☆DOZER☆ - 12 By Dingdi Pachuau

☆DOZER☆ - 12 By Dingdi Pachuau

Zànriah kîl laiin ka patea'n," Kumin Krismas chu he lamah i hmang ve ang chu tiraw? Lunglei lamah i hmang peih kher àwm si lo va," tia min zawh chuan," Hman pawh ka lo tum chiah lo va," ti ringawtin ka lo chhâng a, ka nutei chuan," Lunglei lamah maw?" a lo ti vat a, kei chuan," He lamah pawh, Lunglei lamah pawh," tiin ka chhâng leh a.

"I naute an rawn haw khâwm ang a, a nuam dâwn asin, i hmu châk hlawm lo'm ni?"  ka patea chuan a ti leh a, ka naute tak tak ai pawhin a fate hi ka ngaina zâwk a ni tih a hre ve khiau tlat; mahse, tum ka lo nei tawh a, țhulh ka tum lo. Bâkah, he tah chuan ka la mikhual ve deuh a, nauteho nèn ni dâwn tho mah ila nuam ka ti ve chuang lo ang.

"Hmu châk e, an ngaihawm bawk; mahse, hmun dangah hman ka lo tum tawh a, kumin chu ka hmanpui lo rih phawt ang che u," ka tih leh chuan thu tlûkna ka siam fel vek tawh a ni tih a hre ta a ni ang, a ngawi zui ta a. Ka nutei erawh chuan," Han hmangho thei ila a nawm dâwn tehlul nèn chuan a! Mahse, Pathian zârah kan dam ang a, nakkum lamah kan la hmangho dial dial ang chu tiraw?" a lo ti leh a, ka lu ka lo bu nghat a.

Zela leh Ruhthi pawh chuan Aizawla Krismas hmang ve tùr chuan min sâwm nasa a, kan hman dàn tùrte sawiin a nuam thei ang ber tùr chuan an han sawi kual vêl a, ka nui vêl mai mai ringawt. Ka tum tawh hi chu sawh sawn ka tum lo, bâkah, he tah chuan Benson-a ka hmuh zauh zauh ka ring a, chu chu ka duh lêm lo a ni. Hmuh zen hi ka duh lo, Zela anga mipa țhian angin ka en thei ngai dâwn chuang si lo va. Bialpa angin ka en dâwn tihna a ni chuang lo nain ka ex a nihnaah ka mipa țhian Zela ang ngawt chuan ka en thei ngai dâwn lo va, inhmuh zauh zauh chu sawi loh, inkawm zauh zauh hlauh phei chu ka duh zâwng a ni lo tawp mai a ni, chu vàng chuan a theih chin chinah tlànchhiatsan ni lovin hmuh tam loh ka duh, ka haw hran tawh lo; mahse, hmuh tam loha kawm tam loh hi ka tân a țha.

Lungleia haw phei lova Phaizâwl lama tlang nghâl mai ka duh laiin ka pain zàn hnih khat tal riaka haw phei ve tùr chuan min ngèn a. Min hringtu ka pa a ni a, min enkawltu a ni bawk a, a thu hnial thei ka ni lo tih ka hria, peih erawh ka peih hlawl lo; mahse, ka riak phei ve ang chu. Taka, an thil tùr ka leisak pawh kha ka hawn phei ngei a ngai ang chu.

Lungleia ka phei hmain Phaizâwl lama ei tùr ken tùr ka lei kháwl țeuh a, ka pu khân a ei ve vak ngai àwm si lo va, chu vàng chuan ka lei deuh țeuh a ni. Ka siam hunah ka pe ve ang chu, ani pawhin duhsak takin soup min rawn suah kha. Ka kal hunah ka period leh țuh êm lo ang chu maw,  Krismas leh Kum thar hun lai vël kha a ni mai a... A, min ti buai lo ang, tûn thla atân kâr hmasa lawkah ka period diam tawh tak alawm.

Ka haw phei hma nî chuan Angaihi thlàn ka tlawh leh a, pangpâr dah pahin kan pahniha kan thlalâk, uang zeta kan thlalâk dun chu ka dah tel bawk a. Chumi pah chuan ka be mawlh mawlh a," Kumin chu a hmaa i kal châk deuh hmunah khân Krismas ka va hmang ang a, thla ka la țeuh ang a, ka rawn haw hunah ka thlalâkte chu ka rawn hmuh leh ang che aw. Nang chu he tah la awm la chuan kan han hmang dùn tùr a nia," tiin kan pahniha thlalâk chu ka thlîr ka thlîr a. Ani nèn khân kan uang thei viau a, bâkah, insiam chhiatna camera ka ti mai, khatiang kha kan uar a, kan phùr zual châng phei chuan țum khatah vawi 50 vawi 60 chuangte thla kan la a,  a hnuah kan delete leh a, chutiang chuan hun kan hmang dùn țhìn a ni. Ani hnên ațang hian hlimna ka lo la nei ve thei a ni tih ka zir chhuak a, mihring pahnih kâra inngainatna, inngaihsak tawnna leh hmangaihna tak tak pawh ka zir chhuak bawk. A hmaa hlim lo leh nui hmêl pawh pu ngai lo kha ka nui ve leh thei ta a, ka tân chuan mi hlu tàwp, mi țha tàwp a ni tak meuh a, theihnghilh theih rual a ni lo a ni.

Lunglei pawh Krismas a hnai ta bawk a, bazâr mai ni lovin khawlai pawh pawh a lo lùn ve tawh lutuk! A boruak a hot ve viau nain hlimna tùr erawh ka hmu chuang lo. A mak ve ngawt mai, mahni ina hlim loh tlat zêl mai hi, keimah hi ka dik lo zozai tawh a ni ang ka ti ta deuh, ka nu hlim lo hmêl hian kan in chhûngkhur boruak hi a ti rit ngawih ngawih a ni mai. A pheikhawk tùr ka pêk lai erawh chuan tlêmin a zia ve deuh chuan ka hria, a nui ve suk a! A nui der mai a ni nge phei chu ka hre chuang lo; mahse, a nui ve suk hrim hrim chu a țha, a duh zâwng tak ka pe pawh a lo ni maithei a ni. A châng chuan ka nu hi ka khawngaih leh tlat țhìn, min ngaithei lo tlat mai leh ka bula a hlim thei tlat lo mai hi, ka hmêl hi a ngei zâwng tak a lo ni pawh a ni maithei a ni, hmeichhia chuan hmêl ngei zâwng hi kan nei duh țhìn si a. Chutiang chu a lo nih hlauh chuan min hmuh hian hlim hmêl put a har ve dâwn êm mai a, min en țha peih lo pawh hi a àwm ngawt ang. Ka pa erawh a hma ang thoin, ka chungah lãwm thiam tak a ni, Johan-a erawh a rawn haw chhoh loh avàngin lei pawh ka leisak ve lo a, a lo haw hunah a ni mai ka ti.

Krismas hunpui a thleng țêp tawh a, motor service pawh an tâwt êm êm vek tawh a ni, ticket ka lo hauh sa bawk si lo nèn, ka scooty chuan Phaizâwl panin ka chhuak ta ringawt a, ka pa chuan car keng tùrin min ti zâwk a; mahse, ka hnial a, Krismas-ah inkhâwmte an duh ang a, car ka ken daih chuan a țha lo ang. 

Kawng ka hre ve tawh a, rilru hlim takin chak vak lovin ka tlãn a, thlen thuai thuai chu duh teh mah ila ka tlãn chak duh lo. Krismas a hnai tawh a, chêt sualna a thlen ka hlau, ka chêt sual vaih chuan ka pu ka hmu thei lo ang, damdawi in lama Krismas hman zawng a fuh àwm lo êm mai. 

Gate lian pui bul ka thlen chuan ka ding ta dat a, phûr zet hian ka helmet chu phelhin ka han hawi kual a, ka puin min lo nghah rán tawh ka rin tehlul nèn, a lo la awm miah lo nia! Engati nge, vawiinah ka thleng dâwn tih a hre lo em ni le? An hrilh lo tihna a ni thei ang em? Ni lo ang, a buai deuh rih a ni ang, a motor pawh kha chhe thut thei reng a ni a, a chhe timing lo riau pawh a lo ni thei, nghâk phawt ang.

Ni sa vawl vawl hnuaiah chuan ding lovin thing buk hlim hnuaiah Scooty chu ka hûng țha sauh sauh a, kei pawh ka țhu ve nghâl a. Ka nghah rei viau loh beisei ang, ani hi a lo damlo reng te hi a ni zâwk lo'ng maw? Remchàn lohna remchâng tak a nei a nih loh chuan hetiang hian a tlai hauh lo ang.

Minute 15 a liam a, ka nghâk leh dar dar a, dârkâr chanve a liam leh ta. Ka țhu reng nain ka beng ka chhi kar a, ka mit pawh ka lèn ngun, ka hlauh vàng a ni lo, min tihder a nih ka ring zâwk a ni. Min lo hmu ru reng ang a, amah nghâk tùrin min ti lui pawh a ni maithei, ka tho chhuak lo nain ka ke erawh ka phût char char thung.

Sana chu ka en leh a, dârkâr khat a ni ta, phone ka phawrh a; mahse, ka en hma chuan  signal a awm leh dâwn lo tih ka ngaihtuah chhuak leh nghâl a, ka ak leh ringawt. Engtin nge ka tih dâwn ni? A rei tawh mah mah, ani pui hi a damlo ang a, damlo chung chung chuan min rawn hruai thei lo a ni ang, chu chu a nih ka ring ta tlat, ka ngaih a țha thei tawh lo. Gate saw ka lãwn liam mai dâwn em ni ang? A sâng ve fú mai a; mahse, ka lãwn liam thei tho ang.

Ka tho ta thuai a, gate lam ka pan dâwn lai takin bike ri ni àwm tak hi ka hre ta a, keimah ang thoa Rûna riak lût ve tùr an awm a ni ngei ang. Bike rî ka hriatna lam hre chiang tùr chuan ka beng ka han dawh a, a tìrah chuan ka hre thiam lawk lo; mahse, a hnuah gate chhûng lam ațangin a ni tih ka hre nghâl a, ka phûr nghâl sârh mai; mahse, min nghahtîr rei mah mah tih ngaihtuah chhuak lehin ka han titau rilru leh rih a; mahse... rawn lang phawt se, a hmêl ka hmuh hunah ka rilru tùr chu ka la ngaihtuah țha leh mai ang ka ti leh ta zâwk a. Tunah tak hi chuan ka chhûngrilah ka phûr tawr tawr viau mai a, a chungah ka titau hlei thei pawhin ka ring lo.

A rawn lang ta thuai a, gate thing kâr ațang chuan ka lo en reng a, a rawn thlen hnaih deuh chuan a biang, kut leh kè vêl chu a dum deuh niai a ni tih ka hmu thei a, hna a thawk laklawh a ni maithei a ni. Ni danga ka hmuh dàn ang lo takin puan a khum lo va, a chhîp lama a sam sei nghuang kha a phiar fel thlup roh a, hna thawh thuam a inbel leh a hmêl dum deuh nuau chu a inhmeh ngawih ngawih, a lang pà ka ti thlâwt, ka tihtauhna rilru pawh amah ka hmuh chiah chuan a thlâwk bo nghâl vek!

Gate chu a rawn hawng a, min rawn hmuh chuan ka rin loh deuh hian," Ka innghahtîr che avàngin pawi ka ti a, ngaihdam ka dîl e," a rawn ti a, ka lo en hau mai! Chutiang thu chu a sawi chhuah ka ring pha lo hrim hrim a," Kal nghâl ang," tih vêl chauh a sawi ka lo ring a, a hmêl bàl deuh nuau anga lang leh a țawng chhuak dût chu eng emaw ti tak hian a inhmeh riau lehnghâl a.

"Scooty-in ka lo kal a, khawiah nge ka dah ang?" tiin ka han râwn a, a ngawih deuh vang vang hnuah," Rawn khalh lût mai rawh," a ti sup a, Scooty lam chu panin ka han ti nung a, gate chhûng lamah chuan ka khalh lût zui ta nghâl a.

A hmaa ka thlennaah bawk chuan ka invawm lût leh a, scooty pawh Rûn kawtah ka hûng hmiah. Garage a awm ve mang si lo va, khuhna tùr lam ka lo ngaihtuah chhuak hauh bawk si lo nèn, ni sa a tuar deuh tlawk tlawk tawh mai a ni ang chu, khua a vâwt tal a, ni lum a ai ve tihna a ni mai.

Ka indah fel hmain ka kut leh hmai ka phih fai phawt a, chumi hnuah thuamhnaw leh ei tùr ka kente ka dah fel chauh, khawiah mah ka chawlh loh avàngin ka ril a țàm deuh a, ei tùr siamin ka ei a, tukverha dâkin ka țhu chàwl vang vang a.

He laiah hi chuan dam man hi a awm hliah hliah bîk a ni. Rilru a hahdam a, chutiangin taksa pawh, rilru a hahdam miau chuan thinrimna tùr pawh a awm lo, ka phûr sárh a, ka hlim a, ni deuh veng veng, nuam deuh veng veng hian ka awm ni berin ka hria.

Kal kual vêl mai mai tuma ka chhuah chuan páwn lam bang kil lam deuha lehkha intâr chu ka hmu a, ka han en chuan he laia kalte tâna hriat tùr points hrang hrang a lo inziak dal reuh a. A hma khân ka hmu hauh lo a nia, a mak ngawt mai. Ka han chhiar dan dan a, point 8-naa 'Lìrthei eng chî mah ken luh phal a ni lo' tih ka han chhiar chuan ka hmui ka hup ringawt! Ka scooty lam ka hawi leh a, ka hùn ang angin a lo la ding ve tak si a, ken luh phal a lo ni hauh si lo.

Rilru nuam lo takin ka hawi kual a, ka pu khân min khalh luhtîr mai sia, ani khân ken luh phal loh a ni tih kha a hre chiang àwm hlê si a, engati nge min khalh luhtîr mai le? Ka lo hre miah lo chu mak ka ti, tunah ka hre chauh a, ka khalh lût vek tawh bawk si. Rilru nuam lo ru tak chu ka pu chènna lam panin ka kal zui ta nghâl a, ngaihdam ka dìl loh chuan a dik dâwn lo, phal loh thil tih chu ka duh bîk lo asin.

Ka pu chu inah a lo awm lo va; mahse, a garage lama thãwm ka hriat tâk avàng chuan ka pan phei a,   a truck kha a lo siam niin, motor hnuai ațanga a rawn tawlh chhuak chiah chu ka hmu a, nichîna a dum nuau chhan pawh kha hei vàng hi a lo ni ngei ang, oil rim lah a nam rum rum bawk a.

"Ka pu, ka tih palh lutuk! 'Lìrthei ken luh phal loh' tih kha ka lo hre miah lo va, a pawi ka ti tak zet a ni," ka han ti a, min chhàn miah loh avàng chuan ka inthiam lo zual a, nuam lo ti tak hian," Ka va khalh chhuak leh mai dâwn em ni ang? Gate pâwn lamah khân ka va dah tawp mai ang a?" ka ti leh a, min chhâng lo chuan a rawn tho chhuak a, oil rim a nam zual sawt.

"Tui bottle kha min lo hawnsak mai teh," a ti teh daih a! A melhna lam ka en vat a, tui bottle chu ka ban zui nghâl a. A chhìn ka hawna pêk ka tum lai chuan ani chuan a pawnchhe khai chuan a kut chu a lo hru nawk nawk a, chutah, bottle chu rawn banin a in zui nghâl khawlh khawlh a, a kâa leng lo chu a khabeah a luang thla a, a nghâwngahte... a vâwt ngawt ang chu!

"Ka va dah chhuak---" ka tih leh lai mêk chuan," Khalh lût tùrin ka ti che alawm, inthiam lo duh suh," tiin min lo țawng khalh a, ka ngawi ta dâk a, chutiang chuan min chhâng nain ka rilru erawh a la nuam chuang miah lo, dàn bawhchhia ka la ni tho tho. Ka lo kal ta kher kher chu ka inchhîr lek lek hial thei nia! 

Ka ngawih tâk reng avàng chuan thãwm nei chu amah zâwk chauh chu a ni a, pawnchhe inkhai chu lain a kut chu a hru țha leh a, wrench lo darh deuh niai chu a chhar khâwm zui leh nghâl zat a, puih ka duh viau laiin ka rilru a nuam zân si lo va, ka ti ta lo mai.

"Chumi min hrilh tùr chuan em ni i rawn kal?"

"Aw... ka rawn chhuah lamah pâwn lam bang kil sîr deuha lehkha intâr kha ka hmu a, ka hre ve chauh a ni, a zia lo ka ti tak tak a ni," ka ti duah a, tunah tak hi chuan khûk chem chema khûk ral daih ka châk a ni, ka pu bulah a ni lehnghâl si a, nuam lo ka ti ngawih ngawih.

"Theihnghilh daih la, hlim takin awm rawh, hriat pawh ka lo hrechang tawh zâwk hleinem," a ti a, wrench a dah khâwmna box chu garage sîr lamah chuan a va dah țha a, rawn lêt lehin," I lo kal ta rau rau, min pui leh zawk mai a ni ang chu. Truck chhûngah hian lût la,  a brake kha i theihtâwpa nâin lo tlawh teh," a ti leh a, a hmêl chu ka en zawk phawt a, chutah, rang takin Truck chhûngah chuan ka lût zui ta nghâl a. Brake tlawh chiam chu a har hleinem, a duh aia na mah pawhin ka tlawh thei ang chu.

Zàn lam chu a vâwt ve reuh khawp mai; mahse, mutpuan a awm țha a, kekawr lum zet leh hâk nuam tak ka mutpui bawk a, ka mu lum har hran lo, thil ken tùra tui lum ip ka hre chhuak lo erawh ngaihtuah tlêm ka inti deuh, ka kal tùr kha ka phûrin ka helhhawlh êm mai a, khaw vawh dàn tùr lam ka lo ngaihtuah pha lo a ni.

Ka va mu tui tak!! Kan in lama ka hlim lohna rilru kha chu paih bo ang hmak a ni tawh a, dàn ka bawhchhiat avànga ka rilru nawm lohna pawh ka puin theihnghilh daih tùra min tih avàng khân ka ngaihtuah chhunzawm duh lo ta kha a nia, hmun nuam ka tih leh ka ngainat êm êm hmuna ka awm tâk vàng pawh a ni ngei ang, ka tho chhuak tlai angreng viau a ni.

Tui lum inin pâwnah ka chhuak a, ka han zi mar vêl a, ka scooty pawh ka hùn ang angin rinawm takin a lo la ding ve a, ani hi chuan dàn a bawhchhe hauh lo maw le, heta ka awm chhûng chuan a dinna ngaiah hian a ding ve reng dâwn tihna chu a ni tak si a, ka khawngaih reuh mang e, ka hah ngai miah lova thui tak tak min phur kualtu, ka duhna hmun min thlen chat chattu a ni a, ka duat viau pawh a ngai a ni, nakinah rualrem takin ka hûng țha ang.

Pâwnah awm rei lovin ka lût leh thuai a, tûkțhuan tùr ka buatsaih nghâl a, phone-ah Krismas hla ka play a, eirawng bâwl pah chuan ka lo zàwm rât rât a, a chângin ka lãm leh dâwrh dâwrh bawk a, a nuam ve êm a ni.

Chaw ei kham lamah chuan scooty hûng țhain ka vâk kual a, mi dang an lo awm ve leh awm ve loh pawh hriat a țha ve alawm tiin Rûn dang awmna lamah chuan ka kal chhin a; mahse, thãwm a lo reh dak mai, ka kal zêl a, motor thãwm deuh ham ham ka hriat tákah chuan hnim buk phênah ka kal vat a, a chhan chu ka kalna kawng lama a rawn tlàn ka rin vàng a ni. A rawn tlãn ngei bawk a, ka pu chuan nupa tuak ni àwm tak a phur a, gate thleng a thlah dâwn a ni ngei ang chu. Krismas a ni dâwn a, an khuaah, an chhûngte bulah hmang tùrin an haw dâwn a ni ngei ang. Kan lo inang lo hlawm teh tak e, kei, kan in leh ka chhûngte awmna hmuna hmang peih lovin helai hmun reh reih rawih hi ka pan a, mite chu an chhûngte bula hman loh hlauin an haw ve thung chu a nia, dinhmun leh rilru hi a lo inang lo thei khawp mai.

Ka kal kual zêl nain thãwm dang ka hre tawh lêm lo. Thâwk ka la a, mal tlat țhang ka ni a, kei chuan tu mah ka mamawh ve lo alawm. Krismas hunpui kha hostel-ah keimah chauh pawhin ka lo hmang ve nual tawh a, kumin pawh keimah leh bawkin ka hmang dâwn a ni mai a, hloh ka nei lo. Kumin phei chu ka duhna ber hmunah ka hmang dâwn zâwk a, ka hlim ang, ka hlim alawm.

Motor rawn lêt thãwm pawh ka hre reng a; mahse, tih buai ka duh loh avàngin a hmaah ka inlan duh lo a ni. Thil hi ka ngaihtuah chiang lo țhìn hi ka tia, vawiiinah nupa tuak an haw a, mi dang an awm tawh lo a ni ang, thãwm a awm lo êm mai. Chuti a nih chuan keimah chauh heta awm chu ka ni ta a, ka awm miau avàngin keimah vàng chauh tak takin hetah hian Krismas a hmang dâwn tihna a ni a, mi dang ang thovin ani pawhin a chhûngte, a țhenrualte kiangah hman a duh ve ngei ang; mahse, chu chu kei hian ka dang tlat tihna a ni dâwn a. Heta kal apiang chu a lo ngaihven tùr leh lo chiauau tùr chu a ni teh meuh mai; mahse, Krismas hunpui angah te êm êm chuan... keimah vàngin chawlh a nei thei dâwn lo tihna a ni. Min lo ngei ru viau ang a? Mahse, mipa hi chuan keini hmeichhia angin an sawi chhuak ve zen ngai lo, a thu ni se a hmeichhia tlat. Ani tân han sawisèl bàwng báwng chi ka nih lohna lai a awm ve thei deuh a, a chhan chu Krismas hunpuiah khàr a nih tùr thu ziak pakhat mah a awm loh bâkah pawisa a hmuhna tho ka nia, min han dem viau dâwn se... A, min dem lo ang, ka pu chu a fel alawm.

A tûk zînga kawnga ka tlàn mai mai laiin min tàáwk záwngin ka hmaah chuan a rawn kal phei a, ka tlãn chak lëm lo va, a kal mai mai nèn chuan kan intluk tâwk khawpin ka ring, a kal muang ngai lo hrim hrim.

"Zànah vâwt i ti em?" tia min zawh chuan ka ding zui nghâl a, tlän chak lo viau mah ila ka thaw ve huam huam tho, exer hi ka la khât ve deuh ta a ni, ka hah hmà êm êmzia hi..

"Vâwt ti lo ve. A lum nuam lutuk!" ka  ti ve a, dáwt ka sawi lo. A hmêlah chuan enin," Ka pu, keimah vàng chauha heta awm hi i ni em? Ka sawi awmzia chu Krismas a ni țêp tawh a, i chhûngte leh i țhenrualte bulah, in khua ngeiah hman i châk ve ngei ang, chawlh i lâkna tùr ka dãl tiraw? Kei chu tawn kal lo ila vawiin lamah pawh i haw daih theih àwm si a," tiin ka han zâwt zui a.

"I ngaihtuah thui reuh hle mai maw?" ti ringawtin min chhâng a, inti-luhlul luiin," Ka lo ngaihtuah thui lo zâwk a nih àwm hi, i chawlh lâkna tùr ka dãl si a. I duh chuan hãw daih rawh, keimah pawhin ka awm ngam alawm, hlauh tùr a awm lo," ka ti leh mawlh mawlh a, keimah vànga a chàwl thei lo tùr chu ka duh lo a ni, ka khawngaih.

"Saw saw ka chènna, ka in a nia, ka inah sáwn ka hãw mai țhìn," tiin fiah takin min chhâng khauh a, min melh rùn pah chuan," Engati nge thil i ngaihtuah vak vak țhin? Thil țûl lo ngaihtuah lo la, hlim leh nuam ti takin hun hman tum zâwk rawh. Lirhbiang kha i lìr leh chhin châk em?" a rawn ti leh daih a.

Lirhbiang a rawn sawi chhuah leh chiah chuan phùrna nasa tak ka nei nghâl a, thup pawh tum lo chuan," Châk chiang e! I nei em ni?!! Chuan, min hman hawhtîr dâwn tihna a ni em?" ka lo ti nghâl mawlh mawlh a. Ka mitthlaah lirhbiang ka lìrh lai kha a rawn lang leh uar uar a, ka puin a neih phawt chuan Krismas chhûng chuan ka vaw lìr thiam hman ngei ngei ang tih ka sawi ngam sak.

"Truck in bang chhak lamah khân ka 

tàr kha, va kal la, i hmu mai ang," a tih chuan hnial pawh ka tum chhin lo hrim hrim, hlim zet chuan," Ka lãwm e, ka pu," tiin, a garage lam pan chuan ka tlãn zui ta nghãl a.

*THU TAM TAK I SAWI HRIA, HRE THIAM CHUANG HAUH LO CHE AN AWM LAIIN THU MAL KHAT LEK PAWH I SAWI CHHUAH NGAI LOVA HRE THIAM ÊM ÊMTU CHE AN AWM ȚHÌN, I TÂNA AN HLUT DÀN A INANG LO NGAWT ANG*