☆DOZER☆ - 11 By Dingdi Pachuau

☆DOZER☆ - 11 By Dingdi Pachuau

Ka hriat chian theihna chhan pawh a lu a lo khuh leh hlûn tawh a, a hmêl ka hmu chiang a, bâkah, a taksa pian leh a kal dàn hrim hrim ațangin ka hre lo thei lo. Ka hre chiang ve hman êm! A hai theih loh! Hna thawh kawr erawh a ha tawh bîk lo a nia, a lang fai ve lutuk.

Ka lam chu a rawn hawi a, ka kut ka lo vai a, ka nui sâng bawk; mahse, min hre chiah lo a ni maithei, min rawn vai lêt ve si lo va, phei chu a rawn phei zêl tho a.

Ka helmet chu ka phelh ta thuai a, ka auh vak khân min lo hre lo a ni ngei ang, helmet ka phelh tâk hnu chuan keimah ka ni tih min rawn hre ve ta a ni chiah mai, mak ti hmêl pu deuhin a mitko a sàn ve deuh tlat!

"Eng nge i lo tih? Engtikin nge i lo kal? Engtikah nge i haw dâwn? I dam țha maw?" Zawhna hlîr chu ka ka ațangin a rawn puak chhuak pawp pawp mai a, ka nèl êm êm leh ka hmêl hriat țha lutuk ang maiin ka be nghâl mawlh mawlh lo thei lo. A hmêl ka hmu nawlh hi mak ka ti a, ka lãwm a, chu chu ka kaah a rawn lang chhuak ka ti mai.

"Aizawl mi i ni lo emaw ka ti?" a  aw thûm dup chuan a lo ti ve thung a, ka zawhna pawh min chhâng lo; mahse, pawi ka ti chuang rêng rêng lo, a hmêl ka hmu hi ka lâwm bon tawp a ni mai.

"Ni lo mah ila hetah hna thawkin ka awm alawm. Chuan, eng nge i lo tih dâwn? Khawiah nge i innghah? Kan inhmu teh hlawl sia, i hmanhmawh loh chuan kan chàwl lawk dâwn em ni ang? I ril a țâm ang?" tiin ka záwt mawlh mawlh a, ka hmu hlawl sia, ka biak reng loh chuan a kal sawn thuai ang tih ka hlau a ni.

"Vawi khatah zawhna min zâwt tam mah mah!" tiin a nui suk a, a mit chu a meng zîm zui sawr sawr bawk a! A hmêl chu hmuhnawm ka tih êm avàng chuan ka en reng a, a hmêl ka hmuh chiah hian ka lo ngai ve roh riau a ni tih ka hre chhuak bawk; mahse, a rûk tak chuan ka inthlahrung! A hmuhnawm ka ti leh lutuk a! Hmun dangah pawh ka hawi sawn phal lo.

Scooty chu ka hûng țha sauh sauh a, duh chiah lo mah se chawlhpui ka tum hrim hrim! A ril pawh a țâm ve êm êm ang, hmêl hriat a nei àwm si lo va, chawlhpuia sâwmtu pawh a nei nâng, ka chawlhpui ngei ngei a ngai tlat.

"I duh duh thlang rawh, i ei châk apiang kha kan lam ang a, kan ei țeuh dâwn nia," ka ti sauh sauh a, a inthlahrun ka hlau a ni. Thingtlâng ațangin a rawn kal vang vang a nia, a ei châk ve țhìn dâwn êm asin.

"Kei aiin i thlang thiam zâwk ang," a tih avàng chuan a inthlahrung a nih ringin ka han chah zung zung a, kan nghah chhûng chuan," Kan inah chaw lo ei ta che, i riak nghâl ang a. Kan inah chuan mi pathum chauh kan chêng a, a inthlahrunawm loh lutuk! A zahthlâk loh bawk," tiin ka han sâwm zui nghâl a.

A nui hawk a," Zak rual lek hmuhin min hmu em ni?" a rawn tih chuan ka nui ve ringawt a," A, i la upat loh khawp kha, kan inrual loh pawhin tlêm tê bâkin i upa thei lo hrim hrim! Zak rual chauh alawm kan la nih,"  fiamthu hian ka ti lêt a, a han inmeh fai deuh hnu hian a hmaa putar kha tlangvâl a rawn ni thut si a, a inlâk upat hmèl vêl lutuk hi ka duh lo.

Kan thil order chu a rawn thleng a, a ei tùr plate chu ka han hùn remsak a," Ei țeuh rawh aw, a dang pawh kan lam leh zêl dâwn nia," ka ti malh malh a, ei tùr rim chu ka'n hîp lût vang vang a," A tui dâwn lutuk! Ei țeuh rawh," ka ti leh a.

"Aw le."

Thil kan ei lai chuan," Chuan, engtikah chuan maw i haw phei dâwn a? I rawn kal daih sia, tuin nge Rûn chu lo nghâk ang?" tiin ka han zâwt a, ani chuan," Naktûk khian ka haw ang," a ti phawt a, a ngawi dat a, ka lo en reng a, min rawn en lêtin," Ka awm loh châng hi chuan mi dang chhawr ka nei ve țhìn a," a ti leh a. 

Ka nuih a ti za roh mang e! Mi chhawr a han nei ve leh chhãwng a nia, ka pu pui roh hi, a hlawh a țha roh phian a niang ka ti, mi a la chhawr chhãwng thei a nia.

"A remchàn phian chu," ka ti ve mai a, chutah," Ih, kan inah chuan chaw chu rawn ei rawh aw, a la tlai chhe hran lo bawk a, rawngbàwl lamah  ni se buaithlâk a awm miah lo, keini chuan mikhual pakhat hi chu kan kêp ziah ang a ni, chaw leh chawhmeh siam belh a ngai lo ang," ka ti leh a, a lo ei lo ang tih ka hlau, lo ei ngei ngei se ka ti a ni.

A lo ei thei dâwn lo, mi dangin an lo sâwm daih tawh a lo ni a, han ngei viau mah ila Aizâwlah țhian, chaw eia sâwmtu a nei chu ka lawmpui angreng viau thung. Zàn lam pawh a țhiante hnênah chuan a riak zui nghâl dâwn bawk, zàn tal chu lo riak thei se...

Thlah ka tum chuan a lo hnial tlat a! Hmeichhe phurha chuan a hreh a nih ka ring nghâl mai, mipa hian an hreh leh tlat țhìn tlat, ani ang mipa ve tak tân phei chuan a àwm ka tihpui lutuk! A bike upa lam ve tawh deuh hneh zeta a han khalh lai kha ka mitthlaah a rawn lang uai uai a, amah nèn hian a bike kha, a inhmeh ngawih ngawih, an pà dùn tawp ka ti.

In ka thlen hnu chuan mãwl ka inti leh ta. A hming kha lo zawh ve tùr a nia, kei lahin ka hming ka hrilh hauh bawk si lo, a phone number tal pawh... ka va mãwl chhah țhìn tak êm!! Engati nge ka lo hriat chhuah miah loh le? Aizawl khawlaiah 'Ka pu' tiin ka ko vak zui a, a tân khân a zahthlâk duh ngawt ang. Nula kum 30 tling țêp tawhin ka han 'pu' ta vak mai a nia.

Office chu kal ngai lo se chuan zîng kâr ațangin ka pu hàwnna tùr sumo vêl ka thlithlai ru ngei ngei ang! Min lo hmu pawh ni se chhuanlam ka siam mai ang a, tih tùr pawimawh nei angin ka insawi mai dâwn a... mahse, ka kal ta chuang lo va, ka suangtuah thlàwn mai mai chu a ni. Pawi ta ber chu a hming tal emaw a phone number tal emaw ka lo zâwt ve lo kha, 'Ka pu' tia han koh leh ringawt hi chu a fuh ber lo tlat! A lo inlâk tlangvàl ve viau phei chuan... A phone number erawh a phone tlang theih tak tak dâwn chuang lo va, tlêm chuan a pawi lo deuh zâwk.

Ka pu chu ka ngaihtuahnaah a awm deuh reng a, tluang takin a thleng tawh êm ang chu maw. A tluan hrâm ka beisei, a tluan loh chuan ani zawng amah chauh a nia, a dam țhat loh pawhin amahin a inenkawl a ngai a, a mal ve tak zet a ni. Mal viau leh vànduai viau niin ka inhre țhìn a; mahse, kei aia mal leh harsa, khawharna leh hrehawmnain a tuam, hringnun hmachhawn chho ve ngar ngar hi chu an lo awm ve chiang a ni. Kei chuan sum lama min ngaihtuahtu pa ka la nei a, nei lua lo mah ila mi dang ka awt viau lo, sumin a lei theih thil lamah hian hlimna tak tak hi awm thei phei se chuan... hei hi chu dah țha rih ang, ka pateate nupain min ngaihtuahin an fa ang maia min enin min ngaina a, min hmangaih tho bawk ang, hei aia hmangaihna tih lan dàn dang hi a awm chuangin ka ring lo, ka hrehawm hauh lo a ni. Vànduai inti tùr ni pawhin ka inhre tawh lo, ka pu awm dàn ka ngaihtuah chhuah châng hi chuan.

Zela'n," Sunday chawhnu chu lêng ang u, kan chhuak khât leh tawh e," a tih avàng chuan kan inrawt phûr a,  kei pawhin ka châk ve reng. Ka pu ka hmuh ațang phei kha chuan chhuah hi ka châk thar zek zek a, hun hi ral duak duak se, kum tàwp chawlh rawn inher chhuak tawh se ka ti tak zet a ni.

A nuteite in lamah, Durtlâng lamah kan inkhalh chho leh ta a, khua a tui hul ve țan tawh bawk nèn, an huana kal leh pawh kha a châkawm tawh hrim hrim! Benson-a erawh hmu lo hrâm ila ka ti; mahse, an vêng lam a nia, kan hmu khut thei tho bawk a.

Zela nuteite inah chuan Benson-a chu a lo awm tak tak tehrêng a nih chu! Zëla'n kan kal dâwn thu a hrilh a nih ka ring a; mahse, min hmuha a hmêla mak a tihzia leh a inthuamna kekawrbùl leh T-shirt mai mai ka hmuh chuan kan kal tùr a hre sa lo a nih ka ring zui leh a, dik pawh a lo dik chiah. A nutei chuan min lo welcome țha leh hlê a, pa ber erawh a lo awm lo hlauh a, tihzia ka ti viau a ni. Benson-a nèn kan inhre sa a ni tih hriattîr kher ka duh lo, lo awm se chuan a hre thei nghâl vat àwm si a.

A nuteite huanah kal mai mai kan tum tih Zela'n a sawi chuan," A nuam ve alawm, hmun dang nuam ve deuh deuh lai pawh a awm nual asin. Kan vêng a nia, ka hre chiang ve tawh viau bawk a ni, in duh phawt chuan in driver-ah vawiin atân luau liau ka lo țansak thei ang che u," Benson-a chuan a lo ti a, a nui pah sâng a.

"Han fanpui tak rawh, nang pawh hi i tuallîm lo lutuk a, chhuak harh ve deuh teh, tlangvâl i la nih kha," Zela nutei chuan a lo ti vat a, Ruthi pawh chuan," Min chhuahpui peihte chuan a tihchi ngawt ang, keini hi zawng helamah hi chuan mikhual chan hi kan chang deuh hlek a," a lo tih zawm ve zat bawk. Kei chuan ka duh êm êm lo, kan inkârah eng mah awm tawh lo mah se Zela'n kan lo inkawp tawh a ni tih a hre kar bawk si a, nuam ka ti tehchiam lo; mahse, hnial zâwngin awka erawh ka chhuah chuang lo.

Mahse, Benson-a chuan ka tâna nuam lo tùr leh kan lo inkawp tawh a ni tih hriat theihna tùrin țawngkam pakhat mah a cheh lo va, hlim tak leh hmêl nui sângin min hruai kual a, an in pawh min tlawhpui zawk nghe nghe. In pawh an lo nei țha teh e,  Zopa chhiara chhãwng thum a ni a, a chhûng a zau țha bawk si a, a nuam khawp mai; mahse, nuam ka ti vak lo, rilru dang ka lo pu leh țhìn sia, ka sual reuh ngawt mai.

Durtlâng hi chu a boruak hi a nuam ve hrim hrim a, a boruak pawh hi a la thianghlim ka ti mai, kan chènna hmun nèn chuan khaikhin chi pawh a ni lo. Benson-a chu min hruai kualtu a ni bawk a, an vêng a lo ni bawk nèn, ka rin aiin a lo hre daih mai! Ruthi chuan thil a zâwt peih khawp mai a, Zela a lo inrawlh zauh zauh bawk. Hmun hrang hrangah min tlàn kualpui a, a nuam viau nain Phaizãwl nèn ka lo tehkhin zêl a, nuam ve viau mah se Phaizãwl tluk rêng a awm si lo va, ka mitthlaah Phaizãwl langin ka Rûn riangtê kha ka ngai vawng vawng lo thei lo a ni, ka pu pawh tiamin.

A tàwpah Zela nuteite huanah chuan kan lût leh ta a, theirah lawh tùr awm chiam tawh lo mah se a nuam ve hrim hrim! Han lèn kual hian rilru pawh a harh ve a, a nuam a, a hrisêl bawk. Lungtêin hnah kan invawm fuhsiak pek a, mahni chan tùr țheuh lungtê inzât vekin (sàwm) kan chhar a, kan piah deuh, pên sàwma mi vêl hnah lian vak lo chu kan target-ah kan hmang ta a. A hmasa berin Ruthi'n a vawm a, a fuh lo nasa mai! Kan nui vak vak a, keiin ka vawm leh a, Ruthi ai chuan tlêmin a hnaih deuh tih chauh a ni, ka fuh lo chiang lutuk tho. Zela'n vawm ve lehin ani erawh chuan a thâwi thuak a, a inhûm sek zuai hman tawh nghe nghe! Benson-a pawhin a fuh teuh khawp mai.

A vaia kan vawm zawh hnu chuan Ruthi'n teuh deuhin vawi khat a vawm a, kei chuan vawi hnih lai ka fuh ve thung. Zela'n vawi 3 niin Benson-a'n vawi 4 a fuh a, fuh tam ber làwmmanah Zela chuan hnah báwr khat thliahkin a pe a," Pangpâr bâwr angah ngai mai rawh," a ti zui a, Ruthi pawhin hnah hring a mal nghauh nghauh a, a rem khâwm țeuh a, chu chu hlànin," Pawisa tam tâwkah ngai mai rawh," a ti ve a, a thutak ve bawk si a, kan nui nasa viau a ni.

Ka nuih nasat avàngin ka kawng ka en lo va, ka han petek leh dâwrh bîk a, ka tlu tùr chu Zela leh Benson-a'n min rawn pawt hman hrâm a, tlêma tlêmah ka insawh leh dawt lo chauh a ni. Min chelh avàng chuan làwm thu sawiin ngaihdam ka'n dîl pah bawk a, kei hi petek ka chíng hrim hrim, kal hi chu ka kal chak vein  tlàn pawh keima tâwkah chuan ka thei ve reng; mahse, ka ding hi a nghet lo em maw ni tih tùr a ni,  ka tlûk loh pawhin han petek khet khet hi ka hrât êm mai.

Haw kawngah Ruthi chuan Benson-a felzia thu leh a țawng duhziate chu a sawi barh barh a, mi rèl lam a ni lo bawk a, kei pawhin fakna thu ka lo chhâk chhuak ve zauh zauh a. Dik tak chuan kan inkawp lai pawh khân min duatin min ngaihsak țhìn a, sawisèlna tùr pawh ka hre ngai lo kha a ni rêng a, a thil tih pakhat țha lo tak vàngin kan ințhen ta chauh a. A perfect teuh teh rêng nèn, perfect nih hi a lo har a ni ang e, mi perfect hauh lo hian bialpa perfect neih kan han duh țhìn chu a nia, a buaithlâk ve det.

Felfeli pawh a naupai a tluang zêl a, a pai tluang zêl a nih chuan kum thar lamah chuan naute thar hmêl kan hmu thei thuai ang; mahse, J--a farnu pakhat nèn an inmil vak loh thu a rawn sawi chuan pawi ka lo tihpui khawp a, a nuam lo dâwn êm a ni. Lunglèn nèn, pasal chhûngte zînga mi nèn inmil lo zui bawk, a vàn ram tla fual lei Eden dâwn tlat lo. Ka theih tâwkin ka zilh ve a, tuar hrãm hrâm tùr leh J-a farnu chu mil tum tlat tùrin ka ti ve a, eng tak chu ang ang maw?

Zàn khat chu Zela leh Benson-a an rawn lêng ve teh tlat a! Zela chu ka ngei ru tak tak a ni, eng atân nge maw a rawn lènpui rêng rêng ni, ani hi min renew-tîr leh a tum em maw ni, a teuh lo lutuk ringawt! Mahse, nula fing chin ka ni ve tawh a, ka hmêlah ka lantîr tùr a ni lo tiin, țha takin ka lo be ve ve tho.

Mahse, Zela chu ka han hrilh ve ngawt a, Benson-a chu lo lènpui tawh lo tùrin ka hrilh a, ani lah chuan," Inhmêlma en lova in awm hi țha ka tih vàng alawm, renew-tîr leh che u hi ka tum lo hrim hrim, ka țhian a nihnaah ințhian ve ula tih duhin ka lo kalpui chauh a ni," thu tak fê hian a lo ti a, chutia a tih tâkah chuan ka chhâng zui ngam ta lo va.

Kum tàwp pawh a lo hnai ta kuar mai. Aizawl pawh a hneawm țan, Krismas hunah phei chuan aw... ka chawlh hmanna tùr lam pawh ka ti fel vek tawh a, a hmun ngaiah leh Rûn ngaiah ka thleng leh ang chu. Ka thlen hnuah khân tu tak thleng leh ang maw? Kha Rûn kha chu a cute reuh êm mai a, tu mahin luah ve lo se ka ti, ka rilruin ka hauh deuh bur tawp.

Mi zawng zawng rilruin Bethlehem kam a hawi laiin kei chuan Phaizâwl Rûn lam a hawi thung a! Mihring hi kan inang lo hlawm teh e, Krismas mahni khua ngeia hman tum thingtlâng nula leh tlangvâl an tei suau suau laiin kei chuan ka chhûngte pakhat mah awm lohna, hmun pilril takah hun hman ka tum daih a nia, mi tân chuan ka mak ngawt ta ve ang!

Pawisa ka ngah ve tho a, pateate nupa kawrlum ka leisak ve ve a, secondhand mah ni se a țha tawp a, to pawh a to ve pãngngai. Ka pa chu mawza lum țha tak leh kutkawr lum țha tak ka leisak ve thung a, ka nu pawh bun nuam tak tùr pheikhawk ka leisak a, a làwm ve ngei ka beisei. Chuan, ka pu tân mawza leh kutkawr lum țha tak, a man pawh pãngngai chung lam hret ka leisak bawk a, a duh ve ngawtin ka ring, a lum nuam si a.

*KHAWVÊLAH HIAN MAHNI INTHUNUN THEI MI CHU MI CHAK, MI THILTITHEI LEH MI HLAWHTLING AN NI CHÂWK*