☆DOZER☆ - 4 By Dingdi Pachuau

☆DOZER☆ - 4 By Dingdi Pachuau

"Thingpui ka siam che," ti thûm dût ri ka hriat tâkah chuan ka inher ta thuai a, in chhûng en kuala ka lo hawi vual vual mai chu ka inthiam lo deuh nghâl zat mai, bâkah, thingpui min rawn siam lehnghâl a nia, thing ka putpui vàng kha a ni thei ang em? Làwm thu sawi nân min rawn siamsak ve a ni ngei ang.

Tlàwmngai rilru viau mah ila," Ka lâwm e," ka ti ta zâwk a, thingpui no hnih leh eng emaw ni hmeh tùr ni àwm tak hi a rawn chawi phei tel bawk a, eng nge a nih ka hre hauh lo nia, chhang chi khat a ni maithei. A thingpui siam rim lah chuan ka hnâr a verh phian a, sawhthîng leh eng eng emaw a pawlh kual chiam a ni ngei ang, ka in tùr insiam dâwn ni ila ka in peih hauh lo ang le.

Thingpui chu a tui ka ti reuh khawp mai a, chutiang chu ka in ngai loh vàng ni maw, a lunglènthlâk ka ti ru tlat pek a nih chu. Hmeh tùra a rawn chhawp erawh a thlum tui viau nain lem hun hriat thiam a har bâkah lem a har ka ti a, thingpui in zêl loh chuan ka lem țha thei miah lo, a tui tehlul nèn a tui tùr ang aiin tui ka tih loh phah, hriat thiam a har êm mai, thingpui no ka chawi reng mai a ni.

Ka dîlchhût ve hrim hrim a, kan thil ei chu eng nge a hming ka'n zâwt leh hrâm pek a, ani chuan," Kâwlbahra," a lo ti mai a, a hming chu ka hre ve tawh chuan ka hria a; mahse, ka lo la ei ngai lo a nih hmèl,   ka zâwt ta rau rau, dîlchhût leh deuh teh ang tiin," Lem har i ti ve tho em? Hetiang tùr rêng hi em ni?" ka'n ti lehpek a, ani chuan," Lem har i ti a ni maw? Thingpui kha a la awm țeuh a nia," tiin a tho thut a, lem har a ti ve lo nge ni, a thingpui a la awm țeuh bîk a nih chu.

A rawn lêt leh chuan thingpui min rawn pêk belh a nih chu! Polite lo taka lo hnial ka duh chiah si lo, ka va puar dâwn tak êm! Tunah pawh hian ka puar nuam tâwk viau tawh a nia! A pawi lo, ei țeuh mai teh ang, chaw chhum ka save thei maithei asin.

Kâwlbahra ka eia thingpui ka in zawh meuh chuan ka puar tak zet a ni, ka dul chu ka zût ka zût mai a, hetiang chuan tlàn leh pawh kha a chi tawh miah loh ang, ka luak mai ang tih a hlauhawm zâwk a ni. Ka chhuah dâwn chuan làwm thu ka han sawi nual a, mak chu min ti ve ngawt ang, ka ei tam nasa mai si a.

Ka inpal khut a, ka tlu bawkkhup țhuai mai. Ka puar bawk nèn, ka khûp nâ avàng chuan han bawh deuh riha țap chiah lo pawh ni ila han awm deuh vang vang ka duh tehlul nèn, nâ ti lo ang takin ka tho thuai a, Huanpu-a'n min lo en tâk hlauhah ka ti a ni, ka hawi zak zak a; mahse, ka hmu lo hlauh. Ka khûp chu ka'n en chhin a, a vun chhia chu lo pilh nian niin, a thî ser ser bawk a, ka inbual hunah a thîp ngawt ang chu. 

Tlàn leh chu khawi lam, ka bãi ta saih saih a, tih mar a nawm loh êm avàng chuan hnung lamah ka khai ta reng mai. Hnawih tùr chi lah chu ka lo inring dèr si lo va, a buaithlâk khawp mai.

"Angaih, en teh, ka tlâwzia chu i hriat kha, ka inpal tlu lehpek a, ka khûp hi ka ti mar thei lo, a mar chuan a hrehawm lutuk! Nang chu awm la, min enkawlsakin damdawite min ngaihtuahsak leh ang a... Aw, ka ngaih che hi a va zual țhìn tak êm!!" Ka khûp thîp hlur mai chhêm hoh hoh pah chuan ka ti sap sap a, kan têt deuh laia kan school-in annual sport kan neih laite chu ka mitthlaah a rawn lang chuai chuai a. Item danga ka tel ve loh zêl avàngin Relay race-ah kan house aiawhin house leader-in min telh ve a, ka hnial ngam si lo. Keima tâwkah chak takin, hah thaw hlawp hlawpin ka tlãn ve a, thlen dâwnah ka tlu ta pek a nih kha; mahse, line ka va pelh ve hman avàngin kan house chu kan chak loh phah ta chuang lo va, pahnih erawh kan ni ta chauh a ni. Ka khûp a pilh nasa a, Angaih'n hnawih tùr min lo lamsak vat a, hnawiha ka khûp chhêm hoh hoh pah chuan tlãn chak min tihzia chu min hrilh pah malh malh a.

Hmeichhe țawngmawh leh harhvãng lo tak ka ni țhìn a, Angaihi nèn kan inkawm chhoh hnuah erawh ka țawng duh chho ve ta deuh a, ka țawng duh tâk deuh hnuah ka dîlchhût chho leh viau bawk; mahse, Angaihi bulah bâk a ni lo, Benson-a nèn kan inkawp hnu khân ani bulah khân ka dîlchhût leh deuh bawk a, min ning thei viau nghe nghe a nih kha," Dïlchhût viau zêl suh," tiin fiamthuin ka chalah min pensak țhìn, ka haw ngai lêm hlei lo va. Tlâw erawh ka tlâw lutuk bîk lo chuan ka hria a; mahse, eng emaw châng zeuh hian, ka nervous chângte hian ka che buai leh țhìn.

Benson-a nèn kan inkawp hnuah pawh vawi khat chu ka che chhe leh a, kan ințhen hma lawkin a ni nghe nghe. Ka in luahah a rawn lêng a, ei tùr ka siamsak ve e ka tia, a țhutna bul dawhkàn lam pana tray-a ka châwi phei chu chhuata puan chhe tla chu ka rap fuh palh a, ka tlu ta, ka thil siam chu boruakah ka vawrh chho vek a, ka thingpui siamin min buak vek bawk, ka țap lo chauh a ni. Ani lah chuan nuihza insûm tak hian min rawn kài tho a," I duh tâwkin min nuih rawh," ka lo ti hlak hlak a, ka nuih a zat ve loh avàng chauh chuan min nuih vak ngam lo niin ka hria. A hnuah erawh kan nui dùn vak vak a, ka tih dànte chu zirin a nuih zã zâah ka la țang zui a.

"I awm em?" tia kawngka kik rî ka hriat chuan Huanpu-a âw a ni tih hriain," Awm e," ka ti a, bãi saih saih chuan kawng chu ka va hawnsak a, hnathawh thuamhnaw hain a lo lût a," Khawi i khûp chu," tiin, damdawi hmeh chhuah chi hi a lo keng reng niin, a han hmet chhuak zui a.

"Ka inhnawih thei--" ka tih lai chuan rawn kûn hniamin ka khûp pilh chu a rawn hnawih nghâl mawlh mawlh a, a thîp nghâl vát vát avàng chuan ka inrin hmain ka sî vak a; mahse, hre chhuak thutin ka hmui chu ka hup ta vat a. Ani pawh chuan," A thîp deuh hlek ang," a ti dût a, a chhêm zui nghâl a, a thîp pawh chu a zia deuh huai thei.

"Hei hi i inbual zawhah i hnawih țhìn dâwn nia," tiin a ding a, damdawi chu dawhkànah dahin a chhuak zui ta nghâl a," Ka lãwm lutuk e, ka pu," tiin ka au zui a, a hre zui kher lo maithei, a beng kha a chhêt deuh si a. Chu pawh chu ni se, a làwmawm lutuk tho e. Engtin nge ka khûp ka ti nâ a ni tih a hriat le? Ka tlù kha min lo hmu ru reng tihna a ni ngei ang, ka pu mai mai chuh! Tlangvâl chu la ni phei se chuan a va zahthlâk dâwn tak! Putar a ni tawh hlauh chu a zia zia a awm e.

Kekawrtluan hâk theih hek loh le, ka khûp chungah ka thlep chho tûng a, a hnuah erawh tih dàn hre chhuakin ka kekawr chu a khûp chungah chemtêin ka tan ve ve ta tawp a, rual lêm lo mah se a zia ta phian mai. Zànah rizai ka sinpui ngam lo va, ka ke ding lam chu zankhuain ka dah chhuak tawp mai a ni.

Ke a nat tâkah chuan tih tùr a vâng ta khawp mai a, awm mai mai ai chuan tiin tiang ka hawl a, chu lai hmun vêl chu zàwi muangin ka fang kual leh a, thlai chìn leh pangpâr chi hrang hrang leh thing kûng sâng tak tak hmuh chu a nuam ve hrim hrim, zalèn taka hun hman leh thãwm dang bengchheng awm miah lova hetiang hmun reh reih rawih hi ka thlahlel a ni, boruak hi a thiangin a hrisêl hrim hrim bawk. Thing buk hnuaiah ka țhu a, chutiang chuan nî chu ka lêng ve leh mai bawk a. Zànah erawh ka khûp chu a na zualin ka hria, damdawi kha ka ngeih vak lo em maw ni le? Damdawi dang zawn tumin phone ka han on a, signal a lo awm rêng rêng lo niin, eng nge a awmzia le? Ka phone hi a chhia chu a ni lo maw le? Ka kal hma kha chuan a chhiat loh tawp kha.

Ka tãi nã chuan min ti awm nuam lo angreng a, tui ka in tlêm a nih ringin ka han in țeuh a, ka inthiar hnuah pawh chuan a nuam hran chuang lo. Niminah pawh khân a na riai riai tawh ngei mai a, ka thil eiah puh tùr ka han zawng chhin a, chutiang chu ka hre hauh lo. Ka ngaihtuah zêl a, kei hi, ka period a hnai tawh zâwk em ni le? A ni lo ang, a ni thei lo, tûn thla țan tìrah khân ka period daih tawh kha; mahse, ka awm dànah hi chuan rinhlelh chi pawh a ni lo, ka âwmbáwr ka'n khawih chhin a, chuti tho a lo ni. Kei hi, ka period leh dâwn chiang mai, ka inring hleinem le! A va buaithlâk êm! Sanitary pads pawh ka keng lo hrim hrim. Phone signal awm bawk si lo, ka pu khân motor kha a nei ngei mai a, hire-in khaw hnai berah kal ta ila...

A tûkah chuan ka pu awmna lam pan chuan muangchângin ka inhawl chhuak leh ta a, ani hi a lo buai viau chuan a inthlahrunawm duh ngawt ang le; mahse, beisei chhin phawt ang, a thlàwn pawhin ka ti dáwn chuang lo va.

A in piah deuhah chuan lei hi a lo lài tâwrh tâwrh a, lane neiin a lài a, thlai eng emaw a chîng leh dâwn a ni ngei ang, ani hi thâ a lo la nei phian a nih àwm hi. Ti ila hna a thawk nasa a, tar chhia pawh a la ni lo va, thahrui zawng a ngah àwm êm mai, sâwng mai mai saw chu engah mah a ngai lo ang.

Ring lèng làwng hian," Ka pu, i va buai àwm ve a?" ka han ti a, ka nui pah bawk a, ani pawh a thil tih lai chu a chàwl ve dat mai, ka au ring bawk a, a hre ve chiang a ni; mahse, rawn hawi chuang lo hian," Buai lo. Mamawh i nei em?" a rawn ti thûm dût a. Ka pu finzia hi chu aw... ka țawng chhuak leh ka țawng thlûk dàn ațangte hian a lo hre thei em maw ni ka ti hial.

"A, lài zo phawt rawh, ka lo pui nghe nghe ang che," tiin a lam pan chuan ka bãi phei saih saih a, rawn hawi pheiin," A ngai lo ve, eng nge ni ta?" a rawn ti ve ta thung a, nula ke bãi sawih sawih, kekawr bùl tlâng sàwi zet nèn, min rawn en vung vung pawh chu a mak ka ti lo.

"I truck khân khaw hnái berah min hruai hman ang em ka tia, khaw hnai ber chu heta țang hian a hla viau em?" ka han ti zat a, a bul ka thlen chuan ani chuan a lei laihna hmanrua dah țhat pah chuan," A hla lo, mêl 2-a hlâ a ni," a ti a, kei chuan," A nih tak chu, lei hi lài zo phawt ila, rei awm pawh a ngai lo ang, thil lei lawk tùr pawimawh lutuk ka neih vàng a nia," ka ti leh a, a hmanraw dah chu han ban mai ka tum a, ani chuan," A hmanhmawhthlâk loh," a lo ti mai a, a dah sawn leh nghâl a, a kekawr chu a bêng fai thuk thuk a.

"Va insiam rawh, kan kal nghâl ang," a ti leh dût a, kei erawh chuan," Lài zo phawt ila," te chu ka'n ti khawmawi ve a, kan kal nghâl rum rum chu ka lo ring chiah lo ve bawk a ni. Ani erawh chuan min rawn kal pèl fua pah hian," Va insiam rawh," a ti leh mai a, a in ka ti mai, chu lam pan chuan a kal nghâl daih a. Ka en zui vang vang ringawt, insiam  tùrin min ti a, insiam dàn vak ka hre lo, tuna ka awm ang tawp hian kal chhuah mai ka tum asin, kekawrtlâwn ka ha thei hleinem; mahse, pawisa chu ka ken ve ngei a ngai ang chu.

Chak thei ang berin ka lêt ve a, ka purse ka la a, puan han bih mai tùr chu awm se chuan ka duh viau a; mahse, ka keng dèr si lo, towel han ken chhuah ngawt lah chu a tih chi hauh si loh a, ka awm ang chuan ka lo nghâk tawp mai a ni.

A truck țãwng lam ve tawh chu a rawn ri phei bup bup a, a truck nèn hian inhmeh ka ti tawp. Amah hi țawp deuh ni chiah si lo hian a inchei fai lo ve ropui si a, hna thawh thuam nèna inchei fai viau thu awm hek lo chuan, a truck țãwng ve tawh leh rawng khawk deuh nuai nèn hian an inhmeh êm êm a ni.

Kawnga kan tlàn lai chuan kan kalna tùr khua chu eng ang nge tih leh in eng zât vêl nge awm tihte ka han záwt ve luam a, ani chuan," In 100 chiah chiah," hriat chian hmèl tak hian a lo ti a, min chhànna chu mak ka ti deuh a, ka en hau nghe nghe. A kal ngun viau a ni ngei ang chu, a hriat chian hmèl êm mai.

"A nawm tham ve dâwn chu, a la thingtlâng ve deuh ang a, nawm pawh a nuam phian ang a," ka ti leh a, ani erawh chuan," An en duh viau che a nih pawhin mak ka ti lo ang," a lo ti daih thung a.

*MI I HMANGAIH TAK TAK A NIH CHUAN, A TIH SUAL PALH PAKHAT TÊ VÀNG MAI KHA CHUAN I THINLUNG I LAMLÉT HAUH LO ANG LE. I THIN CHU A RIM NGEI ANG; MAHSE, I THINLUNG KHÂN A LAM CHAUH A HAWI THO ANG*