10 By Dingdi Pachuau

"Engah nge ngaihdam min dìl a? Ngaihdam min dìlna chhan tùr a awm hauh lo," ka lo ti vat a, min dìlna chhan tùr awm hek lo le. Angaihi hming a rawn lam ri tel erawhin mi dek viau. A boral thute chu khawi ațanga lo hre ve nge a nih ni? An vêng a inang hauh si lo.

"Ni lo, ka thiam loh vek a ni, natna ka siamsak che a, min be duh lo pawh hi ka hre thiam lutuk che. I rilru ka tih nat êm êm laiin i țhiannu i kawm ngeih êm êmin a boralsan che tih ka han hre leh zui a, pawi ka ti tak zet a ni. Hun kal tawh kha koh kìr theihin siam țhat theih se zawng sum tam tak sèn pawh ngai mah se ka siam țha ngei ang," a ti sap sap a, a țawng dàn ațang chuan pawi a tih tak tak hmèl viau ; mahse; luhlul takin a hmêl chu ka en duh lo lui tlat a, inchhîr tak tak hmêl leh pawi ti hmêl a pu em tih pawh ka hmu lo.

"Hun kal tawh a koh kìr theih ngai loh!" ka lo ti khut a, ka sual ve reuh asin, ka duh chuan ka sual ve thei viau ang; mahse, ka duh chiah lo va, ka ti lang lo țhìn mai mai a ni.

"'Theih se' ka ti rêng a ni, i chunga ka chêt dàn zawng zawng, ka tih natna zawng zawngah che khân ka inchhîr tak zet, theih se chuan ka paih bo vek ang a, ka siam țha ngei ang," a lo ti ve leh thung a, sawi thu tak ve viau mah se a hmêl ka la en duh chuang lo. A inchhîr a ni ve mai, mihring kan nia, inchhîr thei kan ni tlat, mite pawh an inchhír ve fo a nia.

"Inchhìr hi a awm ve châwk a nia; mahse, kan inchhìr hma hian kan tih tùrte ngun taka ngaihtuah hmasak hi a țha asin, awmze awm tawh lova inchhìr zawng a awmzia lo êm mai," ka lo ti leh a. Dik tak chuan sual chu ka inti ve reuh a ni, a inchhìr thu leh pawi a tih thu a sawi mawlh mawlh laiin keiin ngeiawm êm êmin ka lo chuk ve mawlh mawlh a nia. Ka țawng hre tùr mi dang an awm hnai lo hlauh a, a tihzia e.

"Engtin pawh sawi mah la, thinrim ngam tùr ka ni lo, i sawi dik vek a ni, engkim kha ka thiam loh vek a ni bawk," ti sapin a han ngawi leh dat a," Engtin chiah maw Angaihi chu a boral a? Min hrilh hreh loh chuan ka hre chiang châk hle mai," a tih zawm leh a. Hrilh hrehna chhan tùr leh hrilh duh lohna tùr a awm lêm lo va, min zâwt bawk nèn, ka hrilh ta vek a, damdawi in a awm ațanga a boral thlengin. Ka hun tawn zînga hun hrehawm ber a nih avàngin ka sawi zâwng pawh chuan hrehawm ka la ti a, engkim chu nimin ang maia chiangin ka la hre thei vek bawk.

"A pawi hlê a ni, hrehawm i ti dâwn nasa si a," tia ka kut a rawn vawn dà dá chuan ka suangtiahna mitthla ațang chuan ka harh chhuak chiang ta a, ka kut chu la sawn zàl zálin," A hun lai kha chuan a hrehawm, nun pawh kha ka ning alawm, engkim kha a ho vek; mahse, tunah chuan mihring chunga thil thleng țhìn a ni tih hriain ka pawm thiam ve viau tawh a ni," ka ti a, ka kut chu enin ka chûl ka chûl a.

"Angaihi tak chu aw... ka khawngaih viau rualin a boral chu a tân a nuam zâwkin ka ring, cancer hi zawng a nunrãwng êm mai a, mi a dìm ngai bawk si lo. A damlo tih ka lo hre miah lo erawh ka inthiam lo tak zet, a thlàn tlawh ve ngei pawh ka bâ a nih chu, a dam lai ka hmu ve hman tawh si lo va," a ti leh sap sap a, a chungah lungni lovin be châk viau lo mah ila tuna a rilru, Angaihi chunga a rilru put dàn hi ka rilru nèn a inan ber țum, kan thinlung a inhnaih ber țum a ni hial ang chu, kan inkawp lai ațanga chhûta tûn thleng hian. 

Chuta țang chuan Benson-a chu ka hmu ta lo vang vang a, a sawi angin Angaihi thlàn chu a tlawh ve ta em tih pawh ka hre lo; mahse, hna țan hmain tiin vawi khat ka tlawh leh țumah pangpâr vár báwr khat, thar ser sawr tak ka hmuh avàngin a tlawh ve taah ka ngai ringawt. Angaihi bulah chuan ngaihdam a dîl ang em? Eng tak hrilh ve ang maw?

Hna chu ka han țan ve ta a, kan office awmna chu bus-a kal a buaithlâk avàngin patea scooty ka hmansak leh rih a, nakinah pawisa ka khâwl hunah ka lei ve ngei a ngai ang, patea pawhin han hawl chhuah duh châng a nei dâwn a, ka hmansak zêl ringawt chuan a fuh ber lo ang.

Mahse, ka pain 'Scooty lei nân' tiin ka account-ah pawisa a rawn thun a, 'I patea sâwm la, in pahnihin in lei dâwn nia' a rawn ti nghe nghe, engtin nge scooty ka mamawh tih a lo hriat ni, ka patea hian a scooty ka khalhsak țhìn tih hi a lo va hrilh em ni aw ka ti deuh hial. Keiin kam khat tê mahin ka hrilh si lo va, mak ka ti deuh hlek a ni. Rawn thun kher lo mah se ka account-ah hian scooty leina khawp chu a awm ve êm êm tih ka hria, ka account hi ka têt laia min siamsak kha a ni a, chumi hun lai ațang tawh chuan thla tin pawisa a dah lût ziah bawk, thla tina a dah luh tam viau lo mah se a dahna a rei ve tawh hrim hrim a, bâkah, thla tina pawisa lût ve ta reng chu tunah phei chuan a tam tham ve tawh viau a ni. Hlawh ka neih ve hnu khân 'Ka thawk chhuak ve thei tawh a, ka lo chhâwk ve tawh ang che' ka ti a; mahse, min ngaihsakna a lantîrna ve ai ka ti mai, 'A harsa lo' a ti tlat a,  sawi pawh ka sawi ri zui duh ta lo a ni.

Scooty chu ka patea nèn chuan kan lei ta a; mahse, a thar chu amah ka khalhtîr hlauh thung, ka lo lek ngun deuh tawh avàngin a scooty chu ka duh zâwk tlat a ni. Hlawh ka lâk hmasak berah nutei nèn Pathiannia an bun tùr pheikhawk ka leisak ve ve a, man to tak pawh a ni lo. Ka pa kamis tùr ka leisak bawk a, ka nu pawh ka la leisak ve leh ang chu, min ngaina lêm lo mah se a pasala fanu ka nihna a bo chuang si lo va, hlawh ka lo nei thar ve leh bawk nèn, leisak ve ngei chu țha ka ti a ni.

Benson-a ka hmu lo vang vang a, kan inhmuh hnuhnun ber țuma ka chhàn dàn leh ka biak țhat lutuk loh vàng khân a zak a ni maithei, a nih loh pawhin min hrechang lo lêkin bialnu kawp a nei leh tawh pawh a ni thei tho, a hnuhnung hi ka ring zâwk mah, ani zawng a luck ve a, kei hi chuan ka phû lo êm a ni.

Zela'n Benson-a nèn kan lo inkawp tawh țhìn a ni tih a lo hre tlat mai! A hria a ni tih ka hriatna chhan pawh min fiam zuk a," Kan dine-out zàn khân i phu zawk em? I lunghlui pawh a lêng ngawt lo maw? I lo țawng țhat duh miah loh chhan kha ka hre chhuak tawh," tiin. Zàna a rawn lènin hetiang hian min fiam a, buai map lovin ka man thiam nghâl thlap a, Benson-a'n a hrilh ngei a ni tih pawh ka hria, an inhre tlat si a; mahse, ka hre thiam lo der tlat thung a, ka hriat loh der tlat avàng chuan min fiam zui duh ta bík lo a ni ang, thil dang a rawn sawi ta daih a.

Mahse, a hnu daihah Benson-a nèn an inkawm dàn, an inkungkaih dàn leh an awm dànte chu min hrilh ta vek a. Benson-a nèn a hma chuan an inpawh ve viau țhìn a, kawm pawh an inkàwm nasa; mahse, Benson-a'n phai lama hun leh ni a hman deuh reng hnuah erawh an inkàwm hlei thei ta bîk lo va, phone erawh chuan an la inbe zauh zauh. Benson-a kha keimah ang chiahin Mizoram lamah a haw chho khât ve a, chu vàng chuan Zela pawhin a hmu khât viau rêng a ni. An inkungkaih dàn chu Durtlanga a nutei pasal, pateate office-a pu ber, khã mi u kha Benson-a pa a lo ni a, a hma chuan Bungkàwn Vengthar lamah an awm țhìn a; mahse, kum hnih emaw liam ta ațang khân Durtlâng lamah an insawn chho ve leh ta ni àwm tak a ni.

"An ina ka han lèn chhohin Benson-a'n ka phone-ah i thlalâk, kan dine-out zàna mi kha a hmu a, tu nge i nih tih min zâwt zui nghâl chat a, i hming ka hrilh hnu chuan eng nge a ngaihtuah pawh ka hre lo, zu a rawn la chhuak a, a in zui nghâl ta mial mial mai a, a awm dàn chu mak ka ti khawp a, thil awmzia ka han zawh lah chuan min hrilh duh bawk si lo, rùi hnêpin a in a, titipui theih pawh a ni lo. A hnu daih, khami zàn ațanga zàn linaah  niin ka hre ta, min rawn biain in inhriat dàn chu min hrilh ta a ni. Mak ka lo ti khawp mai a! Nang nèn ber kher lehnghâl! Mahse, a sawi chhuah tâkah chuan ka han mitthla dùn che u a, a tìrah kha chuan âwih harsa chu ka ti alawm; mahse, a hnu deuhah erawh ka han ngaihtuah a, ka mitthlà che u a, in inhmeh dùn riauin ka hre ta che u a ni. Rei ve tâwk tak in inkawp hnua in ințhen thu a sawi chuan,' Engati nge in ințhen a?' tiin ka zâwt a," a ti duah a.

"A hrilh che em?" ka tih chuan," Hrilh lo, a rùi deuh hlek bawk nèn, ka be rei duh ta lo a ni. In ințhen chu a la na deuh hlek a nih ka ring, a inchhìr thu a rawn sawi lang leh țhìn tlat, engti tiha ințhen nge maw in nih le?" tiin min zâwt lêt thung a, kei chuan," Amah i zâwt dâwn nia," ka lo ti ve thung a.

Ka hna ka thawk țha a, țhahnem ngai takin, keima tâwkah rim takin ka thawk ve, ka thawhpuite tâna ngeiawm leh ninawm nih erawh ka hlau a, an tâna entawn tlâk ni thei tùrin ka thawk a ni. Ka thawh țhat leh keima tân leh mi dang tân a țha a, mi pakhat lek țhahnemngaihna hian thawhhonaah awmzia a nei thei a ni tih ka hria, ka patea min fuihna pawh a ni." Kan hna hi kan hlawh hmuhna a nih mai piah lamah kan duty a ni a, kan ngaipawimawh hlê tùr a ni. Hna neih ve kan duh vàngin hna ruak awm kan dîl a, kan han hmu ta chêng a, kan thawk zelthel leh ta țhìn hi chu Pathian tân pawh hian malsàwm hi kan har țhìnin ka ring, a duh zâwng a nih pawh a rinawm loh. I zelthel ve ka ring miah lo, ka ring tâwk viau bawk che. Hna i thawh țhata i hna i ngaihpawimawh chuan i hlim ang a, nuam pawh i ti ang, mi dang țhawh țhat leh țhat lohah chuan buai a ngai lêm lo, i thawh țhat phawt chuan, kha kha a țha ber. Rinawm tak leh țha taka i thawh khân i duty i hlen tihna a nia, Pathian duh zâwng tak pawh a ni," a ti dap dap a, ka sawi tawh angin ka patea hi kohhranah a inhmang tehchiam lo; mahse, a hnaah hian a rinawm ve tâwk tih nutei'n min hrilh tawh a, ka mit ngeiin ka hmu tawh bawk a, ka entawn theiha awmin a hnaa a rinawm hi ka zahin ka ngaisâng țhìn viau rêng a ni.

Vànduaithlâk takin ka ti dâwn nge ni, ka nau hmeichhia zâwk Felfeli chuan pasal a ûm ta tlat mai. Ka pain min rawn hrilh a, nizàn lama palaite nèn an inbiak fel thu chu sawiin inneih țhata innei lovin tlãn koh angin an ti mai mai dâwn ni àwm tak a ni. A pasal tùr chu a lehkha zirna hmuna lehkha zira awm ve tho J-a, Champhai lam mi niin an rawn inru haw chho zân mai a, kâr hmasa tawh khân, thla nga mi naute a lo pai tawh nghe nghe.

Ka pateate nèn zanriah kîl laiin kan sawi chhuak a, patea chuan kei aiin a lo hre hma tawh a, ka pa pawhin a rawn râwn ve nghe nghe ni àwm a ni. Nutei chuan," A la naupang ve viau khân ka hria a," a lo ti a, patea chuan," Naupang lutuk tawh bîk lo, kum 20 chu a ni ve tawh lo maw?" a lo ti ve a, a kum zât ka sawi chuan ka patea vêk chuan," Tûn laiah hi chuan naupang chhe ena kan ente pawh hian nupui pasal neih hi an lo cho ve khut zêl tawh," a lo ti leh a," A zahthlâk e!" zàwi deuh sapa ka tih chuan," Mi tih loh dàn pawh a ni bîk chuang hleinem, thil țha tak erawh ni lo mah se tih sual hi chu mihring ziaa bet tlat hi a nia. Naute an ti tla lo va, an huaisenin an ti țha ti mai ang, nau pai ka sawimawina ni lovin an thil tih sualah tih sual nawn leh duh lovin a nihna ang angin an lang ngam a, hetiang tùr hi a ni rêng a ni," nutei chuan a lo ti ve thung a.

Ka nu chu Felfeli chungah chuan a lungawi lo viauin ka ring, a lungawithlâk loh rêng bawk a, chutiang chiah chuan ka pa pawh a ni ve thoin ka ring; mahse, mipa hi chuan an sawi chhuak ve vak ngai lo va, lungawi lo mah se awmzia a awm tawh dâwn lo tih a ngaihtuah thiam ang; mahse, ka nu erawhin chutiang chuan rilru a pu ve thiam lo ang. 

An inneih thuai dâwn avàngin kei pawhin thil pawimawh tùrte chu ka theih tâwkin ka lo ngaihtuah ve a, a mamawh tùr nia ka rinte chu ka lo ziak chhuak ve a. Ka nau a ni a, a awm dànin zir tawh lo mah se mawi lo taka kal tùr leh hrehawm ti taka kal tùrin ka duh bîk lo. Va biakpawh hmasak erawh ka hreh khawp a, a lo thinrim bûr thei tlat si a, a raipuar thinchhiat lai tak a niha ka nuin a lo hauh nasat viau phei chuan... amah ni se mi thinchhe deuh chi a lo ni sa bawk a, a lo bak hlur mai lo'ng maw? Ka nau mah ni se a hma ațangin innêl tak leh inpawh takin kan inbe ngai lo hrim hrim kha a nia, tuna a mamawh tùr zâwta va biak tâk  pawh chu a va inthlahrunawm tak! Mahse, pawisa ka dîl dâwn lo va, a mamawh tùr ka va zâwt dâwn a ni mai a.

A tàwpa tàwpah chuan u zâwk ka nihna angin ka va be ta nge nge a, ani pawhin țha takin min lo chhâng ve a, a mamawh tùr ka zawh chuan naute a neih thuai dâwn avàngin 'naute mamawh tùr' tiin min hrilh ve mai bawk. Ka rin aiin kan inbe țha thei a, biak erawh kan inbe rei lo, kan inbiak zawh hnu chuan ka thaw huai huai mai.

Ka pa erawh chuan," Eng mah lo buaipui a ngai lo aw, nangmah kha inenkawl țha viau la, i mamawh kha chu lei hmiah hmiah rawh, Bawihtei mamawh tùr zawng kan leisak thei alawm, bâkah, man eitute pawhin a mamawh tùr aia tam daih thil an rawn tihsak bawk ang a," a rawn ti ve thung a, kan inbia tih Felfeli'n a hrilh em maw ni ka ti, keiin ka hrilh hauh si lo. Ngawi teh, a hre lo thei nâng! Amah ngei hi Felfeli number ka va zâwt tak alawm le! A va chiangkuan loh theih tak êm!

Inneihnaa kal tùr chuan ka patea leh nutei nèn Lungleiah chuan kan phei a, Felfeli ka hmu chu ka khawngaih reuh ngei mai. A chêr kiam mai a, a rilru a hahin a hrehawm ve pawh a ni ngei ang. Kan tê ber Johan-a pawh a lo lian nasa tawh mai a, tlangvãl dik tak ang a ni tawh mai, a chêr sâng zuai a, ka pa a chhun viau bawk. Ka nu erawh a hlim nui hmêl hmuh tùr a awm lo va, pateate nupa erawh chu țha taka biain nui lui tih hriat tak hian a lo làwm ve tho a, a fanu awm dàn chuan a ti hlim hlawl lo tih a hriat theih hliah hliah, a khawngaihthlâk ka ti. 

'Tlãn koh ang' ti mah se tu nu leh pa mah hian holam leh lutuka an fate nupui pasal neihtîr chu an duh bîk lo tawp ang, chutiang chiah chuan ka pate pawhin Felfeli chu holam takin an liamtîr duh bîk chuang lo va, biak in hawng ngeia inneih tluka ropui awm lo mah se Felfelite inneihna pawh mihring lamah chuan a nêp chuang hauh lo. A pasal J-ate pawh an lo khawsa thei viau a ni ang, an in rêng a lo ropui mai! Fapa mal a lo la ni zui a, an in ropui tak pawh hi a tã vek tùr tihna a nih chu. An in leh a vêlte kan hmuh chian hnu chuan ka nu pawh tlêm chuan a hlim ve thei ta deuhin ka hria, a nui hmêl pawh hmuh tùr a awm ve tawh tlat.

Hlim takin hun chu kan hmang ve a, hlim loh chu ka duh bîk lo, hlim nî a ni a, ka nau pasal neih nî a ni a, kan hlim tùr a ni rêng a ni. A tûk lamah erawh kan haw nghâl mai a, Lunglei lama lût kual tawh lovin Aizawl lam kan pan ding nghâl a ni. Felfelite inneihna avàngin patea nèn kan hnaah kan chàwl lo thei si lo va, inneihna a zawh hnu chuan haw vat vat a ngai tawh tlat.

Hun a liam zêl a, Benson-a pawh ka hmu leh zauh zauh tawh! Ka hmu leh ka tih vàngin kan inbiain ka va ngaizâwng leh tihna lam a ni lo va, khawi emawa a kal leh ka hna thawk haw lam kan inhmu zauh zauh ka tihna a ni. Min be hmasa ziah a, kei hi chuan biak hmasak tumna ka nei lo hrim hrim, ka sual ka la chhuah tluang zèl a ni. Ani erawh chuan hmêl hlim takin min be ziah a, min biak dàn chu mipain a hmeichhe țhian țha tak a bia ang hian; a tìrah chuan chhàn pawh ka chhâng țha peih lo a; mahse, a hnu deuhah erawh inthununin pãngngai takin ka chhãng ve thei ta a.

Felfeli pawh ka text zauh zauh a, min rawn chhâng rang thei khawp mai, betu a nei vak lo a ni maithei a ni. Hrehawm a tih leh tih lohte, an duat leh duat lohte leh a pum țhan chhoh zël dànte chu ka zâwt a. An duatin nuam a tih thua min rawn chhàn chuan ka nui sak a. Amah kha a chêr reuh si a, hrehawm ti taka a lo awma hun a lo hman vaih chuan hmuh tlâk a awm dâwn lo êm asin, ruhkawl a ni mai ang.

Ni khat chu ka haw lam, thlai hnah lei tùr ka en lai chuan," Thlîin a hnah a chhèm phét lêp lêp theih hmeh te chu a!" tia țawng ri ka hriat chuan ka en vat a, Zela lo nui sûng ka hmuh chuan," Thli chhèm phét lêp lêp theih chawhmeh hi a hrisêl ber, lo ei ve ziah tawh rawh," nui chung hian ka ti lêt ve a, Anțam têl lian vak lo chu ka lei zui nghâl a.

"Eng nge hetah i tih a?" tia ka zawh chuan," Saw laiah sâwn thil ka lei lawk a, ka rawn hmu nghâl che a," a lo ti a, a kawhna lam en chuan ka bu nghat a.

"I duh ang i lei zawh tawh chuan, i ril a țâm em? Ka chawlhpui thei reng che a nia," a rawn ti leh a, kei chuan lu thingin," Țâm lo ve. I ril a țâm a ni maw? Ka lo treat dâwn che em ni?" tiin ka zâwt nghâl a, "A, ka theihnghilh dâwn, ka hmanhmawh tak alawm. Ni dangah ni mai rawh se, bye bye! ka tlai dâwn! Ka hmuh che vàng vak!" tih leh inhera kal nghâl vut chu a rual a, nui țhâ chungin ka en zui vang vang a, engah tak chuan tlai dãwn chu ni maw, thil pawi tak a nih loh beisei ang.

Hmarchapui leh beetroot ka lei leh hnu chuan Scooty lam ka pan zui nghâl a, Scooty-a ka chuan hnu, ka la tlàn hma sî-a ka lam pana lo kal phei hmêl ka hmuh chuan ka inrin hmain," Ka pu...!!!" tiin ka au chhuak ta vak a!

*A TÛN DINHMUN AȚANGIN A HMA LAM HUNA A DINHMUN TÙR LO SAWI LÁWK NGAWT SUH, A CHHAN CHU HUN HIAN THILTIHTHEIHNA NEIIN ENG ANGA LUNG DUM CHHIA PAWH LUNGHLÛ ȚHA MI-AH A CHHUAH THEI A NI*