☆DOZER☆ - 2 By Dingdi Pachuau
Ni tam chàm tuma chhuak ka ni lêm lo bawk a, thuamhnaw pawh Airbag lian lo têah ka keng chauh. Ka pain car ken a phal nain ka khalh peih chiah loh avàngin a țhianpa Pa C-a, Sèrchhîpa kal tùr remchâng motor-ah Sèrchhîp thleng chu ka chuang ve lâwp lâwp a, Sèrchhîp ațangin motor dang, N. Vanlaiphai lam tlãnah ka chuang leh a, chuta țang chuan Phaizâwl chu motor hran hmangin ka kal leh a ni. Ka motor hman driver lah chu a țawng duh khawp a, khaw lum nèn ka rùi lo chauh, kuhva țhial tuam tuam chung chuan Phaizâwl chu khaw hming ni lova ram hming a nih thu leh Lungkawlh leh N. Vanlaiphai khaw inrìna chhak deuha a awm thu chu min hrilh barh barh a, Lumlér khua ațanga a kal theih thu leh kawng dang ațang pawha a kal theih tho thute chu min hrilh bawk a.
"Tlêm lai deuh khân nupa ni ngei tùr, i kalnaa kal tum thote pawhin min hmang tawh alawm, an phûr khawp a! A hmun thleng thlah tùrin min ti nghe nghe a; mahse, gate thleng bâk ka thlah ta chuang lo. A chhan chu gate lo nghâktute khân lìrthei an lo kawl ve tho a, chutah chuan an chuang zui ta zâwk a ni. A nuam ve reuh viau chuan ka ring a, a chhan pawh a hmunhma ațang khân a nuam ang tih kha a hriat tlat a," a tih chuan chhàn vak ngaihna ka hre lo va, chhàn loh aiah," Nia, nuam ang," ka ti ve ringawt a. Nupa a sawite chu Lcite nupa an nih ka'n ring deuh ngawt a, a lo ni lo thei tho bawk a.
Rei ve tâwk tak kan tlàn leh hnu chuan kawngpui ațang chuan kan pêng ta a, kan pènna kawng chu a hmaa kan tlànna kawngpui ang êm kha chuan zauin țha lo mah se tlàn hrehawm tak chu a ni hran lo; mahse, a khu deuh hlek thung.
A sawi angin kan hmaah gate chu a lo awm ta ngei a, Gate-ah chuan hawrawppui hian lian ve tâwk takin HAH DAMNA RÛN tih hi a lo intâr kuau bawk. Kan ding ta dat a, chutih lai chuan gate bula chawlhbûk ni àwm tak ațang chuan pa pakhat hi a rawn chhuak ve mêk a, min lo nghâk a nih ka ring ve ngawt a, ka ring dik chiah a ni tih ka hre zawm nghâl. Driver pawisa ka pêk fel hnu chuan," A nih aw, nuam deuhin le," tiin a tlãn lêt leh ta thuai a, min lo nghâktupa chuan," Lo kal rawh," ti supin gate chu a khãr țha a, a pik-up truck lam chu min panpuiin kan tlãn zui nghâl mai bawk. A țawng chhunzawm lo va, kei pawh ka țawng bîk chuang lo, a rúkin ka mitsìr leh hrek hrek ringawt țhìn a, hmêl hriat ngai loh a nih bâkah a inzuah buk deuh avàng chuan ka hlau rilru deuh lek lek a, min be zui ta bawk lo nèn, ka be ta bîk chuang lo a ni.
Kan thleng har lo. Chu pa chuan ka thlenna tùr chu a hre sa vek a ni ang chu, Rûn no. 3 kawtah chuan a ding ta dat a, ka bag min pêk rual chuan chu Rûn chahbi ni ngei tùr chu min pe tel a, eng mah pawh sawi chuang lo chuan truck-ah lûtin a tlãn zui ta nghâl a, ka en zui deuh vang vang ringawt a, chutih rualin a țawng miah lo leh min be zui miah lo chuan min ti hrilhhai lek lek a ni, a nèlawm loh tak zet, engtin he lai hmun neitute hian an chhawr duh zâwk ni? Ka lu ka thing a, thaw hawkin in chhûngah chuan ka lût ta zâwk a.
In chhûng chu ka rin ang ngeiin a lo fel faiin a lo nuam a, boruak a lo dài dap mai nghe nghe. Ka hawi kual zêl a, dawhkàn chunga lehkha lo awm chuan ka mit la chatin thil inziak chu ka han chhiar nghâl a, min lo lawmna leh làwmthu sawina a lo ni a, ka room pawh chu vawiin chawhma lama tih fai a nih thu leh mut puan zawng zawng pawh a fai thar hlaka thlâk a nih thute a lo inziak a, chutih rual chuan ka hriat tùr pawimawh leh harsatna ka tawh thulha a neitute ka biak theih dàn tùr pawh chu a lo inziak tel thlap bawk, a hmaa reservation ka siam lai khân an dàn leh hrai țhen țhen kha chu ka hre nual tuah a, ka chêt buai ka ring lêm lo.
Pâwna chhuaha han dah kual vêl pawh a țhat viau rualin ka peih rih lo va, khumah chuan ka tlu zâl phawt a. Minute 10 hnu vêlah thovin muangchângin ka thuamhnaw chu ka phawrh darh a, cupboard lo awm ve thlapah chuan ka rem fel leh a, chumi hnuah chuan hmanhmawhna nei hauh lovin vawiin lama khaw lum min hmehna thlantuite chu ka tleuh fai leh ta a.
Mahnia ei insiam mai tùr a ni a, ka huphurh hran hauh lo nain chaw ka ei peih ka rin chiah loh avàng chuan ka hmanhmawh lo khawp a, țhu mai mai pah chuan in chhûng an chei dàn chu ka en kual a, in sak dàn hrim hrim leh a chhûng an chei dàn hi Mizorama kan insak țhin dàn leh chei dàn nèn a inan loh êm avàng chuan ka mit a la lo thei lo a ni. A tê felin zîm chhia a ni chuang lo va, thil a awm kim ve biai tho, in chhûnga bungraw awmho chu a dik vêl vek ti hian a sawi fiah ber ang.
Khuma ka tluzâl chu ka lo muhìl zui daih niin, vawiina ka motor chuang kha ka chau deuh a ni ngei ang, zàn dâr 7 vêlah ka harh a, ka rilțâmin min kài harh a nih ka ring, ka pum a lo ri rawih rawih a ni. Light ka on hma chuan la muin thãwm ka han ngaithla vang vang a, a reh țha reuh rawih viau mai; mahse, hei tak hi ka thlâkhlelh chu a ni, hmun reh rawih rawiha awm ka châk a nih kha.
Eirawng bâwl lovin ei tùr ka ken hlek chu ka phawrh a, thingpui nèn ka hmeh mai. Tukverhah dâkin zàn boruak thiang nuam zet chu ka hîp vang vang a, thlà a èn ruih avàngin light ka ti thim tê tê a, bathlàr zîm angreng takah chuan chhuakin thla êng chu ka thlîr a, a hnu deuhah chuan ka maimichhîng ta vang vang a. Boruak reh raih chu nuam ka ti a, ka awmna bul hnaiah mi dang awm ve lo mah se hlauhna ka nei chuang lo, hetiang boruak hi ka tawng ngai lovin ka thlahlel êm asin.
Angaihi ka ngaihtuahnaah a lo lût a, ka lung a lêng nghâl vawng vawng mai, thlà a êng nuamin boruak a nuam êm êm bawk si a, rannung tê chi hrãm tih loh, a reh raih mai bawk nèn, hmun duhthusàm chu a ni chiang alawm, kan awmna țhin anga vai țawng ri leh motor tlãn ri bengchheng nuai nuai ang kha chu hriat tùr a awm loh bâkah boruak uap churh pawh a awm lo a nia, hei vàng hi em ni ang he lai hmunah hian kal a lo châk êm êm ni. La damin natna nei lo se chuan kan kal dùn ngei àwm si a, hlim taka titi bawrh bawrhin kan nui dùn leh vak vak emaw kha a ni ang a.. mahse, tunah zawng keimah chauhin ka kal ta si a, a thlarau talin min rawn thlîr ve tho ang em le? Ka kal dâwn khân ka inthiam lo ru deuh kha a nia; mahse, ani pawhin min hriat thiam chu ka ring tho, ka biak theih leh kawm theihin a awm ve ta si lo va, ka dinhmun hi a hrehawm ve êm a ni.
"Angaih, min lo hmu ve reng em? Ka va ngai tak che êm! Ka bulah awmin kan pahnihin kal dùn ila chuan tiraw a nuam dâwn asin...Ka ngai êm mai che, vawi khat tal han inhmuha han inkawm theih leh ka va châk êm!!" ka ti sap sap a, rannung hräm deuh chiah chiah thãwm bâk hriat tùr awm lova reh vawng vawng mai chuan ka lunglèn a ti zual tlat a ni.
"Tunah chuan natna i tuar tawh lo ang a tiraw? A nuam tawh ngawt ang, Siamtea nèn chuan in inhmu tawh ngei ang a, kei i țhiannu hi hriat pawh min hrechang tawh lo ang a... a ni em? Mahse, min hrechang tawh lo pawh ni la ka dem chuang miah lo che, he khawvêl hi zawng hrehawmna leh natna ram mai a nia, hriat zui reng tlâk pawh a ni lo rêng a ni," tiin ka mittui chu ka hru zauh a, hmui pet fan fanin ka hawi kual a," E, chuan, i kal châk deuhna hmun kha i la hria tiraw? Hei ka kal a; mahse, i awm ve si lo va, a reh vawng vawng mai," ka ti leh sap sap a.
Zàn lama hrãm țhìn rannung hrãm chiah chiah rî chu ka ngaithla a, ka lung a tilêngin an nun chu ka awt ve hial zâwk mai. Lunglèn leh khawhar an hre ve dâwn si lo va, phûr takin anmahni Siamtu chu fakin an hrãm a ni a, a hmaa ka ngaihtuahnaa awm reng țhìn khawhar leh lunglèn hre thiama ka lo piang chhuak bîk vànduai ka intihna chu lo thar lehin chu thil chuan min uai rit leh ta.
"Nangmahni angte hian lo piang ila țha tùr! Rilru leh thlarau neia ka lo piang hi mi vànduai tak chu ka lo ni," ka ti leh a, ka rilru a va vâk kual thui leh tak êm! Ka têt lai leh ka țhan len chhoh dàn ka ngaihtuah lêt a, mite angin ka hriat ve theih hnuah nu hmangaihna ka dawng ve lo va, min hringtu ka nu lah ka hre hek lo. Ka la têt laiin ka pa min enkawl tùrin min kalsan a, ka pa chuan min enkawlin a fanu ka nih angin a theihtâwpin min duat ve a, a neihchhun ka ni bawk nèn, kei pawhin ka ngainain ka ngai êm êm țhìn. School ka kai tirh ațangin mi dang aia ka hnufual hlauin boarding school-ah min dah nghâl a, ka va ngai thei tak! Mahse, a hun zat zatah min rawn kanin ei tùr pawh tui tak tak tam tâwk min rawn kensak țhìn. Pâwl nga ka zir kumah nupui a nei leh ta a, nu ka nei ve ta chu ka lãwm viau a nih nghe nghe kha; mahse, ka rin ang a lo ni miah lo, hostel ațanga chawlha ka chhuak hlek țhìn pawh kha min lo ngaithei miah lo niin, Mizoram mai ni lo Vai ramah daih min thawn bo ta a ni. Ka la naupan ve deuh avàngin thil awmzia kha ka la hre thiam vak lo va, nu awm dàn tùr rêngah ka ngai mai a; mahse, nikhua ka hriat tak tak hnuah erawh kha chuan a mitmeng leh chezia ațangin ka man thiam ve tawh a, tûn thleng hian ngainat pawh ka ngaina tak tak thei ta lo rêng a ni. Ka nu thar chu ngai hran lo mah ila ka pa erawh ka ngaih a bâng chuang lo va, ngaih tak têin ka ngai vawng vawng țhìn, khatih laia ka lunglèn theihzia kha! Naupang tê ni mah ila hmangaihtu kha ka ngai êm êm a, min hmangaihtu ka pa kha ka thlahlel ngawih ngawih a ni.
Mahse, vànneihthlâk takin mal tak leh khawhar taka ka awm lai chuan Angaihi nèn inhre pawpin kan inkàwm thei ta hlauh a, kan school luhnaah inang miau hek le, kan lo inhre har mah mah zâwk a lo ni a, kan section a lo inan loh vàng maiin kan lo inhre lo a lo ni, kan inhriat pawh ațang erawh tu dang mah kan kàwm tawh ngai lo, Mizo dang awm ve ta bawk si lo chu kan inngaina lo thei lo ka ti tawp mai, ka pa ka ngaihna pawh chu a reh ve ta tial tial a, khawvêla ka țhian awmchhun leh ka thlâkhlelh ber ni chhoin min hmangaihtu, ka hmangaih êm êm ka țhian, ka bula awm reng a ni bawk a, amah ațang hian hmangaihna pawh hi ka hre thiam niin ka hria a, ka ngaina takzet a ni.
Sihal a rawn ù rawng rawng tâkah chuan ka ngaihtuahna ațangin ka harh chhuak ta chauh a, ka thingpui pawh a lo dài vek tawh. Ka paih a, lût nghâl mai lo chuan sihal û chu ka ngaithla leh rih a, a ù-na chu ka awmna ațangin a hla tehchiam lo va, a rî ațang chuan pahnih an ni nghe nghein ka hria.
Zàn lama ka mut tam loh avàngin a tûk zîngah pawh chuan ka tho har deuh hlek a, ka mutna chu ka hai deuh lek lek lehnghâl a; mahse, ka hai rei lo. Ka harh hnu pawh chuan tho chhuak peih lawk lovin pãwn lam thãwm chu ka ngaithla leh vang vang phawt a, hla deuh hleka motor thãwm ham ham ka hriat chuan nimin lama gate-a min lo nghâktu motor kha a nih ka ring nghâl ngawt a.
Tho chhuakin ka inphih fai hnuah eirawng bàwl tùr ka ngaihven zui nghâl a, chawhmeh lam chu lui bula thlài chìnna hmuna mi mahni duh zâwng inlâk mai tùr a ni a, Alu leh Dãl tih vêl chu a awm tho nain fresh deuh taka thlai thar ei châkawm ka tih vàng leh ka piana hnu lama ka ei tùr thlai hnah leh rah ka inlâk vawi khatna tùr a nih vàng chuan ka phûr deuh ngawt ringawt a.
Lui awmna nia ka hriatna lam pan chuan ka chhuak ve ta a, a lo dik chiah bawk. Kalkawng chu a zau lêm lo nain a nuam thlip thlep reuh tawp, thei kûng leh thlai kûng ka pèl zêl a, a khât tâwkin pangpâr a lo awm ve zêl bawk a, zîng thawh hlima hmuh atân chuan an iaiawm loh takzet a ni. Kal pah chuan ei chi nia ka hriat thlai hnah chu ka melh pah zêl a, Anțam leh Maian chu ka hre chiang ve ngang mai.
Thlai chi hrang hrang a tam khawp a, awm lo pawh a awmin ka ring lo hial a ni. Carrot, zîkhlum leh purùn tlêm țheuhin ka la a, a thar zêla lâk ka duh zâwk avànga la tam duh lo ka ni, bâkah, mahni chauh chuan ei tam a har dâwn êm asin. Tomato lo hmin sen tiar ka hmuh chuan pum thum lo telin fanghma rah no vâr par mai pakhat ka lo tel bawk. Ka hrisêl haw khawp ang, thlai hnah leh rah hlîr mai ka chawhmeh dâwn si a, sa ka râwp haw huam huam maithei bawk a ni. Lui kal manah rêng rêng tiin tui chu ka zu khawih chhin a, a lo vâwt var mai lehnghâl, dài nuam sawng sawng tak a ni, a tui a thianghlim bawk sia, in țeuh a châkawm, chèngkawl leh sanghate pawh an awm ngei ngei ang.
Tûkțhuan ka ei khamah chhuakin ka tei kual mai mai a, ka thinlung a hlim lêm lo nain boruak thiang tak mai leh reh reih rawih chu nuam ka ti tho. Hetiang boruak thianghlim hi ka hîp khât êm asin, a manhla ka ti a, naktûk lah chuan zîng hma deuh hlekah thovin exer la ila a țha ang, ka harh phah deuh mahna. Thing buk hnuaiah chuan ka țhu chàwl a, ka hawi kual a, ka hma lawka khuai pahnihin pangpâr bàwma a zû an dâwt lai chu ka thlîr deuh reng a, nupa an nih ngei ka ring, an hlim ngawt ang chu! Chung lamah ni se sava an ri leh nak nak țhìn bawk a, thãwm dang a awm lêm lo bawk nèn, thing kûng nghènga țhu chuan ka maimichhîng a, sava thãwm chu ka ngaithla ta reng a.
"Che sawn miah suh?"
Ka meng nghâl zawk mai! Min ti phu chiang viau nain ti lang lo tùrin ka inthunun hrâm hrâm thung a, thâwk la vakin ka inhùm ruh a, chutah, ka bulah chuan eng emaw ni hi a rawn ri zui ta dawt dawt a, ka che sawn lo ngam teuh lo, ka zuang sawn dâwrh mai a ni.
Thil thleng chu mit khap kár lek ang mah ni se ka thil hmuh avàng chuan ka thin phu chu rang zual nghâlin hlauhna avàngin ka kaiza thâ a khùr nghâl dar dar mai, rûl a ni, rûl lian tak chu ni lo mah se ka hlau tho, ka ngainat theih loh leh hmuh apiang pawh that zêl se tih ka duh laiin kei erawh chuan thah ka ngam hauh lo thung ang, a takah ka la hmu hauh lo nain a tak lo pawh hi ka hlauh loh phahin ka ngainat phah chuang lo.
Hla deuh taka kal sawn pah chuan," Ka lo hre miah lo a nih chu, a mak hlê mai!" ka han ti a, ka aw chhuak chu ka duh lo kher mai, thunun ka tum viau nain a khùr deuh tih erawh ka hre chiang hlê a, ka thin ni se a hma aiin a phu rang tulh tulh ni maiin ka hria; mahse, inthunun tum tak chuan ka la inhûm ruh reng thung.
"A hlauhawm tawh loh," a hma ang chiaha aw thûm dût chuan ti lehin rûl a vuak hlum, a mei lam la che ngawlh ngawlh chu a chemin a pir kãng a, a kal sawnpui nghâl daih mai. Ka en zui deuh reng ringawt! Lo kal lovin kha rûl khân min chuk ta se, engtin nge ka awm ang? Ka thi ngei ngei ang chu! Zànah ka awmna Rûnahte khân lo lût ta se.... Harh chhuak thutin ka ûm zui ve nghâl a, a kal chak phian lehnghâl a, ka tlãn deuh dàwr dáwr a ni ber.
"Ka pu, ka lãwm e," ka ti phawt a, a kal reng tho avàng chuan zui ve zêlin," Heta thawk hi i ni ang maw? Heng lai vêlah hian rûl a tam rêng rêng em?" tiin ka zâwt leh a, ani chuan," Tam lo," a lo ti leh mai a, a țawng chhuak chu nèlawm viau lo mah se ka luhlul ka chhuah lui ve tlat a, biak chhunzawm zêlin," A nih leh, zànah ka awmnaahte sâwn a lo lût thei ang em? A hlauhawm viau lo'ng maw? Rûl hlauh tùr ang chi, entîr nân damdawi han phul kual mai tùr ang chîte hi a awm thei ang em?" ka ti leh a.
A ding ta a, kei pawh ka hah deuh avànga thaw deuh hap hap chung chuan ka ding ve nghâl a," Rawn la la," a tih sup chuan," A hlau tak tak ang em?" tiin ka dîlchhût leh rih a, rawn inher meuhin min rawn en ta rùn mai. Tlêmin ka tawlh hnung deuh hret a, min en dàn chu min ngei hmèl ka ti dâwn nge ni, a nin hmèl ka ti dâwn zâwk? Rilruah inthiam lohna ka nei deuh hlek a, thil ka zâwt a, min chhâng a, rinhlelh hmèl takin zawhna ka siam lehlawi bawk a.
"Englo a nia, zànah ka mutnaahte an lo lût thei a, min chuk ang tih ka hlauh vàng a nia," ka ti leh ringawt a, a hmêl nèlawm lo leh bawrchhawr zet chuan a ti lang nèlawm loh zual a, chumi belhchhah tùr lah chuan a inzuah buk angreng hle a, lukhum a khum bâkah puanin a lu chu a la khuh lûk zui bawk. Hna a thawk nasa a ni tih a vun sen uk kharh ațang chuan a hriat theih a, ni e, a thawk nasa ang, heta a thawh chuan thawh tùr a tam dâwn êm asin. Thing, thlai zawng zawng leh pangpârte hi a enkawl vek ang a, tui pêk an ngaih hunah a pe leh ang a, hna lah chu ni sa hnuaia thawh châng a tam zâwk ngei bawk ang.
A țawng thei ta lo emaw tih hnuah," Min zui rawh," a ti nghut a, a kal țan leh ta a, hmui pet fan fanin ka en reng phawt a, a hnuah ka zui ve ta chauh a.
Minute thum vêl zet kan kal hnuah in lian vak lo pakhat kawtah hian a rûl pir chu leia theh thlain inah chuan a lût zui ta a, ka ding deuh dat phawt a, ka lût ve ang nge lût ve lo ang tiin ka rilruin ka inhnial leh rih a; mahse, Rûl hlauh kha ka mamawh bawk si a tiin inngaihtuah rei lovin muangchâng chuan ka lût ve ta a.
Lei țha leh bungrua eng ilo dah khâwmna in a lo ni a, a chhûng rim pawh a danglam nghâl zar mai. Ka hnar ka hup ringawt a, ani chuan ip vâr pakhat ațang hian damdawi eng emaw phut vâr hi polythene lian lo têah hian a lo țhãm chhuak mêk a, Rûl hlauh chu a ni ngeiin ka ring.
Min pêk mai ka ring deuh a nia; mahse, min pe ta mai lo chuan min kal pèlin amah chuan khaiin a chhuak zui vut a, ka zui ve ringawt bawk. A kal zêl a, a kal chak êm avàng chuan a hnungah tlãn titihin ka zui ve zêl a, ka thlenna Rûn bulah chuan a ding ta, hah thaw hap hapa ka din ve hnu chuan," Kha lai deuhah khân lo awm sawn rawh," a rawn ti leh sup ringawt a, engtizia nge ni? Rûl a hmu leh chu a ni êm lo'ng maw? A lo nih tâk hlauhin, ka kal sawn rang khawp mai.
Thil phut vâr chu amah chuan in ban leh a bul vêl leiah chuan a phul ta țhet țhet a, min awm sawntîr tê tê a, Rûl a hmu leh ta emaw ka lo ti hman asin le. Hetiang phul te mai mai chu ka thiam ve reng, ka thiam a ring lo nge maw ni zâwk ni, a ni ngei ngei ang. Eng damdawi tak chu ni ang maw? DDT a ni thei mai ang em? Mahse, lo ni ta se, a hlauhawm viau a ni lo'm ni? Ani lah saw chuan a kut lâwngin a khawih mai bawk si a, a hlau lêm lo a ni ngei ang.
A phul zawh chuan a kal sawn zui leh nghâl daih a, a liam tùr chu," Ka lâwm e," tiin ka han au zui lawm lawm a, a kal lai chu a tìm deuh phah eih chuang lo, chu mai ni lovin hawi pawh a rawn hawi lët lo hrim hrim. Min rawn chhàn lêt kher chu ka ring lo sa hrim hrim a; mahse... a, a beng a lo chhêt deuh pawh a ni maithei a ni.
Tih tùr a awm loh êm avàng chuan Rûn chhûngah lûtin tukverh ka hawng sauh sauh a, mu mai mai pah chuan Angaihi thil ziah chu ka chhiar leh a. Rûl hlauhna khawvêl ațang chuan Angaihi khawvêlah chuan ka chêng leh ta rih a, a chét chhiatna a ziah chuan ka nuih a tih zat rualin amah nèn chuan inhmeh lo reuh ka ti, a chhan chu ani hi chu a felin a chê pawh a bu ang thlap thlap, chét chhiat pawh nei ngai lo ni mai khân ka hre ţhìn si a, a thil ziah lah chu dâwt a nih ka ring chiah bawk si lo va, kan hun hman dunte ka han ngaihtuah a, ka ngaih a zual leh ta vawng vawng mai.
"Angaih, i va ngaihawm tak!! Ka va ngai tak che êm!! Ka la mamawh tehlul che nèn, ka malzia hi aw...min hmu tiraw? I bula awma nuih leh hawk hawk ka va châk tak êm! Ka ngai ngawih ngawih che a ni," tiin ka phun sap sap a, ka mitthlaah a hlim nui lai hmêl ka hmu a, nui sen sen chungin a țawng siam siam țhìn a nih kha.
Angaihi hlîr mai ka ngaihtuah chhuah leh tâkah chuan pâwna chhuaha tei kual vêl pawh ka phûr tawh lo va, ka mu ta reng a, a chângin ka mittui a tla a, ka tâwt up up reng mai. Tlai lamah pawh chuan eirawng bâwl peih lovin ka rilru ka kàwm a, hun kal tawhah ka chêng a, Angaihi nèn kan hun hman ațangin Benson-a nèn kan hun hman lamah ka kual leh a.
*MI Ã HIAN THIL SAWI NÂN A KÂ A HMANG ȚHÌN A, MI HMANGHRIA ERAWH CHUAN A THLUAK A HMANG A, MI FING ERAWH CHUAN A THINLUNG A HMANG THUNG ȚHÌN*
Ngaihnawm
ReplyDelete