☆DOZER☆ - 3 By Dingdi Pachuau

☆DOZER☆ - 3 By Dingdi Pachuau

Benson-a nèn hian kan inhriat tirh ațangin kan induh nghâl mai bík lo, ka hriat tirh phei chuan bialnu kawp lai nei a la ni nghe nghe. Bialpa ka la nei ngai lo va, mite ang thovin star erawh ka nei ve țhìn tho, a rûkin Benson-a pawh hi ka star ve khiau a; mahse, ka star a ni tih hi a hria ang tih erawh ka hlau thei viau thung. Bialnu nei lai a ni a, lo star ve ngawt pawh kha țha ka ti lo a ni. 

Hmuh tam loh tum viau țhìn mah ila eng emaw tih khâwm neiin Mizoho kan inhmu khâwm lét lét a, Benson-a lah Welfare lamah a lo inhmang ve bawk nèn, a phusa pâwlah a țang lo thei lo va, hmuh zin loh theih pawh a ni lo.

A hmêl țhain a fai êm êm reng a, ka rualpui nulât hre chho mêkte nalh tih tâwk tùr chiahin a pian a nalh a, a inkhaithlîin vun ngo a ni bawk a, mi zîngah a hmêl hi a langsàr nalh ka ti lo thei lo, kei tih loh mi dang pawhin an lo star ve țhûm tho tih a hnu daihah ka hre chhuak a, tu mah ka dem lo, a chhe lo ve êm bawk a ni, a hmêl leh pian chawih tùr lah chuan a inthuamnain a zir thei êm êm bawk a, star rawn a ni chu thil mak a ni hauh lo.

A bialnu pawh a inchhuang ve thei viau rêng a ni. Mi zîngah pawh hian an inkawp a ni tih a hriat loh theih loh, a bânah a vawnsak chial reng a, a duh hliah hliah tih a hriatin hauh pawh a hauh viau a ni. Kan hmuh lai ngeia a han nêk deuh salh salh țhìn phei hi chu ka ngei tâwk a lo tling ve țhìn viau lehnghâl a, sawi chhuak chuang miah lo hian ka lo thinrim ru țûng țhìn a ni.

Hun a kal a, bialpa ka neih ngai loh vàngin ani bialnu nei lai lehnghál star chu hrehawm hi ka ti ru ve țhìn khawp mai a; mahse, han star loh ngawt tum mah ila ka star tho bawk si, ka rilruah a châm veng veng țhìn. Ngaihtuah loh ka tum pawhin ka mitthlaah ka hmu ve ziah a, zàn mut dáwnah leh zîng thawh hlima ka ngaihtuah hmasak ber țhìn leh ka mitthlaa hmêl lang hmasa ber pawh amah Benson-a ngei chu a ni.

Zan khat chu rin loh lutukin a message ka dawng ve ringawt mai a, tu nge a nih ka hre chiang bawk si, min rawn thawn sual emaw ka ti hial nghe nghe, a âwihawm loh rum rum rualin thinphu a rang nghâl viau bawk.

Amah a ni tih ka hre nghâl chat lo thei nâng, a number ka nei ru khiau tlat a ni, save kher lo pawh ni ila a number hi zawng, ka thluakin a hre hnehsawh ve lutuk tlat, number dang ka chhinchhiah theih loh tehlul nèn, ka number ngei pawh hi miin min zâwt ta se, ka sawi nghâl zawt zawt thei hauh lo a nia.

*Teruat, thil pawimawh deuh hrilh duh che ka nei a, tun Saturday hian ka hmu thei che ang em?*   tiin.

Ka number a lo nei ve hi chu ka hre thiam thei mai lo, eng atân nge a lo neih ve ni? E, heta Mizo awm zawng zawng hming leh number hi a nei vek ngei ang chu. Chu vàng chuan ka hming pawh a hre dik chat a nih chiah hi; mahse, eng atân nge min hmuh a duh? Thil tih sual ka nei em ni? Ka neih àwm ka hre lo. Chuan, thil min hrilh tùr pawh chu lo nei ta teh rêng se, tunah  phone-ah pawh hian a sawi theih reng loh em ni? 

*Eng nge ni ta? Phone-ah hian a sawi mai theih lo'm ni?*   tiin ka chhâng lêt ve ngawt a, tu nge a nih ka hre saah a ngai ve ngei ang chu.

*Sawi mai theih loh, hmaichhan ngeia hrilh che a ngai, a pawimawh riau a*   tia min rawn chhàn leh chuan han chhàn leh dàn tùr pawh ka hre tawh lo, a pawimawh viau bawk si chuan ka hmuh ngei a ngai dâwn a ni, hmuh hreh teh mah ila a rük tak chuan phùrawm chu ka ti ve tho bawk a.

Kan inhmuh nî a lo thlen hma ni chiahah Angaihi a damsam lo tlat mai a, a tûkah pawh chuan a chhuak peih ta lo chiah rêng a, min kalpui se ka tih tehlul nèn, keimah chuan ka kal ta a, a hmun kan ruata ka va thlen chuan ani chu a lo awm vàng tawh nghe nghe a, a chhiat lohzia mai chu a! Mizo mipa hmêl țha tak hi chu a ni ve chiang alawm.

A rûk tak chuan nuam ka ti a, chutih rual chuan ka zãm viau thung. Eng eng emaw sawia kan țhut muan deuh  hnu chuan," Eng nge i eiin i in duh ang? I duh duh a ni mai," tiin a han nui pah bawk a, kei chuan,"Ril pawh a la țâm lo," ka lo ti sap a, ani erawh chuan," Khua a lum deuh sia, a vawt lam in phawt ang aw," tiin in tùr lam chu a order zui ta nghâl a.

Kan nghah chhûngin kan hostel chanchinte min zâwt luam a, țha takin ka chhâng zêl a, hetiang mai mai min zâwt tùra min hmuh a duh hi chu ka ring chiah lo asin, eng atân nge min hmuh a duh chiah ni?

"Teruat, bialpa i nei em? I nei lo niin ka hria a."

Mak ti zetin ka en reng ringawt! Chuti teh thuta a rawn sawi chhuak chuan mak min tihtîr bâkah ka rin loh lutuk zawhna a ni chuan min ti hamhaih zual a, chhàn pawh ka chhâng thei lawk lo rêng a ni.

"I nei lo... tiraw?" Mahni inrintâwk hmel taka a rawn tih nawn leh chuan mak tihna ațanga harh chhuakin ka hawi sawn ta chauh a, zahna chuan min rawn tuam hlup hlup nghâl bawk. Ka biang chu a sa ham ham a, a sen nasa ngawtin ka ring a ni.

"Aih... ka nei lo," ti bah deuh nakin ka lu chu ka thing nak a, hriat nuam deuh hian a lo nui hak a," Ka hre dik chiah e!" a ti leh a, eng atân nge ka bialpa neih leh neih loh chu a hriat duh ni? 

In tùr a rawn thlen tâk avàng chuan țawng lovin kan in phawt a, a thil sawi chhuahin min la tih zah reng avàng chuan amah pawh en ngam lo chuan ka thil in lai chu ka en deuh reng a. Ani lah chuan," I thil in lai chu a hmuhnawm àwm ngar ngar hle mai," a la rawn ti zui a, min fiam tih hre tho mah ila za lo zet leh lài zetin ka nuih phah ringawt, a zahthlâk ve êm a ni.

"Teruat, ka duh che a ni. Chu chu hmaichhanah ngei hian hrilh che ka duh vàng a nia," a rawn tih chuan zahthlâk ka va ti zual tak! Chutih rual erawh chuan hlimna ka nei tel pah bawk a; mahse, a ti mai mai a nih ka ring nghâl bawk, min duh hi ka ring thei lo, bâkah, bialnu a nei bawk tak alawm, a tihchi loh lutuk!

"Joicy nèn kha chuan kan inzui tawh lo aw, i lo hriat loh tâkin. Hnaisai lo tak chu ka ni bîk lo aw, ani nèna la inkawp reng chu ni ila ka duh che tih thu pawh hi ka hrilh hauh lo ang che; mahse, kawp lai ka nei tawh lo va, ka duh thu hrilh che hi a thiang tawh a ni, ni lo'm ni?" a ti leh zung zung a, ngawi rengin ka lo ngaithla ve tawp a, ka zah êm avang chuan țawng ve  pawh ka tum lo, bâkah, sawi tùr pawh ka hre lo. Joicy nèn chuan engtik lai khân nge maw an lo ințhen ni? Ani khân a duh hleuh hleuh viau a nih kha, a chhe lo thei nasa bawk si, eng titiha ințhen nge maw an nih ni?

Amah ka duh ve leh duh ve loh min zâwt miah lo va; mahse, chumi hnu ațang chuan min rawn text ta zauh zauh a, chutah pawh chuan min zâwt chuang lo; mahse, min duh thu a rawn ziak nawn fo thung. Hun a kal zêl a, biak ngeia min rawn biak hnuah erawh Joicy nèn an ințhen daih tawh tih leh bialnu a nei lo ngêi a ni tih ka hre chiang ve tawh bawk a, ka duh a ni tih chu ka thup buai duh ta bîk lo va.

Kan han inkawp chho ve ta a, Angaihi pawhin min duhpui viau mai, thlà a han ral chho a, a hmaa ka lo hriat dàn ang aiin a lo la fel daih zui a! Vànnei ka inti tak tak a ni, ani angin kei ve mai min han duh ve êm êm mai chu nuam ka ti a, kim ve ta riauin ka inhriat phah nghe nghe. Tu mipa mah hian kei ve mai, fahrah, nu pawh nei lo, chhûngte pawhin an tlawh ngai loh leh chhûngte pawh be vak ngai lo hi min duh êm êm theih ka ring ngai lo; mahse, Benson-a chuan chu chu a rawn țhiat vek a, ka chanchin hre vek mah se min duhzia a lantîr hreh ngai lo. Hostel-a awm ka nih avàngin duh hun hunah min rawn hmu thei bîk lo va, kâr tàwpah erawh ngèi ngéiin kan chhuak dùn ve ziah thung.

College ka la kal a, ani a chhuak tawh thung a, eng eng emaw exam buatsaih pahin a inhlawh mêk a, sum pawh a nei thei viau mai, kan chhuah hi chuan thil min leisak ve ziah a, ka tân ui a nei ngai lo, min leisak fo avàng chuan kei pawhin ka leisak ve zauh zauh bawk. Kan awm dun ve fo a, mi sawi theiha awm ka duh loh avàngin kan Mizopuite bulah kan awm vak ngai lo va, eng emaw function pawimawh deuh kan hman nîah erawh min hmu dùn lo thei bîk lo va, kan inkawp a ni tih pawh an hre har ve hlawm rêng a ni.

Mipa ka fawh hmasak ber leh min fâwp hmasatu ber a ni a, ka bialpa hmasa ber niin ka hmangaih hmasak ber, he khawvêl mi tam tak zînga Angaihi leh ka pa tih loha min hmangaihtu, hlim taka mahni chauh pawha nui theia min siamtu a ni a, ka tân chuan theihnghilh a har dâwn lutuk.

Angaihi pawhin min duhpui ve viau a, a chhan pawh Benson-a hian min ngaihsak a, ka chanchin zawng zawng a hriat vek tawh vàng nge ni, Angaihi nèn pawh chuan an inpawh phah ka ti mai, min khawngaih dùn a, min hmangaih dùn bawk a, khatih hun lai kha chuan tuna ka chunga a thil tih hi a ti duh ang tih ka ngaihtuah phâk loh chu sawi loh, mumang lamah chhetê pawhin khatiang lam kha chu ka hmuin ka mangphan ngei hek lo.

Hun kal tawh ngaihtuahnain min lo àwi muhìl a ni chêk ang chu, ka rin aiin ka mu tui phian zui a, ka harh leh meuh chuan khua a lo vâr tawh! Tho vatin ka inphih fai a, thuamhnaw inthlâkin zîng boruak hîp tùr chuan Rûn chu ka chhuahsan  zui ta nghâl a. Zîng boruak thiang nuam zet leh thianghlim zet chu duhthawh takin, ding meuhin ka han hîp lût vang vang phawt a, zîng kár boruak thiang nuam zet leh sava hräm deuh nak nak chu inrem ka ti, maimichhîng vang vangin boruak chu ka hîp lût leh kâwk kâwk a, ka hma lam kawng lang phei zuiah chuan ka tlän țan ta nghâl a.

Kawng zâwl hlír a ni bawk a, thui ve tâwk tak ka tlàn hnu pawh chuan ka hah viau hran lo, ka hah viau ka rin tehlul nèn, ka tlàn chak lêm loh vàng pawh chu a ni maithei. Ka hriat theih tirh ațanga zînga ka vawi khat tlànna a ni ngei ang, ka rin ai daihin a lo nuam lehnghâl a, hetiang hian zîng boruak hi a lo nuam thei ang tih pawh ka ngaihtuah pha ngai hauh lo. 

Thui ve tâwk tak ka tlàn hnu chuan dingin ka han phar kual vêl a, ka taksa ka pawt fân kual vêl a ni ber mai. Ka kâwng ka her kual vêl lai tak chuan ka piah deuha thãwm ri chu hriain ka hawi nghâl vat a, mi sual tu emaw a ni thei tih ka ngaihtuahnaah a lo lût zawk si a, a nih loh tal pawhin rûl a ni thei tlat; mahse, a ni lo ve ve hlauh mai. Huanpu ka hmuh tawh leh ka biak tawh ngei kha a lo ni a, min rawn hmu ve ngei ang, ka lam panin rawn kal miau hek le, a thingțang tèl khâwm put lah chu a rawn pu hnehsawh khawp lehnghâl a.

"Ka pu chu i va thawk chhuak hma ve!" tiin ring deuh hlek hian ka lo bia a, a beng chhêt pawh ni se tuna mi kha chu a hre thei ngei ngei ang. "I put rih hmèl sia, ka lo chhâwk țhen dâwn che em ni ang?" ka ti leh a, làwm thu sawi nân ka puih ve a ngai alawm, tûnlaiah tu mah a thlàwnin kan inpuih theih tawh loh hi.

"Rûl chu a lo kal lo maw?" a rawn tih chuan ka en ta vat a, lu thingin," Aih, kal lo, damdawi kha a țha viau a nih ka ring. Chuan, ka lãwm e, i thing put kha a rit àwm si a, khawi ka lo chhâwk țhen ang che," ka ti a, a rih chu ring tho mah ila chhâwk țhen a duh erawh ka ring chuang lo, ka zo lo ang tih a ring thiam tho àwm si a, ka han tikhawmawi ve a ni mah.

"I piah deuha thing kûnga thing ro ka tun saw, pû la, min zui rawh," a rawn tih thùm dût tâkah chuan a kawh lam chu ka en ta vat a, thing kûng nghènga thing sei ve deuh hlek lo intung ka hmuh tâkah chuan chhâwk țhen ka lo tum kha ti sual ka inti ru hnuhnawh khawp mai, a rih hlauh phei chuan aw... 

Ka hmui pàr lutuk vàngin thing tlâwn ro ka put phah ta chu a nia, a la rit hrep zui, ani lah chuan rit ka ti ang nge ti lo ang tih lam ngaihtuah hauh lo chuan thingțang tèl kháwm a pû tih pawh hriat loh hian a kal vâwk vâwk mai si a, ka hahzia mai chu, amah hmu phâka kal ve ngei ka duh bawk nèn, chhâwk lam chu vawi khat té pawhin ka sawi ri tawh lo chiang ngawt ang!

Vawk chaw chhumna in ni àwm tak bulah min lo nghâk a, min hmuh lai chuan hah lo àwm tak leh rit tih loh ve hmèl tak chuan ka pu lui hrâm hrâm a, a bul ka thlen hma chuan min lo lâksakin zo zet hian a kut vei lam chuan a keng vêl mai mai a, rit a tih loh hmèl lutuk leh keiin rit ka ti viau si chu ka ngei, ka hahpui tehlul nèn.

Vawk note duhawm deuh deuh ka hmuh tâkah erawh chuan ka hahna zawng zawng chu lâk bo ang vek ni maiin ka hria! An va duhawm hlawm tak! An vár sen no chek hlawm nèn," An va țha reuhin an va duhawm hlawm tak!!" ka ti chùl nghe nghe a, vawk note chu a zât ka han chhiar zui a, ka chhiar theih chin zawng pawh 25 lai a ni, dem dem hlawm reuh chuan. Engtin nge a enkawl le? Huanpu-a hi a lo taimain a lo thawkrim viau a nih àwm hi.

"An chaw a hautak ve dâwn a nih hi, a hautak ngawt ang," ka ti leh a, ka țawng a ni tih a hre lëm lo nge nia țawng a tum ve lêm lo zâwk, vawk note chauh chu a lo en ngur a. Ni dâwn tak, a beng a chhêt tih ka lo theihnghilh leh tawh a ni.

"Ka pu, tui in tùr hi a awm hnai em le? Ka tui a hãl riau mai," ring deuh zâwk hian ka ti leh ta a, ka biakna chu a hre ve ta chiang, rawn hawi chhuakin," Min zui rawh," a ti ve ta sup a, inherin a kal zui ta nghâl a.

Rei lo tê hnuah in pakhat, pâwn lam ațanga han en rêng rêng pawha nuam tùr tih hriat tak hi kan thleng thuai a, a kal chak avànga ûm phâk tuma kal vâwk vâwk ka ni bawk a, ka hah leh hman dèr tawh nia, a upat ve tawh àwm nèn, a speed a la sâng țha viau a ni.

In chhûngah chuan lûtin filter-a tui chu ka in ta khawlh khawlh a, ka va in tui teh rêng êm! No hnih lai ka in hnu chuan duh tâwkin chhuah tumin ka inher a; mahse, in chhûng awm dàn leh chei dàn chuan ka mit a la ta tlat pek a, en kualin ka hawi kual leh rih a, a hahdamthlâk chu thuhran, a hmuhnawm ka ti tawp. Amah Huanpu-a ang lo takin a fel faiin thil awm rêng rêng chu a ni thlap mai a, changkäng tak tia sawi tùr chu a ni lo nain in chhûnga thil awm chu a common lo hlawm khawpin ka hria.

*I NUNHLUI KHA INSAL BEHTÍR RENG DUH MAH TA CHE, KHA KHA CHU I TÂN ZIRLAI MAI A NIH KHA, DAM CHHÛNG TÀN IN TÙR NI LOVIN*